Pene 11

A pee i te peropheta ora

« Te peropheta faufaa roa a‘e, no tatou nei, o te peropheta ïa e ora nei i to tatou nei anotau ».

No roto mai i te oraraa o Ezra Taft Benson

I te hoê pô, 15 noa matahiti to Ezra Taft Benson, tei ni‘a oia i te amuraa maa e te toea o te utuafare, a faaroo ai i to’na metua tane ia tai‘o i te hoê rata no roto mai i te peresideni Joseph F. Smith e to’na na tauturu i roto i te Peresideniraa Matamua. Te na ô ra te tahi tuhaa o te rata e : « Te a‘o e te faaitoito puai atu nei matou ia haamauhia te hoê ‘Pô utuafare’ i roto i te Ekalesia taatoa, i reira ho‘i te mau metua tane e te mau metua vahine e haaputuputu ai i ta ratou mau tamaiti e ta ratou mau tamahine i piha‘i iho ia ratou i roto i te utuafare, e e haapii ai ia ratou i te parau a te Fatu … Mai te peu e, e haapa‘o te feia mo‘a i teie a‘o, te parau fafau atu nei matou e, e tae mai te mau haamaitairaa rarahi. E tupu te here i te rahi i roto i te utuafare, e te haapa‘o i te parau a te mau metua. E hotu te faaroo i roto i te aau o te feia apî no Iseraela, e e roaa ia ratou te puai no te aro i te mau hutihutiraa e te mau faahemaraa o te ino e tae mai i ni‘a ia ratou ».¹

I muri a‘era, ua faahaamana‘o mai te peresideni Benson e : « I te opaniraa [to’u metua tane i te rata, na ô maira oia e, ‘ua parau te peresideniraa, e o teie te parau a te Fatu ia tatou !’ Mai taua taime maira, ua faatupu tamau noa matou i te pureraa pô utuafare i roto i te fare o to’u apîraa ».²

Ia roaa to te peresideni Benson utuafare, ua tamau â oia e ta’na vahine i te rave i te peu ta’na i haapii mai na roto mai i to’na na metua. Ua parau oia e, « Na roto i teie iteraa [i roto i te fare o to’u na metua] e na roto i te iteraa no ni‘a i te mau pô utuafare i roto i to’u iho fare, te faaʻite papû nei au e, e tupu mai te mau haamaitairaa varua rarahi ».³

I te matahiti 1947 ua faaue mai te Peresideniraa Matamua i te mau melo o te Ekalesia ia faaitoito faahou i te faatupu i te mau pô utuafare. Ua haapapû faahou mai te peresideni Benson, a melo ai oia no te Pŭpŭ no te Tino Ahuru Ma Piti Aposetolo, i taua tumu parau ra i roto i te hoê a‘oraa o te amuiraa rahi. Ua faaʻite papû oia e, te utuafare, « o te hoê ïa faanahonahoraa hanahana »,⁴ e ua faahaamana‘o oia i te Feia Mo‘a i te mau haamaitairaa e roaa mai ia haapa‘o ana‘e ratou i te a‘oraa a te peropheta ia haapuai i to ratou mau utuafare e ia faatupu i te mau pô utuafare. Ua faaʻite papû oia e : « To tatou oaoa i ô nei e a muri a‘e, tei roto ïa i to tatou faaotiraa i teie hopoi‘a rahi. Titauhia ia tatou e te mau taea‘e e te mau tuahine, ia faanaho e ia haapa‘o maitai na roto i te pure, e te ti‘aturi nei au i roto i to’u aau e, e haamaitairaa rahi te roaa ia tatou, e tae mai te oaoa e te mauruuru rahi mai te mea e, e haapa‘o tatou i teie e i te taatoaraa o te tahi atu mau a‘oraa tei horo‘ahia mai ia tatou na te peresideni o te Ekalesia ».⁵

