“ວັນທີ 18–24 ເດືອນພະຈິກ: ‘ເພື່ອຄວາມຊົ່ວຕ່າງໆຈະໄດ້ໝົດໄປ.’ ອີເທີ 6–11,” ຈົ່ງຕາມເຮົາມາ—ສຳລັບບ້ານ ແລະ ໂບດ: ພຣະຄຳພີມໍມອນ 2024 (2023)
“ວັນທີ 18–24 ເດືອນພະຈິກ. ອີເທີ 6–11,” ຈົ່ງຕາມເຮົາມາ—ສຳລັບບ້ານ ແລະ ໂບດ: 2024 (2023)
I Will Bring You up Again out of the Depths [ເຮົາຈະເອົາເຈົ້າຂຶ້ນມາອີກຈາກຄວາມເລິກຂອງທະເລ], ໂດຍ ຈອນນາຕັນ ອາເຕີ ຄະລາກ
ວັນທີ 18–24 ເດືອນພະຈິກ: “ເພື່ອຄວາມຊົ່ວຕ່າງໆຈະໄດ້ໝົດໄປ”
ອີເທີ 6–11
ຫລາຍຮ້ອຍປີຫລັງຈາກທີ່ຊາວຢາເຣັດໄດ້ຖືກທຳລາຍ, ຊາວນີໄຟໄດ້ຄົ້ນພົບເມືອງຮ້າງບູຮານຂອງພວກເຂົາ. ໃນບັນດາເມືອງຮ້າງເຫລົ່ານັ້ນ ມີບັນທຶກລຶກລັບສະບັບໜຶ່ງ—ເປັນບັນທຶກທີ່ເຮັດດ້ວຍ “ຄຳສົດ” ຊຶ່ງ “ເຕັມໄປດ້ວຍຕົວອັກຂະລະ” ແລະ ຊາວນີໄຟ “ປາດຖະໜາເກີນກວ່າຈະວັດແທກໄດ້” ທີ່ຈະອ່ານມັນ (ໂມໄຊຢາ 8:9; 28:12). ທຸກວັນນີ້ທ່ານມີເລື່ອງຫຍໍ້ຂອງບັນທຶກນີ້, ແລະ ມັນມີຊື່ວ່າ ໜັງສືອີເທີ. ເມື່ອຊາວນີໄຟໄດ້ອ່ານມັນ, “ພວກເຂົາເຕັມໄປດ້ວຍຄວາມເສົ້າສະຫລົດໃຈ” ທີ່ໄດ້ຮຽນຮູ້ເຖິງຄວາມເສື່ອມໂຊມຂອງຊາວຢາເຣັດ. “ເຖິງຢ່າງໃດກໍຕາມ ມັນໄດ້ໃຫ້ຄວາມຮູ້ແກ່ພວກເຂົາຢ່າງຫລວງຫລາຍ, ຊຶ່ງໃນນັ້ນໄດ້ເຮັດໃຫ້ພວກເຂົາມີຄວາມປິຕິຍິນດີ” (ໂມໄຊຢາ 28:18). ທ່ານ, ເຊັ່ນດຽວກັນ, ກໍອາດພົບເຫັນຊ່ວງໄລຍະທີ່ໂສກເສົ້າໃນໜັງສືເຫລັ້ມນີ້. ແຕ່ທ່ານຍັງສາມາດປິຕິຍິນດີ ໃນຂອງປະທານແຫ່ງຄວາມຮູ້ນີ້ໄດ້ນຳອີກ. ຕາມທີ່ໂມໂຣໄນໄດ້ຂຽນວ່າ, “ຂ້າພະເຈົ້າ … ໄດ້ຮັບບັນຊາໃຫ້ຂຽນເລື່ອງເຫລົ່ານີ້ ເພື່ອຄວາມຊົ່ວຕ່າງໆຈະໄດ້ໝົດໄປ, ແລະ ວ່າເວລາຈະມາຮອດ ຊຶ່ງຊາຕານຈະບໍ່ມີອຳນາດເໜືອໃຈຂອງລູກຫລານມະນຸດ” (ອີເທີ 8:23, 26).
