Te Onimaki ni Mwakuri ao ni Kakoroa Nanona
Rinanon te tataro, te kamatebwai n koroboki aika tabu, ao te mwakuri, ti kona n kauki kakabwaia mai karawa ao n riki bwa ana reirei te Tia Kamaiu Iesu Kristo ae tamaroa riki.
Tabeua te tai i mwiin weteakiu bwa N na beku bwa te Mataniwi ni Kabuta n te Itingaun, e reke au tai n kaitibo ma Beretitenti Russell M. Nelson i nanon tabeua te miniti. Bon te kaitibo ae e aki kantaningaki i nanon te tabo n amwarake, ao e bon rang n mwamwannano ngke e weteai ma Unimwaane S. Mark Palmer bwa ti na tekateka n katawanou ma ngaia.
“Tera ae ti na marooroakina n ara tai ni katawanou ma te Burabeti?” bon te iango are ea roko n au iango. Ngaia are I a titirakina Beretitenti Nelson ngkana iai ana taeka n reirei ao n ibuobuoki nakoiu ngkai I a waaki i nanon tibwangau. Ana kaeka e bon rang n matata man kaineti raoi; e taraai man taku, “Unimwaane Schmeil ko weteaki nakon are ko kona ni kakoroa nanona.” I rianna nako man te bwai ae I rinanona aio ao n iangoia raoi bwa N na kanga n riki bwa te aomata ae tangiria te Uea. Ngke I tabe n iangoa aio, ao I a kunea bwa E tangirai bwa N na riki bwa te buu, te tama, ao te nati ao te toro ae tamaroa. I kunea bwa bwaai aikai ni kabane a kona n koro nanoia ngkana I mwakuri korakora n riki bwa ana reirei ae tamaroa te Tia Kamaiu Iesu Kristo.
N te maungatabu ni kabuta ae nako, Beretitenti Nelson e taku, “Kanakoraoan raoi te mwakuri e kainanoa mwakuriana. Akea naba okorona ma rikim bwa ana reirei ni koaua ae tamaroa Iesu Kristo.”1 E kaoira Beretitenti Nelson bwa ti na mwakuri korakora n riki bwa ana reirei ae tamaroa riki Iesu Kristo. E tuangiira bwa te riki n ai aron te Tia Kamaiu, ti kainanoia bwa ti na kakorakora ara onimaki rinanon te titiraki, te mwakuri ao te kamatebwai, i buakon ara mwakuri ake tabeua.
1. Titiraki
Ao e taku, “Bubutia Tamam are i Karawa n aran Iesu Kristo ibukin buokam.”2 Te bubuti rinanon te tataro bon teuana mai ibuakon kingin n ataia bwa kona kanga n riki bwa ana reirei ae tamaroa Iesu Kristo.
N tokin Ana mwakuri ibuakoia Nibwaite iaon Amerika, Iesu Kristo e waerake nako karawa. Imwiina riki, ao a bootaki Ana reirei, ao a katiteuanaia n tataro mwaaka ao n aki mamatam. Ao Iesu e kaoti nakoia, bwa a bon tataro nakon te Tama n arana.”3 E aera ngkai e kaoti kaua Iesu Kristo nakoia Ana reirei? I nanon aia tataro; ao a bubuti.
Ao E a manga kangai:
“Ao ngkai N na nakon te Tama. Ao e koaua ae I tuangkami, bwa bwaai ni kabane ake kam na tuanga te Tama n arau kam na bon anganaki.
“Ngaia are, bubuti ao kam na anganaki; karebwerebwe ao e na kaukaki nakoim; bwa ane e bubuti, e na reke irouna; ao nakon ane e karebwerebwe ao e na kaukaki.”4
Ti riai n titiraki ma te onimaki bwa ti aonga n ataa nanon te Uea ao n butimwaia bwa te Uea e ataa ae tamaroa riki ibukira.
2. Te Mwakuri
Te mwakuri bon teuana te kiing ae kakawaki n riki bwa ana reirei ae tamaroa Iesu Kristo. Ngkana ti mwakuria, E na kawakinira man kairira i nanon kawaira. I aki nanokokoraki bwa Nibwaai e bon bubuti buokana mairoun te Uea bwa e na kanga ni karekei Bwatua aika Buraati mairoun Rabwan, e ngae ngke ai uoua aia tai n kataia ma e bon aki naba reke irouia. Ma a bon mwakuria, ao te Uea e bon kairiria i nanon kawaia. N tokin te tai ao e a tokanikai Nibwaai n te kateniua n tai. E taku, “Ao I kairaki iroun te Tamnei, n aki atai moa baika I riai ni karaoi.”5
Aio aron ana kakamwakuri te Uea ngkana ti karimoa man karaoia e ngae ngkana akea ootara ni bwaai aika riai ni karaoaki. Te Uea e tuanga Nibwaai bwa tera ae ena karaoia: nako ao anai bwaatua. Ma E aki tuanga Nibwaai bwa ena kanga ni karaoia. E katikua nakon Nibwaai bwa ena ukoria man bubutia te Uea buokana—ao aio aron naba ana kakamwakuri te Uea i nanon maiura. Ngkana ti mwakuri i nanon te onimaki, te Uea e na kairira man tuangiira kawaira.
