Omuaraa

Ua faanaho te Peresideniraa Matamua e te Pŭpŭ no te Tino Ahuru Ma Piti Aposetolo i teie mau buka, Te mau haapiiraa a te mau Peresideni o te Ekalesia no te tauturu ia outou ia haafatata atu i to outou Metua i te Ao ra, e ia faahohonu i to outou ite no te evanelia a Iesu Mesia tei faaho‘i-faahou-hia mai. A tuu noa ai te Ekalesia i te buka apî i roto i teie mau buka, e roaa ïa ia outou te hoê haaputuraa buka evanelia no to outou utuafare. Ua opuahia teie mau buka no te tuatapaparaa a te taata hoê, e no te mau haapiiraa i te Sabati. E tauturu atoa te reira ia outou ia faaineine i te tahi atu mau haapiiraa e aore râ mau a‘oraa, e ia pahono i te mau uiraa no ni‘a i te haapiiraa tumu a te Ekalesia.

Te vauvau nei teie buka i te mau haapiiraa a te peresideni Ezra Taft Benson, tei tavini ei Peresideni no te Ekalesia a Iesu Mesia i te Feia Mo‘a i te Mau Mahana Hopea Nei mai te 10 no novema 1985, e tae atu i te 30 no me 1994.

Te tuatapaparaa a te taata hoê

A tuatapapa ai outou i te mau haapiiraa a te peresideni Ezra Taft Benson, a titau i te faaûruraa a te Varua Maitai na roto i te pure. E tauturu te mau uiraa i te pae hopea o te pene tata‘itahi ia outou ia feruri, ia maramarama e ia faa‘ohipa i te mau haapiiraa a te peresideni Benson. E tauturu atoa teie mau mana‘o i muri nei ia outou :

Papa‘i i te mau mana‘o o te feruriraa e o te aau e tae mai na roto i te Varua Maitai, i roto i ta outou tuatapaparaa.
A reni i te mau tuhaa ta outou e hinaaro e hamanaʻo. A opua ia tamau aau i te tahi mau tuhaa e aore râ a tapa‘o i te reira i roto i ta outou mau papa‘iraa mo‘a, i pihaʻi iho i te irava tuʻati.
Tai‘o i te hoê pene e aore râ te hoê tuhaa hau i te hoê taime no te maramarama hohonu a‘e i te reira.
A ui ia outou iho i te tahi mau uiraa mai teie i muri nei : Nahea te mau haapiiraa a te peresideni Benson i te faarahi i to’u maramaramaraa i te mau parau tumu o te evanelia ? Eaha ta te Fatu e hinaaro nei ia haapii au mai roto mai i teie mau haapiiraa ?
Faa‘ite i to outou utuafare e i te mau hoa i te mau mea ta outou i apo mai.
A ui ia outou iho nahea te mau haapiiraa i roto i teie buka e nehenehe ai e tauturu ia outou i roto i to outou mau tamataraa e mau mana‘ona‘oraa.

Haapii mai roto atu i teie buka

Ua opuahia teie buka no te faa‘ohiparaa i te fare e i te fare pureraa. E nehenehe i teie mau arata‘iraa i muri nei e tauturu ia outou ia haapii mai roto atu i teie buka.

Faaineine no te haapii

Titau i te arata‘iraa a te Varua Maitai a faaineine ai outou no te haapii. Tuatapapa i te pene na roto i te pure, ia ti‘a ia outou ia papû maitai te mau haapiiraa a te peresideni Benson. E haapii outou ma te aau tae e te puai rahi a‘e mai te mea e, e faaûru ta’na mau parau ia outou iho (a hi‘o PH&PF 11:21).

Mai te mea e haapii outou i te haapiiraa na te Autahu‘araa a Melehizedeka e aore râ na te Sotaiete Tauturu, eiaha outou e tuu i teie buka i te hiti e aore râ e faaineine i te hoê haapiiraa mai roto mai i te tahi atu mau materia. Na roto i te pure, a ma‘iti i roto i te pene te mau haapiiraa ta outou e mana‘o ra, e riro i te tauturu rahi atu i te mau taata ta outou e haapii ra. I roto i te tahi mau pene, ua rahi aʻe te mau materia no te haapii atu i te taime e vai ra no te haapiiraa.

