“ວັນທີ 30 ເດືອນກັນຍາ–ວັນທີ 6 ເດືອນຕຸລາ: ‘ເຮົາຄືກົດ, ແລະ ຄວາມສະຫວ່າງ.’ 3 ນີໄຟ 12–16,” ຈົ່ງຕາມເຮົາມາ—ສຳລັບບ້ານ ແລະ ໂບດ: ພຣະຄຳພີມໍມອນ 2024 (2023)
“ວັນທີ 30 ເດືອນກັນຍາ–ວັນທີ 6 ເດືອນຕຸລາ. 3 ນີໄຟ 12–16,” ຈົ່ງຕາມເຮົາມາ—ສຳລັບບ້ານ ແລະ ໂບດ: 2024 (2023)
Third Nephi: These Twelve Whom I Have Chosen [ນີໄຟສະບັບທີສາມ: ສິບສອງຄົນນີ້ ຊຶ່ງເຮົາໄດ້ເລືອກ], ໂດຍ ແກຣີ ແອວ ແຄບ
ວັນທີ 30 ເດືອນກັນຍາ–ວັນທີ 6 ເດືອນຕຸລາ: “ເຮົາຄືກົດ, ແລະ ຄວາມສະຫວ່າງ”
3 ນີໄຟ 12–16
ເຊັ່ນດຽວກັບສານຸສິດຂອງພຣະເຢຊູ ທີ່ໄດ້ເຕົ້າໂຮມກັນເພື່ອຟັງຄຳເທດສະໜາຢູ່ເນີນພູໃນແຂວງຄາລີເລ, ຜູ້ຄົນທີ່ເຕົ້າໂຮມກັນຢູ່ທີ່ພຣະວິຫານໃນເມືອງອຸດົມສົມບູນ ໄດ້ດຳລົງຊີວິດຕາມກົດຂອງໂມເຊ. ພວກເຂົາໄດ້ເຮັດຕາມກົດນັ້ນ ເພາະມັນຊີ້ນຳຈິດວິນຍານຂອງພວກເຂົາໃຫ້ໄປຫາພຣະຄຣິດ (ເບິ່ງ ຢາໂຄບ 4:5), ແລະ ບັດນີ້ພຣະຄຣິດໄດ້ມາຢືນຢູ່ຕໍ່ໜ້າພວກເຂົາ, ປະກາດເຖິງກົດທີ່ສູງກວ່າ. ແຕ່ ແມ່ນແຕ່ຜູ້ຄົນເຫລົ່ານັ້ນໃນພວກເຮົາຜູ້ທີ່ບໍ່ເຄີຍດຳລົງຊີວິດຕາມກົດຂອງໂມເຊ ກໍສາມາດຮັບຮູ້ວ່າ ມາດຕະຖານທີ່ພຣະເຢຊູໄດ້ຕັ້ງໄວ້ສຳລັບສານຸສິດຂອງພຣະອົງ ແມ່ນກົດທີ່ສູງ. “ເຮົາຈຶ່ງຢາກໃຫ້ເຈົ້າດີພ້ອມ,” ພຣະອົງໄດ້ປະກາດ (3 ນີໄຟ 12:48). ຖ້າເລື່ອງນີ້ເຮັດໃຫ້ທ່ານຮູ້ສຶກບໍ່ພຽບພ້ອມ, ໃຫ້ຈື່ໄວ້ວ່າພຣະເຢຊູໄດ້ກ່າວອີກວ່າ, “ຄົນຍາກຈົນທາງວິນຍານທີ່ມາຫາເຮົາຍ່ອມເປັນສຸກ, ເພາະວ່າອານາຈັກສະຫວັນຈະເປັນຂອງຜູ້ນັ້ນ” (3 ນີໄຟ 12:3). ກົດທີ່ສູງກວ່າແມ່ນຄຳເຊື້ອເຊີນ—ວິທີໜຶ່ງອີກຂອງການກ່າວວ່າ “ຈົ່ງມາຫາເຮົາ ແລະ ເຈົ້າຈະລອດ” (3 ນີໄຟ 12:20). ເຊັ່ນດຽວກັບກົດຂອງໂມເຊ, ກົດນີ້ຊີ້ນຳເຮົາໃຫ້ໄປຫາພຣະຄຣິດ—ພຣະອົງດຽວເທົ່ານັ້ນທີ່ສາມາດຊ່ວຍເຮົາໃຫ້ລອດ ແລະ ໃຫ້ດີພ້ອມທຸກຢ່າງ. “ຈົ່ງເບິ່ງ,” ພຣະອົງໄດ້ກ່າວ, “ເຮົາຄືກົດ, ແລະ ຄວາມສະຫວ່າງ. ຈົ່ງເບິ່ງທີ່ເຮົາ, ແລະ ອົດທົນຈົນເຖິງທີ່ສຸດ, ແລະ ເຈົ້າຈະມີຊີວິດ” (3 ນີໄຟ 15:9).
