“ວັນທີ 9–15 ເດືອນກັນຍາ: ‘ຂ່າວອັນໜ້າຊື່ນຊົມແຫ່ງຄວາມປິຕິຍິນດີອັນຍິ່ງໃຫຍ່.’ ຮີລາມັນ 13–16,” ຈົ່ງຕາມເຮົາມາ—ສຳລັບບ້ານ ແລະ ໂບດ: ພຣະຄຳພີມໍມອນ 2024 (2023)
“ວັນທີ 9–15 ເດືອນກັນຍາ. ຮີລາມັນ 13–16,” ຈົ່ງຕາມເຮົາມາ—ສຳລັບບ້ານ ແລະ ໂບດ: 2024 (2023)
Samuel the Lamanite on the Wall [ຊາມູເອນຄົນເລມັນຢູ່ເທິງກຳແພງ], ໂດຍ ອາໂນລ໌ ຟຣີເບີກ
ວັນທີ 9–15 ເດືອນກັນຍາ: “ຂ່າວອັນໜ້າຊື່ນຊົມແຫ່ງຄວາມປິຕິຍິນດີອັນຍິ່ງໃຫຍ່”
ຮີລາມັນ 13–16
ເທື່ອທຳອິດທີ່ຊາມູເອນຄົນເລມັນໄດ້ພະຍາຍາມແບ່ງປັນ “ຂ່າວອັນໜ້າຊື່ນຊົມ” ຢູ່ໃນເມືອງເຊຣາເຮັມລາ (ຮີລາມັນ 13:7), ເພິ່ນໄດ້ຖືກປະຕິເສດ ແລະ ຖືກຂັບໄລ່ອອກໄປ ໂດຍຊາວນີໄຟທີ່ໃຈແຂງກະດ້າງ. ທ່ານສາມາດເວົ້າໄດ້ ຄືກັບວ່າພວກເຂົາໄດ້ສ້າງກຳແພງທີ່ຜ່ານເຂົ້າໄປບໍ່ໄດ້ອ້ອມຮອບໃຈຂອງພວກເຂົາ ທີ່ກີດກັນພວກເຂົາຈາກການຮັບເອົາຂ່າວສານຂອງຊາມູເອນ. ຊາມູເອນໄດ້ເຂົ້າໃຈເຖິງຄວາມສຳຄັນຂອງຂ່າວສານ ທີ່ເພິ່ນໄດ້ກ່າວ ແລະ ໄດ້ສະແດງສັດທາໂດຍການເຮັດຕາມພຣະບັນຍັດຂອງພຣະເຈົ້າ “ວ່າເພິ່ນຄວນກັບຄືນໄປອີກ, ແລະ ທຳນາຍ” (ຮີລາມັນ 13:3). ຄືກັນກັບຊາມູເອນ, ເຮົາທຸກຄົນກໍປະເຊີນກັບກຳແພງ ຂະນະທີ່ເຮົາ “ຕຽມທາງຂອງພຣະຜູ້ເປັນເຈົ້າ” (ຮີລາມັນ 14:9) ແລະ ພະຍາຍາມເຮັດຕາມສາດສະດາຂອງພຣະອົງ. ແລະ ຄືກັນກັບຊາມູເອນ, ເຮົາກໍເປັນພະຍານເຖິງພຣະເຢຊູຄຣິດຄືກັນ, “ຜູ້ຈະສະເດັດມາຢ່າງແນ່ນອນ,” ແລະ ເຊື້ອເຊີນທຸກຄົນໃຫ້ “ເຊື່ອໃນພຣະນາມຂອງພຣະອົງ” (ຮີລາມັນ 13:6; 14:13). ບໍ່ແມ່ນທຸກຄົນຈະຮັບຟັງ, ແລະ ບາງຄົນອາດຕໍ່ຕ້ານເຮົາຢ່າງຮຸນແຮງ. ແຕ່ຜູ້ທີ່ເຊື່ອໃນຂ່າວສານນີ້ ດ້ວຍສັດທາໃນພຣະຄຣິດ ຈະພົບວ່າມັນເປັນ “ຂ່າວອັນໜ້າຊື່ນຊົມແຫ່ງຄວາມປິຕິຍິນດີອັນຍິ່ງໃຫຍ່” ແທ້ໆ (ຮີລາມັນ 16:14).
