Onimaki Riki

Iroun Unimwaane Gerrit W. Gong

Man te Kooram n Abotoro n te Tengaun ma Uoman

Onimakinan te Atua ao bon ngaira imarenara e uoti kakabwaia mai karawa.

N te taina, ngke I uarereke, e reke au iango bwa N na birinako man mweengau. N arou ngke I ataeinimwane, I namakinna bwa akea ae tangirai.

Tinau e ongora ao e karaua nanou n tuangngai bwa e tangiria. I a mano raoi ni mweengau.

Ko a tia n namakinna ae kanga ko birinako man mweengam? N aron ae ririki, te birinako man te mweenga nanona te onimaki e a tia n taenako ke n uruaki—onimakinara, imarenara, ma te Atua. Ngkana e kangaanga te onimaki, ti aki ataia bwa ti na kanga ni manga onimaki riki.

Au rongorongo n te bong aei, okiran mweengam imwiin kitanakina, te Atua e na roko ni kaitibo mangaira.¹ Irouna ti kona ni karekea te onimaki, ninikoria, wanawana ao te motinnano ni manga onimaki riki. N aron anne, E bubutiira bwa ti na kateimatoa te ota iaora imarenara, bwa tina ikabwarabure ao ni kauarerekea motikan taekara imarenara, bwa e aonga Ana Ekaretia ni kona n riki bwa te tabo ae ti mweengaraoi iai, ngkana ti roko n te moan tai iai ke ti a oki.

Te onimaki bon te mwakuri n onimaki. Te Atua e kawakina onimakinara. E ngae n anne, ana onimaki te aomata e kona ni mamaara ke n uruaki ngkana:

• Te rao, raom ni bitineti, ke temanna ae e onimakinna e aki kokoaua, e kammarakira, ke e aonikaira.²

• Te buu ni mare e aki kokoaua.

• Tao n aron ae e aki kantaningaki, temanna ae ti tangiria e mate, ikoaki, ke aoraki.

• Ti kaitara te titiraki n te euangkerio ae aki kantaningaaki, tao te bwai ae kaineti ma rongorongon te Ekaretia ke tuan te Ekaretia, ao temanna e taekinna bwa ara ekaretia e karabaa ke e aki taekina te koaua.

Kangaanga tabeua a kona n aki rangi ni bwarabwara raoi ma te tabeaianga bon titebo.

Tao ti aki roroko n te Taromauri, ti aki namakinna bwa ti bootau, ti namakina motikan taekara irouia tabeman.

Ke, e ngae ngke ti a tia ni karaoi bwaai ake a kantaningaaki, aki reke mwiina are ti kantaningaia. N aki tarai kangaanga ake ti mena inanona ma te Tamnei ae Raoiroi, ti kona n tuai namakinna bwa ti ataia bwa te Atua e maiu ke e koaua te euangkerio.

A mwaiti n te bong aei aika a namakina kainnanoan te onimakinaki n reitakiia ma aomata ao irouia te botannaomata n taai aikai.³

Ngkai ti kauringa te onimaki, ti ataia bwa te Atua bon Atuan te koaua, ao “e aki kona ni kewe.”⁴ Ti ataia bwa te koaua bon ataakin te bwai n aroia, ngkoa, ao n taai aika a na roko.⁵ Ti ataia bwa te kaotioti ao te kaunganano e reitinako ni kakoroa nanon te koaua ae aki bibitaki n aroaro aika a bibitaki.

Ti ataia bwa uruakin berita aika tabu a urui naano. “I karaoi bwaai aika burababa,” e taku. “Ko aki kona ni kabwara au bure?” Te bumwaane ma kainnabana a kona n taubai, ni kantaningaia bwa a na manga onimaki riki. N te tabo ae kaokoro, te bure ae mena n te o ni kaikain e kauringnga, “Ngke arona bwa I a tia ni kawakina Tuan te Mauri, I bon aki kona n roko ikai n te bong aei.”

Ti ataia bwa te kimwareirei ni kawain te Uea ni berita, ao wewete ni beku ibukina n Ana Ekaretia bon te kakao n namakina onimakinan te Atua ao ana tangira ibukira ao n tatabemaniira. Kain te ekaretia, n raonaki ma ikawai ake a tuai n iein, a beku n tainako ni kabuta te Ekaretia ao n ara komunite.

Man te kaotioti, te bitiobiriki e weteia taanga ni kairake bwa a na beku n te netiuri n te uoote. N te moan tai, te buumwaane e tekateka n te koona, ni kaokoroa ao ni kararoa. Teutana imwiin teutana, e a moangare ma ataei. Imwiina, taanga a kaota te kakaitau. Mai imwaina, a taku, te buuaine e tangiriia ataei, te buumwaane e aki tangiriia. Ngkai, e a tia te beku ni bitiia ao ni katiteuanaia. E uota naba te kimwareirei nakoia ataei inanon ieiniia ao mweengaia.

N te kaawa teuana, te tina ae te kairake ma natina uoman ao kainnabana a miimi man tounako ma a butimwaia ngke e weteaki bwa e na beku bwa te beretitenti n te Bootaki n Aine. N te tai ae uarereke imwiina, te angibuaka n te aiti e karika maten te iti, ao akean bwaai n titoa ao mweenga a mwaitorotoro kanga baoki n aiti. Ibukina bwa iai aia iti ao te bwai ni kaabue, te utu aei e butimwaeia utu ake tabeua ao bon aomata nakon mweengaia ni kabueia ni karokoa e manga maiu te iti.

E riki ni bwai te onimaki ngkana ti karaoi bwaai aika matoatoa ma te onimaki. Ibuobuoki ao anganano a rikirake korakoraia ao a kaitiaki naano. Onimakinan te Atua ao ngaira imarenara e uoti kakabwaia mai karawa.

Imwiin marurungina man te kaentia, te tari ae kakaonimaki e moanaki n te kaa. N onea mwiin namakinan te nanokawaki, e tataromwaaka n titiraki, “Tera ae I kona n reiakinna ngkai I rinanon aei?” Inanon te iunite are e tararuaki raoi iai, e namakina raraoman ana neeti ibukin kainnabana ma natina. Te aoraki inanon marakina e karekei kaeka ngkai e onimakina te Atua ao ni buokiia tabeman.

Ngkai e tataninga i tinanikun ana aobiti te beretitenti n te titeiki te tari ma raraomana ibukin tamnei aika buakaka, e tataro te beretitenti n te titeiki bwa e na ata arona n ibuobuoki. Te namakin ae itiaki e roko, “Kauka te mataroa ao karina te tari.” Ma te onimaki ao onimakinan te Atua e na ibuobuoki, te tia kairiiri n te nakoanibonga e kauka te mataroa ao e irabwati ma te tari. A uaia n namakina te bitaki n tangira ao onimakinan te Atua imarenaia. Ma e kakukurei, bwa te tari e a waaki n rairananona ao ni bitaki.

Ngkai arora n tatabemaniira a bon ataaki iroura, reirein te euangkerio ao te Tamnei ae Raoiroi a kona ni buokiira n ataia ngkana, ni kanga, ao nningai ae ti na manga onimakiniia riki iai tabeman. Ngkana e uruaki te onimaki ke e burebureaki, marakinnano ao onimakinan koaua ake ko kakoauai bwa a kairua a bon riki; ai aron naba kainnanoan te motinnano n ataia ngkana te onimaki ao te ninikoria a tau ni manga onimaki riki n arora n aomata.

E ngae n anne, ma te karinerine nakon te Atua ao kaotioti bon ibukira, Beretitenti Russell M. Nelson e kamatoa ni kakoaua, “Ko riai n aki titiraki bwa antai ae mano onimakinana.”⁶ Ti kona n onimakina te Atua n taainako. Te Uea e kinaira riki ao e tangiriira nakon are ti ataia ke n tangiriira i bon iroura. Ana tangira ae akea tiana ao ana atatai ae kororaoi n taai aika nako, ae ngkai ao aika ana roko e kateimatoai Ana berita aika tabu ao berita bwa a koaua.

Onimakina te bwai are e taekinaki inanon koroboki aika a tabu bwa “inanon waakin te tai.”⁷ Ma ana kakabwaia te Atua, waakin te tai, ao reitinakora n onimaki ao n ongotaeka, ti kona iai ni karekea te raunnano ao te rau.

E karaunano te Uea:

“Tao e tang te aba ni kangaina, ma e kakatonga te aba n te ingabong.”⁸

“Kona kaki I [aon] Iehova rawawatam ae E anganiko, ao E na buokiko.”⁹

“Akea te rawawata iaon te aba ae e aki kona ni kamaoaki i karawa.”¹⁰

Onimakina te Atua¹¹ ao Ana kakai. Ngaira ao arora n reitaki a kona ni bitaki. Rinanon Ana Mwakuri ni Kamaiu Kristo te Uea, ti kona ni katikui arora n iangoira i bon iroura ao n riki bwa natin te Atua, nimamannei, nanorinano,¹² n onrake n te onimaki ao te onimakinaki ae tau. Ngkana ti rairi nanora, ngkana ti kaoti ara bure ao ti kitani, te Uea e taku, N na aki manga uring ana bure.¹³ Tiaki nanona bwa E na mwaninga, ma n te aro ae kamimi, e tara n rineia bwa E na aki manga uringi, n ai arora naba.