Na roto i to’na iteraa i te mau haamaitairaa tei roaa mai na roto i te haapa‘oraa i te a‘oraa a te mau tavini ma‘itihia a te Fatu, ua faaitoito pinepine o Ezra Taft Benson i te Feia Mo‘a i te Mau Mahana Hopea Nei ia hi‘o noa i to ratou mata i ni‘a i te peropheta ora. Ua faaʻite papû oia ma te taiâ ore i te piiraa hanahana o te peresideni tata‘itahi o te Ekalesia ta’na i tavini i piha‘i iho.⁶ I te taime te peresideni Spencer W. Kimball, tei faatoro‘ahia ei aposetolo hoê â mahana e te peresideni Benson, a horo‘a ai i ta’na a‘oraa matamua ei peresideni no te Ekalesia i mua i te hoê pŭpŭ feia faatere, « ua ti‘a te peresideni Benson i ni‘a, e ma te reo iti ruru, ua faaʻite mai i te mana‘o o te mau taata atoa i reira, na ô a‘era oia : ‘E te peresideni Kimball, i roto i te roaraa o te mau matahiti a faaterehia ai teie mau apooraa, aita â matou i faaroo a‘enei i te hoê a‘oraa mai ta oe i vauvau a‘enei. Te vai mau nei te hoê peropheta i Iseraela nei’ ».⁷ E ia tae mai taua piiraa hanahana ra i ni‘a i te peresideni Benson i muri a‘e i te poheraa o te peresideni Kimball, ua farii oia i te reira ma te haehaa e te mana‘o itoito. Na ô a‘era oia e : Ua pure tamau noa maua ta’u vahine, o Flora, ia roa mai te puʻe mahana o te peresideni Kimball i ni‘a i te fenua nei, e ia faatupuhia mai te hoê semeio no’na. I teie nei râ, ua faaoti te Fatu, e e rave ïa matou i te maitai a‘e e roaa ia matou, i raro a‘e i Ta’na faatereraa e Ta’na arata‘iraa, no te faahaere i teie ohipa i mua na te ao nei ».⁸

I teie mahana, te putuputu nei te Feia Mo‘a i te Mau Mahana Hopea Nei i roto i te Fare Amuiraa e na te ao atoa nei no te faaroo i te peropheta ora.

Te mau haapiiraa a Ezra Taft Benson,

O te Peresideni o te Ekalesia te auvaha parau o te Fatu i ni‘a i te fenua nei.

Haapii i te tape‘a noa i to outou mata i ni‘a i te peropheta. Oia te auvaha parau o te Fatu e te taata hoê roa o te nehenehe e paraparau no te Fatu i teie mahana. E tuu tatou i ta’na a‘oraa faaûruhia i mua roa. Faariro tatou i ta’na mau parau faaûruhia ei niu no te feruri i te a‘o a te mau mana faatere atoa i raro mai. I muri iho, e haapa‘o maite outou i te Varua ei reira outou e ite ai i te parau mau i te mau mea atoa.⁹

E farii te auvaha parau o te Fatu e te peropheta i ni‘a i te tino o te fenua nei i teie mahana i to’na mana na roto mai i te reni o te mau peropheta e tae roa’tu ia Iosepha Semita ra, tei faatoro‘ahia e Petero, Iakobo e Ioane, tei faatoro‘ahia e te Mesia, tei riro na e o te riro nei i teie mahana ei upoo no te Ekalesia, te Rahu nui o teie fenua, e te Atua i mua hoʻi Ia’na te mau taata atoa e faaʻite ai i ta ratou tiaauraa.¹⁰

Aita teie Ekalesia e arata‘ihia nei na roto i te paari o te taata. Ua ite au i te reira. Na te mana e te faaûruraa o te Atua Manahope e arata‘i nei i Ta’na Ekalesia.¹¹

Te peropheta faufaa roa a‘e no tatou, o te peropheta ora ïa.

Ua ite te Atua i te mau mea atoa, mai te haamataraa e tae roa’tu i te hopea, e aore e taata e riro hape noa ei peresideni no te ekalesia a Iesu Mesia, e aore e taata e vai i reira ma te tupu noa, e aore e taata e piihia ia hoʻi ma te hitimaʻue noa.

