Aokati 26–Tebetembwa 1: “Te Bwa Are Ara Tia Kabomwi”

Ereman 1–6

Ana boki Ereman e koroi ni kauoua te tokanikai ao taai aika a kananokawaki ibuakoia Nibwaite ao Reimwanaite. E moanaki ma te “kaangaanga ae korakora i buakoia ana botanaomata Nibwaite” (Ereman 1:1), ao kaangaanga a teimatoa n roroko ni kabutaa te rekooti. Ikai ti wareka taekan te waaki ni kakaitara n te tautaeka, te kaeng n iraa, ribakin te burabeti, ao te kainikatonga ao te aki onimaki ni kabutaa te aba. Ma ti kunei naba katooto n aron Nibwaai ao Riaai ao “korakoran bwainikirinaia mwakoroia te botanaomata ake a nanorinano riki,” are aki tii tiku ni maiu ma a maiu raoi n tamnei (Ereman 3:34). A kanga ni karaoia? A kanga n tiku ni korakora ngkai rikirakeia e a moanna ni kerikaaki ao ni bwaka? Titebo naba ngkana iai mai ibuakora ae tei ni matoatoa n te “angibuaka ae korakora” e kanakoaki te riaboro bwa “e na [oroira]”—man katean maiura “iaon te bwa are ara Tia Kabomwi, are te Kristo, Natin te Atua, … aan te kateitei are ngkana aomata a kateitei iaona ao aki kona ni bwaka” (Ereman 5:12).

Iango ibukin Reiakinana n te Mweenga ao n te Taromauri

Ereman 1–6

Te kainikatonga e kamaenakoai mairoun te Tamnei ao korakoran te Uea.

Ngkai ko wareka Ereman 1–6, ko na kona ni kunea bannan anuaia tenaan Nibwaite. Ngkana a raoiroi, e kakabwaiaiia te Uea, ao a maiuraoi. Imwiin te tai, a moanna ni kainikatonga ao ni buakaka, ni karaoi rinerine aika e na kairiia nakon te mate ao te kainnano. Imwiina a nanorinano ao ni kairaki bwa a na rairi nanoia, ao te Atua e a manga kakabwaiaia. Te banna e bon kaokiokia i bon irouna n tainako are a atongnga tabeman aomata bwa “okiokin te kainikatonga.”

Okiokin te “kainikatonga”

Tarai katooto n okiokin te katooto aei ngkana ko wareka Ereman 1–6. Aikai tabeua titiraki aika a na buokiko n ataa te banna aei:

• Tera kakoauaan te kainikatonga ae ko nooria ibuakoia Nibwaite? (taraa, te katooto, Ereman 3:33–34; 4:11–13). Iai aekan katootongan te kainikatonga ae ko nooria iroum?

• Tera mwiin te kainikatonga ao te buakaka? (taraa Ereman 4:23–26). Tera mwiin te nanorinano ao te rairannano? (taraa Ereman 3:27–30, 35; 4:14–16).

• Tera ae tangiria Ereman bwa a na uringnga natina mwaane? (taraa Ereman 5:4–12). A kanga uringakin koaua aikai ni buokiko n totokoa rikim ni kainikatonga?

Taraa naba “Mwakoro 18: Beware of Pride,” Teachings of Presidents of the Church: Ezra Taft Benson (2014), 229–40; “I Kainnanoiko Ngai,” Anene n Taromauri, nambwa. 13.

Ereman 3:24–35

Onimakinan Kristo e kaona tamneiu n te kimwareirei.

N Ereman 3, Moomon e kabwarabwara te tai ni kimwareirei ngke e kakabwaiaaki te Ekaretia are a rangi ni miimi naba iai taan kairiiri. Ni kaeti ma are e boboto am wareware iaona ni kiibu 24–32, n am iango tera are e kaira aron te kimwareirei anne? Tiaki ni kabane membwa ae a reitinako ni kimwareirei, kanga n aron anne. Ataa te kaokoro imarenaia aomata ake a kabwarabwaraaki ni kiibu 33–35. Tera ae ko reiakinna man aia katooto?

