“ວັນທີ 4–10 ເດືອນພະຈິກ: ‘ຂ້າພະເຈົ້າເວົ້າກັບທ່ານຄືກັບວ່າທ່ານຢູ່ຕໍ່ໜ້າ.’ ມໍມອນ 7–9,” ຈົ່ງຕາມເຮົາມາ—ສຳລັບບ້ານ ແລະ ໂບດ: ພຣະຄຳພີມໍມອນ 2024 (2023)

“ວັນທີ 4–10 ເດືອນພະຈິກ. ມໍມອນ 7–9,” ຈົ່ງຕາມເຮົາມາ—ສຳລັບບ້ານ ແລະ ໂບດ: 2024 (2023)

Moroni Writing on Gold Plates [ໂມໂຣໄນກຳລັງຂຽນໃສ່ແຜ່ນຈາລຶກຄຳ], ໂດຍ ແດວ ຄິວບອນ

ວັນທີ 4–10 ເດືອນພະຈິກ: “ຂ້າພະເຈົ້າເວົ້າກັບທ່ານຄືກັບວ່າທ່ານຢູ່ຕໍ່ໜ້າ”

ມໍມອນ 7–9

ໂມໂຣໄນໄດ້ຮູ້ວ່າການຢູ່ຜູ້ດຽວຢູ່ໃນໂລກທີ່ຊົ່ວຮ້າຍນັ້ນເປັນແບບໃດ—ໂດຍສະເພາະຫລັງຈາກບິດາຂອງເພິ່ນໄດ້ເສຍຊີວິດຢູ່ໃນສົງຄາມ ແລະ ຊາວນີໄຟໄດ້ຖືກທຳລາຍ. “ຂ້າພະເຈົ້າຖືກປ່ອຍໃຫ້ຢູ່ຜູ້ດຽວ,” ເພິ່ນໄດ້ຂຽນ. “ຂ້າພະເຈົ້າບໍ່ມີໝູ່ເພື່ອນເລີຍທັງບໍ່ມີບ່ອນຈະໄປຫາ” (ມໍມອນ 8:3, 5). ສະພາບການອາດເບິ່ງຄືວ່າໝົດຫວັງ, ແຕ່ໂມໂຣໄນໄດ້ພົບຄວາມຫວັງຢູ່ໃນພຣະເຢຊູຄຣິດ ແລະ ປະຈັກພະຍານຂອງເພິ່ນວ່າ “ຈຸດປະສົງອັນເປັນນິລັນດອນຂອງພຣະຜູ້ເປັນເຈົ້າຈະດຳເນີນຕໍ່ໄປ” (ມໍມອນ 8:22). ແລະ ໂມໂຣໄນໄດ້ຮູ້ວ່າພາກສ່ວນທີ່ສຳຄັນໃນຈຸດປະສົງນິລັນດອນເຫລົ່ານັ້ນ ຈະເປັນພຣະຄຳພີມໍມອນ—ບັນທຶກທີ່ບັດນີ້ເພິ່ນໄດ້ເຮັດສຳເລັດຢ່າງພາກພຽນ, ບັນທຶກທີ່ໃນມື້ໜຶ່ງຈະນຳຜູ້ຄົນຢ່າງຫລວງຫລາຍມາ “ສູ່ຄວາມຮູ້ເລື່ອງພຣະຄຣິດ” (ມໍມອນ 8:16; 9:36). ສັດທາຂອງໂມໂຣໄນ ໃນຄຳສັນຍາເຫລົ່ານີ້ໄດ້ເຮັດໃຫ້ເປັນໄປໄດ້ສຳລັບເພິ່ນທີ່ຈະປະກາດຕໍ່ຜູ້ອ່ານໃນອະນາຄົດເຖິງປຶ້ມເຫລັ້ມນີ້ວ່າ, “ຂ້າພະເຈົ້າເວົ້າກັບທ່ານຄືກັບວ່າທ່ານຢູ່ຕໍ່ໜ້າ” ແລະ “ຂ້າພະເຈົ້າຮູ້ວ່າ ທ່ານຈະໄດ້ຍິນຄຳເວົ້າຂອງຂ້າພະເຈົ້າ” (ມໍມອນ 8:35; 9:30). ບັດນີ້ເຮົາມີຖ້ອຍຄຳຂອງເພິ່ນ, ແລະ ວຽກງານຂອງພຣະຜູ້ເປັນເຈົ້າກຳລັງດຳເນີນໄປໜ້າ, ຊຶ່ງພາກສ່ວນໜຶ່ງເປັນເພາະມໍມອນ ແລະ ໂມໂຣໄນໄດ້ຍຶດໝັ້ນຢູ່ໃນຄວາມຈິງໃຈຕໍ່ພາລະກິດຂອງພວກເພິ່ນ, ແມ່ນແຕ່ໃນເວລາທີ່ຢູ່ຜູ້ດຽວ.

