“ຈົ່ງເບິ່ງ! ເຮົາຄືພຣະເຈົ້າແຫ່ງສິ່ງມະຫັດສະຈັນ”

ໂດຍ ແອວເດີ ຣອນໂນ ເອ ແຣັສ໌ແບນ

ແຫ່ງກຸ່ມອັກຄະສາວົກສິບສອງ

ສິ່ງມະຫັດສະຈັນ, ເຄື່ອງໝາຍ, ແລະ ສິ່ງແປກປະຫລາດກໍມີຫລາຍໃນບັນດາຜູ້ຕິດຕາມພຣະເຢຊູຄຣິດໃນວັນເວລານີ້, ໃນຊີວິດຂອງທ່ານ ແລະ ຂອງຂ້າພະເຈົ້າ.

ອ້າຍເອື້ອຍນ້ອງທີ່ຮັກແພງຂອງຂ້າພະເຈົ້າ, ຊ່າງເປັນສິດທິພິເສດແທ້ໆ ທີ່ໄດ້ມາກ່າວກັບທ່ານໃນມື້ນີ້. ຮ່ວມກັນກັບຜູ້ທີ່ໄດ້ກ່າວປາໄສແລ້ວໃນກອງປະຊຸມໃຫຍ່ນີ້, ຂ້າພະເຈົ້າເປັນພະຍານຕໍ່ທ່ານວ່າ ພຣະເຢຊູຄຣິດຊົງພຣະຊົນ. ພຣະອົງນຳພາສາດສະໜາຈັກຂອງພຣະອົງ; ພຣະອົງກ່າວຕໍ່ສາດສະດາຂອງພຣະອົງ, ປະທານຣະໂຊ ເອັມ ແນວສັນ, ແລະ ພຣະອົງຮັກລູກໆຂອງພຣະບິດາເທິງສະຫວັນທຸກຄົນ.

ໃນວັນອາທິດອີດສະເຕີນີ້ ເຮົາສະເຫລີມສະຫລອງການຟື້ນຄືນພຣະຊົນຂອງພຣະເຢຊູຄຣິດ, ພຣະຜູ້ຊ່ວຍໃຫ້ລອດ ແລະ ພຣະຜູ້ໄຖ່ຂອງເຮົາ,¹ ພຣະເຈົ້າຊົງລິດ, ອົງສັນຕິລາດ.² ການຊົດໃຊ້ຂອງພຣະອົງ, ເຖິງຈຸດສູງສຸດດ້ວຍການຟື້ນຄືນພຣະຊົນຂອງພຣະອົງຫລັງຈາກສາມວັນ ຢູ່ໃນອຸບມຸງທີ່ຢືມໃຊ້, ຍັງຄົງເປັນສິ່ງມະຫັດສະຈັນທີ່ຍິ່ງໃຫຍ່ທີ່ສຸດໃນປະຫວັດສາດຂອງມະນຸດ. “ຈົ່ງເບິ່ງ,” ພຣະອົງໄດ້ປະກາດ, “ເຮົາຄືພຣະເຈົ້າແຫ່ງສິ່ງມະຫັດສະຈັນ.”³

“ສິ່ງມະຫັດສະຈັນໝົດໄປແລ້ວບໍ ເພາະພຣະຄຣິດໄດ້ສະເດັດຂຶ້ນໄປສະຫວັນ, ແລະ ປະທັບຢູ່ທາງເບື້ອງຂວາພຣະຫັດຂອງພຣະເຈົ້າ?”⁴ ສາດສະດາມໍມອນຖາມໃນພຣະຄຳພີມໍມອນ. ເພິ່ນຕອບວ່າ, “ບໍ່ເລີຍ; ແລະ ທັງເຫລົ່າທູດກໍບໍ່ໄດ້ເລີກປະຕິບັດສາດສະໜາກິດແກ່ລູກຫລານມະນຸດ.”⁵

ຫລັງຈາກການຄຶງ, ທູດຂອງພຣະຜູ້ເປັນເຈົ້າອົງໜຶ່ງໄດ້ປະກົດຕໍ່ນາງມາຣີ, ພ້ອມດ້ວຍແມ່ຍິງສາມສີ່ຄົນ, ຜູ້ໄດ້ໄປທີ່ອຸບມຸງເພື່ອຫົດສົງນ້ຳມັນໃສ່ພຣະກາຍຂອງພຣະເຢຊູ. ທູດອົງນັ້ນໄດ້ກ່າວວ່າ:

“ເປັນຫຍັງພວກເຈົ້າຈຶ່ງຊອກຫາຄົນເປັນຢູ່ໃນໝູ່ຄົນຕາຍ?”⁶

“ພຣະອົງບໍ່ໄດ້ຢູ່ທີ່ນີ້: ພຣະອົງເປັນຄືນມາສູ່ຊີວິດແລ້ວ.”⁷

ສາດສະດາອະບີນາໄດໃນພຣະຄຳພີມໍມອນໄດ້ປະກາດເຖິງສິ່ງມະຫັດສະຈັນນັ້ນວ່າ:

“ຖ້າຫາກພຣະຄຣິດບໍ່ໄດ້ລຸກຂຶ້ນຈາກຄວາມຕາຍ, … ແລ້ວຈະບໍ່ມີການຟື້ນຄືນຊີວິດເລີຍ.

