Okitobwa 21–27: “Akea Riki te Botanaomata n ai Aroia ae a Kukurei Riki”

3 Nibwaai 27–4 Nibwaai

Ana anga reirei Iesu Kristo a raka riki tamaroaia nakon rabakau aika ko na iangoi inanom. A nanonaki bwa a na kaungai nanora n riki n ai Arona. Te boki ae te ka 4 Nibwaai e kaotia bwa e bwanin ana euangkerio te Tia Kamaiu ni kona ni bitiia aomata. N rimwiaki ma ana mwakuri n ibuobuoki Iesu, itabararaa inanon tienture imarenaia Nibwaite ao Reimwanaite a roko n tokiia. Uoua baronga n aomata aika a kinaaki ibukin aia kaiangatoa ao aia kamoamoa a “katiteuanaaki, natin Kristo” (4 Nibwaai 1:17), ao a moanna n iai te “katiteboaki imarenaia” (4 Nibwaai 1:3). Ana “tangira te Atua … are e maeka inanoia aomata,” ao “akea riki te botanaomata n ai aroia ae a kukurei riki ibuakoia aomata ni kabane ake a tia ni karikaki ni bain te Atua” (4 Nibwaai 1:15–16). Aio aron ana reirei te Tia Kamaiu ni bitiia Nibwaite ao Reimwanaite. A kanga ni bitiko?

Iango ibukin Reiakinana n te Mweenga ao n te Taromauri

3 Nibwaai 27:1–12

Ana Ekaretia Iesu Kristo e aranaki n Arana.

Ngke ana reirei te Tia Kamaiu a moanna ni katea Ana Ekaretia ni kabutaa te aba, e rio te titiraki, irouia tabeman, e taraa n ae te iango ae aki kakawaki—tera raoi aran te Ekaretia? (taraa 3 Nibwaai 27:1–3). Tera ae ko reiakinna ibukin kakawakin te ara aei man ana kaeka te Tia Kamaiu n 3 Nibwaai 27:4–12?

Te Tia Kamaiu e kaoka aran Ana Ekaretia ni boong aikai inanon Reirei ao Berita aika Tabu 115:4. Iangoi taeka n tatabeua nako n te ara anne. A kanga taeka aikai ni buokiira n ataia bwa antai ngaira, tera ae ti kakoaua, ao ti na kanga ni mwakuriia?

Taraa naba Russell M. Nelson, “The Correct Name of the Church,” Riaona, Nob. 2018, 87–89; “Jesus Christ Declares the Name of His Church and His Doctrine” (video), Gospel Library.

3 Nibwaai 27:10–22

Ana Ekaretia Iesu Kristo e kateaki iaon Ana eungkerio.

Imwiin are e kabwarabwaraa bwa Ana Ekaretia e riai ni “kateaki iaon [Ana] euangkerio” (3 Nibwaai 27:10), te Tia Kamaiu e kabwarabwara bwa tera Ana euangkerio. Ko na kanga ni korei ni kauarerekei baike E taekin n 3 Nibwaai 27:13–22? Ni kaeti ma ae nanonaki n aei, tera nanona ibukin te Ekaretia—ao ibukim—bwa e na kateaki iaon Ana euangkerio?

Korei mwiin baike ko reiakin. Ataia bwa tera ae reireiniia iai Ana reirei Iesu n 3 Nibwaai 27:23–26. Bukin tera e kakawaki kawakinan te rekooti ibukin taneiai n te maiu n tamnei? Tera ae kaunga nanom bwa kona koreia ngkai ko kamatebwaia ana mwakuri te Tia Kamaiu n 3 Nibwaai?

3 Nibwaai 28:1–11

“Teraa te bwai ae kam tangiria mai irou?”

Tera ae ko na taekinna ngkana e titirakiniko te Tia Kamaiu, n aron are E titirakiniia Ana reirei, “Tera te bwai ae kam tangiria mai irou?” (3 Nibwaai 28:1). Iangoa te titiraki aei ngkana ko wareka 3 Nephi 28:1–11. Tera ae ko reiakinna ibukin te bwai ae a tangiria n nanoia ana reirei Iesu man aia kaeka nakon Ana titiraki? E kanga ni bitaki baike e tangiria nanom ngkai ko maeuakina ana euangkerio Iesu Kristo?

N taainako ao anene n taraomauri a kaoti baike a nako mai inanom—“More Holiness Give Me” bon te katooto ae tamaroa (Anene n taromauri, nambwa. 131). Iangoia kakaea te anene n taromauri are e na kaoti baike e tangiria nanom.

3 Nibwaai 29–30

Ana Boki Moomon bon te kanikinaa ae ana mwakuri te Atua n bong aikai a kakoroaki nanoia.

Iangoi kanikinaa are e na kaotia nakoim bwa iai te bwai ae na riki. N aron te katooto, ko kanga n ataia bwa e nang bwaka te karau ke e bitaki kanoan te tai? Ni kaineti 3 Nibwaai 29:1–3, ko kanga n ataa ana mwakuri te Atua ni ikotakiia Ana aomata “bwa e nang moanna ni koro bukina”? (taraa naba 3 Nibwaai 21:1–7). Ko kona naba n nooria, inanon 3 Nibwaai 29:4–9, bwaai ake a na kakewei aomata inanon ara bong. E kanga ana Boki Moomon ni kakorakora am onimaki ni bwaai aikai?

4 Nibwaai 1:1–18

Iriiran ana reirei Iesu Kriso e kairiko nakon te katiteuanaaki ao te kukurei.