ແນວຄິດສຳລັບການຮຽນຮູ້ຢູ່ທີ່ບ້ານ ແລະ ຢູ່ທີ່ໂບດ
ພຣະຜູ້ເປັນເຈົ້າໃຫ້ຄຳເຕືອນຜ່ານທາງສາດສະດາຂອງພຣະອົງ.
ໃນພຣະຄຳພີ, ບາງເທື່ອສາດສະດາໄດ້ຖືກປຽບທຽບໃສ່ກັບນາຍຍາມຢູ່ເທິງກຳແພງ ຫລື ຫໍສູງ ຜູ້ເຕືອນບອກສິ່ງອັນຕະລາຍ (ເບິ່ງ ເອຊາຢາ 62:6; ເອເຊກຽນ 33:1–7). ຂະນະທີ່ທ່ານສຶກສາຖ້ອຍຄຳຂອງຊາມູເອນຢູ່ໃນ ຮີລາມັນ 13, ໃຫ້ພິຈາລະນາວ່າເພິ່ນຄືກັນກັບນາຍຍາມສຳລັບທ່ານແນວໃດ. ເພິ່ນໄດ້ເວົ້າຫຍັງແດ່ທີ່ເບິ່ງຄືກ່ຽວພັນກັບວັນເວລາຂອງເຮົາ? (ເບິ່ງໂດຍສະເພາະ ຂໍ້ທີ 8, 21–22, 26–29, 31, ແລະ 38). ຍົກຕົວຢ່າງ, ຊາມູເອນ ໄດ້ສິດສອນຫຍັງແດ່່ກ່ຽວກັບການກັບໃຈ? ກ່ຽວກັບຄວາມຖ່ອມຕົວ ແລະ ຄວາມຮັ່ງມີ? ກ່ຽວກັບການສະແຫວງຫາຄວາມສຸກ “ໃນການເຮັດຄວາມຊົ່ວຮ້າຍ”?
ທ່ານອາດຊອກຫາຂ່າວສານຈາກກອງປະຊຸມໃຫຍ່ທີ່ລ່າສຸດນຳອີກ ສຳລັບຄຳເຕືອນທີ່ຄ້າຍຄືກັນນີ້ ທີ່ພຣະຜູ້ເປັນເຈົ້າໄດ້ປະທານໃຫ້ ຜ່ານທາງສາດສະດາໃນຍຸກສະໄໝໃໝ່. ທ່ານຮູ້ສຶກໄດ້ຮັບການດົນໃຈໃຫ້ເຮັດສິ່ງໃດກ່ຽວກັບຄຳເຕືອນເຫລົ່ານີ້?
ຊອກຫາແບບແຜນ. ແບບແຜນ ຄືແຜນການ ຫລື ແບບຢ່າງທີ່ສາມາດໃຊ້ເປັນສິ່ງນຳພາໃຫ້ບັນລຸວຽກງານໃດໜຶ່ງ. ໃນພຣະຄຳພີ, ເຮົາພົບເຫັນແບບແຜນທີ່ສະແດງໃຫ້ເຫັນວິທີທີ່ພຣະຜູ້ເປັນເຈົ້າ ບັນລຸວຽກງານຂອງພຣະອົງ, ດັ່ງເຊັ່ນການສົ່ງຜູ້ຮັບໃຊ້ຂອງພຣະອົງໄປເຕືອນຜູ້ຄົນ.
ເມື່ອເຮົາຮັບຟັງບັນດາສາດສະດາ, ພວກເພິ່ນຈະຊີ້ໃຫ້ເຮົາໄປຫາພຣະເຢຊູຄຣິດ.
ພຣະເຈົ້າເຊື້ອເຊີນເຮົາໃຫ້ກັບໃຈ.