“ແຕ່ມັນມີການຟື້ນຄືນຊີວິດ, ສະນັ້ນຫລຸມຝັງສົບຈຶ່ງບໍ່ມີໄຊຊະນະ, ແລະ ຄວາມເຈັບປວດແຫ່ງຄວາມຕາຍຈະຖືກກືນເຂົ້າໄປໃນພຣະຄຣິດ.”⁸

ການກະທຳທີ່ມະຫັດສະຈັນຂອງພຣະເຢຊູຄຣິດໄດ້ເຮັດໃຫ້ສານຸສິດໃນສະໄໝກ່ອນປະກາດວ່າ: “ທ່ານຜູ້ນີ້ເປັນຜູ້ໃດໜໍ, ແມ່ນແຕ່ລົມ ແລະ ຟອງທະເລກໍຍອມຟັງຄວາມເພິ່ນ.”⁹

ຂະນະທີ່ອັກຄະສາວົກໃນສະໄໝກ່ອນໄດ້ຕິດຕາມພຣະເຢຊູຄຣິດ ແລະ ໄດ້ຍິນພຣະອົງສິດສອນພຣະກິດຕິຄຸນ, ພວກເພິ່ນໄດ້ເຫັນສິ່ງມະຫັດສະຈັນຫລາຍຢ່າງ. ພວກເພິ່ນໄດ້ເຫັນວ່າ “ຄົນຕາບອດເຫັນຮຸ່ງໄດ້, ຄົນຂາຫ້ານຍ່າງໄດ້, ຜູ້ທີ່ເປັນພະຍາດຂີ້ທູດກໍດີສະອາດ, ຄົນຫູໜວກກໍໄດ້ຍິນ, ຄົນຕາຍແລ້ວເປັນຄືນມາ, ແລະ ຂ່າວປະເສີດກໍມີການປະກາດແກ່ຄົນຍາກຈົນ.”¹⁰

ສິ່ງມະຫັດສະຈັນ, ເຄື່ອງໝາຍ, ແລະ ສິ່ງແປກປະຫລາດກໍມີຫລາຍໃນບັນດາຜູ້ຕິດຕາມພຣະເຢຊູຄຣິດໃນວັນເວລານີ້, ໃນຊີວິດຂອງທ່ານ ແລະ ຂອງຂ້າພະເຈົ້າ. ສິ່ງມະຫັດສະຈັນແມ່ນການກະທຳຈາກສະຫວັນ, ການສະແດງໃຫ້ປະຈັກ ແລະ ການສະແດງອອກເຖິງອຳນາດທີ່ບໍ່ມີຂອບເຂດຂອງພຣະເຈົ້າ ແລະ ການຢືນຢັນວ່າພຣະອົງ “ເປັນເໝືອນກັນເຊັ່ນມື້ວານນີ້, ມື້ນີ້, ແລະ ຕະຫລອດການ.”¹¹ ພຣະເຢຊູຄຣິດ, ພຣະອົງທີ່ໄດ້ສ້າງທະເລ, ສາມາດເຮັດໃຫ້ມັນສະຫງົບລົງ; ພຣະອົງທີ່ເຮັດໃຫ້ຄົນຕາບອດເຫັນຮຸ່ງສາມາດຊ່ວຍເຮົາໃຫ້ເອົາໃຈໃສ່ເລື່ອງທີ່ເປັນທາງວິນຍານ; ພຣະອົງທີ່ໄດ້ເຮັດໃຫ້ຄົນຂີ້ທູດຫາຍດີສະອາດສາມາດປິ່ນປົວຄວາມເຈັບປ່ວຍຂອງເຮົາ; ພຣະອົງທີ່ໄດ້ປິ່ນປົວຜູ້ຊາຍທີ່ຍ່າງບໍ່ໄດ້ກໍສາມາດເອີ້ນໃຫ້ເຮົາລຸກຂຶ້ນໂດຍກ່າວວ່າ “ຈົ່ງຕາມເຮົາມາ.”¹²

