“ວັນທີ 26 ເດືອນສິງຫາ–ວັນທີ 1 ເດືອນກັນຍາ: ‘ດານຫີນຂອງພຣະຜູ້ໄຖ່ຂອງພວກເຮົາ.’ ຮີລາມັນ 1–6,” ຈົ່ງຕາມເຮົາມາ—ສຳລັບບ້ານ ແລະ ໂບດ: ພຣະຄຳພີມໍມອນ 2024 (2023)

“ວັນທີ 26 ເດືອນສິງຫາ–ວັນທີ 1 ເດືອນກັນຍາ. ຮີລາມັນ 1–6,” ຈົ່ງຕາມເຮົາມາ—ສຳລັບບ້ານ ແລະ ໂບດ: 2024 (2023)

ວັນທີ 26 ເດືອນສິງຫາ–ວັນທີ 1 ເດືອນກັນຍາ: “ດານຫີນຂອງພຣະຜູ້ໄຖ່ຂອງພວກເຮົາ”

ຮີລາມັນ 1–6

ໜັງສືຮີລາມັນ ບັນທຶກທັງໄຊຊະນະ ແລະ ຄວາມໂສກເສົ້າ ຢູ່ໃນບັນດາຊາວນີໄຟ ແລະ ຊາວເລມັນ. ມັນເລີ່ມຕົ້ນດ້ວຍ “ຄວາມຫຍຸ້ງຍາກຢ່າງຮ້າຍແຮງເກີດຂຶ້ນໃນບັນດາຜູ້ຄົນຂອງນີໄຟ” (ຮີລາມັນ 1:1), ແລະ ຄວາມຫຍຸ້ງຍາກກໍຫລັ່ງໄຫລມາຕະຫລອດທົ່ວບັນທຶກ. ຢູ່ໃນໜັງສືນີ້ ເຮົາອ່ານກ່ຽວກັບກົນອຸບາຍທາງດ້ານການເມືອງ, ພວກໂຈນ, ການປະຕິເສດສາດສະດາ, ແລະ ຄວາມທະນົງຕົວ ແລະ ຄວາມບໍ່ເຊື່ອຖື ຕະຫລອດທົ່ວແຜ່ນດິນ. ແຕ່ເຮົາກໍຍັງພົບເຫັນຕົວຢ່າງ ເຊັ່ນ ນີໄຟ ແລະ ລີໄຮ ແລະ “ຜູ້ຄົນທີ່ຖ່ອມຕົວຢ່າງຫລວງຫລາຍ,” ຜູ້ທີ່ບໍ່ພຽງແຕ່ລອດມາໄດ້ ແຕ່ຍັງຈະເລີນກ້າວໜ້າທາງວິນຍານນຳອີກ (ຮີລາມັນ 3:34). ພວກເພິ່ນເຮັດແນວນັ້ນໄດ້ແນວໃດ? ພວກເພິ່ນຍັງຄົງເຂັ້ມແຂງຢູ່ໄດ້ແນວໃດ ຂະນະທີ່ຄວາມສີວິໄລຂອງພວກເພິ່ນເລີ່ມເສື່ອມໂຊມ ແລະ ພັງທະລາຍໄປ? ໃນທາງດຽວກັນກັບທີ່ເຮົາຍັງຄົງເຂັ້ມແຂງຢູ່ໃນ “ລົມພະຍຸຮ້າຍ” ທີ່ມານສົ່ງມາ “ຕີ [ເຮົາ]”—ໂດຍການສ້າງຊີວິດຂອງເຮົາ “ຢູ່ເທິງດານຫີນຂອງພຣະຜູ້ໄຖ່ຂອງພວກເຮົາ, ຄືພຣະຄຣິດ, ພຣະບຸດຂອງພຣະເຈົ້າ, … ເປັນຮາກຖານຊຶ່ງຫາກມະນຸດສ້າງຂຶ້ນເທິງມັນ ພວກເຂົາຈະຕົກໄປບໍ່ໄດ້” (ຮີລາມັນ 5:12).

