ພວກເຈົ້າສາມາດເຕົ້າໂຮມອິດສະຣາເອນ!
ຂ້າພະເຈົ້າແນ່ໃຈທີ່ສຸດວ່າຊາວໜຸ່ມພວກເຈົ້າສາມາດເຮັດສິ່ງນີ້ໄດ້ເພາະບາງສິ່ງກ່ຽວກັບເອກະລັກຂອງພວກເຈົ້າ ແລະ ພະລັງມະຫາສານທີ່ຢູ່ພາຍໃນຕົວຂອງພວກເຈົ້າ.
ເກືອບສາມປີກ່ອນ, ປະທານຣະໂຊ ເອັມ ແນວສັນ ໄດ້ເຊື້ອເຊີນຊາວໜຸ່ມຂອງສາດສະໜາຈັກຂອງພຣະເຢຊູຄຣິດແຫ່ງໄພ່ພົນຍຸກສຸດທ້າຍທຸກຄົນ “ໃຫ້ເຂົ້າຮ່ວມກອງທັບຊາວໜຸ່ມຂອງພຣະຜູ້ເປັນເຈົ້າ ເພື່ອຊ່ວຍເຕົ້າໂຮມອິດສະຣາເອນ” ຢູ່ທັງສອງຟາກມ່ານ. ເພິ່ນໄດ້ກ່າວວ່າ, “ການເຕົ້າໂຮມນັ້ນເປັນສິ່ງສຳຄັນທີ່ສຸດ ທີ່ກຳລັງເກີດຂຶ້ນຢູ່ໃນໂລກທຸກວັນນີ້.”1 ຂ້າພະເຈົ້າແນ່ໃຈທີ່ສຸດວ່າຊາວໜຸ່ມພວກເຈົ້າສາມາດເຮັດສິ່ງນີ້ໄດ້—ແລະ ເຮັດໄດ້ດີຫລາຍ—ເພາະ (1)ບາງສິ່ງກ່ຽວກັບເອກະລັກຂອງພວກເຈົ້າ ແລະ (2) ພະລັງມະຫາສານທີ່ຢູ່ພາຍໃນຕົວຂອງພວກເຈົ້າ.
ເມື່ອ ສີ່ສິບເອັດປີກ່ອນ, ຜູ້ສອນສາດສະໜາສອງຄົນຈາກສາດສະໜາຈັກໄດ້ຮູ້ສຶກຖືກນຳພາໄປຫາບ້ານຫລັງໜຶ່ງຢູ່ທີ່ລັດນິວເຈີຊີ, ໃນສະຫະລັດ. ເມື່ອເວລາຜ່ານໄປ, ໜ້າອັດສະຈັນໃຈທີ່, ພໍ່ແມ່ທັງສອງ ແລະ ລູກໆທັງໝົດ 10 ຄົນໄດ້ຮັບບັບຕິສະມາ. ໃນຖ້ອຍຄຳຂອງສາດສະດາ, ເຂົາເຈົ້າໄດ້ “ໃຫ້ພຣະເຈົ້າໄຊຊະນະ”2 ໃນຊີວິດຂອງເຂົາເຈົ້າ. ຂ້າພະເຈົ້າຄວນຈະກ່າວວ່າ “ຊີວິດຂອງພວກເຮົາ.” ຂ້າພະເຈົ້າເປັນລູກຄົນທີສາມ. ຂ້າພະເຈົ້າມີອາຍຸ 17 ປີຕອນຂ້າພະເຈົ້າໄດ້ຕັດສິນໃຈເຮັດພັນທະສັນຍາຢ່າງຖາວອນທີ່ຈະຕິດຕາມພຣະເຢຊູຄຣິດ. ແຕ່ພວກເຈົ້າເດົາໄດ້ບໍວ່າຂ້າພະເຈົ້າໄດ້ຕັດສິນໃຈເຮັດຫຍັງອີກແດ່? ຂ້າພະເຈົ້າຈະບໍ່ໄປຮັບໃຊ້ເຜີຍແຜ່ເຕັມເວລາ. ນັ້ນເປັນເລື່ອງທີ່ຍາກໂພດ. ແລະ ນີ້ກໍບໍ່ໄດ້ເປັນສິ່ງທີ່ຖືກຄາດຫວັງຈາກຂ້າພະເຈົ້າ, ແມ່ນບໍ? ຂ້າພະເຈົ້າເປັນສະມາຊິກໃໝ່ໆຂອງສາດສະໜາຈັກ. ຂ້າພະເຈົ້າບໍ່ມີເງິນ. ນອກຈາກນັ້ນ, ເຖິງແມ່ນວ່າຂ້າພະເຈົ້າຫາກໍຈົບຈາກໂຮງຮຽນມັດທະຍົມປາຍທີ່ຍາກທີ່ສຸດຢູ່ໃກ້ເມືອງຟີລາແດວເຟຍຕາເວັນຕົກ ແລະ ໄດ້ເອົາຊະນະການທ້າທາຍທີ່ອັນຕະລາຍຫລາຍຢ່າງ, ຂ້າພະເຈົ້າບໍ່ຢາກໃຫ້ໃຜຮູ້ວ່າຂ້າພະເຈົ້າຢ້ານກົວຫລາຍທີ່ຈະຈາກບ້ານໄປເປັນເວລາສອງປີເຕັມໆ.
ເອກະລັກທີ່ແທ້ຈິງຂອງພວກເຈົ້າ
ແຕ່ຂ້າພະເຈົ້າຫາກໍໄດ້ຮຽນຮູ້ວ່າ ຂ້າພະເຈົ້າ ແລະ ມະນຸດຊາດທັງປວງໄດ້ອາໄສຢູ່ນຳພຣະບິດາເທິງສະຫວັນໃນຖານະບຸດ ແລະ ທິດາທາງວິນຍານຂອງພຣະອົງກ່ອນເຮົາໄດ້ມາເກີດຢູ່ເທິງໂລກ. ຄົນອື່ນກໍຈຳເປັນຕ້ອງຮູ້, ດັ່ງທີ່ຂ້າພະເຈົ້າໄດ້ຮູ້, ວ່າພຣະອົງປາດຖະໜາໃຫ້ລູກໆຂອງພຣະອົງທຸກຄົນມີຊີວິດນິລັນດອນກັບພຣະອົງ. ສະນັ້ນ, ກ່ອນຄົນໃດໄດ້ລົງມາຢູ່ເທິງໂລກ, ພຣະອົງໄດ້ສະເໜີແຜນແຫ່ງຄວາມລອດ ແລະ ຄວາມສຸກທີ່ສົມບູນໃຫ້ແກ່ທຸກຄົນ, ໂດຍມີພຣະເຢຊູຄຣິດເປັນພຣະຜູ້ຊ່ວຍໃຫ້ລອດຂອງເຮົາ. ເປັນຕາເສົ້າໃຈແທ້, ຊາຕານໄດ້ຄັດຄ້ານແຜນຂອງພຣະເຈົ້າ.3 ອີງຕາມພຣະທຳພຣະນິມິດ, “ຂະນະນັ້ນໄດ້ເກີດສົງຄາມຂຶ້ນໃນສະຫວັນ”!4 ຊາຕານໄດ້ຫລອກລວງໜຶ່ງສ່ວນສາມໃນບັນດາລູກໆທາງວິນຍານຂອງພຣະບິດາເທິງສະຫວັນຢ່າງສະຫລາດໃຫ້ມັນໄຊຊະນະແທນພຣະເຈົ້າ.5 ແຕ່ບໍ່ແມ່ນພວກເຈົ້າແນ່! ອັກຄະສາວົກໂຢຮັນໄດ້ເຫັນວ່າພວກເຈົ້າໄດ້ເອົາຊະນະຊາຕານ “ເພາະຄຳພະຍານຂອງ [ພວກເຈົ້າເອງ].”6