ພວກທ່ານຫລາຍຄົນກໍໄດ້ເຫັນສິ່ງມະຫັດສະຈັນ, ຫລາຍກວ່າທີ່ທ່ານຈະຮັບຮູ້. ມັນອາດເບິ່ງຄືວ່າເປັນເລື່ອງເລັກນ້ອຍເມື່ອປຽບທຽບໃສ່ກັບເລື່ອງທີ່ພຣະເຢຊູເຮັດໃຫ້ຄົນຕາຍກັບມາມີຊີວິດ. ແຕ່ຄວາມຍິ່ງໃຫຍ່ບໍ່ໄດ້ຈຳແນກວ່ານັ້ນເປັນສິ່ງມະຫັດສະຈັນ, ພຽງແຕ່ວ່າສິ່ງມະຫັດສະຈັນນັ້ນໄດ້ມາຈາກພຣະເຈົ້າ. ບາງຄົນແນະນຳວ່າສິ່ງມະຫັດສະຈັນກໍເປັນພຽງແຕ່ເລື່ອງບັງເອີນ ຫລື ໂຊກດີເທົ່ານັ້ນ. ແຕ່ສາດສະດານີໄຟໄດ້ປະນາມຜູ້ຄົນທີ່ “ບໍ່ຫົວຊາຕໍ່ອຳນາດ ແລະ ສິ່ງມະຫັດສະຈັນຂອງພຣະເຈົ້າ, ແລະ ສິດສອນເຖິງປັນຍາຂອງຕົນເອງ, ເພື່ອພວກເຂົາຈະຫາຜົນປະໂຫຍດ ແລະ ບົດຢ່ຳຢີໜ້າຂອງຄົນຍາກຈົນ.”¹³

ສິ່ງມະຫັດສະຈັນທຳງານໂດຍອຳນາດແຫ່ງສະຫວັນ ໂດຍພຣະອົງຜູ້ “ຊົງລິດອຳນາດຍິ່ງໃຫຍ່ທີ່ຈະຊ່ວຍໃຫ້ລອດ.”¹⁴ ສິ່ງມະຫັດສະຈັນເປັນການຂະຫຍາຍແຜນນິລັນດອນຂອງພຣະເຈົ້າ; ສິ່ງມະຫັດສະຈັນເປັນສາຍຊູຊີບຈາກສະຫວັນເຖິງແຜ່ນດິນໂລກ.

ໃນລະດູໃບໄມ້ຫລົ່ນປີຜ່ານມາ ຊິດສະເຕີ ແຣັສ໌ແບນ ແລະ ຂ້າພະເຈົ້າໄດ້ຢູ່ລະຫວ່າງທາງໄປສູ່ເມືອງໂກເຊັນ ລັດຢູທາ, ເພື່ອໄປຮ່ວມລາຍການ Face to Face [ໜ້າຕໍ່ໜ້າ] ທີ່ຖືກຖ່າຍທອດອອກໄປສູ່ຫລາຍກວ່າ 600,000 ຄົນໃນ 16 ພາສາ.¹⁵ ລາຍການນັ້ນແມ່ນເຈາະຈົງໃສ່ເຫດການຂອງການຟື້ນຟູພຣະກິດຕິຄຸນຂອງພຣະເຢຊູຄຣິດ, ໂດຍມີຄຳຖາມທີ່ຜູ້ໃຫຍ່ໜຸ່ມໄດ້ສົ່ງເຂົ້າໄປ ຈາກທົ່ວໂລກ. ຊິດສະເຕີ ແຣັສ໌ແບນ ແລະ ຂ້າພະເຈົ້າໄດ້ທົບທວນຄຳຖາມເປັນສ່ວນຕົວ; ມັນໄດ້ໃຫ້ໂອກາດພວກເຮົາທີ່ຈະເປັນພະຍານເຖິງໂຈເຊັບ ສະມິດ ວ່າເປັນສາດສະດາຂອງພຣະເຈົ້າ, ອຳນາດຂອງການເປີດເຜີຍໃນຊີວິດຂອງເຮົາ, ການຟື້ນຟູອັນຕໍ່ເນື່ອງຂອງພຣະກິດຕິຄຸນຂອງພຣະເຢຊູຄຣິດ, ແລະ ຄວາມຈິງ ແລະ ພຣະບັນຍັດທີ່ພວກເຮົາຖະໜອມ. ຫລາຍຄົນທີ່ກຳລັງຮັບຟັງຢູ່ໃນມື້ນີ້ກໍໄດ້ເປັນພາກສ່ວນຂອງລາຍການທີ່ມະຫັດສະຈັນນັ້ນ.

ໃນຕອນຕົ້ນການຖ່າຍທອດວ່າຈະເລີ່ມຕົ້ນຢູ່ທີ່ປ່າສັກສິດ ໃນພາກເໜືອຂອງລັດນິວຢອກ, ບ່ອນທີ່, ດັ່ງໂຈເຊັບ ສະມິດ ໄດ້ເປັນພະຍານວ່າ: “ຂ້າພະເຈົ້າໄດ້ເຫັນສອງພຣະອົງປະທັບຢືນຢູ່ໃນອາກາດຊື່ຫົວຂອງຂ້າພະເຈົ້າ, ຄວາມສະຫວ່າງ ແລະ ລັດສະໝີພາບຂອງທັງສອງພຣະອົງນັ້ນເກີນກວ່າທີ່ຈະພັນລະນາໄດ້. ອົງໜຶ່ງໄດ້ຮັບສັ່ງກັບຂ້າພະເຈົ້າ, ໂດຍເອີ້ນຊື່ຂອງຂ້າພະເຈົ້າ ແລະ ຊີ້ພຣະຫັດໄປຫາອີກອົງໜຶ່ງ ແລະ ກ່າວວ່າ—ນີ້ຄືບຸດທີ່ຮັກຂອງເຮົາ. ຈົ່ງຟັງທ່ານ!”¹⁶ ນັ້ນແຫລະ, ອ້າຍເອື້ອຍນ້ອງທັງຫລາຍ, ຄືສິ່ງມະຫັດສະຈັນ.

