“ວັນທີ 16–22 ເດືອນກັນຍາ: ‘ຈົ່ງເງີຍໜ້າ ແລະ ເບີກບານເຖີດ.’ 3 ນີໄຟ 1–7,” ຈົ່ງຕາມເຮົາມາ—ສຳລັບບ້ານ ແລະ ໂບດ: ພຣະຄຳພີມໍມອນ 2024 (2023)
“ວັນທີ 16–22 ເດືອນກັນຍາ. 3 ນີໄຟ 1–7,” ຈົ່ງຕາມເຮົາມາ—ສຳລັບບ້ານ ແລະ ໂບດ: 2024 (2023)
One Day, One Night, and One Day [ມື້ໜຶ່ງ, ຄືນໜຶ່ງ, ແລະ ອີກມື້ໜຶ່ງ], ໂດຍ ໂຮເຮ ໂກໂກ
ວັນທີ 16–22 ເດືອນກັນຍາ: “ຈົ່ງເງີຍໜ້າ ແລະ ເບີກບານເຖີດ”
3 ນີໄຟ 1–7
ໃນບາງວິທີ, ມັນເປັນເວລາທີ່ໜ້າຕື່ນເຕັ້ນ ທີ່ໄດ້ເປັນຜູ້ເຊື່ອໃນພຣະເຢຊູຄຣິດ. ການທຳນາຍໄດ້ເກີດເປັນຈິງ—ເຄື່ອງໝາຍ ແລະ ສິ່ງມະຫັດສະຈັນທີ່ຍິ່ງໃຫຍ່ໃນບັນດາຜູ້ຄົນ ໄດ້ເປັນສິ່ງຊີ້ບອກວ່າ ບໍ່ດົນພຣະຜູ້ຊ່ວຍໃຫ້ລອດຈະມາກຳເນີດ. ກົງກັນຂ້າມ, ມັນກໍເປັນເວລາທີ່ກັງວົນໃຈສຳລັບຜູ້ທີ່ເຊື່ອ ເພາະ, ເຖິງແມ່ນສິ່ງມະຫັດສະຈັນທັງໝົດນັ້ນ, ຜູ້ທີ່ບໍ່ເຊື່ອກໍຍັງໝັ້ນໃຈວ່າ “ເວລາໄດ້ຜ່ານພົ້ນໄປແລ້ວ” ສຳລັບພຣະຜູ້ຊ່ວຍໃຫ້ລອດທີ່ຈະມາກຳເນີດ (3 ນີໄຟ 1:5). ຜູ້ຄົນເຫລົ່ານີ້ໄດ້ກໍ່ໃຫ້ເກີດມີການ “ຮ້ອງປ່າວໄປຕະຫລອດທົ່ວແຜ່ນດິນ” (3 ນີໄຟ 1:7) ແລະ ກໍຍັງໄດ້ຕັ້ງວັນທີ່ຈະຂ້າຜູ້ທີ່ເຊື່ອທັງໝົດ ຖ້າຫາກເຄື່ອງໝາຍທີ່ໄດ້ທຳນາຍໄວ້ໂດຍຊາມູເອນຄົນເລມັນ—ຄືນທີ່ບໍ່ມີຄວາມມືດ—ບໍ່ປະກົດຂຶ້ນ.
ໃນສະຖານະການທີ່ຍາກລຳບາກເຫລົ່ານີ້, ສາດສະດານີໄຟໄດ້ “ຮ້ອງທູນຕໍ່ພຣະເຈົ້າຂອງເພິ່ນຢ່າງສຸດກຳລັງເພື່ອຜູ້ຄົນຂອງເພິ່ນ” (3 ນີໄຟ 1:11). ຄຳຕອບຂອງພຣະຜູ້ເປັນເຈົ້າໃຫ້ການດົນໃຈຕໍ່ທຸກຄົນທີ່ປະເຊີນກັບການຂົ່ມເຫັງ ຫລື ຄວາມສົງໄສ ແລະ ຕ້ອງການທີ່ຈະຮູ້ຈັກວ່າ ແສງສະຫວ່າງຈະເອົາຊະນະຄວາມມືດຫລືບໍ່: “ຈົ່ງເງີຍໜ້າ ແລະ ເບີກບານເຖີດ; … ເຮົາຈະເຮັດໃຫ້ທຸກສິ່ງຢ່າງຊຶ່ງເຮົາໄດ້ເວົ້າໄວ້ໂດຍປາກຂອງສາດສະດາຜູ້ບໍລິສຸດຂອງເຮົາສຳເລັດ” (3 ນີໄຟ 1:13).
ແນວຄິດສຳລັບການຮຽນຮູ້ຢູ່ທີ່ບ້ານ ແລະ ຢູ່ທີ່ໂບດ
ການປ່ຽນໃຈເຫລື້ອມໃສຕໍ່ພຣະກິດຕິຄຸນຂອງພຣະເຢຊູຄຣິດນັ້ນ ຮຽກຮ້ອງໃຫ້ມີຄວາມອົດທົນ ແລະ ຄວາມພະຍາຍາມ.
3 ນີໄຟ 1–7 ບັນຍາຍຜູ້ຄົນທີ່ປ່ຽນໃຈເຫລື້ອມໃສຕໍ່ພຣະຜູ້ເປັນເຈົ້າ ແລະ ຄົນອື່ນທີ່ບໍ່ໄດ້ປ່ຽນໃຈເຫລື້ອມໃສ. ແມ່ນຫຍັງຄືຄວາມແຕກຕ່າງລະຫວ່າງກຸ່ມເຫລົ່ານີ້? ຕາຕະລາງທີ່ຄືກັນກັບດັ່ງຕໍ່ໄປນີ້ ອາດຊ່ວຍທ່ານໃຫ້ຈັດລະບຽບຄວາມຄິດຂອງທ່ານໄດ້:
|
ສິ່ງທີ່ເຮັດໃຫ້ການປ່ຽນໃຈເຫລື້ອມໃສອ່ອນແອລົງ |
ສິ່ງທີ່ເຮັດໃຫ້ການປ່ຽນໃຈເຫລື້ອມໃສເຂັ້ມແຂງຂຶ້ນ | |
|---|---|---|
|
ການບໍ່ເຊື່ອຖ້ອຍຄຳຂອງສາດສະດາ ແລະ ເຍາະເຍີ້ຍຄົນຊອບທຳ |
ການມີສັດທາໃນຖ້ອຍຄຳຂອງສາດສະດາ ແລະ ອະທິຖານຂໍຄວາມຊ່ວຍເຫລືອ | |
ຖາມຄຳຖາມສ່ວນຕົວຂະນະທີ່ທ່ານສຶກສາ. ຍົກຕົວຢ່າງ, ຂະນະທີ່ຕື່ມໃສ່ຕາຕະລາງນີ້, ທ່ານສາມາດຖາມຄຳຖາມເຊັ່ນ “ບົດຮຽນສຳລັບເຮົາໃນທີ່ນີ້ແມ່ນຫຍັງ?” ສິ່ງນີ້ຈະນຳການດົນໃຈມາຈາກພຣະວິນຍານບໍລິສຸດ.
ຍ້ອນພຣະເຢຊູຄຣິດ, ເຮົາຈຶ່ງສາມາດ “ເບີກບານ” ໄດ້.
