Moomon ngke e Kauarerekei Kanoan taiani Bwaatua, iroun Tom Lovell

Okitobwa 28–Nobembwa 3: “I Tangiria bwa N na Kona ni Kairoroia ni Kabane … bwa a na Rairi nanoia”

Moomon 1–6

Moomon e aki korei mwiin “bwaninin rongorongon te bwai ae “e karika te aro ae aki tamaroa are e nooria ibuakoia Nibwaite (Moomon 2:18; 5:8). Ma te bwai are e a tia ni korea mwiina n Moomon 1–6 e bon tau bwa e na kauringiira bwa a kanga aomata aika a raoiroi ni kona ni bwaka. Ngkai e a rangi ni korakora te buakaka, e ataaki raoi bwa e a moanna Moomon ni kua ao ni bwarannano. E ngae n anne ni kabane bwaai ake e noori ao n rinanoi, e aki kona ni bua ana onimaki n ana mwakuri n akoi te Atua ae korakora ao ana koaua ae te rairannano bon te kawai ni karekeana. Ao e ngae ngke ana aomata Moomon a totokoa ana kakao ni bubuti bwa a na rairi nanoia, e ataia bwa a rawata ana aomata aika e kona n anai nanoia. “Ma ngaia ae,” e katanoata, “I koroia nakon tabotabon aonaaba.” N taekana teuana, e koroboki nakoim (taraa Moomon 3:17–20). Ao ana rongorongo nakoim, n te bong aei, ti tebo ma te rongorongo ae e na kona n tia ni kamaiuiia Nibwaite n aia tai: “Onimakina ana euangkerio Iesu Kristo. … Te rairannano ao te katauraoi n tei imatan ana kaintoka ni motikitaeka-Kristo” (Moomon 3:21–22).

Taraa naba “Mormon Preserves the Record to Bring the House of Israel to Christ” (video), Gospel Library.

Iango ibukin Reiakinana n te Mweenga ao n te Taromauri

Moomon 1–6

I kona n iriira Iesu Kristo n aki tabe ma te bwai are a karaoia aomata.

Man te tai are e a koro iai 10 ana ririki, e bon rangi ni kaokoro Moomon mairouia aomata ake a mena irarikina. Ngkai ko wareka Moomon 1–6, kakaei kawai ike ana onimaki Moomon iroun Iesu Kristo e karikia bwa e rangi n onoti ao n anganna tibwangana bwa e na beku ao ni kakabwaiaia aomata. Ko kona ni moanna man kiibu aikai:

Moomon 1:2–3, 13–17.Tera te kaokoro ae ko nooria imarenan Moomon ao ana aomata? Tera anuana ake irouna are e buokia bwa e na teimatoa ni korakora n te maiu n tamnei n te tai ae moan te kangaanga?

Moomon 2:18–19.Tera taeka aika e kabonganai Moomon ni kabwarabwara te aonaaba ae maeka iai? E kanga ni kateimatoa te kantaninga n aki tabe ma baika a riki irarikina?

Moomon 3:12.E kanga ana namakin Moomon ibukiia aomata ake a mena irarikina? Tera ae ko kona ni karaoia ni karikirakea te aeka n tangira ane irouna?

Tera tabeua riki kiibu n Moomon 1–6 are a kaota ana onimaki Moomon iroun Iesu Kristo? Tera tibwanga ake e anganaki ibukina ngkai e rineia bwa e na teimatoa ni kakaonimaki?

Iangoia kamatebwaia ana marooro Beretitenti Thomas S. Monson “Be an Example and a Light” (Riaona, Nob. 2015, 86–88), ni kakaea bukina bwa e aera ngkai e rangi ni kakawaki irouia taan iriira Iesu Kristo bwa a na rangi n terenako tarakiia ke n tei ni kaokoro. Ko na kanga ni kamota te tientienti n aron aikai? “ bon te banna ni katooto nakoiu ngke teuanne [ke neienne] . Aei e buokai bwa N na tangiria n .”

