ສັດທາທີ່ຈະທູນຂໍ ແລະ ແລ້ວກະທຳ

ໂດຍ ປະທານເຮັນຣີ ບີ ໄອຣິງ

ທີ່ປຶກສາທີສອງໃນຝ່າຍປະທານສູງສຸດ

ສັດທາໃນພຣະເຢຊູຄຣິດເປັນສິ່ງສຳຄັນຕໍ່ການໄດ້ຮັບການເປີດເຜີຍເຖິງຄວາມຈິງ.

ອ້າຍເອື້ອຍນ້ອງທີ່ຮັກແພງຂອງຂ້າພະເຈົ້າ, ຂ້າພະເຈົ້າກະຕັນຍູສຳລັບໂອກາດທີ່ໄດ້ມາກ່າວກັບທ່ານໃນວັນເສົາພາກຄ່ຳຂອງກອງປະຊຸມໃຫຍ່ສາມັນນີ້. ໃນການແນະນຳຕົວຕໍ່ກອງປະຊຸມໃຫຍ່ມື້ເຊົ້ານີ້, ປະທານຣະໂຊ ເອັມ ແນວສັນ ໄດ້ກ່າວວ່າ “ການເປີດເຜີຍທີ່ບໍລິສຸດສຳລັບຄຳຖາມໃນໃຈຂອງທ່ານ ຈະເຮັດໃຫ້ກອງປະຊຸມໃຫຍ່ນີ້ກຸ້ມຄ່າ ແລະ ໜ້າຊົງຈຳ. ຖ້າຫາກທ່ານຍັງບໍ່ໄດ້ສະແຫວງຫາການປະຕິບັດສາດສະໜາກິດຂອງພຣະວິນຍານບໍລິສຸດເທື່ອ ເພື່ອຊ່ວຍທ່ານໃຫ້ໄດ້ຍິນສິ່ງທີ່ພຣະຜູ້ເປັນເຈົ້າຢາກໃຫ້ທ່ານໄດ້ຍິນ ໃນລະຫວ່າງສອງມື້ນີ້, ຂ້າພະເຈົ້າເຊື້ອເຊີນທ່ານໃຫ້ເຮັດເຊັ່ນນັ້ນດຽວນີ້.”¹ ຂ້າພະເຈົ້າໄດ້ສະແຫວງຫາພອນນັ້ນ ຂະນະທີ່ຂ້າພະເຈົ້າກຽມຕົວເພື່ອຮັບເອົາການເປີດເຜີຍສຳລັບການມາຢ້ຽມຢາມທ່ານເທື່ອນີ້. ຄຳອະທິຖານທີ່ຈິງໃຈທີ່ສຸດຂອງຂ້າພະເຈົ້າແມ່ນຢາກໃຫ້ທ່ານໄດ້ຮັບການເປີດເຜີຍຈາກພຣະເຈົ້າ.

ວິທີຮັບເອົາການເປີດເຜີຍຈາກພຣະເຈົ້າຍັງບໍ່ປ່ຽນແປງນັບຕັ້ງແຕ່ວັນເວລາຂອງອາດາມ ແລະ ເອວາ ເປັນຕົ້ນມາ. ມັນຍັງຄືເກົ່າສຳລັບຜູ້ຮັບໃຊ້ທີ່ຖືກເອີ້ນທຸກຄົນຂອງພຣະຜູ້ເປັນເຈົ້າ ນັບແຕ່ຕອນເລີ່ມຕົ້ນ ຈົນເຖິງປະຈຸບັນນີ້. ມັນຍັງຄືເກົ່າສຳລັບທ່ານ ແລະ ຂ້າພະເຈົ້າ. ມັນເປັນໄປໂດຍການໃຊ້ສັດທາສະເໝີ.²

