Fa’ahōho’ara’a nō Nephi i ni’a i te hō’ē patu i roto i te ’āua, nā Jerry Thompson

2–8 nō Tetepa : « Ha’amana’o i te Fatu »

Helamana 7–12

’Ua a’o te metua tāne ’o Nephi, ’o Helamana, i tāna mau tamaiti ’ia « ha’amana’o, ha’amana’o » ’Ua hina’aro ’oia ia rātou ’ia ha’amana’o i tō rāua mau tupuna, ’ia ha’amana’o i te mau parau a te mau peropheta, ’e hau atu ā, ’ia ha’amana’o i « tō tātou Tāra’ehara, ’o te Mesia » (hi’o Helamana 5:5–14). E mea pāpū maita’i ’ua ha’amana’o mau ’o Nephi, inaha, ’o taua poro’i nei tāna i poro e rave rahi matahiti i muri iho « ma te tu’utu’u ’ore » i te ta’ata.(Helamana 10:4). « Nāhea e ti’a ai ia ’outou ’ia ha’amo’e i tō ’outou Atua ? » tāna ïa uira’a (Helamana 7:20). Te mau tauto’ora’a ato’a a Nephi ra—te porora’a, te purera’a, te ravera’a i te mau temeio ’e te tāparura’a i te Atua i te o’e—e mau tītaura’a ana’e ïa nō te tauturu i te ta’ata ’ia fāriu i ni’a i te Atua ’e ’ia ha’amana’o iāna. I roto i te mau rāve’a e rave rahi, te ha’amo’era’a i te Atua, ’o te hō’ē ïa fifi hau atu i te rahi i te ’orera’a e ’ite iāna. E mea ’ōhie ’ia ha’amo’e iāna ’ia fa’a’ōnevaneva-ana’e-hia tō tātou ferurira’a i « te mau mea faufa’a ’ore o teie nei ao » ’e ’ia fa’arumarumahia i te hara (Helamana 7:21 ; hi’o ato’a Helamana 12:2). ’Āre’a rā, mai tei ’itehia i roto i te tāvinira’a a Nephi, ’aita i taere roa nō te ha’amana’o ’e nō te « fāriu… i te Fatu ra i tō ’outou Atua » (Helamana 7:17).

Mana’o nō te ’apo i te ha’api’ira’a i te ’utuāfare ’e i te fare purera’a

Helamana 7–11

E heheu mai te mau peropheta i te hina’aro o te Atua i te mau ta’ata.

Helamana 7–11 o te hō’ē ïa vāhi maita’i ta’a ’ē nō te ha’api’i mai nō ni’a i te mau mea tā te mau peropheta e rave. ’A tai’o ai ’oe i teie mau pene, ’a ha’apa’o maita’i i te mau ’ohipa a Nephi, tōna mau mana’o ’e tāna ’āparaura’a ’e te Fatu. Nāhea te tāvinira’a a Nephi i te tauturu ia ’oe ’ia māramarama i te ’ohipa a te mau peropheta ? Teie te tahi mau hi’ora’a. E aha atu ā tā ’oe e ’ite ra ?

• Helamana 7:17–22 : E pi’i te mau peropheta i te tātarahapara’a ma te fa’aara nō ni’a i te mau fa’ahope’ara’a o te hara.

• Helamana 7:29 ; 9:21–36 :

• Helamana 8:13–23 :

• Helamana 10:7 :

• Helamana 10:4–7, 11–12 :

’Ia au i te mau mea tā ’oe i tai’o, nāhea ’oe i te fa’ata’a i te huru o te hō’ē peropheta ’e e aha tāna e rave ? E nehenehe e pāpa’i i te hō’ē tātarara’a poto. I muri iho ’a hi’o e aha tā ’oe e tu’u atu i roto i tā ’oe tātarara’a i muri a’e i te tai’ora’a i te parau « Prophet » i roto i te Arata’i nō te mau pāpa’ira’a mo’a (Vaira’a buka ’evanelia) ’aore rā « ’A pe’e i te peropheta ora » (Te mau ha’api’ira’a a te mau peresideni o te ’Ēkālesia : Ezra Taft Benson [2014], 147–55).

