Riki Bwa Te Tia Irira Kristo
Te riki bwa te tia irira Kristo bon uaiakinan kaboraoan ara mwakuri, arora, ao maiura nakon te Tia Kamaiu.
I nanon au kamatebwai ni koroboki aika a tabu, e anaaki nanou n rongorongon Tauro tei Tareto, are e kinaaki i mwina bwa Bauro, n aron kabwarabwarana n te Baibara.
Bauro bon te mwaane ae marurung ni bwainikirina te Ekaretia ao Kiritian. Ma ibukin mwaakan karawa ao Ana Mwakuri ni kamaiu Iesu Kristo, E bitaki raoi, ao e riki bwa temanna ana toro te Atua ae korakora. Maiuna kanga e katotoonga aron maiun te Tia Kamaiu Iesu Kristo.
N ana reirei teuana Bauro nakoia I-Korinto, e kaoia bwa a na riki bwa ana reirei n ai arona ngaia ae te tia irira Kristo (tara 1 I-Korinto 11:1). Aio ana kakao Bauro ae koaua man bwainaki man ana tai Bauro ni karokoa bong aikai: n riki bwa te tia irira Kristo.
I karaua n iangoia bwa tera nanon ae ko na riki bwa te tia irira Kristo. Ma ae kakawaki riki, I tabeka au titiraki ae kangai, “Tera arou n toua Mwina?”
Te riki bwa te tia irira Kristo bon uaiakinan kaboraoan ara mwakuri, arora, ao maiura nakon te Tia Kamaiu. Bon ukoran baika a itiaki. Bon te riki bwa ana reirei ae kakaonimaki Kristo.
I a tia ni kamatebwaia tabeua aron maiun te Tia Kamaiu, ao I taui irou, bwa kanoan au maroro n te bong aei, aua Arona aika I kataia n uaiakin ao N na tibwai ma ngkami.
Te moan n anuan te Tia Kamaiu bon te nanorinano. Iesu Kristo ea kaman nanorinano man te maiu i mwain te maiu aei. N te Kauntira i Karawa, E nora man boutoka nanon te Atua bwa e na tokanikai i nanon te babaire ni kamaiu i bukia aomata. E taku, “Tamau, e na karaoaki nanom, ao am bwai te mimitong n aki toki” (Mote 4:2).
Ti ataia bwa e reirei Iesu Kristo te nanorinano ao e kananorinanoa n angan Tamana te mimitong.
Ti riai ni maeka ma te nanorinano bwa e uota te rau (tara Reirei ao Berita aika Tabu 19:23). Te nanorinano e roko i mwain te mimitong, ao e bati akoakira iroun te Atua: “Eng, kam na bane ni kabaei nukami n te nanorinano, n akoakoi: ba E rawa te Atua nakoia akana kainikatonga, ma E anga te akoi nakoia akana nanorinano ” (1 Betero 5:5). Te nanorinano e uoti kaeka aika a bebete. Boni ngaia oin te anua ae tamaroa.
Unimwaane Dale G. Renlund e reirei:
“Naake a nakonako n nanorinano ma te Atua a uringa te bwai ae e a tia ni karaoia Tamara are i Karawa ma Iesu Kristo ibukiia.”
“Ti karinea te Atua man mwanangara ma te nanorinano ma Ngaia” (“Karaoa ae Eti, Tangira te Nanoanga, ao Nakonako ma te Nanorinano ma Atuam,” Riaona, Nov. 2020, 111, 109).
Te kauoua n anuan te Tia Kamaiu bon te ninikoria. Ngkana I iangoa Iesu Kristo ngke 12 ana ririki, n tekateka i nanon ana tembora te Atua ni mena ibuakoia taan rabakau n te tua ao n reireiniia bwai aika tabu, I noria bwa E a kaman iai irouna, i nanon maiuna, te aro n ninikoria, ae onoti. E boni ngae ngke e mwaiti ae e kantaningaia bwa e na rereiaki te ataeinimwane aei irouia taan rabakau n te tua, ma ngaia E reireinia ngke “a ongora irouna, man titirakinna” (Ana Rairairi Iotebwa Timiti, Ruka 2:46 [n Ruka 2:46, footnote c]).
Ti karaoa ara mwakuri ni mitinare n tararua te mition ae te Democratic Republic of the Congo Mbuji-Mayi n te ririki 2016 nakon 2019. Aron te mwananga n te mition man te tabo teuana nakon teuana bon iaon te kawai. Te bwai ae kamimi bwa n te aono aei iai taan ira aika a uabiti ake a aki toki n tuka te kawai ao ni kamwengabuakaia taan mwamwananga.
Iai niman mitinare aika a mwananga man te tabo teuana nakon teuana n tain te kamwaing ake a reke i nanon te kangaanga aei. Ibukina bwa e a tia naba n riki aei nakoira n taai aika a nako, ti raraoma i bukin maiura ao maurira ngaira ni kabane, ao ti a tautaua moa mwanangara ni kawaria mitinare i bukin karaoan te maungatabu n te tioun. Ti aki ataia bwa e na toki nningai te waaki aei. I korea au riboti, are I kanakoa nakon te Beretitentii n te Aono, ao I kaota ara raraoma i bukin te mwamwananga bwa bon tii rinanon te kawai angara ni kawaria ara mitinare.
N ana kaeka, Unimwaane Kevin Hamilton, are bon te Beretitenti n Aonon Aberika Maiakimainiku, e kangai: “Au taeka nakoim bwa ko na karaoa am kabanea n tamaroa. Kawanawanako ao bwaina te tataro. Tai kataia ni karekei ngkami ke ami mitinare n te kabuanibwai, e ngae n anne waaki ma te onimaki. ‘Ba e aki anganiira te Atua te nano ae mamaku; ma E anganiira te nano ae korakora, ae tatangira te aba, ae kawanawana te aba’ (2 Timoteo 1:7).”