ຄຳເຕືອນຂອງຊາມູເອນເຖິງການພິພາກສາຂອງພຣະເຈົ້າແມ່ນລວມດ້ວຍຄຳເຊື້ອເຊີນທີ່ມີເມດຕາສະເໝີ ເພື່ອໃຫ້ກັບໃຈ. ໃຫ້ຊອກຫາຄຳເຊື້ອເຊີນເຫລົ່ານີ້ ຕະຫລອດທົ່ວ ຮີລາມັນ 13–15 (ເບິ່ງ ໂດຍສະເພາະ ຮີລາມັນ13:6–11; 14:15–19; 15:7–8). ທ່ານຮຽນຮູ້ຫຍັງແດ່ ຈາກຂໍ້ເຫລົ່ານີ້ ກ່ຽວກັບການກັບໃຈ? ບາງຄົນເຫັນການກັບໃຈວ່າເປັນການລົງໂທດທີ່ໂຫດຮ້າຍ—ເປັນສິ່ງທີ່ຕ້ອງຫລີກເວັ້ນ. ໃນຄວາມຄິດເຫັນຂອງທ່ານ, ຊາມູເອນຢາກໃຫ້ຊາວນີໄຟເຫັນການກັບໃຈວ່າເປັນແບບໃດ?
ເພື່ອເຮັດໃຫ້ການສຶກສາຂອງທ່ານເລິກເຊິ່ງ, ທ່ານສາມາດອ່ານຂ່າວສານຂອງປະທານຣະໂຊ ເອັມ ແນວສັນ “We Can Do Better and Be Better” (Liahona, May 2019, 67). ເພິ່ນໄດ້ໃຫ້ນິຍາມການກັບໃຈວ່າແນວໃດ? ພອນຂອງການກັບໃຈຢ່າງຈິງໃຈໃດແດ່ທີ່ທ່ານພົບເຫັນໃນຂ່າວສານຂອງເພິ່ນ? ທ່ານອາດຊອກຫາສິ່ງໃດສິ່ງໜຶ່ງໂດຍສະເພາະທີ່ສາດສະດາໄດ້ເຊື້ອເຊີນເຮົາໃຫ້ປ່ຽນແປງ. ພຣະວິນຍານບໍລິສຸດກຳລັງບອກທ່ານວ່າທ່ານຕ້ອງປ່ຽນແປງຫຍັງແດ່? ໃຫ້ຄິດທີ່ຈະຂຽນການເປີດເຜີຍສ່ວນຕົວທີ່ທ່ານໄດ້ຮັບລົງໄວ້.
ການກັບໃຈແຕກຕ່າງຈາກການພຽງແຕ່ປ່ຽນແປງພຶດຕິກຳຂອງທ່ານເທົ່ານັ້ນແນວໃດ? ເປັນຫຍັງມັນຈຶ່ງສຳຄັນທີ່ຈະຮັບເອົາຄຳເຊື້ອເຊີນຂອງພຣະເຈົ້າເພື່ອໃຫ້ກັບໃຈ? ຂະນະທີ່ທ່ານໄຕ່ຕອງເລື່ອງນີ້, ໃຫ້ຄິດທີ່ຈະຮ້ອງເພງ ຫລື ຟັງເພງສວດທີ່ສະແດງເຖິງຄຳເຊື້ອເຊີນນີ້, ດັ່ງເຊັ່ນ “ຂ້າຂໍຂອບພຣະໄທອົງບິດາ” (ເພງສວດ ແລະ ເພງຂອງເດັກນ້ອຍ, 67).
ເບິ່ງ “Jesus Christ Will Help You,” ສຳລັບຄວາມເຂັ້ມແຂງຂອງຊາວໜຸ່ມ: ຄູ່ມືສຳລັບການເລືອກ, 6–9; “Repentance: A Joyful Choice,” “Principles of Peace: Repentance” (ວິດີໂອ), ຫ້ອງສະໝຸດພຣະກິດຕິຄຸນ; Gospel Topics “Repentance,” ຫ້ອງສະໝຸດພຣະກິດຕິຄຸນ ນຳອີກ.
ພຣະເຈົ້າໄດ້ສົ່ງເຄື່ອງໝາຍ ແລະ ການແປກປະຫລາດມາ ເພື່ອເປັນພະຍານເຖິງການກຳເນີດ ແລະ ການສິ້ນພຣະຊົນຂອງພຣະຜູ້ຊ່ວຍໃຫ້ລອດ.
