Pene 19
Te faatereraa
« Mai te mea ananahi e piihia outou i ni‘a i te faatereraa o te Ekalesia, [o to outou] fenua e o to outou iho utuafare, e ti‘a ia outou ia vai aueue ore i roto i te faaroo, aueue ore i mua i te ino ».
No roto mai i te oraraa o Ezra Taft Benson
Ua haamata Ezra Taft Benson i te riroraa ei ti‘a faatere i to’na apîraa. I te fatataraa te 13 o to’na matahiti, ua piihia to’na metua tane ia tavini i te hoê misioni. No te mea o oia te matahiapo o te utuafare, na Ezra i amo i te hopoi‘a no te faatereraa i te ohipa o te faaapu i te revaraa to’na metua tane. E rave rahi matahiti i muri mai, te tavini ra oia i roto i te misioni no Peretane, ua tavini oia ei peresideni amaa e ei peresideni no te amuiraa no Newcastle (mai te huru te reira i te hoê mataeinaa i teie mahana). I muri iho, ua tavini oia i roto e toru peresideniraa tĭtĭ—te hoê taime ei tauturu, te tahi ei peresideni tĭtĭ, no te hoê tau poto noa, e te tahi faahou ei peresideni tĭtĭ, no te hoê tau maoro a‘e. I roto i ta’na toroʻa ohipa, e rave rahi ti‘araa faatereraa ta’na i amo i roto i te ohipa faaapu. No te mea ua riro mai oia ei ti‘a faatere aravihi roa i roto i te ohipa faaapu, ua ani roa te Peresideni Dwight D. Eisenhower ia’na ia tavini i ni‘a i te ti‘araa teitei roa a‘e o te ohipa faaapu i te mau Hau Amui no Marite. Vaʻu matahiti te maoro to’na ohiparaa e te peresideni Eisenhower ei faatere hau no te ohipa faaapu i te mau Hau Amui no Marite.
Na mua oia a riro mai ai ei Peresideni no te Ekalesia, ua tavini te peresideni Benson 12 matahiti ei peresideni no te Pŭpŭ no te Tino Ahuru Ma Piti Aposetolo. E mea faatura rahi te mau melo o te pŭpŭ ia’na ei ti‘a faatere. Pinepine Elder Bruce R. McConkie « i te parau i te mau melo o to’na utuafare e, aita roa oia i ite a‘enei i te hoê faatereraa i roto i te Ekalesia mai ta te peresideni Benson ».1
A faatere ai oia i te Tino Ahuru Ma Piti, ua faaitoito noa te peresideni Benson i te mau melo o te pŭpŭ ia faa‘ite hua mai i to ratou mana‘o, e noa’tu e, e mana‘o ê to’na. I te riroraa Elder Russell M. Nelson ei melo apî no te pŭpŭ, ua mana‘o oia e, peneiaʻe eiaha e parau i to’na mana‘o. « Aita râ [te peresideni Benson] i vaiiho noa », ua parau oia. « E mai te mea e vai mu noa vau no ni‘a i te hoê mea, na’na e faamahuti mai i to’u mana‘o i rapae ».2
Noa’tu â e mea titau te peresideni Benson i te mana‘o o te taatoaraa, aita râ oia i vaiiho i te tauʻaraa parau ia hahi ê. Ua parau te peresideni Howard W. Hunter, ua « ite oia nahea i te faatupu i te tauʻaraa parau matara e te afaro i rotopu i [te mau] Taea‘e e [ua] ti‘a ia’na ia faatere e ia arata‘i haere i te reira no te tapae i te hoê faaotiraa amui e te hoêraa o te taatoaraa ».3 Ia « mana‘o oia e, ua navaʻi te tauʻaraa parau, pinepine oia i te parau, ‘Te mana‘o nei au ua navaʻi ta tatou vaereraa. E haaputu ana‘e i teie nei’, no te ite mai i te rave‘a ».4
E mea manaʻonaʻo te peresideni Benson i te taata ta’na e arata‘i, e mea haapii oia na roto i te hi‘oraa. « Aita e taata ê atu ta’u i mâtau e teie huru faaturaraa rahi i to’na mau hoa ohipa e teie mana‘ona‘oraa rahi i to ratou maitai », te parau ïa a te peresideni Gordon B. Hinckley. « Eita roa oia e ani i te tahi mau puʻeraa i te hoê mea eita o’na iho e hinaaro ia rave, aita, e faa‘ite râ oia i te hi‘oraa tano no te taviniraa ia pee mai te tahi mau puʻeraa ».5 E mea aravihi atoa te peresideni Benson no te opereraa i te ohipa i te tahi atu taata, no te haapiiraa e no te paturaa ia ratou na roto i te reira faanahoraa.