ການຮູ້ຈັກເອກະລັກທີ່ແທ້ຈິງຂອງຂ້າພະເຈົ້າ, ໂດຍໄດ້ຮັບການຊ່ວຍເຫລືອຈາກປິຕຸພອນຂອງຂ້າພະເຈົ້າ, ໄດ້ໃຫ້ຂ້າພະເຈົ້າມີຄວາມກ້າຫານ ແລະ ສັດທາທີ່ຈະຮັບເອົາຄຳເຊື້ອເຊີນຂອງປະທານສະເປັນເຊີ ດັບເບິນຢູ ຄິມໂບ ທີ່ຈະເຕົ້າໂຮມອິດສະຣາເອນ.7 ມັນກໍຈະເປັນແບບນັ້ນສຳລັບພວກເຈົ້າ, ເພື່ອນທີ່ຮັກແພງ. ການຮູ້ວ່າພວກເຈົ້າໄດ້ເອົາຊະນະຊາຕານ ເພາະຄຳພະຍານຂອງພວກເຈົ້າທີ່ຜ່ານມາ ຈະຊ່ວຍພວກເຈົ້າໃຫ້ຮັກ, ແບ່ງປັນ, ແລະ ເຊື້ອເຊີນ8 ໃນທຸກວັນນີ້ ແລະ ຕະຫລອດໄປ—ເຊື້ອເຊີນຄົນອື່ນໃຫ້ມາເບິ່ງເອົາ, ໃຫ້ມາຊ່ວຍເຫລືອ, ແລະ ໃຫ້ມາເປັນພາກສ່ວນ, ໃນຂະນະທີ່ສົງຄາມເພື່ອຈິດວິນຍານຂອງລູກໆຂອງພຣະເຈົ້າສືບຕໍ່ຮ້າຍແຮງໄປໜ້າ.
ສັດທາທີ່ມີພະລັງໃນຕົວພວກເຈົ້າ
ແລ້ວເປັນຈັ່ງໃດກ່ຽວກັບພະລັງມະຫານສານພາຍໃນຕົວຂອງພວກເຈົ້າ? ຂໍໃຫ້ຄິດເຖິງເລື່ອງນີ້: ພວກເຈົ້າໄດ້ເປັ່ງສຽງໂຮຮ້ອງຍິນດີ9 ທີ່ຈະລົງມາສູ່ໂລກທີ່ຕົກ ບ່ອນທີ່ທຸກຄົນຈະໄດ້ປະສົບຄວາມຕາຍທັງທາງຮ່າງກາຍ ແລະ ທາງວິນຍານ. ເຮົາຈະບໍ່ສາມາດເອົາຊະນະຄວາມຕາຍທາງໃດໄດ້ເລີຍດ້ວຍຕົວເຮົາເອງ. ເຮົາບໍ່ພຽງແຕ່ຈະທົນທຸກທໍລະມານຈາກບາບຂອງເຮົາເທົ່ານັ້ນ ແຕ່ຈາກບາບຂອງຄົນອື່ນນຳອີກ. ມະນຸດຊາດຈະໄດ້ປະສົບການແຕກສະຫລາຍ ແລະ ຄວາມຜິດຫວັງທຸກໆຢ່າງທີ່ຈະຈິນຕະນາການໄດ້10—ທັງໝົດດ້ວຍຄວາມຊົງຈຳເລື່ອງຊີວິດກ່ອນເກີດຖືກປິດກັ້ນ ແລະ ສັດຕູທີ່ຊົ່ວຮ້າຍທີ່ສຸດໃນໂລກກໍໂຈມຕີ ແລະ ລໍ້ລວງເຮົາຕໍ່ໄປ. ຄວາມຫວັງທັງໝົດສຳລັບການກັບຄືນໄປໂດຍໄດ້ຟື້ນຄືນຊີວິດແລ້ວ ແລະ ສະອາດຕໍ່ທີ່ປະທັບອັນສັກສິດນັ້ນແມ່ນຂຶ້ນຢູ່ກັບພຣະອົງໜຶ່ງທີ່ຈະຮັກສາຄຳສັນຍາຂອງພຣະອົງ.11