ຊາຍໜຸ່ມໂຈເຊັບ ສະມິດ ໄດ້ມີສັດທາຫລາຍພໍທີ່ຈະທູນຖາມພຣະເຈົ້າ, ໂດຍທີ່ເຊື່ອວ່າພຣະເຈົ້າຈະສະໜອງຄວາມຕ້ອງການຈາກໃຈຈິງຂອງເພິ່ນ. ຄຳຕອບທີ່ ໄດ້ຮັບນັ້ນປ່ຽນໂລກ. ເພິ່ນຢາກຮູ້ວ່າ ຄວນເຂົ້າຮ່ວມກັບສາດສະໜາຈັກໃດເພື່ອຈະສະອາດຈາກບາບ. ຄຳຕອບທີ່ເພິ່ນໄດ້ຮັບຊຸກຍູ້ເພິ່ນໃຫ້ຖາມຄຳຖາມທີ່ດີຂຶ້ນເລື້ອຍໆ ແລະ ເຮັດຕາມການເປີດເຜີຍທີ່ຫລັ່ງໄຫລມາຢ່າງຕໍ່ເນື່ອງ ຊຶ່ງພຽງແຕ່ເປັນການເລີ່ມຕົ້ນ.³

ປະສົບການຂອງທ່ານອາດຄ້າຍຄືກັນນັ້ນ ໃນກອງປະຊຸມໃຫຍ່ນີ້. ທ່ານມີຄຳຖາມສຳລັບສິ່ງທີ່ທ່ານສະແຫວງຫາຄຳຕອບ. ຢ່າງໜ້ອຍທ່ານມີສັດທາພຽງພໍທີ່ຫວັງວ່າ ທ່ານຈະໄດ້ຮັບຄຳຕອບຈາກພຣະຜູ້ເປັນເຈົ້າ ຜ່ານທາງຜູ້ຮັບໃຊ້ຂອງພຣະອົງ.⁴ ທ່ານຈະບໍ່ມີໂອກາດເພື່ອຖາມອອກສຽງສຳລັບຄຳຕອບຈາກຜູ້ກ່າວຄຳປາໄສ, ແຕ່ທ່ານສາມາດທູນຖາມພຣະບິດາທີ່ຊົງຮັກໃນຄຳອະທິຖານໄດ້.

ຂ້າພະເຈົ້າຮູ້ຈາກປະສົບການວ່າ ທ່ານຈະໄດ້ຮັບຄຳຕອບທີ່ເໝາະສົມກັບຄວາມຕ້ອງການຂອງທ່ານ ແລະ ສຳລັບການກຽມທາງວິນຍານຂອງທ່ານ. ຖ້າຫາກທ່ານຕ້ອງການຄຳຕອບທີ່ສຳຄັນຕໍ່ຄວາມຜາສຸກນິລັນດອນຂອງທ່ານ ຫລື ຂອງຄົນອື່ນ, ສ່ວນຫລາຍຈະໄດ້ຮັບຄຳຕອບ. ແຕ່, ເຖິງແມ່ນແນວນັ້ນ, ທ່ານອາດໄດ້ຮັບ—ດັ່ງທີ່ໂຈເຊັບ ສະມິດ ໄດ້ຮັບ—ຄຳຕອບ ບອກໃຫ້ອົດທົນ.⁵

ຖ້າຫາກສັດທາຂອງທ່ານໃນພຣະເຢຊູຄຣິດ ໄດ້ເຮັດໃຫ້ໃຈຂອງທ່ານອ່ອນລົງ ຜ່ານທາງຜົນກະທົບຂອງການຊົດໃຊ້ຂອງພຣະອົງ, ທ່ານຈະສາມາດຮູ້ສຶກເຖິງການກະຊິບຂອງພຣະວິນຍານ ໃນການຕອບຄຳອະທິຖານຂອງທ່ານ. ປະສົບການສ່ວນຕົວຂອງຂ້າພະເຈົ້າແມ່ນເປັນສຽງແຜ່ວເບົາ—ຊຶ່ງເປັນຄວາມຈິງ—ແຈ່ມແຈ້ງ ແລະ ຫລິງເຫັນໄດ້ໃນຈິດໃຈ ເມື່ອຂ້າພະເຈົ້າຮູ້ສຶກສະຫງົບງຽບພາຍໃນ ແລະ ຍິນຍອມຕໍ່ພຣະປະສົງຂອງພຣະຜູ້ເປັນເຈົ້າ. ຄວາມຮູ້ສຶກທີ່ຖ່ອມຕົວນັ້ນ ສາມາດບັນຍາຍໄດ້ດີທີ່ສຸດ ດັ່ງນີ້ “ຂໍຢ່າໃຫ້ເປັນໄປຕາມຄວາມປາດຖະໜາຂອງລູກ, ແຕ່ຂໍໃຫ້ເປັນໄປຕາມຄວາມປະສົງຂອງພຣະບິດາເຈົ້າເທີ້ນ.”⁶