Kakaei reirei aika a onoti ae ko na maiuakin. Te burabeti ae Moomon e kabongana te kibuntaeka ae “ikai are ti a nooria” ni katuruturua kakawakin koaua n aron are e korei ni kauarerekei n ana Boki Moomon. N aron te katooto, tera ae e tangiria bwa ti na nooria n Ereman 3:27–30? Ngkai ko kamatebwai booki aika tabu, n tabetai ko toki moa bwa ko na kabwanina te kibuntaeka ae “ao ikai are ti a nooria” ni kaineti ma are ko a tia ni warekia.

Ereman 5:6–7

I kona ni karinea aran te Tia Kamaiu.

Warekan Ereman 5:6–7 e na kona ni kaunga nanom n iangoi aara ake ko anganaki, n ikotaki ma araia utu. Tera ae nanonaki n aara aikai nakoim? Ko na kanga ni karinei? Ma ae kakawaki riki, iangoia tera nanon ae ko na katoka aran te Tia Kamaiu iaom (taraa Moronaai 4:3). Ko na kanga ni karinea te ara ane e tabu anne?

Ereman 5:12–52

Ngkana I karika Iesu Kristo bwa aau, I aki konaa ni bwaka.

Tera ae nanonaki iroum ni “katea aam” iaon te bwa are ara Tia Kabomwi? (Ereman 5:12). Ko kanga ni kunea te kamanoaki man angibuakan te maiu iroun Iesu Kristo? Ngkai ko wareka Erema 5:12–52, ataia bwa e kanga Nibwaai ao Riaai ni kakabwaiaaki ibukin katean aia onimaki iaon te bwa are aia Tia Kabomwi.

Tabeman aomata a kunea bwa e rangi n ibuobuoki katamneian baike a kamatebwai iaona. Ni katamneia Ereman 5:12, ko kona ni katea rabwatan te auti ae uarereke iaon aekakin nako aan kateitei aika a kakaokoro. Ko kona ngkanne ni karaoa te “angibuaka ae korakora” man tauriia aona n te ran ao kabongana te iriba ni karika ukin te ang. Tera atatai aika ko anganaki ni katean aam iaon Iesu Kristo? Baikara riki bwaai aika ko reiakin man te witeo ae “A Secure Anchor”? (Gospel Library).

Te kibu 50 e taekina “ibukin korakoran te bwai ni kakoaua” are a tia Reimwanaite ni karekea. Warekan Ereman 5:12–52 e na kaira am iango nakon bwaai ni kakoaua ake e a tia n anganiko te Uea. N aron te katooto, tao “ana wirikiriki” te Tamnei ae Raoiroi e kakorakora am onimaki iroun te Tia Kamaiu (Ereman 5:30; taraa naba Reirei ao Berita aika Tabu 88:66). Ke tao ko a tia ni mena inanon te rootongitong ao n takarua n tang nakon te Atua ibukin korakoran am onimaki (taraa Ereman 5:40–47). Tera taneiai riki tabeua ake a tia ni buokiko ni katea aam iaon Iesu Kristo?

Taraa naba Russell M. Nelson, “Te Tembora ao Aan Maiun Tamneim,” Riaona, Nob. 2021, 93–96; Sean Douglas, “Kaitaraakin Angibuakan Maiura n Tamnei mani Kakoauaan Kristo,” Riaona, Nob. 2021, 109–11; Gospel Topics, “Faith in Jesus Christ,” Gospel Library.

Ibukin iango riki tabeua, taraa te beeba ni kaongora n te namwakaina aei ibukin te Riaona ao Ibukin Kakorakoraia Kairake maekatiin.

Iango ibukin Reiakinaia Ataei

Ereman 3:24, 33–34; 4:11–15

Tamara are i Karawa e tangirai bwa N na nanorinano.

