Kaitaraakin Angibuakan Maiura n Tamnei mani Kakoauaan Kristo
Ti kaitaraakin angibuakan maiura n tamnei mani kakoauaan Kristo ao kawakinan Ana tua.
N te maan ae onoua te ririki n nako, neiere nanou ae, Ann, ao Ngai ti maeka i Texas n uakaan ma te Gulf Coast, te tabo are e aki toki n ororeaki n te angibuaka i aon te United States, ike e a tiku mwina bwa te urubeke ae korakora ao ai buan te maiu. Te kananokawaki bwa, namwakaina aika nako bon tiaki te bwai ae raka n rokon taian angibuaka n urubeke aikai. Ara tangira ao ara tataro e a nakoimi ni kabane naake a tia n rootaki n aanga aika kakaokoro. Inanon 2017, ti aitara naba ma Hurricane Harvey, are e tei ana rekooti ni bwakan karauna ae roko n 60 te inti rietana.
Tuan te otabwanin bon ngaia ae e tautaekanii rikin angibuaka aikai. Kabuebuen taari e a nakon ae kaniia 80 degree Fahrenheit, (27 degrees C), n ruo rikaaki 165 te buuti (50 m) i aan taari. Ngke e kaitiboo te ang ma taari ae kaabue aio, ao e a karika taari bwa e na buane man betirake nako karawa, ike e a manga riki n ran. A waerake naang, ao te ang e kare ni karika ae ai aron tein te ukeukennati ietan taari.
Angibuaka a bon rangi ni bububura tiaitiia, ao ni kona n roko n te rieta ae 50,000 te buuti (15,240 m) ke e raka riki n waerake nako karawa ma rababana ae kona ni kaniia 125 te maire (200 km). Ma te kamimi, bwa te tai are e roko iai iaon te aba te angibuaka aio ao ikanne are e a keerikaki naba korakorana kiona kai akea te ran ae kabubue are e anganna korakorana.1
Tao ko na aki kaitiboo ma te aekaki n angibuaka aio n rabwata. Ma e ngae n anne, ti a bane n tia n rinanon ao n teimatoa n rinanon angibuaka n tamnei are a na anaa te rau mairoura ao ni kataa ara onimaki. N te aonaaba n te bong aei, e betete karekean te rongorongo ao n tibwauaaki. Ma ti kakaitau, bwa te Uea e a tia n katauraoa te kawai ae ti na kona n karekea te tokanikai ma iai. Man maiuakinan ana euangkerio Iesu Kristo ao ti kakoaua bwa “ngkana a roko kangaaanga i aora n anaa te rau mairoura, iai te onimaki iroura bwa ti na kainaomataira.”2
E kabwarabwara Beretitenti Russell M. Nelson:
Aomata aika Itiaki a kona ni kukurei iaan aroaro ni kabane. Ti kona n namakina te kimwareirei e ngae ngkana a aki nakoraoi ara bong, te wiiki ke riki te ririki!
“…Te kimwareirei ae ti namakinna e uarereke nakon karaoana ma aroaron maiura ao bwaai ni kabane are e na karaoaki ma tarakin raoi maiura.
“Ngkana e kaineti maiura iaon… Iesu Kristo ao Ana euangkerio, ti namakina te kimwareirei n aki tabe bwa tera ae riki—ke akea ae riki—inanon maiura.”3
N ai aron tuan kanoan te bong are e tautaekanii angibuaka, tuua aika mairoun te Uea a tautaekana namakinan te kimwareirei iroura inanon aitarara ma angibuaka inanon maiura n tamnei Te kimwareirei ke te nanokawaki are ti namakinna ngkana ti kaitarai angibuakan te maiu aio e irekereke ma tuua ake e a tia ni katei te Atua. E taku Beretitenti Nelson bwa, “A aranaki bwa tuua ma a bon koaua man korakora n ai aron tuan te kiba, tuan [ao] ana katikitiki te aonnaba ao ai te tua are tautaekana ikeiken te buro.”