ພຣະບິດາເທິງສະຫວັນຂອງທ່ານຮູ້ວ່າ ຊີວິດຂອງທ່ານຈະລວມທັງຊ່ວງເວລາທີ່ຍາກລຳບາກ, ແມ່ນແຕ່ເປັນຕາຢ້ານ. ແຕ່ພຣະອົງຍັງຢາກໃຫ້ທ່ານປະສົບກັບຄວາມຊື່ນຊົມນຳອີກ. ອ່ານ 3 ນີໄຟ 1:1–23 ເພື່ອຮຽນຮູ້ກ່ຽວກັບເຫດຜົນທີ່ຊາວນີໄຟທີ່ຊື່ສັດຕ້ອງຢ້ານ. ພຣະຜູ້ເປັນເຈົ້າໄດ້ໃຫ້ເຫດຜົນອັນໃດເພື່ອໃຫ້ພວກເຂົາ “ເບີກບານ”?
ພຣະຜູ້ເປັນເຈົ້າໄດ້ໃຊ້ວະລີທີ່ວ່າ “ເບີກບານ” ໃນຫລາຍໆໂອກາດ—ຍົກຕົວຢ່າງ, ໃນ ມັດທາຍ 14:24–27; ໂຢຮັນ 16:33; ຄຳສອນ ແລະ ພັນທະສັນຍາ 61:36; 78:17–19. ແມ່ນຫຍັງທີ່ປະທັບໃຈທ່ານກ່ຽວກັບຄຳເຊື້ອເຊີນເຫລົ່ານີ້? ທ່ານອາດອ່ານຂໍ້ທີ່ຢູ່ອ້ອມໆ ເພື່ອທີ່ຈະເຂົ້າໃຈສະພາບການ ຊຶ່ງພຣະຜູ້ຊ່ວຍໃຫ້ລອດໄດ້ກ່າວຖ້ອຍຄຳເຫລົ່ານີ້. ໃນແຕ່ລະກໍລະນີ, ພຣະອົງໄດ້ໃຫ້ເຫດຜົນອັນໃດ ເພື່ອຊ່ວຍໃຫ້ຜູ້ຄົນປະເຊີນໜ້າກັບຄວາມຢ້ານກົວຂອງພວກເຂົາ? ພຣະອົງໄດ້ກະທຳສິ່ງນີ້ເພື່ອທ່ານແນວໃດ?
ໃຫ້ພິຈາລະນາສຶກສາຄຳປາໄສຂອງ ປະທານຣະໂຊ ເອັມ ແນວສັນ “Joy and Spiritual Survival” (Liahona, Nov. 2016, 81–84). ປະທານແນວສັນສິດສອນທ່ານຫຍັງແດ່ກ່ຽວກັບການພົບຄວາມຊື່ນຊົມໃນທຸກໆສະຖານະການ? ໃຫ້ສັງເກດເບິ່ງວ່າ ປະທານແນວສັນໃຊ້ຄຳວ່າ ເຈາະຈົງ ຈັກເທື່ອ. ບາງເທື່ອທ່ານກໍສາມາດປຽບທຽບການໝຸນເລນກ້ອງຖ່າຍຮູບໃຫ້ແຈ້ງ ຫລື ເລນອື່ນໆ ກັບການສຸມໃຈໃສ່ພຣະເຢຊູຄຣິດ. ທ່ານຈະສຸມໃຈໃສ່ພຣະອົງໃຫ້ຫລາຍຂຶ້ນໄດ້ແນວໃດ?
ເບິ່ງ “ຄວາມທຸກໂສກ,” “ຄວາມຫວັງ,” “ສຸຂະພາບຈິດ,” ຫລື ຫົວຂໍ້ອື່ນໆໃນພາກ “Life Help” ຂອງ ຫ້ອງສະໝຸດພຣະກິດຕິຄຸນ ນຳອີກ.
ພຣະຜູ້ເປັນເຈົ້າຈະເຮັດໃຫ້ພຣະຄຳທັງໝົດຂອງພຣະອົງສຳເລັດໃນເວລາຂອງພຣະອົງ.
