ພຣະເຢຊູຄຣິດ: ຜູ້ດູແລຈິດວິນຍານຂອງເຮົາ
ເມື່ອເຮົາກັບໃຈຈາກບາບຂອງເຮົາຢ່າງຈິງໃຈ, ເຮົາອະນຸຍາດໃຫ້ການເສຍສະລະຊົດໃຊ້ຂອງພຣະຄຣິດມີຜົນດີຄົບຖ້ວນໃນຊີວິດຂອງເຮົາ.
ອ້າຍເອື້ອຍນ້ອງທີ່ຮັກແພງຂອງຂ້າພະເຈົ້າ, ໃນເຊົ້າວັນອີດສະເຕີທີ່ຮຸ່ງໂລດມື້ນີ້ ຫົວໃຈຂອງຂ້າພະເຈົ້າປິຕິຍິນດີເມື່ອຈື່ຈຳການກະທຳທີ່ປະເສີດສຸດ, ສະຫງ່າລາສີທີ່ສຸດ, ເໜືອທີ່ຈະວັດແທກໄດ້ ທີ່ໄດ້ເກີດຂຶ້ນໃນປະຫວັດສາດຂອງມະນຸດ—ການເສຍສະລະຊົດໃຊ້ຂອງພຣະຜູ້ເປັນເຈົ້າຂອງເຮົາ, ພຣະເຢຊູຄຣິດ. ຖ້ອຍຄຳທີ່ໂດດເດັ່ນຂອງສາດສະດາເອຊາຢາ ຂະຫຍາຍຄວາມຍິ່ງໃຫຍ່ ແລະ ບໍ່ເຫັນແກ່ຕົວຂອງພຣະຜູ້ຊ່ວຍໃຫ້ລອດ ທີ່ເອື້ອອາທອນ ແລະ ເສຍສະລະເພື່ອລູກໆຂອງພຣະເຈົ້າທຸກຄົນວ່າ:
“ແທ້ຈິງທ່ານທົນຕໍ່ຄວາມທຸກທີ່ເປັນຂອງພວກເຮົາ, ແລະ ທົນຄວາມເຈັບປວດທີ່ພວກເຮົາສົມຄວນໄດ້ຮັບ: ຄວາມລຳບາກທີ່ທ່ານຮັບເອົານັ້ນພວກເຮົາຄິດຢູ່ສະເໝີວ່າເປັນການລົງໂທດມາຈາກພຣະເຈົ້າ.
“ແຕ່ຍ້ອນການບາບຂອງພວກເຮົານັ້ນ ທ່ານຈຶ່ງໄດ້ຮັບບາດເຈັບ, ຖືກຂ້ຽນຖືກຕີຍ້ອນການຊົ່ວຮ້າຍຂອງພວກເຮົາ: ພວກເຮົາໄດ້ຮັບການປິ່ນປົວໃຫ້ດີ ຍ້ອນໂທດກຳທີ່ທ່ານຮັບ; ດີປົກກະຕິຍ້ອນການຕົບຕີທີ່ທ່ານຮັບເອົາ.”1
ໂດຍການອາສາຮັບເອົາບາບຂອງມະນຸດຊາດທັງປວງດ້ວຍຕົວພຣະອົງເອງ, ໂດຍການຖືກຄຶງທີ່ໄມ້ກາງແຂນຢ່າງທາລຸນ, ແລະ ໂດຍການເອົາຊະນະຄວາມຕາຍຢ່າງມີໄຊໃນມື້ທີສາມ,2 ພຣະເຢຊູໄດ້ໃຫ້ຄວາມສຳຄັນທີ່ສັກສິດຫລາຍຂຶ້ນຕໍ່ພິທີການປັດສະຄາ ທີ່ໄດ້ຖືກມອບໃຫ້ຊາວອິດສະຣາເອນໃນສະໄໝບູຮານ.3 ໃນການບັນລຸຄຳທຳນາຍ, ພຣະອົງໄດ້ສະເໜີມອບພຣະກາຍ ແລະ ໂລຫິດຂອງພຣະອົງເອງ ໃຫ້ເປັນການເສຍສະລະຄັ້ງສຸດທ້າຍທີ່ຍິ່ງໃຫຍ່,4 ເພື່ອຢືນຢັນເຄື່ອງໝາຍແບບດັ້ງເດີມ ທີ່ຖືກໃຊ້ໃນການສະຫລອງງານປັດສະຄາຂອງພຣະຜູ້ເປັນເຈົ້າ.5 ໃນການກະທຳດັ່ງນີ້, ພຣະຄຣິດໄດ້ທົນທຸກທໍລະມານທັງທາງພຣະກາຍ ແລະ ພຣະວິນຍານ ທີ່ເກີນກວ່າຄວາມນຶກຄິດຂອງມະນຸດຈະເຂົ້າໃຈໄດ້. ພຣະຜູ້ຊ່ວຍໃຫ້ລອດເອງ ໄດ້ກ່າວວ່າ:
