I Tataro bwa E na Kabonganaira
Mwakuri aika a uarereke aika barongaaki a karika te bitaki ae korakora, ni kamwaiti bwaai ake a karaoi aomata ngkai a riki bwa ana reirei Iesu Kristo.
Te kukii aei e karaoaki man te buraawa ae aki karikaki ao koraan te pistachio bon anganano ni kakaitau. E karaoaki iroun te utu ae Kadado, ake inanon tebwina te ririki, a bwaibwai n teniua tabo ni karao kariki i Damascus, Syria. Ngke e roko te buaka, e katokaki karokoan amwarake nakon te kaawa. Te utu ae Kadado a rootaki n te baki. Ni korakoran te kanganga aei, te bootaki ae te Latter-day Saint Charities ao tabeman taan mwakuri aika ninikoria n te Rahma Worldwide a waaki ni tibwai amwarake aika kabuebue, n raonaki ma miiriki ibukiia ataei aika uarereke. Imwiin te tai ae kanganga, te utu a manga wakina maiuia—n aron naba aia tabo ni karao kariki—teuana riki te tai n te aba ae boou.
N aki maan nako, e roko te baoki ni kuuki n aobitin te Ekaretia ma rongorongona ae kangai: “E raka iaon uoua namwakaina, ae ti karekei amwarake man te tabo ni kuuka n te Rahma–Latter-day Saint [Chariteis]. Ngke arona bwa akea tina [kaman] bak[i] ni karokoa ti mate. Taiaoka butimwaea aei … katotongan amwarake man au titoa bwa kaotan ara kakaitau. I butiia te Atua ae Mwaaka bwa e na kakabwaiai ngkami … ni bwaai ni kabane ake kam karaoi.”1
Te kukii ni kakaitau ao ni kanuring. E nanonaki ibukimi. Nakoia ake a tia n tataro imwiin matakuakinan te rongorongo, nakoia ni kabane ake a tia n anganano ngke e angabuaka ke ake a tia n angamwane ma te akoi nakon te buoka nakon te aonaaba; n onimakinna bwa e na ibuobuoki n aro tabeua, kam rabwa.
Tibwanga mai Karawa n Tararua ibukiia aika Kainnano
Ana Ekaretia Iesu Kristo iai tibwangana are e anganaki mairoun te Atua bwa e na tararuaia aika kainnano.2 Bon teuana te boua n te mwakuri ni kamaiu ao te karietataki.3 Te bwai are e koaua n ana tai Aramwa e bon koaua naba ibukira: “Ao ngkanne, n tain nakoraoin aroia, aki kanakoia aika akea karabaia, ke ake a baki, ke ake a taka, ke ake a aoraki, ke ake a tuai n amwarake man mooi; ke ake aki mena nanoia iaon te kaubwai, mangaia ae a bon akoi nakoia aomata ni kabane, ake a kara ao ake a ataei, ake a kabureaki ao ake a inaomata, te mwaane ao te aine, mai tinanikun te ekaretia ke mai i nanon te ekaretia, n akea te inanonano nakoia aomata n aron kainnanoia.”4
Te Ekaretia e kaeka nakon tibwangana are e anganaki mairoun te Atua ni kawai aika a rang bati, n raonaki ma:
-
te mwakuri n ibuobuoki are ti karaoia rinanon te Bootaki n Aine, kooram n te nakoanibonga, ao kiraati;
-
te aki mamatam ao kabonganan angabwai n aki mamatam;
-
tabo ni man ao tabo ni karao tin n amwarake;
-
tienta ni butimwai ibukiia ake a boou n te aba;
-
burokuraem n ibuobuoki ibukiia ake n te o ni kaikain;
-
mwakuri n ibuobuoki ibukiia aomata nako man te Ekaretia;
-
ao te JustServe app, are e karekeia taan ibuobuoki nakon tibwangaia n ibuobuoki.
