Rikirakem Riki Inanon Kristo: Te Taetae ni Kaikonaki Iaon te Kabwatete

Iroun Unimwaane Clark G. Gilbert

Man te Itingaun

N ana tai te Uea, e aki moanaki man te tabo are ti waaki mai iai, ma te tabo are ti na nako iai ae bon kakawaki riki.

Ngke te ataeinimwaane ngai, ao a rawata au iango. N te taina imwiin te reirei, I titiraki, “Tinau, tera arou ngkana I a ikawai: te tia bwatiketibooro ae mwatai ke te titaa n te anene?” E ngae n anne, bon “akea te tarena iroun” Clark ke te konabwai n takakaro ke n anene. E ngae ngke e rangi ni mwaiti au kekeiaki, ma I bon aki butimwaeaki nakon ana burokuraem ni kamatebwai te reirei ibukin are iaona. N tokina a iangoia au tia reirei ae I riai ni kabanea au tai ni bwain te reirei. N te tai teuana, I karikirakea te nano ni kan kamatebwai. Bon inanon tain karaoan au mition i Tiabaan are I a namakinna bwa wanawanau ao te atatai ni maiun tamneiu e a tabe n rikirake. I reitinako ni mwakuri korakora. Ma n te moan tai ni maiu, I kairekerekea te Uea ma rikirakeu, ao anne are e a karekea te bitaki.

Tariu ao mwaneu, inanon te Ekaretia aei, ti kakoaua ae iai te konabwai mai ieta irouia natin te Atua ni kabane ni kona n riki n aron Kristo. N ana tai te Uea, e tabeaianga riki ma ara kekeiaki ao rikirakera ma nakon te tabo are ti na nako iai ae kakawaki riki.¹

Ni katamneia te reirei aei, N na kabonganai tabeua numera aika bebete. Tai kubanako ngkana kam ongo te taeka numera inanon te maungatabu ni kabuta aei. Ara tia reirei n te numera i BYU–Idaho e kamatoaa nakoiu bwa e ngae ngkana ko a tibwa reireiniko n te numera e na bon reke naba iroum. E moanaki ma te bomura ibukin te rain. Te tabo are a kaitibo iai, ibukin ara kaantaninga, bon moan ara rain. Te tabo are a kaitibo iai rain e bon kona ni moanaki mai ieta n te kurabu ke mai inano n te kurabu. Kabwateten te rain e kona ni bwatete nako eta ke rikaaki n te kurabu.

A bane ni kakaokoro moanakin maiura—ti moanna n taabo aika kakaokoro ma aekan nako baike a reke ni maiura. Tabeman a bungiaki inanon te maiuraoi, n reke aroia ae tamaroa. Tabeman a moanna man taian kangaanga aika a matoatoa ao n taraa n aki eti.² Ma imwiina ao ti a tabe n rikirake inanon te kekeiaki inanon maiura. Tarakin maiura n taai aika a na roko aki reke man te tabo are ti waaki mai iai ma bon man arora ni kekeiaki. Iesu Kristo e noori ara konabwai e ngae ngke tera arora inanon moan waakira. E noria irouia aomata ake a bubuti, a buakaka, ao irouia ake a taonaki n te aoraki. E noria naba iroun te tia akawa, te tia ikoikoti ana mwane te Uea, ao te tia onimaki. E ngae ngke ti waaki mai ia, ma Kristo e taraa riki are ti karaoia nakon bwaai ake ti karekei.³ Ngkai te aonaaba e taraa are ti karekea, te Atua e taraa aron ara kekeiaki. N ana numera te Uea, E karaoa ana kabanea ni konaa ni buokiira bwa ti aonga ni kekeiaki ni karokoira i karawa.

