“ວັນທີ 27 ເດືອນພະຈິກ–ວັນທີ 1 ເດືອນທັນວາ: ‘ດ້ວຍສັດທາ ທຸກສິ່ງທຸກຢ່າງຍ່ອມສຳເລັດ.’ ອີເທີ 12–15,” ຈົ່ງຕາມເຮົາມາ—ສຳລັບບ້ານ ແລະ ໂບດ: ພຣະຄຳພີມໍມອນ 2024 (2023)
“ວັນທີ 25 ເດືອນພະຈິກ–ວັນທີ 1 ເດືອນທັນວາ. ອີເທີ 12–15,” ຈົ່ງຕາມເຮົາມາ—ສຳລັບບ້ານ ແລະ ໂບດ: 2024 (2023)
Ether Hiding in the Cavity of a Rock [ອີເທີກຳລັງລີ້ຊ່ອນຕົວຢູ່ໃນຫລືບຫີນ], ໂດຍ ແກຣີ ເອີນເນັສ໌ ສະມິດ
ວັນທີ 25 ເດືອນພະຈິກ–ວັນທີ 1 ເດືອນທັນວາ: “ດ້ວຍສັດທາ ທຸກສິ່ງທຸກຢ່າງຍ່ອມສຳເລັດ”
ອີເທີ 12–15
ຄຳທຳນາຍຂອງອີເທີຕໍ່ຊາວຢາເຣັດ ແມ່ນ “ຍິ່ງໃຫຍ່ ແລະ ໜ້າອັດສະຈັນ” (ອີເທີ 12:5). ເພິ່ນ “ໄດ້ບອກພວກເຂົາເຖິງເລື່ອງທັງໝົດນັບຕັ້ງແຕ່ການເລີ່ມຕົ້ນຂອງມະນຸດ” (ອີເທີ 13:2). ເພິ່ນໄດ້ເຫັນລ່ວງໜ້າເຖິງ “ວັນເວລາຂອງພຣະຄຣິດ” ແລະ ເຢຣູຊາເລັມໃໝ່ໃນຍຸກສຸດທ້າຍ (ອີເທີ 13:4). ແລະ ເພິ່ນໄດ້ກ່າວເຖິງຄວາມ “ມຸ້ງຫວັງສຳລັບໂລກທີ່ຈະດີກວ່ານີ້, ແທ້ຈິງແລ້ວ, ແມ່ນທາງເບື້ອງຂວາພຣະຫັດຂອງພຣະເຈົ້າ” (ອີເທີ 12:4). ແຕ່ຊາວຢາເຣັດໄດ້ປະຕິເສດຖ້ອຍຄຳຂອງເພິ່ນ, ເພາະເຫດຜົນດຽວກັນກັບທີ່ຜູ້ຄົນປະຕິເສດຄຳທຳນາຍຂອງຜູ້ຮັບໃຊ້ຂອງພຣະເຈົ້າໃນທຸກວັນນີ້—“ຍ້ອນວ່າພວກເຂົາບໍ່ [ເຫັນ] ມັນ” (ອີເທີ 12:5). ຕ້ອງມີສັດທາກ່ອນຈະເຊື່ອໃນຄຳສັນຍາ ຫລື ໃນຄຳເຕືອນກ່ຽວກັບເລື່ອງທີ່ເຮົາບໍ່ສາມາດຫລຽວເຫັນ, ຄືກັນກັບອີເທີທີ່ຕ້ອງມີສັດທາທີ່ຈະທຳນາຍເຖິງ “ເລື່ອງທີ່ຍິ່ງໃຫຍ່ ແລະ ໜ້າອັດສະຈັນ” ຕໍ່ຜູ້ຄົນທີ່ບໍ່ເຊື່ອ. ໂມໂຣໂນຕ້ອງມີສັດທາທີ່ຈະໄວ້ວາງໃຈວ່າ ພຣະຜູ້ເປັນເຈົ້າສາມາດປ່ຽນ “ຄວາມອ່ອນແອຂອງການຂຽນ” ຂອງເພິ່ນ ໃຫ້ກັບເປັນຄວາມເຂັ້ມແຂງ (ເບິ່ງ ອີເທີ 12:23–27). ມັນແມ່ນສັດທາແບບນີ້ແຫລະ ທີ່ເຮັດໃຫ້ເຮົາ “ແນ່ໃຈ ແລະ ແນ່ວແນ່, ເຮັດວຽກງານດີໃຫ້ຫລາຍຢູ່ສະເໝີ, ອັນຈະນຳໄປຫາການຖວາຍບາລະມີແດ່ພຣະເຈົ້າ” (ອີເທີ 12:4). ແລະ ມັນແມ່ນສັດທາແບບນີ້ ຊຶ່ງໂດຍການນັ້ນ “ທຸກສິ່ງທຸກຢ່າງຍ່ອມສຳເລັດ” (ອີເທີ 12:3).