ອ່ານ 3 ນີໄຟ 1:4–7 ແລະ ຄິດກ່ຽວກັບສິ່ງທີ່ທ່ານອາດຮູ້ສຶກ ຖ້າທ່ານເປັນໜຶ່ງໃນຜູ້ທີ່ເຊື່ອ. ພວກເຂົາໄດ້ເຮັດສິ່ງໃດ ເພື່ອຮັກສາສັດທາຂອງພວກເຂົາໃຫ້ເຂັ້ມແຂງ? (ເບິ່ງ 3 ນີໄຟ 1:4–21 ແລະ 5:1–3). ຖ້ອຍຄຳຂອງຊາມູເອນໄດ້ສຳເລັດຢ່າງໃດ? (ເບິ່ງ 3 ນີໄຟ 1:19–21). ພຣະຜູ້ເປັນເຈົ້າໄດ້ເຮັດໃຫ້ພຣະຄຳຂອງພຣະອົງສຳເລັດໃນຊີວິດຂອງທ່ານແນວໃດ?
3 ນີໄຟ 1:4–15; 5:12–26; 6:10–15; 7:15–26
ເຮົາເປັນສານຸສິດຂອງພຣະເຢຊູຄຣິດ.
ມໍມອນໄດ້ປະກາດວ່າ, “ຈົ່ງເບິ່ງ, ຂ້າພະເຈົ້າເປັນສານຸສິດຂອງພຣະເຢຊູຄຣິດ” (3 ນີໄຟ 5:13). ວະລີນີ້ມີຄວາມໝາຍຕໍ່ທ່ານແນວໃດ? ໃຫ້ຄິດທີ່ຈະຄົ້ນຄວ້າ 3 ນີໄຟ 1:4–15; 5:12–26; 6:10–15; ແລະ 7:15–26, ເພື່ອຊອກຫາຄຸນສົມບັດ, ຄວາມເຊື່ອ, ແລະ ການກະທຳຂອງສານຸສິດຂອງພຣະຄຣິດ.
ເບິ່ງ “I’m Trying to Be like Jesus,” Children’s Songbook, 78 ນຳອີກ.
ເມື່ອເຮົາໃຊ້ສັດທາໃນພຣະເຢຊູຄຣິດ, ເຮົາກໍບໍ່ຈຳເປັນຕ້ອງຢ້ານ.
ປະສົບການຂອງຊາວນີໄຟກັບກຸ່ມໂຈນ ອາດມີບົດຮຽນທີ່ສາມາດຊ່ວຍທ່ານເລື່ອງຄວາມອັນຕະລາຍທາງວິນຍານທີ່ທ່ານປະເຊີນ. ໃຫ້ຊອກຫາບົດຮຽນເຫລົ່ານີ້ໃນ 3 ນີໄຟ 2:11–12 ແລະ 3:1–26. ຍົກຕົວຢ່າງ, ທ່ານສາມາດຄົ້ນຫາຄຳເວົ້າຂອງກິດດີອານໄຮໃນ 3 ນີໄຟ 3:2–10 ແລະ ປຽບທຽບມັນກັບວິທີທີ່ຊາຕານອາດພະຍາຍາມຫລອກລວງທ່ານ. ທ່ານຮຽນຮູ້ຫຍັງແດ່ຈາກຕົວຢ່າງຂອງເລໂຄນິອັດ?
ສຳລັບແນວຄິດເພີ່ມເຕີມ, ໃຫ້ເບິ່ງວາລະສານ Liahona ແລະ For the Strength of Youth ສະບັບຂອງເດືອນນີ້.
ແນວຄິດສຳລັບການສິດສອນເດັກນ້ອຍ
ມີດາວດວງໃໝ່ປະກົດຂຶ້ນໃນເວລາທີ່ພຣະເຢຊູຄຣິດກຳເນີດ.
