Samuel the Lamanite on the Wall [Samuela te ’āti Lamana i ni’a i te patu], nā Arnold Friberg

9–15 nō Tetepa : « Te mau parau ’oa’oa nō te ’oa’oa rahi »

Helamana 13–16

Te taime mātāmua ’a tāmata ai Samuela te ’āti Lamana i te fa’a’ite atu i « te mau parau ’oa’oa » i Zarahemela (Helamana 13:7), ’ua pāto’ihia ’oia ’e ’ua tīahihia e te mau ’āti Nephi ’ā’au ’eta’eta. Mai te huru ra ē, ’ua patu rātou i te hō’ē patu me’ume’u ’ati a’e i tō rātou ’ā’au i ’ore ai rātou i fāri’i i te poro’i a Samuela. ’Ua māramarama Samuela i te faufa’a rahi o te poro’i tāna i hōro’a ’e ’ua fa’a’ite i tōna fa’aro’o nā roto i te pe’era’a i te fa’auera’a a te Atua « ’ia ho’i fa’ahou atu ’oia, ’e ’ia tohu atu i te mau ta’ata » (Helamana 13:3). Mai ia Samuela te huru, e fārerei tātou pā’āto’a i te mau patu ’a « fa’aineine [ai tātou] i te ’ē’a o te Fatu » (Helamana 14:9) ’e ’a tūtava ai i te pe’e i tāna mau peropheta. ’E mai ia Samuela ato’a te huru, tē hōro’a ato’a nei tātou i tō tātou ’ite nō Iesu Mesia, « ’o tē haere mai iho ā » ma te ani i te tā’āto’ara’a ’ia « ti’aturi […] i tōna ra i’oa » (Helamana 13:6 ; 14:13). E’ita te mau ta’ata ato’a e fa’aro’o mai, ’e tē vai ra e pāto’i ’ū’ana roa mai ia tātou. ’O rātou rā tē ti’aturi i teie poro’i ma te fa’aro’o i te Mesia, e ’ite mai ïa rātou ē e parau mau te reira « mau parau ’oa’oa nō te ’oa’oa rahi » (Helamana 16:14).

Mana’o nō te ’apo i te ha’api’ira’a i te ’utuāfare ’e i te fare purera’a

Helamana 13

Tē hōro’a nei te Fatu i te mau fa’aarara’a nā roto i tāna mau peropheta.

I roto i te mau pāpa’ira’a mo’a, i te tahi taime, tē fa’aauhia nei te mau peropheta i te mau tīa’i i ni’a i te patu ’aore rā i ni’a i te pare ’o tē fa’aara mai i te mau ataatara’a (hi’o Isaia 62:6 ; Ezekiela 33:1–7). ’A tuatāpapa ai ’oe i te mau parau a Samuela i roto i te Helamana 13, e aha tōna tū’atira’a i te hō’ē tīa’i, ia ’oe. E aha tāna i parau ’o tē tano i tō tātou nei ’anotau ? (hi’o ta’a ’ē i te mau ’īrava 8, 21–22, 26–29, 31, ’e 38). ’Ei hi’ora’a, e aha tā Samuela i ha’api’i nō ni’a i te tātarahapara’a ? nō ni’a i te ha’eha’a ’e te tao’a rahi ? nō ni’a i te ’imira’a i te ’oa’oa « nā roto i te ravera’a i te mau ’ohipa ’ī’ino » ?

E nehenehe ato’a ’oe e mā’imi i roto i te mau a’ora’a o te ’āmuira’a i ma’iri a’enei, i te mau fa’aarara’a tā te Fatu i hōro’a mai nā roto mai i te mau peropheta nō teie tau. E aha tē fa’auruhia ia ’oe ’ia rave i muri a’e i tō ’oe tai’ora’a i teie mau fa’aarara’a ?