ແນວຄິດສຳລັບການຮຽນຮູ້ຢູ່ທີ່ບ້ານ ແລະ ຢູ່ທີ່ໂບດ
ສັດທາໃນພຣະເຢຊູຄຣິດສາມາດນຳໄປສູ່ການມະຫັດສະຈັນ.
ມັນເປັນເລື່ອງປົກກະຕິໃນທຸກວັນນີ້, ດັ່ງທີ່ມັນໄດ້ເປັນໃນວັນເວລາຂອງອີເທີ, ທີ່ຫລາຍຄົນຢາກເຫັນຫລັກຖານກ່ອນພວກເຂົາຈະເຊື່ອໃນພຣະເຈົ້າ ແລະ ໃນອຳນາດຂອງພຣະອົງ. ທ່ານຮຽນຮູ້ຫຍັງແດ່ຈາກ ອີເທີ 12:5–6 ກ່ຽວກັບຄວາມຄິດນີ້?
ຂະນະທີ່ທ່ານອ່ານ ອີເທີ 12, ທ່ານອາດຢາກໝາຍເຫດທຸກໆເທື່ອທີ່ທ່ານພົບເຫັນຄຳວ່າ “ສັດທາ.” ໃຫ້ພິຈາລະນາສິ່ງທີ່ແຕ່ລະເຫດການສິດສອນກ່ຽວກັບສັດທາ. ຄຳຖາມແບບດັ່ງຕໍ່ໄປນີ້ສາມາດຊ່ວຍໄດ້: ແມ່ນຫຍັງຄືສັດທາ? ການໃຊ້ສັດທາໝາຍຄວາມວ່າແນວໃດ? ແມ່ນຫຍັງຄືຜົນຂອງສັດທາໃນພຣະເຢຊູຄຣິດ? ທ່ານກໍຍັງສາມາດບັນທຶກຄວາມຄິດຂອງທ່ານກ່ຽວກັບພະຍານທີ່ທ່ານໄດ້ຮັບນຳອີກ “ຫລັງຈາກການທົດລອງສັດທາຂອງທ່ານ” (ອີເທີ 12:6).
ເບິ່ງ Russell M. Nelson, “Christ Is Risen; Faith in Him Will Move Mountains,” Liahona, May 2021, 101–4 ນຳອີກ.
ປ່ອຍໃຫ້ຄົນອື່ນແບ່ງປັນ, ແລະ ບາງເທື່ອສິດສອນ. ຜູ້ຄົນຈະຮຽນຮູ້ໄດ້ດີທີ່ສຸດເມື່ອເຂົາເຈົ້າມີໂອກາດທີ່ຈະແບ່ງປັນສິ່ງທີ່ເຂົາເຈົ້າກຳລັງຮຽນຮູ້ຢູ່ ຫລື ແມ່ນແຕ່ສິດສອນຢູ່ໃນສະພາບແວດລ້ອມທີ່ເປັນທາງການ. ບໍ່ວ່າຈະຢູ່ທີ່ບ້ານ ຫລື ທີ່ໂບດ, ໃຫ້ພິຈາລະນາທີ່ຈະອະນຸຍາດໃຫ້ຄົນອື່ນ, ລວມທັງຊາວໜຸ່ມ, ສິດສອນສ່ວນໃດໜື່ງຂອງບົດຮຽນ.
ພຣະເຢຊູໃຫ້ “ຄວາມຫວັງອັນປະເສີດທີ່ສຸດ” ແກ່ເຮົາ.