ຂັ້ນຕອນຂອງການເປີດເຜີຍນີ້ ຄືເຫດຜົນທີ່ທ່ານຈະໄດ້ຍິນຜູ້ກ່າວປາໄສສິດສອນຢູ່ໃນກອງປະຊຸມໃຫຍ່ນີ້ ໃນສິ່ງທີ່ເອີ້ນວ່າ ຄຳສອນຂອງພຣະຄຣິດ.⁷ ເຮົາໄດ້ຮັບການເປີດເຜີຍຕາມສ່ວນລຳດັບທີ່ເຮົາສະແຫວງຫາ ທີ່ຈະນຳເອົາຄຳສອນຂອງພຣະຄຣິດເຂົ້າສູ່ໃຈຂອງເຮົາ ແລະ ນຳໃຊ້ມັນໃນຊີວິດຂອງເຮົາ.

ທ່ານຄົງຈື່ໄດ້ຈາກພຣະຄຳພີມໍມອນ ວ່ານີໄຟໄດ້ສິດສອນເຮົາວ່າ ສັດທາໃນພຣະເຢຊູຄຣິດເປັນສິ່ງສຳຄັນຕໍ່ການໄດ້ຮັບການເປີດເຜີຍເຖິງຄວາມຈິງ ແລະ ເປັນສິ່ງສຳຄັນຕໍ່ການມີຄວາມໝັ້ນໃຈວ່າ ເຮົາກຳລັງເຮັດຕາມການຊີ້ນຳຂອງພຣະຜູ້ຊ່ວຍໃຫ້ລອດ. ນີໄຟໄດ້ຂຽນຂໍ້ຄວາມເຫລົ່ານີ້ ຫລາຍສັດຕະວັດກ່ອນການກຳເນີດຂອງພຣະເຢຊູຄຣິດໃນຄວາມເປັນມະຕະ:

“ເຫລົ່າທູດກ່າວໂດຍອຳນາດຂອງພຣະວິນຍານບໍລິສຸດ; ດັ່ງນັ້ນ, ພວກເພິ່ນຈຶ່ງກ່າວພຣະຄຳຂອງພຣະຄຣິດ. ດັ່ງນັ້ນ, ຂ້າພະເຈົ້າເວົ້າກັບພວກທ່ານວ່າ, ຈົ່ງຊື່ນຊົມດ້ວຍພຣະຄຳຂອງພຣະຄຣິດ; ເພາະຈົ່ງເບິ່ງ, ພຣະຄຳຂອງພຣະຄຣິດຈະບອກພວກທ່ານທຸກຢ່າງທີ່ພວກທ່ານຄວນເຮັດ.

“ດັ່ງນັ້ນ, ບັດນີ້ຫລັງຈາກຂ້າພະເຈົ້າເວົ້າຂໍ້ຄວາມນີ້ແລ້ວ ຖ້າຫາກພວກທ່ານບໍ່ເຂົ້າໃຈມັນກໍເປັນເພາະພວກທ່ານບໍ່ໝັ່ນຂໍ ແລະ ທັງພວກທ່ານບໍ່ໝັ່ນເຄາະ; ດັ່ງນັ້ນ, ພວກທ່ານຈຶ່ງບໍ່ຖືກພາມາຫາຄວາມສະຫວ່າງ, ແຕ່ຕ້ອງຕາຍຢູ່ໃນຄວາມມືດ.