ແນວຄິດສຳລັບການຮຽນຮູ້ຢູ່ທີ່ບ້ານ ແລະ ຢູ່ທີ່ໂບດ

ມໍມອນ 7

“ເຊື່ອໃນພຣະເຢຊູຄຣິດ” ແລະ “ຍຶດໝັ້ນໃນພຣະກິດຕິຄຸນ [ຂອງພຣະອົງ].”

ຫລັງຈາກການຫຍໍ້ບັນທຶກຂອງຜູ້ຄົນຂອງເພິ່ນແລ້ວ, ມໍມອນໄດ້ໃຫ້ຂ່າວສານສຸດທ້າຍຂອງເພິ່ນຢູ່ໃນ ມໍມອນ 7. ທ່ານຄິດວ່າ ເປັນຫຍັງເພິ່ນຈຶ່ງໄດ້ເລືອກຂ່າວສານນີ້? ຄຳວ່າ “ຍຶດໝັ້ນໃນພຣະກິດຕິຄຸນຂອງພຣະຄຣິດ” ໝາຍຄວາມວ່າແນວໃດສຳລັບທ່ານ? (ມໍມອນ 7:8).

ເບິ່ງ “ພຣະຜູ້ໄຖ່ແຫ່ງອິດສະຣາເອນ,” ເພງສວດ ແລະ ເພງຂອງເດັກນ້ອຍ, 5 ນຳອີກ.

ມໍມອນ 7:8–10; 8:12–16; 9:31–37

ພຣະຄຳພີມໍມອນມີຄ່າຢ່າງຫລວງຫລາຍ.

ປະທານຣະໂຊ ເອັມ ແນວສັນ ໄດ້ຖາມວ່າ: “ຖ້າຫາກມີຄົນມາສະເໜີມອບເພັດພອຍໃຫ້ທ່ານ ຫລື ສະເໜີມອບພຣະຄຳພີໃຫ້ທ່ານ, ທ່ານຈະເລືອກເອົາອັນໃດ? ຕາມຄວາມຈິງແລ້ວ, ສິ່ງໃດ ມີ ຄ່າຫລາຍກວ່າ ສຳລັບທ່ານ?” (“The Book of Mormon: What Would Your Life Be Like without It?,” Liahona, Nov. 2017, 61).

ທ່ານພົບເຫັນຫຍັງແດ່ ຢູ່ໃນ ມໍມອນ 7:8–10; 8:12–22; ແລະ 9:31–37 ທີ່ຊ່ວຍທ່ານໃຫ້ເຂົ້າໃຈວ່າເປັນຫຍັງພຣະຄຳພີມໍມອນຈຶ່ງມີຄ່າໃນວັນເວລາຂອງເຮົາ? ເປັນຫຍັງມັນຈຶ່ງມີຄ່າຕໍ່ທ່ານ? ທ່ານອາດພົບເຫັນຄວາມຮູ້ເພີ່ມເຕີມຢູ່ໃນ 1 ນີໄຟ 13:38–41; 2 ນີໄຟ 3:11–12; ແລະ ຄຳສອນ ແລະ ພັນທະສັນຍາ 33:16; 42:12–13.

ພຣະຄຳພີມໍມອນໃນຫລາຍພາສາ — ສິ່ງທີ່ສາດສະດາຂອງພຣະຄຳພີມໍມອນໄດ້ຂຽນໄວ້ ແມ່ນກ່ຽວຂ້ອງກັບເຮົາ.

ມໍມອນ 8:1–11

ເຮົາສາມາດຮັກສາພຣະບັນຍັດເຖິງແມ່ນວ່າຄົນອື່ນບໍ່ເຮັດກໍຕາມ.