Te peropheta faufaa roa a‘e, no tatou nei, o te peropheta ïa e ora nei i to tatou nei anotau. Teie te peropheta tei mau i te mau arata‘iraa no teie mahana e no tatou, no ô mai i te Atua ra. Aita te heheuraa a te Atua ia Adamu i haapii ia Noa nahea ia hamani i te hoê pahi. E titau te u‘i tata‘itahi i te papa‘iraa mo‘a no mutaa iho ra, e tae noa’tu i te papa‘iraa mo‘a apî no roto mai i te peropheta ora. No reira, te tai‘oraa e te feruriraa hohonu faufaa a‘e o te ti‘a ia outou ia rave, o te tai‘oraa ïa e te feruriraa i te mau parau faaûru hopea no roto mai i te auvaha parau o te Fatu. No reira i riro ai ei ohipa faufaa roa ia roaa ia outou ta’na mau parau e ia tai‘o maite i te reira.…

Oia ïa, te haamauruuru nei tatou i te Atua no te hoê peropheta o te arata‘i noa mai ia tatou i teie nei tau hopea [a hi‘o Te mau himene, n° 10].¹²

E ara i te feia e tuu mai i te mau peropheta pohe i mua i te mau peropheta ora, no te mea, tei mua te mau peropheta ora i te mau taime atoa.¹³

Ua ma‘itihia te peresideni tata‘itahi no te taime e no te ohipa e hinaarohia ra e te ao nei e te Ekalesia. Ua riro ratou paatoa « ei mau taata no taua hora ra », mai ta tatou i ite i roto i te peresideni Spencer W. Kimball. A hi‘o na i te semeio no taua faatoro‘araa e te faaineineraa mai mutaa iho mai ra. Noa’tu ua piihia oia e ua horo‘ahia ia’na te mau taviri e rave rahi matahiti hou te taime a topa mai ai te pereue i ni‘a iho ia’na, ua riro te peresideni, i te mau taime atoa, ei taata i faataahia no te vahi ti‘a no tera tau e tera tau. Ua riro teie semeio ei tapa‘o no te ti‘araa hanahana o te Ekalesia.¹⁴

Te ui nei au e, hinaaro anei tatou i te hoê peropheta mau na te Fatu i ni‘a i te fenua nei i teie mahana ? Ua hinaaro anei te taata i te anotau o Noa i te hoê peropheta no te faaara ia ratou i te pae varua e i te pae tino ? Ahiri hoê taata i patoʻi i te pee ia Noa, e faaorahia anei oia i te diluvi ? Te parau mai nei te Bibilia ia tatou e, ia tae i te mau mahana hopea ta tatou e ora nei, e tuea te ino o te taata i te ino o te taata i te anotau o Noa a tamâ ai te Atua i te fenua na roto i te diluvi [a hi‘o Mataio 24:37–39]. I to outou mana‘o, e hinaaro anei tatou i te hoê peropheta i teie mahana no te faaara e no te faaineine ia tatou no te tamâraa ta te Atua i parau fafau mai e, e tae mai, na roto râ i te auahi i teie taime ?¹⁵

Mai te mea e, e hinaaro tatou ia ite e, mea maitai anei tatou i mua i te aro o te Fatu, e ui tatou ia tatou iho e, e mea maitai anei tatou i mua o To’na raatira tahuti nei—e mea au maitai anei to tatou oraraa i to tei faatahinuhia e te Fatu—te Peropheta ora—te Peresideni o te Ekalesia, e na reira atoa i to te pŭpŭ no te Peresideniraa Matamua.¹⁶

Ei peresideni no te Ekalesia, ua paraparau o Ezra Taft Benson ma te here rahi e te rû.

E parau mai te peropheta ora ia tatou i te mea ta tatou e ti‘a ia ite, eiaha te mea ta tatou e hinaaro ia faaroo.