“ເພາະຈົ່ງເບິ່ງ, ເຮົາພຣະເຈົ້າ, ໄດ້ທົນທຸກທໍລະມານກັບສິ່ງເຫລົ່ານີ້ແທນທຸກຄົນ, …
“ຊຶ່ງຄວາມທຸກທໍລະມານເຮັດໃຫ້ຕົວເຮົາເອງ, ແມ່ນແຕ່ພຣະເຈົ້າ, ຜູ້ຍິ່ງໃຫຍ່ທີ່ສຸດໃນບັນດາທຸກສິ່ງທັງປວງ, ຕ້ອງສັ່ນເພາະຄວາມເຈັບປວດ, ແລະ ເລືອດໄຫລອອກຈາກທຸກຂຸມຂົນ, ແລະ ທົນທຸກທໍລະມານທັງຮ່າງກາຍ ແລະ ວິນຍານ—ແລະ ປາດຖະໜາທີ່ເຮົາຈະບໍ່ຕ້ອງດື່ມຈອກອັນຂົມຂື່ນນັ້ນ, ແລະ ຢຸດສະຫງັກຢູ່—
“ເຖິງຢ່າງໃດກໍຕາມ, ລັດສະໝີພາບຈົ່ງມີແດ່ພຣະບິດາ, ແລະ ເຮົາໄດ້ຮັບເອົາ ແລະ ໄດ້ສຳເລັດການຕຽມຂອງເຮົາເພື່ອລູກຫລານມະນຸດ.”6
ພຣະຄຣິດໄດ້ສຳເລັດຕາມພຣະປະສົງຂອງພຣະບິດາດ້ວຍຄວາມກະລຸນາ7 ຜ່ານທາງການຊົດໃຊ້ທີ່ບໍ່ມີຂອບເຂດ ແລະ ມີເມດຕາຂອງພຣະອົງ. ພຣະອົງໄດ້ເອົາຊະນະຄວາມຕາຍທາງພຣະກາຍ ແລະ ພຣະວິນຍານ,8 ທີ່ຖືກນຳມາສູ່ໂລກຜ່ານທາງການຕົກ,9 ສະເໜີມອບຄວາມເປັນໄປໄດ້ທີ່ສະຫງ່າລາສີຂອງຄວາມລອດນິລັນດອນໃຫ້ແກ່ເຮົາ.10
ພຣະເຢຊູໄດ້ເປັນຜູ້ດຽວທີ່ສາມາດສຳເລັດການເສຍສະລະນິລັນດອນ ແລະ ສົມບູນແບບນີ້ໃຫ້ແກ່ເຮົາທຸກຄົນ.11 ພຣະອົງຖືກເລືອກ ແລະ ຖືກແຕ່ງຕັ້ງຢູ່ໃນກອງປະຊຸມມະຫາສານໃນສະຫວັນ, ແມ່ນແຕ່ກ່ອນໂລກນີ້ຖືກສ້າງ.12 ນອກເໜືອຈາກນັ້ນ, ໂດຍການກຳເນີດຈາກມານດາທີ່ເປັນມະນຸດ, ພຣະອົງໄດ້ຮັບການສິ້ນພຣະຊົນທາງພຣະກາຍ, ແຕ່ຈາກພຣະເຈົ້າ, ໃນຖານະທີ່ເປັນພຣະບຸດອົງດຽວທີ່ຖືກຳເນີດຂອງພຣະບິດາ, ພຣະອົງໄດ້ຮັບອຳນາດທີ່ຈະສະລະພຣະຊົນຊີບຂອງພຣະອົງເອງ ແລະ ແລ້ວຮັບເອົາມັນຄືນມາໄດ້.13 ນອກຈາກນັ້ນ, ພຣະຄຣິດໄດ້ດຳລົງພຣະຊົນຊີບທີ່ດີພ້ອມ ທີ່ບໍ່ມີມົນທິນ ແລະ, ສະນັ້ນ, ຈຶ່ງຖືກຍົກເວັ້ນຈາກການຮຽກຮ້ອງຂອງຄວາມຍຸດຕິທຳຈາກສະຫວັນ.14 ໃນໂອກາດໜຶ່ງ ສາດສະດາໂຈເຊັບ ສະມິດ ໄດ້ສິດສອນວ່າ:
“ຄວາມລອດຈະມາສູ່ໂລກບໍ່ໄດ້ປາດສະຈາກການໄກ່ເກ່ຍຂອງພຣະເຢຊູຄຣິດ.