ແນວຄິດສຳລັບການຮຽນຮູ້ຢູ່ທີ່ບ້ານ ແລະ ຢູ່ທີ່ໂບດ

ຮີລາມັນ 1–6

ຄວາມທະນົງຕົວແຍກເຮົາຈາກພຣະວິນຍານ ແລະ ພະລັງຂອງພຣະເຈົ້າ.

ຂະນະທີ່ທ່ານອ່ານ ຮີລາມັນ 1–6, ທ່ານອາດສັງເກດເຫັນແບບແຜນໃນພຶດຕິກຳຂອງຊາວນີໄຟ. ເມື່ອພວກເຂົາຊອບທຳ, ພຣະເຈົ້າອວຍພອນພວກເຂົາ, ແລະ ພວກເຂົາກໍຈະເລີນຮຸ່ງເຮືອງ. ບາງຄັ້ງ, ພວກເຂົາໄດ້ກາຍເປັນຄົນທະນົງຕົວ ແລະ ຊົ່ວຮ້າຍ, ຕັດສິນໃຈເຮັດສິ່ງທີ່ພາໄປສູ່ຄວາມພິນາດ ແລະ ຄວາມທຸກທໍລະມານ. ແລ້ວພວກເຂົາກໍຖ່ອມຕົວລົງ ແລະ ຖືກດົນໃຈໃຫ້ກັບໃຈ, ແລະ ພຣະເຈົ້າກໍອວຍພອນພວກເຂົາຄືນອີກ. ແບບແຜນດັ່ງກ່າວໄດ້ລຶ້ມຄືນຕົວມັນເອງເລື້ອຍໆ ຈົນວ່າບາງຄົນເອີ້ນມັນວ່າ “ວົງຈອນຂອງຄວາມທະນົງຕົວ.”

ໃຫ້ຊອກຫາຕົວຢ່າງຂອງວົງຈອນນີ້ ຂະນະທີ່ທ່ານອ່ານ ຮີລາມັນ 1–6. ຕໍ່ໄປນີ້ແມ່ນຄຳຖາມບາງຂໍ້ ເພື່ອຊ່ວຍໃຫ້ທ່ານເຂົ້າໃຈແບບແຜນນີ້:

ມີຫລັກຖານໃດແດ່ຂອງຄວາມທະນົງຕົວ ທີ່ທ່ານເຫັນຢູ່ໃນບັນດາຊາວນີໄຟ? (ເບິ່ງ, ຍົກຕົວຢ່າງ, ຮີລາມັນ 3:33–34; 4:11–13). ທ່ານເຫັນຫລັກຖານທີ່ຄ້າຍຄືກັນຂອງຄວາມທະນົງຕົວ ຢູ່ໃນຕົວທ່ານເອງບໍ?
ມີຜົນສະທ້ອນຢ່າງໃດແດ່ຂອງຄວາມທະນົງຕົວ ແລະ ຄວາມຊົ່ວຮ້າຍ? (ເບິ່ງ ຮີລາມັນ 4:23–26). ມີຜົນສະທ້ອນຢ່າງໃດແດ່ຂອງຄວາມຖ່ອມຕົວ ແລະ ການກັບໃຈ? (ເບິ່ງ ຮີລາມັນ 3:27–30, 35; 4:14–16).
ຮີລາມັນຢາກໃຫ້ພວກລູກຊາຍຂອງເພິ່ນຈື່ຈຳສິ່ງໃດແດ່? (ເບິ່ງ ຮີລາມັນ 5:4–12). ໃນວິທີໃດແດ່ທີ່ການຈື່ຈຳຄວາມຈິງເຫລົ່ານີ້ຊ່ວຍທ່ານຫລີກເວັ້ນຈາກການກາຍເປັນຄົນທະນົງຕົວ?

ເບິ່ງ “Chapter 18: Beware of Pride,” Teachings of Presidents of the Church: Ezra Taft Benson (2014), 229–40; “ຂໍເພິ່ງພຣະທຸກຊົ່ວໂມງ,” ເພງສວດ ແລະ ເພງຂອງເດັກນ້ອຍ, 12 ນຳອີກ.

ຮີລາມັນ 3:24–35

ສັດທາໃນພຣະຄຣິດເຕີມເຕັມຈິດວິນຍານຂອງເຮົາດ້ວຍຄວາມຊື່ນຊົມ.

