“ວັນທີ 16–22 ເດືອນທັນວາ: ‘ຈົ່ງມາຫາພຣະຄຣິດ, ແລະ ຖືກເຮັດໃຫ້ເປັນຄົນດີພ້ອມໃນພຣະອົງ.’ ໂມໂຣໄນ 10,” ຈົ່ງຕາມເຮົາມາ—ສຳລັບບ້ານ ແລະ ໂບດ: ພຣະຄຳພີມໍມອນ 2024 (2023)
“ວັນທີ 16–22 ເດືອນທັນວາ. ໂມໂຣໄນ 10,” ຈົ່ງຕາມເຮົາມາ—ສຳລັບບ້ານ ແລະ ໂບດ: 2024 (2023)
That Ye May Know [ເພື່ອພວກເຈົ້າຈະໄດ້ຮູ້], ໂດຍ ແກຣີ ແອວ ແຄັບ
ວັນທີ 16–22 ເດືອນທັນວາ: “ຈົ່ງມາຫາພຣະຄຣິດ, ແລະ ຖືກເຮັດໃຫ້ເປັນຄົນດີພ້ອມໃນພຣະອົງ”
ໂມໂຣໄນ 10
ພຣະຄຳພີມໍມອນເປີດດ້ວຍຄຳສັນຍາຂອງນີໄຟ ທີ່ສະແດງໃຫ້ເຮົາເຫັນວ່າ “ຄວາມເມດຕາອັນລະອຽດອ່ອນຂອງພຣະຜູ້ເປັນເຈົ້າມີຢູ່ເໜືອທຸກຄົນທີ່ພຣະອົງເລືອກໄວ້, ເປັນເພາະສັດທາຂອງພວກເຂົາ” (1 ນີໄຟ 1:20). ພຣະຄຳພີປິດດ້ວຍຄຳເຊື້ອເຊີນທີ່ຂະໜານກັນຈາກໂມໂຣໄນ: “ຈື່ຈຳໄວ້ວ່າ ພຣະຜູ້ເປັນເຈົ້າເມດຕາ … ຫລາຍພຽງໃດ” (ໂມໂຣໄນ 10:2–3). ຕົວຢ່າງໃດແດ່ຂອງຄວາມເມດຕາຂອງພຣະຜູ້ເປັນເຈົ້າ ທີ່ທ່ານເຄີຍເຫັນໃນພຣະຄຳພີມໍມອນ? ທ່ານອາດຄິດເຖິງວິທີແຫ່ງຄວາມເມດຕາທີ່ພຣະເຈົ້າໄດ້ນຳພາຄອບຄົວຂອງລີໄຮ ຜ່ານຜ່າຖິ່ນແຫ້ງແລ້ງກັນດານ ແລະ ຂ້າມຜືນນ້ຳອັນກວ້າງໃຫຍ່, ຄວາມເມດຕາອັນອ່ອນໂຍນທີ່ພຣະອົງໄດ້ສະແດງຕໍ່ເອໂນດ ເມື່ອຈິດວິນຍານຂອງເພິ່ນຫິວໂຫຍການໃຫ້ອະໄພ, ຫລື ຄວາມເມດຕາທີ່ພຣະອົງໄດ້ສະແດງຕໍ່ແອວມາ, ສັດຕູທີ່ຂົມຂື່ນຂອງສາດສະໜາຈັກ ຜູ້ທີ່ໄດ້ກາຍເປັນຜູ້ປົກປ້ອງທີ່ບໍ່ມີຄວາມຢ້ານກົວຂອງສາດສະໜາຈັກ. ຫລື ຄວາມຄິດຂອງທ່ານອາດຫັນໄປສູ່ຄວາມເມດຕາທີ່ພຣະຜູ້ຊ່ວຍໃຫ້ລອດສະແດງຕໍ່ຜູ້ຄົນ ເມື່ອພຣະອົງໄດ້ປິ່ນປົວຄົນເຈັບປ່ວຍ ແລະ ໃຫ້ພອນແກ່ເດັກນ້ອຍໆ. ບາງທີ ສິ່ງທີ່ສຳຄັນທີ່ສຸດ, ທັງໝົດນີ້ສາມາດເຕືອນທ່ານເຖິງ “ພຣະຜູ້ເປັນເຈົ້າເມດຕາ … ຫລາຍພຽງໃດ” ຕໍ່ທ່ານ, ເພາະພຣະຄຳພີມໍມອນໄດ້ຖືກຂຽນໄວ້ເພື່ອເຊື້ອເຊີນເຮົາແຕ່ລະຄົນໃຫ້ຮັບເອົາຄວາມເມດຕາຂອງພຣະເຈົ້າ—ຄຳເຊື້ອເຊີນຊຶ່ງມີຢູ່ພຽງແຕ່ໃນຄຳກ່າວອຳລາຂອງໂມໂຣໄນ ທີ່ວ່າ, “ຈົ່ງມາຫາພຣະຄຣິດ, ແລະ ຖືກເຮັດໃຫ້ເປັນຄົນດີພ້ອມໃນພຣະອົງ” (ໂມໂຣໄນ 10:32).