ນອກເໜືອຈາກຄວາມຮູ້ກ່ຽວກັບສັດທາທີ່ເລິກເຊິ່ງແລ້ວ, ອີເທີ 12 ກໍຍັງມີຫລາຍສິ່ງທີ່ຈະກ່າວກ່ຽວກັບຄວາມຫວັງນຳອີກ. ປ່ອຍໃຫ້ຄຳຖານເຫລົ່ານີ້ນຳພາການສຶກສາຂອງທ່ານ.
-
ແມ່ນຫຍັງຄືເຫດຜົນທີ່ອີເທີໄດ້ “ມຸ້ງຫວັງສຳລັບໂລກທີ່ຈະດີກວ່ານີ້”? (ເບິ່ງ ອີເທີ 12:2–5).
-
ແມ່ນຫຍັງຄືຈຸດປະສົງຂອງສະໝໍ? ຄວາມຫວັງເຮັດຫຍັງແດ່ໃຫ້ແກ່ຈິດວິນຍານຂອງທ່ານ ທີ່ຄ້າຍຄືກັນກັບສິ່ງທີ່ສະໝໍເຮັດສຳລັບເຮືອ? (ເບິ່ງ ອີເທີ 12:4).
-
ເຮົາຄວນມຸ້ງຫວັງຫຍັງແດ່? (ເບິ່ງ ອີເທີ 12:4; ໂມໂຣໄນ 7:41).
-
ພຣະກິດຕິຄຸນຂອງພຣະເຢຊູຄຣິດໄດ້ໃຫ້ “ຄວາມຫວັງອັນປະເສີດທີ່ສຸດ” ແກ່ທ່ານແນວໃດ? (ອີເທີ 12:32).
ເບິ່ງ ໂມໂຣໄນ 7:40–41; Jeffrey R. Holland, “A Perfect Brightness of Hope,” Liahona, May 2020, 81–84 ນຳອີກ.
ພຣະເຢຊູຄຣິດສາມາດເຮັດໃຫ້ຄວາມອ່ອນແອຂອງເຮົາກາຍເປັນຄວາມເຂັ້ມແຂງໄດ້.
ເມື່ອເຮົາອ່ານການຂຽນທີ່ມີພະລັງຂອງໂມໂຣໂນ, ມັນງ່າຍທີ່ຈະລືມໄປວ່າ ເພິ່ນໄດ້ເປັນຫ່ວງກັບ “ຄວາມອ່ອນແອຂອງການຂຽນ” ຂອງເພິ່ນ ແລະ ຢ້ານວ່າຜູ້ຄົນຈະເຍາະເຍີ້ຍຖ້ອຍຄຳຂອງເພິ່ນ (ເບິ່ງ ອີເທີ 12:23–25). ຖ້າຫາກທ່ານເຄີຍຮູ້ສຶກກັງວົນກ່ຽວກັບຄວາມອ່ອນແອຂອງທ່ານເອງ, ໃຫ້ອ່ານກ່ຽວກັບການຕໍ່ສູ້ດີ້ນລົນຂອງໂມໂຣໄນ—ແລະ ການຕອບຮັບຂອງພຣະຜູ້ຊ່ວຍໃຫ້ລອດ—ຢູ່ໃນ ອີເທີ 12:23–29. ທ່ານອາດໄຕ່ຕອງເວລາທີ່ພຣະເຢຊູຄຣິດໄດ້ຊ່ວຍເຫລືອທ່ານໃຫ້ຮັບຮູ້ຄວາມອ່ອນແອຂອງທ່ານ ແລະ ໄດ້ເຮັດໃຫ້ທ່ານເຂັ້ມແຂງ—ເຖິງແມ່ນວ່າພຣະອົງບໍ່ໄດ້ລົບລ້າງມັນທັງໝົດກໍຕາມ. ພ້ອມນີ້ກໍໃຫ້ຄິດກ່ຽວກັບຄວາມອ່ອນແອຕ່າງໆທີ່ທ່ານກຳລັງຕໍ່ສູ້ດີ້ນລົນຢູ່ໃນເວລານີ້. ທ່ານຕ້ອງເຮັດສິ່ງໃດເພື່ອຈະໄດ້ຮັບຄຳສັນຍາຂອງພຣະຜູ້ຊ່ວຍໃຫ້ລອດ ເພື່ອ “ເຮັດໃຫ້ສິ່ງທີ່ອ່ອນແອນັ້ນກັບມາເຂັ້ມແຂງ”? (ອີເທີ 12:27).