ແມ່ນຫຍັງໄດ້ໃຫ້ພະລັງພວກເຈົ້າທີ່ຈະເລືອກຮັບເອົາແຜນຂອງພຣະບິດາ? ປະທານເຮັນຣີ ບີ ໄອຣິງ ໄດ້ສິດສອນວ່າ, “ມັນຕ້ອງໃຊ້ສັດທາໃນພຣະເຢຊູຄຣິດ ເພື່ອຈະສະໜັບສະໜູນແຜນແຫ່ງຄວາມສຸກ ແລະ ບົດບາດຂອງພຣະເຢຊູຄຣິດຢູ່ໃນແຜນນັ້ນ ເມື່ອທ່ານໄດ້ຮັບຮູ້ຢ່າງເລັກນ້ອຍເຖິງການທ້າທາຍ ທີ່ທ່ານຈະໄດ້ປະເຊີນຕໍ່ຢູ່ໃນຊີວິດມະຕະ.”12 ເມື່ອພຣະເຢຊູຄຣິດໄດ້ສັນຍາວ່າພຣະອົງຈະສະເດັດລົງມາໃນຊີວິດມະຕະ ແລະ ປະທານພຣະຊົນຊີບຂອງພຣະອົງເພື່ອເຕົ້າໂຮມ13 ແລະ ຊ່ວຍເຮົາໃຫ້ລອດ, ພວກເຈົ້າບໍ່ໄດ້ພຽງແຕ່ເຊື່ອພຣະອົງເທົ່ານັ້ນ. ພວກເຈົ້າ “ດວງວິນຍານທີ່ດີເລີດ”14 ໄດ້ມີ “ສັດທາອັນແຮງກ້າ” ຈົນພວກເຈົ້າໄດ້ເຫັນວ່າຄຳສັນຍາຂອງພຣະອົງນັ້ນຈະສຳເລັດແນ່ນອນ.15 ພຣະອົງຕົວະບໍ່ໄດ້, ສະນັ້ນພວກເຈົ້າຈຶ່ງໄດ້ເຫັນພຣະອົງເໝືອນດັ່ງພຣະອົງໄດ້ຫລັ່ງໂລຫິດຂອງພຣະອົງເພື່ອພວກເຈົ້າແລ້ວ, ດົນນານກ່ອນພຣະອົງໄດ້ມາກຳເນີດ.16
ໃນຖ້ອຍຄຳທີ່ເປັນສັນຍາລັກຂອງໂຢຮັນ, ພວກເຈົ້າ “ໄດ້ເອົາຊະນະ [ຊາຕານ] ດ້ວຍໂລຫິດຂອງພຣະເມສານ້ອຍ.”17 ປະທານດາລິນ ເອັຈ ໂອກສ໌ ໄດ້ສິດສອນວ່າຢູ່ໃນໂລກນັ້ນ “[ພວກເຈົ້າ] ໄດ້ເຫັນຈຸດໝາຍປາຍທາງແຕ່ຕອນຕົ້ນ.”18
ສົມມຸດວ່າໜຶ່ງມື້ກ່ອນພວກເຈົ້າຈາກບ້ານໄປໂຮງຮຽນ ພໍ່ແມ່ຂອງພວກເຈົ້າໃຫ້ຄຳສັນຍາທີ່ແທ້ຈິງວ່າ ພວກເຈົ້າຈະສາມາດໄດ້ກິນອາຫານໂປດຕອນພວກເຈົ້າກັບບ້ານ! ພວກເຈົ້າກໍຕື່ນເຕັ້ນ! ໃນຂະນະທີ່ຢູ່ໂຮງຮຽນ ພວກເຈົ້າວາດພາບເຫັນຕົນເອງກິນອາຫານນັ້ນ, ແລະ ພວກເຈົ້າສາມາດຊີມລົດຊາດມັນໄດ້ແລ້ວ. ຕາມປົກກະຕິແລ້ວ, ພວກເຈົ້າຈະແບ່ງປັນຂ່າວດີຂອງພວກເຈົ້າກັບຄົນອື່ນ. ການມຸ້ງຫວັງຈະໄດ້ກັບບ້ານເຮັດໃຫ້ພວກເຈົ້າມີຄວາມສຸກຫລາຍຈົນວ່າການສອບເສັງ ແລະ ການທ້າທາຍຕ່າງໆຂອງໂຮງຮຽນນັ້ນເບິ່ງຄືວ່າງ່າຍໆ. ບໍ່ມີຫຍັງສາມາດຍາດເອົາຄວາມສຸກຂອງພວກເຈົ້າໄປ ຫລື ເຮັດໃຫ້ພວກເຈົ້າສົງໄສເພາະວ່າຄຳສັນຍານັ້ນແມ່ນແນ່ນອນແທ້ໆ! ຄ້າຍໆຄືກັນ, ກ່ອນພວກເຈົ້າດວງວິນຍານທີ່ດີເລີດໄດ້ມາເກີດ, ພວກເຈົ້າໄດ້ຮຽນຮູ້ທີ່ຈະພິຈາລະນາຄຳສັນຍາຂອງພຣະຄຣິດໃນທາງທີ່ແນ່ນອນນີ້, ແລະ ພວກເຈົ້າໄດ້ຊີມລົດຊາດຂອງຄວາມລອດຂອງພຣະອົງ.19 ສັດທາອັນຍິ່ງໃຫຍ່ຂອງພວກເຈົ້າກໍຄືກັນກັບກ້າມເນື້ອທີ່ແຂງແຮງ ແລະ ໃຫຍ່ຂຶ້ນເມື່ອພວກເຈົ້ານຳໃຊ້ມັນ, ແຕ່ມັນໄດ້ຢູ່ພາຍໃນຕົວຂອງພວກເຈົ້າຢູ່ແລ້ວ.
ພວກເຈົ້າຈະປຸກສັດທາທີ່ຍິ່ງໃຫຍ່ຂອງພວກເຈົ້າໃນພຣະຄຣິດ ແລະ ນຳໃຊ້ມັນເພື່ອເຕົ້າໂຮມອິດສະຣາເອນໃນເວລານີ້ ແລະ ເອົາຊະນະຊາຕານອີກຄັ້ງໄດ້ແນວໃດ? ໂດຍການກັບມາຮຽນຮູ້ທີ່ຈະມຸ້ງຫວັງ ແລະ ເຫັນຄຳສັນຍາຂອງພຣະຜູ້ເປັນເຈົ້າດ້ວຍຄວາມແນ່ນອນໃຈອັນດຽວກັນນັ້ນ ເພື່ອເຕົ້າໂຮມ ແລະ ຊ່ວຍໃຫ້ລອດໃນວັນເວລານີ້. ສ່ວນຫລາຍພຣະອົງໃຊ້ພຣະຄຳພີມໍມອນ ແລະ ສາດສະດາຂອງພຣະອົງເພື່ອສິດສອນເຮົາວ່າຈະເຮັດແນວໃດ. ດົນນານກ່ອນພຣະຄຣິດ, “ສາດສະດາ, ແລະ … ປະໂລຫິດ, ແລະ … ຄູສອນ … ຊາວນີໄພ [ໄດ້ຊັກຊວນໃຫ້ຜູ້ຄົນ] ມຸ້ງຫາພຣະເມຊີອາ, ແລະ ເຊື່ອໃນພຣະອົງທີ່ຈະສະເດັດມາເໝືອນດັ່ງພຣະອົງໄດ້ສະເດັດມາແລ້ວ.”20 ສາດສະດາອະບີນາໄດໄດ້ສິດສອນວ່າ, “ແລະ ບັດນີ້ຖ້າຫາກພຣະຄຣິດບໍ່ສະເດັດມາຍັງແຜ່ນດິນໂລກ, ກ່າວເຖິງສິ່ງທີ່ຈະມາເຖິງ ເໝືອນດັ່ງມັນມາເຖິງແລ້ວ, ການໄຖ່ກໍຈະມີຂຶ້ນບໍ່ໄດ້.”21 