“ເພາະຈົ່ງເບິ່ງ, ຂ້າພະເຈົ້າເວົ້າກັບພວກທ່ານອີກວ່າ ຖ້າຫາກພວກທ່ານຈະເຂົ້າໄປໂດຍທາງນັ້ນ ແລະ ໄດ້ຮັບພຣະວິນຍານບໍລິສຸດ, ພຣະອົງຈະສະແດງທຸກຢ່າງທີ່ພວກທ່ານຄວນເຮັດໃຫ້ແກ່ພວກທ່ານ.

“ຈົ່ງເບິ່ງ, ນີ້ຄືຄຳສອນຂອງພຣະຄຣິດ, ແລະ ຈະບໍ່ມີຄຳສອນປະທານໃຫ້ອີກຈົນຫລັງຈາກພຣະອົງຈະສະແດງພຣະອົງເອງໃຫ້ປະຈັກແກ່ພວກທ່ານໃນເນື້ອໜັງ. ແລະ ເມື່ອພຣະອົງຈະສະແດງພຣະອົງເອງໃຫ້ປະຈັກແກ່ພວກທ່ານໃນເນື້ອໜັງແລ້ວ, ສິ່ງທີ່ພຣະອົງຈະກ່າວກັບພວກທ່ານ, ພວກທ່ານຈົ່ງປະຕິບັດ.”⁸

ພຣະຜູ້ເປັນເຈົ້າຈະກ່າວບາງຢ່າງກັບທ່ານ ແລະ ຂ້າພະເຈົ້າ ຜ່ານທາງຜູ້ຮັບໃຊ້ຂອງພຣະອົງ ໃນມື້ນີ້ ແລະ ໃນມື້ຕໍ່ໆໄປ. ພຣະອົງຈະບອກເຮົາເຖິງສິ່ງທີ່ເຮົາຄວນເຮັດ.⁹ ພຣະຜູ້ຊ່ວຍໃຫ້ລອດຈະບໍ່ຮ້ອງບອກພຣະບັນຍັດແກ່ທ່ານ ແລະ ຂ້າພະເຈົ້າ. ດັ່ງທີ່ພຣະອົງໄດ້ສິດສອນເອລີຢາວ່າ:

“ພຣະອົງກ່າວຕໍ່ເພິ່ນວ່າ, ຈົ່ງອອກໄປຢືນຢູ່ຕໍ່ໜ້າພຣະຜູ້ເປັນເຈົ້າເທິງຈອມພູນັ້ນ. ແລ້ວພຣະຜູ້ເປັນເຈົ້າກໍພວມກະຈາຍໄປ, ກ່ອນໜ້າພຣະຜູ້ເປັນເຈົ້າສະເດັດໄປກໍເກີດມີລົມພະຍຸຮ້າຍຈົນເຮັດໃຫ້ພູເຂົາຍະອອກ ແລະ ເຮັດໃຫ້ກ້ອນຫີນແຕກເປັນກ້ອນໆ ແຕ່ພຣະຜູ້ເປັນເຈົ້າບໍ່ໄດ້ຢູ່ໃນລົມນັ້ນ. ຫລັງຈາກນັ້ນກໍເກີດແຜ່ນດິນໄຫວ, ແຕ່ພຣະຜູ້ເປັນເຈົ້າບໍ່ໄດ້ຢູ່ໃນແຜ່ນດິນໄຫວນັ້ນ:

“ຫລັງຈາກແຜ່ນດິນໄຫວກໍມີໄຟ, ແຕ່ພຣະຜູ້ເປັນເຈົ້າບໍ່ໄດ້ຢູ່ໃນໄຟນີ້. ແລະ ຫລັງຈາກໄຟກໍມີສຽງກະຊິບເບົາໆດັງແວ່ວມາ.”¹⁰