ແນວຄິດສຳລັບການຮຽນຮູ້ຢູ່ທີ່ບ້ານ ແລະ ຢູ່ທີ່ໂບດ
ເຮົາສາມາດເປັນສານຸສິດທີ່ແທ້ຈິງຂອງພຣະເຢຊູຄຣິດໄດ້.
ຕໍ່ໄປນີ້ແມ່ນວິທີໜຶ່ງທີ່ຈະສຶກສາ ແລະ ນຳໃຊ້ສິ່ງທີ່ພຣະຜູ້ຊ່ວຍໃຫ້ລອດໄດ້ສິດສອນໃນ 3 ນີໄຟ 12–14: ໃຫ້ເລືອກເອົາຂໍ້ຕ່າງໆກຸ່ມໜຶ່ງ, ແລະ ໃຫ້ເບິ່ງວ່າທ່ານຈະສາມາດສະຫລຸບຂໍ້ເຫລົ່ານັ້ນ ໃນປະໂຫຍກດຽວໄດ້ຫລືບໍ່ ທີ່ເລີ່ມຕົ້ນດ້ວຍຄຳວ່າ “ສານຸສິດທີ່ແທ້ຈິງຂອງພຣະເຢຊູຄຣິດ …” ຍົກຕົວຢ່າງ, ຄຳສະຫລຸບໜຶ່ງຂອງ 3 ນີໄຟ 13:1-8 ອາດເປັນ “ສານຸສິດທີ່ແທ້ຈິງຂອງພຣະເຢຊູຄຣິດ ບໍ່ສະແຫວງຫາຄຳຍ້ອງຍໍສັນລະເສີນຈາກສາທາລະນະຊົນສຳລັບການເຮັດຄວາມດີ.” ໃຫ້ລອງໃຊ້ກັບຂໍ້ເຫລົ່ານີ້:
ຫລັງຈາກອ່ານຂໍ້ເຫລົ່ານີ້ແລ້ວ, ທ່ານຮູ້ສຶກໄດ້ຮັບການດົນໃຈໃຫ້ເຮັດຫຍັງແດ່ ເພື່ອຕິດຕາມພຣະເຢຊູຄຣິດ?
ພຣະບັນຍັດໃນ 3 ນີໄຟ 12:48 ອາດເບິ່ງຄືວ່າລົ້ນເຫລືອ—ແມ່ນແຕ່ເປັນໄປບໍ່ໄດ້. ທ່ານຮຽນຮູ້ຫຍັງແດ່ຈາກຂ່າວສານຂອງແອວເດີ ແຈັບຟະຣີ ອາ ຮໍແລນ “Be Ye Therefore Perfect—Eventually” (Liahona, Nov. 2017, 40–42) ທີ່ຊ່ວຍໃຫ້ທ່ານເຂົ້າໃຈພຣະຄຳຂອງພຣະຜູ້ຊ່ວຍໃຫ້ລອດຢູ່ໃນຂໍ້ນີ້? ອີງຕາມ ໂມໂຣໄນ 10:32–33, ແມ່ນຫຍັງທີ່ເຮັດໃຫ້ເປັນໄປໄດ້ທີ່ຈະເປັນຄົນດີພ້ອມເໝືອນດັ່ງພຣະຜູ້ຊ່ວຍໃຫ້ລອດ?