’Ua tāpa’o ānei ’oe i te itoito o Nephi i roto te Helamana 7:11–29 ? I tō ’oe mana’o, nō te aha i tītauhia ai i te mau peropheta i te tahi taime ’ia parau ma te mata’u ’ore mai tā Nephi i rave ? E nehenehe e ’imi i te mau pāhonora’a i roto i te tuha’a « ’Eiaha e māere » i roto i te parau poro’i a Elder Neil L. Andersen « Te peropheta a te Atua » (Liahona, Mē 2018, 26).

Ma te feruri i teie mau parau mau ato’a, ’a feruri nāhea te Fatu i te ha’amaita’ira’a ia ’oe nā roto i te tāvinira’a a tāna mau peropheta. E aha tāna i ha’api’i ia ’oe ’aita i maoro a’enei nā roto mai i tō tātou peropheta ora ? E aha tā ’oe e rave nei nō te fa’aro’o ’e nō te pe’e i te arata’ira’a a te Fatu ?

Helamana 9 ; 10:1, 12–15

’Eiaha tō’u fa’aro’o ia Iesu Mesia ’ia patuhia i ni’a noa i te mau tāpa’o ’e te mau temeio.

’Āhiri i nava’i noa i te mau tāpa’o ’e te mau temeio nō te taui i te ’ā’au o te hō’ē ta’ata, ’ua fa’afāriuhia ïa te tā’āto’ara’a o te mau ’āti Nephi nā roto i te mau tāpa’o fa’ahiahia tā Nephi i hōro’a i roto te Helamana 9. ’Aita rā te reira i tupu. ’A hi’o na i te mau huru rau tō te ta’ata pāhonora’a i te temeio i roto te Helamana 9–10. ’Ei hi’ora’a, e nehenehe ’oe e fa’aau i te mau pāhonora’a a nā ta’ata e pae e te mau ha’avā rahi i roto te Helamana 9:1–20 (hi’o ato’a Helamana 9:39–41 ; 10:12–15). E aha te ha’api’ira’a tā ’oe i ’apo mai i roto i teie mau ’ohipa, nō ni’a i te huru nō te patura’a i tō ’oe fa’aro’o i roto ia Iesu Mesia ?

Hi’o ato’a 3 Nephi 1:22 ; 2:1–2.

Helamana 10:1–12

E hōro’a te Fatu i te mana i te feiā e ’imi i tōna hina’aro ’e e fa’aitoito i te ha’apa’o i tāna mau fa’auera’a.

’A tuatāpapa ai ’oe te Helamana 10:1–12, ’a hi’o e aha tā Nephi i rave nō te fāri’i i te ti’aturi o te Fatu. Nāhea tōna fa’a’itera’a ē, ’ua ’imi ’oia i te hina’aro o te Fatu, ’eiaha rā tōna iho ? E aha tā te ’itera’a ’o Nephi e fa’auru nei ia ’oe ’ia rave ?

Helamana 10:2–4

Te feruri-hōhonu-ra’a i te parau a te Atua, e fa’atae mai ïa i te heheura’a.

Mai te peu e tupu mai te teimaha, te pe’ape’a, ’aore rā te ta’a ’ore i roto ia ’oe, e ti’a ia ’oe ’ia ha’api’i mai i te hō’ē ha’api’ira’a faufa’a mau nā roto mai i te hi’ora’a ’o Nephi i roto te Helamana 10:2–4. E aha tāna i rave ’a tupu ai tōna mana’o « taiā » ? (’īrava 3).

’Ua ha’amāramarama mai te peresideni Henry B. Eyring, « ’Ia feruri maīte ana’e tātou, tē ani ra tātou i te heheura’a a te Vārua » (« ’A tavini nā roto i te Vārua », Liahona, Novema 2010, 60). Nāhea e nehenehe ai ia ’oe ’ia ha’amau i te hō’ē peu nō te feruri-māite-ra’a ?

