ການເປັນຜູ້ຕິດຕາມພຣະຄຣິດ

ໂດຍ ແອວເດີ ອາເຟຣດ ຄີອູນກູ

ແຫ່ງສາວົກເຈັດສິບ

ການເປັນຜູ້ຕິດຕາມພຣະຄຣິດແມ່ນການພະຍາຍາມໃຫ້ການກະທຳ, ການປະພຶດ, ແລະ ການດຳລົງຊີວິດຂອງເຮົາສອດຄ່ອງກັບຂອງພຣະຜູ້ຊ່ວຍໃຫ້ລອດ.

ໃນການສຶກສາພຣະຄຳພີສ່ວນຕົວຂອງຂ້າພະເຈົ້າ, ຂ້າພະເຈົ້າໄດ້ປະທັບໃຈກັບການປ່ຽນໃຈເຫລື້ອມໃສຂອງໂຊໂລຊາວເມືອງຕາໂຊ, ຜູ້ຊຶ່ງຕໍ່ມາກາຍເປັນທີ່ຮູ້ຈັກໃນນາມໂປໂລ, ດັ່ງທີ່ໄດ້ອະທິບາຍໃນພຣະຄຣິສຕະທຳຄຳພີ.

ໂປໂລເປັນຄົນໜຶ່ງທີ່ຕໍ່ຕ້ານສາດສະໜາຈັກ ແລະ ຊາວຄຣິດຫລາຍທີ່ສຸດ. ແຕ່ວ່າຍ້ອນອຳນາດແຫ່ງສະຫວັນ ແລະ ການຊົດໃຊ້ຂອງພຣະເຢຊູຄຣິດ, ເພິ່ນໄດ້ປ່ຽນແປງຢ່າງສົມບູນ, ແລະ ເພິ່ນໄດ້ກາຍເປັນໜຶ່ງໃນຜູ້ຮັບໃຊ້ທີ່ດີເລີດຂອງພຣະເຈົ້າ. ແບບຢ່າງໃນຊີວິດຂອງເພິ່ນແມ່ນພຣະຜູ້ຊ່ວຍໃຫ້ລອດ ພຣະເຢຊູຄຣິດ.

ໜຶ່ງໃນຄຳສອນຂອງໂປໂລທີ່ມີຕໍ່ຊາວໂກຣິນໂທ ຄື, ເພິ່ນໄດ້ເຊື້ອເຊີນເຂົາເຈົ້າໃຫ້ເປັນຜູ້ຕິດຕາມເພິ່ນ ຄືກັນກັບທີ່ເພິ່ນເປັນຜູ້ຕິດຕາມພຣະຄຣິດ (ເບິ່ງ 1 ໂກຣິນໂທ 11:1). ນີ້ເປັນຄຳເຊື້ອເຊີນທີ່ຈິງໃຈ ແລະ ມີເຫດຜົນ ຈາກວັນເວລາຂອງໂປໂລ ຈົນເຖິງປະຈຸບັນ ຄື: ການເປັນຜູ້ຕິດຕາມພຣະຄຣິດ.

ຂ້າພະເຈົ້າເລີ່ມສະທ້ອນຄິດວ່າ ການກາຍການເປັນຜູ້ຕິດຕາມພຣະຄຣິດ ໝາຍຄວາມວ່າແນວໃດ. ແລະ ສິ່ງສຳຄັນໄປກວ່ານັ້ນຄື, ຂ້າພະເຈົ້າໄດ້ເລີ່ມທູນຖາມ, “ເຮົາຄວນຮຽນແບບພຣະອົງໄດ້ໃນທາງໃດແດ່?”