E kona n namakinna Moomon bwa ana katooto akea te bitaki ae reke ma ana aomata. Ngkana e reke am tai n taetae ma Moomon, tera ae ko na tuangnga n aron ae iai bitakim ae riki man ana katooto?

Taraa naba David A. Bednar, “Quick to Observe,” Ensign, Dec. 2006, 30–36, ke Riaona, Ritembwa. 2006, 14–20; “Something Different about Us: Example” (video), Gospel Library; Gospel Topics, “Living the Gospel of Jesus Christ,” Gospel Library.

Buokiia tabeman bwa a na tibwaua are a reiakinna. Ngkana aomata a tibwaua bwaai ake a reiakin, a kakorakora oin aia onimaki ao aia onimaki tabeman (taraa Reirei ao Berita aika Tabu 88:122). Kataia titirakiniia am utu ke kaain te kiraati tera taneiai ake a karekei ngkai a kamatabwaia ana taeka te Atua.

Buaka, iroun Jorge Cocco

Moomon 2:10–15

Te rawawata are E tangiria te Atua e kairai nakon Kristo ao te bitaki ae reitinako.

Ngke e noori nanokawakiia ana aomata Moomon, e kantaningaia bwa a na rairi nanoia. Ma “nanokawakia bon tiaki ibukin te rairannano” (Moomon 2:13)—bon tiaki te rawawata are e tangiria te Atua ma te nanokawaki n aonaaba. Ni mataata n aron te kaokoro, iangoia korei baike ko reiakin man Moomon 2:10–15 inanon te tiata n aron ae teuana aei:

Te rawawata are e tangiria te Atua	Te rawawata n aonaaba
Nakomai nakon Iesu (te kibu 14)	Taetaebuakaa te Atua (te kibu 14)

Ko na kanga n ataia ngkana rawawatam ngaia are e tangiria te atua ke n aonaaba? Ngkana ko namakina te rawawata n aonaaba, ko na kanga ni bitia nakon te nanokawaki n atua?

Taraa naba 2 I-Korinto 7:8–11; Michelle D. Craig, “Divine Discontent,” Liahona, Nob. 2018, 52–55.

Moomon 3:3, 9

“A bon aki ataia bwa bon te Uea are e a tia ni kamaiuia.”

E nooria Moomon bwa Nibwaite aki atai aanga ake a kakabwaiaaki iai iroun te Uea. Ngkana ko wareka Moomon 3:3, 9, ko na iangoia bwa ko kanga ni kinai ana kairoro te Atua ni maium. Tera kakabwaia aika a na reke ngkana ko kinai Ana kairoro? Tera tokin ke mwiin aki kan Kinakina? (taraa Momoon 2:26; Reirei ao Berita aika Tabu 59:21).

Taraa naba Henry B. Eyring, “O Remember, Remember,” Riaona, Nob. 2007, 66–69.

Moomon 5:8–24; 6:16–22

Iesu Kristo e tei n taakin baina bwa e na butimwaeai.

Ngkana ko namakina te bwarannano ibukin am bure, ana kabwarabwara Moomon ibukin te Tia Kamaiu ngke e tei “ma baina aika a tangaina ni butimwaiko” e kona ni karekea te kakoaua. Ngkai ko wareka Moomon 5:8–24 ao 6:16–22, tera ae ko reiakinna ibukin ana namakin Tamara are i Karawa ao Iesu Kristo ibukim, e ngae ngke ko bure? Ko kanga n tia n namakina Iesu Kristo ni karoko iroum ma baina aika a taakinaki? Tera ae ko namakina bwa ko kan karaoia?

Taraa naba “Mai Nakon Iesu,” Anene n Taromauri, nambwa. 117.

Iango ibukin Reiakinaia Ataei

Moomon 1:1–3; 2:1, 23–24; 3:1–3, 12, 17–22

N aron Moomon, I kona n iriira Iesu Kristo.