Onimakina ana kairiiri te Atua n atatai ma te wanawana. Ti kona n ikabwarabure imarenara n te tai ae riai n aron are e taekinna te Uea bwa ti riai ni karaoia,¹⁴ ngkai n arora “ni wanawana n ai aroia naeta, ao n nimamanei n ai aroia taobe.”¹⁵

N tabetai ngkai a rang uruaki nanora ao n raraoma, ti waekoa n nakon ana karaunano ao ana kairiiri te Tamnei ae Raoiroi.¹⁶ Te motikitaeka ao te kabwarabure a uaia ni waaki man kinaakin te kaairua. N angiin te tai te motikitaeka e boboto iaon taai aika a nako. Te kabwarabure e taraa te kainaomataki n taai aika a na roko. “Bukina bwa E aki kanakomaia Natina te Atua nako aon te aba ba E na kabuakaka te aba; ma E kanakomaia ba e na kamaiuaki te aba i Rouna.”¹⁷

Te Abotoro Bauro e titiraki, “Antai ae e na karaureira ma tangirara iroun Kristo?” E kaeka, “E aki kona te mate, ke te maiu, … ke te rietata, ke te rinano, … e aki kona ni karaureira ma tangirara iroun te Atua, are I nanoni Kristo Iesu are ara Uea.”¹⁸ Ma, iai temanna ae e kona ni karaureira mairoun te Atua ao Iesu Kristo—ao te aomata anne bon ngaira, i bon iroura. N aron are e taekinna Itaia, “Ami bure a karabaa matana nako imi.”¹⁹

Man ana tangira mai ieta ao ana tua, ti bukintaeka ibukin ara rinerine ao mwiia ake ana riki. Ma ana tangira ni kamaiu ara Tia Kamaiu “akea tiana ma tokina.”²⁰ Ngkana ti a tauraoi n okira mweengara, riki ngkana ti a “rangi n kiraroa,”²¹ te Atua e tauraoi nanona ae korakora ni butimwaira, ma te kukurei n anga bwai aika tamaroa ake Irouna.²²

Beretitenti J. Reuben Clark e taku, “I kakoaua bwa Tamara are i Karawa e tangiria ni kamaiuia natina n tatabemaniia, … ngaia are n ana motikitaeka ao ana nanoanga e na anganiira te kanuaanga ae mwaiti ibukin ara mwakuri, e na anganaiira ni kabane are e kona, ao ni boon mwiina, I kakoaua bwa e na bon katoka iaora te katuua ae te kabanea n uarereke are e kona n anga.”²³

Iaon te kaibangaki, ao e bubuti ara Tia Kamaiu ae nanoanga nakon Tamana ni kangai “Tamau, ko na kabwara aia bure” ma ”Tamau e kabarai aia bure, ba a aki ata ae a karaoia.”²⁴ Iai nanon ara rinerine ao inaomatara bukina ngkai ti bukintaeka imatan te Atua ao ngaira ibukin arora, ibukin te bwai are ti ataia ke ti karaoi. Ma te kakaitau, ti kona n onimakina ana momotiraoi te Atua ao ana nanoanga ae kororaoi ni motiki taekara ibukin nanora ao ara mwakuri.

Ti kainna n aron are ti waaki iai—ma a na nanoanga te Atua ngkai ngaira n tatabemaniira ti nakon mweengara nako Ina ao nakoira n tatabemaniira.

Kam uringa ana taetae ni kaikonaki Iesu Kristo iroun teuare iai uoman natina?²⁵ Te nati are temanna e kiitana mweengana ao e bakataei tibwangana. Ngke a bane ana bwai, te nati aei e oki nakon mweengana. Te nati are temanna, ae namakinna bwa e a tia ni kawakin tua “Noria, n ririki aika bati,”²⁶ e aki tangiria ni butimwaea tarina nakon mweengana.

Tariu ao mwaneu, ti kona n taiaoka ni iangoa Iesu ni butiia bwa e na kauki nanora, ni kaotaira, nanoangaira, ma te nanorinano, ao n noorira n arora aika uoua?