’Imi i te mau huru hōho’a. Te hō’ē huru hōho’a, ’o te hō’ē ïa fa’anahora’a ’aore rā te hō’ē hi’ora’a e nehenehe e fa’a’ohipa ’ei arata’i nō te fa’atupu i te hō’ē ’ohipa. I roto i te mau pāpa’ira’a mo’a e ’ite mai tātou i te mau huru hōho’a e fa’a’ite mai e nāhea te Fatu i te fa’atupu i tāna ’ohipa, mai te tonora’a i tāna mau tāvini nō te fa’aara i te ta’ata.

’Ia fa’aro’o tātou i te mau peropheta, e fa’atoro rātou i ni’a ia Iesu Mesia

Helamana 13–15

Tē ani nei te Atua iā’u ’ia tātarahapa.

I roto i te mau fa’aarara’a a Samuela nō ni’a i te mau ha’avāra’a a te Atua, tē vai ra te hō’ē anira’a aroha ’ia tātarahapa. ’A ’imi i teie mau anira’a i roto i te Helamana 13–15 (hi’o ta’a ’ē i te Helamana 13:6–11 ; 14:15–19 ; 15:7–8). E aha te ha’api’ira’a tā ’oe e ’apo nei i roto i teie mau ’īrava nō ni’a i te tātarahapara’a ? Tē hi’o nei te tahi mau ta’ata i te tātarahapara’a mai te hō’ē fa’autu’ara’a ’eta’eta—hō’ē mea e ’ape. I tō ’oe mana’o, e aha tā Samuela i hina’aro i te ’āti Nephi ’ia ’ite i roto i te tātarahapara’a ?

Nō te fa’ahōhonu i tā ’oe tuatāpapara’a, e nehenehe e tai’o i te a’ora’a a te peresideni Russell M. Nelson « E nehenehe tātou e rave maita’i a’e ’e e ha’amaita’i ia tātou » (Liahona, Mē 2019, 67). Nāhea ’oia i te tātara i te aura’a nō te tātarahapara’a ? E aha te mau ha’amaita’ira’a nō te tātarahapara’a mau tā ’oe e ’ite ra i roto i tāna a’ora’a ? E nehenehe ato’a ’oe e ’imi i te mau mea ta’a ’ē tā te peropheta i ani ia tātou ’ia taui. E aha tā te Vārua Maita’i e parau nei ia ’oe e tītauhia ia ’oe ’ia taui ? E nehenehe e pāpa’i i te heheura’a ta’ata hō’ē tā ’oe e fāri’i.

E aha te ta’a-’ē-ra’a i roto i te tātarahapara’a ’e te taui-noa-ra’a i tō ’oe huru ? Nō te aha e mea faufa’a ai ’ia fāri’i i te anira’a a te Atua ia tātarahapa ? ’A feruri ai ’oe i te reira, e nehenehe e hīmene ’aore rā e fa’aro’o i te hō’ē hīmene ’o tē fa’a’ite i teie anira’a, mai te hīmene « ’Auē te aroha rahi » (Te mau hīmene, N°63).

Hi’o ato’a « E tauturu Iesu Mesia ia ’oe », Nō te pūai o te feiā ’āpī : E arata’i nō te rave i te mau mā’itira’a, 6–9 ; « Repentance: A Joyful Choice [Te tātarahapara’a : Hō’ē mā’itira’a ’oa’oa] », « Principles of Peace: Repentance [Te mau parau tumu nō te hau : Te tātarahapara’a] » (mau video), Vaira’a buka ’evanelia.

Helamana 14 ; 16:13–23

’Ua tono mai te Atua i te mau tāpa’o ’e te mau mea māere nō te fa’a’ite pāpū nō te fānaura’a ’e te pohera’a o te Fa’aora.