-
ໜ້າກິດຈະກຳຂອງອາທິດນີ້ ສາມາດຊ່ວຍໃຫ້ລູກໆຂອງທ່ານຮຽນຮູ້ກ່ຽວກັບການອັດສະຈັນທີ່ຊາວນີໄຟໄດ້ເຫັນ ເມື່ອພຣະເຢຊູກຳເນີດ. ທ່ານຍັງສາມາດໃຊ້ “ບົດທີ 41: ເຄື່ອງໝາຍເຖິງການກຳເນີດຂອງພຣະຄຣິດ” (ເລື່ອງພຣະຄຳພີມໍມອນ, 114–16) ນຳອີກ ເພື່ອສິດສອນພວກເຂົາກ່ຽວກັບເລື່ອງນີ້—ຫລື ເພື່ອຊ່ວຍໃຫ້ພວກເຂົາເລົ່າໃຫ້ທ່ານຟັງ.
ຖ້ອຍຄຳຂອງສາດສະດານັ້ນ ສຳເລັດສະເໝີ.
-
ຂະນະທີ່ທ່ານ ແລະ ລູກໆຂອງທ່ານອ່ານ 3 ນີໄຟ 1:4–10, ເຊື້ອເຊີນໃຫ້ພວກເຂົາເວົ້າກ່ຽວກັບວ່າ ພວກເຂົາອາດຮູ້ສຶກຢ່າງໃດທີ່ເປັນໜຶ່ງໃນຜູ້ທີ່ເຊື່ອໃນສະໄໝນັ້ນ. ແລ້ວ, ຂະນະທີ່ພວກເຂົາອ່ານເລື່ອງລາວທີ່ເຫລືອໃນ ຂໍ້ທີ 11–15, ພວກເຂົາສາມາດແນະນຳວິທີທີ່ຈະປະກອບປະໂຫຍກນີ້ໃຫ້ຄົບຖ້ວນ: “ບົດຮຽນຂອງເລື່ອງລາວນີ້ສຳລັບຂ້ອຍແມ່ນ …”
-
ບາງເທື່ອລູກໆຂອງທ່ານກໍສາມາດຊ່ວຍທ່ານນຶກເຖິງເວລາອື່ນໆທີ່ພຣະເຈົ້າສຳເລັດຄຳສັນຍາຂອງພຣະອົງ ທີ່ໄດ້ໃຫ້ໄວ້ຜ່ານທາງສາດສະດາຂອງພຣະອົງ. ພວກເຂົາອາດຢາກຊອກຫາຮູບຂອງເລື່ອງລາວເຫລົ່ານີ້ໃນ ປຶ້ມຮູບພຣະກິດຕິຄຸນ (ເບິ່ງ, ຍົກຕົວຢ່າງ, ເລກທີ 7–8 ແລະ 81). ໃຫ້ພວກເຂົາແບ່ງປັນສິ່ງທີ່ພວກເຂົາຮູ້ກ່ຽວກັບເລື່ອງລາວເຫລົ່ານີ້, ລວມທັງວິທີທີ່ຄຳສັນຍາຕ່າງໆຂອງພຣະເຈົ້າສຳເລັດ. ອ່ານ 3 ນີໄຟ 1:20 ນຳກັນ, ແລະ ແບ່ງປັນຄຳພະຍານຂອງທ່ານເອງກ່ຽວກັບຄວາມຈິງເຫລົ່ານີ້.
3 ນີໄຟ 2:11–12; 3:13–14, 24–26
ພວກເຮົາເຂັ້ມແຂງຂຶ້ນ ເມື່ອພວກເຮົາເຕົ້າໂຮມກັນ.
-
ຊ່ວຍລູກໆຂອງທ່ານຄົ້ນພົບວ່າ ເປັນຫຍັງຊາວນີໄຟຈຶ່ງເຕົ້າໂຮມກັນ ແລະ ພອນທີ່ມາສູ່ພວກເຂົາໃນ 3 ນີໄຟ 2:11–12 ແລະ 3:13–14, 24–26. ເປັນຫຍັງມັນຈຶ່ງສຳຄັນສຳລັບເຮົາທີ່ຈະເຕົ້າໂຮມກັນໃນສະໄໝນີ້ ໃນຄອບຄົວຂອງເຮົາ ແລະ ຢູ່ທີ່ໂບດ?