I roto i te amuiraa rahi i paturuhia ai te peresideni Benson ei Peresideni no te Ekalesia, ua faa‘ite te peresideni Gordon B. Hinckley i to’na mana‘o papû e, ua ma‘iti te Fatu e ua faaineinehia te peresideni Benson no te arata‘i mai i te Ekalesia.
« Te horo‘a atu nei au i to’u iteraa papû e, na te Fatu i ma‘iti ia Ezra Taft Benson no te riro mai ei melo no te Apooraa no te Tino Ahuru Ma Piti fatata a maha ahuru ma toru matahiti i teie nei. Na te Fatu i roto i taua mau matahiti ra i hi‘opo‘a e i faatiti‘aifaro ia’na, i haapii e i faaineine ia’na…
« Ei taata mâtau ia’na e o te ti‘a nei i to’na aoao, te horo‘a atu nei au i to’u iteraa papû e, e taata faaroo oia, ua papû te faatereraa, ua hohonu te here no te Fatu e no Ta’na ohipa, ua î oia i te here no te mau tamaiti e te mau tamahine a te Atua i te mau vahi atoa. E taata tei itehia to’na aravihi ».6
Te peresideni Ezra Taft Benson e to’na na taturuu i roto i te Peresideniraa Matamua : Te peresideni Gordon B. Hinckley (i te pae aui) e te peresideni Thomas S. Monson (i te pae atau)
Te mau haapiiraa a Ezra Taft Benson
1
Te feia faatere aravihi, e vai aueue ore oia i roto i te faaroo e e faa‘ite oia i te hi‘oraa maitai.
Ua tupu te mana o te Mesia no te faatereraa mai roto mai i te tamataraa o To’na hi‘oraa. Ta’na piiraa rahi, oia hoʻi, « Mai pee mai ! » … To’na [manuïaraa i roto te apîraa] i te haavare ore o te mau taata e te pûpûraa ia ratou iho i te mau parau tumu no te parau-ti‘a, tei te huru ïa i te riroraa te here ei rave‘a faaitoito rahi. Ua tauturu Oia ia tatou ia ite e, e nehenehe i te hiro‘a hanahana i roto ia tatou tata‘itahi, teie hiro‘a te tiaoro nei ia mahiti i rapae, e nehenehe i te reira ia riro ei mea hanahana, ei mea oraora e ei mea papû. Te tamau noa nei to’na hi‘oraa ia riro ei ti‘aturiraa rahi roa a‘e e ei puai rahi roa a‘e no te taata nei.7
Mai te mea ananahi e piihia outou i ni‘a i te faatereraa o te Ekalesia, [o to outou] fenua e o to outou iho utuafare, e ti‘a ia outou ia vai aueue ore i roto i te faaroo, aueue ore i mua i te ino, e mai ta Paulo i parau, « A ahu na i te haana tama‘i atoa a te Atua ra, ia ti‘a ia outou ia pato‘i atu i te mau rave‘a paari a te diabolo ra. E ere hoʻi i te taata ana‘e ra ta tatou e to nei, o te feia hau atoa râ, e te mana, e te mau tavana o teie nei ao pouri, et e mau varua iino i te reva nei ». (Ephesia 6:11–12).8
Titauhia no ta tatou feia apî ia faaitihia mai te mau faahaparaa e ia faarahihia mai te mau hi‘oraa maitai. O outou te mau hi‘oraa maitai ta ratou e hi‘o’tu ei hoho‘a no to ratou oraraa, ta ratou e nehenehe e pee e e faahoho‘a’tu. Titau ratou i te faaûruraa e nehenehe e mahuti mai na roto mai ia outou a faatuea ai outou i to outou oraraa i ni‘a i te mau haapiiraa o te evanelia.9
2
E pahono te taata i te faatereraa aravihi.
