Uangaa Rorobuaka n Ataei aika Taani Buaka, iroun Arnold Friberg

Aokati 19–25: “A Kawakinaki ni Mwaakana ae Moan te Kamimi”

Aramwa 53–63

Ngkana e kabotauaki ma aia taanga ni buaka Reimwanaite, Ana taanga ni buaka Ereman “ae uarereke” (Aramwa 56:33) ae kairake n ataeinimwaane a na bon aki reke aia tai. Irarikin uarereken mwaitiia, a na taanga ni buaka Ereman “a bane … ni kairake, ”ao a tuai man iriira te bubuaka” (Aramwa 56:46–47). N taai tabetai, ao ti kona ni katitebooa ma arora ngkana ti taonaki nako n ana buaka Tatan ni boong aikai ma taan tei ibukin te buakaka n te aonaaba.

Ma ana taanga ni buaka Ereman iai rakaia iaoia Reimwanaite ae aki irekereke ma te mwaiti ke te rabakau ni buaka. A rinea Ereman, te burabeti, bwa e na kairiia (taraa Aramwa 53:19); “a bon reireinaki irouia tinaia, bwa ngkana aki nanououa, ao e na kamaiuia te Atua” (Aramwa 56:47); ao e “korakora aia onimaki n te bwai are a tia n reireinaki iai.” Ao n tokina, a kawakinaki man “mwaakan te Atua ae moan te kamimi” (Aramwa 57:26). Ngaia are ngkana ko kaitara ma buakan te maiu, ti kona n ninikoria. Ti reiakinaki n ana taanga ni buaka Ereman bwa “[iai] te Atua ae momotiraoi, ao [ane] e aki nanokokoraki, ao [e na] bon kawakinaki ni mwaakana ae moan te kamimi” (Aramwa 57:26).

Iango ibukin Reiakinana n te Mweenga ao n te Taromauri

Aramwa 53:10–22; 56:43–49, 55–56; 57:20–27; 58:39–40

Onimakinan te Atua e buokai n tokanikai iaon te maaku.

Ngke arona bwa tiaki ibukin aia onimaki, e na iai bukina ae tamaroa irouia ana taanga ni buaka Ereman ngkai a namakina te maaku. Ma ibukin aia onimaki, e na iai riki bukina irouia ngkai a ninikoria. Ngkai ko wareka rongorongoia n Aramwa 53–58, kakaei bwaai ake a buokiko ni kaitara maakum ma te onimaki iroun Kristo. Iangoia kabanea nanom iaon kiibu akana imwiina: Aramwa 53:10–22; 56:43–49, 55–56; 57:20–27; ao 58:39–40. E kona te taibora aei ni buokiko ni korei mwiin bwaai ake ko kunei.

Anuaia ana taanga ni buaka Ereman aika kairake:
Oin bukina ae kona reke ngkai e rangi ni matoatoa aia onimaki iroun Kristo:
Tera te bwai ae a karaoia ni kamwakura aia onimaki iroun Kristo:
E kanga te Atua ni kakabwaiaiia:

N tokanikai iaon buakanakira n te maiu n tamnei, ti kainnanoa naba mwaakan Iesu Kristo. Ko na kanga ni karekea Mwaakana? Kakaei taian kaeka n ana rongorongo Beretitenti Russell M. Nelson “Katikan Mwaakan Iesu Kristo Nako Nanon Maiura” (Riaona, Meei 2017, 39–42). Ko kona ni kabotaua ana taeka n reirei ma baike a taekin ana taanga ni buaka Ereman.

Imwiin kamatebwaian bwaai aikai, iangoa oin buakanakim n te maiu n tamnei. Korei mwiin bwaai ake ko kaungaaki bwa ko na karaoi ni kamwakura am onimaki iroun Iesu Kristo.

Taraa naba Neil L. Andersen, “Wounded,” Riaona, Nob. 2018, 83–86; “True to the Faith,” Hymns, no. 254; “Drawing upon the Power of God in Our Lives” (video), Gospel Library; Gospel Topics, “Faith in Jesus Christ,” Gospel Library.