ຮູບພາບ

ສາກພາບພະຍົນເຢຣູຊາເລັມໃນເມືອງໂກເຊັນ, ລັດຢູທາ

ການລະບາດຕະຫລອດທົ່ວໂລກໄດ້ບັງຄັບໃຫ້ພວກເຮົາຍ້າຍການຖ່າຍທອດນັ້ນໄປທີ່ເມືອງໂກເຊັນ, ລັດຢູທາ, ບ່ອນທີ່ສາດສະໜາຈັກຂອງພຣະເຢຊູຄຣິດແຫ່ງໄພ່ພົນຍຸກສຸດທ້າຍໄດ້ສ້າງສ່ວນໜຶ່ງຂອງເຢຣູຊາເລັມເກົ່າຂຶ້ນຄືນໃໝ່, ເພື່ອການຖ່າຍທຳພາບພະຍົນ. ຊິດສະເຕີ ແຣັສ໌ແບນ ແລະ ຂ້າພະເຈົ້າໄດ້ຢູ່ພາຍໃນສາມສີ່ກິໂລແມັດຈາກເມືອງໂກເຊັນ ໃນແລງວັນອາທິດຕອນທີ່ພວກເຮົາໄດ້ເຫັນຄວັນໄຟໜາຕຶບມາຈາກທິດທາງທີ່ພວກເຮົາຈະໄປຫາ. ໄຟໄໝ້ປ່າກຳລັງໄໝ້ຢ່າງແຮງໃນເຂດນັ້ນ, ແລະ ພວກເຮົາກໍເປັນຫ່ວງຢ້ານວ່າການຖ່າຍທອດອາດຕົກຢູ່ໃນອັນຕະລາຍ. ມັນເປັນແນວນັ້ນແທ້ໆ, ຕອນເວລາ 6 ໂມງຍັງ 20, ເວລາຖ່າຍທອດຂອງພວກເຮົາ, ໄຟຟ້າໃນສະຖານທີ່ນັ້ນກໍດັບໄປ. ບໍ່ມີໄຟຟ້າ! ບໍ່ມີການຖ່າຍທອດ. ມີເຄື່ອງຈັກປັ່ນໄຟຟ້າໜ່ວຍໜຶ່ງທີ່ບາງຄົນໄດ້ຄິດວ່າພວກເຮົາອາດໃຊ້ໄດ້ເພື່ອປັ່ນໄຟ, ແຕ່ບໍ່ມີການຮັບຮອງວ່າມັນຈະມີພະລັງງານພໍສຳລັບອຸປະກອນທີ່ມີໃຫ້ໃຊ້ຢູ່ທີ່ນັ້ນຫລືບໍ່.

ຮູບພາບ

ຄວັນໄຟ

ເຮົາທຸກຄົນທີ່ຈະກ່າວໃນລາຍການ, ລວມທັງຜູ້ບັນຍາຍລາຍການ, ນັກດົນຕີ, ແລະ ນັກວິຊາການ—ແມ່ນແຕ່ຜູ້ໃຫຍ່ໜຸ່ມ 20 ຄົນທີ່ເປັນຍາດພີ່ນ້ອງຂອງພວກເຮົາເອງ—ກໍມີຄວາມຕັ້ງໃຈຢ່າງເຕັມທີ່ໃນສິ່ງທີ່ຈະເກີດຂຶ້ນນັ້ນ. ຂ້າພະເຈົ້າໄດ້ອອກໄປຈາກນ້ຳຕາ ແລະ ຄວາມສັບສົນຂອງເຂົາເຈົ້າ ແລະ ໄດ້ອ້ອນວອນກັບພຣະຜູ້ເປັນເຈົ້າທູນຂໍສິ່ງມະຫັດສະຈັນ. “ພຣະບິດາເທິງສະຫວັນ,” ຂ້າພະເຈົ້າໄດ້ອະທິຖານ, “ໜ້ອຍເທື່ອທີ່ຂ້ານ້ອຍໄດ້ທູນຂໍສິ່ງມະຫັດສະຈັນ, ແຕ່ຂ້ານ້ອຍທູນຂໍສິ່ງນັ້ນໃນເວລານີ້ ການປະຊຸມນີ້ຕ້ອງເກີດຂຶ້ນສຳລັບຜູ້ໃຫຍ່ໜຸ່ມຂອງພວກເຮົາທຸກຄົນຕະຫລອດທົ່ວໂລກ. ພວກຂ້ານ້ອຍຕ້ອງການໃຫ້ມີໄຟຟ້ານັ້ນຕໍ່ໄປ ຖ້າຫາກວ່ານັ້ນເປັນຕາມພຣະປະສົງຂອງພຣະອົງ.”