ເບິ່ງ Dallin H. Oaks, “The Challenge to Become,” Ensign, Nov. 2000, 32–34; Gospel Topics, “Become like Jesus Christ,” ຫ້ອງສະໝຸດພຣະກິດຕິຄຸນ; “ພຣະຜູ້ໄຖ່ແຫ່ງອິດສະຣາເອນ,” ເພງສວດ ແລະ ເພງຂອງເດັກນ້ອຍ, 5; “Jesus Christ Teaches How to Live the Higher Law” (ວິດີໂອ), ຫ້ອງສະໝຸດພຣະກິດຕິຄຸນ ນຳອີກ.
ໃຊ້ບົດຮຽນທີ່ໃຊ້ສິ່ງຂອງ. ພຣະຜູ້ຊ່ວຍໃຫ້ລອດໄດ້ສິດສອນຄວາມຈິງທີ່ເລິກເຊິ່ງ ໂດຍການອ້າງເຖິງສິ່ງຂອງທີ່ຄຸ້ນເຄີຍ. ທ່ານສາມາດເຮັດບາງສິ່ງທີ່ຄ້າຍຄືກັນ ຂະນະທີ່ທ່ານອ່ານ ຫລື ສຶກສາກ່ຽວກັບ 3 ນີໄຟ 12. ການເບິ່ງ ຫລື ຖືເກືອ, ທຽນໄຂ, ຫລື ເສື້ອຄຸມ ສາມາດສົ່ງເສີມການສົນທະນາກ່ຽວກັບຄວາມຈິງນິລັນດອນທີ່ພຣະຜູ້ຊ່ວຍໃຫ້ລອດໄດ້ສິດສອນ.
3 ນີໄຟ 12:1–2; 15:23–24; 16:1–6
ຜູ້ທີ່ເຊື່ອປາດສະຈາກການໄດ້ເຫັນຍ່ອມເປັນສຸກ.
ມີໜ້ອຍຄົນທີ່ສຸດໃນບັນດາລູກຂອງພຣະເຈົ້າ ທີ່ເຄີຍເຫັນພຣະຜູ້ຊ່ວຍໃຫ້ລອດ ແລະ ໄດ້ຍິນສຸລະສຽງຂອງພຣະອົງ, ຄືກັນກັບຜູ້ຄົນຢູ່ເມືອງອຸດົມສົມບູນໄດ້ເຫັນ ແລະ ໄດ້ຍິນ. ພວກເຮົາສ່ວນຫລາຍເປັນເໝືອນດັ່ງຜູ້ຄົນທີ່ມີບັນຍາຍ ຢູ່ໃນ 3 ນີໄຟ 12:2; 15:23; ແລະ 16:4–6. ມີຄຳສັນຍາໃດແດ່ທີ່ໄດ້ເຮັດໄວ້ກັບຜູ້ຄົນເຊັ່ນນັ້ນ ຢູ່ໃນຂໍ້ເຫລົ່ານີ້? ຄຳສັນຍາເຫລົ່ານີ້ໄດ້ເກີດເປັນຈິງໃນຊີວິດຂອງທ່ານແນວໃດ?
ເບິ່ງ ໂຢຮັນ 20:26–29; 2 ນີໄຟ 26:12–13; ແອວມາ 32:16–18 ນຳອີກ.
3 ນີໄຟ 12:21–30; 13:1–8, 16–18; 14:21–23
ເຮົາສາມາດພະຍາຍາມຊຳລະຄວາມປາດຖະໜາໃນໃຈຂອງເຮົາໃຫ້ສະອາດ.