A aki Nanokokoraki, iroun Joseph Brickey

Aramwa 58:1–12, 31–37; 61

Taan iriira Iesu Kristo aki kai rootaki.

Iai raoi bukina iroun Ereman ao Bwaoraan ngkai a un. Ereman e aki karekea te boutoka ae bwanin ibukiia ana taanga ni buaka, ao Bwaoraan e bukinaki n ae kairua roun Moronaai bwa e taua te boutoka anne (taraa Aramwa 58:4–9, 31–32; 60). Tera ae kakawaki nakoim n te bwai ae a karaoia n Aramwa 58:1–12, 31–37 ao Aramwa 61? Bukin tera n am iango ngkai a kaeka n te aro aei?

Unimwaane David A. Bednar e kotea Bwaoraan bwa te katooto n te nimamannei ao n reirei bwa te “kabanea ni kakawaki ni katooto n te nimamannei a kuneaki inanon maiun te Tia Kamaiu n tii Ngaia” (“Te Nimamannei ao te Nanorinano,” Riaona, Meei 2018, 32). Iangoia inanom bwa e kanga te Tia Kamaiu ni kaota te nimamannei. Taraa, ibukin te katooto, Mataio 27:11–26; Ruka 22:41–42; Ioane 13:4–17. Ko na kanga n irii Ana katooto?

Aramwa 60:7–14

Iai tabeu n tabekiia rake aomata ake a mena irarikiu.

E koreia Moronaai bwa te Atua e na katuaea Bwaoraan ngke arona bwa e bon ataia ae e aki tabe ma kainnanoia aia taan ni buaka Nibwaite. Tera ae ko reiakinna man Aramwa 60:7–14 ibukin mwannanoaia aomata ake a rootaki n te kainnano? Tera ae ko kona ni karaoia bwa ko aonga n ataa kainnanoia ao aron naba buokaia tabeman?

Aramwa 62:39–51

Ngkana I nanorinano, a kona kangaanga n te maiu ni bita nanou nakon te Uea.

Kamena te bunnimoa ae tuai ni mwai ao te buteeta inanon te ran ae buroburo ni buokiko n iango bwa ko na kanga n rineia n riki “n amarau” ke “ni matoatoa” man kataakim. Ngkai e a tabe ni mwai am bunnimoa ma am buteeta, kamatebwaia Aramwa 62:39–51, ao ataia bwa a kanga aroia aomata nakon ana mwakuri Ereman imwiin aia buaka ae moan te maan ma Reimwanaite. Ko kona ngkanne ni kabotaua aei bwa e kanga aroia nakon ana kabwarabwara 13 te ririki mai imwaaina (taraa Aramwa 45:20–24). A kanga n rootaki Nibwaite n te aro ae kaokoro man karawawatakiia ae ti te arona? Ngkana e mwai raoi te bunnimoa ma te buteeta, raeua te bunnimoa ao korea te buteeta. A kanga n rootaki n te ran ae bane burona n te aro ae kaokoro? Tera ae ko reiakinaki iai bwa e na kanga arora n rinerine bwa ti na kona ni kaeka nakon te karawawataaki? Ko na kanga n rairaki nakon te Atua n am tai ni karawawataaki?

Karaoa aron are ko reiakinna man mweengam. Ngkana ko anga reirei n te kiraati n tain te Taromauri, tuangiia kaain te kiraati bwa a na tibwauai baike a reiakin ni mweengaia. N aron te katooto, ukoria bwa tera ae a reiakinaki ibukin taian karawawataaki ao te nanorinano man bunnimoa ao buteeta ake a buroburo.

Ibukin iango riki tabeua, taraa te beeba ni kaongora n te namwakain aio n te Riaona ao Ibukin Kakorakoraia Kairake maekatiin.

Iango ibukin Reiakinaia Ataei

Aramwa 53:20–21; 56:47–48

I kona ni kakaonimaki nakon te Atua n aroia ana taan buaka Ereman aika rorobuaka.