ເວລາ 6 ໂມງເຈັດນາທີ, ໄຟຟ້ານັ້ນໄດ້ດັບໄປໄວເທົ່າໃດ, ມັນກໍໄດ້ກັບຄືນມາໄວເທົ່ານັ້ນ. ທຸກສິ່ງເລີ່ມທຳງານ, ຈາກສຽງເພງ ແລະ ໄມໂກຣໂຟນໄປເຖິງວິດີໂອ ແລະ ອຸປະກອນການຖ່າຍທອດທຸກສິ່ງ. ພວກເຮົາກໍໄດ້ເລີ່ມລາຍການຖ່າຍທອດທັນທີ. ພວກເຮົາໄດ້ເຫັນສິ່ງມະຫັດສະຈັນ.

ຮູບພາບ

ການສະແດງເພງລະຫວ່າງລາຍການໜ້າຕໍ່ໜ້າ

ຂະນະທີ່ຊິດສະເຕີ ແຣັສ໌ແບນ ແລະ ຂ້າພະເຈົ້າຢູ່ໃນລົດຕອນກັບບ້ານທ້າຍແລງມື້ນັ້ນ, ປະທານ ແລະ ຊິດສະຕີ ແນວສັນໄດ້ສົ່ງຂໍ້ຄວາມຫາພວກເຮົາ ມີຄວາມວ່າ: “ຣອນ, ພວກເຮົາຢາກໃຫ້ພວກເຈົ້າຮູ້ວ່າ ທັນທີທີ່ພວກເຮົາໄດ້ຍິນວ່າໄຟຟ້າດັບ, ພວກເຮົາໄດ້ອະທິຖານທູນຂໍສິ່ງມະຫັດສະຈັນ.”

ຢູ່ໃນພຣະຄຳພີຍຸກສຸດທ້າຍໄດ້ມີບັນທຶກໄວ້ວ່າ, “ເພາະເຮົາ, ພຣະຜູ້ເປັນເຈົ້າ, ໄດ້ຍື່ນມືຂອງເຮົາອອກໄປສະແດງອຳນາດຂອງສະຫວັນ; ພວກເຈົ້າບໍ່ສາມາດເຫັນມັນຕອນນີ້, ແຕ່ບໍ່ດົນພວກເຈົ້າຈະເຫັນມັນ, ແລະ ຮູ້ວ່າເຮົາເປັນຢູ່, ແລະ ວ່າເຮົາຈະມາ ແລະ ປົກຄອງກັບຜູ້ຄົນຂອງເຮົາ.”¹⁷

ສິ່ງນັ້ນກໍໄດ້ເກີດຂຶ້ນແທ້ໆ. ພຣະຜູ້ເປັນເຈົ້າໄດ້ຍື່ນພຣະຫັດຂອງພຣະອົງອອກໄປ, ແລະ ໄຟຟ້າກໍໄດ້ກັບມາ.

ສິ່ງມະຫັດສະຈັນທຳງານຜ່ານທາງພະລັງແຫ່ງສັດທາ, ດັ່ງທີ່ປະທານແນວສັນໄດ້ສິດສອນເຮົາຢ່າງມີພະລັງ ໃນພາກແລ້ວນີ້. ສາດສະດາໂມໂຣໄນໄດ້ສັ່ງສອນຜູ້ຄົນວ່າ, “ເພາະຖ້າຫາກບໍ່ມີສັດທາໃນບັນດາລູກຫລານມະນຸດ ພຣະເຈົ້າຈະເຮັດສິ່ງມະຫັດສະຈັນໃນບັນດາພວກເຂົາບໍ່ໄດ້; ດັ່ງນັ້ນ ພຣະອົງຈຶ່ງບໍ່ປະກົດຕົວຈົນກວ່າຫລັງຈາກທີ່ພວກເຂົາມີສັດທາ.”

ເພິ່ນໄດ້ກ່າວຕໍ່ໄປວ່າ:

“ຈົ່ງເບິ່ງ, ມັນແມ່ນສັດທາຂອງແອວມາ ແລະ ແອມມິວເລັກທີ່ເຮັດໃຫ້ຄຸກພັງທະລາຍລົງພື້ນດິນ.

“ຈົ່ງເບິ່ງ, ມັນແມ່ນສັດທາຂອງນີໄຟ ແລະ ລີໄຮທີ່ເຮັດໃຫ້ເກີດການປ່ຽນແປງກັບຊາວເລມັນ, ຈົນວ່າພວກເຂົາໄດ້ຮັບບັບຕິສະມາດ້ວຍໄຟ ແລະ ດ້ວຍພຣະວິນຍານບໍລິສຸດ.

