Oktubre 21–27: “Wala Na sing Mas Malipayon Pa nga Katawhan”

3 Nefi 27–4 Nefi

Ang mga pinanudlo ni Jesucristo mas masobra pa sangsa matahum nga pilosopiya nga dapat binagbinagon. Gintuyo ini para papagsikon kita nga mangin pareho sa Iya. Ang libro nga 4 Nefi nagapakita kon paano mabag-o sing lubos sang ebanghelyo sang Manluluwas ang mga tawo. Pagkatapos sang malip-ot nga pag-alagad ni Jesus, ang pila ka siglo nga pag-ilinaway sa tunga sang mga Nefinhon kag Lamanhon natapos. Duha ka mga nasyon nga nakilala sa oposisyon kag bugal “nagakaisa, ang mga anak ni Cristo” (4 Nefi 1:17), kag nagsugod sila nga maggawi nga ang “tanan nga mga butang kabilugan sa ila” (4 Nefi 1:3). Ang “gugma sang Dios … nagpuno sa mga tagipusuon sang katawhan,” kag “wala na sing isa ka mas malipayon pa nga katawhan sa tunga sang tanan nga katawhan nga gintuga sang kamot sang Dios” (4 Nefi 1:15–16). Sa amo sini ginbag-o sang mga pinanudlo sang Manluluwas ang mga Nefinhon kag mga Lamanhon. Paano ka sini ginabag-o?

Mga Ideya sa Pagtuon sa Puluy-an kag sa Simbahan

3 Nefi 27:1–12

Ang Simbahan ni Jesucristo ginatawag sa Iya ngalan.

Sang nagasugod ang mga disipulo sang Manluluwas sa pagpasad sang Iya Simbahan sa bilog nga kadutaan, nagtuhaw ang pamangkot nga, para sa pila ka tawo, daw gamay lamang nga punto—ano dapat ang ngalan sang Simbahan? (tan-awa sa 3 Nefi 27:1–3). Ano ang imo matun-an parte sa importansya sang sining ngalan sa sabat sang Manluluwas sa 3 Nefi 27:4–12

Ginpahayag sang Manluluwas ang ngalan sang Iya Simbahan sa karon nga panahon sa Doktrina kag mga Kasugtanan 115:4. Pamensara sing maayo ang tagsa ka tinaga sa sina nga ngalan. Paano kita ginabuligan sining mga tinaga nga mahibal-an kon sin-o kita, kon ano ang aton ginapatihan, kag kon paano kita dapat maggawi?

Tan-awa man sa Russell M. Nelson, “Ang Husto nga Ngalan sang Simbahan,” Liahona, Nob. 2018, 87–89.

3 Nefi 27:10–22

Ang Simbahan ni Jesucristo gintukod sa Iya ebanghelyo.

Pagkatapos nga ipaathag nga ang Iya Simbahan kinahanglan “napasad sa [Iya] ebanghelyo” (3 Nefi 27:10), ginlaragway sang Manluluwas kon ano ang Iya ebanghelyo. Paano mo ihambal sa malip-ot ang Iya ginhambal sa 3 Nefi 27:13–22? Base sa sining kahulugan, ano ang buot silingon para sa Simbahan—kag para sa imo—nga mapasad sa Iya ebanghelyo?

Isulat ang imo matun-an. Tandai kon ano ang gintudlo sang Manluluwas sa Iya mga disipulo sa 3 Nefi 27:23–26. Ngaa importante nga magtago sang rekord sang espirituhanon nga mga eksperiyensya? Ano ang ginapabatyag sa imo nga irekord samtang ginatun-an mo ang pag-alagad sang Manluluwas sa 3 Nefi?

3 Nefi 28:1–11

“Ano bala ang inyo luyag?”

Ano ang imo ihambal kon pamangkuton ka sang Manluluwas, pareho sang Iya ginpamangkot sa Iya mga disipulo, “Ano bala ang inyo luyag gikan sa akon?” (3 Nefi 28:1). Hunahunaa ini samtang imo ginabasa ang 3 Nefi 28:1–11. Ano ang inyo matun-an parte sa mga handum sang mga tagipusuon sang mga disipulo sa ila mga sabat sa Iya pamangkot? Paano nagabag-o ang imo mga handum samtang ginapangabuhi mo ang ebanghelyo ni Jesucristo?

  Pamensara ang pagpangita sang himno nga nagapakita sang imo mga handum.

3 Nefi 29–30

Ang Libro ni Mormon isa ka tanda nga ang buluhaton sang Dios sa ulihing-adlaw nagakatuman na.

Hunahunaa ang mga senyales nga nagapahibalo sa imo nga may matabo. Halimbawa, paano mo nahibal-an nga may manug-abot nga ulan ukon magabaylo na ang panahon? Suno sa 3 Nefi 29:1–3, paano mo mahibal-an nga ang buluhaton sang Dios nga pagtipon sang Iya katawhan “nagasugod na nga matuman”? (tan-awa man sa 3 Nefi 21:1–7). Pwede mo man tandaan sa 3 Nefi 29:4–9, ang mga butang nga ipanginwala sang mga tawo sa aton panahon. Paano ginapabakod sang Libro ni Mormon ang imo pagtuo sa sining mga butang?

4 Nefi 1:1–18

Ang pagsunod sang mga pinanudlo ni Jesucristo nagaresulta sa pag-isa kag kalipayan.