• Ko kona ni kabonganai bwaai n ibuobuoki n tibwaua rongorongoia ana tautia Ereman, n ikotaki ma tamnei inanon te kamataata aei ao “Mwakoro 34: Ereman ao 2,000 Taan Buaka Aika Kairake” (Karaki man Ana Boki Moomon, 93–94). Te iteraniba ibukin te waaki ni kakukurei n te wiiki aei e kona ni buokiia am ataei n iangoi kawai are a na kona n riki n aroia ana taanga ni buaka Ereman. Iangoia tibwauai tabeua anuaia tautia aika kairake man Aramwa 53:20–21 ni waaki mai iai. Kam kona n ikotaki n anenea “We’ll Bring the World His Truth” (Aia Boki n Anene Ataei,, 172–73).

Aramwa 56:45–48; 57:21

I kona ni kakaonimaki nakon baike a reirei iaona au karo inanon te raoiroi.

• Ana tautia Ereman aika kairake a taraa aia onimaki tinaia ngke a kaitaraki ma te kangaanga ae korakora. Ko kona ni wareka Aramwa 56:46–48 ma am ataei ao kaoiia bwa a na kakauongo nakon te bwai are a taekinna tinaia taan buaka aika rorobuaka nakoia iaon te onimaki. Ko kona n titirakiniia tera ae a tia n reiakinna mairouia aia karo—ke tabeman riki ikawai aika a kakaonimaki—n taekan te Tia Kamaiu. Bukin tera e kakawaki bwa ti na ongeaaba “ni karaoi raoi nanon taeka ni kairiiri”? (Aramwa 57:21).

• Ko na kanga ngkoe—n aroia tinaia taan buaka aika rorobuaka—ni kakoaua raoi bwa am ataei a ataia bwa iai am onimaki iroun te Atua? Teuana te kawai bon tibwauakina bwa e kanga am onimaki n roota aron maium. N aron te katooto, e kanga te Atua ni “kamaiuko” ngkai ko aki “nanokokoraki”?

Atin te Onimaki,, iroun Jay Ward

Aramwa 53:10–18

I kona ni kawakin au berita aika tabu ma Tamau are i Karawa.

• A kona am ataei ni karakina te tai ngke temanna e karaoa ao e kawakina ana bertia ma ngaiia. Tera aia namakin ngke e kawakinaki te berita? Ko kona ni wareka Aramwa 53:10–18 ao kaoiia am ataei n taraia bwa e kanga Ereman, ana aomata Amon, naati mwaane irouia ana aomata Amon ni karaoa ao ni kawakin aia berita, ke aia berita aika tabu. Ko kona n tibwauaia bwa e kanga Tamara are i Karawa ni kakabwaiako ngkai ko kawakin am berita aika tabu.

Aramwa 61:3–14

I kona n rineia bwa N na aki un.

Iangoia kaoiia am ataei bwa a na iangoa te tai are a kabuakakaaki iai ibukin karaoan te bwai ae a bon aki karaoia. Tuangiia bwa e riki naba aio nakon Bwaoraan (taraa Aramwa 60–61; taraa naba “Mwakoro 35: Kaaben Moronaai ao Bwaoraan,” Karaki man Ana Boki Moomon, 95–97). N ataia bwa tera aron Bwaoraan nako iai, ikaruoruo ni wareki kiibu man Aramwa 61:3–14. Tera ae karaoia Bwaoraan ngke e kabuakakaaki iroun Moronaai? (taraa Aramwa 61:2–3, 8–9). Tera ae ti reiakinna ibukin te kabwarabure man ana banna ni katooto te Tia Kamaiu? (taraa Ruka 23:34).

Ibukin iango riki tabeua, taraa te beeba ni kaongora n te namwakaina aio n te Te Rao maekatiin.

E Koaua ae I tuangko, A Bane n Roko ao A Tauaki Mwiia, iroun Clark Kelley Price.