ຢູ່ໃນ ຮີລາມັນ 14, ຊາມູເອນໄດ້ອະທິບາຍເຫດຜົນທີ່ພຣະຜູ້ເປັນເຈົ້າໄດ້ຈັດໃຫ້ມີເຄື່ອງໝາຍເຖິງການກຳເນີດ ແລະ ການສິ້ນພຣະຊົນຂອງພຣະຜູ້ຊ່ວຍໃຫ້ລອດ ເພື່ອວ່າຜູ້ຄົນ “ຈະໄດ້ຮູ້ເຖິງ … ການສະເດັດມາຂອງພຣະອົງ” ແລະ “ເຊື່ອໃນພຣະນາມຂອງພຣະອົງ” (ຮີລາມັນ 14:12). ຂະນະທີ່ທ່ານສຶກສາ ຮີລາມັນ 14, ໃຫ້ສັງເກດເບິ່ງເຄື່ອງໝາຍເຖິງການກຳເນີດຂອງພຣະຜູ້ຊ່ວຍໃຫ້ລອດ ຢູ່ໃນ ຂໍ້ທີ 1–8 ແລະ ເຄື່ອງໝາຍເຖິງການສິ້ນພຣະຊົນຂອງພຣະອົງ ຢູ່ໃນ ຂໍ້ທີ 20–28. ທ່ານຄິດວ່າ ເປັນຫຍັງເຄື່ອງໝາຍເຫລົ່ານີ້ຈຶ່ງເປັນວິທີທີ່ມີປະສິດທິພາບ ໃນການໃຫ້ຄວາມໝາຍແກ່ການກຳເນີດ ແລະ ການສິ້ນພຣະຊົນຂອງພຣະເຢຊູຄຣິດ?
ເຄື່ອງໝາຍທີ່ເປັນສ່ວນຕົວ ແລະ ໜ້າຕື່ນຕາຕື່ນໃຈໜ້ອຍກວ່າສາມາດຊ່ວຍທ່ານ “ເຊື່ອໃນພຣະນາມ [ຂອງພຣະຜູ້ຊ່ວຍໃຫ້ລອດ] ໄດ້.” ພຣະອົງໄດ້ກະທຳສິ່ງໃດເພື່ອເພີ່ມຄວາມເຂັ້ມແຂງໃຫ້ແກ່ຄວາມເຊື່ອຂອງທ່ານໃນພຣະອົງ?
ມີຄຳເຕືອນຫຍັງແດ່ທີ່ມອບໃຫ້ກ່ຽວກັບເຄື່ອງໝາຍ ຢູ່ໃນ ຮີລາມັນ 16:13–23? ທ່ານຈະຫລີກເວັ້ນຈາກທັດສະນະຄະຕິຂອງຜູ້ຄົນທີ່ບັນຍາຍຢູ່ໃນຂໍ້ເຫລົ່ານີ້ໄດ້ແນວໃດ?
ເບິ່ງ ແອວມາ 30:43–52; Ronald A. Rasband, “By Divine Design,” Liahona, Nov. 2017, 55–57 ນຳອີກ.
ການຕີສອນຈາກພຣະຜູ້ເປັນເຈົ້າ ເປັນເຄື່ອງໝາຍເຖິງຄວາມຮັກຂອງພຣະອົງ.
ຖ້ອຍຄຳຂອງຊາມູເອນບັນຈຸການຕີສອນທີ່ເຂັ້ມງວດ, ແຕ່ ຮີລາມັນ 15:3 ໃຫ້ເຮົາເຫັນມຸມມອງຂອງການຕີສອນຈາກພຣະຜູ້ເປັນເຈົ້າ. ການຕີສອນຈາກພຣະຜູ້ເປັນເຈົ້າ ສາມາດເປັນເຄື່ອງໝາຍເຖິງຄວາມຮັກຂອງພຣະອົງແນວໃດ? ທ່ານເຫັນຫລັກຖານໃດແດ່ເຖິງຄວາມຮັກ ແລະ ຄວາມເມດຕາຂອງພຣະຜູ້ເປັນເຈົ້າ ໃນການທຳນາຍ ແລະ ການເຕືອນຂອງຊາມູເອນ?
ໃຫ້ພິຈາລະນາທີ່ຈະສຶກສາຂ່າວສານຂອງ Elder D. Todd Christofferson “As Many as I Love, I Rebuke and Chasten” (Liahona, May 2011, 97–100), ຊອກຫາຈຸດປະສົງສາມຢ່າງຂອງການຕີສອນທີ່ສູງສົ່ງ. ເມື່ອໃດທີ່ທ່ານໄດ້ເຫັນພຣະເຈົ້າທຳງານໃນວິທີທາງເຫລົ່ານີ້ໃນຊີວິດຂອງທ່ານ?