Te taeka ni kauring aei e kakorakoraira ao e anganira te unga n nano bwa ti na mwananga ao ni beku ma te ninikoria ni karokoa e bane ara mition i bukina bwa ti ongeaba nakon ana kaetieti Tamara are i Karawa i nanon te kibu anne.
I nanon koroboki aika a tabu, ti ata ana taeka te burabeti Iotebwa Timiti are e kaota ana kaunganano te Uea nakoira: “Taari, ti na aki waaki n te mwakuri ae rangi ni kakawaki? Waaki rake ao tiaki rikaaki. Ninikoria, tariu; ao waaki, waaki nakon te tokanikai!” (Reirei ao Berita aika Tabu 128:22).
Ti a ninikoria ni karaoa ae eti, e ngae ngke e aki tangiraki—te ninikoria ni kamanoa ara onimaki ao karaon te mwakuri ma te onimaki. Ti a ninikoria n rairi nanora n te bong koraki, te ninikoria n ongeaba nakon nanon te Atua ma Ana tua nako. Ti a ninikoria ni maiuna ae raoiroi ao ni karaoa are e kantaningaki mai iroura n tibwangara ma nakoara aika a kakaokoro.
Te kateniua n anuan te Tia Kamaiu bon te kabwarabure. I nanon Ana mwakuri ngke e maiu, te Tia Kamaiu e kamanoa te aine are e kuneaki ni wenenibure man te karebanaki n te atibu. E tuangnga ae kangai “ko na nako, ao tai manga bure” (Ioane 8:11). E kairaki neiei nakon te rairannano ao kabwaran ana bure, bwa n aron are e koreaki ni koroboki aika a tabu “e anga te mimitong nakon te Atua man te tai anne ao e kakoaua arana” (Ana Rairairi Iotebwa Timiti, Ioane 8:11 [n Ioane 8:11footnote c]).
I nanon tain te botaki n tataro n tain te Kiritimati n Ritembwa 2018, ara burabeti ae tangiraki Beretitenti Russell M. Nelson e maroro i aon aua ara bwai n tituaraoi mai iroun te Tia Kamaiu. E taku bwa teuana ana bwai n tituaraoi ae e anga te Tia Kamaiu bon te kona ni kabwarabure:
“Rinanon Ana Mwakuri ni Kamaiu, ko kona ni kabwarai aia bure ake a tia ni kamarakiko ao n aki kona ni butimwaai bukinaia n aia mwakuri n aki ako nakoim.
“E bebete riki kabwaraan ana bure te aomata ae e kabwara ana bure ma te koaua ao te nanorinano. Ma te Tia Kamaiu e na anganiko te konaa ni kabwarai aia bure aomata ake a tia ni bwainikiriniko” (“Aua Bwaintangira aika Ko Anganaki” [Aia Taromauri ni Ka Kiritimati te Moan Beretitentii, Ritembwa 2, 2018], broadcasts.ChurchofJesusChrist.org).
Ti ikabwarabure ma te koaua bon imarenara bwa e aonga ni kabwaraki ara bure iroun Tamara. Te kabwarabure e anganira te kainaomataki ao namakinan te tau ni kana te toa ni katoa Tabati. Te kabwarabure e riai n iai iroura bwa ti aonga n riki bwa ana reirei ni koaua Iesu Kristo.
Te kaaua n anuan te Tia Kamaiu bon te anga karea. Bon kanoan ana euangkerio Iesu Kristo. Te Tia Kamaiu e anga te kabanea ni karea are bon Maiuna i bukira bwa ti aonga ni kaboaki. Ngke e namakina kamarakin te anga karea, E butia Tamana bwa e na anaki mai irouna te mwangko, ma E kakoroa nanon ana anga karea. Aio bon ana Mwakuri ni kamaiu Iesu Kristo.
E kangai ana reirei Beretitenti M. Russell Ballard: Te anga karea [bon] kaotan te nano ae e itiaki. Mwaitin ara tangira i bukin te Uea, i bukin te euangkerio, ao i bukia raora e kona n noraki man nanora ni ibuobuoki nakoia” (“The Blessings of Sacrifice,” Ensign, Meei 1992, 76).
Ti kona n anga ara tai ni karaoa te mwakuri n ibuobuoki, ni buokia aomata, ni karaoa ae tamaroa, ni karaoa ara riki, ao ni kakoroi nanon tibwangara n te Ekaretia.
Ti kona n anga ara mwane bwa ara kabwianibwai, angabwai n aki mamatam, ao tabeua riki anganano i bukin katean abanuean te Atua i aonaaba. Ti riai n anga karea bon teuana kakoroan nanon ara berita ma te Tia Kamaiu.
Au tataro bwa man iriran Iesu Kristo ao karekean te kakabwaia man Ana Mwakuri ni kamaiu, ti karikirakea te nanorinano, ti karikirakea ara ninikoria, ti kabatia kabwaran aia bure aomata, ao ti anga nanora i bukin Abanueana.
I kakoaua bwa Tamara are i Karwa e maiu ao e kinaira n tatabemaniira, bwa Iesu bon te Kristo, bwa Beretitenti Russell M. Nelson bon ana burabeti te Atua ni bong aikai. I kakoaua bwa Ana Ekaretia Iesu Kristo ibukiia Aika Itiaki ni Boong Aika Kaitira bon abanuean te Atua i aon te aba ao ana Boki Moomon e bon koaua. N aran Iesu Kristo, te Tia Kabooira, amen.