ການໄດ້ຍິນສຽງນັ້ນ ຈະມາຈາກສັດທາຂອງເຮົາໃນພຣະອົງ. ດ້ວຍສັດທາພຽງພໍ, ເຮົາຈະທູນຂໍການຊີ້ນຳ ດ້ວຍຄວາມຕັ້ງໃຈທີ່ຈະໄປ ແລະ ເຮັດສິ່ງໃດກໍຕາມທີ່ພຣະອົງຂໍໃຫ້ເຮົາເຮັດ.¹¹ ເຮົາຈະຕ້ອງພັດທະນາສັດທາ ເພື່ອຈະໄດ້ຮູ້ຈັກສິ່ງໃດກໍຕາມທີ່ພຣະອົງຂໍໃຫ້ເຮົາເຮັດ ທີ່ຈະເປັນພອນໃຫ້ແກ່ຄົນອື່ນ ແລະ ວ່າເຮົາຈະສາມາດຖືກຊຳລະໃຫ້ສະອາດໃນຂະບວນການ ຍ້ອນຄວາມຮັກຂອງພຣະອົງທີ່ມີຕໍ່ເຮົາ.

ດັ່ງທີ່ສັດທາຂອງເຮົາໃນພຣະເຢຊູຄຣິດ ຈະນຳເຮົາໄປທູນຂໍຄຳຕອບຈາກພຣະບິດາ, ສັດທານັ້ນກໍຈະນຳຄວາມສຳພັດຂອງພຣະຜູ້ຊ່ວຍໃຫ້ລອດມາ ທີ່ຄ່ອຍພໍໃຫ້ເຮົາໄດ້ຍິນຄຳຊີ້ນຳຂອງພຣະອົງ ແລະ ມີຄວາມຕັ້ງໃຈ ແລະ ຕື່ນເຕັ້ນທີ່ຈະເຊື່ອຟັງ. ແລ້ວເຮົາຈະຮ້ອງເພງສັນລະເສີນດ້ວຍຄວາມຊື່ນຊົມ, ເຖິງແມ່ນວຽກງານຈະໜັກໜ່ວງວ່າ: “ແສນຫວານງານເລີດ, ຂໍເທີດກະສັດ.”¹²

ເມື່ອເຮົາມີຄຳສອນຂອງພຣະຄຣິດໃນຊີວິດ ແລະ ໃນໃຈຂອງເຮົາຫລາຍຂຶ້ນເທົ່າໃດ, ເຮົາກໍຈະຮູ້ສຶກຮັກ ແລະ ເຫັນໃຈຜູ້ທີ່ບໍ່ເຄີຍໄດ້ຮັບພອນແຫ່ງສັດທາໃນພຣະເຢຊູຄຣິດ ຫລື ກຳລັງຕໍ່ສູ້ດີ້ນລົນທີ່ຈະຮັກສາມັນ ຫລາຍຂຶ້ນເທົ່ານັ້ນ. ມັນຍາກທີ່ຈະຮັກສາພຣະບັນຍັດຂອງພຣະຜູ້ເປັນເຈົ້າ ປາດສະຈາກສັດທາ ແລະ ການໄວ້ວາງໃຈໃນພຣະອົງ. ເມື່ອບາງຄົນສູນເສຍສັດທາຂອງຕົນໃນພຣະຜູ້ຊ່ວຍໃຫ້ລອດ, ພວກເຂົາອາດໂຈມຕີຄຳແນະນຳຂອງພຣະອົງ, ເອີ້ນ ຂອງດີວ່າຊົ່ວ ແລະ ຂອງຊົ່ວວ່າດີ.¹³ ເພື່ອຫລີກລ້ຽງຈາກຄວາມຜິດທີ່ຮ້າຍແຮງນີ້, ມັນສຳຄັນທີ່ການເປີດເຜີຍສ່ວນຕົວທີ່ເຮົາໄດ້ຮັບ ສອດຄ່ອງກັບຄຳສອນຂອງພຣະຜູ້ເປັນເຈົ້າ ແລະ ສາດສະດາຂອງພຣະອົງ.