ແນວຄິດສຳລັບການຮຽນຮູ້ຢູ່ທີ່ໂບດ ແລະ ຢູ່ທີ່ບ້ານ
![]()
ຮູບພາບໄອຄອນຫ້ອງຮຽນສາດສະໜາ
ຄຳສັນຍາຢູ່ໃນ ໂມໂຣໄນ 10:3–7 ໄດ້ປ່ຽນແປງຊີວິດຂອງຫລາຍລ້ານຄົນຕະຫລອດທົ່ວໂລກ. ມັນໄດ້ປ່ຽນແປງຊີວິດຂອງທ່ານແນວໃດ? ຂະນະທີ່ທ່ານອ່ານ ໂມໂຣໄນ 10:3–7, ໃຫ້ພິຈາລະນາທີ່ຈະອ່ານຢ່າງລະອຽດກວ່າທີ່ທ່ານອາດເຄີຍເຮັດຜ່ານມາ. ທ່ານສາມາດກວດກາເບິ່ງແຕ່ລະວະລີ, ຖາມຕົວເອງດັ່ງເຊັ່ນ: ສິ່ງນີ້ໝາຍຄວາມວ່າແນວໃດ? ເຮົາຈະເຮັດສິ່ງນີ້ໄດ້ດີກວ່າເກົ່າແນວໃດ? ເຮົາມີປະສົບການໃດແດ່ກັບສິ່ງນີ້?
ຂະນະທີ່ທ່ານໄຕ່ຕອງການຄົ້ນຫາຄວາມຈິງຝ່າຍວິນຍານສ່ວນຕົວຂອງທ່ານນັ້ນ, ມັນອາດຊ່ວຍໃຫ້ທ່ານຮຽນຮູ້ວ່າ ຄົນອື່ນໄດ້ພົບຄວາມຈິງໂດຍອຳນາດຂອງພຣະວິນຍານບໍລິສຸດແນວໃດ. ແອວເດີ ມາຕີອາສ໌ ແຮວດ໌ ໄດ້ເລົ່າປະສົບການຂອງເພິ່ນຕອນເປັນສະມາຊິກໃໝ່ຂອງສາດສະໜາຈັກ (ເບິ່ງ “Seeking Knowledge by the Spirit,” Liahona, May 2019, 31–33). ແອວເດີ ເດວິດ ແອັຟ ອີແວນສ໌ ໄດ້ເລົ່າປະສົບການຂອງເພິ່ນ ເຖິງແມ່ນໄດ້ເຕີບໃຫຍ່ໃນສາດສະໜາຈັກ ແຕ່ກໍຍັງມີຄຳຖາມຢູ່ (ເບິ່ງ “The Truth of All Things,” Liahona, Nov. 2017, 68–70). ໃຫ້ພິຈາລະນາອ່ານໜຶ່ງ ຫລື ທັງສອງຂ່າວສານນີ້ ແລະ ຂຽນສິ່ງໃດກໍຕາມທີ່ທ່ານຮຽນຮູ້ຈາກການຄົ້ນຫາຄວາມຈິງຂອງພວກເພິ່ນ ທີ່ຊ່ວຍທ່ານໃນການຄົ້ນຫາຄວາມຈິງຂອງທ່ານ.