A faaitoito i te mau piahi ia tuatapapa i te pene hou a haere mai ai i te haapiiraa e ia afa‘i mai i ta ratou buka. Ia na reira ana‘e ratou, e ineine maitai a‘e ïa ratou no te tau‘aparau e no te faatupu i te maitai i roto i te tahi e te tahi.

I roto i ta outou faaineineraa no te haapii, a haapa‘o maitai i te tuhaa ra « Te mau mana‘o tauturu no te tuatapaparaa e te haapiiraa » i te pae hopea o te pene tata‘itahi. I raro a‘e i te reira upoo parau, e ite outou i te mau uiraa, te mau papa‘iraa mo‘a tuʻati e te mau tauturu haapiiraa. E tu‘ati maitai te mau uiraa e te mau papa‘iraa mo‘a i ni‘a i te pene i reira ratou e itehia ai. E nehenehe i te tauturu no te tuatapaparaa e te haapiiraa e arata‘i ia outou i roto i ta outou mau tautooraa no te haapii e no te ora i te evanelia, e no te tauturu atoa ia vetahi ê ia na reira.

Omua i te pene

A omua ai outou i te pene, e i te roaraa o te haapiiraa, a imi i te raveʻa no te faatupu i te hoê huru i reira ho‘i te Varua e nehenehe ai e haaputapû i te aau e i te mana‘o o te feia ta outou e haapii ra. No te haamata i te haapiiraa, a tauturu i te feia ta outou e haapii ra ia faatumu i te mana‘o i ni‘a i te mau haapiiraa o te pene. E nehenehe ta outou e faa‘ohipa i te hoê e aore râ e rave rahi atu â mana‘o i muri nei :

A tai‘o e a aparau i te tuhaa i parauhia « No roto mai i te oraraa o Ezra Taft Benson » i te haamataraa o te pene.
A aparau no ni‘a i te hoê hoho‘a e aore râ, te hoê irava no roto mai i te pene.
A himene amui i te hoê himene e tu‘ati.
A faa‘ite poto noa i te hoê ohipa tei tupu i ni‘a ia outou iho no ni‘a i te tumu parau.

A faaitoito i te tauʻaraa parau no ni‘a i te mau haapiiraa a te peresideni Benson

A haapii ai outou i teie buka, a ani ia vetahi ê ia faa‘ite mai i to ratou mau mana‘o, ia ui i te mau uiraa e ia haapii i te tahi e te tahi. Mai te mea e, e amui mai ratou i roto i te aparauraa, e ineine rahi atu â ïa ratou no te apo mai e no te farii i te heheuraa no ratou iho. A vaiiho i te mau tau‘araa parau maitatai ia tere noa na, eiaha e tamata i te haapii i te taatoaraa o te mau tumu parau. No te faaitoito i te tauʻaraa parau, a faa‘ohipa i te mau uiraa i te pae hopea o te pene tata‘itahi. E nehenehe atoa ta outou e faaineine i ta outou iho mau uiraa taa ê no te taata ta outou e haapii nei.

E nehenehe teie mau raveraa i muri nei e horoʻa mai ia outou i te tahi atu mau manaʻo :

A ani i te mau piahi ia faa‘ite mai e, eaha ta ratou i haapii mai na roto i ta ratou iho tuatapaparaa i te pene. E mea maitai atoa ia farerei i te tahi mau piahi i roto i te hepetoma e ia ani ia ratou ia haere ineine mai no te faa‘ite i te mea ta ratou i haapii.
A faaue i te tahi mau piahi ia tai‘o i te tahi o te mau uiraa i ma‘itihia i te pae hopea o te pene (ei taata hoê anei e aore râ, ei pŭpŭ na‘ina‘i). A ani ia ratou ia imi i te mau haapiiraa e vai ra i roto i te pene, o te tu‘ati i te mau uiraa. I muri iho a ani ia ratou ia faa‘ite mai i to ratou mau mana‘o e ta ratou mau hi‘oraa.
A tai‘o amui outou i te tahi o te mau haapiiraa a te peresideni Benson i roto i te pene. A ani i te mau piahi ia faa‘ite mai i te tahi hi‘oraa i roto i te mau papa‘iraa mo‘a e aore râ i roto i te mau ohipa ta ratou iho i ite no te faahoho‘a i te mea e haapiihia ra.
A ani i te mau piahi ia ma‘iti i te hoê tufaa e ia tai‘o i te reira ma te mamu noa. A ani ia ratou ia amui ei pŭpŭ piti taata e aore râ toru taata, e ma‘iti atu ai i te hoê â tuhaa no te tauaparau ratou iho i te reira.