ການເປັນຜູ້ຕິດຕາມພຣະຄຣິດແມ່ນການພະຍາຍາມໃຫ້ການກະທຳ, ການປະພຶດ, ແລະ ການດຳລົງຊີວິດຂອງເຮົາສອດຄ່ອງກັບຂອງພຣະຜູ້ຊ່ວຍໃຫ້ລອດ. ມັນຄືການສະແຫວງຫາຄຸນງາມຄວາມດີ. ມັນຄືການເປັນສານຸສິດທີ່ແທ້ຈິງຂອງພຣະເຢຊູຄຣິດ.

ຂ້າພະເຈົ້າໄດ້ສຶກສາພຣະຊົນຊີບຂອງພຣະຜູ້ຊ່ວຍໃຫ້ລອດໃນບາງແງ່ມຸມ, ແລະ ຂ້າພະເຈົ້າໄດ້ເກັບຮັກສາໄວ້, ເພື່ອສ່ວນໜຶ່ງຂອງຂ່າວສານຂອງຂ້າພະເຈົ້າໃນມື້ນີ້, ມີຄຸນສົມບັດສີ່ຢ່າງຂອງພຣະອົງທີ່ຂ້າພະເຈົ້າພະຍາຍາມຮຽນແບບ ແລະ ທີ່ຂ້າພະເຈົ້າຈະແບ່ງປັນກັບທ່ານ.

ຄຸນລັກສະນະທຳອິດຂອງພຣະຜູ້ຊ່ວຍໃຫ້ລອດແມ່ນຄວາມຖ່ອມຕົວ. ພຣະເຢຊູຄຣິດຖ່ອມຕົວຫລາຍຈາກຊີວິດກ່ອນເກີດ. ທີ່ສະພາສະຫວັນ, ພຣະອົງໄດ້ຮັບຮູ້ ແລະ ຍອມໃຫ້ເປັນໄປຕາມພຣະປະສົງຂອງພຣະເຈົ້າໃນແຜນແຫ່ງຄວາມລອດສຳລັບມວນມະນຸດ. ພຣະອົງໄດ້ກ່າວວ່າ, “ພຣະບິດາເອີຍ, ຂໍໃຫ້ເປັນໄປຕາມພຣະປະສົງຂອງພຣະອົງເທີ້ນ, ແລະ ຂໍໃຫ້ລັດສະໝີພາບເປັນຂອງພຣະອົງຕະຫລອດໄປ” (ໂມເຊ 4:2).

ເຮົາຮັບຮູ້ວ່າພຣະເຢຊູຄຣິດໄດ້ສິດສອນຄວາມຖ່ອມຕົວ ແລະ ໄດ້ຖ່ອມຕົວເອງລົງເພື່ອສັນລະເສີນພຣະບິດາຂອງພຣະອົງ.

ຂໍໃຫ້ເຮົາຈົ່ງໃຊ້ຊີວິດໃນຄວາມຖ່ອມຕົວ ເພາະວ່າມັນຈະນຳສັນຕິສຸກມາໃຫ້ (ເບິ່ງ ຄຳສອນ ແລະ ພັນທະສັນຍາ 19:23). ຄວາມຖ່ອມຕົວມາກ່ອນລັດສະໝີພາບ, ແລະ ມັນນຳຄວາມໂປດປານຂອງພຣະເຈົ້າມາສູ່ເຮົາ: “ພວກເຈົ້າ, ໝົດທຸກຄົນຈົ່ງສວມຄວາມຖ່ອມໃຈ, ເພື່ອຮັບໃຊ້ຊຶ່ງກັນແລະກັນ: ພຣະເຈົ້າຊົງຕໍ່ສູ້ຄົນທີ່ຈອງຫອງແຕ່ຊົງປະທານພຣະຄຸນແກ່ຜູ້ທີ່ຖ່ອມໃຈລົງ” (1 ເປໂຕ 5:5). ຄວາມຖ່ອມຕົວຈະນຳຄຳຕອບທີ່ອ່ອນໂຍນມາ. ມັນເປັນແຫລ່ງຂອງລັກສະນະທີ່ຊອບທຳ.