Aikai kawai ni kabane, aika barongaaki rinanon te nakoanibonga, are ikotakin mwakuri aika uarereke a karika te bitaki ae korakora, ni kamwaiti bwaai ake a karaoi aomata ngkai a riki bwa ana reirei Iesu Kristo.
Burabeti Iai Bukinaia ibukin te Aonaaba ae Bwanin
Burabeti iai tibwangaia n tararua te aonaaba ae bwanin, tiaki ti ibukiia kain te Ekaretia. I kona n ribooti man oin au taneiai bwa a kangaa kain te Moan Beretitentii n aroia n tatabemaniia ni kabanea nanoia nakon te tibwanga anne. Ngkana iai kainanoana, te Moan Beretitentii a kaumakiira ni karaka ara ibuobuoki nakoia ake a kainnano n te kawai ae tamaroa. A nano n aron wakinana ae tabangaki ao kabwarabwaraana ae uarereke.
N aki maan nako, ti uoti nakoia kunikai ni kamanomano ake a ituuaki man te tabo ni kunikai ae te Biaiwe ibukin onaoraki bwa a na kabonganai n tain te butinaoraki. Ngkai te taokita ibukin bwainaoraki, Beretitenti Russell M. Nelson e rang n nano iai. E aki tangiria n tii nooria. E tangiria ni karinna—n tuoi baia ao mwaraina ao kabaeana nako buki. E tuangiira imwiina, ma te bwana n tang, “Ngkana kam kaitibo ma aomata n tain ami beku, karabwaia ibukin aia aki mamatam, aia angabwai, ao aia mwakuri n ibuobuoki n aran te Uea.”
Ribooti iaon te Ibuobuoki
Man ana kairiiri Beretitenti Nelson, N na ribooti rikaaki iaon aron Ana Ekaretia Iesu Kristo ibukiia Aika Itiaki ni Boong aika Kaitira ni kaeka nakon taian angibuaka, mwaeiei, kamwaingaia taan birinako mai abaia—ao bon te butinaoraki—te kakaitau ibukin aia akoi aika Itiaki ni Boong aika Kaitira ao rao aika a mwaiti. Ngkai e raka iaon 1,500 te karikirake ibukin te COVID-19 are bon boton te ibuobuoki n te Ekaretia inanon te maan ae 18 namwakaina, te Ekaretia e kaeka naba nakon 933 angibuaka aika riki ao kanganga irouia taan birinako man aba aika 108 mwaitiia. Ma te taibora ni warebwai e aki kaota bwaninin te rongorongo. Anganai bwa N na tibwauai aua katoto aika kimototo ni kabwarabwarai bwai aika a tia ni karaoaki.
Mwakuri ni Kamaiu n te COVID i Aberika Maiaki
Dieke Mphuti ae tebwi ma onou ana ririki mai Welkom, Aberika Maiaki, a bua ana karo n ririki aika a nako, ni katikua bwa e na tararuaia tarina ao mwanena aika teniman n ti ngaia. E kangaanga n tainako irouna kakaean te amwarake ae tau, ma aki taun bwaai n te COVID ao te tiku ni kaokoroaki e a bon kangaanga riki rekena. A baki n tainako, ni karemremwii amwarake ake a reke mai irouia kaain rarikiia.
N te ngaina teuana n Aokati 2020, Dieke e tounako n te karebwerebwe iaon ana mataroa. E kaukia ao e nooria uoman aomata aika e aki kinaia—temanna te tia tei man te Ekaretia n aobitin te aono i Johannesburg ao are temanna te tia mwakuri man ana Botaki ni Mwakuri te tauteka mai Aberika Meang.
A reitaki bootaki aika uoua aikai ni uoti amwarake nakoia kain auti ake a rootaki. E oki nanon Dieke ngke e norii bwariko n amwarake ake atia aroia ao amwarake riki tabeua, ake atia ni kaboaki man ana mwane n ibuobuoki te Ekaretia. Aikai e na buokia ni kateimatoaia ana utu ibukin tabeua te wiiki ni karokoa rokon bwaai n ibuobuoki man te tautaeka ibukiia.
