Te Aine, iroun Jen Tolman, e na aki kaeweaki

Tuurai 29–Aokati 4: “Taraa te Atua ma ni Maiu”

Aramwa 36–38

Ngke e noora te buakaka Aramwa are e katobibiaki iai, e namakina te “nanokawaki,” “te kataaki,” ma “kammarakan tamneina” (Aramwa 8:14). “Te buakaka are i buakoia aomata aikai,” e taetae ibukiia kaain Tioramwaite, “e bon kammaraka tamneiu” (Aramwa 31:30). E namakina te bwai teuana ae ai aron are e riki imwiin okina man ana mition nako Tioramwaite—e nooria bwa nanoia aomata aika taian Nibwaite “a moanna ni matoatoa, ao a moanna n un ibukin matoan te taeka,” ao aio are e karika “korakoran nanokawakin nanona” (Aramwa 35:15). Tera ae karaoia Aramwa n te bwai are e nooria ao n namakinna? E aki tii bwarananona ke n aki onimakina aron te aonaaba. Ma, “e tua bwa natina ake mwaane a na ikotaki” ao n reireiniia “bwaai aika a kaineti nakon te raoiroi” (Aramwa 35:16). E reireiniia bwa “akea riki te kawai ke te anga are e kona te aomata ni kamaiuaki iai, ma tii inanon ao rinanon Iesu Kristo. … Nooria, ngaia te taeka te koaua ao te raoiroi” (Aramwa 38:9).

Iango ibukin Reirei n te Mweenga ao n te Taromauri

Aramwa 36; 38:5–6

I kona ni bungiaki iroun te Atua.

Tabeman mai buakora a na iai aia taneiai aika a kakubanako n aron rairakin Aramwa. Ma aomata nako a riai ni “bungiaki iroun te Atua,” e ngae ngke e riki teutana imwiin teutana (Alma 36:23; 38:6). Ngkai ko wareka Aramwa 36, iangoia bwa tera nanon ae te bungiaki iroun te Atua. N aron aei, inanon waakin te bungiaki iroun te Atua, tera am namakin iaon te bure? iroun Iesu Kristo? E kanga manga te bungiaki inanon te Atua n roota are ko karaoia ibukin am bure? Tera bitaki tabeua aika a riki n am koaua ao ana mwakuri? Iangoia bwa ko kanga n rinanon bitaki aikai.

Taraa naba Motiaea 5:7; 27:25–26; Aramwa 5:14; 22:15; Ereman 3:35; “Alma the Younger Is Converted unto the Lord” (witeo), Gospel Library.

Aramwa 36:12–24; 38:8–9

Iesu Kristo e onea mwiin te nanokawaki n te kimwareirei.

N tabetai a maaku aomata n rairi nanoia bukina bwa a tara te raira n nano bwa te katuaeaki ae kammaraki ibukin te bure. Tera n am iango ae e taekinna Aramwa ibukin anne? N ukerana, ko kona ni kabotaua bwa tera maiun Aramwa imwain ae raira nanona (taraa Aramwa 36:6–17) ma kabwarabwaraan maiuna imwiin rairan nanona (tarai kiibu 18–27). Ni kaineti ma Aramwa 36:17–18, e kanga Aramwa ni karekea kabwaraan ana bure?

Taraa naba Matthew S. Holland, “Ana Bwaintituaraoi te Nati ae Rianako,” Riaona, Nobembwa 2020, 45–47.

Aramwa 37

A tia koroboki aika tabu ni kawakinaki “ni bukina ae kakawaki.”

Iangoa te kakai ao te kakabwaia ae e reke man karekean koroboki aika tabu n te bong aei! Ngkai ko wareka Aramwa 37, tarai kakabwaia aika a roko man karekean koroboki aika tabu (taraa, te katooto, kiibu 7–10, 18–19, 44–45).

N Aramwa 37:38–47, Aramwa e kabotaua “ana taeka Kristo” nakon te Riaona. Ngkana ko iangoi kabotau aikai, iangoi kawai aika ko a tia n rinanon iai te kakai ao n te mwaaka n ana reirei Kristo “ni katoa bong” (Aramwa 37:40).

Taraa naba D. Todd Christofferson, “The Blessing of Scripture,” Riaona, Meei 2010, 32–35; “As I Search the Holy Scriptures,” Booki n Anene n taromauri, nambwa. 277; “Alma Testifies to His Son Helaman” (witeo), Gospel Library.

A reireiniira koroboki aika tabu bwa ti na kanga n ira te Atua

Aramwa 37:1–14

“Bwa a riki bwaai aika a korakora man bwaai aika a uarereke man aki kaangaanga.”

N tabetai ti kona n namakinna ae a rangi ni bubura ao ni korakora ara kaangaanga are e na bubura ao e na bon kaangaanga naba aron katokaia. Ma tiaki anne n taainako ana kawai te Uea. Ngkai ko wareka Aramwa 37:1–14, iangoia bwa tera ae anaa nanom ibukin rongorongon karaoan Ana mwakuri. Imwiina ko kona ni iangoia raoi ao n taui mwiin kawai ake ko a tia n noora iai te reirei aei n riki inanon maium.

Ngkana ko na anga te reirei iaon te tua aei nakon temanna, tera katooto man baika a ririki n te maiu ae e na boongana ni kamataata te reirei? Ko kona ni kunei tabeua n ana rongorongo Unimwaane Dallin H. Oaks “Bwaai Aika Uarereke Man Aki Kaangaanga,” (Riaona, Meei 2018, 89–92).

Tera tabeua bwaai aika a uarereke man aki kaangaanga ae a kaaniko riki nakon Tamara are i Karawa ao Iesu Kristo?