ແອວເດີ ແດວ ຈີ ເຣັນລັນ ໄດ້ສິດສອນວ່າ:

“ບຸກຄົນທີ່ໃຊ້ຊີວິດກັບພຣະເຈົ້າດ້ວຍຄວາມຖ່ອມໃຈ ຈື່ຈຳສິ່ງທີ່ພຣະບິດາເທິງສະຫວັນ ແລະ ພຣະເຢຊູຄຣິດໄດ້ກະທຳເພື່ອເຂົາເຈົ້າ.”

“ເຮົາປະພຶດຢ່າງມີກຽດກັບພຣະເຈົ້າໂດຍການໃຊ້ຊີວິດກັບພຣະເຈົ້າດ້ວຍຄວາມຖ່ອມໃຈ” (“Do Justly, Love Mercy, and Walk Humbly with God,” Liahona, Nov. 2020, 111, 109).

ຄຸນລັກສະນະທີສອງຂອງພຣະຜູ້ຊ່ວຍໃຫ້ລອດແມ່ນຄວາມກ້າຫານ. ເມື່ອຂ້າພະເຈົ້າຄິດເຫັນພຣະເຢຊູຄຣິດທີ່ມີອາຍຸພຽງ 12 ປີ, ນັ່ງຢູ່ໃນພຣະວິຫານຂອງພຣະເຈົ້າທ່າມກາງກຸ່ມອາຈານ ແລະ ສິດສອນເຂົາເຈົ້າເຖິງສິ່ງສັກສິດ, ຂ້າພະເຈົ້າຮູ້ວ່າພຣະອົງມີຢູ່ແລ້ວ, ຕັ້ງແຕ່ຍັງເຍົາໄວ, ຄວາມກ້າຫານທີ່ດີ, ຄວາມກ້າຫານໂດຍສະເພາະ. ໃນຂະນະທີ່ຄົນສ່ວນຫລາຍຄາດຫວັງວ່າເດັກນ້ອຍຈະຖືກສິດສອນໂດຍກຸ່ມອາຈານ, ແຕ່ພຣະອົງໄດ້ສິດສອນເຂົາເຈົ້າຂະນະທີ່ “ເຂົາເຈົ້າກຳລັງຟັງ, ແລະ ຊັກຖາມຄຳຖາມ” (ການແປຂອງໂຈເຊັບ ສະມິດ, ລູກາ 2:46 [ໃນ ລູກາ 2:46, ໝາຍເຫດຢູ່ທາງລຸ່ມໜ້າປຶ້ມ ຄ]).

ພວກເຮົາໄດ້ຮັບໃຊ້ເປັນຜູ້ສອນສາດສະໜາເຕັມເວລາໃນເຂດເຜີຍແຜ່ສາທາລະນະລັດປະຊາທິປະໄຕຄອງໂກ ເອັມບູຈີ-ມາຢີ ຈາກປີ 2016 ຫາ 2019. ວິທີເດີນທາງໃນເຂດເຜີຍແຜ່ຈາກອະນາເຂດໜຶ່ງໄປຫາອີກເຂດໜຶ່ງແມ່ນໃຊ້ລົດ. ໄດ້ເກີດມີເຫດການບໍ່ສະຫງົບໃນເຂດນັ້ນ ໂດຍມີພວກໂຈນຕິດອາວຸດບຸກລຸກເຂົ້າໂຈມຕີຢູ່ຕາມຖະໜົນຫົນທາງ ແລະ ໄດ້ເຮັດໃຫ້ການເດີນທາງຂອງຜູ້ຄົນບໍ່ສະຫງົບ.