Ana karaki Dieke bon teuana man te nga te taneiai ake a riki ni kabuta te aonaaba inanon butin te aoraki ae te COVID te kakaitau ibukin ami anganano ae tabu.
Buokaia Afghan i Ramstein
Ti a tia ni bane n noori tamnei iaon bwaai ni kaongora: nga ma nga aomata a kakibaki mai Afghanistan. A mwaiti aika a nikiraki n ana tabo te tanga ni buaka ke n taabo tabeua i Qatar, te United States, Germany, ao Spain imwain ae a reitinako nakon tokin kawaia. Kainnanoia a kawaekoa, ao e kaeka te Ekaretia n anga bwaai ao taan ibuobuoki. N te Ramstein Air Base i Tiaman, te Ekaretia e katauraoi aia bitaaki ataei, aia miriki ataei, amwarake, ao taian kau.
Tabeman aine n te Bootaki n Aine a ataia bwa a mwaiti aine mai Afghan ake a kabonganai aia kabaraaki buuia n rabuni atuia ibukina bwa rabunan atuia e a tia n raeuakaki n tain te mangao n te marae ni wanikiba i Kabul. N te mwakuri n iraorao are e riaon katein aro nako ke katei, ainen te Ramstein Uoote Teuana a ikotaki n itui kunnikaia Muslim ibukiia ainen Afghan. Titita Bethani Halls e taku, “Ti ongo bwa aine a kainnanoa te kunnikai n tataro, ao ti a ituui bwa aonga ni kona ni [mwengaraoi] n tataro.”5
Kamaiu ni Mwaingingin te Aba i Haiti
Te katoto ae imwiina e kaotia bwa ko aki kantaningaaki bwa kona kaubwai ke ni kara n riki bwa te bwai ni mwakuri ibukin te raoiroi. Marie “Djadjou” Jacques tebwi ma waniua ana ririki bon kaain te Mwaanga ae Cavaillon i Haiti. Ngke e roko te mwaiei ae korakora irarikin ana kaawa n Aokati, ana auti ana utu bon teuana naba mai ibuakoia nga kateitei ake a ingunako. E bon kuri kanganga iangoan te bwarannano ni buan mweengam. Ma nakon are e na taenikai n te kanganga anne,Djadjou— n ae kamimi—e iangoia ni buokiia ake a rootaki.
Bootaki ni Kareke Rongorongo ae te Associated Press
E noora kain rarikina te kara are inimaki ao e nako ni buokia n tabeakinna. E buokiia tabeman ni kanakoi bwaai ake a uruaki. N aki tabe ma kuana, e raoniia kain te Ekaretia tabeman n tibwatibwai amwarake ao bwaai ni kakaitiaki nakoia aomata. Rongorongon Djadjou bon teuana man banna ni katoto aika korakora ni waaki ni ibuobuoki ake a karaoaki irouia te roronrikirake ao kairake n ikawai ngkai a kataia n iriira ana banna Iesu Kristo.
Te Ibuobuoki n te Ieka i German
Bon tabeua te wiiki imwain te mwaiei, te kurubu teuana irouia kairake n ikawai a anga te ibuobuoki ae aekan anne rinuukan te Atlantic. Te ieka are e raanga rinanon Eurobe maeao inanon Turai a bon rangi ni korakora riki nakon tebwina te ririki n nako.