ຄືກັນກັບແອວມາ, ອະບີນາໄດ “[ໄດ້] ຄອຍຖ້າດ້ວຍຕາແຫ່ງສັດທາ”22 ແລະ ໄດ້ເຫັນຄຳສັນຍາແຫ່ງຄວາມລອດທີ່ແນ່ນອນຂອງພຣະເຈົ້າເໝືອນດັ່ງມັນໄດ້ສຳເລັດແລ້ວ. ພວກເພິ່ນ “ໄດ້ເອົາຊະນະຊາຕານໂດຍທາງໂລຫິດຂອງພຣະເມສານ້ອຍ ແລະ … ຖ້ອຍຄຳຂອງປະຈັກພະຍານຂອງພວກເພິ່ນ” ດົນນານກ່ອນພຣະຄຣິດໄດ້ມາກຳເນີດ, ເໝືອນດັ່ງພວກເຈົ້າໄດ້ເຮັດ. ແລະ ພຣະຜູ້ເປັນເຈົ້າໄດ້ປະທານອຳນາດໃຫ້ແກ່ພວກເພິ່ນ ເພື່ອໃຫ້ເຊື້ອເຊີນ ແລະ ເຕົ້າໂຮມອິດສະຣາເອນ. ພຣະອົງຈະເຮັດແບບດຽວກັນນີ້ສຳລັບພວກເຈົ້າ ຂະນະທີ່ພວກເຈົ້າມຸ້ງຫວັງດ້ວຍສັດທາ, ເຫັນອິດສະຣາເອນຖືກເຕົ້າໂຮມ—ຕະຫລອດທົ່ວໂລກ ແລະ ຢູ່ໃນ “ກຸ່ມ” ຂອງພວກເຈົ້າເອງ23—ແລະ ເຊື້ອເຊີນທຸກຄົນ!
ຜູ້ສອນສາດສະໜາຫລາຍໆຮ້ອຍຄົນໄດ້ເສີມສ້າງສັດທາທີ່ປ່ຽມດ້ວຍພະລັງຂອງເຂົາເຈົ້າໃນພຣະຄຣິດໃນໂລກກ່ອນເກີດ ໂດຍການວາດພາບເຫັນຜູ້ຄົນທີ່ເຂົາເຈົ້າໄດ້ຕິດຕໍ່ຫາ ຫລື ໄດ້ສິດສອນ ນຸ່ງເສື້ອຜ້າບັບຕິສະມາ ແລະ ພຣະວິຫານ. ໃນຄຳປາໄສຊື່ວ່າ “Begin with the End in Mind,”24 [ເລີ່ມຕົ້ນດ້ວຍຈຸດໝາຍປາຍທາງຢູ່ໃນໃຈ] ປະທານແນວສັນໄດ້ແບ່ງປັນຕົວຢ່າງສ່ວນຕົວຢ່າງໜຶ່ງໃນການເຮັດດັ່ງນີ້ ແລະ ໄດ້ແນະນຳຜູ້ນຳເຂດເຜີຍແຜ່ໃຫ້ສິດສອນຜູ້ສອນສາດສະໜາຂອງເຮົາໃຫ້ເຮັດຄືກັນນີ້. ໂດຍທີ່ຮູ້ວ່າເຂົາເຈົ້າໄດ້ໃຊ້ສັດທາອັນຍິ່ງໃຫຍ່ນີ້ໃນພຣະເຢຊູຄຣິດໃນໂລກກ່ອນເກີດໄດ້ຊ່ວຍຜູ້ສອນສາດສະໜາທີ່ຮັກຂອງເຮົາຢ່າງຫລວງຫລາຍໃຫ້ “ຟັງທ່ານ”25 ແລະ ໃຊ້ສັດທາມະຫາສານຂອງເຂົາເຈົ້າເພື່ອເຕົ້າໂຮມອິດສະຣາເອນດັ່ງທີ່ພຣະຜູ້ເປັນເຈົ້າໄດ້ສັນຍາໄວ້.