Haehaa
Hoê o te mau tapa‘o no te faatereraa maitai, o te varua haehaa ïa, i teie nei e a muri noa’tu.10
Te puai pae varua
E faatiani te puai pae varua i te mana‘o au, te mau fâ au, te mau peu au, te mau huru au e te mau tautooraa au. Teie te mau tuhaa hiro‘a e faaitoito i te paari, te maitai i te pae tino e i te pae feruriraa, e te fariiraa e te pahonoraa ma te anaanatae ia vetahi ê.11
I te taata maitai noa e roaa ai te aravihi no te faateitei e no te faaitoito i te tahi e te tahi, ia rahi atu â te taviniraa, ia rahi atu â te manuïaraa, ia rahi atu â te puai.12
Titau-roa-hia te faaûruraa no te faatereraa tiʻa … E ti‘a ia tatou ia farii i te varua no te faaûruraa, no te haapii anei (PH&PF 50:13–14) e aore râ no te faatere i te mau ohipa o te basileia (PH&PF 46:2).13
Aita to te Varua e mono au.14
Ite
E tamata tamau te ti‘a faatere maitai ia ite noa oia i te mau parau haamaramarama. E taata oia te ohipa ia au i te parau tumu eiaha râ i te apî e vai ra. E tamata oia i te haapii mai roto mai i te mau ohipa atoa ua ite te taata, e faito atu ai i ni‘a i te mau parau tumu o te paari hanahana tei heheuhia mai.15
Te hoê rave‘a maitai roa a‘e na te feia faatere no te maramarama i te mau parau tumu tano, o te imiraa ïa i te ite papû e te maramaramaraa no ni‘a i te mau papa‘iraa mo‘a e te buka arata‘i tano. Te rahiraa o te mau ohipa e tupu nei, ua tupu a‘ena paha na mua a‘e, peneiaʻe paha e rave rahi roa taime, e ua oti a‘ena paha te mau ture e te faatereraa i te faaotihia no te pahono i te fifi. E no reira, e mana‘o paari te hi‘oraa e te haamâtauraa i te mau arata‘iraa e te mau ture a te Ekalesia tei papa‘i-a‘ena-hia ia hiti noa mai te mau uiraa.16
Te aʻohia nei te feia faatere ia tuatapapa i te mau haapiiraa tumu o te Ekalesia, ia nehenehe ta ratou ia faa‘ite tano i ta tatou mau haapiiraa tumu ia vetahi ê. Ma te faa‘ohipa i te faahitiraa parau a te aposetolo Paulo, te tia‘i nei matou ia riro outou ei « rave ohipa aita e haamaraa » (2 Timoteo 2:15).17
Haavare ore
E titau te ti‘a faatere maitai i te haavare ore. E horo‘a atoa oia i to’na haavare ore. E turu oia i te feia ta’na i horo‘a i te ohipa. E tano te haavare ore no te mau ohipa hau atu â i te piiraa e te hopoi‘a. E mea haavare ore te hoê taata ia tae ana‘e mai te arueraa i te feia e apiti nei ia’na i roto i te taviniraa. E haapeuraa na’na ta ratou mau manuïaraa. Eita oia e patoʻi haere noa i te parau, e paraparau maoti oia na mua i te taata na’na teie faaotiraa. Eita oia e faahaamâ i te hoê apiti ohipa i mua i te tahi atu taata. E mea parau afaro oia e te matara te mana‘o.18
Hoêraa
Te vai ra te hoê « tahoêraa i titauhia e te ture o te basileia tiretiera ; E e ore roa e ti‘a ia faati‘ahia mai Ziona maori râ no te ture o te basileia tiretiera ». (PH&PF 105:4–5). I roto i te mau parau tumu e te huru tei titauhia, te vai nei te tahoêraa i te feruriraa e te aau. « Te parau atu nei au ia outou, ia tahoê ; e mai te mea aita outou e riro ei hoê ra e ere hoʻi outou no’u nei (PH&PF 38:27; Ioane 17:20–23) Aita e vahi ê atu i reira teie titauraa i te mea faufaa tumu roa a‘e maori râ, i rotopu i te taata Ta’na i pii ia peresideni i roto i To’na basileia.19
« E mea faufaa te here i te taata i roto i te faatereraa aravihi ».
