I Am the Light of the World [’O vau te māramarama o te ao nei], nā James Fullmer

23–29 nō Tetepa : « ’A ti’a mai i ni’a, ’e ’a haere mai iā’u nei »

3 Nephi 8–11

« Inaha, ’o vau nei ’o Iesu Mesia, ’o tā te mau peropheta i fa’a’ite mai e tae mai i te ao nei » (3 Nephi 11:10). Nā roto i teie mau parau, tē fa’a’ite nei te Fa’aora tei ti’afa’ahou iāna iho, ma te fa’atupu i te mau parau tohu tahito ra e 600 matahiti te maoro, i roto i te Buka a Moromona. ’Ua pāpa’i Elder Jeffrey R. Holland : « Terā fāra’a ’e terā fa’a’itera’a, ’o te taime tumu ïa, te taime rahi hope, i roto i te ’ā’amu tā’āto’a o te Buka a Moromona. ’O te fa’a’itera’a ’e te fa’auera’a mana i ha’amāramarama ’e i fa’auru i te mau peropheta ’āti Nephi ato’a […] ’Ua paraparau pā’āto’a rātou nō ni’a iāna, ’ua hīmene nō ni’a iāna, ’ua moemoeā nō ni’a iāna ’e ’ua pure ’ia fā mai ’oia—i teienei rā tei reira mau ’oia. Te mahana rahi roa ’ino ! ’Ua tae mai te Atua e taui i te mau pō pōiri ato’a ’ei po’ipo’i māramarama » (Christ and the New Covenant [1997], 250–51).

Hi’o ato’a « Jesus Christ Appears in the Ancient Americas [’Ua fā mai Iesu Mesia i te fenua Amerika Tahito] » (video), Vaira’a buka ’evanelia.

Jesus Christ Appears in the Ancient Americas | 3 Nephi 8–11

Ominous destruction comes upon the people of Ancient America. Hope returns as survivors gather and witness the Resurrected Christ descend from Heaven.

Mana’o nō te ’apo i te ha’api’ira’a i te ’utuāfare ’e i te fare purera’a

3 Nephi 8–11

’O Iesu Mesia te māramarama o te ao nei.

’Ua ’ite paha ’oe ē, ’ua parau ’e ’ua parau-fa’ahou-hia te mau tumu parau e au i te pōiri ’e te māramarama i roto i te 3 Nephi 8–11. E aha tā ’oe i ha’api’i mai i roto i teie mau pene nō ni’a i te pōiri pae vārua ’e te māramarama pae vārua ? (hi’o, ’ei hi’ora’a, 3 Nephi 8:19–23 ; 9:18 ; 10:9–13). E aha tē hōpoi nei i te pōiri i roto i tō ’oe orara’a ? E aha tē hōpoi nei i te māramarama ? I tō ’oe mana’o, nō te aha te Fa’aora i mā’iti ai e fa’a’ite iāna iho ’ei « māramarama ’e te ora o te ao nei » ? (3 Nephi 9:18 ; 11:11).

Te mau ’ohipa i tupu i roto i te 3 Nephi 11:1–17 tei roto ïa i te mau ’ohipa mo’a roa a’e o te Buka a Moromona. ’A tai’o marū noa i te reira, ’e ’a feruri māite. Teie te tahi mau uira’a nō te tauturu ia ’oe. E nehenehe e pāpa’i i te mau mana’o e tae mai ia ’oe.

• E aha ra tō’u mana’o ’āhiri ē, tei rotopū vau i teie mau ta’ata ?

• E aha tā’u e fa’ahiahia nei nō ni’a i te Fa’aora i roto i teie mau pene ?

• Nāhea vau i te ’ite ē, ’o Iesu Mesia tō’u Fa’aora ?

• E mea nāhea ’oia i te rirora’a ’ei māramarama i roto i tō’u orara’a ?