ໃນ ຮີລາມັນ 3, ມໍມອນໄດ້ບັນຍາຍເຖິງເວລາແຫ່ງຄວາມປິຕິຍິນດີ ເມື່ອສາດສະໜາຈັກໄດ້ຮັບພອນ ຈົນແມ່ນແຕ່ພວກຜູ້ນຳປະຫລາດໃຈ. ອີງຕາມສິ່ງທີ່ທ່ານໄດ້ອ່ານຢູ່ໃນ ຂໍ້ທີ 24–32, ທ່ານຄິດວ່າແມ່ນຫຍັງທີ່ນຳໄປສູ່ສະພາວະທີ່ຊົມຊື່ນຍິນດີເຊັ່ນນັ້ນ? ເຖິງຢ່າງໃດກໍຕາມ, ບໍ່ແມ່ນສະມາຊິກທຸກຄົນທີ່ສືບຕໍ່ຢູ່ໃນຄວາມຊື່ນຊົມນັ້ນ. ໃຫ້ສັງເກດຄວາມແຕກຕ່າງລະຫວ່າງຜູ້ຄົນທີ່ຖືກບັນຍາຍໃນ ຂໍ້ທີ 33–35. ທ່ານຮຽນຮູ້ຫຍັງແດ່ຈາກແບບຢ່າງຂອງພວກເຂົາ?

ໃຫ້ຊອກຫາການນຳໃຊ້ສ່ວນຕົວ. ສາດສະດາມໍມອນໃຊ້ວະລີທີ່ວ່າ “ພວກເຮົາຈຶ່ງເຫັນໄດ້ວ່າ” ເພື່ອເນັ້ນຄວາມຈິງທີ່ສຳຄັນ ຂະນະທີ່ເພິ່ນຫຍໍ້ພຣະຄຳພີມໍມອນ. ຍົກຕົວຢ່າງ, ເພິ່ນຢາກໃຫ້ເຮົາເຫັນຫຍັງຢູ່ໃນ ຮີລາມັນ 3:27–30? ຂະນະທີ່ທ່ານສຶກສາພຣະຄຳພີ, ທ່ານອາດຢຸດເປັນບາງຄັ້ງຄາວ ເພື່ອປະກອບວະລີ ທີ່ວ່າ “ແລະ ພວກເຮົາຈຶ່ງເຫັນໄດ້ວ່າ” ໃຫ້ສົມບູນ ກ່ຽວກັບສິ່ງທີ່ທ່ານໄດ້ອ່ານ.

ຮີລາມັນ 5:6–7

ເຮົາສາມາດໃຫ້ກຽດແດ່ພຣະນາມຂອງພຣະຜູ້ຊ່ວຍໃຫ້ລອດ.

ການອ່ານ ຮີລາມັນ 5:6–7 ອາດດົນໃຈທ່ານໃຫ້ພິຈາລະນາຊື່ທີ່ທ່ານໄດ້ຮັບ, ລວມທັງນາມສະກຸນ. ຊື່ເຫລົ່ານີ້ມີຄວາມໝາຍຕໍ່ທ່ານແນວໃດ? ທ່ານຈະສາມາດໃຫ້ກຽດມັນໄດ້ແນວໃດ? ທີ່ສຳຄັນໄປກວ່ານັ້ນກໍຄື, ໃຫ້ພິຈາລະນາວ່າ ການຮັບພຣະນາມຂອງພຣະຜູ້ຊ່ວຍໃຫ້ລອດນັ້ນ ໝາຍຄວາມວ່າແນວໃດ? (ເບິ່ງ ໂມໂຣໄນ 4:3). ທ່ານຈະໃຫ້ກຽດແດ່ພຣະນາມອັນສັກສິດນັ້ນແນວໃດ?

ຮີລາມັນ 5:12–52

ຖ້າເຮົາໃຫ້ພຣະເຢຊູຄຣິດເປັນຮາກຖານຂອງເຮົາ, ເຮົາຈະລົ້ມລົງບໍ່ໄດ້.