ອ້າຍເອື້ອຍນ້ອງທັງຫລາຍ, ຕ້ອງໃຊ້ສັດທາໃນການເຊື່ອຟັງພຣະບັນຍັດຂອງພຣະຜູ້ເປັນເຈົ້າ. ຕ້ອງໃຊ້ສັດທາໃນພຣະເຢຊູຄຣິດ ເພື່ອຮັບໃຊ້ຄົນອື່ນແທນພຣະອົງ. ຕ້ອງໃຊ້ສັດທາໃນການອອກໄປສິດສອນພຣະກິດຕິຄຸນຂອງພຣະອົງ ແລະ ສະເໜີມອບມັນໃຫ້ກັບຜູ້ຄົນ ທີ່ອາດບໍ່ຮູ້ສຶກໄດ້ຍິນສຸລະສຽງຂອງພຣະວິນຍານ ຫລື ອາດແມ່ນແຕ່ປະຕິເສດຄວາມເປັນຈິງຂອງຂ່າວສານ. ແຕ່ເມື່ອເຮົາໃຊ້ສັດທາໃນພຣະຄຣິດ—ແລະ ຕິດຕາມສາດສະດາທີ່ມີຊີວິດຢູ່—ສັດທາຈະເພີ່ມຂຶ້ນຕະຫລອດທົ່ວໂລກ. ຍ້ອນເທັກໂນໂລຈີ, ບາງທີລູກໆຂອງພຣະເຈົ້າຫລາຍຄົນຈະໄດ້ຍິນ ແລະ ຮັບຮູ້ພຣະຄຳຂອງພຣະເຈົ້າ ໃນສອງມື້ນີ້ ຫລາຍກວ່າສອງມື້ອື່ນໆໃນປະຫວັດສາດ.

ດ້ວຍສັດທາທີ່ເພີ່ມຂຶ້ນ ວ່ານີ້ແມ່ນສາດສະໜາຈັກ ແລະ ອານາຈັກຂອງພຣະຜູ້ເປັນເຈົ້າ ຢູ່ເທິງແຜ່ນດິນໂລກ, ສະມາຊິກຈຳນວນຫລາຍກໍຈ່າຍສ່ວນສິບ ແລະ ບໍລິຈາກ ເພື່ອຊ່ວຍເຫລືອຄົນຍາກຈົນ, ເຖິງແມ່ນໃນຂະນະທີ່ສະມາຊິກເຫລົ່ານັ້ນກຳລັງປະເຊີນກັບການທົດລອງໃນຊີວິດຂອງເຂົາເຈົ້າກໍຕາມ. ດ້ວຍສັດທາວ່າ ເຂົາເຈົ້າຖືກເອີ້ນໂດຍພຣະເຢຊູຄຣິດ, ຜູ້ສອນສາດສະໜາຕະຫລອດທົ່ວໂລກ ໄດ້ພົບເຫັນວິທີທາງ ທີ່ຈະເອົາຊະນະການທ້າທາຍທີ່ເກີດຈາກການລະບາດ, ເຮັດດ້ວຍຄວາມກ້າຫານ ແລະ ກຳລັງໃຈ. ແລະ ໃນຄວາມພະຍາຍາມເປັນພິເສດຂອງເຂົາເຈົ້າ, ສັດທາຂອງເຂົາເຈົ້າໄດ້ເຕີບໂຕເຂັ້ມແຂງຂຶ້ນ.

ການຕໍ່ຕ້ານ ແລະ ການທົດລອງ ເປັນບໍ່ເກີດຂອງຄວາມເຕີບໂຕຂອງສັດທາມາເປັນເວລາດົນນານແລ້ວ. ນັ້ນເປັນຄວາມຈິງສະເໝີມາ, ໂດຍສະເພາະນັບຕັ້ງແຕ່ການເລີ່ມຕົ້ນການຟື້ນຟູ ແລະ ການສ້າງຕັ້ງສາດສະໜາຈັກຂອງພຣະຜູ້ເປັນເຈົ້າ.¹⁴

