N na Kaotinakoko man te Tabo ae Nano,, iroun Jonathan Arthur Clarke

Nobembwa 18-24: “Bwa e Aonga n Toki te Buakaka”

Ita 6–11

Tebubua te ririki imwiin are a kamaunaaki Iaretaite, tenaan Nibwaiite a kunei mwiin aia maeka aia bakatibu aika a urubekeaki. Ibuakon urubekebeke aikai bon te rekooti ae e rangi ni kamimii—bwaatua aika “koora” ake a “on n te koroboki,” ao Nibwaite “a kabanei nanoia ” ni kan warekia (Motiaea 8:9: 28:12). N te bong aei e a tia n reke kauarerekean te rongorongo aei, ae rairaki nakon am taetae, ao e aranaki bwa ana boki Ita. Ngke a warekia Nibwaite, “a onrake nte rawawata” ngke a reiakina te kanganga ni ibwakaia Iaretaite. “E ngae n anne, e anganiia te atatai ae korakora, are a kimwareirei iai” (Motiaea 28:12, 18). Ngkoe, naba, kona bon bae ni kunea naba te rawawata inanon te boki aei. Ma kona bon kimwareirei naba n te bwaintangira ae te ataibwai aei. E koroboki Moronaai, “ bon te ataibwai inanon te Uea ae bwaai aikai a riai ni kaotaki nakoimi … bwa e aonga n toki te buakaka, ao bwa e na roko te tai are a na akea mwaakan Tatan iaon nanoia natiia aomata” (Ita 8:26).

Iango ibukin Reiakinana n te Mweenga ao n te Taromauri

Ita 6:1–12

E na kairai te Uea i nanon mwanangau n te maiu aei.

Ko na kona ni kunei iango n tamnei ngkana ko kabotaua’ mwanangaia Iaretaite n rinanon te marawa nakon mwanangam rinanon te maiu aei. Te katooto, tera ae e a tia ni katauraoia te Uea ae e na kaotaa kawaim n aron atiibu i nanon aia bwaati Iaretaite’? Tera ae e na tei ibukin te bwaati, ke te ang are “e kare nakon te aba ni berita”? (Ita 6:8). Tera ae ko reiakinna man aia mwakuri Iaretaite imwaina, n tain, ao imwiin te mwananga? E kanga te Uea ni kairiko nakon am aba ni berita?

“Anene nakon te Uea;.” Iaretaite a kaota aia kakaitau ao aia tangira nakon te Uea rinanon aia anene ao aia nebonebo (taraa Ita 6:9). Kona bae n taraa ke ni karaoi aanga are kona kabonganaa iai te anene ao kakoaua aika riinga te nano n neboa te Uea n te mweenga ao n te taromauri. Te katoto, e na rangi n nakoraoi ngkana ko anenea te anene n nebo n aiaron “Praise the Lord with Heart and Voice” (Anene m Taromauri, nambwa. 73) ngkana ko kamatebwaia Ita 6:1–12.

Te teei iaon te kaibuke, iroun Kendal Ray Johnson

Ita 6:5–18, 30; 9:28–35; 10:1–2

“Nakonako ma te nanorinano i matan te Uea.”

E ngae ngke te kamoamoa ao te buakaka a taraa n taona nako rongorongoia Iaretaite, iai naba katooto n te nanorinano inanon mwakoro aikai—riki inanon Ita 6:5–18, 30; 9:28–35; ao 10:1–2. Iangoakin titiraki aikai a kona ni buokiko n reiakiniko man katooto aikai: Bukin tera a kananorinanoia Iaretaite n taian kaangaanga aikai? A kanga ni kaota nanorinanoia? E kanga ni kakabwaiaia te Uea? Iangoia bwa tera ae ko kona ni karaoia ma nanom ni koaua “nakonako ma te nanorinano imatan te Uea” (Ita 6:17) nakon are ko na imanonoaki bwa ko na nanorinano (taraa Motiaea 4:11–12; Aramwa 32:14–18).