ບາງເທື່ອທ່ານອາດຮູ້ສຶກໂດດດ່ຽວໃນຄວາມພະຍາຍາມຂອງທ່ານທີ່ຈະຮັກສາພຣະບັນຍັດ. ທ່ານສາມາດຮຽນຮູ້ຫຍັງແດ່ຈາກຕົວຢ່າງຂອງໂມໂຣໄນທີ່ສາມາດຊ່ວຍທ່ານໄດ້ (ເບິ່ງ ມໍມອນ 8:1–11). ຖ້າຫາກທ່ານສາມາດຖາມໂມໂຣໄນວ່າເພິ່ນໄດ້ຍຶດໝັ້ນຢ່າງຊື່ສັດແນວໃດ, ທ່ານຄິດວ່າເພິ່ນຈະເວົ້າແນວໃດ?

ເບິ່ງ “All May Know the Truth: Moroni’s Promise” (ວິດີໂອ), ຫ້ອງສະໝຸດພຣະກິດຕິຄຸນ ນຳອີກ.

ມໍມອນ 8:26–41; 9:1–30

ພຣະຄຳພີມໍມອນໄດ້ຖືກຂຽນໄວ້ສຳລັບວັນເວລາຂອງເຮົາ.

ພຣະເຢຊູຄຣິດໄດ້ໃຫ້ໂມໂຣໄນເຫັນສິ່ງທີ່ຈະເກີດຂຶ້ນ ເມື່ອພຣະຄຳພີມໍມອນໄດ້ອອກມາ (ເບິ່ງ ມໍມອນ 8:34–35), ຊຶ່ງໄດ້ນຳພາເພິ່ນໃຫ້ຂຽນຄຳເຕືອນຢ່າງກ້າຫານສຳລັບວັນເວລາຂອງເຮົາ. ຂະນະທີ່ທ່ານອ່ານ ມໍມອນ 8:26–41 ແລະ 9:1–30, ໃຫ້ໄຕ່ຕອງວ່າ ຖ້ອຍຄຳຂອງເພິ່ນກ່ຽວຂ້ອງກັບທ່ານແນວໃດ. ຍົກຕົວຢ່າງ, ໃນຂໍ້ເຫລົ່ານີ້ ໂມໂຣໄນຖາມຄຳຖາມ 24 ຂໍ້. ມີຫລັກຖານໃດແດ່ທີ່ທ່ານເຫັນຢູ່ໃນຄຳຖາມເຫລົ່ານີ້ ທີ່ໂມໂຣໄນໄດ້ເຫັນວັນເວລາຂອງເຮົາ? ພຣະຄຳພີມໍມອນສາມາດຊ່ວຍກັບການທ້າທາຍທີ່ໂມໂຣໄນໄດ້ເຫັນລ່ວງໜ້າແນວໃດ?

ຮັບຟັງພຣະວິນຍານ. ໃຫ້ເອົາໃຈໃສ່ຕໍ່ຄວາມຄິດ ແລະ ຄວາມຮູ້ສຶກຂອງທ່ານ, ເຖິງແມ່ນວ່າມັນເບິ່ງຄືບໍ່ກ່ຽວຂ້ອງກັບສິ່ງທີ່ທ່ານກຳລັງອ່ານຢູ່ກໍຕາມ. ຄວາມປະທັບໃຈເຫລົ່ານີ້ອາດເປັນສິ່ງທີ່ພຣະບິດາເທິງສະຫວັນປະສົງໃຫ້ທ່ານຮຽນຮູ້. ຍົກຕົວຢ່າງ, ທ່ານມີຄວາມປະທັບໃຈຫຍັງແດ່ ຫລັງຈາກການໄຕ່ຕອງຄຳຖາມທີ່ໂມໂຣໄນຖາມ ຢູ່ໃນ ມໍມອນ 9:1–30?

ມໍມອນ 9:1–25

ພຣະເຢຊູຄຣິດເປັນພຣະເຈົ້າແຫ່ງການມະຫັດສະຈັນ.