ຫົວຂໍ້ໜຶ່ງທີ່ທ່ານອາດສັງເກດເຫັນຢູ່ໃນບົດເຫລົ່ານີ້ ແມ່ນຄຳເຊື້ອເຊີນຂອງພຣະຜູ້ຊ່ວຍໃຫ້ລອດ ໃຫ້ດຳລົງຊີວິດຕາມກົດທີ່ສູງກວ່າ—ໃຫ້ເປັນຄົນຊອບທຳ ບໍ່ແມ່ນພຽງແຕ່ໃນການກະທຳຂອງເຮົາເທົ່ານັ້ນ ແຕ່ໃນໃຈຂອງເຮົາເຊັ່ນກັນ. ໃຫ້ຊອກຫາຫົວຂໍ້ນີ້ ຕອນທີ່ພຣະຜູ້ຊ່ວຍໃຫ້ລອດກ່າວກ່ຽວກັບການຂັດແຍ້ງ (3 ນີໄຟ 12:21–26), ການຜິດສິນທຳ (3 ນີໄຟ 12:27–30), ການອະທິຖານ (3 ນີໄຟ 13:5–8), ແລະ ການຖືສິນອົດເຂົ້າ (3 ນີໄຟ 13:16–18). ມີຕົວຢ່າງອື່ນອີກໃດແດ່ທີ່ທ່ານສາມາດພົບເຫັນ? ທ່ານສາມາດເຮັດສິ່ງໃດໄດ້ແດ່ ເພື່ອຊຳລະຄວາມປາດຖະໜາໃນໃຈຂອງທ່ານ?
ພຣະບິດາເທິງສະຫວັນຈະປະທານສິ່ງທີ່ດີໃຫ້ເຮົາ ເມື່ອເຮົາໝັ່ນຂໍ, ໝັ່ນຊອກ, ແລະ ໝັ່ນເຄາະ.
ຂະນະທີ່ທ່ານອ່ານຄຳເຊື້ອເຊີນຂອງພຣະຜູ້ຊ່ວຍໃຫ້ລອດ ຢູ່ໃນ 3 ນີໄຟ 14:7–11 ມີການຂໍ, ການຊອກ, ແລະ ການເຄາະ, ການໄຕ່ຕອງ “ສິ່ງທີ່ດີ” ອັນໃດແດ່ທີ່ພຣະອົງຢາກໃຫ້ທ່ານທູນຂໍ. ຂໍ້ພຣະຄຳພີເພີ່ມເຕີມດັ່ງຕໍ່ໄປນີ້ ສາມາດຊ່ວຍທ່ານໃຫ້ເຂົ້າໃຈເຖິງວິທີທີ່ຈະຂໍ, ຊອກ, ແລະ ເຄາະ. ຂໍ້ພຣະຄຳພີເຫລົ່ານີ້ອາດຊ່ວຍອະທິບາຍເຫດຜົນທີ່ຄຳອະທິຖານບາງຢ່າງ ບໍ່ໄດ້ຮັບຄຳຕອບໃນວິທີທີ່ທ່ານຄາດໄວ້: ເອຊາຢາ 55:8–9; ຮີລາມັນ 10:4–5; ໂມໂຣໄນ 7:26–27, 33, 37; ແລະ ຄຳສອນ ແລະ ພັນທະສັນຍາ 9:7–9; 88:64. ຂໍ້ພຣະຄຳພີເຫລົ່ານີ້ ມີຜົນກະທົບຕໍ່ວິທີທີ່ທ່ານຂໍ, ຊອກ, ແລະ ເຄາະແນວໃດ?
ເບິ່ງ Milton Camargo, “Ask, Seek, and Knock,” Liahona, Nov. 2020, 106–8 ນຳອີກ.
ສຳລັບແນວຄິດເພີ່ມເຕີມ, ໃຫ້ເບິ່ງວາລະສານ Liahona ແລະ For the Strength of Youth ສະບັບຂອງເດືອນນີ້.
ແນວຄິດສຳລັບການສິດສອນເດັກນ້ອຍ
ເຮົາສາມາດເປັນຕົວຢ່າງທີ່ດີໄດ້ ໂດຍການຕິດຕາມພຣະເຢຊູ.