ຈົ່ງເບິ່ງ, ມັນແມ່ນສັດທາຂອງອຳໂມນ ແລະ ພີ່ນ້ອງຂອງລາວ ຊຶ່ງໄດ້ເຮັດສິ່ງມະຫັດສະຈັນອັນຍິ່ງໃຫຍ່ເຊັ່ນນີ້ໃນບັນດາຊາວເລມັນ. …

“ແລະ ທັງບໍ່ວ່າເວລາໃດກໍຕາມ ຈະບໍ່ມີຜູ້ໃດສາມາດເຮັດສິ່ງມະຫັດສະຈັນໄດ້ເລີຍຈົນກວ່າຜູ້ນັ້ນຈະມີສັດທາເສຍກ່ອນ; ດັ່ງນັ້ນ ກ່ອນອື່ນໝົດເຂົາຕ້ອງເຊື່ອໃນພຣະບຸດຂອງພຣະເຈົ້າເສຍກ່ອນ.”¹⁸

ຂ້າພະເຈົ້າສາມາດກ່າວຕື່ມໃສ່ຂໍ້ພຣະຄຳພີເຫລົ່ານັ້ນໄດ້ວ່າ, “ມັນແມ່ນສັດທາຂອງນັກສະແດງຜູ້ໃຫຍ່ໜຸ່ມທີ່ຈິງໃຈ, ຜູ້ຖ່າຍທອດມືອາຊີບ, ຜູ້ນຳຂອງສາດສະໜາຈັກ ແລະ ສະມາຊິກທັງຫລາຍ, ອັກຄະສາວົກ, ແລະ ສາດສະດາຂອງພຣະເຈົ້າທີ່ໄດ້ສະແຫວງຫາສິ່ງມະຫັດສະຈັນທີ່ຍິ່ງໃຫຍ່ ທີ່ເຮັດໃຫ້ໄຟຟ້າໄດ້ກັບຄືນມາສູ່ສະຖານທີ່ຖ່າຍທຳພາບພະຍົນທີ່ຫ່າງໄກສອກຫລີກໃນເມືອງໂກເຊັນ, ລັດຢູທາ.”

ສິ່ງມະຫັດສະຈັນຈະມີມາເພື່ອເປັນຄຳຕອບຕໍ່ຄຳອະທິຖານ. ມັນຈະບໍ່ເປັນໄປຕາມສິ່ງທີ່ເຮົາທູນຂໍສະເໝີໄປ ຫລື ສິ່ງທີ່ເຮົາຄາດຫວັງ, ແຕ່ເມື່ອເຮົາໄວ້ວາງໃຈໃນພຣະຜູ້ເປັນເຈົ້າ, ພຣະອົງຈະສະຖິດຢູ່ທີ່ນັ້ນ, ແລະ ພຣະອົງຈະເຮັດສິ່ງທີ່ຖືກຕ້ອງ. ພຣະອົງຈະປັບສິ່ງມະຫັດສະຈັນໃຫ້ເຂົ້າກັບເວລາທີ່ເຮົາຕ້ອງການມັນ.

ພຣະຜູ້ເປັນເຈົ້າສະແດງສິ່ງມະຫັດສະຈັນເພື່ອເຕືອນເຮົາເຖິງອຳນາດຂອງພຣະອົງ, ຄວາມຮັກທີ່ພຣະອົງມີໃຫ້ເຮົາ, ອິດທິພົນຂອງພຣະອົງໃນປະສົບການມະຕະຂອງເຮົາ, ແລະ ຄວາມປາດຖະໜາຂອງພຣະອົງທີ່ຈະສິດສອນເຖິງສິ່ງສຳຄັນທີ່ສຸດ. “ຄົນທີ່ມີສັດທາໃນເຮົາທີ່ຈະຮັບການປິ່ນປົວໃຫ້ຫາຍດີ,” ພຣະອົງໄດ້ກ່າວຕໍ່ໄພ່ພົນໃນປີ 1831, ແລະ ຄຳສັນຍານັ້ນກໍຍັງຄົງຢູ່ຕໍ່ໄປໃນວັນເວລານີ້ວ່າ, “ແລະ ບໍ່ໄດ້ຖືກກຳນົດໃຫ້ຕາຍ, ຈະຫາຍດີ.”¹⁹ ມີກົດອອກຄຳສັ່ງໃນສະຫວັນ, ແລະ ເຮົາກໍຂຶ້ນຢູ່ກັບກົດເຫລົ່ານັ້ນສະເໝີໄປ.