N aron te moan nati te mwaane ke te aine, ti kona n tionako ao imwiina ti ukoukora okiran mweengara. Te Atua e taningaira ni butimwaira.

Ao n aron te nati te mwaane ke te aine are temanna, te Atua e kakukureira ngkai ti bane n oki nako Ina. E kaoira bwa ti na karaoa ara taromauri, kooram, kiraati, ao ni kauki waaki ni kakukurei, aika onimakinaki, mano—mweenga ibukira n tatabemaniira. Ma te akoi, mataata, ao te ikarinerine, ti ukoukora te Uea n tatabemaniira ao n tataro ni butimwaea Ana euangkeiro ae kaokaki ni kakabwaiaia ni kabane.

Mwanangara ni maiura e kaineti nakoira n tatabemaniira, ma ti kona ni manga oki riki nakon te Atua ao Natina ae Tangira rinanon onimakinan te Atua, onimakinara, ao bon ngaira.²⁷ Iesu e kaotia, “Tai maku, ko na ti onimaki naba.”²⁸ Ai aron naba te Burabeti Iotebwa, n aki maku ti bia onimakina ana tararua Tamara are i Karawa.²⁹ Tariu ao mwaneu aika kam tangiraki, raoraou aika kam tangiraki, taiaoka taraia riki ibukin te onimaki—te kakai are E beritanna nakoimi n te bong aei. N aran Iesu Kristo ae tabu ao man mimitong, amen.

Bwaai aika a na taraaki

1. Taraa Ruka 15:20.

2. Te katooto, I kinaia ao I mataiakiniia aomata ake a mwakuri inanon te karineaki inanon ririki ni kabwakai taraau ni bitineti ake a katukaki nakoia irouia tabeman.

3. Te onimaki bon te bwai ae kakaawaki n aron te aomata ibuakon te botanaomata, ao n ibuobuoki nakon kaubwain te aba, te inonoo, ao n nakoraoin te tautaeka ao kamwengaraoi, (taraa, te katooto, Francis Fukuyama, Trust: The Social Virtues and the Creation of Prosperity [1995], 3–59).

4. Ita 3:12; tara naba Enoti 1:6.

5. Taraa Reirei ao Berita aika Tabu 93:24; taraa naba Iakobwa 4:13.

6. Russell M. Nelson, “Te Kaotioti ibukin te Ekaretia, Te Kaoitoti ibukin Maiura,” Riaona, Meei 2018, 95.

7. “Tion, inanon wakin te tai, e uotaki rake nako karawa” (Mote 7:21).

8. Taian Areru 30:5.

9. “Ai Akoira ana tua te Atua,” Boki n Anene, nambwa. 125; taraa naba Taian Areru 55:22: “Cast thy burden upon the Lord, and he shall sustain thee,” aer e taekinaki inanon “Cast Thy Burden upon the Lord,” Bokin n Anene, nambwa. 110.

10. “Come, Ye Disconsolate,” Boki n Anene, nambwa. 115.

11. Taraa Aramwa 5:13.

12. Taraa Motiaea 3:19.

13. Taraa Reirei ao Berita aika Tabu 58:42–43.

14. Taraa Reirei ao Berita aika Tabu 64:10.

15. Mataio 10:16; taraa naba Aramwa 18:22.

16. Tara 3 Nibwaai 9:20.

17. Ioane 3:17.

18. I-Rom 8:35, 38–39.

19. Itaia 59:2.

20. Aramwa 34:10.

21. Ruka 15:20.

22. Uota mai te ninira are moan te raoiroi, burenibai, kau, ao bon te kaotetei ae kamarikaki (taraa Ruka 15:22–23).

23. J. Reuben Clark Jr., in Conference Report, Okitobwa. 1953, 84.

24. Ruka 23:34; taraa naba Mataio 6:12—“Kabara ara bure mai roura, n ai arora ngkai ti kabara aia bure akana bure nako ira”—are e kaineti ma ara konabwai bwa a na kabwaraaki ara bure nakon nanora ni kabwarai buure.

25. Taraa Ruka 15:11–32.

26. Ruka 15:29.

27. Ti kona ni karekei kakabwaia n te “mwaaka n atua” rinanon otenanti ao berita aika tabu ake a kaokaki, n aron are e reirei Reirei ao Berita aika Tabu 84:20 .

28. Mareko 5:36; taraa naba Ruka 8:50.

29. Taraa “Joseph Smith’s First Prayer,” Boki n Anene, nambwa. 26.