ສິ່ງທີ່ປະທານຈອດ ຄິວ ແຄນນັນ ໄດ້ກ່າວດົນນານມາແລ້ວ ແມ່ນເປັນຄວາມຈິງໃນທຸກວັນນີ້ ແລະ ຈະເປັນແນວນັ້ນ ຈົນກວ່າພຣະຜູ້ຊ່ວຍໃຫ້ລອດສະເດັດມາເອງ ເພື່ອນຳພາສາດສະໜາຈັກຂອງພຣະອົງ ແລະ ຜູ້ຄົນຂອງພຣະອົງ: “ການເຊື່ອຟັງພຣະກິດຕິຄຸນຈະນຳ [ຜູ້ຄົນ] ເຂົ້າສູ່ຄວາມສຳພັນທີ່ໃກ້ຊິດທີ່ສຸດກັບພຣະຜູ້ເປັນເຈົ້າ. ມັນສ້າງຄວາມສຳພັນທີ່ໃກ້ຊິດລະຫວ່າງມະນຸດຢູ່ເທິງໂລກ ແລະ ພຣະຜູ້ສ້າງທີ່ຍິ່ງໃຫຍ່ ໃນສະຫວັນ. ມັນເຮັດໃຫ້ຈິດໃຈມະນຸດຮູ້ສຶກໝັ້ນໃຈຢ່າງສົມບູນໃນພຣະອົງຜູ້ຊົງລິດອຳນາດຍິ່ງໃຫຍ່ ແລະ ໃນຄວາມເຕັມພຣະໄທຂອງພຣະອົງທີ່ຈະຟັງ ແລະ ຕອບຄຳອ້ອນວອນຂອງຜູ້ທີ່ໄວ້ວາງໃຈໃນພຣະອົງ. ໃນເວລາທີ່ມີການທົດລອງ ແລະ ຄວາມຫຍຸ້ງຍາກ ຄວາມໝັ້ນໃຈນີ້ແມ່ນເກີນຄ່າ. ບັນຫາອາດຈະເກີດຂຶ້ນກັບຄົນດຽວ ຫລື ກັບຫລາຍໆຄົນ, ໄພພິບັດອາດຂົ່ມຂູ່ ແລະ ຄວາມຫວັງຂອງມະນຸດອາດເບິ່ງຄືວ່າຈະຖືກໂຄ່ນລົ້ມ, ແຕ່, ບ່ອນທີ່ຜູ້ຄົນໄດ້ໃຊ້ສິດທິພິເສດຂອງຕົນ ໃນການເຊື່ອຟັງພຣະກິດຕິຄຸນ, ພວກເຂົາຈະມີບ່ອນຢືນຢ່າງແນ່ນອນ; ຕີນຂອງພວກເຂົາຢູ່ເທິງຫີນທີ່ບໍ່ສາມາດເຄື່ອນຍ້າຍໄດ້.”¹⁵

ປະຈັກພະຍານຂອງຂ້າພະເຈົ້າຄື ຫີນທີ່ເຮົາຢືນຢູ່ເທິງນັ້ນ ຄືພະຍານຂອງເຮົາວ່າ ພຣະເຢຊູຄືພຣະຄຣິດ; ວ່ານີ້ແມ່ນສາດສະໜາຈັກຂອງພຣະອົງ, ຊຶ່ງພຣະອົງນຳພາເອງ; ແລະ ວ່າປະທານຣະໂຊ ເອັມ ແນວສັນ ເປັນສາດສະດາຂອງພຣະອົງ ໃນທຸກວັນນີ້.

ປະທານແນວສັນສະແຫວງຫາ ແລະ ໄດ້ຮັບການຊີ້ນຳຈາກພຣະຜູ້ເປັນເຈົ້າ. ເພິ່ນເປັນຕົວຢ່າງສຳລັບຂ້າພະເຈົ້າເລື່ອງການສະແຫວງຫາການຊີ້ນຳນັ້ນ ດ້ວຍຄວາມຕັ້ງໃຈທີ່ຈະເຮັດຕາມ. ຄວາມຕັ້ງໃຈຢ່າງດຽວກັນນັ້ນ ທີ່ຈະເຊື່ອຟັງການຊີ້ນຳຂອງພຣະຜູ້ເປັນເຈົ້າ ມີຢູ່ໃນໃຈຂອງທຸກຄົນທີ່ໄດ້ກ່າວຜ່ານມາ ຫລື ຈະກ່າວ, ອະທິຖານ, ຫລື ຮ້ອງເພງ ໃນກອງປະຊຸມໃຫຍ່ສາມັນຄັ້ງນີ້ ຂອງສາດສະໜາຈັກຂອງພຣະອົງ.