ສາດສະດາຊີ້ທາງໃຫ້ເຮົາໄປຫາພຣະເຢຊູຄຣິດ.
ໃນ ຮີລາມັນ 16, ທ່ານຮຽນຮູ້ຫຍັງແດ່ຈາກຜູ້ຄົນທີ່ໄດ້ຍອມຮັບຄຳສອນຂອງຊາມູເອນ? ທ່ານຮຽນຮູ້ຫຍັງແດ່ຈາກຜູ້ຄົນທີ່ໄດ້ປະຕິເສດເພິ່ນ? ໃຫ້ຄິດກ່ຽວກັບວິທີທີ່ສາດສະດາທີ່ມີຊີວິດຢູ່ໄດ້ຊ່ວຍທ່ານ ຫຍັບເຂົ້າໃກ້ພຣະເຢຊູຄຣິດຫລາຍຂຶ້ນແນວໃດ.
ສຳລັບແນວຄິດເພີ່ມເຕີມ, ໃຫ້ເບິ່ງວາລະສານ Liahona ແລະ For the Strength of Youth ສະບັບຂອງເດືອນນີ້.
ແນວຄິດສຳລັບການສິດສອນເດັກນ້ອຍ
ພຣະເຈົ້າສາມາດກ່າວກັບເຮົາຢູ່ໃນໃຈຂອງເຮົາ.
-
ທ່ານຈະສາມາດສິດສອນລູກໆຂອງທ່ານວ່າ ພຣະເຈົ້າສາມາດກ່າວຕໍ່ໃຈຂອງເຮົາໄດ້ແນວໃດ, ດັ່ງທີ່ພຣະອົງໄດ້ເຮັດໃຫ້ແກ່ຊາມູເອນ? ບາງທີທ່ານສາມາດຂໍໃຫ້ພວກເຂົາສະແດງວິທີທາງທີ່ແຕກຕ່າງເພື່ອສື່ສານໂດຍບໍ່ໃຊ້ຖ້ອຍຄຳ (ດັ່ງເຊັ່ນທ່າທີ ຫລື ການສະແດງອອກທາງໃບໜ້າ). ສິ່ງນີ້ສາມາດນຳໄປສູ່ການສົນທະນາກ່ຽວກັບວິທີທາງທີ່ແຕກຕ່າງທີ່ພຣະບິດາເທິງສະຫວັນສື່ສານກັບເຮົາ. ເພື່ອເປັນພາກສ່ວນຂອງການສົນທະນານີ້, ທ່ານ ແລະ ລູກໆຂອງທ່ານສາມາດເບິ່ງຮູບຊາມູເອນຄົນເລມັນ (ໂຄງຮ່າງນີ້ມີຮູບສອງໃບ) ແລະ ອ່ານ ຮີລາມັນ 13:2–5 ຂະນະທີ່ລູກໆຂອງທ່ານຕັ້ງໃຈຟັງວ່າ ພຣະເຈົ້າໄດ້ບອກໃຫ້ຊາມູເອນໃຫ້ກ່າວຫຍັງແດ່.
-
ເຮົາຫລາຍຄົນ—ໂດຍສະເພາະເດັກນ້ອຍ—ຕ້ອງການຄວາມຊ່ວຍເຫລືອເພື່ອຮຽນຮູ້ທີ່ຈະຮັບຮູ້ວ່າພຣະເຈົ້າກຳລັງກ່າວກັບເຮົາ ແນວໃດ ແລະ ເມື່ອໃດ ທ່ານອາດບອກລູກໆຂອງທ່ານກ່ຽວກັບເວລາເມື່ອພຣະວິນຍານບໍລິສຸດໄດ້ຊ່ວຍໃຫ້ທ່ານຮູ້ຢູ່ໃນໃຈຂອງທ່ານເຖິງສິ່ງທີ່ພຣະເຈົ້າປະສົງໃຫ້ທ່ານເຮັດ ຫລື ກ່າວ. ໃຫ້ອະທິບາຍວ່າທ່ານຮູ້ໄດ້ແນວໃດວ່າ ພຣະເຈົ້າກຳລັງສື່ສານກັບທ່ານ. ບາງທີລູກໆຂອງທ່ານສາມາດແບ່ງປັນປະສົບການທີ່ຄ້າຍຄືກັນ ທີ່ພວກເຂົາເຄີຍມີ.