ຜູ້ສອນສາດສະໜາຫ້າຄົນທີ່ກຳລັງເດີນທາງຈາກອະນາເຂດໜຶ່ງໄປຫາອີກເຂດໜຶ່ງຊຶ່ງເປັນການປ່ຽນເຂດເຜີຍແຜ່ໄດ້ຕົກເປັນເຫຍື່ອຂອງຄວາມບໍ່ສະຫງົບເຫລົ່ານີ້. ໂດຍທີ່ເຄີຍຕົກເປັນເຫຍື່ອຂອງເຫດການອັນບໍ່ສະຫງົບນີ້ມາກ່ອນແດ່ແລ້ວ, ພວກເຮົາເລີ່ມເປັນຫ່ວງກັບຄວາມປອດໄພຂອງຊີວິດຂອງພວກເຮົາໝົດທຸກຄົນ, ແມ່ນແຕ່ລັງເລໃນການເດີນທາງຕາມເສັ້ນທາງເຫລົ່ານີ້ເພື່ອໄປຢ້ຽມຢາມຜູ້ສອນສາດສະໜາ ແລະ ຈັດກອງປະຊຸມອະນາເຂດ. ພວກເຮົາບໍ່ຮູ້ວ່າມັນຈະເປັນແບບນີ້ອີກດົນປານໃດ. ຂ້າພະເຈົ້າໄດ້ຂຽນໃບລາຍງານສະບັບໜຶ່ງ, ຊຶ່ງຂ້າພະເຈົ້າໄດ້ສົ່ງໄປໃຫ້ຝ່າຍປະທານເຂດ, ແລະ ຂ້າພະເຈົ້າໄດ້ສະແດງຄວາມຮູ້ສຶກຢ້ານກົວຂອງຂ້າພະເຈົ້າກ່ຽວກັບການເດີນທາງຕໍ່ໄປ ເມື່ອເສັ້ນທາງນັ້ນເປັນທາງດຽວທີ່ຈະໄປຮອດຜູ້ສອນສາດສະໜາຂອງພວກເຮົາ.

ໃນການຕອບກັບຄືນຂອງເພິ່ນ, ແອວເດີ ແຄວິນ ແຮມໂມຕັນ, ຜູ້ທີ່ເປັນປະທານຂອງພວກເຮົາຢູ່ເຂດຕາເວັນອອກສຽງໃຕ້ຂອງອາຟຣິກາ, ໄດ້ຂຽນຫາຂ້າພະເຈົ້າວ່າ: “ຄຳແນະນຳຂອງຂ້ອຍແມ່ນເຮັດໃຫ້ດີທີ່ສຸດເທົ່າທີ່ເຈົ້າສາມາດເຮັດໄດ້. ຈົ່ງສະຫລາດ ແລະ ຈົ່ງອະທິຖານ. ຢ່າເອົາຕົວເອງ ຫລື ຜູ້ສອນສາດສະໜາຂອງເຈົ້າໄປໃນທາງທີ່ຈະເກີດອັນຕະລາຍຢ່າງຮູ້ຕົວ, ແຕ່ໃນເວລາດຽວກັນ ກໍໃຫ້ກ້າວຕໍ່ໄປໃນສັດທາ. ‘ເພາະວ່າພຣະເຈົ້າບໍ່ໄດ້ປະທານໃຈອັນຢ້ານກົວໃຫ້ແກ່ເຮົາ; ແຕ່ໄດ້ປະທານໃຈອັນປະກອບດ້ວຍອຳນາດ, ແລະ ຄວາມຮັກ, ແລະ ການບັງຄັບຕົນເອງ ໃຫ້ແກ່ເຮົາ’ (2 ຕີໂມທຽວ 1:7).”

ຄຳຕັກເຕືອນນີ້ເຮັດໃຫ້ພວກເຮົາເຂັ້ມແຂງຫລາຍຂຶ້ນ ແລະ ຊ່ວຍໃຫ້ພວກເຮົາເດີນທາງຕໍ່ໄປ ແລະ ຮັບໃຊ້ດ້ວຍຄວາມກ້າຫານຈົນເຖິງທີ່ສິ້ນສຸດຂອງການເຜີຍແຜ່ຂອງພວກເຮົາ, ເພາະວ່າພວກເຮົາໄດ້ຍິນການຊີ້ນຳຈາກພຣະບິດາຜູ້ສະຖິດໃນສະຫວັນຂອງພວກເຮົາ ຜ່ານທາງພຣະຄຳພີຂໍ້ນັ້ນ.