Te reirei aei e na riai ni uota te mwengaraoi nakoia te koraki ake a kekeiaki ao te tei moa nakoia ake a mwaiti ae a karekea. N na moanna moa n taetae nakoia naake iai aia kangaanga ni moan aia waaki, n raonaki ma kainnano, uarereke aron reken aia rerirei, ao kangaanga n te utu. Tabeman a kaitara ma kangaanga n rabwataia, aorakin te iango, rikiia ae karika tarakiia ae okoro.⁴ Kam riai n ataia ngkamii ake iai ami kanganga inanon ami moan waaki bwa e a tai ara kangaanga te Tia Kamaiu. E uota “iaona [mamarara], bwa e [na] on nanoia n te nanoanga, … bwa e [na] ataia … bwa e na kanga ni [buokiira] ni kaineti [ma] mamarara.”⁵

N na tibwauaa nakoimi uoua tein au kaunganano nakoia ake iai aia kanganga n aia moan waaki. Te moan, kabanea nanom nakon te tabo are ko na uaiakinna ma tiaki te tabo are ko moan waaki mai iai. E na rangi ni kairua ngkana ko na katinanikui bwaai ake a riki nakoim—bon bwaai aika koaua ao a riai n taekinaki. Ma ngkana ko rangi ni kabanea am tai iaon aron tein am moan waaki ao ikanne are e na kona ni kaota arom ao ni kakerikaaka am konabwai n rinerine.⁶

N ririki aika nako ao I mwakuri ma teuana te botaki n roronrikirake i Boston, Massachusetts, ake a boou nakon te Ekaretia ao nakon ana kantaninga te Ekaretia. E rangi ni korakora te kariiri ni kamangaoa au nanoanga ao tabeaiangau ibukin aia waaki naake a karekea te iango ni kan kamangora aron ana kainibaire te Atua.⁷ Ma imwiina ao I a ataia bwa te kawai ae te kabanea ni korakora ibukin kaotan au tangira bwa n na aki karinanoa te bwai are I ataia bwa eti. Ma bwaai ni kabane aika I atai bwa ti na karaoia, ti bane ni mwakuriia iaon aia konabwai, ao imwiina e a tabe ni kekerake aron aia kekeiaki. Rikirakeia inanon te euangkerio e karaurau ma e teimatoa. N te bong aei ao a tia ni karaoi aia mition, a tia ni bane aia tai man taian kuura n reirei, a tia ni mare n te tembora, ao n riki bwa aomata aika rianako man konabwai inanon maiuiia.

Te kauoua, kairekerekea te Uea inanon am tai ni kekeiaki. Ngke I beretitenti n te BYU–Pathway n te Aonaba, ao I uringa tekatekau inanon te bootaki n taromauri ae bubura i Lima, Peru, are te tia taetae iai bon Unimwaane Carlos A. Godoy. Ngke e taraia kaain te taromauri, e korakora nanona n iangoia ataei n te iuniwetiri n te moan roro aika kakaoninaki. Tao E kabotaua ma arona ngke e waaki i bon irouna n rinanon kangaanga aikanne, e taetae Unimwaane Godoy n rangi n rootaki: E na “buokii ngkami te Uea nakon are iaon are kam kona ni karekea ibukimi. [Ngaia are] kairiira te Uea inanon ami waaki.”⁸ Te burabeti Nibwaai e reirei “bwa bon rinanon te akoi are ti kamaiuaki iai, i mwin bwaai ni kabane ake ti kona ni karaoi.”⁹ Ti riai ni karaoa ara kabanea ni kona,¹⁰ are irianaki ma te rairannano, ma bon tii rinanon ana tangira te Uea ae ti kona n ataa iai arora ae mai iroun te Atua.¹¹

Kabaneana, n na tibwauaa nakoimi uoua anga n ibuobuoki ibukiia ake a nakoraoi aroia n aia moan waaki. Te moan, ti kona ni kaota te nanorinano ibukin bwaai ake ti aki karikii ibon iroura? Te Beretitenti ngkoa n te BYU ae Rex E. Lee e taekina aei nakoia ana ataei, “Ti a tia ni bane ni mooi man mwanibwa aika tiaki kenii ao ni kabueeira man taian ai aika tiaki kaurai.”¹² E weteia ngkanne ana ataei aikai bwa a na kaokii ao ni manga kanoai taian mwanibwa n ataibwai ake a tia ni kenaki irouia moan bwaeoniia. Ara aki konabwai ni manga unika te onaroka are e unikaki irouia tabeman e na bon kona n titebo ma kaokan te tarena ae akea rikirakena.