Te here e te faa‘iteraa i te ti‘aturiraa
E mea faufaa te here i te taata i roto i te faatereraa aravihi. Te here ra anei outou i te feia ta outou e ohipa ra i piha‘i iho ? Ua taa anei ia outou te faufaa o te mau varua, e mea rahi i te mata o te Atua (hi‘o PH&PF 18:10) ? E faaroo anei to outou i roto i te feia apî ? Te faahanahana ra anei outou i ta ratou mau peu maitai, ma te arue ia ratou i ta ratou mau manuïaraa ? E aore râ, e mea huru faahapa anei outou ia ratou i ta ratou mau hapehape ?20
E i te tahi taime atoa, te mea fifi atu â i te faahaparaa, o te vai-mu-raa o to tatou feia faatere no ni‘a i te ohipa tei faauehia ia tatou ia rave. Te tahi rii noa parau e aore râ te tahi rii nota, ma te aau tae e te parau taa ê, e riro te reira ei faaitoitoraa rahi.21
Ua ite matou e… e mea hoona a‘e no te hoê ti‘a faatere te taime hoê e hoê e te tahi melo, i te taime te tuuhia nei i roto i te mau apooraa e te mau hopoi‘a faatereraa. Ua riro te paraparauraa i te taata, hoê e hoê, i te taviri no te faafariuraa i te melo paruparu.22
Hau atu râ, i roto i te Ekalesia, e mea hoona a‘e te hoê aniraa i te hoê faaheporaa—maitai atoa a‘e te mana‘o i te aau. E haamana‘o ia parau atu no te aha. A hiʻopoʻa no te ite e, eaha te huru te ohipa i te tereraa. Faa‘ite i to outou mauruuru ia haapa‘o maitai anaʻe te taata i te mau arata‘iraa. E faa‘ite atu i to outou tiʻaturiraa, ma te haavare ore. Ia patore ana‘e te tahi ohipa, e mea maitai ia hi‘o i muri no te ite mai i te mea i moʻe—e eiaha e taiâ ia parau atu e, ua hape ihoa. E haamana‘o e, to tatou mau taata, na ratou iho e haere mai e na ratou iho e hinaaro. E ua here atoa ratou i te Fatu e i Ta’na ohipa. A here ia ratou. A au ia ratou. Mai te mea e tae mai te hinaaro ia faahapa i te hoê hoa ohipa, eiaha. E tamata na i te tahi opuaraa apî ma te tahi rima faaitoito i ni‘a i te tapono. E aau maitai to te mau tamarii e rave rahi a to tatou Metua na te ao atoa nei. Ua here Oia ia ratou. E mea ti‘a atoa ia tatou ia na reira.23
Aita te taata e au ia faahepohia ana‘e ratou no te rave i te hoê ohipa, noa’tu e, no to ratou maitai. E pahono râ te taata i te faatereraa aravihi.24
3
E faa‘ohipa te feia faatere paari i te tonoraa taata.
Te hi‘oraa o te Faaora i roto i te tonoraa taata.
Ua haamauhia te niu o teie nei ao na roto i te haamanaraa o tei tonohia. E rave rahi taime to Iesu faahaamanaʻoraa i te taata e, Ta’na misioni i ni‘a i te fenua nei, e mea na roto ïa i te haamanaraa o tei tonohia. Te Faaho‘i-faahou-raa mai o Ta’na Ekalesia, ua haamata mau ïa na roto i te haamanaraa o tei tonohia.
I to’na paraparauraa i te mau ati Iuda i roto i te sunago, ua parau Iesu ia ratou e, ua tonohia mai Oia e To’na Metua : « I pou mai nei hoʻi au mai te raʻi mai e haapa‘o i to tei tono mai ia’u nei hinaaro, eiaha to’u iho hinaaro » (Ioane 6:38).25
Te horo‘a nei Iesu ia tatou i te hi‘oraa hope no te faatereraa maitai na roto i te tonoraa tiʻa … E rave rahi o Ta’na mau misionare tonohia tei ratere ma te farii moni ore e te pute ore. Ua mamae rahi te taata no to ratou pororaa i Ta’na mau arata‘iraa. Ua pohe te tahi pae i te pohe riʻariʻa mau i roto i Ta’na ohipa. Ua haere noa râ ta’na mau pĭpĭ tonohia i roto i teie nei ao, mai te liona ra i te mata’u ore ia au i Ta’na tonoraa. Ua faaoti ratou i te mau mea aita â ratou i moemoea a‘enei. Aore ti‘a faatere tei faaitoito i te taata e te vahine mai Ta’na i rave.26
Te patu nei te Ekalesia a Iesu Mesia i te feia faatere na roto i te faaôraa mai i te taata tei tonohia na roto i te haamanaraa. I to [Iesu] parahiraa i ni‘a i te fenua nei, ua pii oia e ahuru ma piti aposetolo no te tauturu ia’na i roto i te faatereraa i te Ekalesia. Ua pii atoa Oia i te hitu ahuru. Ua opere Oia i te ohipa i te tahi atu taata. Mai te huru ra e, eiaha te feia mata‘ita‘i i roto i ta’na ekalesia. E tiʻa i te mau taata atoa ia faaôhia mai no te tauturu i te paturaa i te basileia. E a patu noa ai ratou i te basileia, ua patu atoa ïa ratou ia ratou iho.