ໃນພຣະຄຳພີສະໄໝໃໝ່, ເຮົາໄດ້ອ່ານຖ້ອຍຄຳດົນໃຈຂອງສາດສະດາໂຈເຊັບ ສະມິດ ສະທ້ອນເຖິງການໃຫ້ກຳລັງໃຈຂອງພຣະຜູ້ເປັນເຈົ້າຕໍ່ເຮົາວ່າ: “ອ້າຍນ້ອງທັງຫລາຍ, ພວກເຮົາຈະບໍ່ກ້າວຕໍ່ໄປໃນອຸດົມການອັນຍິ່ງໃຫຍ່ເຊັ່ນນີ້ບໍ? ກ້າວໄປໜ້າ ແລະ ບໍ່ຖອຍກັບ. ຈົ່ງກ້າຫານ, ອ້າຍນ້ອງທັງຫລາຍ; ແລະ ກ້າວຕໍ່ໄປ, ຕໍ່ໄປເຖິງໄຊຊະນະ!” ຄຳສອນ ແລະ ພັນທະສັນຍາ 128:22.

ຂໍໃຫ້ເຮົາມີຄວາມກ້າຫານທີ່ຈະເຮັດສິ່ງທີ່ຖືກຕ້ອງ ເຖິງແມ່ນວ່າມັນຈະບໍ່ເປັນທີ່ນິຍົມ—ຄວາມກ້າຫານທີ່ຈະປົກປ້ອງສັດທາຂອງເຮົາ ແລະ ກະທຳດ້ວຍສັດທາ. ຂໍໃຫ້ເຮົາມີຄວາມກ້າຫານທີ່ຈະກັບໃຈແຕ່ລະວັນ, ກ້າຫານທີ່ຈະຍອມຮັບພຣະປະສົງຂອງພຣະເຈົ້າ ແລະ ເຊື່ອຟັງພຣະບັນຍັດຂອງພຣະອົງ. ຂໍໃຫ້ເຮົາມີຄວາມກ້າຫານທີ່ຈະດຳລົງຊີວິດຢ່າງຊອບທຳ ແລະ ເຮັດໃນສິ່ງທີ່ເຮົາຖືກຄາດຫວັງໄວ້ໃນໜ້າທີ່ຮັບຜິດຊອບ ແລະ ຕຳແໜ່ງຕ່າງໆຂອງເຮົາ.

ຄຸນລັກສະນະທີສາມຂອງພຣະຜູ້ຊ່ວຍໃຫ້ລອດແມ່ນການໃຫ້ອະໄພ. ລະຫວ່າງການປະຕິບັດສາດສະໜາກິດຂອງພຣະອົງໃນຊ່ວງມະຕະ, ພຣະຜູ້ຊ່ວຍໃຫ້ລອດໄດ້ປ້ອງກັນຜູ້ຍິງຄົນໜຶ່ງທີ່ໄດ້ລ່ວງປະເວນີຈາກການຖືກແກວ່ງກ້ອນຫີນໃສ່ໃຫ້ຕາຍ. ພຣະອົງໄດ້ສັ່ງນາງວ່າ “ຈົ່ງໄປສາ, ຕໍ່ໄປຢ່າເຮັດບາບອີກ” (ໂຢຮັນ 8:11). ສິ່ງນີ້ໄດ້ກະຕຸ້ນໃຫ້ນາງໄປສູ່ການກັບໃຈ ແລະ ການໃຫ້ອະໄພໃນທີ່ສຸດ, ດັ່ງທີ່ໄດ້ບັນທຶກໃນພຣະຄຳພີ, “ຍິງຄົນນັ້ນໄດ້ສັນລະເສີນພຣະເຈົ້ານັບແຕ່ເວລານັ້ນ, ແລະ ເຊື່ອໃນພຣະນາມຂອງພຣະອົງ” (ໂຈເຊັບ ສະມິດ, ໂຢຮັນ 8:11 [ໃນ ໂຢຮັນ 8:11, ໝາຍເຫດຢູ່ທາງລຸ່ມໜ້າປຶ້ມ ຄ]).