ໂມໂຣໄນໄດ້ສະຫລຸບການຂຽນຂອງບິດາຂອງເພິ່ນ ດ້ວຍຂ່າວສານທີ່ມີພະລັງສຳລັບຜູ້ຄົນໃນວັນເວລາຂອງເຮົາ ຜູ້ທີ່ບໍ່ເຊື່ອໃນການມະຫັດສະຈັນ (ເບິ່ງ ມໍມອນ 8:26; 9:1, 10–11). ເປັນຫຍັງທ່ານຈຶ່ງຮູ້ສຶກວ່າຄວາມເຊື່ອໃນການມະຫັດສະຈັນແມ່ນຈຳເປັນໃນວັນເວລານີ້? ໃຫ້ຄົ້ນຄວ້າ ມໍມອນ 9:9–11, 15–27 ແລະ ໂມໂຣໄນ 7:27–29 ແລະ ໄຕ່ຕອງຄຳຖາມດັ່ງຕໍ່ໄປນີ້:

ເຮົາຮຽນຮູ້ຫຍັງແດ່ກ່ຽວກັບພຣະຜູ້ຊ່ວຍໃຫ້ລອດ ຈາກຂໍ້ເຫລົ່ານີ້?
ເຮົາຮຽນຮູ້ຫຍັງແດ່ກ່ຽວກັບການມະຫັດສະຈັນ, ໃນອະດີດ ແລະ ປະຈຸບັນ?
ແມ່ນຫຍັງຄືຜົນປະໂຫຍດຂອງການເຊື່ອວ່າ ພຣະເຢຊູຄຣິດເປັນພຣະເຈົ້າແຫ່ງການມະຫັດສະຈັນ? ແມ່ນຫຍັງຄືຜົນສະທ້ອນຂອງການບໍ່ເຊື່ອສິ່ງນີ້?
ມີການມະຫັດສະຈັນໃດແດ່—ໃຫຍ່ ແລະ ນ້ອຍ—ທີ່ພຣະຜູ້ຊ່ວຍໃຫ້ລອດໄດ້ກະທຳໃນຊີວິດຂອງເຮົາ? ການມະຫັດສະຈັນເຫລົ່ານີ້ສິດສອນເຮົາຫຍັງແດ່ກ່ຽວກັບພຣະອົງ?

ປະທານຣະໂຊ ເອັມ ແນວສັນ ໄດ້ສິດສອນວ່າ: “ພຣະຜູ້ຊ່ວຍໃຫ້ລອດ ແລະ ພຣະຜູ້ໄຖ່ຂອງເຮົາ, ພຣະເຢຊູຄຣິດ, ຈະສະແດງວຽກງານທີ່ຍິ່ງໃຫຍ່ທີ່ສຸດຂອງພຣະອົງ ນັບຈາກເວລານີ້ໄປ ຈົນເຖິງເວລາທີ່ພຣະອົງສະເດັດມາອີກ. ເຮົາຈະໄດ້ເຫັນການມະຫັດສະຈັນ ທີ່ບົ່ງບອກວ່າ ພຣະເຈົ້າອົງເປັນພຣະບິດາ ແລະ ພຣະບຸດຂອງພຣະອົງ, ພຣະເຢຊູຄຣິດ, ຄວບຄຸມສາດສະໜາຈັກນີ້ ໃນຄວາມສະຫງ່າລາສີ ແລະ ດ້ວຍລັດສະໝີພາບ” (“Revelation for the Church, Revelation for Our Lives,” Liahona, May 2018, 96). ທ່ານຮູ້ສຶກວ່າ ແມ່ນຫຍັງຄືການມະຫັດສະຈັນບາງຢ່າງເຫລົ່ານີ້? ທ່ານຈະເຮັດສິ່ງໃດເພື່ອຊ່ວຍພຣະຜູ້ຊ່ວຍໃຫ້ລອດເຮັດໃຫ້ມັນເກີດເປັນຈິງ?

ທ່ານຮຽນຮູ້ຫຍັງແດ່ກ່ຽວກັບສັດທາ ແລະ ການມະຫັດສະຈັນຈາກປະສົບການຂອງໄພ່ພົນຢູ່ທີ່ປະເທດຊາມົວ, ຕົງກາ, ຟີຈີ, ແລະ ຕາຮີຕີ ຕອນທີ່ປະທານ ແລະ ຊິດສະເຕີ ແນວສັນ ໄດ້ໄປຢ້ຽມຢາມເຂົາເຈົ້າ? (ເບິ່ງ Russell M. Nelson, “Christ Is Risen; Faith in Him Will Move Mountains,” Liahona, May 2021, 101–4).