“ພຣະເຈົ້າ … ໄດ້ຕຽມການເສຍສະລະ ໃນຂອງປະທານທີ່ເປັນພຣະບຸດຂອງພຣະອົງເອງ, ຜູ້ຈະຖືກສົ່ງມາຕາມການເວລາ ເພື່ອ … ເປີດປະຕູໃຫ້ມະນຸດສາມາດເຂົ້າໄປຫາທີ່ປະທັບຂອງພຣະຜູ້ເປັນເຈົ້າ.”15
ເຖິງແມ່ນວ່າຜ່ານທາງການເສຍສະລະຂອງພຣະຜູ້ຊ່ວຍໃຫ້ລອດໄດ້ຖອນຜົນສະທ້ອນຂອງຄວາມຕາຍທາງຮ່າງກາຍ ໂດຍບໍ່ມີເງື່ອນໄຂ,16 ພຣະອົງບໍ່ໄດ້ກຳຈັດຄວາມຮັບຜິດຊອບສ່ວນຕົວຂອງເຮົາທີ່ຈະກັບໃຈຈາກບາບທີ່ເຮົາໄດ້ກະທຳລົງໄປ.17 ແຕ່, ພຣະອົງໄດ້ເຊື້ອເຊີນເຮົາດ້ວຍຄວາມຮັກ ເພື່ອໃຫ້ຄືນດີກັບພຣະບິດານິລັນດອນຂອງເຮົາ. ຜ່ານທາງພຣະເຢຊູຄຣິດ ແລະ ການເສຍສະລະຊົດໃຊ້ຂອງພຣະອົງ, ເຮົາສາມາດປະສົບການປ່ຽນແປງທີ່ຍິ່ງໃຫຍ່ຂອງຄວາມຄິດ ແລະ ຫົວໃຈ, ທີ່ນຳທັດສະນະຄະຕິໃໝ່ມາໃຫ້, ທັງຕໍ່ພຣະເຈົ້າ ແລະ ຕໍ່ຊີວິດໂດຍທົ່ວໄປ.18 ເມື່ອເຮົາກັບໃຈຈາກບາບຂອງເຮົາຢ່າງຈິງໃຈ, ຫັນຫົວໃຈ ແລະ ຄວາມປະສົງຂອງເຮົາມາຫາພຣະເຈົ້າ ແລະ ພຣະບັນຍັດຂອງພຣະອົງ, ເຮົາສາມາດໄດ້ຮັບການໃຫ້ອະໄພຈາກພຣະອົງ ແລະ ຮູ້ສຶກເຖິງອິດທິພົນຂອງພຣະວິນຍານສັກສິດຫລາຍຂຶ້ນ. ດ້ວຍຄວາມເມດຕາ, ເຮົາຈະຫລີກລ້ຽງການໄດ້ປະສົບຄວາມທຸກທໍລະມານທີ່ພຣະຜູ້ຊ່ວຍໃຫ້ລອດໄດ້ອົດທົນຕໍ່.19
ຂອງປະທານແຫ່ງການກັບໃຈເປັນການສະແດງອອກເຖິງຄວາມເມດຕາຂອງພຣະເຈົ້າ ທີ່ມີໃຫ້ລູກໆຂອງພຣະອົງ ແລະ ເປັນການສາທິດອຳນາດທີ່ຫາອັນປຽບບໍ່ໄດ້ຂອງພຣະອົງ ເພື່ອຊ່ວຍເຮົາໃຫ້ເອົາຊະນະບາບທີ່ເຮົາກະທຳລົງໄປ. ມັນຍັງເປັນຫລັກຖານຂອງຄວາມອົດທົນ ແລະ ຄວາມອົດກັ້ນຂອງພຣະບິດາທີ່ຊົງຮັກຂອງເຮົາ ສຳລັບຄວາມອ່ອນແອ ແລະ ຈຸດອ່ອນແອທີ່ເປັນມະນຸດຂອງເຮົານຳອີກ. ປະທານຣະໂຊ ເອັມ ແນວສັນ, ສາດສະດາທີ່ຮັກຂອງເຮົາ, ໄດ້ອ້າງເຖິງຂອງປະທານນີ້ວ່າເປັນ “ສິ່ງທີ່ນຳເຮົາໄປສູ່ຄວາມສຸກ ແລະ ຄວາມສະຫງົບໃນຈິດໃຈ.”20