I roto i te Helamana 14, ’ua fa’ata’a Samuela ē, ’ua hōro’a mai te Fatu i te mau tāpa’o nō te fānaura’a ’e te pohera’a o te Fa’aora ’ia « ’ite [te mau ta’ata i] tōna taera’a mai » ’e « ’ia ti’aturi i tōna ra i’oa » (Helamana 14:12). ’A tuatāpapa ai ’oe i te Helamana 14, e pāpa’i i te mau tāpa’o nō te fānaura’a o te Fa’aora i roto i te mau ’īrava 1–8 ’e te mau tāpa’o nō tōna pohe i roto i te mau ’īrava 20–28. ’Ia mana’o ’oe, nō te aha e mau tāpa’o fa’ahiahia teie nō te fa’aara i te fānaura’a ’e te pohera’a o Iesu Mesia ?

E nehenehe te tahi atu mau tāpa’o nō te ta’ata hō’ē ’e te iti ho’i, e tauturu ia ’oe ’ia « ti’aturi i [te i’oa o te Fa’aora]. » E aha tāna i rave nō te ha’apūai i tō ’oe ti’aturira’a iāna ?

E aha te mau fa’aarara’a ’e te mau tāpa’o i roto i te Helamana 16:13–23 ? Nāhea ’oe e nehenehe ai e ’ape i te huru o te mau ta’ata i fa’ahitihia i roto i teie mau ’īrava ?

Hi’o ato’a Alama 30:43–52 ; Ronald A. Rasband, « ’Ei ’ōpuara’a hanahana », Liahona, Novema. 2017, 55–57.

Helamana 15:3

Te fa’autu’ara’a nō ’ō mai i te Fatu, e tāpa’o ïa nō tōna here.

Tē vai nei i roto i te mau parau a Samuela e rave rahi parau-fa’autu’a-ra’a ’āfaro, ’āre’a rā tē hōro’a mai nei te Helamana 15:3 i te hō’ē hi’ora’a ta’a ’ē roa nō ni’a i te fa’autu’ara’a a te Fatu. Nāhea te fa’autu’ara’a nō ’ō mai i te Fatu ra e nehenehe ai e riro ’ei tāpa’o nō tōna here ? E aha te fa’a’itera’a tā ’oe e ’ite ra nō ni’a i te here ’e te aroha o te Fatu i roto i te mau parau tohu ’e te mau fa’aarara’a a Samuela ?

E nehenehe e tuatāpapa i te a’ora’a a Elder D. Todd Christofferson « ’O tā’u e here ra, ’o tā’u ïa e a’o, ’e e papa’i ho’i » (Liahona, Mē 2011, 97–100), ma te ’imi e toru ’ōpuara’a nō te fa’autu’ara’a hanahana. I nāfea tō ’oe ’itera’a i te Atua i te ’ohipara’a i teie mau huru ravera’a i roto i tō ’oe orara’a ?

Helamana 16

E fa’atoro te mau peropheta iā’u i ni’a ia Iesu Mesia.

I roto i te Helamana 16, e aha tā tātou e ha’api’i mai nei nō ni’a i te feiā tei fāri’i i te mau ha’api’ira’a a Samuela ? E aha tā ’oe e ha’api’i nei nō ni’a i te feiā tei pāto’i iāna ? ’A feruri nāhea te pe’era’a i te mau peropheta ora i te tauturura’a ia ’oe ’ia ha’afātata atu ā ia Iesu Mesia.

Nō te tahi atu ā mana’o, ’a hi’o i te mau ve’a Liahona ’e Nō te pūai o te feiā āpī nō teie ’āva’e.

Mana’o nō te ha’api’i i te tamari’i

Helamana 13:2–5

E nehenehe te Atua e paraparau mai iā’u i roto i tō’u ’ā’au.