Hi’o ato’a Sharon Eubank, « Te Mesia : Te māramarama e ’ana’ana i roto i te pōiri », Liahona, Mē 2019, 73–76.

Pāpa’i i te mau mana’o e tae mai. ’Ia pāpa’i ana’e ’oe i te mau mana’o pae vārua e tae mai, e rahi atu ā tō ’oe pāpūra’a nō te fāri’i rahi atu ā.

3 Nephi 9–10

E hina’aro rahi tō Iesu Mesia ’ia fa’a’ore i te hapa.

’Ua fa’a’ite ’o Elder Neil L. Andersen, « Tē fa’a’ite pāpū nei au ē e nehenehe ’e e hina’aro rahi mau tō te Fa’aora i te fa’a’ore i tā tātou mau hara » (« ’A tātarahapa… ’ia fa’aora vau ia ’outou », Liahona, Novema 2009, 40). ’A mā’imi i roto i te 3 Nephi 9–10 i te mau fa’a’itera’a nō te hina’aro o te Mesia ’ia fa’a’ore i te hara. E aha tā ’oe e ’ite ra i roto i te 3 Nephi 9:13–22 ; 10:1–6 ’o tē tauturu nei ia ’oe ’ia putapū i tōna here ’e tōna aroha ? E aha te mau taime ’ua ’ite ’oe iāna i te « ha’aputuputura’a » ’e i te « fa’a’amura’a » ia ’oe ? (hi’o 3 Nephi 10:4).

3 Nephi 9:19–22

Tē tītau nei te Fatu i « te ’ā’au ’oto ’e te vārua tātarahapa ra. »

Hou te taera’a mai o te Fa’aora, ’ua riro te mau tusia ’ānimara ’ei tāpa’o nō te tusia a Iesu Mesia (hi’o Mose 5:5–8). E aha te fa’auera’a ’āpī tā te Fa’aora i hōro’a i roto i te 3 Nephi 9:20–22 ? Tē nāhea ra te reira i te fa’atoro ia tātou i ni’a iāna ’e i ni’a i tāna tusia ?

E aha te aura’a ’ia pūpū atu i te hō’ē tusia nō te ’ā’au ’oto ’e te vārua tātarahapa ? I tō ’oe mana’o, nō te aha te Fa’aora i hina’aro ai i teie tusia mai roto mai ia ’oe ?

3 Nephi 11:1–8

E ti’a iā’u ’ia ha’api’i ’ia fa’aro’o ’e ’ia māramarama i te reo o te Atua.

Nāhea ’oe i te ’ite ē tē parauparau ra te Atua ia ’oe ? Pēnei a’e e nehenehe te ’ohipa i tupu nō te mau ta’ata i roto i te 3 Nephi 11:1–8 e tauturu ia ’oe ’ia māramarama i te tahi mau parau tumu nō te fa’aro’ora’a ’e te māramaramara’a i te reo o te Atua. E nehenehe ’oe e tāpa’o i te huru o te reo o te Atua tā te ta’ata i fa’aro’o ’e te mea tā rātou i rave nō te māramarama atu ā i te reira.

E mea maita’i ato’a paha ’ia hi’o haere i te tahi atu mau pāpa’ira’a mo’a e fa’ata’a ra mai te aha te reo o te Atua ’aore rā te fa’aurura’a a tōna Vārua. Teie te tahi mau hi’ora’a. Pēnei a’e, i muri a’e i te tai’ora’a i te reira, e nehenehe ’oe e pāpa’i i te tahi mau arata’ira’a nō te ’itera’a e aha te heheura’a : 1 Te mau Ari’i 19:11–12 ; Galatia 5:22–23 ; Alama 32:27–28, 35 ; Helamana 10:2–4 ; Etera 4:11–12 ; Te Ha’api’ira’a Tumu ’e te mau Fafaura’a 9:7–9 ; 11:11–14.