Helamana 12

Tē hina’aro nei te Fatu ’ia ha’amana’o vau iāna.

Nāhea ’oe i te ha’amana’o i te mau ha’amāramaramara’a faufa’a rahi—mai te mahana fānaura’a o te hō’ē melo o te ’utuāfare ’aore rā, te mau ha’amāramaramara’a nō te hō’ē hi’opo’ara’a ? Nāhea te reira e tū’ati ai i te tauto’ora’a e tītauhia nō te « ha’amana’o i te Fatu » ? (Helamana 12:5). E aha te ta’a-’ē-ra’a ?

Tē fa’ata’a nei te Helamana 12 e rave rahi mau mea e mo’ehia ai te Fatu i te ta’ata. Penei a’e e nehenehe tā ’oe e tāpura i te reira ’e ’ia ui ia ’oe iho ē, e nehenehe ānei te reira e fa’anevaneva ia ’oe iāna. E aha te mea e tauturu ia ’oe ’ia ha’amana’o ia Iesu Mesia ? E aha tē fa’auruhia ra ia ’oe ’ia rave ’ia au i te mau mea tā ’oe i ha’api’i mai ?

Hi’o ato’a Te Ha’api’ira’a Tumu ’e te mau Fafaura’a 20:77, 79 ; « Ma te ’ā’au ha’eha’a », Te mau Hīmene, N°105.

Fa’a’ohipa i te mau ha’api’ira’a tao’a. Pinepine te Fa’aora i te fa’atū’ati i te mau parau tumu o te ’evanelia i te mau mea o te mau mahana ato’a tā te ta’ata i mātau. ’Ia ’apo mai ’aore rā ’ia ha’api’i ana’e ’oe nō ni’a te Helamana 12:1–6, e nehenehe ’oe e fa’aau i « te pāpū ’ore o te ta’ata » i tō tātou huru, ’ia tāmata ana’e tātou i te ti’a pāpū i ni’a i te hō’ē ’āvae. Nāhea tātou e vai pāpū ai i te pae vārua ?

Nō te tahi atu ā mana’o, ’a hi’o i te ve’a Liahona ’e Nō te pūai o te feiā ’āpī nō teie ’āva’e.

Mana’o nō te ha’api’i i te tamari’i

Helaman 7:20–21

Tē hina’aro nei te Fatu ’ia ha’amana’o vau iāna.

• Nō te ha’amata i te hō’ē tāu’ara’a parau nō ni’a i te ha’amana’ora’a i te Fatu, e nehenehe ’oe e parau i tā ’oe mau tamari’i nō ni’a i te hō’ē taime ’a mo’ehia ai ia ’oe te hō’ē mea. E vaiiho ia rātou ’ia fa’a’ite mai i te mau ’ohipa mai te reira nō rātou iho. I muri iho, e tai’o ’āmui ’outou te Helamana 7:20–21 ’e e ani i tā ’oe mau tamari’i e aha tō rātou mana’o nō tē parau ra ha’amo’e i te Atua. E nehenehe paha tā ’oe mau tamari’i e pāpa’i hōho’a i te mau mea e nehenehe e fa’aha’amo’e ia tātou i te Fatu, ’e e fa’a’ohipa i tā rātou mau hōho’a pāpa’i nō te tāpo’i i te hō’ē hōho’a nō Iesu. I muri iho e nehenehe rātou e feruri i te mau mea tā rātou e nehenehe e rave nō te ha’amana’o iāna. ’A fa’a’ite ai rātou i tō rātou mau mana’o, e nehenehe rātou e tātara hō’ē hō’ē i te mau hōho’a pāpa’i e tae roa e ’itehia te hōho’a o te Fa’aora.

Helamana 8:13–23

Tē fa’a’ite pāpū nei te mau peropheta nō Iesu Mesia.