Te hoê faaʻiteraa no te peropheta mau, o te faaʻiteraa ïa oia i te hoê parau poro‘i no ô mai i te Atua ra. Aita oia e tatarahapa no taua poro‘i ra, aita atoa oia e măta‘u i te mau mea o te riro i te faatupu i te vahavaharaa e te hamani-ino-raa.¹⁷

I te tahi taime te vai ra te tahi mau taata e feruri nei e, to ratou ite tahuti nei no ni‘a i te tahi mau tumu parau, tei ni‘a a‘e ïa i te ite no te ra‘i mai, ta te Atua e horo‘a mai nei i ta’na ra peropheta no ni‘a i taua tumu parau ra. Te feruri nei ratou e, e ti‘a i te peropheta ia farii i te mana e aore râ, i te haapiiraa mai tei fariihia e ratou hou a farii ai ratou i te hoê mea ta te peropheta e parau mai e o te riro i te patoʻi i to ratou ite tahuti nei. Eaha pai te faito no te ite tahuti nei a Iosepha Semita ? Noa’tu râ, ua horo‘a mai oia i te mau heheuraa no ni‘a i te mau huru tumu parau atoa … Te faaitoito nei tatou i te ite tahuti nei i roto i te mau mea e rave rahi, tera râ, a haamana‘o e, mai te mea e, e tupu te umeumeraa i rotopu i te ite tahuti nei e te mau parau a te peropheta, e ti‘a outou i piha‘i iho i te peropheta, e e haamaitaihia outou e na te tau e faaʻite mai e, ua rave outou i te ohipa ti‘a.

… Aita e titauhia i te peropheta ia parau e, « Teie ta te Fatu i parau » no te horo‘a mai i te papa‘iraa mo‘a ia tatou nei.

I te tahi taime e mârô te tahi pae i te mau parau. E parau ratou e, ua a‘o mai te peropheta ia matou, aita râ matou i titau-roa-hia ia pee i te reira, ahani râ ua parau mai oia, e faaueraa teie. Tera râ, teie ta te Fatu i parau no ni‘a i te peropheta, « E haapa‘o outou i ta’na mau parau e i ta’na mau faaueraa atoa o ta’na e horo‘a’tu ia outou ». (PH&PF 21:4)

… E parau mai te peropheta ia tatou i te mea ta tatou e ti‘a ia ite, eiaha râ te mea ta tatou e hinaaro ia ite.

« Ua faaʻite mai oe ia maua i te mau mea faahapa, e ore hoʻi e ti‘a ia maua ia faaoroma‘i », te na reira ra na taea‘e o Nephi i te amuamu. Pahono atura râ Nephi i te na ôraa e, « E mea faahapa ïa te parau mau, no te mea na te reira e haaputapû ia ratou i to ratou aau ». (1 Nephi 16:1–2).

Teie te parau a te peresideni Harold B. Lee :

« E riro outou i te au ore i te mau mea no roto mai i te mana faatere o te Ekalesia. E patoʻi paha te reira i to outou mau mana‘o poritita. E patoʻi paha te reira i to outou mau mana‘o i te pae sotiare. E faataupupu paha te reira i te tahi pae o to outou oraraa sotiare … To outou parururaa e to matou atoa nei, tei te huru ïa to tatou peeraa e aore râ, to tatou pee-ore-raa … E tape‘a maite tatou i to tatou mata i ni‘a i te peresideni o te Ekalesia ». (Conference Report, Atopa 1970, p. 152–153).

Tera râ, o te peropheta ora teie e riro nei ei au-ore-raa na to te ao nei. « I roto roa’toa i te Ekalesia nei », te na reira ra te peresideni Kimball, « e rave rahi o te faaunauna nei i te menema o te mau peropheta no mutaa iho ra, e o te pehi nei to ratou feruriraa i te ofa‘i i ni‘a i te mau peropheta ora ». (Instructor, 95:257).

No te aha ? No te mea e faaʻite mai te peropheta ora i te mau mea e ti‘a ia tatou ia ite i teie nei, areʻa to te ao nei, e mea au a‘e na ratou ia pohe atu te mau peropheta e aore râ, ia haapa‘o noa ratou i ta ratou mau ohipa.…

Te huru tatou e pahono atu i te mau parau a te hoê peropheta ora, a parau mai ai oia ia tatou i te mea e ti‘a ia tatou ia ite, e o ta tatou hoʻi e au a‘e eiaha roa’tu ia faaroo, ua riro ïa ei tamataraa no to tatou haapa‘o maitai.…

E feruri paha te taata ite e, te faaûruhia nei te peropheta i te taime ana‘e ua tuʻati o’na i ni‘a ia ratou, aita ana‘e, te horo‘a noa ra te peropheta i to’na mana‘o—te paraparau ra oia mai te taata. E feruri paha te feia moni e, aita e titauhia ia ratou ia faaroo i te a‘o a te hoê peropheta iti ha‘iha‘i…

Eita te peropheta e riro papû ei taata tuiroo i roto i te ao nei aore râ i to te ao nei.