ແນວຄິດສຳລັບການຮຽນຮູ້ຢູ່ທີ່ບ້ານ ແລະ ຢູ່ທີ່ໂບດ
ພຣະຜູ້ເປັນເຈົ້າຈະນຳພາເຮົາຜ່ານຜ່າການເດີນທາງໃນຊ່ວງມະຕະຂອງເຮົາ.
ທ່ານອາດພົບເຫັນຄວາມຮູ້ທາງວິນຍານ ຖ້າຫາກທ່ານປຽບທຽບການເດີນທາງຂ້າມທະເລຂອງຊາວຢາເຣັດໃສ່ກັບການເດີນທາງໃນຊ່ວງມະຕະຂອງທ່ານ. ຍົກຕົວຢ່າງ, ພຣະຜູ້ເປັນເຈົ້າໄດ້ຈັດຫາຫຍັງໃຫ້ທ່ານເພື່ອເປັນແສງສະຫວ່າງ ທີ່ຄືກັນກັບກ້ອນຫີນຢູ່ໃນເຮືອຂອງຊາວຢາເຣັດ? ເຮືອເຫລົ່ານັ້ນ, ຫລື ລົມທີ່ “ພັດໄປທາງແຜ່ນດິນແຫ່ງຄຳສັນຍາ ເປັນຕົວແທນໃຫ້ສິ່ງໃດ”? (ອີເທີ 6:8). ທ່ານຮຽນຮູ້ຫຍັງແດ່ຈາກການກະທຳຂອງຊາວຢາເຣັດ ກ່ອນ, ລະຫວ່າງ, ແລະ ຫລັງຈາກການເດີນທາງ? ພຣະຜູ້ເປັນເຈົ້າກຳລັງນຳພາທ່ານໄປຫາແຜ່ນດິນແຫ່ງຄຳສັນຍາແນວໃດ?
“ຮ້ອງສັນລະເສີນພຣະຜູ້ເປັນເຈົ້າ.” ຊາວຢາເຣັດໄດ້ສະແດງຄວາມກະຕັນຍູຂອງພວກເຂົາ ແລະ ຄວາມຮັກທີ່ມີໃຫ້ແກ່ພຣະເຈົ້າ ຜ່ານທາງການຮ້ອງເພງ ແລະ ການສັນລະເສີນ (ເບິ່ງ ອີເທີ 6:9). ທ່ານອາດຊອກຫາ ຫລື ສ້າງໂອກາດທີ່ຈະນຳໃຊ້ສຽງເພງ ແລະ ປະຈັກພະຍານຈາກໃຈຈິງ ເພື່ອສັນລະເສີນພຣະເຈົ້າຢູ່ທີ່ບ້ານ ແລະ ຢູ່ທີ່ໂບດ. ຍົກຕົວຢ່າງ, ມັນອາດສົມຄວນທີ່ຈະຮ້ອງເພງສັນລະເສີນ ດັ່ງເຊັ່ນ “ພຣະຜູ້ໄຖ່ແຫ່ງອິດສະຣາເອນ” (ເພງສວດ ແລະ ເພງຂອງເດັກນ້ອຍ, 5) ເມື່ອສຶກສາ ອີເທີ 6:1–12.
Baby on Board [ແອນ້ອຍໃນເຮືອ], ໂດຍ ເຄັນໂດ ເຣ ຈອນສັນ
ອີເທີ 6:5–18, 30; 9:28–35; 10:1–2
“ເດີນໄປຢ່າງຖ່ອມຕົວຕໍ່ພຣະພັກຂອງພຣະຜູ້ເປັນເຈົ້າ.”