E fâ na Iesu te faateiteiraa i te taata hoê…
E fâ na Iesu te faariroraa i te taata atoa ei arii, te paturaa ia’na no te faatereraa mure ore. I tera ra pô rahi no te tamaaraa hopea, ua parau Oia i na tino ahuru ma hoê… « Amene, amene, e parau atu vau ia outou, O te faaroo mai ia’u ra e rave atoa oia i teie nei mau ohipa ta’u e rave nei, e e rahi atu â ta’na e rave i teie, no te mea te haere nei au i ta’u Metua ra ». (Ioane 14:12). Na roto i te ohipa tonoraa, ua hinaaro Iesu ia faateitei i te taata, eiaha râ ia faaore. E na roto i te Ekalesia taatoa, i teie nei, te tupu nei te mau tane e te mau vahine i te rahi na roto i te mau ti‘araa tei tonohia ratou ia amo.27
I te roaraa o Ta’na taviniraa tahuti, ua horo‘a Iesu Mesia i na aposetolo hoê ahuru ma piti Na’na i te haamanaraa.
Tono i roto i ta tatou mau faanahoraa
Te faatereraa maitai, te auraa ra, e tonoraa haamana ïa. Te tonoraa ia outou no te tahi tuhaa ohipa, e tauturu te reira ia outou e i ta outou faanahoraa. Te hoê faatereraa manuïa, o te aravihi ïa no te faananearaa ia outou iho na roto i te tahi atu mau taata.28
E titau te tonoraa paari i te faaineineraa na roto i te pure, mai te reira atoa no te hoê haapiiraa e te hoê pororaa manuïa maitai. Te haapapû nei te Fatu i te reira na roto i teie mau parau : « E e horo‘ahia’tu te Varua ia outou na roto i te pure faaroo ; e mai te mea e ore roa outou e farii i te Varua ra e ore hoʻi outou e haapii atu » (PH&PF 42:14). E e parau tatou e, e ore hoʻi outou e tono ma te ore e farii i te Varua.29
Eita te hoê taata faatere paari i roto i te Ekalesia, i teie mahana, e tamata i te rave i te ohipa o’na ana‘e, e mai te huru atura ïa aita e taata ê atu e ti‘a ia rave i te ohipa. E ia tono atu oia i te hoê taata, e riro oia i te faatae i te tahi mana‘o taiâ ore i te taata ta’na i tono atu, e tei muri oia ia’na no te turu atu.30
Ia oti te hopoi‘a i te horo‘ahia, eita te ti‘a faatere e haamoʻe i teie taata ta’na i faaue e na reira atoa ta’na faaueraa ohipa. E pee maite oia i teie ohipa, eiaha râ no te « hi‘opo‘a huʻahuʻa’tu ». E horo‘a oia i te tahi haamauruururaa taa ê mai te mea ua ti‘a te reira. E horo‘a oia i te tahi faaitoitoraa e te tauturu mai te mea e titauhia. Ia mana‘o oia e, aita te ohipa e ravehia ra e titauhia te tahi tauiraa, e ohipa oia ma te itoito e te aueue ore, e ma te marû atoa râ. Ia oti te hoê ti‘araa i te rave-hope-hia, e faa‘ite oia i to’na faahiahia e to’na mauruuru.31
Aore roa e ti‘a faatere paari e ti‘aturi e, mai roto ana‘e ia’na te mau mana‘o maitai atoa. E ani oia i te mau mana‘o tauturu no roto mai ia ratou ta’na e faatere nei. E vaiiho oia ia ratou ia manaʻo e, e mea faufaa ratou i roto i te faaotiraa. E vaiiho Oia ia ratou ia ite e, te rave ra ratou i ta ratou mau faaotiraa, eiaha ta’na noa.32
4
E mau mauihaa te feia faatere o te Ekalesia i roto i te rima o te Atua, e e ti‘a ia ratou ia imi i te Varua i roto i te arata‘iraa e te paturaa i te tahi atu mau taata.