Daw ano ayhan ang magpangabuhi sa mga tinuig pagkatapos sang pagbisita sang Manluluwas? Samtang ginatun-an mo ang 4 Nefi 1:1–18, pamensara ang paglista sang mga bugay nga nabaton sang mga tawo. Pwede mo man markahan ukon tandaan ang mga pagpili nga ila ginhimo nga nakabulig padulong sa sining ginbugayan nga kabuhi. Ano ang gintudlo ni Jesus sa ila nga nagpapagsik sang ila matarong nga mga pagpili? Ari ang pila ka mga halimbawa, pero mahimo nga makakita ka sang iban pa: 3 Nefi 11:28–30; 12:8–9, 21–24, 40–44; 13:19–21, 28–33; 14:12; 18:22–25.

Binagbinaga kon ano ang pwede mo himuon para buligan ang imo pamilya, ward, ukon komunidad nga magpangabuhi sa mas dako nga paghiliusa kag kalipayan. Ano ang sarang mo himuon sa pagbulig nga malampuwasan ang mga pagbinahin-bahin kag matuod nga “mangin isa” sa iban nga mga anak sang Dios? Ano nga mga pinanudlo ni Jesucristo ang nagabulig sa imo nga matuman ining tuyo?

Sa masubo nga palad, ang sosyedad sang Sion nga ginlaragway sa 4 Nefi sang ulihi nahulog sa kalautan. Samtang imo ginabasa ang 4 Nefi 1:19–49, pangitaa ang mga pamatasan kag pangginawi nga nagtapos sang ila kalipay kag paghiliusa. Ano ang pwede mo himuon para dulaon ining mga pamatasan kag pangginawi?

Tan-awa man sa Moises 7:18; D. Todd Christofferson, “Masustiner nga mga Sosyedad,” Liahona, Nob. 2020, 32–35.

Para sa dugang nga mga ideya, tan-awa sa mga isyu sini nga bulan sang mga magasin nga Liahona kag Para sa Kusog sang mga Lamharon.

Mga Ideya para sa Pagtudlo sang mga Kabataan

3 Nefi 27:3–8

Miyembro ako sang Simbahan ni Jesucristo.

• Para ipakilala ang importansya sang ngalan sang Simbahan ni Jesus, hambali upod sa imo kabataan ang parte sa ila kaugalingon nga mga ngalan. Ngaa importante ang aton mga ngalan? Dayon pwede ninyo basahon ang 3 Nefi 27:3 sing ululupod, nga ginapangita ang pamangkot sang mga disipulo ni Jesus. Buligi ang imo kabataan nga pangitaon ang sabat sa 3 Nefi 27:5–8. Ngaa importante kaayo ang ngalan sang Simbahan?

• Pwede mo man buligan ang imo kabataan nga magpanumdom sang lainlain nga mga grupo nga ila ginaentrahan, pareho sang pamilya ukon klase sa Primary. Pamangkuta sila kon daw ano ang mangin miyembro sang tagsa ka grupo.  

3 Nefi 27:13–16

Ang Simbahan ni Jesucristo ginpasad sa Iya ebanghelyo.

• Ginpalip-ot sang Manluluwas ang Iya ebanghelyo sa 3 Nefi 27. Pwede mo ipaathag sa imo kabataan nga ang tinaga nga ebanghelyo nagakahulugan sang “maayong balita.” Ano nga maayong balita ang aton makita sa 3 Nefi 27:13–16? Gamita ang pahina para sa kahiwatan sini nga semana para itudlo nga ang Simbahan sang Manluluwas napasad sa Iya ebanghelyo.

3 Nefi 27:30–31

Ang Amay nga Langitnon nagakalipay kon ang Iya mga anak nagabalik sa Iya.

• Pamensara nga maghampang sang panaguay. Pwede ini magbukas sang paghinambalanay parte sa kalipay nga aton mabatyagan kon makita na ang tawo nga nadula. Pagkatapos nga basahon ang 3 Nefi 27:30–31, pwede ninyo hambalan kon paano buligan ang kada isa nga magpabilin nga malapit sa Amay nga Langitnon para “wala’y isa … nga madula.”

4 Nefi

Ang pagsunod kay Jesucristo nagadala sa akon sang kalipay.

• Para buligan ang imo kabataan nga magtuon parte sa kalipayan sang mga tawo nga ginalaragway sa 4 Nefi, pwede ka magpakita sa ila sang mga litrato sang malipayon nga mga tawo. Dayon, samtang inyo ginabasa sing ululupod ang mga bersikulo 2–3 kag 15–17, pwede nila itudlo ang mga litrato kon maglab-ot ka na sa istorya nga nagadala sang kalipay.

• Para buligan ang imo kabataan nga ipangabuhi ang ginatudlo sa 4 Nefi 1:15–16, pwede mo ipresentar sa ila ang mga sitwasyon kon sa diin akig ang mga tawo sa kada isa. Hagara sila nga idrama-drama kon daw ano ayhan ang mangin sitwasyon kon kita may “gugma sang Dios” sa aton mga tagipusuon.

Para sa dugang nga mga ideya, tan-awa sa isyu sang Abyan nga magasin sini nga bulan.

Christ with Three Nephite Disciples [Si Cristo upod ang Tatlo ka Nefinhon nga mga Disipulo], ni Gary L. Kapp.