ເຖິງແມ່ນວ່າຄວາມທະນົງຕົວ ແລະ ຄວາມຊົ່ວຮ້າຍເບິ່ງຄືວ່າ ເຕັມຢູ່ໃນປະຫວັດສາດຂອງຊາວຢາເຣັດ, ແຕ່ກໍຍັງມີຕົວຢ່າງຂອງຄວາມຖ່ອມຕົວຢູ່ໃນບົດເຫລົ່ານີ້—ໂດຍສະເພາະ ຢູ່ໃນ ອີເທີ 6:5–18, 30; 9:28–35; ແລະ 10:1–2. ການໄຕ່ຕອງຄຳຖາມດັ່ງຕໍ່ໄປນີ້ ສາມາດຊ່ວຍທ່ານຮຽນຮູ້ຈາກຕົວຢ່າງເຫລົ່ານີ້: ເປັນຫຍັງຊາວຢາເຣັດຈຶ່ງຖ່ອມຕົວລົງໃນສະຖານະການເຫລົ່ານີ້? ພວກເຂົາສະແດງໃຫ້ເຫັນຄວາມຖ່ອມຕົວຂອງພວກເຂົາແນວໃດ? ພຣະເຈົ້າອວຍພອນພວກເຂົາເພາະການຖ່ອມຕົວແນວໃດ? ໃຫ້ພິຈາລະນາສິ່ງທີ່ທ່ານສາມາດເຮັດ ເພື່ອ “ເດີນໄປຢ່າງຖ່ອມຕົວຕໍ່ພຣະພັກຂອງພຣະຜູ້ເປັນເຈົ້າ” ດ້ວຍຄວາມເຕັມໃຈ (ອີເທີ 6:17) ແທນທີ່ຈະຖືກບັງຄັບໃຫ້ຖ່ອມຕົວ (ເບິ່ງ ໂມໄຊຢາ 4:11–12; ແອວມາ 32:14–18).
ເບິ່ງ Dale G. Renlund, “Do Justly, Love Mercy, and Walk Humbly with God,” Liahona, Nov. 2020, 109–12 ນຳອີກ.
ເຮົາສາມາດກາຍເປັນຜູ້ນຳເໝືອນດັ່ງພຣະຄຣິດ.
ບົດທີ 7–11 ຂອງອີເທີ ສຳລວມຢ່າງໜ້ອຍ 28 ລຸ້ນຄົນ. ເຖິງແມ່ນວ່າບໍ່ສາມາດໃຫ້ລາຍລະອຽດຢ່າງຫລວງຫລາຍໄວ້ໃນຊ່ອງວ່າງຈຳນວນໜ້ອຍນັ້ນ, ແຕ່ແບບແຜນໄດ້ເລີ່ມຕົ້ນປະກົດຂຶ້ນກ່ຽວກັບຜົນສະທ້ອນຂອງການເປັນຜູ້ນຳທີ່ຊອບທຳ ແລະ ຊົ່ວຮ້າຍ. ທ່ານຮຽນຮູ້ຫຍັງແດ່ກ່ຽວກັບການເປັນຜູ້ນຳຈາກຕົວຢ່າງ—ໃນທາງລົບ ແລະ ທາງບວກ—ຂອງກະສັດທີ່ລະບຸໄວ້ຢູ່ຂ້າງລຸ່ມນີ້?
-
ໂອໄຣຮາ—ອີເທີ 6:30; 7:1
-
ຊູນ—ອີເທີ 7:23–27
-
ຢາເຣັດ—ອີເທີ 8:1–7, 11–15
-
ອີເມີ ແລະ ໂຄຣິອານທຳ—ອີເທີ 9:21–23
-
ເຫັດ—ອີເທີ 9:26–30
-
ເຊັດ—ອີເທີ 10:1–2
-
ຣິບລາຄິດ—ອີເທີ 10:5–8
-
ໂມຣິອານທັນ—ອີເທີ 10:9–11
-
ລິບ—ອີເທີ 10:19–28
-
ອີເທັມ—ອີເທີ 11:11–13
-
ພຣະເຢຊູຄຣິດ—ມັດທາຍ 18:1–4; 20:20–28; 23:11
ແອວເດີ ດີເດີ ແອັຟ ອຸກດອບ ໄດ້ໃຫ້ຄຳແນະນຳກ່ຽວກັບການເປັນຜູ້ນຳໃນຂ່າວສານຂອງເພິ່ນ “The Greatest among You” (Liahona, May 2017, 78–81). ໃຫ້ພິຈາລະນາທີ່ຈະສຶກສາຂ່າວສານນີ້—ໂດຍສະເພາະເລື່ອງລາວທີ່ເພິ່ນບອກເລົ່າ—ຊອກຫາຫລັກທຳ ຫລື ແບບແຜນຂອງການເປັນຜູ້ນຳເໜືອນດັ່ງພຣະຄຣິດ. ເມື່ອໃດທີ່ທ່ານໄດ້ເຫັນຫລັກທຳ ຫລື ແບບແຜນເຫລົ່ານີ້ຖືກສະແດງໃຫ້ເຫັນໃນຜູ້ຄົນທີ່ນຳພາ?