ຄຳວ່າ “ສ້າງຮາກຖານຂອງລູກ” ຂຶ້ນເທິງ “ດານຫີນຂອງພຣະຜູ້ໄຖ່ຂອງພວກເຮົາ” ໝາຍຄວາມວ່າແນວໃດຕໍ່ທ່ານ? (ຮີລາມັນ 5:12). ທ່ານໄດ້ພົບຄວາມປອດໄພຈາກມໍລະສຸມຊີວິດໃນພຣະເຢຊູຄຣິດແນວໃດ? ຂະນະທີ່ທ່ານອ່ານ ຮີລາມັນ 5:12–52, ໃຫ້ລະບຸວ່າ ນີໄຟ ແລະ ລີໄຮໄດ້ຮັບພອນ ຍ້ອນການສ້າງສັດທາຂອງພວກເພິ່ນຂຶ້ນເທິງດານຫີນຂອງພຣະຜູ້ໄຖ່ຂອງພວກເພິ່ນແນວໃດ.

ບາງຄົນພົບວ່າ ການນຶກພາບສິ່ງທີ່ພວກເຂົາກຳລັງສຶກສານັ້ນ ມີປະໂຫຍດ. ເພື່ອໃຫ້ເຫັນພາບ ຮີລາມັນ 5:12, ທ່ານສາມາດສ້າງໂຄງສ້າງນ້ອຍໆຢູ່ເທິງຮາກຖານທີ່ແຕກຕ່າງກັນ. ແລ້ວໃຫ້ທ່ານສ້າງ “ລົມພະຍຸຮ້າຍ” ໂດຍການສີດນ້ຳໃສ່ເທິງມັນ ແລະ ໃຊ້ພັດລົມ ເພື່ອສ້າງລົມ. ສິ່ງນີ້ໃຫ້ຄວາມເຂົ້າໃຈທີ່ເລິກເຊິ່ງຢ່າງໃດແດ່ກ່ຽວກັບການສ້າງຮາກຖານຂອງທ່ານຂຶ້ນເທິງພຣະເຢຊູຄຣິດ? ທ່ານຮຽນຮູ້ຫຍັງອີກແດ່ ຈາກວິດີໂອ “A Secure Anchor”? (ຫ້ອງສະໝຸດພຣະກິດຕິຄຸນ).

ຂໍ້ທີ 50 ກ່າວເຖິງ “ຄວາມຍິ່ງໃຫຍ່ຂອງຫລັກຖານ” ທີ່ຊາວເລມັນໄດ້ຮັບ. ການອ່ານ ຮີລາມັນ 5:12–52 ອາດເຮັດໃຫ້ທ່ານນຶກເຖິງຫລັກຖານທີ່ພຣະເຈົ້າໄດ້ມອບໃຫ້ທ່ານ. ຍົກຕົວຢ່າງ, ບາງທີ “ສຽງສື່ມ” ຈາກພຣະວິນຍານບໍລິສຸດໄດ້ເສີມສ້າງສັດທາຂອງທ່ານໃນພຣະຜູ້ຊ່ວຍໃຫ້ລອດ (ຮີລາມັນ 5:30; ເບິ່ງ ຄຳສອນ ແລະ ພັນທະສັນຍາ 88:66 ນຳອີກ). ຫລື ບາງທີທ່ານຍັງຢູ່ໃນຄວາມມືດ ແລະ ເອີ້ນຫາພຣະເຈົ້າເພື່ອຂໍໃຫ້ມີສັດທາຫລາຍຂຶ້ນ (ເບິ່ງ ຮີລາມັນ 5:40–47). ປະສົບການອື່ນອີກຢ່າງໃດແດ່ທີ່ໄດ້ຊ່ວຍໃຫ້ທ່ານສ້າງຮາກຖານຂອງທ່ານຂຶ້ນເທິງພຣະເຢຊູຄຣິດ?

ເບິ່ງ Russell M. Nelson, “The Temple and Your Spiritual Foundation,” Liahona, Nov. 2021, 93–96; Sean Douglas, “Facing Our Spiritual Hurricanes by Believing in Christ,” Liahona, Nov. 2021, 109–11; Gospel Topics, “Faith in Jesus Christ,” ຫ້ອງສະໝຸດພຣະກິດຕິຄຸນ ນຳອີກ.

