Te Marooro Iaon Marurungin te Iango
Anganai au tai bwa n na tibwauai tabeua bwaai ake i kaitibo ma ngaai inanon kangaanga ake a tia n aitara ma ngaia au utu.
E ngae ngke a tia ara utu ni karekei kakabwaia n tain mwanangara iaon kawain te berita ae tabu, ti bon kaitara naba ma kangaanga n te maiu aei. I tangiria n tibwauai au taneiai ake I a tia ni kaitibo mangaai ae irekereke ma aorakin te iango. Aorakin te iango aikai ake a irekereke ma te bwarannano, te raraoma ae korakora, mangaongaon te iango, ADHD—are n tabetai aikai ni kabane. N na tibwauai au taneiai aikai ma aia kariaia naake a tia n irekereke iai.
N au tai ni mwakuri, ao I a tia ni kaitibo ma aomata ao utu aika mwaiti ae titebo tein aia kangaanga. N tabetai ao I aki toki n iangoia ngkana “aoraki ake a tiritiri” e a rabuna te aonaaba n aron are e mwaneweaki inanon booki aika tabu, tao iai naba ibuakona aorakin te iango.1 E kabutaa te aonaaba, n rotii aaba nako ma aomata n aekaia nako—kairake, kaara, kaubwai, ao kainnano. Aki katukaki kaain te Ekaretia.
Ma irarikina, ti reiakinaki rinanon ana reirei te ekaretia bwa ti na keiaki ni katotonga maiun Iesu Kristo ao ni kakororaoaki Irouna. Anenea ara ataei, “I tangiria n riki n aron Iesu.”2 Iai nanora ae korakora ni kan kororaoi n aroia Tamara are i Karawa ao Iesu Kristo aika a kororaoi.3 Ibukina bwa e kona aorakin te iango ni kaitaraa ara waaki ni kakororaoira, ao e riki bwa te bwai ae kamatauninga taekinana. N tokina, e a korakora te aki kan ongo, te korakai ae aki noraki, ao te bwara n nano. A mwaiti, ake a taku n aia koaua bwa aki tau n riki bwa kaain te Ekaretia, ibukin aia iango are irouia e aki boraoi ma ana waaki te Ekaretia.
Ni kaitarai taian kewe aikanne, e kakawaki bwa ko na uringnga ae “te Tia Kamaiu e tangiriia Natin Tamana ni kabane. E atai maraki ao kangaanga ake a tia n rinanoi aomata inanon aia tai n aitara ma kangaanga ake a reke man aorakin te iango. E rinanon te ‘maraki ma te rawawata ao kariri n aekaia nako; … [ni uota] i aona marakiia ao aorakiia ana aomata’ (Aramwa 7:11; e kairaki ma katuruturuana; taraa naba Ebera 4:15–16; 2 Nibwaai 9:21). Bukina bwa E atai rawawata ni kabane, E ata aron ‘kamaiuakiia aika uruaki nanoia’ (Ruka 4:18; taraa naba Itaia 49:13–16).”4 N tainako ao kakaewenako a kaota kainnanoan bwainimwakuri ma ibuobuoki riki tabeua ao tiaki kabwakara man aroarora.
Anganai au tai bwa n na tibwauai tabeua bwaai ake i kaitibo ma ngaai inanon kangaanga ake a tia n aitara ma ngaia au utu.
Te moan, a mwaiti ake a na nanokawaki ma ngaira; ma a bon aki motiki taekara. N irekereke ma rereken te maaku, te nakonnano, ao te bwarannano ae korakora, e a okira mwengara natira te mwaane imwiin aua te wiiki n ana mwakuri ni mitinare. Ngkai ana karo ngaira, e kuri kangaanga aron kaitarakin te un ma te nanokawaki ibukina bwa ti a tia ni kabatia ara tai n tataro ibukina bwa e na koro nanon ana iango. N aroia kaaro ni kabane, ti tangiriia natira bwa a na rikirake ao ni kukurei. Te mwakuri ni mitinare bon teuana te mwaneka ae kakawaki ibukin natira te mwaane. Ti aki ataia naba bwa aekakira aia iango tabeman.