ທ່ານອາດສຳຫລວດສິ່ງທີ່ພຣະເຈົ້າໄດ້ສິດສອນກ່ຽວກັບຄວາມຈິງເຊັ່ນກັນ ໂດຍການອ່ານບາງຂໍ້ໃນຄູ່ມືພຣະຄຳພີ, “ຈິງ, ຄວາມຈິງ” (ຫ້ອງສະໝຸດພຣະກິດຕິຄຸນ). ຂໍ້ພຣະຄຳພີຂໍ້ໃດທີ່ໃຫ້ຄວາມເຂົ້າໃຈເລິກເຊິ່ງແກ່ທ່ານໂດຍສະເພາະ? ບາງທີ ທ່ານກໍສາມາດເລືອກເອົາຂໍ້ໜຶ່ງເພື່ອແບ່ງປັນກັບຄົນອື່ນທີ່ກຳລັງສະແຫວງຫາຄວາມຈິງໂດຍພຣະວິນຍານ.
ເບິ່ງ Henry B. Eyring, “The Faith to Ask and then to Act,” Liahona, Nov. 2021, 74–76; “ບອກມາ ສັດຈະຄືຫຍັງ,” ເພງສວດ ແລະ ເພງຂອງເດັກນ້ອຍ, 34; Gospel Topics, “Seek Truth and Avoid Deception,” ຫ້ອງສະໝຸດພຣະກິດຕິຄຸນ ນຳອີກ.
ບັນທຶກຄວາມປະທັບໃຈ. ການປ່ຽນໃຈເຫລື້ອມໃສຕໍ່ພຣະກິດຕິຄຸນຂອງພຣະເຢຊູຄຣິດນັ້ນ ໝາຍເຖິງທັງການຮູ້ຈັກ ແລະ ການດຳເນີນຊີວິດຕາມພຣະກິດຕິຄຸນ. ທ່ານມີແນວໂນ້ມທີ່ຈະປະຕິບັດຕາມສິ່ງທີ່ທ່ານຮຽນຮູ້ ຖ້າທ່ານຂຽນມັນລົງ. ຖ້າທ່ານກຳລັງສິດສອນ, ໃຫ້ເຊື້ອເຊີນຄົນທີ່ທ່ານສິດສອນໃຫ້ບັນທຶກຄວາມປະທັບໃຈທາງວິນຍານຂອງເຂົາເຈົ້າ.
ພຣະເຈົ້າໄດ້ມອບຂອງປະທານຝ່າຍວິນຍານໃຫ້ແກ່ເຮົາ.
ມີຫລາຍວິທີທາງທີ່ບຸກຄົນອາດ “ປະຕິເສດ … ຂອງປະທານຂອງພຣະເຈົ້າ” (ໂມໂຣໄນ 10:8). ບາງຄົນປະຕິເສດວ່າ ຂອງປະທານເຫລົ່ານີ້ບໍ່ມີຈິງ. ບາງຄົນປະຕິເສດຂອງປະທານຂອງຕົນ ໂດຍການບໍ່ສົນໃຈກັບມັນ ຫລື ບໍ່ພັດທະນາມັນ. ຂະນະທີ່ທ່ານອ່ານ ໂມໂຣໄນ 10:8–25, ໃຫ້ຊອກຫາຄວາມຈິງທີ່ຈະຊ່ວຍທ່ານໃຫ້ຄົ້ນພົບຂອງປະທານທາງວິນຍານຂອງທ່ານ ແລະ ໃຊ້ມັນເພື່ອເປັນພອນໃຫ້ແກ່ລູກໆຂອງພຣະເຈົ້າ. ຄຳຖາມດັ່ງຕໍ່ໄປນີ້ອາດຊ່ວຍໄດ້: ຂອງປະທານຝ່າຍວິນຍານຂອງທ່ານແມ່ນຫຍັງ? ມັນຖືກມອບໃຫ້ໃຜ? ເປັນຫຍັງມັນຈຶ່ງຖືກມອບໃຫ້? ເຮົາຈະຮັບມັນໄດ້ແນວໃດ? ທ່ານສາມາດນຶກເຖິງຕົວຢ່າງຂອງຄົນທີ່ໃຊ້ຂອງປະທານທີ່ມີລະບຸໄວ້ໃນ ໂມໂຣໄນ 10:9–16 ໄດ້ບໍ່?