E fāna’o ato’a ’oe i te fa’aro’ora’a i te mau peropheta, te mau ’āpōsetolo, ’e te tahi atu feiā fa’atere o te ’Ēkālesia nō teie tau, rātou tei fāri’i i te fa’aro’ora’a ’e te pe’era’a i te reo o te Atua. E rave rahi o rātou e fa’a’ite nei i te mea tā rātou i ’ite, i roto i te ha’aputura’a video « Fa’aro’o iāna ! » i roto i te Vaira’a buka ’evanelia. E nehenehe e māta’ita’i i te hō’ē ’aore rā hau atu.

Nāhea ’oe i te fa’a’ohipa i te mea tā ’oe i ha’api’i mai, nō te fa’aro’o ’e nō te ite māramarama atu ā i te reo o te Atua ?

Hi’o ato’a Russell M. Nelson, « Fa’aro’o iāna », Liahona, Mē 2020, 88–92.

One by One [Ta’ihō’ē], nā Walter Rane

3 Nephi 11:8–17

Tē tītau manihini nei Iesu Mesia iā’u ’ia roa’a tō’u iho ’itera’a pāpū nōna.

Fātata e 2 500 ta’ata tei putuputu i te hiero nō Bounetifula i te fāra’a mai Iesu Mesia (hi’o 3 Nephi 17:25). Noa atu ā tō rātou nūmera rahi, ’ua tītau manihini te Fa’aora ia rātou tāta’itahi ’ia haere « ta’ihō’ē » mai e fāfā i te mau puta i tōna nā rima ’e i tōna nā ’āvae (3 Nephi 11:14–15). ’A tai’o ai ’oe, ’a feruri e aha ra te huru ’āhiri ē tei reira ’oe. E aha tā te Fa’aora e rave nei nō te tītau manihini ia ’oe ’ia « ti’a mai i ni’a, ’e ’a haere mai » iāna ra ? (3 Nephi 11:14).

Nō te tahi atu ā mana’o, ’a hi’o i te mau ve’a Liahona ’e Nō te pūai o te feiā ’āpī nō teie ’āva’e.

Mana’o nō te ha’api’i i te tamari’i

Nō te mea teie sābati ’o te pae ïa o te sābati o te āva’e, tē fa’aitoitohia nei te mau ’orometua ha’api’i o te Paraimere ’ia fa’a’ohipa i te ’ohipara’a ha’api’ipi’ira’a i roto te « Parau hi’u B : Fa’aineinera’a i te mau tamari’i nō te hō’ē orara’a tā’āto’a i ni’a i te ’ē’a nō te fafaura’a a te Atua ».

3 Nephi 8–9

Tei roto ana’e au i te pōiri, e nehenehe Iesu Mesia e riro ’ei māramarama nō’u.

• Nō te tauturu i tā ’oe mau tamari’i ’ia māramarama i te mau ’ohipa e fa’ahitihia i roto i te 3 Nephi 8–9, e nehenehe ’oe e fa’ati’a fa’ahou ā, ’aore rā e fa’aro’o i te tahi tuha’a nō te mau haruharura’a o teie mau pene i roto i te hō’ē piha pōiri. E ’āparau e aha te huru te fa’aea-noa-ra’a i roto i te pōiri e toru mahana. I muri mai e nehenehe ’outou e paraparau nō te aha ’o Iesu Mesia i pi’i ai iāna iho ’ei Māramarama o te ao nei (hi’o 3 Nephi 9:18). E aha tā Iesu i ani i te mau ta’ata, ’e ia tātou, ’ia rave, ’ia ti’a iāna ’ia riro ’ei māramarama nō tātou ? (hi’o 3 Nephi 9:20–22).

3 Nephi 10:4–6

Tē pāruru nei Iesu i tōna mau ta’ata mai te hō’ē moa ufa e pāruru i tāna mau fanau’a.