ໃຫ້ພິຈາລະນາທີ່ຈະຄົ້ນຄວ້າຂໍ້ພຣະຄຳພີດັ່ງຕໍ່ໄປນີ້ ເພື່ອຈະເຫັນວ່າຄົນອື່ນຢູ່ໃນພຣະຄຳພີໄດ້ຮັບຄວາມເຂັ້ມແຂງ ຜ່ານທາງພຣະຄຸນຂອງພຣະເຢຊູຄຣິດແນວໃດ:
-
ເອນົກ (ໂມເຊ 6:31–34; 7:13)
-
ໂມເຊ (ອົບພະຍົບ 4:10–12; 14:31)
-
ກີເດໂອນ (ພວກຜູ້ປົກຄອງ 6:12–16; 8:22–23)
-
ເປໂຕ (ລູກາ 5:8–10; 22:55–62; ກິດຈະການ 4:13–21)
-
ໂມໂຣໄນ (ອີເທີ 12:23–29)
-
ໂຈເຊັບ ສະມິດ (ໂຈເຊັບ ສະມິດ—ປະຫວັດ 1:28; ຄຳສອນ ແລະ ພັນທະສັນຍາ 35:17; 135:3)
ເບິ່ງ Gospel Topics, “Grace,” ຫ້ອງສະໝຸດພຣະກິດຕິຄຸນ; “ເຮົາຮູ້ວ່າພຣະບິດາຊົງພຣະຊົນ,” ເພງສວດ ແລະ ເພງຂອງເດັກນ້ອຍ, 65.
ການປະຕິເສດສາດສະດາຂອງພຣະຜູ້ເປັນເຈົ້າຈະນຳເຮົາໄປສູ່ສິ່ງອັນຕະລາຍທາງວິນຍານ.
ການເປັນກະສັດຂອງຊາວຢາເຣັດ, ຕາມປະຫວັດສາດ, ເປັນຕຳແໜ່ງທີ່ອັນຕະລາຍ. ມັນເປັນຄວາມຈິງໂດຍສະເພາະສຳລັບໂຄຣິອານທະເມີ, ດັ່ງທີ່ຫລາຍຄົນຊຶ່ງເປັນ “ພວກຍິ່ງໃຫຍ່ … ພະຍາຍາມທຳລາຍ [ເພິ່ນ]” (ອີເທີ 13:15–16). ໃນ ອີເທີ 13:15–22, ໃຫ້ສັງເກດເບິ່ງສິ່ງທີ່ໂຄຣິອານທະເມີໄດ້ເຮັດ ເພື່ອປ້ອງກັນຕົວເອງ ແລະ ສິ່ງທີ່ສາດສະດາອີເທີໄດ້ແນະນຳເພິ່ນໃຫ້ເຮັດແທນນັ້ນ. ຂະນະທີ່ທ່ານອ່ານສ່ວນທີ່ເຫລືອຢູ່ຂອງໜັງສືອີເທີ, ໃຫ້ໄຕ່ຕອງຜົນສະທ້ອນຂອງການປະຕິເສດສາດສະດາ. ມີຫຍັງເກີດຂຶ້ນກັບຜູ້ຄົນເມື່ອ “ພຣະວິນຍານຂອງພຣະຜູ້ເປັນເຈົ້າ [ເລີກລົ້ມ] ຄວາມພະຍາຍາມກັບພວກເຂົາ”? (ອີເທີ 15:19). ພຣະຜູ້ເປັນເຈົ້າປະສົງໃຫ້ເຮົາຮຽນຮູ້ຫຍັງແດ່ຈາກເລື່ອງລາວເຫລົ່ານີ້? ໃຫ້ພິຈາລະນາສິ່ງທີ່ທ່ານຈະເຮັດ ເພື່ອເຮັດຕາມສາດສະດາຂອງພຣະອົງ.
ສຳລັບແນວຄິດເພີ່ມເຕີມ, ໃຫ້ເບິ່ງວາລະສານ Liahona ແລະ For the Strength of Youth ສະບັບຂອງເດືອນນີ້.