Tiaki ataia, ae okin natira man ana mwkuri ni mitinare bon te bwai ae aki karaunano nakoina. E bon rangi n tangira ana Uea ao ni kororaoi nanona ni kan beku, ma e aki kona iaan bukina aika e aki ota iai. E waekoa n roko irouna te bwara n nano, namakinan te kairua. E namakinna ae e aki butimwaeaki ma e kerikaaki namakinan te tamnei. A moanna n roko iango ni bakabure.
N ana tai ni kangaanga aei, ao te kabanea ni kawai ae nang karaoia natira bon ti anakin maiuna. E kainanoaki te Tamnei ae Raoiroi ma aia taanga ni buaka anera ni kamaiua.
Inanon ana tai ni kekeiakina aron marurungina ao n ana tai ni kangaanga aei, a roko ana utu, taan kairiiri, ma membwa n te uoote, ao raoraona ni karaoi aia boutoka ao aia ibuobuoki nakoira.
I tuai man namakina te aeka n tangira ae rianako nakon aei. I tuai man noora aron te korakora ni karau nano nakoia ake a kainanoa karauan nanoia. Ana teimatoa ni kakaitau ara utu ibukin te tangira are e raanga n te tai aei.
I aki kona ni kabwarabwarai taian kakai ake a roko n raona aron te bwai are ti aitara ma ngaia n te tai aei. Ti kakaitau, bwa e kamaiuaki natira, ma e a tia n ana te tai ae maan ao te tararua n te bwainaoraki, buoka ni kamarurung, ao ni maiuna n tamnei ibukina bwa e na marurung ao n ataia bwa e tangiraki, e uaana, ao e kainnanoaki.
I ataia bwa kangaanga n aron aikai aki titebo tokiia. I nanokawaki ma naake a tia ni bua maiuia ake a tangiriia ao n tiku n nanokawaki ma aia titiraki aika tuai kaekaaki.
N au nonori, ao e kona ni kangaanga irouia kaaro aron kinakin te korakai irouia natiia, ma ti riai n reireiniira bwa ti na ataia. Ti na kanga n ataa te kaokoro imarenan kangaanga aika a irekereke ma te rikirake ae bwainaki ao kanikina n te aoraki? Ngkai kaaro ngaira, iai tabera ae tabu ni buokiia natira ni kaitarai kakaewenakon te maiu; e ngae n anne, e karako ibuakora ae taan rabakau iaon aorakin te iango. Ti riai n tararuaia raoi natira rinanon ara ibuobuoki nakoia bwa a na nanoraoi n aia botumwaaka ni karekean te bwai ae a uaiakinna. Man oin kabwakara aika kakaokoro ti bane ni kona n ataia bwa rikirakera inanon maiura n tamnei e reitinako.
Ngkai ti ataia bwa bon “akea bwainaorakian te rotaki ke te aoraki n te iango. Tina teimatoa n rinanon te bwaranano ao te aki rau ibukina bwa ti maiu inanon te aonaaba n rabwata. N raonaki ma anne, iai naba raon aikai ake a irekereke ma reken te aoraki n te iango. Bwa tao arora aron marurungin ara iango ma namakin, e kakawaki riki te rikirake nakon ae ti na rangi kaatuua ara iango iaon kabwakara.”5
Kainabau ao ngai, te bwai ae e a tia ni buokiira bon kaaniakira nakon te Uea n aron ae ti kona. Atakin te bwai are ti rinanona, ti a kona ngkai n noora aron kairakira iroun te Uea inanon taai ake tiaaki ota iai. E kairiira Otana inanon kawaira ni waakirake inanon taai ni kangaanga. E kaotaira te Uea bwa ti na ataia ae kakawaki riki maiun temanna n ana babaire te Atua ibukin te maiu are akea tokina nakon bwaai ake ti karekei n te maiu aei.