ເພື່ອນທີ່ຮັກແພງຂອງຂ້າພະເຈົ້າ, ຂ້າພະເຈົ້າເປັນພະຍານຕໍ່ທ່ານວ່າ ເມື່ອເຮົາກັບໃຈຈາກບາບຂອງເຮົາຢ່າງຈິງໃຈ,21 ເຮົາອະນຸຍາດໃຫ້ການເສຍສະລະຊົດໃຊ້ຂອງພຣະຄຣິດມີຜົນດີຄົບຖ້ວນໃນຊີວິດຂອງເຮົາ.22 ເຮົາຈະເປັນອິດສະລະຈາກການເປັນຂ້າທາດຂອງບາບ, ພົບເຫັນຄວາມສຸກໃນການເດີນທາງຂອງເຮົາຢູ່ເທິງໂລກ, ແລະ ເໝາະສົມທີ່ຈະໄດ້ຮັບຄວາມລອດນິລັນດອນ, ຊຶ່ງຖືກກະກຽມໄວ້ຈາກການວາງຮາກຖານຂອງໂລກໃຫ້ແກ່ທຸກໆຄົນ ທີ່ເຊື່ອໃນພຣະເຢຊູຄຣິດ ແລະ ມາຫາພຣະອົງ.23
ນອກເໜືອໄປຈາກການພິສູດຂອງປະທານແຫ່ງຄວາມລອດທີ່ສະຫງ່າລາສີນີ້, ພຣະຜູ້ຊ່ວຍໃຫ້ລອດໄດ້ສະເໜີມອບການບັນເທົາ ແລະ ການປອບໂຍນໃຫ້ແກ່ເຮົາ ຂະນະທີ່ເຮົາປະເຊີນໜ້າກັບຄວາມທຸກທໍລະມານ, ການລໍ້ລວງ, ແລະ ຄວາມອ່ອນແອຂອງຊີວິດມະຕະ, ລວມທັງສະຖານະການທີ່ເຮົາໄດ້ປະສົບມາເມື່ອບໍ່ດົນມານີ້ ລະຫວ່າງການລະບາດໃນປະຈຸບັນ. ຂ້າພະເຈົ້າຂໍໃຫ້ທ່ານແນ່ໃຈໄດ້ວ່າ ພຣະຄຣິດຮັບຮູ້ຄວາມຍາກລຳບາກທີ່ເຮົາປະສົບຢູ່ໃນຊ່ວງມະຕະນີ້ສະເໝີ. ພຣະອົງເຂົ້າໃຈຄວາມຂົມຂື່ນ, ຄວາມທຸກທໍລະມານ, ແລະ ຄວາມເຈັບປວດທາງຮ່າງກາຍທັງໝົດ ຕະຫລອດທັງການທ້າທາຍທາງອາລົມ ແລະ ທາງວິນຍານທີ່ເຮົາປະເຊີນໜ້າຢູ່. ອຸທອນຂອງພຣະຜູ້ຊ່ວຍໃຫ້ລອດເຕັມໄປດ້ວຍຄວາມເມດຕາ, ແລະ ພຣະອົງກໍພ້ອມສະເໝີທີ່ຈະຊ່ວຍເຫລືອເຮົາ. ສິ່ງນີ້ເປັນໄປໄດ້ ຍ້ອນວ່າພຣະອົງໄດ້ປະເຊີນກັບມັນດ້ວຍຕົວພຣະອົງເອງ ແລະ ຮັບເອົາຄວາມເຈັບປວດຂອງຄວາມອ່ອນແອ ແລະ ຄວາມເຈັບໄຂ້ຂອງເຮົາ.24