Ia heheu ana‘e mai te peropheta i te parau mau, e faaamahamaha te reira i te taata. E haapa‘o te feia aau parau-ti‘a i ta’na mau parau, areʻa te feia aau parau-ti‘a ore ra, eita ratou e tau‘a i te peropheta e aore râ, e aro ratou ia’na. Ia faaʻite ana‘e te peropheta i te mau hara a to te ao nei, e hinaaro to te ao nei e tapiri i te vaha o te peropheta, e aore râ, e rave noa ratou mai te huru ra e, aita e peropheta, e aita atoa ïa e tatarahapa i ta ratou mau hara. Eita roa’tu te roo e riro ei faati‘araa no te parau mau. E rave rahi peropheta tei taparahi-pohe-hia e aore râ, tei tiavaruhia. A fatata noa ai tatou i te tae-piti-raa mai o te Fatu e ite outou e, ia rahi noa’tu te ino o to te ao nei, e iti roa’toa ïa te roo o te peropheta i mua ia ratou.¹⁸

E haamaitaihia tatou ia pee ana‘e tatou i te peropheta ora.

No te tauturu ia outou ia upooti‘a i te tamataraa rahi e vai nei i mua ia outou, te horo‘a’tu nei au ia outou… i te hoê taviri rahi, e mai te mea e, e faatura outou i te reira, e faatorona te reira ia outou i te hanahana o te Atua, e e faaupooti‘a ia outou noa’tu te ino rahi o Satane

… Te himene nei tatou te Ekalesia i te himene ra, « Mauruuru Matou, E te Atua » [Te mau himene, no. 10]. No reira teie te taviri rahi—a pee i te peropheta…

O te peropheta ana‘e te taata e parau no te Fatu i roto i te mau mea atoa.

I roto i te tuhaa 132 irava 7 o Te Parau Haapiiraa e te Mau Parau Fafau te parau nei te Fatu no ni‘a i te peropheta—te peresideni—i te na ôraa e :

« Aita’tu maori râ te taata hoê i ni‘a i te ao nei i te taime hoê o tei horo‘ahia’tu teie nei mana e te mau taviri ho‘i no teie nei autahu‘araa ».

E i roto i te tuhaa 21 irava 4–6, te parau nei te Fatu e :

« No reira, e to te ekalesia e, e haapa‘o outou i ta’na mau parau e i ta’na mau faaueraa atoa o ta’na e horo‘a’tu ia outou mai te noaa ia’na ra, i te haereraa mo‘a i mua ia’u nei

« E farii ho‘i outou i ta’na parau mai te mea ra e, no roto i to’u iho nei vaha, ma te faaoroma‘i e te faaroo.

« No te mea na roto i te raveraa i teie nei mau mea e ore roa outou e noaa i te mau uputa o hade ».¹⁹

Eita roa te peropheta e arata‘i ê atu i te Ekalesia.

Ua parau te peresideni Wilford Woodruff : « Te parau nei au i to Iseraela, e ore roa te Fatu e faati‘a ia’u aore râ te tahi atu taata ia ti‘a ei peresideni no teie nei Ekalesia no te arata‘i ê atu ia outou. Aita te reira i roto i te faanahonahoraa. E ere te reira te mana‘o o te Atua » [a hi‘o Te mau haapiiraa a te mau Peresideni o te Ekalesia : Wilford Woodruff (2004), 222].