ຂ້າພະເຈົ້າອະທິຖານວ່າ ທຸກຄົນຕະຫລອດທົ່ວໂລກທີ່ຮັບຊົມກອງປະຊຸມໃຫຍ່ນີ້ ຈະຮູ້ສຶກເຖິງຄວາມຮັກຂອງພຣະຜູ້ເປັນເຈົ້າທີ່ມີຕໍ່ເຂົາເຈົ້າ. ພຣະບິດາເທິງສະຫວັນໄດ້ຕອບຄຳອະທິຖານຂອງຂ້າພະເຈົ້າວ່າ ຂ້າພະເຈົ້າຈະຮູ້ສຶກຈັກໜ້ອຍໜຶ່ງເຖິງຄວາມຮັກຂອງພຣະຜູ້ຊ່ວຍໃຫ້ລອດ ສຳລັບທ່ານ ແລະ ຄວາມຮັກຂອງພຣະອົງສຳລັບພຣະບິດາເທິງສະຫວັນຂອງພຣະອົງ, ຜູ້ເປັນພຣະບິດາເທິງສະຫວັນຂອງເຮົາ.

ຂ້າພະເຈົ້າເປັນພະຍານວ່າ ພຣະເຢຊູຄຣິດຊົງພຣະຊົນຢູ່. ພຣະອົງເປັນພຣະຜູ້ຊ່ວຍໃຫ້ລອດ ແລະ ພຣະຜູ້ໄຖ່ຂອງເຮົາ. ນີ້ແມ່ນສາດສະໜາຈັກຂອງພຣະອົງ. ພຣະອົງເປັນປະມຸກ. ພຣະອົງ, ພ້ອມດ້ວຍພຣະບິດາເທິງສະຫວັນຂອງພຣະອົງ, ໄດ້ມາປະກົດຕົວຕໍ່ໂຈເຊັບ ສະມິດ ຢູ່ໃນປ່າໃນລັດນິວຢອກ. ພຣະກິດຕິຄຸນຂອງພຣະເຢຊູຄຣິດ ແລະ ຖານະປະໂລຫິດຂອງພຣະອົງ ໄດ້ຖືກຟື້ນຟູຜ່ານທາງຜູ້ສົ່ງຂ່າວຈາກສະຫວັນ.¹⁶ ໂດຍອຳນາດຂອງພຣະວິນຍານບໍລິສຸດ, ຂ້າພະເຈົ້າຮູ້ວ່າສິ່ງນີ້ເປັນຄວາມຈິງ.

ຂ້າພະເຈົ້າອະທິຖານວ່າ ທ່ານຈະມີປະຈັກພະຍານຢ່າງດຽວກັນນັ້ນ. ຂ້າພະເຈົ້າອະທິຖານວ່າ ທ່ານຈະທູນຂໍໃຫ້ພຣະບິດາເທິງສະຫວັນຊ່ວຍທ່ານໃຫ້ມີສັດທາໃນພຣະເຢຊູຄຣິດ ທີ່ທ່ານຕ້ອງການ ເພື່ອເຮັດ ແລະ ຮັກສາພັນທະສັນຍາ ເພື່ອວ່າພຣະວິນຍານບໍລິສຸດຈະເປັນເພື່ອນຂອງທ່ານສະເໝີ. ຂ້າພະເຈົ້າຂໍມອບຄວາມຮັກ ແລະ ປະຈັກພະຍານທີ່ແນ່ນອນຂອງຂ້າພະເຈົ້າໄວ້ກັບທ່ານ ໃນພຣະນາມອັນສັກສິດຂອງພຣະເຢຊູຄຣິດ, ອາແມນ.