Na kaokia riki, reiakinara iaon taekan aoraki nako n te iango e na kona ni buokiira ao tabeman ake a taonaki n te korakai. Te maroro aika onoti ao n aanaki n te koaua e na konaa ni buoka aron bonganan te reirei aei nakon are kainanoia riki. E ngae n anne, te ataibwai e roko man ana kairiiri te Tamnei ao rinanon kaotioti. A kona kanganga aikai n rotia aomata nako, ao ngkana ti kaitarai, a kaoti n ae kanga aki kona ni kaitaraaki.
Teuana te bwai ae ti riai moa n ataia bwa iai ae raoraoniira n taainako. I kaungai ngkamii bwa kam na kamatebwaia ongorongon aorakin te iango are e na reke n te Life Help inanon te Gospel Library app. Te kamatebwai e na anganira te ataibwai, te kai ota, te ataatai aomata ao te tangira. E konaa ni kauarerekei aron kanganga inanon ara tai ni karikirakei arora ma ara kantaninga ibukin marurungin ara reitaki.
Au kabanea n nonoori: ti riai ni kateimatoaa taratarakira bon imarenara. Ti riai n tangiriira imarenara ao n aki rangi n tatarai arora—riki ngkana aki waekoa ni koro bukin ara kantaninga. Ti riai ni buokiia ara ataei ao te roro ae rikirake bwa a na namakina ana tangira Iesu Kristo inanon maiuiia, e ngae ngke a korakai ni kakaea te tangira ae onoti ibukiia. Unimwaan Orson F. Whitney, are bon temanna kaain te Kooram n Abotoro n te Tengaun ma Uoman, e reireiniia kaaro aroia ni buokiia natiia ake iai aia kangaanga: “Tataro ibukiia … ami ataei; ao tauia n ami onimaki.”6
Ia tia ni karaua n iangoia bwa tera ae nanonaki ni kateimatoaiia inanon korakoran te onimaki. I kakoaua bwa e raonaki ma anua n tangira, te antaeka, te nanoanga ao te karinerine. Are nanona bwa a na rikirake ni bon aia tai ao ni karekea aia koaua bwa e aonga ni buokiia n namakina ana tangira aia Tia Kamaiu. E tangiriira bwa ti na kabanea riki ara tai ibukiia ao ni kauarerekea ibukira ke ake tabeman. E nanonaki n anne bwa e na karako te taetae ni kawai ma e na korakora riki te ongoraa, ao e nako riki. Ti riai n tangiriia, ni kakorakoraiia ao ni kaitauiia n angiin te tai ibukin korakoraia ao aia kaokaonimaki nakon Te Atua. Kabaneana, ti riai ni kabanea korakorara bwa ti na teimatoa ni kaan mangaiia—n arora naba ngkai ti kaan ma Te Atua.
Ibukiia ake a rotaki n aorakin te iango, kateimatoai ngkamii nakon ami berita, e ngae ngkana koaki namakina ana tangira te Atua n te tai aei. Karaoi bwaai ni kabane aika a wene ni mwaakara ao ngkanne “tei naba … n noora ana kamaiu te Atua, ao ibukin baina bwa e na kaotaki.”7
I kakoaua bwa Iesu Kristo bon ara Tia Kamaiu. E ataira. E tangiriira ao E na bon taningaira. N ara tai ni kataaki n ara utu, I a tia n ata aron Kanna nakoira. A koaua Ana berita:
Tai maaku, Ngai raom; ao, tai bwarannano,
Bwa Ngai Atuam ao N na buokiko.
Ko na korakora, man tei, iaon waem, …
Bwa Ko na teimatoa n te raoiroi, ao baim a na korakora.
Atakina bwa e kanga matoan aara, ti na teimatoa ni kukurei n tataekinna:
Te tamnei are iaon Iesu e rara ni motikarawana
N na bon aki, I aki kona, n oki nakon ana kairiribai;
Te tamnei anne, e ngae ngke moone e na kataia n ioia, …
N na bon aki, a na bon akea, N na bon aki, a na bon akea te mwaninga!8
N aran Iesu Kristo, amen.