• Iangoia ni kaoiia am ataei bwa a na korea tamnein oin katotongaia n “okiokin te kainikatonga,” ane e boboto iaon te tamnei ane ieta. Ngkanne, ngkai kam kaai ni wareka Ereman 3:24, 33–34 ao 4:11–15, a kona ni kotei mwakoro ibuakon bwaai akana a okioki akanne ake a kabwarabwaraaki ni kiibu aikai. Ti na kanga n rineia bwa ti na nanorinano—ao n teimatoa n te kawai anne?

Ereman 5:12

N na katea aau iaon Iesu Kristo.

• Iangoia ni kabongana tamnein te tembora ni moana am marooro bwa bukin tera ngkai aan taian kateitei a kainnanoia bwa a n rangi ni matoatoa. Ke ko kona n taraa aan te kateitei ibukin mweengam ke ana kateitei te Ekaretia. Ni katuruturua aan te kateitei ae te bwaa ae matoatoa, a kona am ataei ni kamwakura te bwaa n uka aona. Ngkai kam kaai ni wareka Ereman 5:12, ao titirakiniia am ataei bukin tera ngkai a taku bwa Iesu Kristo bon “aan te kateitei ni koaua” ibukin maiura. Ti na kanga ni katea maiura Iaona? (taraa Ereman 3:27–29, 35 ao Taekan te Onimaki 1:4).

• Kaoiia am ataei bwa a na katea te taua ni kabonganai taian buraoki ke bwaai riki tabeua iaon aan te kateitei aika a kakaokoro (n aron te bwaubwau ae mronron ke te atiibu ae boorai aona). E kanga aan te kateitei ae matoatoa n ti te arona ma Iesu Kristo? A kona ni kanimwa te buraoki nakon te auti ae uarereke ibukin aia iango nako ake a kan tibwauai bwa tera ae a na karaoia bwa aonga n Iriiria.

Ereman 5:21–52

Te Tamnei ae Raoiroi e wirikiriki ma te bwanaa ae maraara, man ni bebete.

• Te bwanaa are e kabwarabwaraaki n Ereman 5:29–30, 45–47 e reiakiniira teuana te kawai are e kona n taetae iai nakoira te Tamnei ae Raoiroi. Ni buokiia am ataei bwa a na mataata n te koaua aei, iangoia ni wareka “Mwakoro 37: Nibwaai ao Riaai inanon te Karabuuti” (Karaki man ana Boki Moomon, 99–102). Ngkana ko taetae iaon te bwanaa are a ongo iai aomata, taetae n te bwanaa ae amarau. Kaokioka te karaki tabeua te tai, ao kaoiia ataei bwa a na wirikiriki ma ngkoe. Buokiia n iangoi kawai riki tabeua are e kona n taetae nakoira te Tamnei ae Raoiroi. Ni kamatoatoa te reirei aei, kam kona ni bane n anenea “The Still Small Voice” (Aia Boki n Anene Ataei, 106–7).

Ereman 5:20–52

Te rairannano e onea mwin te roo n tamnei nakon te oota.

• Ni katuruturua taekan te bwai are e reiakinaki n Helaman 5:20–41 ibukin te rootongitong ao te oota, kataia wareka ke kakimototoa warekan kiibu aikai n te roo, kabongana te tooti ibukin te oota. A kona am ataei ni kakauongo bwa tera ae a riai ni karaoia aomata bwa e aonga n nako te rootongitong. Imwina ao kaurai taura, ao bootaki ni wareka kiibu 42–48. Tera ae reireiniira kiibu aikai iaon taekan te rairannano?

Ibukin iango riki tabeua, taraa te beeba ni kaongora n te namwakaina aio n te Rao maekatiin.

E ngae ngke a mena inanon te karabuuti, Nibwaai ao Riaai a kamanoaki man mwaakan te Atua.

© Ana Boki Moomon ibukiia Taan Wareware aika Kairake, Nibwaai ao Riaai a Katobibiaki n te Boua ae te Ai, iroun Briana Shawcroft; e aki kona ni katotongaki