ເບິ່ງ Ronald A. Rasband, “Behold! I Am a God of Miracles,” Liahona, May 2021, 109–12; Gospel Topics, “Miracles,” ຫ້ອງສະໝຸດພຣະກິດຕິຄຸນ ນຳອີກ.

ແນວຄິດສຳລັບການສິດສອນເດັກນ້ອຍ

ມໍມອນ 7:8–10

ພຣະຄຳພີມໍມອນ ແລະ ພຣະຄຣິສຕະທຳຄຳພີເປັນພະຍານເຖິງພຣະເຢຊູຄຣິດ.

ເພື່ອເນັ້ນຄວາມສຳພັນລະຫວ່າງພຣະຄຣິສຕະທຳຄຳພີ ແລະ ພຣະຄຳພີມໍມອນ, ດັ່ງທີ່ໂມໂຣໄນໄດ້ເນັ້ນ, ທ່ານສາມາດຫລິ້ນເກມທີ່ຄືກັນກັບເກມນີ້ກັບລູກໆຂອງທ່ານ: ຂໍໃຫ້ພວກເຂົາເວົ້າວ່າ, “ພຣະຄຳພີເດີມ, ພຣະຄຳພີໃໝ່” ເມື່ອທ່ານຍົກພຣະຄຣິສຕະທຳຄຳພີຂຶ້ນ ແລະ ວ່າ “ປະຈັກພະຍານອີກຢ່າງໜຶ່ງ” ເມື່ອທ່ານຍົກພຣະຄຳພີມໍມອນຂຶ້ນ. ທ່ານຍັງສາມາດເລືອກສີ່ຫ້າເຫດການທີ່ ທັງພຣະຄຣິສຕະທຳຄຳພີ ແລະ ພຣະຄຳພີມໍມອນເປັນພະຍານເຖິງ—ດັ່ງເຊັ່ນ ການກຳເນີດ, ການສິ້ນພຣະຊົນ, ແລະ ການຟື້ນຄືນພຣະຊົນຂອງພຣະເຢຊູ—ແລະ ເຊື້ອເຊີນລູກໆຂອງທ່ານໃຫ້ຊອກຫາຮູບພາບຂອງເຫດການເຫລົ່ານີ້ (ຍົກຕົວຢ່າງ, ຢູ່ໃນ ປຶ້ມຮູບພຣະກິດຕິຄຸນ).
ເພື່ອຊ່ວຍໃຫ້ລູກໆຂອງທ່ານຮຽນຮູ້ຫລັກແຫ່ງຄວາມເຊື່ອຂໍ້ທີແປດ, ທ່ານສາມາດຂຽນແຕ່ລະຄຳໃສ່ເຈ້ຍນ້ອຍແຕ່ລະໃບ. ເຊື້ອເຊີນລູກໆຂອງທ່ານໃຫ້ຊ່ວຍກັນລຽງຖ້ອຍຄຳເຫລົ່ານັ້ນຕາມລຳດັບ ແລະ ເຮັດຊ້ຳສາມສີ່ເທື່ອ.

ມໍມອນ 8:1–7

ເຮົາສາມາດຮັກສາພຣະບັນຍັດເຖິງແມ່ນວ່າເຮົາຮູ້ສຶກໂດດດ່ຽວ.