ຂະນະທີ່ທ່ານໄຕ່ຕອງສິ່ງທີ່ທ່ານໄດ້ຮຽນຮູ້, ໃຫ້ຄິດກ່ຽວກັບໂອກາດທີ່ທ່ານມີ ໃນການນຳພາ ຫລື ເປັນອິດທິພົນຕໍ່ຄົນອື່ນຢູ່ໃນບ້ານເຮືອນຂອງທ່ານ, ໃນຊຸມຊົນຂອງທ່ານ, ແລະ ໃນການເອີ້ນຂອງທ່ານໃນສາດສະໜາຈັກ, ແລະ ອື່ນໆ. ທ່ານຈະສາມາດພັດທະນາຄຸນສົມບັດຂອງການເປັນຜູ້ນຳເໝືອນດັ່ງພຣະຄຣິດໄດ້ແນວໃດ, ເຖິງແມ່ນວ່າທ່ານບໍ່ມີການມອບໝາຍໃນການເປັນຜູ້ນຳໂດຍສະເພາະກໍຕາມ.
ເບິ່ງ Gospel Topics, “Serving in Church Callings,” ຫ້ອງສະໝຸດພຣະກິດຕິຄຸນ; “Principles of Leadership in the Church,” ຄູ່ມືທົ່ວໄປ: ການຮັບໃຊ້ໃນສາດສະໜາຈັກຂອງພຣະເຢຊູຄຣິດແຫ່ງໄພ່ພົນຍຸກສຸດທ້າຍ, 4.2 ນຳອີກ (ChurchofJesusChrist.org).
ພຣະຜູ້ເປັນເຈົ້າບໍ່ກະທຳວຽກງານໃນຄວາມມືດ.
ເມື່ອຜູ້ຄົນສົມຮູ້ຮ່ວມຄິດທີ່ຈະຮັກສາຄວາມຊົ່ວຮ້າຍຂອງຕົນໄວ້ເປັນຄວາມລັບ, ພວກເຂົາມີສ່ວນຮ່ວມໃນການມົ້ວສຸມລັບ. ນອກເໜືອໄປຈາກການມົ້ວສຸມລັບທີ່ບັນຍາຍຢູ່ໃນ ອີເທີ 8:7–18, ຕົວຢ່າງອື່ນໆກໍມີຢູ່ໃນ ຮີລາມັນ 1:9–12; 2:2–11; 6:16–30; ໂມເຊ 5:29–33. ໃຫ້ຄິດທີ່ຈະປຽບທຽບການກົງກັນຂ້າມໃນຂໍ້ເຫລົ່ານີ້ໃສ່ກັບ 2 ນີໄຟ 26:22–24, ຊຶ່ງໃນນັ້ນນີໄຟໄດ້ບັນຍາຍວິທີທີ່ພຣະຜູ້ເປັນເຈົ້າກະທຳວຽກງານຂອງພຣະອົງແນວໃດ. ທ່ານຄິດວ່າ ເປັນຫຍັງໂມໂຣໄນຈຶ່ງຖືກບັນຊາໃຫ້ຂຽນສິ່ງທີ່ເພິ່ນໄດ້ຂຽນກ່ຽວກັບການມົ້ວສຸມລັບ?
ທ່ານໄດ້ຮຽນຮູ້ຫຍັງແດ່ຈາກໜັງສືອີເທີ ທີ່ສາມາດຊ່ວຍທ່ານໃຫ້ໄດ້ຮັບພອນທີ່ບັນຍາຍຢູ່ໃນ ອີເທີ 8:26?
ແນວຄິດສຳລັບການສິດສອນເດັກນ້ອຍ
ເຮົາສາມາດໄວ້ວາງໃຈພຣະບິດາເທິງສະຫວັນ ເພື່ອປອບໂຍນເຮົາ ເມື່ອເຮົາຢ້ານກົວ.