Te aekakira aron te maiu n ririki inanon ririki mwiin rokon te Tia Kamaiu? Ngkai ko kamatebwaia 4 Nibwaai 1:1–18, iangoia karinani kakabwaia ake a reke irouia aomata. Ko kona naba ni mwaakena ke n atai rinerine ake a karaoi are e ibuobuoki nakon te maiu ae kakabwaiaki aei. Tera ae e reireniia Iesu are e kaunga aia rinerine aika a raraoi? Aikai tabeua katooto, ma ko kona ni kunei riki tabeua: 3 Nibwaai 11:28–30; 12:8–9, 21–24, 40–44; 13:19–21, 28–33; 14:12; 18:22–25.

Iangoa te bwai ae ko kona ni karaoia ni buokiia am utu, uoote, ke te kaomiuniti bwa a na maeka ni katiteuanaaki ma te kukure. Tera ae ko kona ni karaoia n ibuobuoki n tokanikai iaon te kakaokoroaki ao n riki raoi n tii “teuana” ma natin te Atua tabeman? Tera ana anga reirei Iesu Kristo ae a buokiko ni kakoroa nanon te kouru aei?

Ae kananokawaki, ana botanaomata Tion are e kabwarabwaraki n 4 Nibwaain tokin te tai ao a bwaka inanon te buakaka. Ngkana ko wareka 4 Nibwaai 1:19–49, tarai anua ao katei are a katoka kukureia ao katiteunaakia. Tera ae kona karaoia bwa ko na totokoi katei ma anua aikai?

Taraa naba Mote 7:18; D. Todd Christofferson, “Sustainable Societies,” Riiaona, Nob. 2020, 32–35; Reyna I. Aburto, “With One Accord,” Riaona, Meei 2018, 78–80; Gospel Topics, “N riki bwa kaain ana Ekaretia Iesu Kristo,” Gospel Library.

Ibukin iango riki tabeua, taraa te beeba ni kaongora n te namwakain aio n te Riaona ao Ibukin Kakorakoraia Kairake maekatiin.

Iango ibukin Reiakinaia Ataei

3 Nibwaai 27:3–8

Ngai bon kaain Ana Ekaretia Iesu Kristo.

• Ni kabwarabwara kakawakin aran ana Ekaretia Iesu, marooro ma am ataei ibukin araia. Bukin tera a kakaawaki arara? Ngkanne kam kona ni wareka 3 Nephi 27:3 ni kabane, ni kakaei titiraki ake a karekei ana reirei Iesu. Buokiia am ataei ni kakaea te reke inanon 3 Nibwaai 27:5–8. Bukin tera ngkai e kakaawaki aran te Ekaretia?

• Ko kona ni buokiia am ataei n iangoia kurubu aika a kakaokoro ake a mena inanona, n aron te utu ke te kiraati n te Moanrinan. Tuangiia bwa tera ae a tangiria ni kainakin kurubu akanne. Ngkanne kam konaa n anenea “The Church of Jesus Christ” (Aia Boki n Anene Ataei, 77) ni kabane ao maroroakinna bukin tera ko kakaitau ngkai ko kaaina ana Ekaretia te Tia Kamaiu.

3 Nibwaai 27:13–16

Ana Ekaretia Iesu Kristo e kateaki iaon Ana eungkerio.

• Te Tia Kamaiu e taekinna ni kakimototoa Ana eungkerio inanon 3 Nibwaai 27. Ko kona ni kabwarabwara nakoia am ataei bwa te taeka ae te euangkerio nanona “te rongorongo ae kakukurei.” Tera te rongorongo ae kakukurei ae ti kunea inanon 3 Nibwaai 27:13–16? Kabongana te iteraniba ibukin te waaki ni kakukurei n te wiiki aei n reiakinna bwa ana Ekaretia te Tia Kamaiu e kateaki iaon Ana euangkerio.

3 Nibwaai 27:30–31

Tamara are i Karawa e kimwareirei ngkana a okiria Natina.

• Iangoia karaoa te takakaro ike e karaba temanna ao ake tabeman a kataia ni kakaea teuanne ke neienne. Aei e kona ni kaira aron maroroakinan te kimwareirei are ti namakinna ngkana temanna are e bua e a manga reke. Imwiin warekan 3 Nibwaai 27:30–31, ko kona ni maroroakinna bwa ko na kanga ni buoka temanna ma temanna ni kaaniaki riki ma Tamara are i Karawa bwa e aonga n ae “akea … ae bua.”

4 Nibwaai

Iriiran Iesu Kristo e anganai te kimwareirei.

• Ni buokiia am ataei n reiakina taekan kukureia aomata ake a kabwarabwaraaki n 4 Nibwaai, ko kona ni kaota nakoia tamneia aomata aika a kukurei. Ngkanne, ngkai kam kaai ni warekii kiibu 2–3 ao 15–17 (ke “Chapter 48: Peace in America,” Karaki man ana Boki Moomon, 136–37), a kona ni kotea te tamnei ngkana ko a roko n rongorongon te bwai are e uota te kakukurei.

• Ni buokiia ataei bwa a na karaoi bwaai ake a reireinaki inanon 4 Nibwaai 1:15–16, kaotii nakoia aaro ake a mena inanona ngke aomata a un imarenaia. Kaoiia bwa a na katea kain are aekakira aron te kangaanga ngkana ti karekea “tangiran te Atua” inanora.

Ibukin iango riki tabeua, taraa te beeba ni kaongora n te namwakaina aio n te Rao maekatiin.

Kristo ma Teniman Reirei ake Nibwaite,, iroun Gary L. Kapp.