ແນ່ນອນ, ການຈິນຕະນາການເຖິງຄວາມຕົວະທຳລາຍສັດທາ.26 ເພື່ອນໆຂອງຂ້າພະເຈົ້າທັງຫລາຍ, ການຕັ້ງໃຈນຶກເຫັນພາບ ຫລື ການເບິ່ງສິ່ງທີ່ຂັດກັບວ່າພວກເຈົ້າເປັນໃຜກັນແນ່, ໂດຍສະເພາະຮູບພາບລາມົກ, ຈະເຮັດໃຫ້ສັດທາຂອງພວກເຈົ້າໃນພຣະຄຣິດອ່ອນແອລົງ ແລະ, ປາດສະຈາກການກັບໃຈ, ກໍສາມາດທຳລາຍສັດທານັ້ນໄດ້. ຂໍໃຫ້ໃຊ້ການຈິນຕະນາການຂອງພວກເຈົ້າເພື່ອເພີ່ມສັດທາໃນພຣະຄຣິດ, ບໍ່ໃຫ້ທຳລາຍມັນ.
ໂຄງການເດັກ ແລະ ຊາວໜຸ່ມ
ໂຄງການເດັກ ແລະ ຊາວໜຸ່ມກໍເປັນເຄື່ອງມືຂອງສາດສະດາເພື່ອຊ່ວຍພວກເຈົ້າຊາວໜຸ່ມເພີ່ມພະລັງໃຫ້ແກ່ສັດທາອັນຍິ່ງໃຫຍ່ຂອງພວກເຈົ້າ. ປະທານໂອກສ໌ໄດ້ສິດສອນວ່າ, “ໂຄງການນີ້ຖືກຈັດຂຶ້ນມາເພື່ອຊ່ວຍພວກເຈົ້າໃຫ້ກາຍເປັນເໝືອນດັ່ງພຣະຜູ້ຊ່ວຍໃຫ້ລອດຫລາຍຂຶ້ນໃນສີ່ດ້ານ: ທາງວິນຍານ, ທາງສັງຄົມ, ທາງຮ່າງກາຍ, ແລະ ທາງສະຕິປັນຍາ.”27 ຂະນະທີ່ພວກເຈົ້າຊາວໜຸ່ມນຳໜ້າ—ນຳໜ້າ—ໃນການດຳລົງຊີວິດຕາມພຣະກິດຕິຄຸນ, ດູແລຄົນອື່ນ, ເຊື້ອເຊີນທຸກຄົນໃຫ້ຮັບເອົາພຣະກິດຕິຄຸນ, ເຕົ້າໂຮມຄອບຄົວສຳລັບຊີວິດນິລັນດອນ, ແລະ ວາງແຜນກິດຈະກຳທີ່ມ່ວນຊື່ນ,28 ສັດທາອັນຍິ່ງໃຫຍ່ທີ່ພວກເຈົ້າໄດ້ມີໃນພຣະຄຣິດໃນຊີວິດກ່ອນເກີດຈະກັບຄືນມາ ແລະ ເສີມພະລັງໃຫ້ພວກເຈົ້າ ເພື່ອເຮັດວຽກງານຂອງພຣະອົງໃນຊີວິດນີ້!