Faaitoito i te faa‘iteraa e i te faa‘ohiparaa

E auraa taa ê te tae mai i roto i te mau piahi no ni‘a i te mau haapiiraa a te peresideni Benson mai te peu e faa‘ite ratou i te reira ia vetahi ê e e faa‘ohipa ratou i te reira i roto i to ratou oraraa. E nehenehe ta outou e faa‘ohipa i te hoê e aore râ e rave rahi atu â mana‘o i muri nei :

A ani i te mau piahi nahea ratou e nehenehe ai e faa‘ohipa i te mau haapiiraa a te peresideni Benson i roto i ta ratou mau hopoi‘a i te utuafare e i roto i te Ekalesia. Ei hi‘oraa, e ti‘a ia outou ia tauturu ia ratou ia feruri e ia aparau, nahea ratou e nehenehe ai e faa‘ohipa i ta’na mau haapiiraa i roto i to ratou ti‘araa ei mau tane faaipoipo, ei mau vahine faaipoipo, ei mau metua, ei mau tamaiti, ei mau tamahine, ei mau taea‘e haapii utuafare, e aore râ, ei mau tuahine hahaere.
A faaitoito i te mau piahi ia faa‘ite i te tahi o te mau haapiiraa a te peresideni Benson i te mau melo no te utuafare e i te mau hoa.
A ani i te mau piahi ia faa‘ohipa i te mea ta ratou i apo mai e ia faa‘ite mai ratou i to ratou mau iteraa i te haamataraa o te haapiiraa i muri iho.

Faahope i te aparauraa

A pu‘ohu poto noa i te haapiiraa e aore râ, a ani i te hoê e aore râ, e piti piahi ia pu‘ohu mai. A faa‘ite i to outou iteraa papû no ni‘a i te mau haapiiraa ta outou i aparau. E hinaaro atoa paha outou e ani i te tahi ia faa‘ite mai i to’na iteraa papû.

Haamaramaramaraa no ni‘a i te mau materia i faahitihia i roto i teie buka

Te mau haapiiraa i roto i teie buka, e mau faahitiraa parau ïa no roto mai i te mau a‘oraa, te mau papa‘iraa, te mau buka, te mau rata e te mau buka aamu a te peresideni Ezra Taft Benson. No teie mau faahitiraa, ua tape‘a-maite-hia te mau faatomaraa, te papa‘iraa, te mau reta rahi e te mau paratarafa o te mau papa‘iraa tumu, maori râ, ua taui te mau reta i te nene‘iraa no te haamaitai i te tai‘oraa. No te reira tumu, e ite paha outou i te tahi mau tu‘ati-ore-raa i roto i te papa‘iraa. Ei hi‘oraa, te mau taʻo no te faahiti i te Atuaraa, te vai ra ua papa‘i-naʻinaʻi-hia e te vai ra ua papa‘i-rarahi-hia.

Ua faa‘ohipa pinepine atoa te peresideni Benson i te mau parau mai te mau tane, te tane, e aore râ, taata nei no te parau i te mau taata atoa, te tane e te vahine. Ua faa‘ohipa pinepine oia i te mau ta‘o o’na, ta’na, e oia no te parau i na apeni e piti. E peu matarohia te reira i roto i te paraparau i to’na tau. Noa’tu râ te mau taa-ê-raa i roto i teie faanahoraa no te reo e te mau faa‘ohiparaa, e tano te mau haapiiraa a te peresideni Benson na te mau vahine e na te mau tane.