ສຳລັບແນວຄິດເພີ່ມເຕີມ, ໃຫ້ເບິ່ງວາລະສານ Liahona ແລະ For the Strength of Youth ສະບັບຂອງເດືອນນີ້.

ແນວຄິດສຳລັບການສິດສອນເດັກນ້ອຍ

ຮີລາມັນ 3:24, 33–34; 4:11–15

ພຣະບິດາເທິງສະຫວັນຢາກໃຫ້ເຮົາຖ່ອມຕົວ.

ໃຫ້ພິຈາລະນາເຊື້ອເຊີນລູກໆຂອງທ່ານໃຫ້ແຕ້ມຮູບ “ວົງຈອນຂອງຄວາມທະນົງຕົວ,” ໃນແບບຂອງຕົນເອງ, ອີງຕາມແຜນພາບຢູ່ຂ້າງເທິງ. ແລ້ວ, ຂະນະທີ່ພວກທ່ານອ່ານ ຮີລາມັນ 3:24, 33–34 ແລະ 4:11–15 ນຳກັນ, ພວກເຂົາສາມາດຊີ້ໄປຍັງສ່ວນຕ່າງໆຂອງວົງຈອນທີ່ຂໍ້ເຫລົ່ານີ້ບັນຍາຍ. ເຮົາຈະສາມາດເລືອກທີ່ຈະຖ່ອມຕົວ—ແລະ ຄົງຢູ່ແບບນັ້ນໄດ້ແນວໃດ?

ຮີລາມັນ 5:12

ເຮົາຈະສ້າງຮາກຖານຂອງເຮົາເທິງພຣະເຢຊູຄຣິດ.

ໃຫ້ຄິດທີ່ຈະໃຊ້ຮູບພຣະວິຫານເພື່ອເລີ່ມຕົ້ນການສົນທະນາກ່ຽວກັບວ່າ ເປັນຫຍັງອາຄານທັງຫລາຍຈຶ່ງຈຳເປັນຕ້ອງມີຮາກຖານທີ່ແຂງແຮງ. ຫລື ທ່ານອາດເບິ່ງໄປທີ່ຮາກຖານຂອງບ້ານຂອງທ່ານ ຫລື ຕຶກໂບດ. ເພື່ອເນັ້ນເຖິງຄວາມແຂງແຮງຂອງຮາກຖານຫີນທີ່ແຂງແກ່ນ, ລູກໆຂອງທ່ານສາມາດລອງຍ້າຍຫີນກ້ອນໜຶ່ງ ໂດຍການເປົ່າມັນ. ຂະນະທີ່ທ່ານອ່ານ ຮີລາມັນ 5:12 ນຳກັນ, ໃຫ້ຖາມລູກໆຂອງທ່ານວ່າ ເປັນຫຍັງພຣະເຢຊູຄຣິດຈຶ່ງເປັນ “ຮາກຖານທີ່ແໜ້ນໜາ” ສຳລັບຊີວິດຂອງເຮົາ. ເຮົາຈະສາມາດສ້າງຊີວິດເຮົາໄວ້ເທິງພຣະອົງໄດ້ແນວໃດ? (ເບິ່ງ ຮີລາມັນ 3:27–29, 35 ແລະ ຫລັກແຫ່ງຄວາມເຊື່ອ 1:4).
ເຊື້ອເຊີນລູກໆຂອງທ່ານໃຫ້ສ້າງຫໍຄອຍໂດຍໃຊ້ທ່ອນໄມ້ ຫລື ວັດສະດຸອື່ນໆເທິງຮາກຖານທີ່ແຕກຕ່າງກັນ (ເຊັ່ນ ສຳລີ ຫລື ກ້ອນຫີນແປ). ຮາກຖານທີ່ແຂງແກ່ນ ເປັນເໝືອນດັ່ງພຣະເຢຊູຄຣິດແນວໃດ? ພວກເຂົາສາມາດຕື່ມທ່ອນໄມ້ໃສ່ໂຄງສ້າງນັ້ນສຳລັບແຕ່ລະແນວຄິດທີ່ພວກເຂົາແບ່ງປັນກ່ຽວກັບສິ່ງທີ່ພວກເຂົາສາມາດເຮັດໄດ້ເພື່ອຕິດຕາມພຣະອົງ.

