Moronaai e Koroboki iaon Bwatua Aika Koora,, iroun Dale Kilborn

Nobebmbwa 4-10: “I taetae Nakoimi n Aron ae Aongkoa Iai Ngkami”

Moomon 7–9

Moronaai e ataia bwa aekakira te namakin ngkana ti ngkoe n tei n te aonnaba ae mangaongao—riki imwiin maten tamana n te buaka ao Nibwaite a kamaunaaki. “Katukai n tii ngai,” e koroia. “Bon akea raoraou ke te tabo are N na nako iai” (Moomon 8:3, 5). A kona bwaai n taraa ni kabwaranano, ma Moronaai e kunea te kantaninga n ana koaua iroun Iesu Kristo ao ana atatai bwa “ana waaki te Uea aika akea tokiia a na bon waaki nako” (Moomon 8:22). Ao Moronaai e ataia bwa te tabe ae rangi ni kakawaki ma bukina aika akea tokiia aikanne a na karaoaki man ana Boki Moomon—te koroboki ae nanomwaaka ni katia, te koroboki are n te bong teuana e na uotiia aomata aika mwaiti “nakon ataakin Kristo” (Moomon 8:16; 9:36). Ana onimaki Moronaai ni berita aikai e anganna te konaa ni katanoata nakoia taan kairiiri n te boki aei, “I taetae nakoimi n aron ae aongkoa iai ngkami” ao “I ataia bwa a na reke au taeka iroumi” (Moomon 8:35; 9:30). Ngkai iai iroura ana taeka, ao ana mwakuri te Uea e waaki nako, ni mwakorona ibukina bwa Moomon ao Moronaai a teimatoa ni koaua nakon aia mition, e ngae ngke tii ngaiia.

Iango ibukin Reiakinana n te Mweenga ao n te Taromauri

Moomon 7

“Kakoaua Iesu Kristo” ao “taui ni kabane [Ana] euangkerio.”

Imwiin tiana ni korei ni kauarerekei rongorongoia ana aomata, Moomon e anga ana kabanea ni maroro ni Moomon 7. E aera ngkai n am iango e rinea te rongorongo aei? Tera n am iango nanon “taua ni kamatoa ana euangkerio Kristo”? (Moomon 7:8).

Taraa naba “I Believe in Christ,” Anene n Taromaurinambwa 134.

Moomon 7:8–10; 8:12–16; 9:31–37

E bon rangi ni bongana Ana Boki Moomon.

E titiraki Beretitenti Russell M. Nelson: “Ngkana ko anganaki taian taiman ao taian rubii ke ana Boki Moomon, e nga ae ko na rineia? Ni koauana, e nga ae kakawaki riki iroum?” (“Ana Boki Moomon: Tera Aron Maium Ngkana Akea?,” Riaona, Nob. 2017, 61).

Tera ae ko kunea inanon Moomon 7:8–10; 8:12–22; ao 9:31–37 ae kakorakora am atatai bwa e aera ana Boki Moomon e rangi ni bongana n ara bong? Bukin tera e kakawaki iroum? Ko kona ni kunei atatai aika a nano riki inanon 1 Nibwaai 13:38–41; 2 Nibwaai 3:11–12; ao Reirei ao Berita aika Tabu 33:16; 42:12–13.

Aia koroboki burabeti n Ana Boki Moomon a kaineti nakoira

Moomon 8:1–11

I kona ni kawakin tuua e ngae ngke tabeman aaki kona.

N taai tabetai kona namakina te maroaa n am konabwai ni kawakin tuua. Tera ae ko konaa n reiakinna man ana katooto Moronaai are a kona ni buokaki ia? (taraa Mormon 8:1–11). Ngkana ko konaa ni butiia Moronaai bwa e kangaa n teimatoa ni kokoaua, tera ae e na taekinna n am iango?

Taraa naba “All May Know the Truth: Moroni’s Promise” (witeo), Gospel Library.

Moomon 8:26–41; 9:1–30

Ana Boki Moomon e koreaki ibukin ara bong.

Iesu Kristo e kaotia nakon Moronaai te bwai ae e na riki ngkana e otinako Ana Boki Moomon (taraa Moomon 8:34–35), are e na kairia bwa e na anga bwa kauring nakoira n ara bong. Ngkana ko wareka Moomon 8:26–41 ao 9:1–30, iangoia bwa e kanga ana taeka ni kaineti nakoim. Te katoto, ni kiibu aikai ao Moronaai e titiraki 24 taian titiraki. Tera te kakoaua ae ko nooria inanon titiraki aikai ike Moronaai e noora ara bong? E na kangaa Ana Boki Moomon ni buokiira n te kanganga are e a kaman nooria Moronaai?

Kakauongo nakon te Tamnei. Tarai raoi am iango ao am namakin, e ngae ngke aki irekereke nakon te bwai ae ko warekia. A kona iango aikanne n riki bwa bwaai raoi ake e tangiria Tamara are i Karawa bwa ko na reiakin. N aron te katoto, tera tibwanga aika ko karekei imwiin iangoakin raoi titiraki ake e titiraki iai Moronaai inanon Moomon 9:1-30?

Moomon 9:1–25

Iesu Kristo bon Atuan taian kakai.

Moronaai e kabanea ana koroboki tamana ma te rongorongo ae korakora ibukiia aomata n ara bong ake aaki onimakini taian kakai (taraa Moomon 8:26; 9:1, 10–11). Bukin tera ngkai ko namakinna bwa kakoauaan kakai aika a rangi ni kainnanoaki ni boong aikai? Kakaea Mormon 9:9–11, 15–27 ao Moroni 7:27–29 ao iangoi raoi titiraki n aron aikai:

• Tera ae I reiakinna n rongorongon te Tia Kamaiu man kiibu aikai?