Ua faati‘a mai te peresideni Marion G. Romney i teie fifi iti tei tupu i ni‘a ia’na :

« Te haamana‘o nei au e rave rahi matahiti a‘enei, e episekopo vau, ua haere mai te peresideni Heber J. Grant e paraparau i roto i ta matou paroisa. I muri a‘e i te pureraa ua faahoro vau ia’na i te fare … A ti‘a ai oia i piha‘i iho ia’u, ua tuu maira oia i to’na rima i ni‘a i to’u tapono e na ô maira : ‘E ta’u tamaiti, e tape‘a tamau noa oe i to oe mata i ni‘a i te Peresideni o te Ekalesia, e mai te mea noa’tu e, e parau mai oia ia oe ia rave i te hoê mea, e e ohipa hape hoʻi, e e rave oe, e haamaitai mai te Fatu ia oe no te reira’. E ma te anapanapa i to’na mata, na ô maira oia e, ‘Eiaha râ oe e haape‘ape‘a. E ore roa te Fatu e vaiiho i to’na auvaha parau ia arata‘i ê atu i te taata’ ». (Conference Report, Atopa 1960, p. 78).²⁰

Te faati‘ahia ra te aamu no Brigham Young, a tere ai oia na roto i te hoê oire, ite atura oia i te hoê taata te hamani ra i te hoê fare, parau atura oia i taua taata ra ia tata‘i piti te me‘ume‘u o to’na mau papa‘i fare. No to’na farii i te peresideni Young ei peropheta, ua taui a‘era oia i ta’na mau faanahoraa e ua tata‘i piti atura i te mau papa‘i fare. Aita i maoro i muri iho, ua tae maira te pape pu‘e na roto i taua oire ra, e e ino rahi ta’na i faatupu, tera râ, ua vai aueue ore noa te mau papa‘i o teie taata. A tamau ai oia i te tapo‘i o to’na fare, ua faaroohia oia i te himeneraa, « Mauruuru matou e te Atua, no ta oe na peropheta ! »²¹

Ei melo no te Ekalesia, te vai nei te tahi mau aroa tei titauhia ia tatou ia haere na roto mai te mea e, e hinaaro tatou ia tapae i te fare ma te maitai. E horo‘ahia ia tatou te tahi fana‘oraa ia ma‘iti i rotopu i te mau a‘oraa tapitapi a te tahi mau taata. No reira i titauhia ai ia tatou ia haapii—e oi‘oi noa’tu to tatou haapiiraa, maitai noa’tu—ia tapeʻa i to tatou mata i ni‘a i te peropheta, te Peresideni o te Ekalesia.²²

Te mau mana‘o tauturu no te tuatapaparaa e te haapiiraa

Uiraa

Ua parau te peresideni Benson e, « Haapii i te tape‘a noa i to outou mata i ni‘a i te peropheta » (tuhaa 1). Eaha te auraa o teie parau no outou ?
I to outou mana‘o, no te aha o te Peresideni o te Ekalesia i teie taime te peropheta faufaa roa a‘e no tatou ? (A hi‘o i te tuhaa 2). Eaha te a‘oraa ta tatou i farii aita i maoro a‘enei mai roto mai i te peropheta ora ?
Ia hi‘ohi‘o faahou ana‘e outou i te tuhaa 3, a feruri i te hoê taime a pee ai outou i te a‘o a te peropheta noa’tu e, aita outou i maramarama hope roa i te reira. Eaha ta tatou e nehenehe e apo mai na roto mai i te reira mau iteraa ?
A feruri na i te « taviri rahi » ta te peresideni Benson i faaʻite mai i roto i te tuhaa 4. Eaha te tahi mau haamaitairaa ta outou i farii a haapa‘o maitai ai outou i teie taviri rahi ?

Te mau papa‘iraa mo‘a

2 Paraleipomeno 20:20 ; Amosa 3:7 ; Ephesia 2:19–20 ; 4:11–15 ; PH&PF 1:14–16, 37–38 ; 107:91–92 ; Te mau Hiro‘a Faaroo 1:6

Tauturu haapiiraa

« Eiaha e taiâ i te rave i te taime [maniania ore]. E mea pinepine te mau taata i te rave i te taime no te feruri hou a pahono ai i te mau uiraa e aore râ a faaite ai i to ratou mau mana‘o. E nehenehe outou e rave i te hoê taime faaearaa i muri a‘e i ta outou uiraa, i muri a‘e i te faati‘araahia te hoê aamu pae varua e aore râ i te taime e fifi ai te hoê taata i te faaite i to’na iho mau mana‘o » (Te haapiiraa: Aita e piiraa teitei a‘e [1999], 67).