• Nāhea ’oe e nehenehe ai e ha’api’i i tā ’oe mau tamari’i ē, e nehenehe te Atua e paraparau i tō tātou ’ā’au, mai tāna i rave nō Samuela ? Pēnei a’e e nehenehe ’oe e ani ia rātou ’ia fa’a’ite mai i te mau rāve’a rau nō te paraparau ma te ’ore e fa’ahiti i te hō’ē parau (mai te ’aparimara’a ’aore rā te hōho’a mata). E nehenehe te reira e arata’i i te hō’ē ’āparaura’a nō ni’a i te mau rāve’a rau tā te Metua i te ao ra e paraparau nei ia tātou. ’Ei tuha’a nō teie tāu’ara’a parau, e nehenehe ’outou ’e te mau tamari’i e hi’o i te hō’ē hōho’a nō Samuela te ’āti Lamana (e piti e vai ra i roto i teie arata’i ha’api’ira’a) ’e e tai’o i te Helamana 13:2–5 ’ia fa’aro’o tā ’oe mau tamari’i e mea nāhea tō te Atua paraura’a ia Samuela i te mea e parau.

• E rave rahi o tātou—te mau tamari’i iho ā rā—tē hina’aro nei i te tauturu nō te ’ite e nāhea ’e afea te Atua e paraparau mai ai ia tātou. E hina’aro paha ’oe e fa’ati’a i tā ’oe mau tamari’i i te hō’ē taime ’a tauturu ai te Vārua Maita’i ia ’oe ’ia ’ite i roto i tō ’oe ’ā’au e aha tā te Atua i hina’aro ’ia rave, ’aore rā ’ia parau ’oe. ’A fa’ata’a e mea nāhea tō ’oe itera’a ē, tē paraparau ra te Atua ia ’oe. Pēnei a’e e nehenehe ato’a tā ’oe mau tamari’i e fa’a’ite i te hō’ē ā ’ohipa mai te reira i tupu nō rātou.

Helamana 14:2–7, 20–25

Tē ha’api’i nei te mau peropheta nō ni’a ia Iesu Mesia.

• E nehenehe te hīmene-’āmui-ra’a i te hīmene « Au loin, dans l’étable » (Chants pour les enfants, 26–27) e riro ’ei rāve’a maita’i nō te ha’api’i i tā ’oe mau tamari’i e aha tā Samuela i ha’api’i nō ni’a ia Iesu Mesia. ’Oia ato’a te fa’a’itera’a i te « Pene 40 : Samuela te ’āti Lamana e parau ra nō Iesu Mesia » (Te mau ’ā’amu o te Buka a Moromona, 111–13). E aha tā Samuela i ha’api’i nō ni’a i te Fa’aora ? Pēnei a’e e nehenehe ato’a tā ’oe e fa’a’ite e aha tā te mau peropheta nō teie ’anotau e ha’api’i nei nō ni’a iāna. Nāhea tā rātou mau parau i te patu i tō tātou fa’aro’o iāna ?

Helamana 16:1–6

E ha’amaita’ihia vau ’ia pe’e ana’e au i te peropheta.

• E nehenehe ’oe e patu i te ti’aturira’a o tā ’oe mau tamari’i i te peropheta, ma te fa’a’itera’a ia rātou i te hi’ora’a o te tahi mau ta’ata ha’apa’o maita’i. E ’itehia te tahi o rātou i roto i te Helamana 16:1, 5. ’A tai’o ai ’oe, e nehenehe tā ’oe mau tamari’i e ti’a i ni’a ’ia fa’aro’o ana’e rātou i te hō’ē mea tā te ta’ata i rave, i te ti’aturira’a rātou i te mau parau a Samuela. I muri iho, ’ia tai’o ’oe i te mau ’īrava 2 ’e 6, e nehenehe tā ’oe mau tamari’i e pārahi ’ia fa’aro’o ana’e rātou i te hō’ē mea tā te mau ta’ata i rave nō tō rātou ti’aturi-’ore-ra’a. Nāhea tātou e fa’a’ite ai ē, tē ti’aturi nei tātou i te mau parau a te peropheta ora ? ’A parau i te mau tamari’i e mea nāhea tō ’oe ha’amaita’ira’ahia i te pe’era’a i te parau a’o a te Fatu nā roto i tāna mau peropheta.

Nō te tahi atu ā mana’o, ’a hi’o i te ve’a Hoa nō teie ’āva’e.

Samuel the Lamanite [Samuela te ’āti Lamana], nā Lester Yocum.