-
ທຸກຄົນມີວັນທີ່ລຳບາກ—ແມ່ນແຕ່ເດັກນ້ອຍ. ບາງທີທ່ານກໍສາມາດຊ່ວຍລູກໆຂອງທ່ານໃຫ້ຊອກຫາຖ້ອຍຄຳ ແລະ ວະລີຢູ່ໃນ ອີເທີ 6:1–12 ທີ່ສະແດງໃຫ້ເຫັນວ່າຊາວຢາເຣັດໄດ້ໄວ້ວາງໃຈພຣະເຈົ້າແນວໃດ ລະຫວ່າງຊ່ວງເວລາທີ່ຍາກລຳບາກ ແລະ ໜ້າຢ້ານກົວຫລາຍ. ໃຫ້ພິຈາລະນາທີ່ຈະແບ່ງປັນປະສົບການນຳກັນ ຕອນທີ່ພຣະເຈົ້າໄດ້ຊ່ວຍພວກທ່ານລະຫວ່າງຊ່ວງເວລາທີ່ຫຍຸ້ງຍາກໃນຊີວິດຂອງພວກທ່ານ.
ອີເທີ 6:9, 12, 30; 7:27; 10:2
ການຈື່ຈຳສິ່ງທີ່ພຣະຜູ້ເປັນເຈົ້າໄດ້ກະທຳຈະນຳຄວາມກະຕັນຍູ ແລະ ຄວາມສະຫງົບສຸກມາໃຫ້.
-
ຫລັງຈາກໄດ້ມາເຖິງແຜ່ນດິນແຫ່ງຄຳສັນຍາຢ່າງປອດໄພ, ຊາວຢາເຣັດໄດ້ຮູ້ສຶກຂອບພຣະຄຸນຈົນພວກເຂົາ “ໄດ້ຫລັ່ງນ້ຳຕາ” (ອີເທີ 6:12). ທ່ານອາດດົນໃຈລູກໆຂອງທ່ານໃຫ້ຮູ້ສຶກຂອບພຣະຄຸນສຳລັບພອນຂອງພຣະເຈົ້າ ໂດຍການຊ່ວຍພວກເຂົາໃຫ້ຊອກຫາວະລີຈາກ ອີເທີ 6:9, 12 ທີ່ສະແດງໃຫ້ເຫັນວ່າຊາວຢາເຣັດໄດ້ສະແດງຄວາມຂອບພຣະຄຸນຂອງພວກເຂົາແດ່ພຣະເຈົ້າແນວໃດ. ພວກເຂົາອາດມັກຈະຮ້ອງເພງ, ດັ່ງທີ່ຊາວຢາເຣັດໄດ້ຮ້ອງ, ເພງທີ່ສະແດງຄວາມກະຕັນຍູ, ເຊັ່ນ “ຂ້າຂໍຂອບພຣະໄທອົງບິດາ” (ເພງສວດ ແລະ ເພງຂອງເດັກນ້ອຍ, 67). ຂໍໃຫ້ລູກໆຂອງທ່ານບອກທ່ານກ່ຽວກັບບາງສິ່ງທີ່ພວກເຂົາຮູ້ສຶກຂອບພຣະຄຸນ.
-
ບາງທີລູກໆຂອງທ່ານກໍສາມາດອ່ານ ອີເທີ 6:30; 7:27; ແລະ 10:2 ແລະ ຊອກຫາສິ່ງທີ່ກະສັດຜູ້ຊອບທຳໄດ້ຈື່ຈຳ. ມັນໄດ້ມີຜົນກະທົບຕໍ່ວິທີທີ່ພວກເພິ່ນໄດ້ນຳພາຜູ້ຄົນຂອງພວກເພິ່ນແນວໃດ? ທ່ານ ແລະ ລູກໆຂອງທ່ານສາມາດສົນທະນາວິທີທີ່ຈະເຕືອນໃຈຕົວເອງ ເຖິງສິ່ງທີ່ພຣະເຈົ້າໄດ້ກະທຳເພື່ອພວກທ່ານ. ຍົກຕົວຢ່າງ, ບາງທີພວກເຂົາສາມາດຂຽນກ່ຽວກັບສິ່ງນັ້ນ ຫລື ແຕ້ມຮູບ. ທ່ານອາດແນະນຳໃຫ້ພວກເຂົາຂຽນພອນຈາກພຣະເຈົ້າ ທີ່ພວກເຂົາໄດ້ສັງເກດເຫັນລົງໄວ້ເປັນປະຈຳຈົນເປັນນິໄສ (ເບິ່ງ “O Remember, Remember” [ວິດີໂອ], ຫ້ອງສະໝຸດພຣະກິດຕິຄຸນ).