ເຮົາສາມາດດີພ້ອມຜ່ານທາງພຣະຄຸນຂອງພຣະເຢຊູຄຣິດ.
ຄຳແນະນຳຂອງໂມໂຣໄນໃຫ້ “ມາຫາພຣະຄຣິດ” ມີສ່ວນຮ່ວມຫລາຍກວ່າການຮຽນຮູ້ ແລະ ການຄິດກ່ຽວກັບພຣະອົງ. ແຕ່, ສິ່ງນີ້ເປັນຄຳເຊື້ອເຊີນໃຫ້ມາຫາພຣະຄຣິດ ໃນຄວາມໝາຍທີ່ສົມບູນທີ່ສຸດ—ກາຍເປັນເໝືອນດັ່ງພຣະອົງ. ຂະນະທີ່ທ່ານອ່ານ ໂມໂຣໄນ 10:30–33, ໃຫ້ສັງເກດເບິ່ງວະລີທີ່ຊ່ວຍທ່ານໃຫ້ເຂົ້າໃຈວ່າ ການມາຫາພຣະຄຣິດນັ້ນໝາຍຄວາມວ່າແນວໃດ, ມັນເປັນໄປໄດ້ແນວໃດ, ແລະ ຜົນໄດ້ຮັບຂອງການເຮັດເຊັ່ນນັ້ນເປັນແນວໃດ.
ໃຫ້ເບິ່ງຄືນຫລັງເຖິງການສຶກສາພຣະຄຳພີມໍມອນຂອງທ່ານໃນປີນີ້, ແລະ ໄຕ່ຕອງສິ່ງທີ່ທ່ານໄດ້ຮູ້ສຶກ ແລະ ໄດ້ຮຽນຮູ້ກ່ຽວກັບພຣະເຢຊູຄຣິດ. ຍົກຕົວຢ່າງ, ພຣະຄຳພີມໍມອນໄດ້ຊ່ວຍໃຫ້ທ່ານມາຫາພຣະອົງແນວໃດ? ມັນໄດ້ຊ່ວຍໃຫ້ທ່ານເພິ່ງພາພຣະຄຸນຂອງພຣະອົງຢ່າງສົມບູນຂຶ້ນກວ່າເກົ່າແນວໃດ? ມັນໄດ້ຊ່ວຍທ່ານ “ບໍ່ໃຫ້ປະຕິເສດ” ອຳນາດຂອງພຣະຜູ້ຊ່ວຍໃຫ້ລອດແນວໃດ? ໃຫ້ພິຈາລະນາແບ່ງປັນຄຳພະຍານຂອງທ່ານກ່ຽວກັບພຣະຄຳພີມໍມອນກັບຄົນທີ່ຕ້ອງການໄດ້ຍິນມັນ, ລວມທັງຄົນທີ່ທ່ານຮັກ ແລະ ໝູ່ເພື່ອນທີ່ອາດບໍ່ຮູ້ຈັກຂ່າວສານຂອງມັນ.
ເບິ່ງ “Moroni Invites All to Come unto Christ” (ວິດີໂອ), ຫ້ອງສະໝຸດພຣະກິດຕິຄຸນ ນຳອີກ.
ສຳລັບແນວຄິດເພີ່ມເຕີມ, ໃຫ້ເບິ່ງວາລະສານ Liahona ແລະ For the Strength of Youth ສະບັບຂອງເດືອນນີ້.
ແນວຄິດສຳລັບການສິດສອນເດັກນ້ອຍ
ເຮົາສາມາດຮູ້ໄດ້ດ້ວຍຕົວຂອງເຮົາເອງວ່າ ພຣະຄຳພີມໍມອນເປັນຄວາມຈິງ.