Taraa naba Dale G. Renlund, “Karaoa ae Eti, Tangira te Nanoanga, ao Nakonako ma te Nanorinano ma Atuam,” Riaona, Nob. 2020, 109–12.

Ita 7–11

I kona n riki bwa te tia kairiiri n aiaron Kristo.

Mwakoro 7–11 n Ita iai inanona ae kaniia 28 te roro. E ngae ngke e aki tau te kamataata n te marena ae uarereke, e waekoa n roko aron tein te kairiiri ae etiraoi ao te kairiiri ae e buakaka. Tera ae ko reiakinna ibukin te kairiri man katoto aika—buakaka ao aika raoiroi—mairouia Ueea aika a kaotaki inano?

• Oria—Ita 6:30; 7:1

• Tiure—Ita 7:23–27

• Iareta—Ita 8:1–7, 11–15

• Emera ao Koriantam—Ita 9:21–23

• Eta—Ita 9:26–30

• Teeti—Ita 10:1–2

• Ribwakite—Ita 10:5–8

• Morianton—Ita 10:9–11

• Riibu—Ita 10:19–28

• Eetem—Ita 11:11–13

• Iesu Kristo—Mataio 18:1–4; 20:20–28; 23:11

Unimwaane Dieter F. Uchtdorf e anga ana reirei ni ibuobuoki iaon te kairiiri inanon ana maroro, “Ane Kakannato Riki I Buakomi” (Riaona,, Meei 2017, 78–81). Iangoa kamatebwaian te maroro aei—riki karaki ake a taekina—ao n tarai raoi tuua ao aron tein ana kairiiiri Iesu Kristo. Nningai ae ko a tia n noora te tua aei ke aron tein te kairiiri aei ni karaoaki irouia aomata ake a kairiiri?

Ngkai ko iangoi baika ko a tia n reiakin, iangoi taai aika ko na kairiiri ke ni kanakoraoia taberman ni mweengam, am komiuniti, nakoam n te Ekaretia, ao a mwaiti riki. Kona kangaa ni karikirakei anuan Iesu ni kairiiri aikai, e ngae ngke akea mwiokoam ae onoti ni kairiiri?

Taraa naba Gospel Topics,“Wewete inanon te Ekaretia,” Gospel Library; “Principles of Leadership in the Church,” Aeniboki ni kabuta: Mwakuri ni ibuobuoki inanon ana Ekaretia Iesu Kristo ibukiia aika Itiaki ni Boong aika Kaitira, 4.2 (ChurchofJesusChrist.org).

Ita 8:7–26

Te Uea e aki mwamwakuri n te rootongitong.

Ngkana aomata a teimatoa ni karaoi ao ni karabai aia babaire ao aia mwakuri aika buakaka, a bon irekereke ma waaki ni karaba aika buakaka. Irarikin te bootaki ni karaba ae buakaka are e kabwarabwaraaki inanon Ita 8:7–18, katooto tabeua a kona ni kuneaki n Ereman 1:9–12; 2:2–11; 6:16–30; Mote 5:29–33. Karaoa te kabootau n kiibu aikai ma 2 Nibwaai 26:22–24, ike e kabwarabwara iai Nibwaai aron te Uea ni karaoa Ana mwakuri. Bukin tera n am iango ngkai e tuangaki Moronaai bwa e na koroi baike e karaoi ibukin waaki ni karaba aika a buakaka?

Tera ae ti a tia n reiakinna man ana boki Ita ae kona ni buokiira ni karekei kakabwaia aika a kabwarabwaraki inanon Ita 8:26?

Iango ibukin Reiakinaia Ataei

Ita 6:1–12

Tamara arei Karawa e kona ni karaua nanou ngkana I maaku.