ໃນຊ່ວງລາຍການໃຫ້ຄຳດົນໃຈເນື່ອງໃນໂອກາດບຸນຄຣິດສະມາດ ເດືອນທັນວາ ປີ 2018, ປະທານຣະໂຊ ເອັມ ແນວສັນ ທີ່ຮັກແພງຂອງເຮົາ ໄດ້ກ່າວກ່ຽວກັບຂອງປະທານສີ່ຢ່າງ ທີ່ເຮົາໄດ້ຮັບຈາກພຣະຜູ້ຊ່ວຍໃຫ້ລອດ. ເພິ່ນໄດ້ກ່າວວ່າ ຂອງປະທານຢ່າງໜຶ່ງທີ່ພຣະຜູ້ຊ່ວຍໃຫ້ລອດສະເໜີມອບໃຫ້ ແມ່ນຄວາມສາມາດທີ່ຈະ ໃຫ້ອະໄພ:

“ຜ່ານທາງການຊົດໃຊ້ອັນເປັນນິດຂອງພຣະອົງ, ທ່ານສາມາດໃຫ້ອະໄພຄົນທີ່ໄດ້ເຮັດໃຫ້ທ່ານເຈັບປວດ ແລະ ຄົນທີ່ບໍ່ເຄີຍຮັບເອົາຄວາມຮັບຜິດຊອບສຳລັບຄວາມຮ້າຍກາດທີ່ເຂົາໄດ້ເຮັດກັບທ່ານ.

“ມັນເປັນສິ່ງງ່າຍທີ່ຈະໃຫ້ອະໄພແກ່ຄົນທີ່ສະແຫວງຫາການໃຫ້ອະໄພຈາກທ່ານດ້ວຍຄວາມຈິງໃຈ ແລະ ດ້ວຍຄວາມຖ່ອມຕົວ. ແຕ່ພຣະຜູ້ຊ່ວຍໃຫ້ລອດຈະປະທານຄວາມສາມາດໃຫ້ທ່ານ ເພື່ອໃຫ້ອະໄພຄົນທີ່ໄດ້ເຮັດຜິດຕໍ່ທ່ານ ບໍ່ວ່າຈະເປັນໃນຮູບແບບໃດກໍຕາມ” (“ຂອງປະທານສີ່ຢ່າງທີ່ພຣະເຢຊູຄຣິດສະເໜີມອບໃຫ້ທ່ານ” [ລາຍການໃຫ້ຄຳດົນໃຈເນື່ອງໃນໂອກາດບຸນຄຣິດສະມາດ, ວັນທີ 2 ເດືອນທັນວາ, 2018], broadcasts.ChurchofJesusChrist.org).

ຂໍໃຫ້ເຮົາໃຫ້ອະໄພຊຶ່ງກັນແລະກັນດ້ວຍຄວາມຈິງໃຈ ເພື່ອຈະໄດ້ຮັບການໃຫ້ອະໄພຈາກພຣະບິດາ. ການໃຫ້ອະໄພຈະປົດປ່ອຍເຮົາ ແລະ ເຮັດໃຫ້ເຮົາມີຄ່າຄວນທີ່ຈະຮັບເອົາສິນລະລຶກແຕ່ລະອາທິດໄດ້. ການໃຫ້ອະໄພເປັນສິ່ງຈຳເປັນສຳລັບເຮົາທີ່ຈະເປັນສານຸສິດທີ່ແທ້ຈິງຂອງພຣະເຢຊູຄຣິດ.