-
ບາງເທື່ອເດັກນ້ອຍອາດບໍ່ຮູ້ວ່າ ຕົວຢ່າງຂອງພວກເຂົາສາມາດເປັນພອນໃຫ້ແກ່ຄົນອື່ນຫລາຍສໍ່າໃດ. ໃຊ້ 3 ນີໄຟ 12:14–16 ເພື່ອຊຸກຍູ້ພວກເຂົາໃຫ້ແສງສະຫວ່າງຂອງພວກເຂົາສ່ອງແຈ້ງ. ຍົກຕົວຢ່າງ, ເມື່ອທ່ານອ່ານຄຳວ່າ “ເຈົ້າ” ຫລື “ຂອງເຈົ້າ” ໃນຂໍ້ເຫລົ່ານີ້, ຂໍໃຫ້ລູກໆຂອງທ່ານຊີ້ໃສ່ຕົວເອງ. ບອກລູກໆກ່ຽວກັບແສງສະຫວ່າງທີ່ທ່ານເຫັນໃນຕົວພວກເຂົາ ເມື່ອພວກເຂົາຕິດຕາມພຣະເຢຊູຄຣິດ ແລະ ວ່າມັນດົນໃຈທ່ານໃຫ້ຕິດຕາມພຣະອົງແນວໃດ. ພວກທ່ານກໍສາມາດຮ້ອງເພງທີ່ຊຸກຍູ້ໃຫ້ລູກໆສ່ອງແສງເໝືອນດັ່ງແສງສະຫວ່າງ, ເຊັ່ນ “ສອນເຮົາຍ່າງໃນແສງ” (ເພງສວດ ແລະ ເພງຂອງເດັກນ້ອຍ, 72) ນຳອີກ.
-
ເພື່ອທີ່ຈະຊຸກຍູ້ລູກໆຂອງທ່ານບໍ່ໃຫ້ເຊື່ອງແສງສະຫວ່າງຂອງພວກເຂົາ (ເບິ່ງ 3 ນີໄຟ 12:15), ໃຫ້ພວກເຂົາປ່ຽນຜຽນກັນເຊື່ອງ ຫລື ກວມຕະກຽງ ຫລື ແສງອື່ນໆ. ພວກເຂົາສາມາດເປີດແສງ ແຕ່່ລະເທື່ອທີ່ພວກເຂົາບອກສິ່ງເຖິງທີ່ພວກເຂົາສາມາດເຮັດໄດ້ ເພື່ອທີ່ຈະເປັນຕົວຢ່າງທີ່ດີໃຫ້ຄົນອື່ນ.
“ຈົ່ງຮິບໂຮມຊັບສົມບັດສຳລັບຕົນໄວ້ໃນສະຫວັນ.”
-
ການອ່ານຂໍ້ເຫລົ່ານີ້ສາມາດກະຕຸ້ນການສົນທະນາກ່ຽວກັບສິ່ງທີ່ເຮົາຖືວ່າມີຄ່າ. ບາງທີທ່ານກໍສາມາດນຳພາລູກໆຂອງທ່ານໃນການຊອກຫາສົມບັດ ທີ່ເຕືອນພວກເຂົາເຖິງຊັບສົມບັດທີ່ມີຄຸນຄ່ານິລັນດອນ.
ພຣະບິດາເທິງສະຫວັນຕອບຄຳອະທິຖານຂອງເຮົາ.
-
ຂະນະທີ່ທ່ານອ່ານ 3 ນີໄຟ 14:7, ລູກໆຂອງທ່ານສາມາດເຮັດການສະແດງທີ່ເປັນຕົວແທນເຖິງແຕ່ລະຄຳເຊື້ອເຊີນຂອງພຣະຜູ້ຊ່ວຍໃຫ້ລອດໃນຂໍ້ນີ້. ຍົກຕົວຢ່າງ, ພວກເຂົາສາມາດຍົກມືຂຶ້ນ (ຖາມ), ເອົາມືເຮັດກ້ອງສ່ອງທາງໄກ (ຊອກ), ຫລື ທຳທ່າເຄາະປະຕູ (ເຄາະ). ຊ່ວຍໃຫ້ລູກໆຂອງທ່ານຄິດເຖິງສິ່ງທີ່ພວກເຂົາສາມາດເວົ້າ ແລະ ຂໍ ໃນຄຳອະທິຖານຂອງພວກເຂົາ.