ສາດສະດາສິດສອນກ່ຽວກັບພຣະເຢຊູຄຣິດ.
-
ການຮ້ອງເພງ “ຄັ້ງໜຶ່ງເຢຊູເກີດຕ່ຳຕ້ອຍ” ນຳກັນ (ເພງສວດ ແລະ ເພງຂອງເດັກນ້ອຍ, 22) ອາດເປັນວິທີທີ່ດີ ເພື່ອສິດສອນລູກໆຂອງທ່ານເຖິງສິ່ງທີ່ຊາມູເອນໄດ້ສິດສອນກ່ຽວກັບພຣະເຢຊູຄຣິດ. ການແບ່ງປັນ “ບົດທີ 40: ຊາມູເອນຄົນເລມັນປະກາດກ່ຽວກັບພຣະເຢຊູຄຣິດ” (ເລື່ອງພຣະຄຳພີມໍມອນ, 111–13) ກໍເປັນອີກວິທີໜຶ່ງ. ຊາມູເອນໄດ້ສິດສອນຫຍັງແດ່ກ່ຽວກັບພຣະຜູ້ຊ່ວຍໃຫ້ລອດ? ບາງທີທ່ານກໍສາມາດແບ່ງປັນສິ່ງທີ່ສາດສະດາຍຸກສະໄໝໃໝ່ສິດສອນກ່ຽວກັບພຣະອົງ. ຖ້ອຍຄຳຂອງພວກເພິ່ນສ້າງສັດທາຂອງເຮົາໃນພຣະອົງແນວໃດ?
ເຮົາໄດ້ຮັບພອນເມື່ອເຮົາຕິດຕາມສາດສະດາ.
-
ທ່ານສາມາດສ້າງຄວາມໄວ້ວາງໃຈຂອງລູກໆຂອງທ່ານໃນສາດສະດາ ໂດຍການສະແດງໃຫ້ພວກເຂົາເຫັນຕົວຢ່າງຂອງຜູ້ຄົນທີ່ຊື່ສັດ. ບາງຢ່າງເຫລົ່ານີ້ມີຢູ່ໃນ ຮີລາມັນ 16:1, 5. ຂະນະທີ່ທ່ານອ່ານ, ລູກໆຂອງທ່ານສາມາດຢືນຂຶ້ນເມື່ອພວກເຂົາໄດ້ຍິນສິ່ງໃດສິ່ງໜຶ່ງທີ່ຜູ້ຄົນໄດ້ເຮັດ ເມື່ອເຂົາເຈົ້າໄດ້ເຊື່ອຖ້ອຍຄຳຂອງຊາມູເອນ. ແລ້ວ, ຂະນະທີ່ທ່ານອ່ານ ຂໍ້ທີ 2 ແລະ 6, ລູກໆຂອງທ່ານສາມາດນັ່ງລົງເມື່ອພວກເຂົາໄດ້ຍິນສິ່ງໃດສິ່ງໜຶ່ງທີ່ຜູ້ຄົນໄດ້ເຮັດ ເມື່ອເຂົາເຈົ້າບໍ່ເຊື່ອ. ເຮົາຈະສະແດງໃຫ້ເຫັນວ່າ ເຮົາເຊື່ອຖ້ອຍຄຳຂອງສາດສະດາທີ່ມີຊີວິດຢູ່ໄດ້ແນວໃດ? ບອກລູກໆຂອງທ່ານວ່າທ່ານໄດ້ຮັບພອນແນວໃດຂະນະທີ່ທ່ານເຮັດຕາມຄຳແນະນຳຂອງພຣະຜູ້ເປັນເຈົ້າ ຜ່ານທາງສາດສະດາຂອງພຣະອົງ.
ສຳລັບແນວຄິດເພີ່ມເຕີມ, ໃຫ້ເບິ່ງວາລະສານ Friend ສະບັບຂອງເດືອນນີ້.
Samuel the Lamanite [ຊາມູເອນຄົນເລມັນ], ໂດຍ ແລັດສະເຕີ ໂຢກຳ.