• Tera ae I reiakinna n rongorongon taian kakai, ngkekei ao ngkai?

• Baikara kabwaia man onimakinan Iesu Kristo bon Atuan taian kakai? Tera mwiina ngkana ko aki kakoaua aei?

• Baikara kakai—a bubura ke a uarereke—ae e a tia ni mwakuriia te Tia Kamaiu inanon maiu? Tera ae a reireiniko kakai aikai Ibukina?

E reirei Beretitenti Russel M Nelson: “Ara Tia Kamaiu ao te Tia Kabooi maiura, Iesu Kristo, e na karaoi tabeua Ana mwakuri aika mimitong imarenan ngkai ao ngkana E a manga oki. Ti na noori kanikina aika a kamimi are te Atua te Tama ao Natina, Iesu Kristo, a tararua te Ekaretia n ae moan te rine ao ni mimitong” (“Te Kaotioti ibukin te Ekaretia, Te Kaotioti ibukin Maiura,” Riaona, Meei 2018, 96). Tera ae ko namakinna bwa baikara tabeua maibuakon kakai aikai? Tera ae ko kona ni karaoia bwa e na buoka te Tia Kamaiu ni kakoroi nanoia?

Tera ae ko reiakinna ibukin te onimaki ao taian kakai man are a tia n rinanona aomata aika itiaki i Samoa, Tonga, Bitii ao Tahiti ngke Beretitenti ma Titita Nelson a kawariia? (taraa Russell M. Nelson, “E a Uti Kristo; A na Mwaing Maunga man te Onimaki Irouna,” Riaona, Meei 2021, 101–4).

Taraa naba Ronald A. Rasband, “Noria! Bon Ngai Atuan Taian Kakai,” Riaona, Meei 2021, 109–12; Gospel Topics, “Miracles,” Gospel Library.

Iango ibukin Reiakinaia Ataei

Moomon 7:8–10

Ana boki Moomon ao te Baibara a uaia ni kakoaua Iesu Kristo.

• Ni katuruturua irekereken te Baibara ao ana Boki Moomon, n aron are e karaoia Mononaai, ko konaa n takakaro n aekakin aei ma am ataei. Tuangiia bwa a na taekina “O Tetemanti, Nu Tetemanti” ngkana ko taua ieta katoton te Baibara ao “te aekaki ni kakoaua riki teuana” ngkana ko taua ieta katoton ana Boki Moomon. Ko konaa naba n rinei tabeua taai aika a kakawaki aika a riki bwa te Baibara ao ana Boki Mormon a kakoaua ibukin—bungiakin Iesu, matena, ao manga utina—ao kaoiia am ataei bwa a na kakaei tamnein waaki aikai (n aron te katoto, inanon te Gospel Art Book).

• Ibukin buokaia ataei bwa a na reiakini waniua taekan ara onimaki, korei ni kaka teuana taeka iaon beeba aika a uarereke. Kaoiia ataei bwa a na katikui kibu n taeka n rinaniia ae eti ao uaia ni kaokioka karaoana tabeua te tai.

Moomon 8:1–7

I kona ni kawakin tuua e ngae ngke I namakinna bwa I tei n ti ngai.

• Ana katoto Moronaai e na kaungaa nanoia ataei n ongotaeka nakon Ana tua te Atua e ngae ngke a namakinna bwa a tei n tii ngaiia. Imwiin am wareware Mormon 8:1–7 ma ngaiia, a kona n tibwaua bwa aekakira aia namakin ngke arona bwa a riki n aiaron Moronaai. Inanon kiibu 1, 3, ao 4, tera are e tuangaki Moronaai bwa e na karaoia. ao e kangaa n ongotaeka nako iai? Ti na kangaa n riki n ai aron Moronaai?

• Tao ko konaa ngkoe ma am ataei n taetae iaon baika a riki ike a konaa ni karaoa aia rinerine imarenan ae e eti ao ae kairua ngkana akea ae tataraira. E na kanga ara onimaki iroun Iesu Kristo ni buokiira inanon waaki aikai? Te anene n aekakin “Stand for the Right” (Aia Boki n Anene Ataei, 159) e kona ni kaairaki n te marooro.

Moomon 8:24–26; 9:7–26

Iesu Kristo bon Atuan taian kakai.”

• Kabwarabwara nakoia ataei bwa te kakai bon te bwai ae karaoia te Atua ni kaota Mwaakana ao ni kakabwaiai maiura. Imwiina ko konaa ni warekii kibuntaeka man Moomon 9:11-13, 17 are e kabwarabwarai tabeua maibuakon ana kakai te Atua, ao ataei ana konaa ni iangoi kakai tabeua (tamnei man Gospel Art Book, n aron nambwa. 26, 40, 41, ao 83, a kona ni ibuobuoki). Taetae iaon taian kakai bwa ko kanga n tia n noora mwaakan te Atua inanon maium.

• Kaota bwain te kuuka nakoia ataei, ao taetae iaona bwa tera ae e na riki ngkana iai bwain te kuka ae ko mwaninga. Warekia ni bootaki Moomon 8:24 ao 9:20–21 ni kakaea te “rengarenga” are e riai n iai iroura bwa e aonga ni kaoti kakai mairoun te Atua.

Ibukin iango riki tabeua, taraa te beeba ni kaongora n te namwakaina aio n te Te Rao maekatiin.

Moronaai Ngke e Tararua aron kamaunaakiia Nibwaite, iroun Joseph Brickey