ກໍມີບາງເວລາທີ່ເຮົາຫວັງຢາກມີສິ່ງມະຫັດສະຈັນເພື່ອປິ່ນປົວໃຫ້ຄົນທີ່ເຮົາຮັກຫາຍດີ, ໃຫ້ປັບປ່ຽນການກະທຳທີ່ບໍ່ຍຸດຕິທຳ, ຫລື ເພື່ອເຮັດໃຫ້ຫົວໃຈທີ່ຂົມຂື່ນ ຫລື ຜູ້ຄົນທີ່ຜິດຫວັງອ່ອນລົງ. ການພິຈາລະນາສິ່ງຕ່າງໆຜ່ານທັດສະນະຂອງມະນຸດ, ເຮົາຢາກໃຫ້ພຣະຜູ້ເປັນເຈົ້າເຂົ້າມາແຊກແຊງ, ເພື່ອສ້ອມແປງສິ່ງທີ່ແຕກຫັກ. ຜ່ານສັດທາ, ສິ່ງມະຫັດສະຈັນຈະມີມາ, ເຖິງແມ່ນວ່າມັນຈະບໍ່ເກີດຂຶ້ນຕາມເວລາຂອງເຮົາ ຫລື ດ້ວຍທາງແກ້ໄຂທີ່ເຮົາໄດ້ປາດຖະໜາ. ນັ້ນໝາຍຄວາມວ່າເຮົາບໍ່ຊື່ສັດພໍ ຫລື ບໍ່ສົມຄວນຈະໄດ້ຮັບການແຊກແຊງຂອງພຣະອົງບໍ? ບໍ່ເລີຍ. ເຮົາເປັນທີ່ຮັກຂອງພຣະຜູ້ເປັນເຈົ້າ. ພຣະອົງໄດ້ສະລະພຣະຊົນຊີບຂອງພຣະອົງເພື່ອເຮົາ, ແລະ ການຊົດໃຊ້ຂອງພຣະອົງຍັງປົດປ່ອຍເຮົາຈາກພາລະໜັກ ແລະ ບາບຂອງເຮົາຕໍ່ໄປ ຂະນະທີ່ເຮົາກັບໃຈ ແລະ ເຂົ້າໃກ້ພຣະອົງ.

ພຣະຜູ້ເປັນເຈົ້າໄດ້ເຕືອນເຮົາວ່າ, “ຄວາມຄິດເຮົານັ້ນບໍ່ຄືຄວາມຄິດຂອງພວກເຈົ້າ.”²⁰ ພຣະອົງສະເໜີວ່າ, “ຈົ່ງມາຫາເຮົາທຸກຄົນທີ່ອິດເມື່ອຍຈາກການແບກຫາບພາລະໜັກ ແລະ ເຮົາຈະໃຫ້ພວກເຈົ້າໄດ້ພັກຜ່ອນ”²¹—ພັກຜ່ານຈາກຄວາມກັງວົນ, ຄວາມໝົດຫວັງ, ຄວາມຢ້ານກົວ, ການບໍ່ເຊື່ອຟັງ, ຄວາມເປັນຫ່ວງຄົນທີ່ເຮົາຮັກ, ຄວາມຝັນທີ່ສູນຫາຍ ຫລື ແຕກສະຫລາຍໄປ. ຄວາມສະຫງົບສຸກທ່າມກາງຄວາມສັບສົນ ຫລື ຄວາມໂສກເສົ້າກໍເປັນສິ່ງມະຫັດສະຈັນ. ຂໍຈົ່ງຈື່ຈຳພຣະຄຳຂອງພຣະຜູ້ເປັນເຈົ້າທີ່ວ່າ: “ເຮົາບໍ່ໄດ້ກ່າວໃຫ້ຄວາມສະຫງົບແກ່ຈິດໃຈຂອງເຈົ້າບໍກ່ຽວກັບເລື່ອງນີ້? ເຈົ້າຈະມີພະຍານໃດຍິ່ງໃຫຍ່ໄປກວ່າພະຍານຈາກພຣະເຈົ້າ?”²² ສິ່ງມະຫັດສະຈັນກໍແມ່ນວ່າພຣະເຢຊູຄຣິດ, ພຣະເຢໂຮວາຜູ້ຍິ່ງໃຫຍ່, ພຣະບຸດຂອງພຣະເຈົ້າອົງສູງສຸດ, ກຳລັງຕອບຮັບດ້ວຍຄວາມສະຫງົບສຸກ.

ດັ່ງທີ່ພຣະອົງໄດ້ປະກົດຕໍ່ນາງມາຣີຢູ່ໃນສວນ, ເອີ້ນຊື່ນາງ, ພຣະອົງກໍເອີ້ນຫາເຮົາໃຫ້ໃຊ້ສັດທາຂອງເຮົາ. ນາງມາຣີໄດ້ຫາທາງທີ່ຈະຮັບໃຊ້ພຣະອົງ ແລະ ດູແລພຣະອົງ. ການຟື້ນຄືນພຣະຊົນຂອງພຣະອົງບໍ່ໄດ້ເປັນສິ່ງທີ່ນາງໄດ້ຄາດຫວັງ, ແຕ່ມັນໄດ້ເປັນໄປຕາມແຜນແຫ່ງຄວາມສຸກອັນຍິ່ງໃຫຍ່.