Te kauoua, kabanean ara tai iaon tamaroan ara moan waaki e na kona naba ni manga kamwaneira n ara namakin are aongkoa tia tabe n tokanikai ma ni koauana ao bon akea keeraken ara kekeiaki . E reireiniira te burobeetia mai Harvard ae Clayton M. Christensen bwa te koraki ake tenaan kabanea ni konabwai bon tenaan kabanea naba n nanorinano bukina bwa a kakoauaa ae a konaa ni kaetaki iroun ao n reirei mai irouia aomata ni kabane.¹³ Unimwaane D. Todd Christofferson e reireiniira bwa ti “na riai n [ukorii kawai] ni butimwaai ao ni kakaea kaetakira.”¹⁴ E ngae ngke e taraa n nakoraoi bwaai ni kabane, tina bon riai naba n kakaei aanga bwa tina karikirakeira rinanon te tataro ni bubuti.

N aki taraia bwa moan waakira e nakoraoi ke e kangaanga, ti na kina riki ara konabwai ti ngkana ti karika te Atua bwa raora. I marooro n te tai ae aki maan n nako ma te tia reirei ae kinaaki are e kakaea rongorongon aron nakoraoin te BYU–Pathway. Bon te aomata ae wanawana ao ana titiraki e rangi n nano, ma e oti bwa e tangira kaekaana man ana taratara te aonaaba. I tibwauaia mangaia ara burokuraem iaon kateimatoaia ao buokaia ataei n ara aanga reirei. Ma I kabanea n au taetae ni kangai, “Aikai bon waaki aika raraoi, ma oin raoi bukin rikirakeia ara ataei bon ibukina bwa ti reireiniia aroia ae e rine riki. Iangoia ngkana ko tuangaki bwa inanon maium, ao ko na bon aki kona n tokanikai. Ao ngkanne iangoi mwiin reireiam ae bon natin te Atua ngkoe ao iai am konabwai ae moan te rine.” E tei teutana, ao imwiina e kaeka n ae bebete, “E rangi n ringa te nano anne.”

Tariu ao mwaneu, teuana te kakai ae riki man aei, ana Ekaretia te Uea, bwa ngaira n tatabemaniira nako ti kona ni karekea are iaona rinanon Kristo. Akea riki te botaki ae I ataia ae kona n anganiia kaaina aia tai bwa ana beku, ni kaoka te ibuobuoki, n rairannano, ao n riki bwa aomata aika tamaroa. Ngkana ara moan waaki bwa e reke ni mwaiti ke e matoatoa ni maiura, ti riai ni kateia imatara bwa ara kekeiaki e kaeineta karawa. Ngkana ti karaoia, Kristo e na karietaira nakon are iaona riki. N aran Iesu Kristo, amen.

Bwaai aika a na taraaki

1. Taraa Clark G. Gilbert, “The Mismeasure of Man” (BYU–Pathway Worldwide devotional, Tianuare. 12, 2021), byupathway.org/speeches. Inanon te rongorongo aei ao I kunea aron te aonaaba ni kataunarii ana konabwai te aomata. E ngae ngke naake iai nanoia n taraa kakawakin te mwakuri irouia taan kamatebwai n te iango are a boutokaa kateimatoaan rikirakera (Angela Duckworth) ao ana konabwai te iango (Carol S. Dweck) aki kona n ataa raoi ana kona bwai te aomata ngkana a tii bane aia tai iaon karekean te rabakau ao n aki taraa ara konabwai rinanon Kristo.

2. Taraa Dale G. Renlund, “Infuriating Unfairness,” Liahona, Meei 2021, 41–45.

3. Taraa Mataio 25:14–30. N te kaikonaki iaon taia tarena, a anganki tenaan toro aia tarena aika kakaokoro mwaitiia mai iroun aia toka. Ma motin taekana e aki taraaki man mwaitin are karekeaki ma bon man aron tararuakina. Bon te rikirake are e kaira te Uea bwa e na taekina, “E raoiroi, te toro ae raoiroi man kakaonimaki; ko a tia ni kakaonimaki nakon baika karako, N na karaoiko bwa mataniwini baika bati.” (Mataio 25:21).