ນອກຈາກນີ້, ເປົ້າໝາຍສ່ວນຕົວ, “ໂດຍສະເພາະເປົ້າໝາຍໄລຍະສັ້ນ,”29 ຈະຊ່ວຍພວກເຈົ້ານຳສັດທາທີ່ມີພະລັງຂອງພວກເຈົ້າກັບຄືນມາ. ເມື່ອພວກເຈົ້າຕັ້ງເປົ້າໝາຍທີ່ດີ, ພວກເຈົ້າກໍມຸ້ງຫວັງ, ດັ່ງທີ່ພວກເຈົ້າໄດ້ເຮັດມາກ່ອນໜ້ານີ້, ແລະ ເຫັນສິ່ງທີ່ພຣະບິດາເທິງສະຫວັນຂອງພວກເຈົ້າປະສົງໃຫ້ພວກເຈົ້າ ແລະ ຄົນອື່ນກາຍເປັນ.30 ແລ້ວພວກເຈົ້າຈະວາງແຜນ ແລະ ພະຍາຍາມຢ່າງພາກພຽນເພື່ອບັນລຸມັນ. ແອວເດີ ຄວິນຕິນ ແອວ ຄຸກ ໄດ້ສິດສອນວ່າ, “ຢ່າປະໝາດຄວາມສຳຄັນຂອງການວາງແຜນ, ການຈັດຕັ້ງເປົ້າໝາຍ … , ແລະ [ການເຊື້ອເຊີນຄົນອື່ນ]—ທຸກຄົນດ້ວຍຕາແຫ່ງສັດທາ.”31
ການເລືອກເປັນຂອງພວກເຈົ້າ! ພຣະຜູ້ເປັນເຈົ້າໄດ້ກ່າວກັບພວກເຈົ້າວ່າ, “ພະລັງ [ທີ່ຈະເລືອກ] ຢູ່ໃນຕົວເຂົາ.”32 ແອວເດີ ນຽວ ແອວ ແອນເດີເຊັນ ໄດ້ອະທິບາຍວ່າ, “ບໍ່ແມ່ນໂດຍບັງເອີນທີ່ສັດທາຂອງທ່ານຈະເຂັ້ມແຂງຂຶ້ນ, ແຕ່ໂດຍການເລືອກ.”33 ເພິ່ນໄດ້ກ່າວອີກວ່າ, “ຄຳຖາມທີ່ຊື່ສັດ [ໃດໆ] [ທີ່ທ່ານອາດມີຢູ່] … ຈະສະຫງົບໃຈໄດ້ດ້ວຍຄວາມອົດທົນ ແລະ ດ້ວຍຕາແຫ່ງສັດທາ.”34
ຂ້າພະເຈົ້າເປັນພະຍານວ່າ (1) ເອກະລັກທີ່ແທ້ຈິງຂອງພວກເຈົ້າ ແລະ (2) ພະລັງມະຫາສານແຫ່ງສັດທາໃນພຣະຄຣິດທີ່ຢູ່ພາຍໃນຕົວຂອງພວກເຈົ້າ ຈະເຮັດໃຫ້ພວກເຈົ້າສາມາດ “ຊ່ວຍຕຽມຊາວໂລກສຳລັບການສະເດັດກັບມາຂອງພຣະຜູ້ຊ່ວຍໃຫ້ລອດ ໂດຍການເຊື້ອເຊີນທຸກຄົນໃຫ້ມາຫາພຣະຄຣິດ ແລະ ຮັບເອົາພອນແຫ່ງການຊົດໃຊ້ຂອງພຣະອົງ.”35 ຂໍໃຫ້ພວກເຮົາທຸກຄົນຈົ່ງແບ່ງປັນຄວາມສຸກຂອງຄຳສັນຍາທີ່ແນ່ນອນຈາກພຣະຄຳພີມໍມອນ ທີ່ວ່າ:
“ຄົນຊອບທຳທີ່ເຊື່ອຟັງ … ສາດສະດາ, ແລະ … ມຸ້ງຫາພຣະຄຣິດດ້ວຍຄວາມໝັ້ນຄົງ … ທັງທີ່ມີການຂົ່ມເຫັງທຸກຢ່າງ … ຈະບໍ່ຕາຍ.
“ແຕ່ [ພຣະຄຣິດ] … ຈະປິ່ນປົວພວກເຂົາໃຫ້ຫາຍດີ, ແລະ ພວກເຂົາຈະມີສັນຕິສຸກກັບພຣະອົງ.”36
ໃນພຣະນາມຂອງພຣະເຢຊູຄຣິດ, ອາແມນ.