-
ທ່ານຈະສາມາດຊ່ວຍລູກໆຂອງທ່ານໃຫ້ຍອມຮັບຄຳເຊື້ອເຊີນຂອງໂມໂຣໂນໃຫ້ທູນຖາມພຣະເຈົ້າວ່າພຣະຄຳພີມໍມອນເປັນຄວາມຈິງຫລືບໍ່ ໄດ້ແນວໃດ? ໃຫ້ພິຈາລະນາເອົາແຜ່ນເຈ້ຍທີ່ມີຄຳວ່າ ອ່ານ, ຈື່ຈຳ, ໄຕ່ຕອງ, ແລະ ທູນຖາມ ໃຫ້ພວກເຂົາ. ລູກໆຂອງທ່ານສາມາດພົບຄຳເຫລົ່ານີ້ໃນ ໂມໂຣໄນ 10:3–4. ເຮົາຄວນອ່ານ, ຈື່ຈຳ, ໄຕ່ຕອງ, ແລະ ທູນຖາມຫຍັງ ເພື່ອທີ່ຈະໄດ້ຮັບ ແລະ ເສີມສ້າງປະຈັກພະຍານຂອງເຮົາກ່ຽວກັບພຣະຄຳພີມໍມອນ? ລູກໆຂອງທ່ານຍັງສາມາດຊອກຫາຄວາມຄ້າຍຄືກັນລະຫວ່າງຂໍ້ພຣະຄຳພີເຫລົ່ານີ້ ແລະ ເພງ “ອະທິຖານຄອບຄົວ” (ເພງສວດ ແລະ ເພງຂອງເດັກນ້ອຍ, 73) ນຳອີກ.
-
ລູກໆຂອງທ່ານສາມາດນຳໃຊ້ຮູບພາບທີ່ຢູ່ທ້າຍໂຄງຮ່າງນີ້ ເພື່ອເວົ້າກ່ຽວກັບໂມໂຣໄນຝັງແຜ່ນຈາລຶກຄຳ (ເບິ່ງ “ບົດທີ 54: ຄຳສັນຍາຂອງພຣະຄຳພີມໍມອນ,” ເລື່ອງພຣະຄຳພີມໍມອນ, 156 ນຳອີກ). ລູກຜູ້ນ້ອຍອາດມ່ວນຊື່ນກັບການທຳທ່າເປັນໂມໂຣໄນທີ່ກຳລັງຂຽນໃສ່ແຜ່ນຈາລຶກ ແລະ ຝັງມັນ. ແບ່ງປັນປະຈັກພະຍານຂອງພວກທ່ານກ່ຽວກັບພຣະຄຳພີມໍມອນໃຫ້ກັນແລະກັນ.
ພຣະບິດາເທິງສະຫວັນມອບຂອງປະທານຝ່າຍວິນຍານໃຫ້ແກ່ເຮົາ.
-
ເພື່ອສິດສອນລູກໆຂອງທ່ານກ່ຽວກັບຂອງປະທານຝ່າຍວິນຍານ, ທ່ານສາມາດຂຽນເລກ 9 ຫາເລກ 16 ລົງໃນເຈ້ຍແຕ່ລະໃບ ແລະ ຫໍ່ເຈ້ຍແຕ່ລະໃບໃຫ້ຄືກັນກັບຂອງຂວັນ. ລູກໆຂອງທ່ານສາມາດປ່ຽນຜຽນກັນແກະຂອງຂວັນ, ອ່ານຂໍ້ພຣະຄຳພີຈາກ ໂມໂຣໄນ 10:9–16 ທີ່ສອດຄ່ອງກັບຕົວເລກ, ແລະ ບອກຊື່ຂອງປະທານຝ່າຍວິນຍານແຕ່ລະຢ່າງ. ທ່ານສາມາດເວົ້າກ່ຽວກັບວ່າ ພຣະບິດາເທິງສະຫວັນຢາກໃຫ້ເຮົາໃຊ້ຂອງປະທານເຫລົ່ານີ້ເພື່ອເປັນພອນໃຫ້ແກ່ລູກໆຂອງພຣະອົງແນວໃດ. ທ່ານຍັງສາມາດຊ່ວຍໃຫ້ລູກໆຂອງທ່ານສັງເກດເຫັນຂອງປະທານທີ່ພຣະບິດາເທິງສະຫວັນໄດ້ປະທານໃຫ້ແກ່ພວກເຂົາໄດ້ເຊັ່ນກັນ.