N angiin te tai, ara rinerine aika a “uarereke man aki kaangaanga” a karika te kaokoro ae bubura inanon maiura. Iangoia bwa ko na rinea atuun te reirei man Ibukin Kakorakoraia Kairake: Te Kairi ni Karaoan Rinerine ao n titirakiniko titiraki n aron aikai: A na kangaa au rinerine n aikai n roota maiu ma aomata ake irarikiu? Tera bitaki man bwaai aika a uarereke man aki kaangaanga ae I kona ni karaoia ae na kairai nakon te rau ae korakora ao te kukurei?

Taraa naba Michael A. Dunn, “Karakaa Teuana te Betienti,” Riaona, Nobembwa 2021, 106–8; Gospel Topics “Agency,” Gospel Library.

Kabonganai Bwaai aika uarereke man aki kaangaanga. N ai aron bwaai tabeua ni maiura, te anga reirei n te euangkerio ao reiakinana e kona ni karaoaki rinanon bwaai aika a uarereke man aki kaangaanga aroia. N aron, e na kanga te taoro ae uarereke ke te bwai ni kamaiu kariki ni kabongaanaki n reiakina te reirei ae korakora iaon bwaai aika uarereke man aki kaangaanga? (taraa Mataio 5:13; 13:33).

Aramwa 37:35–37

“Reitaki ma te Uea.”

N Aramwa mwakorona 37:35–37, kakaea ana kakao Aramwa nakon natina Ereman. A ngaa mai ibuakon kakao aikai aika ko namakin bwa ko na mwakuria? Ibukin te katooto, ko kona ni iangoia bwa tera ae nanonaki n reitaki ma te Uea.” (kiibu 37). Ko a tia ni kataia ni karaoa aio? E kanga n tia ni kaira maium nakon ae raoiroi?

Aramwa 38

Tibwaan au kakoaua ibukin Iesu Kristo e kona ni kakorakoraia naake ti tangiriia.

Ana taeka Aramwa nakon natina te mwaane ae Tiburon e karekea te katooto ae tamaroa bwa ti na kangaa ni kakorakoraiia ao ni kaungaiia naake ti tangiriia ni maiuakinan te euangkerio. Kamatebwaian Aramwa 38 e kona n anganiko iango tabeua ni buokaia kaain am utu ao raraom ni kunea te korakora iroun Iesu Kristo. Koroia bwa tera ae ko kunea.

Ibukin iango riki tabeua, taraa te beeba ni kaongora n te namwakain aio n te Riaona ao Ibukin Kakorakoraia Kairake maekatiin.

Iango ibukin Reiakinaia Ataei

Aramwa 36:6–24

Te rairannano e uota te kimwareirei nakoiu iroun Iesu Kristo.

• Ibukin buokaia natimi bwa a na oota bwa te rairannano e uota te kimwareirei, ko kona n anganiia te beebwa ma tamnein te ubu ae kukurei n iteran te beebwa teuana ao n are iterana tamnein ubun te aomata ae nanokawaki. Tuangiia bwa a na kakauongo ngkai ko wareka Aramwa 36:13, 17–20 ao n taua te ubu are e kaota ana namakin Aramwa. Ataei ake a ikawai riki a kona ni korei taeka ke kibuntaeka ni kabwarabwara ana namakin. Tera ae karika nanokawakin Aramwa, ao tera ae e uota kimwareireina? Imwiina ko kona n tuangiia taekan te kimwareirei ae ko namakinna ngke ko raira nanom.

Aramwa 37:6–7

“Bwa a riki bwaai aika korakora man bwaai aika uarereke man aki kaangaanga.”

• A kona am ataei ni kukurei man kunean bwaai aika a uarereke ae a kona ni karika te bwai ae bubura. Bwaai n aron baetere, kingiin te kaa, ke te bwai n takakaro ae karika rauia bon katooto tabeua. Ko kona ni wareka Aramwa 37:6–7 ma ngaia ao ni iangoi tabeua bwaai aika a uarereke man aki kaangaaga are e tangiria te Atua bwa ti na karaoia. Tera bwaai aika a bubura aika a kona n riki ngkana ti ongotaeka nakon tuua aika a uarereke man beebete?

• A kona naba am ataei ni kataa naba karaoan aio: kaona te mwangko n te ran, te timna imwiin te timna. E kanga n irekereke aei ma Aramwa 37:6–7? Imwiina ko kona n marooroa bwa e kangaa ana waaki te uea “ni bwaai aika uarereke man aki kaangaanga,” n aron warekan koroboki aika a tabu ni katoabong, n riki bwa kanga ai aron timtimin te ran n te mwangko.

• Buoka am ataei n iangoi aanga aika e na kona ni karaoi bwaai aika a korakora ni mwengaia, n te reirei ke n te taromauri. Te anene “‘Give,’ Said the Little Stream” (Aia Boki n Anene Ataei, 236) e kamataata naba te reirei.

Aramwa 37:38–47

Koroboki aika a tabu a kona ni buokiira ni katoa bong.

• Ko na kanga ni buokiia am ataei ni karikirakea tangiran ana taeka te Atua, n aron are e karaoia Aramwa nakon Ereman? Kaota tamnein te Riaona nakoia (n aron te Gospel Art Book, nambwa. 68) ke tuangia bwa ana korea teuana ngke a tibwatibwaa aia atatai iaona (taraa Aramwa 37:38–47; 1 Nibwaai 16:10, 28–29). A kanga n riki koroboki aika a tabu bwa ai aron te Riaona?

Ibukin iango riki tabeua, taraa te beeba ni kaongora n te namwakaina aio n te Rao maekatiin.

E Kaoti te Anera nakon Aramwa ao Natin Motiaea Mwaane, iroun Clark Kelley Price