-
ລູກໆຂອງທ່ານອາດມັກຫລິ້ນເກມ ຊຶ່ງພວກເຂົາຂໍບາງສິ່ງ ແລະ ໄດ້ຮັບບາງສິ່ງທີ່ແຕກຕ່າງຈາກທີ່ຂໍ. ໃນ 3 ນີໄຟ 14:7–11, ພຣະຜູ້ຊ່ວຍໃຫ້ລອດປະສົງໃຫ້ເຮົາຮູ້ຈັກຫຍັງກ່ຽວກັບພຣະບິດາເທິງສະຫວັນຂອງເຮົາ?
ພຣະຜູ້ຊ່ວຍໃຫ້ລອດປະສົງໃຫ້ເຮົາໄດ້ຍິນ ແລະ ເຮັດສິ່ງທີ່ພຣະອົງສິດສອນ.
-
ໃຫ້ຄິດຫາວິທີທີ່ທ່ານຈະສາມາດຊ່ວຍໃຫ້ລູກໆຂອງທ່ານນຶກພາບຄຳອຸປະມາ ຢູ່ໃນຂໍ້ເຫລົ່ານີ້. ບາງທີ ພວກເຂົາກໍສາມາດແຕ້ມຮູບ, ເຮັດການສະແດງ, ຫລື ສ້າງສິ່ງຕ່າງໆໃສ່ເທິງຮາກຖານທີ່ແຂງແກ່ນ ແລະ ເທິງຮາກຖານທີ່ເປັນດິນຊາຍ. ພວກເຂົາຍັງສາມາດໃສ່ຊື່ຂອງພວກເຂົາແທນຄຳວ່າ “ຄົນສະຫລາດ” ຂະນະທີ່ພວກເຂົາອ່ານ 3 ນີໄຟ 14:24–27 ຫລື ຮ້ອງເພງ “The Wise Man and the Foolish Man” (Children’s Songbook, 281). ຫລື ພວກເຂົາສາມາດຢືນຂຶ້ນ ທຸກເທື່ອທີ່ພວກເຂົາໄດ້ຍິນຄຳວ່າ “ປະຕິບັດຕາມ” ໃນ 3 ນີໄຟ 14:21–27 ແລະ 15:1.
-
ນີ້ແມ່ນບົດຮຽນທີ່ໃຊ້ສິ່ງຂອງທີ່ທ່ານສາມາດລອງໄດ້: ຂໍໃຫ້ລູກໆຂອງທ່ານຈິນຕະນາການວ່າ ຂາຂ້າງໜຶ່ງຂອງພວກເຂົາເປັນຕົວແທນເຖິງການໄດ້ຍິນພຣະຄຳຂອງພຣະຜູ້ຊ່ວຍໃຫ້ລອດ ແລະ ອີກຂ້າງໜຶ່ງເປັນຕົວແທນເຖິງການເຮັດສິ່ງທີ່ພຣະຜູ້ຊ່ວຍໃຫ້ລອດໄດ້ສິດສອນ. ເຊື້ອເຊີນໃຫ້ລູກໆຂອງທ່ານພະຍາຍາມຊົງຕົວດ້ວຍຂາທີ່ “ໄດ້ຍິນ” ເທົ່ານັ້ນ. ຈະມີຫຍັງເກີດຂຶ້ນ ຖ້າລົມແຮງພັດຜ່ານຫ້ອງໄປ? ແລ້ວທ່ານ ແລະ ລູກໆຂອງທ່ານກໍສາມາດຊອກຫາສິ່ງທີ່ສະເພາະເຈາະຈົງທີ່ພຣະຜູ້ຊ່ວຍໃຫ້ລອດໄດ້ສິດສອນພວກເຮົາໃຫ້ເຮັດ: ເບິ່ງ 3 ນີໄຟ 12:3–12, 21–26; 13:5–8.
ສຳລັບແນວຄິດເພີ່ມເຕີມ, ໃຫ້ເບິ່ງວາລະສານ Friend ສະບັບຂອງເດືອນນີ້.
The Savior’s Visit to the People in America [ການຢ້ຽມຢາມຂອງພຣະຜູ້ຊ່ວຍໃຫ້ລອດຕໍ່ຜູ້ຄົນຢູ່ອາເມຣິກາ], ໂດຍ ກະເລັນ ແອັສ ຮອບຄິນສັນ.