I roto i te Ekalesia i teie anotau, te faito ta te hoê ti‘a faatere e noaa mai, tei te huru ïa te mea ta’na e tia‘i mau nei. Titauhia ia feruri rahi oia. E mea ti‘a ia’na ia haapapû i te mau taata ta’na e horo‘a nei i te faaueraa ohipa e, i roto i te taviniraa i te Fatu e mana rahi atu â to ratou i te tahi atu huru hopoi‘a mâtauhia. Aita e manuïa-ore-raa i roto i te ohipa a te Fatu ia rave ana‘e [tatou] i te maitai roa a‘e e noaa ia [tatou]. E mauihaa noa tatou ; na te Fatu teie ohipa. Na’na teie Ekalesia, Na’na teie faanahoraa evanelia. Na’na teie mau tamarii ta tatou e ohipa nei i piha‘i iho. Eita Oia e vaiiho ia tatou ia manuïa ore, mai te mea e rave tatou i ta tatou tuhaa. E faaaravihi atu â Oia ia tatou i roto i to tatou iho mau tareni e to tatou mau aravihi. Papû ia’u te reira.33
E haamana‘o tatou e… te Ekalesia… e ere te ohipa na te ao. Te manuïaraa o te reira, e faitohia i ni‘a i te mau varua tei faaorahia, eiaha râ te apî e te pau. E mea titau ihoa ïa, ia aravihi tatou e ia faahotu, tera râ, titau-atoa-hia ia tutonu noa tatou i ni‘a i te mau opuaraa mure ore. E haapa‘o maitai eiaha ia faahepo i te mau rave‘a e te mau faahitiraa parau o te ao i ni‘a i te mau toro‘a ohipa mo‘a a te autahu‘araa. A haamana‘o e, te mau rave‘a haamatara fifi tei feruri-maite-hia, noa’tu to te reira tauturu rahi, eita e ravaʻi te reira ana‘e iho i roto i te ohipa o te basileia. Te ohipa a te Atua, e mea ti‘a roa ia ravehia na roto i te faaroo, te pure e te Varua, « e mai te mea i te tahi rave‘a ê atu ra e ere ïa i ta te Atua » (PH&PF 50:18).34
Te fâ rahi a te Ekalesia, o te paturaa ïa i te mau tane e te mau vahine o te riro atu mai te Atua i roto i to ratou huru e to ratou hiro‘a e ta ratou mau fâ.35
Te mau mana‘o tauturu no te tuatapaparaa e te haapiiraa
Uiraa
-
Ua haapii te peresideni Benson e, e ti‘a i te feia faatere ia faa‘ite i te hi‘oraa parau-ti‘a (a hi‘o i te tuhaa 1). No te aha te hiʻoraa i riro ai ei faaûruraa puai roa ? Nahea te mau hi‘oraa parau-ti‘a o te feia faatere i te faaûru ia outou ?
-
A tuatapapa i te huru o te feia faatere maitai tei vauvauhia i roto i te tuhaa 2. I to outou manaʻo, no te aha e mea « pahono te taata i [teie huru] faatereraa » ? A feruri i te mau mea ta outou e nehenehe e rave no te faatupu i teie huru o te feia faatere.
-
Ua haapii te peresideni Benson e, e ti‘a i te feia faatere o te Ekalesia ia pee i te hi‘oraa o te Faaora ei taata tono taata (a hi‘o i te tuhaa 3). Nahea te tonoraa i te taata no te hoê ohipa e tauturu ai i te patu i te basileia o te Atua ? Eaha te mau mea ta outou i apî no roto mai i te mau hopoi‘a tei faauehia ia outou ia rave ?
-
Eaha te tauiraa e tupu i ni‘a i ta tatou taviniraa i roto i te Ekalesia, mai te peu e haamana‘o tatou e, « na te Fatu teie ohipa » e « Na’na teie mau tamarii ta tatou e ohipa nei i piha‘i iho » ? (A hi‘o i te tuhaa 4). Eaha ta outou i ite a ohipa ai outou ei mauihaa i roto i te rima o te Fatu no te tautururaa i te tahi atu mau taata ?
Te mau papa‘iraa mo‘a
Exodo 18:13–26; Mataio 5:13–16; Luka 22:31–32; Alama 17:1–11; PH&PF 38:23–27
Tauturu haapiiraa
« E putapû te mau taata ia haafaahiahiahia ta ratou mau horo‘araa. E nehenehe outou e horo‘a i te mau haamauruururaa taa ê i te mau pahonoraa a te taata tata‘itahi, e, mai te mea e nehenehe, a horo‘a i te mau hi‘oraa ei tuhaa no te mau aparauraa o te piha haapiiraa. » (Te Haapiiraa, Aita e Piiraa Teitei A‘e, 36).