• Ibukina ngkai e bon rangi n ataei Moomon ngke e karikirakea ana onimaki iroun Kristo, e kona n riki bwa te anainano nakoia am ataei. Tao ko kona ni wareka Moomon 1:1–3 ao a kona ni kakauongo am ataei bwa te rorora Moomon ngke e anganaki ana mition ae onoti iroun Amaron. Ko kona naba ni buokiia bwa a na kakaei inanon kiibu anua ake e noori Amaron iroun Moomon. A kanga anua aikai ni buokiira n iriira Iesu Kristo?

  

  Moomon, 10 ana ririki,, iroun Scott M. Snow

• Ibukina bwa Moomon e iriira Iesu Kristo, e anganaki tibwangana bwa e na beku ao ni kakabwaia tabeman. Ko kona ni kaoiia am ataei bwa a na wareka teuana ke ae mwaiti riki man kiibu akana imwiina ao buokiia bwa a na tibwaua te bwai are a reiakinna ibukin Moomon Mormon 1:1–3; 2:1, 23–24; ao 3:1–3, 12, 20–22 (taraa naba “Chapter 49: Mormon and His Teachings,” Karaki man ana Boki Moomon, 138–42). E kanga n iriira Iesu Kristo? E kanga ana onimaki iroun Iesu Kristo ni buokia ke ni kakabwaiaia tabeman? E kanga ara onimaki ni buokiia aomata ake ti kinaia?

Moomon 2:8–15

Te rawawata are E tangiria te Atua e kairai nakon Kristo ao te bitaki ae reitinako.

• Tao ko kona ni karaoa te tiata n aron are inanon “Iango ibukin Reiakinana n te Mweenga ao n te Ekaretia” ni buokiia am ataei ni mataata n te kaokoro imarenan te rawawata n aonaaba ao te rawawata are e tangiria te Atua ngkai a wareka Moomon 2:8, 10–15. Kaoiia ataei bwa a na ukera Moomon 2:12 ni kakaea bukina bwa e aera te rairannano e konaa ni karika “nano[ra] … ni kukurei.” Ti na kanga ni kakoaua bwa te rawawata are ti namakinna ibukin ara bure e kairiira bwa ti na ukora ana ibuobuoki te Atua ni bitaki?

Moomon 3:3, 9

Tamara are i Karawa e anganai kakabwaia aika bati.

• Kaoiia am ataei bwa a na karinani ke ni (korea tamanein) tabeua bwaai ake a kakaitau iai bwa bon te kawai ae tamaroa ni buokiia n namakina te kakaitau ibukin te Atua. Imwiin are a tia ni karaoi rinanin bwaai, ko kona ni wareka Moomon 3:3, 9 ao ni kabwarabwara bwa Tamara are i Karawa e tia ni kakabwaiaia Nibwaite, ma aki te roko n ataia. Tera ae ti kona ni karaoia ni kaotia bwa ti kakaitau nakon Tamara are i Karawa ibukin kakabwaiakira?

Moomon 3:12

Tamara are i Karawa e tangirai bwa N na tangiriia aomata nako.

• E ngae ngke a buakaka tenaan Nibwaite, e bon aki te roko n toki tangirakiia iroun Moomon. Buokiia am ataei bwa a na kakaei taeka aika “tangiraki” ao “tangiria” inanon Moomon 3:12. Kam kona ni kaai n anenea te kuna ibukin tangiraia aomata, n aron “Jesus Said Love Everyone” (Aia Boki n Anene Ataei, 61), ngkai ko kaoti tamneia ataei ni katobibia te aonaaba. Kaota koauan ana tangira te Atua nakoia natina ni kabane.

Ibukin iango riki tabeua, taraa te beeba ni kaongora ibukin te namwakaina aei man te Rao maekatiin.

Ana Boki Moomon e koreaki “bwa kam na kakoaua ana euangkerio Iesu Kristo” (Moomon 3:21).