ດ້ວຍພຣະໄທທີ່ອ່ອນໂຍນ ແລະ ຖ່ອມຕົນ, ພຣະອົງໄດ້ສະເດັດລົງໄປຕ່ຳກວ່າທຸກສິ່ງ ແລະ ໄດ້ຍອມຮັບເອົາການຖືກດູຖູກ, ຖືກປະຕິເສດ, ແລະ ຖືກເຮັດໃຫ້ອັບອາຍໂດຍມະນຸດ, ໄດ້ຖືກບາດເຈັບເພາະການລ່ວງລະເມີດ ແລະ ຄວາມຊົ່ວຮ້າຍຂອງເຮົາ. ພຣະອົງໄດ້ທົນທຸກກັບສິ່ງເຫລົ່ານີ້ເພື່ອທຸກຄົນ, ຮັບເອົາບາບທັງໝົດຂອງໂລກ,25 ດັ່ງນັ້ນຈຶ່ງກາຍເປັນຜູ້ດູແລທີ່ຍິ່ງໃຫຍ່ທາງວິນຍານຂອງເຮົາ.
ເມື່ອເຮົາເຂົ້າໃກ້ພຣະອົງຫລາຍຂຶ້ນ, ຍອມໃຫ້ພຣະອົງດູແລເຮົາທາງວິນຍານ, ແລ້ວເຮົາຈະສາມາດຮັບເອົາແອກຂອງພຣະອົງ, ຊຶ່ງພໍເໝາະ, ແລະ ພາລະຂອງພຣະອົງກໍເບົາ, ດັ່ງນັ້ນຈຶ່ງໄດ້ພົບການປອບໂຍນ ແລະ ການພັກຜ່ອນທີ່ຖືກສັນຍາໄວ້. ຍິ່ງໄປກວ່ານັ້ນ, ເຮົາຈະໄດ້ຮັບຄວາມເຂັ້ມແຂງທີ່ເຮົາຕ້ອງການ ເພື່ອເອົາຊະນະຄວາມລຳບາກ, ຄວາມອ່ອນແອ, ແລະ ຄວາມເສົ້າສະຫລົດໃຈຂອງຊີວິດ, ຊຶ່ງເປັນເລື່ອງຍາກເກີນກວ່າຈະອົດທົນໄດ້ ປາດສະຈາກຄວາມຊ່ວຍເຫລືອ ແລະ ອຳນາດທີ່ປິ່ນປົວຂອງພຣະອົງ.26 ພຣະຄຳພີສອນເຮົາວ່າ “ຈົ່ງມອບຄວາມເດືອດຮ້ອນຂອງເຈົ້າໄວ້ກັບພຣະຜູ້ເປັນເຈົ້າ, ພຣະອົງຈະປົກປ້ອງຄຸ້ມຄອງເຈົ້າໄວ້.”27 “ແລະ ເມື່ອນັ້ນ ຂໍໃຫ້ພຣະເຈົ້າຈົ່ງໂປດປະທານໃຫ້ພາລະ [ຂອງເຮົາ] ເບົາບາງລົງ, ໂດຍທາງຄວາມສຸກຂອງພຣະບຸດຂອງພຣະອົງ.”28
ທ້າຍປີທີ່ຜ່ານມານີ້, ຂ້າພະເຈົ້າໄດ້ຮູ້ເຖິງການເສຍຊີວິດຂອງສາມີພັນລະຍາທີ່ໜ້າຮັກຄູ່ໜຶ່ງ, ມາຣີໂອ ແລະ ຣິຈີນາ ເອັມເມີຣິກ, ຜູ້ທີ່ຊື່ສັດແທ້ໆຕໍ່ພຣະຜູ້ເປັນເຈົ້າ ແລະ ໄດ້ເສຍຊີວິດຫ່າງກັນສີ່ວັນ ເນື່ອງຈາກພາວະແຊກຊ້ອນຂອງພະຍາດໂຄວິດ-19.