“ຈົ່ງລົງມາຈາກໄມ້ກາງແຂນເບິ່ງດູ,”²³ ຝູງຊົນທີ່ບໍ່ເຊື່ອໄດ້ເຍາະເຍີ້ຍພຣະອົງຢູ່ທີ່ພູກະໂຫລກຫົວ. ພຣະອົງສາມາດສະແດງສິ່ງມະຫັດສະຈັນດັ່ງກ່າວໄດ້. ແຕ່ພຣະອົງໄດ້ຮູ້ທີ່ສຸດຕັ້ງແຕ່ຕອນຕົ້ນ, ແລະ ພຣະອົງຕັ້ງພຣະໄທທີ່ຈະຊື່ສັດຕໍ່ແຜນຂອງພຣະບິດາຂອງພຣະອົງ. ເຮົາບໍ່ຄວນລົ້ມເຫລວທີ່ຈະເຂົ້າໃຈຕົວຢ່າງນີ້.

ຕໍ່ເຮົາໃນເວລາທີ່ມີການທົດລອງ ພຣະອົງໄດ້ກ່າວວ່າ, “ຈົ່ງເບິ່ງຮອຍແຜທີ່ຖືກແທງຢູ່ຂ້າງຂອງເຮົາ, ແລະ ຮອຍຕະປູຢູ່ໃນມື ແລະ ຕີນຂອງເຮົານຳອີກ; ຈົ່ງຊື່ສັດ, ຈົ່ງຮັກສາພຣະບັນຍັດຂອງເຮົາ, ແລະ ເຈົ້າຈະໄດ້ຮັບອານາຈັກສະຫວັນເປັນມູນມໍລະດົກ.”²⁴ ນັ້ນແຫລະ, ອ້າຍເອື້ອຍນ້ອງທັງຫລາຍ, ຄືສິ່ງມະຫັດສະຈັນທີ່ຖືກສັນຍາໄວ້ໃຫ້ແກ່ເຮົາທຸກຄົນ.

ໃນວັນອາທິດອີດສະເຕີນີ້ ຂະນະທີ່ເຮົາສະເຫລີມສະຫລອງສິ່ງມະຫັດສະຈັນຂອງການຟື້ນຄືນພຣະຊົນຂອງພຣະຜູ້ເປັນເຈົ້າຂອງເຮົາ, ໃນຖານະອັກຄະສາວົກຂອງພຣະເຢຊູຄຣິດ ຂ້າພະເຈົ້າອະທິຖານດ້ວຍຄວາມຖ່ອມຕົວວ່າ ທ່ານຈະຮູ້ສຶກເຖິງອຳນາດຂອງພຣະຜູ້ໄຖ່ໃນຊີວິດຂອງທ່ານ, ວ່າຄຳອຸທອນຂອງທ່ານຕໍ່ພຣະບິດາເທິງສະຫວັນຂອງເຮົາຈະໄດ້ຮັບຄຳຕອບດ້ວຍຄວາມຮັກ ແລະ ຄຳໝັ້ນສັນຍາທີ່ພຣະເຢຊູຄຣິດໄດ້ສະແດງໃຫ້ເຫັນຜ່ານທາງການປະຕິບັດສາດສະໜາກິດຂອງພຣະອົງ. ຂ້າພະເຈົ້າອະທິຖານວ່າທ່ານຈະຢືນຢູ່ຢ່າງແນ່ວແນ່ ແລະ ຊື່ສັດໃນທຸກສິ່ງທີ່ຈະເກີດຂຶ້ນ. ແລະ ຂ້າພະເຈົ້າອວຍພອນທ່ານວ່າ ສິ່ງມະຫັດສະຈັນຈະເກີດຂຶ້ນດັ່ງທີ່ພວກເຮົາໄດ້ປະສົບຢູ່ທີ່ເມືອງໂກເຊັນ—ຖ້າຫາກວ່ານັ້ນເປັນພຣະປະສົງຂອງພຣະຜູ້ເປັນເຈົ້າ. ຂໍໃຫ້ຊອກຫາພອນທີ່ມາຈາກສະຫວັນເຫລົ່ານີ້ໃນຊີວິດຂອງທ່ານ ຂະນະທີ່ທ່ານ “ສະແຫວງຫາພຣະເຢຊູອົງນີ້ ຜູ້ຊຶ່ງສາດສະດາ ແລະ ອັກຄະສາວົກໄດ້ຂຽນໄວ້, ເພື່ອພຣະຄຸນຂອງພຣະເຈົ້າອົງເປັນພຣະບິດາ, ແລະ ຂອງອົງພຣະເຢຊູຄຣິດເຈົ້ານຳອີກ, ແລະ ພຣະວິນຍານບໍລິສຸດ ຊຶ່ງເປັນພະຍານເຖິງພວກພຣະອົງ, ຈະຢູ່ນຳ ແລະ ສະຖິດຢູ່ໃນທ່ານຕະຫລອດໄປ.”²⁵ ໃນພຣະນາມຂອງພຣະເຢຊູຄຣິດ, ອາແມນ.