ພຣະເຢຊູຄຣິດປະສົງໃຫ້ເຮົາມາຫາພຣະອົງ.
-
ລູກໆຂອງທ່ານຮູ້ບໍ່ວ່າ ການ “ມາຫາພຣະຄຣິດ” ໝາຍຄວາມວ່າແນວໃດ? ບາງເທື່ອ ທ່ານສາມາດອ່ານ ໂມໂຣໄນ 10:32 ແລະ ເຊື້ອເຊີນພວກເຂົາໃຫ້ກ່າວວະລີນັ້ນຄືນກັບທ່ານ. ແລ້ວພວກເຂົາກໍສາມາດຫລັບຕາ ຂະນະທີ່ທ່ານວາງຮູບຂອງພຣະເຢຊູໄວ້ບ່ອນໃດບ່ອນໜຶ່ງໃນຫ້ອງ. ຈາກນັ້ນກໍໃຫ້ພວກເຂົາເປີດຕາ, ຊອກຫາຮູບນັ້ນ, ລວມຕົວກັນອ້ອມໆມັນ, ແລະ ເວົ້າກ່ຽວກັບວິທີທີ່ເຮົາສາມາດມາຫາພຣະຄຣິດ. ບາງເທື່ອ ການຂຽນຄຳຖາມທີ່ວ່າ ການມາຫາພຣະຄຣິດໝາຍຄວາມວ່າແນວໃດ? ອາດສາມາດຊ່ວຍໄດ້. ຊ່ວຍພວກເຂົາຄົ້ນຄວ້າ ໂມໂຣໄນ 10:32–33 ເພື່ອຊອກຫາຄຳຕອບທີ່ເປັນໄປໄດ້ (ເບິ່ງ ຫລັກແຫ່ງຄວາມເຊື່ອ 1:3–4 ນຳອີກ). ໃຫ້ຊ່ວຍກັນຂຽນລາຍການສິ່ງທີ່ພຣະຄຣິດຢາກໃຫ້ເຮົາເຮັດ ແລະ ສິ່ງທີ່ພຣະອົງສັນຍາວ່າຈະເຮັດເພື່ອເຮົາ.
-
ບາງເທື່ອລູກໆຂອງທ່ານອາດມ່ວນຊື່ນກັບການເຮັດ ແລະ ຕົກແຕ່ງປ້າຍຮູບຫົວໃຈທີ່ຂຽນວ່າ “ຂ້ອຍຮັກພຣະເຈົ້າດ້ວຍສຸດພະລັງ, ຄວາມນຶກຄິດ, ແລະ ກຳລັງຂອງຂ້ອຍ” (ເບິ່ງ ໂມໂຣໄນ 10:32). ຂະນະທີ່ພວກເຂົາເຮັດສິ່ງນັ້ນ, ໃຫ້ເວົ້າລົມກັບພວກເຂົາກ່ຽວກັບວິທີທີ່ເຮົາສະແດງໃຫ້ພຣະເຈົ້າເຫັນວ່າ ເຮົາຮັກພຣະອົງແນວໃດ.
ສຳລັບແນວຄິດເພີ່ມເຕີມ, ໃຫ້ເບິ່ງວາລະສານ Friend ສະບັບຂອງເດືອນນີ້.
ກ່ອນທີ່ຈະຝັງບັນທຶກ, ໂມໂຣໄນໄດ້ເຊື້ອເຊີນເຮົາໃຫ້ “ຈື່ຈຳໄວ້ວ່າ ພຣະຜູ້ເປັນເຈົ້າເມດຕາ … ຫລາຍພຽງໃດ” (ໂມໂຣໄນ 10:3).