• Ngaira n tatabemaniira nako iai ara bong ni kainnano—ao ataei aika uarereke naba. Tao ko konaa ni buokiia ataei ni kakai taeka ao kibuntaeka inanon Ita 6:1–12 ike e na kaota aroia Iaretaite n onimakina te Atua.inanon aia bong ni mena inanon te kanganga ao ni maaku. Tibwai katoto n aron ae e a tia ni buokiko iai te Atua ni katan irouna inanon am tai ni kaitarai kaangaanga inanon maium.

Ita 6:9, 12, 30; 7:27; 10:2

Uringa te bwai are e a tia ni karaoia te Uea are e uota te kukurei ao te rau.

• Imwiin rokoia ma te kamanoaki n te aba ni berita, Iaretaite a rangi ni kakaitau n te aro are a “bwaro ranin mataia ibukin te kimwareirei ” (Ita 6:12). Ko konaa ni kaungaia am ataei bwa a na namakina te kakaitau nakon te Uea ibukin te kakabwaia ao ni buokiia ni kakaei kiibu n taeka aikanne man Ita 6:9, 12 are e kaotia bwa a kangaa Iaretaite ni kaota aia kakaitau nakon te Uea. A kona ni kukurei n anene, n aron are a karaoia Iaretaite, te kuna are e kaota aia kakaitau, n aron “I Thank Thee, Dear Father” (Aia Boki n Anene Ataei, 195). Tuangiia ataei bwa a na taekin bwaai tabeua ake a karabwarabwa ibukina.

• Tao a kona am ataei ni wareka Ita 6:30; 7:27; ao 10:2 ao ni kakaei bwa baikara baika a uring ueea aika a raoiroi aikai. E na kanga n roota aroia ni kairiia aia aomata? Ngkoe ma am ataei kam konaa ni maroroakin kawai are kam na kona ni kauringingkami bwa tera are e a tia ni karaoia te Uea ibukimi. Te katoto, tao a kona ni korea rongorongona ke ni koro tamnei. Tuangiia bwa a na karaoia bwa anuaia ni korei kakabwaia ake a ataia bwa mairoun te Uea (taraa “O Remember, Remember” [witeo], Gospel Library).

Ita 7:24–27

I kakabwaiaaki ngkana I iriira ana burabeti te Uea.

• Tao ngkoe ma am ataei kam na kukurei ni koroi tamnein bwaai are e a tia n reireiniira te burabeti aron karaoana. Ko konaa naba ni bitia nakon te takakaro ike kona konaa ni keetinna bwa a tei ibukin tera taian waaki aikanne. Aio are e na katauraoia am ataei nakon te maroro iaon ae bukin tera e kakawaki bwa tina iriira ana burabeti te Atua. Ko kona ni wareka ngkanne Ita 7:24–27 ni kakaea bwa tera ae e riki ngke aomata a ongotaeka iroun ana burabeti te Uea. Ti kanga ni kakabwaiaaki man irirakin te burabeti ni boong aikai?

Ita 9:28–35; 11:5–8

E nanoanga te Uea ngkana I rairananou.

• Kakaean te banna boni ngaia te rabakau ae e rangi ni bongana ibukin kamatebwaian koroboki aika tabu. Ana boki Ita e reke inanona banna aika okioki are e katuruturua ana nanoanga te Uea. Ni buokiia am ataei bwa a na kunea te banna aei, kaoiia bwa a na wareka Ita 9:28–35 ao Ita 11:5–8, n tarai waaki aika titebo imarenan akaunti aika uoua. Tera ae ti reiakinna man karaki aikai? Tao a konaa n tarai tamnei inanon te Gospel Art Book ibukiia aomata ake inanon koroboki aika tabu ngke a rairii nanoia ao ni kabwaraaki aia bure.

Ibukin iango riki tabeua, taraa te beeba ni kaongora n te namwakaina aio n te Te Rao maekatiin.

Aia Bwaati/Kaibuke Iaretaite,, iroun Gary Ernest Smith