• Tauturu i tā ’oe mau tamari’i ’ia ’imi te Helamana 8:13–23, nō te ’ite mai i te mau i’oa ’o te mau peropheta tei ha’api’i nō ni’a ia Iesu Mesia. Penei a’e e nehenehe rātou e fa’atere ha’ati i te hō’ē hōho’a nō Iesu, i te mau taime ato’a e ’itehia hō’ē ia rātou. E aha tā tō tātou peropheta ora i ha’api’i mai nō ni’a i te Fa’aora ?

• E nehenehe ato’a ’outou e hīmene ’āmui i te hō’ē hīmene nō ni’a i te mau peropheta, mai te « Suis les prophètes » (Chants pour les enfants, 58–59). E nehenehe paha ’oe ’e tā ’oe mau tamari’i e rave mai i te hō’ē pereota faufa’a roa i roto i te hīmene, ’e e pāpa’i hō’ē ta’o nō roto mai i te pereota i ni’a i te mau ’api parau ta’ahira’a ’āvae e rave rahi. I muri iho e nehenehe ’oe e tu’u i te mau ta’ahira’a ’āvae i ni’a i te tahua e arata’i atu i te hō’ē hōho’a o te Fa’aora, ’e e nehenehe tā ’oe mau tamari’i e pe’e i te mau ta’ahira’a ’āvae e haere atu i te hōho’a ra. Nāhea te pe’era’a i te peropheta i te arata’i atu ia tātou ia Iesu Mesia ra ?

Helamana 10:1–4

Te feruri-hohonu-ra’a i te parau a te Atua, e fa’atae mai ïa i te heheura’a.

• Nō te tauturu i tā ’oe mau tamari’i ’ia māramarama e aha te aura’a ’ia feruri hōhonu, e nehenehe ’outou e tai’o ’āmui i te parau « Feruri hōhonu » i roto i te Arata’i nō te mau pāpa’ira’a mo’a (Vaira’a buka ’evanelia). E aha te tahi atu ā mau ta’o e tū’ati i te feruri hōhonu ? Penei a’e e nehenehe ’outou e tai’o ’āmui te Helamana 10:1–3 ’e e mono i te ta’o feruri hōhonu i te reira mau ta’o. Paraparau i tā ’oe mau tamari’i nō ni’a i te mau rāve’a nō te fa’ariro i te ferurira’a hōhonu ’ei tuha’a nō tā rātou tuatāpapara’a pāpa’ira’a mo’a.

Helamana 10:11–12

E ha’apa’o vau i te parau a te Metua i te ao ra.

• ’Ua ha’apa’o Nephi i te parau a te Metua i te ao ra noa atu ē, te aura’a o te reira ’o te ravera’a ïa i te hō’ē mea fifi. ’Ei hi’ora’a nō te reira, e nehenehe ’oe ’e tā ’oe mau tamari’i e tai’o te Helamana 10:2, 11–12. E nehenehe paha tā ’oe mau tamari’i e rave mai tā Nephi i rave—e haere i te hō’ē pae o te piha (mai tē huru ra ē, tē haere ra rātou i te fare), e fa’aea, e huri, ’e e haere i te tahi atu pae o te piha (mai tē huru ra ē, tē ho’i ra rātou e ha’api’i i te ta’ata). E aha te tahi mau mea tā te Metua i te ao ra e hina’aro ’ia rave tātou ?

Nō te tahi atu ā mana’o, ’a hi’o i te ve’a Hoa nō teie ’āva’e.

Nā roto i te hōro’a nō te tohura’a, ’ua fa’atītī’aifaro Nephi i te taparahi-pohe-ra’a o te ha’avā rahi.

© The Book of Mormon for Young Readers, Seantum—The Murderer Is Discovered [Seanatuma—’Ua ’itehia te ta’ata taparahi ta’ata], nā Briana Shawcroft ; ’eiaha e tāhōho’a