-
ທ່ານຮູ້ຈັກບົດຮຽນທີ່ໃຊ້ສິ່ງຂອງທີ່ສິດສອນກ່ຽວກັບຄວາມເຂັ້ມແຂງຂອງຄວາມເປັນອັນໜຶ່ງອັນດຽວກັນບໍ່? ບາງເທື່ອລູກໆຂອງທ່ານອາດລອງຫັກໄມ້ກິ່ງໜຶ່ງ ແລ້ວຕາມດ້ວຍໄມ້ມັດໜຶ່ງ ຫລື ຈີກເຈ້ຍໃບໜຶ່ງ ແລ້ວຕາມດ້ວຍເຈ້ຍປຶກໜຶ່ງ. ເຮົາເປັນເໝືອນດັ່ງກິ່ງໄມ້ ຫລື ເຈ້ຍແນວໃດ?
3 ນີໄຟ 5:12–26; 6:14; 7:15–26
ເຮົາເປັນສານຸສິດຂອງພຣະເຢຊູຄຣິດ.
-
ຫລັງຈາກທີ່ອ່ານ 3 ນີໄຟ 5:13 ນຳກັນ, ເຊື້ອເຊີນລູກໆຂອງທ່ານໃຫ້ເວົ້າລຶ້ມຄືນວະລີທີ່ວ່າ “ເຮົາເປັນສານຸສິດຂອງພຣະເຢຊູຄຣິດ.” ເພື່ອທີ່ຈະຮຽນຮູ້ວ່າ ການເປັນສານຸສິດຂອງພຣະເຢຊູຄຣິດນັ້ນໝາຍຄວາມວ່າແນວໃດ, ໃຫ້ອ່ານບາງຕົວຢ່າງເຫລົ່ານີ້ນຳກັນ: ຊາວເລມັນທີ່ປ່ຽນໃຈເຫລື້ອມໃສ (ເບິ່ງ 3 ນີໄຟ 6:14), ມໍມອນ (ເບິ່ງ 3 ນີໄຟ 5:12–26), ແລະ ນີໄຟ (ເບິ່ງ 3 ນີໄຟ 7:15–26). ທ່ານຍັງສາມາດພົບແນວຄິດເຫລົ່ານີ້ໄດ້ໃນເພງເຊັ່ນ “ຄັ້ງໜຶ່ງເຢຊູເກີດຕ່ຳຕ້ອຍ” (ເພງສວດ ແລະ ເພງຂອງເດັກນ້ອຍ, 22) ນຳອີກ.
-
ໃນເຈ້ຍອີກໃບໜຶ່ງ, ຊ່ວຍລູກໆຂອງທ່ານແຕ້ມຕາມຮອຍມືຂອງພວກເຂົາ ແລະ ຕັດຮອຍມືອອກ. ຂຽນ “ເຮົາເປັນສານຸສິດຂອງພຣະເຢຊູຄຣິດ” ໃສ່ດ້ານໜຶ່ງ, ແລະ ເຊື້ອເຊີນໃຫ້ພວກເຂົາແຕ້ມສິ່ງໃດສິ່ງໜຶ່ງທີ່ພວກເຂົາສາມາດເຮັດໄດ້ ເພື່ອທີ່ຈະເປັນສານຸສິດໃສ່ອີກດ້ານໜຶ່ງ.
ສຳລັບແນວຄິດເພີ່ມເຕີມ, ໃຫ້ເບິ່ງວາລະສານ Friend ສະບັບຂອງເດືອນນີ້.
A Day, a Night, and a Day [ມື້ໜຶ່ງ, ຄືນໜຶ່ງ, ແລະ ອີກມື້ໜຶ່ງ], ໂດຍ ວາວເຕີ ເຣນ.