ຮີລາມັນ 5:21–52

ພຣະວິນຍານບໍລິສຸດສື່ມດ້ວຍສຽງອັນແຜ່ວເບົາ.

ສຽງທີ່ມີບັນຍາຍໄວ້ໃນ ຮີລາມັນ 5:29–30, 45–47 ສິດສອນເຮົາເຖິງວິທີດຽວທີ່ພຣະວິນຍານບໍລິສຸດເວົ້າກັບເຮົາ. ເພື່ອຊ່ວຍໃຫ້ລູກໆຂອງທ່ານເຂົ້າໃຈຄວາມຈິງນີ້, ໃຫ້ຄິດທີ່ຈະອ່ານ “ບົດທີ 37: ນີໄຟ ແລະ ລີໄຮ ຢູ່ໃນຄຸກ” (ເລື່ອງພຣະຄຳພີມໍມອນ, 99–102). ເມື່ອທ່ານເວົ້າກ່ຽວກັບສຽງທີ່ຜູ້ຄົນໄດ້ຍິນ, ໃຫ້ເວົ້າດ້ວຍສຽງທີ່ອ່ອນໂຍນ. ເລົ່າເລື່ອງນີ້ຄືນປະມານສອງສາມເທື່ອ, ແລະ ເຊື້ອເຊີນໃຫ້ລູກໆເວົ້າຄ່ອຍໆກັບທ່ານ. ຊ່ວຍໃຫ້ພວກເຂົາຄິດເຖິງວິທີອື່ນໆທີ່ພຣະວິນຍານບໍລິສຸດສາມາດເວົ້າກັບເຮົາ. ເພື່ອທີ່ຈະເສີມແຮງໃຫ້ກັບຫລັກທຳນີ້, ພວກທ່ານສາມາດຮ້ອງເພງ “ພຣະວິນຍານພຣະເຈົ້າ” (ເພງສວດ ແລະ ເພງຂອງເດັກນ້ອຍ, 30) ນຳກັນ.

ຮີລາມັນ 5:20–52

ການກັບໃຈແທນທີ່ຄວາມມືດທາງວິນຍານດ້ວຍຄວາມສະຫວ່າງ.

ເພື່ອທີ່ຈະເນັ້ນເຖິງສິ່ງທີ່ ຮີລາມັນ 5:20–41 ສິດສອນກ່ຽວກັບຄວາມມືດ ແລະ ຄວາມສະຫວ່າງ, ໃຫ້ລອງອ່ານ ຫລື ສະຫລຸບຂໍ້ເຫລົ່ານີ້ໃນຄວາມມືດ, ໂດຍໃຊ້ພຽງແຕ່ໄຟສາຍເທົ່ານັ້ນເພື່ອຄວາມສະຫວ່າງ. ລູກໆຂອງທ່ານສາມາດຟັງສິ່ງທີ່ຜູ້ຄົນຈຳເປັນຕ້ອງເຮັດ ເພື່ອວ່າຄວາມມືດຈະຖືກກຳຈັດອອກໄປ. ຈາກນັ້ນກໍເປີດໄຟ, ແລະ ອ່ານ ຂໍ້ທີ 42–48 ນຳກັນ. ຂໍ້ເຫລົ່ານີ້ສິດສອນເຮົາຫຍັງແດ່ກ່ຽວກັບການກັບໃຈ?

ສຳລັບແນວຄິດເພີ່ມເຕີມ, ໃຫ້ເບິ່ງວາລະສານ Friend ສະບັບຂອງເດືອນນີ້.

ນີໄຟ ແລະ ລີໄຮ ຢູ່ໃນຄຸກ — ເຖິງແມ່ນຈະຢູ່ໃນຄຸກ, ນີໄຟ ແລະ ລີໄຮກໍໄດ້ຮັບການປົກປ້ອງໂດຍອຳນາດຂອງພຣະເຈົ້າ.

ໜ້າກິດຈະກຳ: ເຮົາສາມາດສ້າງຮາກຖານຂອງເຮົາເທິງພຣະເຢຊູຄຣິດໄດ້