ລູກຊາຍຄົນໜຶ່ງຂອງເຂົາເຈົ້າ, ທີ່ກຳລັງຮັບໃຊ້ເປັນອະທິການຢູ່ປະເທດບຣາຊິນ, ໄດ້ເລົ່າສິ່ງຕໍ່ໄປນີ້ໃຫ້ຂ້າພະເຈົ້າຟັງວ່າ: “ມັນເປັນເລື່ອງຍາກທີ່ຈະເຫັນພໍ່ແມ່ຂອງຂ້ານ້ອຍຈາກໂລກນີ້ໄປໃນສະພາບການແບບນັ້ນ, ແຕ່ຂ້ານ້ອຍໄດ້ຮູ້ສຶກເຖິງອິດທິພົນຂອງພຣະຜູ້ເປັນເຈົ້າໃນຊີວິດຂອງຂ້ານ້ອຍໃນຊ່ວງເວລາທີ່ໂສກເສົ້ານັ້ນ, ເພາະຂ້ານ້ອຍໄດ້ຮັບຄວາມເຂັ້ມແຂງ ແລະ ຄວາມສະຫງົບທີ່ເກີນກວ່າຂ້ານ້ອຍຈະເຂົ້າໃຈໄດ້. ຜ່ານທາງສັດທາຂອງຂ້ານ້ອຍໃນພຣະເຢຊູຄຣິດ ແລະ ການຊົດໃຊ້ຂອງພຣະອົງ, ຂ້ານ້ອຍໄດ້ຮັບຄວາມຊ່ວຍເຫລືອຈາກສະຫວັນ ເພື່ອເສີມຄວາມເຂັ້ມແຂງ ແລະ ໃຫ້ການປອບໂຍນສະມາຊິກໃນຄອບຄົວຂອງຂ້ານ້ອຍ ແລະ ທຸກໆຄົນທີ່ໄດ້ຊ່ວຍພວກເຮົາລະຫວ່າງປະສົບການທີ່ລຳບາກນີ້. ເຖິງແມ່ນວ່າສິ່ງມະຫັດສະຈັນທີ່ທຸກຄົນໄດ້ຫວັງບໍ່ໄດ້ເກີດຂຶ້ນ, ສຳລັບຂ້ານ້ອຍແລ້ວ ຂ້ານ້ອຍເປັນພະຍານເຖິງການມະຫັດສະຈັນທີ່ໄດ້ເກີດຂຶ້ນໃນຊີວິດຂອງຂ້ານ້ອຍເອງ ແລະ ໃນຊີວິດຂອງສະມາຊິກໃນຄອບຄົວຂອງຂ້ານ້ອຍ. ຂ້ານ້ອຍໄດ້ຮູ້ສຶກເຖິງຄວາມສະຫງົບຢ່າງບອກບໍ່ຖືກ ທີ່ທະລຸເຂົ້າໃນສ່ວນເລິກຂອງໃຈຂ້ານ້ອຍ, ທີ່ໃຫ້ຄວາມຫວັງ ແລະ ຄວາມໝັ້ນໃຈໃນຄວາມຮັກຂອງພຣະຜູ້ຊ່ວຍໃຫ້ລອດ ທີ່ມີໃຫ້ຂ້ານ້ອຍ ແລະ ໃນແຜນແຫ່ງຄວາມສຸກຂອງພຣະເຈົ້າທີ່ມີໃຫ້ລູກໆຂອງພຣະອົງ. ຂ້ານ້ອຍໄດ້ຮຽນຮູ້ໃນມື້ທີ່ໂສກເສົ້າທີ່ສຸດນັ້ນວ່າ, ພຣະຜູ້ຊ່ວຍໃຫ້ລອດພໍພຣະໄທສະເໝີທີ່ຈະສະແດງຄວາມຮັກຕໍ່ເຮົາ ແລະ ປອບໂຍນເຮົາ ເມື່ອເຮົາສະແຫວງຫາພຣະອົງດ້ວຍສຸດໃຈ, ດ້ວຍສຸດຈິດ, ດ້ວຍສຸດຄວາມຄິດ, ແລະ ດ້ວຍສຸດກຳລັງຂອງເຮົາ.”