E reitia n taku Beretitenti Nelson, “bwa bon te bwai ae e bebete arona: ngkana ko tangira te kukurei, kawakin tuua.”4
Te nanououa bon aian te onimaki ao te kimwareirei. N ai aron taari ae kabuebue are e kaabung iai te angibuaka, te nanououa bon nnen angibuakan maiura n tamnei ni kaabung N ai aron ae te koaua bon te rinerine, ai te arona naba ma te nanououa. Ngkana ti rineia bwa ti na nanououa, mai ikanne are e a mwakuri man korakora naba mwaakan te kaaitara i aora ike ti a tiku naba ni mamaara mani ngore n kaitarai kaririakira.5
Tatan e tangirira bwa ti na bwaina te nananououa E tangiria ni kamatoai nanora bwa ti aonga n aki kakoauai bwaai.6 Ana tabo ni kaabung te nanououa e katiki nanona tarana, kioina bwa e tara n uota te rau, ao ranna ae e mwaitoro e aki kainnanoa maiuakinan taeka are a nako mai wiin te Atua“maiuakini taeka ni kabane are a otinako mai wiin te Atua.”7 Inanon aekakin raan aikai, ao Tatan e karirira bwa ti na kamemerea ana kakamwakuri tamneira Te aekaki n aki tara bwai anne e kona n kakea korakoran tamneira, ike ti a aki iai mwaitoro ke n kabuebue.”8 Ngkana tiaki atinrooira iroun Kristo, te nanououa ma raona a na katikiira nakon te tabo ae akea iai te kakai ke te kukurei ae akea tokina ao ai akean te rau [n] tamneira.”9
N ai aron te angibuaka ae e ngore n rokona iaon te aba, te nanououa e kona n oneaki mwina n te onimaki ngkana ti katei aara iroun Kristo. Ti a kona ngkanne n noori angibuakan maiura n tamnei n aroia nako, ao ara konabwai n tokanikai i aoia e na kakorakoraki Ngkanne, “ngkana te riaboro e kanakoa te ang mai irouna ae korakora, eng, ana kanoa i buakon te ukeuke n anti, … bon akea korakorana … ni [katikira] nakon marawan te nanokawaki ao te maraia ae aki totoki, ibukin te bwa are [ti] kateaki i aona, are bon aan te kateitei ni koaua.”10
E reirei Beretitenti Russell M. Nelson:
Te onimaki iroun Iesu Kristo bon aan ni kabane koaua ao karekean te mwaaka ae rietata. …
E aki kainnanoa te onimaki ae kororaoi te Uea bwa ti aonga ni karekea mwaakana ae kororaoi. Ma E tua nakoira bwa ti na kakoaua.”11
Ni moa man te maungatabu ni kabuta are inanon Eberi, ao ngai ma au utu ti a tia ni kakaai aanga are ti na kamatoai iai ara onimaki iroun Iesu Kristo ao ana Mwakuri ni Kamaiu are e na buokira n bitii [ara] kangaanga nakon te rikirake ma tibwanga aika aki tiatianaki.”12
Tibura te aine ae Ruby, e kakabwaiaaki ma te nano ae matoa man tatauraoi Ngke e bungiaki ao e aki toma bibina nakon birotona. E ngae ngke bon te teei ae uarereke Ruby, ma man aia ibuobuoki ana karo ao e kaitara rarawatana aio ma te nanomwaaka Ai nimaua ngkai ana ririki Ruby Ao e ngae ngke e bon rangi n ataei, ma e a tia n katea te banna n katooto ae korakora n aron karekean te kukurei e ngae ngkae iai aorakina E kukurei n taain nako.
I nanon Meei ae e nako, ao e a manga aitara naba ma teuana te angibuaka are e a kataa ana onimaki E bungiaki ma baina teaina ae e aki koro unana ao e kainanoa te korokoro nako iai. Imwain ana korokoro ae matoatoa aio, ao ti kawaria ao n anganna te korobanna ae tamnein te ataei ae taua bain te Tia Kamaiu. Ti titirakina ngkana iai irouna te nako n nano, ao e waetata ni kaekaira man taku, “I aki, ma I kukurei!”
Ngkanne ti titirakinna,“Ruby, e kanga n riki anne?”
E kaeka Ruby ma te nano matoa man taku, “Bwa I ataia ae e na taua baiu Iesu.”
E kamimi bwa e rangi ni waekoa ni marurung Ruby, ao e teimatoa n kukukurei. Itiakin ana onimaki te ataei bon kaitaraan te nanobaba n nanououa are ti aki totoki n mwaamwane iai ngkana ti a tabe n ikawairake!13 Ti kona n riki bwa ai aroia ataei aika a uarereke ao man rineia bwa ti na katuka te nanououa. Bon te rinerine ae bebete.
Te tama ae korakora tabeaiangana ibukin natina e tang nakon te Tia Kamaiu man taku, “Ngkana iai te bwai ae ko kona n karaoia, … buokira.”14
Ao e taku Iesu nakoina:
“Ngkana ko kona, a boni konaki bwai ni kabane iroun ane onimaki.
“Ao e kanenea bwanana naba taman te tei, ao e kangai, ma rannimatana, Te Uea, I onimaki; ko na kakorakora riki au onimaki ae karako.”15
Te tama ae nanorinano aio e rineia bwa e na onimakina ana koaua iroun Kristo nakon nanououana. E tibwauaia Beretitenti Nelson, “Tii am aki kakoaua are e na tuka te Atua ma anganakim kakabwaia ni kamwaing maunga inanon maium.”16
E korakora ana nanoanga te Atua ibukira ngkai e anganira te tia bwa tokin tian ara kakoaua ma tiaki ara atatai!
E reirei Aramwa
E na kakabwaiaki te aomata are e kakoaua ana taeka te Atua.”17
“[Bwa] te Atua e nanoanga nakoia ni kabane ake a kakoaua arana; ngaia are e tangiria, n te moan tai, bwa kam na kakoaua.”18
Eng, man te moan tai, ao e tangiria te Atua bwa ti na Kakoauaa
Kaitaraakin Angibuakan Maiura n Tamnei mani Kakoauaan Kristo ao kawakinan Ana tua. Ara onimaki ma ara ongeaaba e na tomaira ma te mwaaka ae riaon are iroura bwa ti na tokanikai i aon [ni kabane] bwaai ake a riki—ke n aki riki—inanon maiura.”19 Eng, te Atua e “waekoa ni [kakabwaiaira]” ibukin ara kakoaua ao ara ongeaba.20 Ni koauana, i nanon te tai ao ti na bitaki nakon te kukurei ao “ti na bane ni kamaiuaki i nanon Kristo ngkana ti kamwakura ara onimaki Irouna ao mani kawakin Ana tua.21
Tariu ao mwaneu, ti a bane n rineia n te bong aio bwa ti na “katoka te nanououa, ao ni waaki i nanon te kakoaua.”22 “Te kawai ae eti bon kakoauan Kristo.”23 Ti “koreia i nanon [Baina].”24 Boni Ngaia ara Tia Kamaiu ao te Tia Kabooira, are e teitei n ara mataroa ao ni karebwerebwe.25 N aran Iesu Kristo, amen.