ແນວຄິດສຳລັບການສິດສອນເດັກນ້ອຍ
ສັດທາຄືການເຊື່ອໃນສິ່ງທີ່ເຮົາບໍ່ສາມາດຫລຽວເຫັນ.
-
ໃຫ້ຄິດທີ່ຈະຊ່ວຍລູກໆຂອງທ່ານກ່າວຊ້ຳກັບທ່ານຄຳທີ່ວ່າ “ສັດທາຄືສິ່ງທີ່ມຸ້ງຫວັງໄວ້ ແລະ ຍັງບໍ່ທັນເຫັນ” ຈາກ ອີເທີ 12:6. ພວກເຂົາອາດມັກເບິ່ງຮູບພາບທີ່ສະແດງໃຫ້ເຫັນຕົວຢ່າງຂອງສັດທາຢູ່ໃນ ອີເທີ 12:13–15, 19–21 (ເບິ່ງ ປຶ້ມຮູບພຣະກິດຕິຄຸນ, ເລກທີ 78, 85, ແລະ ໜ້າກິດຈະກຳຂອງອາທິດນີ້). ປ່ອຍໃຫ້ລູກໆຂອງທ່ານອະທິບາຍສິ່ງທີ່ພວກເຂົາຮູ້ກ່ຽວກັບເລື່ອງລາວແຕ່ລະເລື່ອງນີ້. ຕໍ່ໄປນີ້ແມ່ນຄຳຖາມບາງຂໍ້ ເພື່ອຊ່ວຍພວກທ່ານໃຫ້ສົນທະນາຕົວຢ່າງຂອງສັດທາເຫລົ່ານີ້:
-
ຜູ້ຄົນເຫລົ່ານີ້ໄດ້ມຸ້ງຫວັງຫຍັງແດ່?
-
ສັດທາຂອງເຂົາເຈົ້າຖືກທົດລອງແນວໃດ?
-
ແມ່ນຫຍັງໄດ້ເກີດຂຶ້ນຍ້ອນສັດທາຂອງພວກເຂົາ?
ທ່ານກໍສາມາດແບ່ງປັນປະສົບການສ່ວນຕົວຂອງທ່ານໃນການໃຊ້ສັດທາເຊັ່ນກັນ.
-
ຄວາມຫວັງແມ່ນຄືກັນກັບສະໝໍຕໍ່ຈິດວິນຍານຂອງເຮົາ.
-
ເພື່ອຈະເຂົ້າໃຈສິ່ງທີ່ ອີເທີ 12:4 ສິດສອນກ່ຽວກັບຄວາມຫວັງ, ທ່ານ ແລະ ລູກໆຂອງທ່ານສາມາດເບິ່ງຮູບເຮືອ ແລະ ສະໝໍ. ເປັນຫຍັງເຮືອຈຶ່ງຕ້ອງການສະໝໍ? ຈະມີຫຍັງເກີດຂຶ້ນກັບເຮືອທີ່ບໍ່ມີສະໝໍ? ຂະນະທີ່ພວກທ່ານອ່ານ ອີເທີ 12:4 ນຳກັນ, ໃຫ້ສົນທະນາກ່ຽວກັບວ່າ ຄວາມຫວັງຊ່ວຍເຮົາໃນທຳນອງດຽວກັນກັບທີ່ສະໝໍຊ່ວຍເຮືອແນວໃດ. ເຊື້ອເຊີນລູກໆຂອງທ່ານໃຫ້ແຕ້ມຮູບເຮືອ ແລະ ສະໝໍ ເພື່ອວ່າພວກເຂົາຈະສາມາດສິດສອນຄົນອື່ນກ່ຽວກັບຄວາມຫວັງ.