4. Taraa Motiaea 3:19. Teuana naba te iango bwa tao arora ni kairaki n ana waaki te rabwata e na kaokoro ni kaineti ma bon rikira are ti mena inanona. N aron ae a bane ni kakaokoro bwai n tangira ake ti karekei, bon iai naba kakaokoro n ara konabwai n rabwatara, ara iango, ao n ara kangaanga aika ti riai ni bwaati arora n tokanikai iaoia.

5. Aramwa 7:11–12. E aki tii kona ni buokiira Kristo bwa ti na tokanikai iaon ara bure rinanon te rairannano, ma e ataa naba aron kabebeteara inanon maiura bwa ibukina bwa, rinanon Ana Mwakuri ni kamaiu, E a tia n anganna namakinan ao te tokanikai iaon rawawataia aomata ni kabane.

6. E kauringiira Unimwaane David A. Bednar bwa ngaira bon tabonibai ao ti riai ni mwakuri bon ibukira. Ngkana ti kabwarabwaraira man kanikinaa n te aonaaba, ti tiana ara konabwai mai ieta ao, ni karaoan aei, ti na tiana ara konabwai n rinerine. (Taraa David A. Bednar, “And Nothing Shall Offend Them,” Liahona, Nobemwa. 2006, 89–92.)

7. Taraa Russell M. Nelson, “The Love and Laws of God” (Brigham Young University devotional, Tebetembwa. 17, 2019), speeches.byu.edu. N tain te botaki n taromauri I BYU, ao e reireiniira Beretitenti Nelson bwa bukina bwa e tangirira te Atua ma Natina, A tia n anganira tuua ao baike ti na irii aika a na buokiira. “Ana tua te Atua e kaota Ana tangira ibukira n tatabemaniira nako. Ana tua nako e kamanoira n tamneira ao ni buokiira bwa ti na rikirake n te maiu ae akea tokina” (iteraniba 2).

8. Carlos A. Godoy, BYU–Pathway Connections Conference, Lima, Peru, Meei 3, 2018.

9. 2 Nibwaai 25:23.

10. Au karo a katea aia kamatenan.o ana utu Gilbert ni “KARAOA AM KABANEA N TAMAROA.” Te kawai naba teuana ni katamneia te kaikonaki iaon te kabwatete bon man kamatataan ae ngkana ti karaoa ara kabanea n tamaroa, ti kona n onimakina te Atua n rin ni karekea te bitaki.

11. Taraa Clark G. Gilbert, “From Grit to Grace” (BYU–Pathway Worldwide devotional, Tebetembwa. 25, 2018), byupathway.org/speeches. Inanon te reirei aei ao I kunea te iango bwa e ngae ngke ti riai ni mwakuri korakora ao ni karekea te katei ae nakoraoi n te boaaki, ao ibukin kinaakin raoi ara konabwai iroun Iesu Kristo, ti riai n reiakinna ni karekea Ana akoi.

12. Rex E. Lee, “Some Thoughts about Butterflies, Replenishment, Environmentalism, and Ownership(Brigham Young University devotional, Tebetembwa. 15, 1992), 2, speeches.byu.edu; taraa naba Te Tua Kaua 6:11.

13. Taraa Clayton M. Christensen, “How Will You Measure Your Life?,” Harvard Business Review, Turai–Aokati. 2010, hbr.org. E moan kanakoaki te rongorongo aei bwa te marooro n te Class Day ae kanoan te angabeeba n te Harvard Business School. N ana rongorongo, te Burobetia Christensen e kauringiia ataein ana reirei bwa a na aki kaokoroa te onimakinaki man te nanorinano, e kauringiia bwa reitinakoia ni waaki rinanon te maiu a riai ni bwaina te nanorinano n ukoukori kaetakiia ao n reirei mairouia tabeman.

14. D. Todd Christofferson, “As Many as I Love, I Rebuke and Chasten,” Liahona, Meei 2011, 97.