ອ້າຍເອື້ອຍນ້ອງທີ່ຮັກແພງຂອງຂ້າພະເຈົ້າ, ໃນວັນອາທິດອີດສະເຕີນີ້, ຂ້າພະເຈົ້າເປັນພະຍານຢ່າງໜັກແໜ້ນວ່າ ພຣະເຢຊູໄດ້ຟື້ນຈາກຄວາມຕາຍ ແລະ ວ່າພຣະອົງຊົງພຣະຊົນຢູ່. ຂ້າພະເຈົ້າເປັນພະຍານຕໍ່ທ່ານວ່າ ຜ່ານທາງພຣະອົງ ແລະ ການຊົດໃຊ້ຂອງພຣະອົງ, ພຣະຜູ້ຊ່ວຍໃຫ້ລອດໄດ້ຈັດຫາວິທີທາງໃຫ້ເຮົາເພື່ອເອົາຊະນະຄວາມຕາຍ, ທັງທາງຮ່າງກາຍ ແລະ ທາງວິນຍານ. ນອກເໜືອໄປຈາກພອນທີ່ຍິ່ງໃຫຍ່ເຫລົ່ານີ້ແລ້ວ, ພຣະອົງຍັງສະເໜີມອບການປອບໂຍນ ແລະ ການຮັບຮອງໃຫ້ແກ່ເຮົາໃນຊ່ວງເວລາທີ່ຍາກລຳບາກນຳອີກ. ຂ້າພະເຈົ້າຂໍໃຫ້ທ່ານແນ່ໃຈໄດ້ວ່າ ເມື່ອເຮົາວາງຄວາມໄວ້ວາງໃຈຂອງເຮົາໃນພຣະເຢຊູຄຣິດ ແລະ ໃນການເສຍສະລະຊົດໃຊ້ອັນສູງສຸດຂອງພຣະອົງ, ອົດທົນດ້ວຍສັດທາຂອງເຮົາຈົນເຖິງທີ່ສຸດ, ເຮົາຈະໄດ້ຮັບຄຳສັນຍາຂອງພຣະບິດາເທິງສະຫວັນທີ່ຮັກຂອງເຮົາ, ພຣະອົງທີ່ເຕັມພຣະໄທກະທຳທຸກສິ່ງທຸກຢ່າງພາຍໃຕ້ອຳນາດຂອງພຣະອົງ ເພື່ອຊ່ວຍເຮົາໃຫ້ກັບຄືນໄປຢູ່ໃນທີ່ປະທັບຂອງພຣະອົງໃນມື້ໜຶ່ງ. ນີ້ແມ່ນວຽກງານຂອງພຣະອົງ ແລະ ລັດສະໝີພາບຂອງພຣະອົງ!29 ຂ້າພະເຈົ້າເປັນພະຍານຕໍ່ທ່ານວ່າ ພຣະເຢຊູຄືພຣະຄຣິດ, ພຣະຜູ້ໄຖ່ຂອງໂລກ, ພຣະເມຊີອາທີ່ຖືກສັນຍາໄວ້, ທີ່ເປັນຄືນມາ ທັງເປັນຊີວິດ.30 ແລະ ຂ້າພະເຈົ້າແບ່ງປັນຄວາມຈິງເຫລົ່ານີ້ກັບທ່ານໃນພຣະນາມອັນສັກສິດຂອງພຣະອົງ, ພຣະອົງດຽວທີ່ຖືກຳເນີດຂອງພຣະບິດາ, ອົງພຣະຜູ້ເປັນເຈົ້າຂອງເຮົາ, ພຣະເຢຊູຄຣິດ, ອາແມນ.