-
ຖ້າຫາກລູກໆຂອງທ່ານຕ້ອງການນິຍາມຂອງຄຳວ່າ ຄວາມຫວັງ, ໃຫ້ຊ່ວຍພວກເຂົາຊອກຫາຢ່າງໜຶ່ງຢູ່ໃນຄູ່ມືພຣະຄຳພີ, “ຄວາມຫວັງ” (ຫ້ອງສະໝຸດພຣະກິດຕິຄຸນ). ອີງຕາມນິຍາມນີ້ ແລະ ອີເທີ 12:4, 32, ເຮົາຄວນມຸ້ງຫວັງຫຍັງແດ່? (ເບິ່ງ ໂມໂຣໄນ 7:40–42 ນຳອີກ). ຊ່ວຍລູກໆຂອງທ່ານຄິດຫາຖ້ອຍຄຳອື່ນໆສຳລັບ ຄວາມຫວັງ, ພ້ອມທັງຖ້ອຍຄຳທີ່ມີຄວາມໝາຍກົງກັນຂ້າມກັບຄຳທີ່ວ່າ ຄວາມຫວັງ. ພວກທ່ານຍັງສາມາດແບ່ງປັນຄວາມຈິງຂອງພຣະກິດຕິຄຸນບາງຢ່າງນຳກັນ ທີ່ໃຫ້ຄວາມຫວັງແກ່ພວກທ່ານນຳອີກ.
ພຣະເຢຊູຄຣິດສາມາດຊ່ວຍເຮົາໃຫ້ເຂັ້ມແຂງທາງວິນຍານ.
-
ບາງເທື່ອເດັກນ້ອຍຈະປະເຊີນສະພາບການ ຊຶ່ງໃນນັ້ນພວກເຂົາຮູ້ສຶກອ່ອນແອ, ດັ່ງທີ່ໂມໂຣໄນໄດ້ຮູ້ສຶກ. ຊ່ວຍລູກໆຂອງທ່ານຄົ້ນຫາວ່າ ເປັນຫຍັງໂມໂຣໄນຈຶ່ງຮູ້ສຶກແບບນີ້ ຢູ່ໃນ ອີເທີ 12:23–25, ແລະ ຖາມພວກເຂົາຖ້າຫາກວ່າພວກເຂົາເຄີຍມີຄວາມຮູ້ສຶກຄ້າຍຄືກັນບໍ. ແລ້ວເຊື້ອເຊີນພວກເຂົາໃຫ້ອ່ານ ຂໍ້ທີ 26–27 ເພື່ອຄົ້ນຫາວ່າພຣະຜູ້ເປັນເຈົ້າໄດ້ຊ່ວຍໂມໂຣໄນແນວໃດ.
-
ບາງທີລູກໆຂອງທ່ານສາມາດແຕ້ມຮູບຂອງສິ່ງທີ່ອ່ອນແອ ແລະ ສິ່ງທີ່ແຂງແກ່ນ. ແລ້ວທ່ານສາມາດຕື່ມຖ້ອຍຄຳ ແລະ ວະລີຈາກ ອີເທີ 12:23–29 ໃສ່ໃນຮູບແຕ້ມຂອງພວກເຂົາ ທີ່ສິດສອນພວກເຂົາກ່ຽວກັບວິທີທີ່ພຣະຜູ້ຊ່ວຍໃຫ້ລອດສາມາດປ່ຽນຄວາມອ່ອນແອຂອງເຮົາໃຫ້ເປັນຄວາມເຂັ້ມແຂງແນວໃດ. ຊຸກຍູ້ລູກໆຂອງທ່ານໃຫ້ຄິດກ່ຽວກັບຄວາມອ່ອນແອທີ່ພວກເຂົາມີ ແລະ ແລ້ວສະແຫວງຫາຄວາມຊ່ວຍເຫລືອຂອງພຣະຜູ້ຊ່ວຍໃຫ້ລອດເພື່ອຈະເຂັ້ມແຂງຂຶ້ນ. ທ່ານຍັງສາມາດແບ່ງປັນປະສົບການ ຕອນທີ່ພຣະຜູ້ຊ່ວຍໃຫ້ລອດໄດ້ຊ່ວຍທ່ານໃຫ້ເຂັ້ມແຂງພໍທີ່ຈະເຮັດສິ່ງທີ່ຍາກນຳອີກ.
ສຳລັບແນວຄິດເພີ່ມເຕີມ, ໃຫ້ເບິ່ງວາລະສານ Friend ສະບັບຂອງເດືອນນີ້.
Marvelous Were the Prophecies of Ether [ຄຳທຳນາຍຂອງອີເທີແມ່ນໜ້າອັດສະຈັນ], ໂດຍ ວາວເຕີ ເຣນ