ເຮົາໄດ້ຮັບພອນເມື່ອເຮົາເຮັດຕາມສາດສະດາຂອງພຣະເຈົ້າ.
-
ບາງທີທ່ານ ແລະ ລູກໆຂອງທ່ານຈະມັກການສະແດງເຖິງສິ່ງທີ່ສາດສະດາໄດ້ສິດສອນໃຫ້ເຮົາເຮັດ. ທ່ານສາມາດເຮັດໃຫ້ເປັນການຫລິ້ນເກມກໍໄດ້ ຊຶ່ງໃນນັ້ນທ່ານທວາຍສິ່ງທີ່ການສະແດງນັ້ນເປັນຕົວແທນໃຫ້ແກ່ສິ່ງໃດ. ສິ່ງນີ້ສາມາດກະກຽມລູກໆຂອງທ່ານໃຫ້ສົນທະນາວ່າ ເປັນຫຍັງມັນຈຶ່ງສຳຄັນທີ່ຈະເຮັດຕາມສາດສະດາຂອງພຣະເຈົ້າ. ແລ້ວທ່ານສາມາດອ່ານ ອີເທີ 7:24–27 ເພື່ອຊອກຫາສິ່ງທີ່ໄດ້ເກີດຂຶ້ນເມື່ອຜູ້ຄົນໄດ້ເຊື່ອຟັງສາດສະດາຂອງພຣະເຈົ້າ. ເຮົາໄດ້ຮັບພອນໂດຍການເຮັດຕາມສາດສະດາໃນທຸກວັນນີ້ແນວໃດ?
ພຣະຜູ້ເປັນເຈົ້າມີເມດຕາເມື່ອເຮົາກັບໃຈ.
-
ການຊອກຫາແບບແຜນເປັນທັກສະທີ່ເປັນປະໂຫຍດຂອງການສຶກສາພຣະຄຳພີ. ໜັງສືອີເທີບັນຈຸແບບແຜນ ລຶ້ມຄືນ ທີ່ເນັ້ນເຖິງຄວາມເມດຕາຂອງພຣະຜູ້ເປັນເຈົ້າ. ເພື່ອຊ່ວຍໃຫ້ລູກໆຂອງທ່ານພົບເຫັນແບບແຜນນີ້, ເຊື້ອເຊີນພວກເຂົາໃຫ້ອ່ານ ອີເທີ 9:28–35 ແລະ ອີເທີ 11:5–8, ເພື່ອຊອກຫາຄວາມຄ້າຍຄືກັນລະຫວ່າງເລື່ອງລາວສອງເລື່ອງ. ເຮົາຮຽນຮູ້ຫຍັງແດ່ ຈາກເລື່ອງລາວເຫລົ່ານີ້? ບາງທີພວກເຂົາສາມາດຊອກຫາຮູບພາບຢູ່ໃນ ປຶ້ມຮູບພຣະກິດຕິຄຸນ ຂອງຜູ້ຄົນອື່ນໆຢູ່ໃນພຣະຄຳພີ ຜູ້ທີ່ໄດ້ກັບໃຈ ແລະ ໄດ້ຮັບການໃຫ້ອະໄພ.
ສຳລັບແນວຄິດເພີ່ມເຕີມ, ໃຫ້ເບິ່ງວາລະສານ Friend ສະບັບຂອງເດືອນນີ້.
Jaredite Barges [ເຮືອຂອງຊາວຢາເຣັດ], ໂດຍ ແກຣີ ເອີນເນັສ ສະມິດ