3. Kamatebwai
N te ka 3 Nibwaai, taan reirei a tuanga te Tia Kamaiu ae iai te kakaokoro n iango irouia aomata ibukin aran te Ekaretia. Ana kaeka, te Tia Kamaiu e reireiniia te moan tua ae kakaawaki ngke e titirakinia ni kangai, “A tuai ni wareki koroboki aika a tabu?”6 Te kamatebwai bon teuana te kiing ae kakawaki n riki bwa ana reirei ae tamaroa Iesu Kristo. Te tataro ao kamatebwaian koroboki aika a tabu a uaia n ikarekebai. A kaai ni mwakuri ibukin ae tamaroa ibukira. Aio aron waakinana ae ea tia n kateia te Uea. “Kanuaingkami n ana taeka Kristo; bwa taraia, a na tuangko ana taeka Kristo bwaai ni kabane aika ko riai ni karaoi.”7
E reireinira naba te Tia Kamaiu ae ti riai n aki tii kamatebwaia taian koroboki aika tabu ma ti na anga reirei naba mai iai, n aron are e karaoia nakoia Nibwaaite: “Ao ngkai e a koro bukina bwa ngke e a tia Iesu ni kabwaranakoi koroboki aika tabu ni kabane n ti teuana, are a tia ni koroi, e tuangiia bwa a na reirei bwaai ake e a tia ni kabwaranakoi nakoia.”8
Aio teuana bukina ngkai e rang n kakawaki iroun Nibwaai bwa ena oki rikaaki n anai Bwatuua aika Buraati: a kainanoi koroboki aika tabu ana utu bwa ena buokia inanon kawaia nakon te aba ni berita ao ena buokiia n reireinia natia mai iai. Ngaira naba ti riai n ukora buokara man koroboki aika tabu inanon kawaira ao ti riai n anga reirei mai iai n mwengara ao n tibwangara n te Ekaretia.
4. Karekei Katei aika Tamaroa
Angiin te tai kaekan ara tataro aki roko ngkekei naba. Ma ti riai n teimatoa n onimaki man mwakuri inanon te raoiroi ao man teimatoa n aron Nibwaai ngke e kataia n karekei bwaatua aika burati. Te Uea e na kaotii nakoira teutana imwin teutana ngkana ti kamatebwaii taian koroboki aika a tabu, te Uea ena anganira kaekan ara tataro ke kakorakorakira n waaki nako inanon te bongina riki, teuana riki te wiiki ao n keiakinna teuana riki te tai. Unimwaane Richard G. Scott e taku: “Karabwarabwa bwa n tabetai te Atua e kariaia bwa ti na kainano inanon te tai ae maan imwain ae roko kaekakira. Anne e kakorakora am onimaki man karikirakea arom ae tamaroa.”9
Rinanon te tataro ma kamatebwaian koroboki aika tabu te Uea ea tia ni kakorakorai bwa N na mwakuri man teimatoa inanon te bong teuana, te wiiki ao ni kataia teuana riki te tai. E rawata te tai ae e na iremwe iai kaekan ara tataro. Iai au titiraki aika a tuai kaekaki ma I bon teimatoa n titiraki man kamatebwai ao I kukurei bwa te Uea e teimatoa n kakorakorai inanon au tai n mwakuri inanon tataningaan reken kaekaia.
E taku naba Unimwaane Richard G. Scott, “I nanon mwanangam n tian am atatai ao n rokom n aiotan bwaai ake aki rang ni matata raoi iroum, ni kamwakuran am onimaki, kona bon kairaki nakon kaeka ake a na bon aki reke iroum.”10
Rikim bwa te tia irira te Tia Kamaiu Iesu Kristo ae tamaroa bon te mwananga rinanon maium, ao ti bane ni mena ni mwaneka aika kakaokoro, ao a kakaokoro naba birira. Ti riai n uringnga bwa tiaki aio te kaboo, ma ti bane n mena ikai bwa ti na tangirira man ibuobuoki imarenara. Ti riai n kakamwakuri bwa tiaonga n kona n namakina ana mwakuri te Tia Kamaiu inanon maiura.
E taetae te Uea nakon Sidney Rigdon man taku: “I a tia n taraiko ma am mwakuri. I a tia n ongo am tataro, ao ni katauraoiko ibukin te mwakuri ae korakora riki.”11 I kakoaua bwa te Uea e ongo man kaekai ara tataro, E kinaira ao iai te mwakuri ae korakora ibukira n tatabemaniira nako. Rinanon te tataro, te kamatebwai n koroboki aika tabu, ao te mwakuri, ti kona n kauki kakabwaia mai karawa ao n riki n tamaroa bwa taan iriira te Tia Kamaiu Iesu Kristo.
E taku Unimwaane Dallin H. Oaks: “Te Kabane ni Motikitaeka bon tiaki ikotan mwaitin ara mwakuri aika raraoi ao aika buakaka—ake ti a tia ni karaoia. Bon butimwaean kabanean mwiin ara mwakuri ao ara iango—n arora are ti a tia ni karekei.”12
I rang kakaitau ibukiia burabeti, taan tia mamata ao taan tia kaotioti bwa ngaia taan taratara man te taua. A noori bwaai ake tiaki kona ngaira n noori. I kakoaua bwa man aia taeka ao ti kona n riki ngaira bwa ana reirei aika tamaroa te Tia Kamaiu Iesu Kristo man kakoroa nanon ara konabwai. I Kakoaua bwa E maiu Kristo ao e kinaira n tatabemanira nako. Aio bon Ana Ekaretia. N aran Iesu Kristo ae tabu, amen.