Ngke e a toki raangan te ran, temanna te tia bwaibwai n te titoa irarikin te karanga n te mwakoro ae Ahrweiler, i Tiaman, e ukera mwiin te urubwai ao e taonaki n te mimi. Te mwane ae mangori aei, ae kain te Katorika, e wirikiriki n tataro bwa te Atua e na kanakoa temanna bwa e na buokia. Bon te ingabong are imwiina, Beretitenti Dan Hammon man te Frankfurt Mition Germany e roko n te kawai ma ana kurubu ni mitinare ake a kabonganai otanga aika a babobob ni Baai n Ibuobuoki. Te ran e a tia n roko n te rieta ae 10 te buti (3m) n ana oo te tia bwaibwai n te titoa, ni katuka te bokaboka ae nano. Taan anganano a tiabora te bokaboka, ni kanakoi kabete ao oo, ao ni kaibetaotaoi bwaai n te kawai bwa a na kanakoaki. Te tia bwaibwai n te titoa e mwakuri irarikiia ma te kukurei inanon aoa, ni mimi bwa te Uea e a tia ni kanakoia Ana tabonibai ni kaeka ana tataro—inanon 24 te aoa!6
“Eng, I tataro bwa E na kabonganaira”
N taekinan ana ibuobuoki te Ekaretia nakoia aomata, Unimwaane Jeffrey R. Holland e taekinna n te taina: “Tataro a kaekaaki … n angiin te tai … iroun te Atua man kabonganakiia aomata tabeman. Eng, I tataro bwa E na kabonganaira. I tataro bwa tina riki bwa kaekan aia tataro aomata.”7
Tariu ao mwaneu, rinanon ami mwakuri n ibuobuoki, anganano, ami tai, ao ami tangira, kam a tia n riki bwa kaeka nakon tataro aika a mwaiti. Ma a rang mwaiti riki aika a na karaoaki. Ngkai kain te Ekaretia aika a tia ni bwabetitoaki, ti mena iaan te berita bwa tina tararua ibukiia ake a kainnano. Ara mwakuri n tatabemaniira e aki kainnanoa te mwane ke tabo aika raroanako;8 a bon kainnanoa ana kairiiri te Tamnei ae Tabu ao te nano ae tauraoi ni kangai nakon te Uea: “Aio Ngai, kanakoai.”9
Te Ririki ni Butimwaea te Uea
Ruka 4 e koreia bwa Iesu e roko i Natareta, te tabo are E a tia n ikawairake iai, ao E tei n te tinakoke ni wareware. Aio e uakaan ma moan Ana mwakuri n ibuobuoki n te maiu ae mamate, ao E taekini kibuntaeka man ana boki Itaia:
“E mena Tamnein te Uea iaou, bukina bwa e a tia ni kabirai bwa n na tataekina te euangkerio nakoia akana aki kaubwai, e kanakomaiai bwa n na tuangiia taenikai te kanakoaki, ao a kana a mataki te manga nooraba, ao bwa n na kainaomataia akana a uruaki nanoia,
“N tataekina te ririki ni butimwaea te Uea. …
“… N te bong aei e a kakoroaki bukin ana taeka te Baibara aei I nanon taningami.”10
I kakoaua bwa koroboki aika a tabu a kakoroaki bukiia n ara tai naba. I kakoaua bwa Iesu Kristo e na roko ni kamaoi nanoia ake a uruaki. Ana euangkerio e na kaoka aia taratara naake a mataki. Ana Ekaretia e na tataekina te kamaiuaki man te tautoronaki, ao Ana reirei ni kabuta te aonaaba a kataia ni kainaomataia ake a ikoaki.
N na kainai man kaokakin te titiraki are e titiraki iai Iesu nakon Ana Abotoro Timon Betero: “Ko tangirai?”11 Te bwai ae kakawaki n te euangkerio e kairaki nakon ara kaeka nakon te titiraki ao “kakamwarakeaia [Ana] tiibu.”12 Ma te karinerine ae korakora ao te tangira ibukin Iesu Kristo ara Mwatita, I kaoira n tatabemaniira bwa tina riki bwa mwakoron Ana mwakuri ae kamimi, ao I tataro bwa E na kabonganaira. N aran Iesu Kristo ae tabu, amen.