ຕົວຢ່າງຂອງໂມໂຣໄນສາມາດດົນໃຈລູກໆຂອງທ່ານໃຫ້ເຊື່ອຟັງພຣະບັນຍັດຂອງພຣະເຈົ້າ ແມ່ນແຕ່ເມື່ອພວກເຂົາຮູ້ສຶກໂດດດ່ຽວ. ຫລັງຈາກທ່ານໄດ້ອ່ານ ມໍມອນ 8:1–7 ກັບພວກເຂົາແລ້ວ, ພວກເຂົາສາມາດແບ່ງປັນວ່າ ພວກເຂົາຈະຮູ້ສຶກແນວໃດຖ້າຫາກວ່າພວກເຂົາໄດ້ເປັນໂມໂຣໄນ. ໃນ ຂໍ້ທີ 1, 3, ແລະ 4, ແມ່ນຫຍັງຄືສິ່ງທີ່ໂມໂຣໄນຖືກບັນຊາໃຫ້ເຮັດ, ແລະ ວ່າເພິ່ນໄດ້ເຊື່ອຟັງແນວໃດ? ເຮົາສາມາດເປັນເໝືອນດັ່ງໂມໂຣໄນຫລາຍຂຶ້ນໄດ້ແນວໃດ?
ບາງທີທ່ານ ແລະ ລູກໆຂອງທ່ານສາມາດເວົ້າລົມກັນກ່ຽວກັບສະພາບການ ບ່ອນທີ່ພວກເຂົາຕ້ອງເລືອກລະຫວ່າງຄວາມຖືກຕ້ອງ ແລະ ຄວາມຜິດ ເມື່ອບໍ່ມີໃຜຫລຽວເບິ່ງ. ການມີສັດທາໃນພຣະເຢຊູຄຣິດຊ່ວຍເຮົາແນວໃດໃນສະພາບການເຫລົ່ານີ້? ເພງເຊັ່ນ “ກ້າເຮັດສິ່ງຖືກ” (ເພງສວດ ແລະ ເພງຂອງເດັກນ້ອຍ, 70) ສາມາດເພີ່ມໃສ່ກັບການສົນທະນານີ້.

ມໍມອນ 8:24–26; 9:7–26

ພຣະເຢຊູຄຣິດເປັນ “ພຣະເຈົ້າແຫ່ງການມະຫັດສະຈັນ.”

ທ່ານອາດຢາກອະທິບາຍຕໍ່ລູກໆຂອງທ່ານວ່າ ການມະຫັດສະຈັນເປັນສິ່ງທີ່ພຣະເຈົ້າກະທຳ ເພື່ອສະແດງອຳນາດຂອງພຣະອົງ ແລະ ເປັນພອນໃຫ້ແກ່ຊີວິດຂອງເຮົາ. ແລ້ວທ່ານສາມາດອ່ານວະລີຈາກ ມໍມອນ 9:11–13, 17 ທີ່ບັນຍາຍເຖິງການມະຫັດສະຈັນຂອງພຣະເຈົ້າບາງຢ່າງ, ແລະ ລູກໆຂອງທ່ານສາມາດຄິດເຖິງການມະຫັດສະຈັນຢ່າງອື່ນ (ຮູບພາບຈາກ ປຶ້ມຮູບພຣະກິດຕິຄຸນ, ດັ່ງເຊັ່ນ ເລກທີ 26, 40, 41, ແລະ 83, ສາມາດຊ່ວຍໄດ້). ເວົ້າລົມກັນກ່ຽວກັບການມະຫັດສະຈັນທີ່ພຣະເຈົ້າໄດ້ກະທຳໃນຊີວິດຂອງທ່ານ.
ເອົາສູດເຮັດອາຫານໃຫ້ລູກໆຂອງທ່ານເບິ່ງ, ແລະ ເວົ້າລົມກັນກ່ຽວກັບສິ່ງທີ່ຈະເກີດຂຶ້ນ ຖ້າຫາກທ່ານບໍ່ເອົາສ່ວນປະກອບສຳຄັນຢ່າງໜຶ່ງໃສ່. ອ່ານ ມໍມອນ 8:24 ແລະ 9:20–21 ນຳກັນ ເພື່ອຊອກຫາ “ສ່ວນປະກອບ” ທີ່ສາມາດນຳໄປສູ່ການມະຫັດສະຈັນ.

ສຳລັບແນວຄິດເພີ່ມເຕີມ, ໃຫ້ເບິ່ງວາລະສານ Friend ສະບັບຂອງເດືອນນີ້.

Moroni Overlooking the Destruction of the Nephites [ໂມໂຣໄນກຳລັງຫລຽວເບິ່ງຄວາມພິນາດຂອງຊາວນີໄຟ], ໂດຍ ໂຈເຊັບ ບຣິກກີ

ໜ້າກິດຈະກຳ: ພຣະຄຳພີມໍມອນ ແລະ ພຣະຄຣິສຕະທຳຄຳພີເປັນພະຍານເຖິງພຣະເຢຊູຄຣິດ