• E ti’a i te hōho’a nō te moa ufa e ha’aputuputu nei i tāna mau fanau’a ’ia riro ’ei rāve’a ha’api’ira’a pūai nō te tauturu i te mau tamari’i ’ia māramarama i te huru o te Fa’aora ’e tāna misiōni. E nehenehe ’outou e tai’o i te 3 Nephi 10:4–6 ’a hi’o ai te ’utuāfare i te hōho’a nō te hō’ē moa ufa ’e tāna mau fanau’a. Nō te aha te moa e ha’aputuputu ai i tāna mau fanau’a ? Nō te aha te Fa’aora e hina’aro ai e ha’aputuputu ia tātou i pīha’i iho iāna ? Nāhea tātou i te haere mai iāna ra nō te ’ite mai i te pārurura’a ?

3 Nephi 11:1–15

Tē ani nei Iesu Mesia iā’u ’ia haere iāna ra.

• Nāhea ’oe i te tauturu i tā ’oe mau tamari’i ’ia putapū i te Vārua ’a tai’o ’āmui ai ’outou i te 3 Nephi 11:1–15 ? Pēnei a’e e nehenehe ’oe e ani ia rātou ’ia parau mai, ’ia ’ite-ana’e-hia ia rātou te hō’ē mea i roto i teie mau ’īrava ’o tē ha’aputapū ia rātou i te here o te Atua. E nehenehe e nā reira ato’a nō te mau hōho’a i roto i teie arata’i ha’api’ira’a ’aore rā, te video « Jesus Christ Appears at the Temple [Tē fā ra Iesu Mesia i te hiero] » (Vaira’a buka ’evanelia). ’A parau i tā ’oe mau tamari’i e aha tō ’oe mana’o i te tai’ora’a ’e i te ferurira’a i teie mau ’ohipa i tupu. ’A vaiiho ato’a ia rātou ’ia fa’a’ite mai i tō rātou mau mana’o.

  Jesus Christ Appears at the Temple | 3 Nephi 11:1–17

  The people of Ancient America come to Bountiful and gather. They hear the voice of God the Father introduce His Son. They witness Jesus descending from heaven and testify He is the Savior of the world.

3 Nephi 11:1–8

Tē paraparau mai nei te Atua iā’u ma te reo marū ’e te ha’iha’i.

• Pēnei a’e e nehenehe e tai’o vetahi o teie mau ’īrava nā roto i te hō’ē reo marū ’e te « iti ha’iha’i » (3 Nephi 11:3). ’Aore rā e nehenehe e ha’uti marū i te hō’ē haruharura’a o te hīmene « Il envoya son Fils aimé » (Chants pour les enfants, 20–21), ’ia fifi i te fa’aro’o atu. E aha tei tītauhia i te ta’ata ’ia rave nō te māramarama i te reo nō te ra’i mai ? (hi’o i te mau ’īrava 5–7). E aha tā tātou e ’apo nei mai roto mai i te mau ’ohipa i tupu nō rātou ?

3 Nephi 11:21–26

Tē hina’aro nei Iesu Mesia ’ia bāpetizohia vau.

• ’A tai’o ai ’oe i te 3 Nephi 11:21–26, ’a ani i tā ’oe mau tamari’i ’ia ti’a i ni’a i te mau taime ato’a e fa’aro’o rātou i te ta’o ra bāpetizo. E aha tā Iesu i ha’api’i i te ta’ata nō ni’a i te bāpetizora’a ? Mai te mea ē, ’ua ’ite a’ena tā ’oe mau tamari’i i te hō’ē bāpetizora’a, ’a ani ia rātou ’ia fa’ata’a mai i te mea tā rātou i ’ite. Nō te aha Iesu e hina’aro ai ’ia bāpetizohia tātou ?

Nō te tahi atu ā mana’o, ’a hi’o i te ve’a Hoa nō teie ’āva’e.

One Shepherd [Hō’ē tīa’i māmoe], nā Howard Lyon.