ຄຸນລັກສະນະທີສີ່ຂອງພຣະຜູ້ຊ່ວຍໃຫ້ລອດແມ່ນການເສຍສະລະ. ມັນເປັນພາກສ່ວນໜຶ່ງຂອງພຣະກິດຕິຄຸນຂອງພຣະເຢຊູຄຣິດ. ພຣະຜູ້ຊ່ວຍໃຫ້ລອດໄດ້ເສຍສະລະພຣະຊົນຊີບຢ່າງສູງສຸດເພື່ອເຮົາ ເພື່ອວ່າເຮົາຈະສາມາດໄດ້ຮັບການໄຖ່. ໂດຍທີ່ຮູ້ສຶກເຈັບປວດຈາກການເສຍສະລະ, ພຣະອົງໄດ້ຂໍໃຫ້ພຣະບິດາຂອງພຣະອົງເລື່ອນຈອກນີ້ອອກໄປ, ແຕ່ວ່າພຣະອົງໄດ້ໄປເຖິງຈຸດຈົບຂອງການເສຍສະລະແຫ່ງນິລັນດອນ. ນີ້ແມ່ນການຊົດໃຊ້ຂອງພຣະເຢຊູຄຣິດ.

ປະທານເອັມ ຣະໂຊ ບາເລີດ ໄດ້ສິດສອນເລື່ອງນີ້ວ່າ: “ການເສຍສະລະຄືການສະແດງຄວາມຮັກອັນບໍລິສຸດ. ລະດັບຄວາມຮັກທີ່ເຮົາມີຕໍ່ພຣະຜູ້ເປັນເຈົ້າ, ຕໍ່ພຣະກິດຕິຄຸນ, ແລະ ຕໍ່ເພື່ອນມະນຸດດ້ວຍກັນ ສາມາດຖືກວັດແທກໄດ້ໂດຍການທີ່ເຮົາຕັ້ງໃຈເສຍສະລະໃຫ້ກັບເຂົາເຈົ້າ” (“The Blessings of Sacrifice,” Ensign, May 1992, 76).

ເຮົາສາມາດເສຍສະລະເວລາຂອງເຮົາໃນການປະຕິບັດສາດສະໜາກິດ, ຮັບໃຊ້ຄົນອື່ນ, ເຮັດຄວາມດີ, ເຮັດວຽກງານປະຫວັດຄອບຄົວ, ແລະ ຂະຫຍາຍການເອີ້ນຂອງເຮົາໃນສາດສະໜາຈັກ.

ເຮົາສາມາດເສຍສະລະທາງດ້ານການເງິນໂດຍການຈ່າຍສ່ວນສິບ, ເງິນຖືສິນອົດເຂົ້າ, ແລະ ການບໍລິຈາກອື່ນໆ ເພື່ອສ້າງສາອານາຈັກຂອງພຣະເຈົ້າເທິງແຜ່ນດິນໂລກ. ເຮົາຕ້ອງເສຍສະລະເພື່ອຮັກສາພັນທະສັນຍາທີ່ເຮົາເຮັດໄວ້ກັບພຣະຜູ້ຊ່ວຍໃຫ້ລອດ.

ຂ້າພະເຈົ້າອະທິຖານວ່າ ໂດຍການຕິດຕາມພຣະເຢຊູຄຣິດ ແລະ ຮັບເອົາພອນຂອງການຊົດໃຊ້ຂອງພຣະອົງ, ເຮົາຈະກາຍເປັນຄົນທີ່ຖ່ອມຕົວຫລາຍກວ່າເກົ່າ, ເຮົາຈະກ້າຫານຫລາຍກວ່າເກົ່າ, ເຮົາຈະໃຫ້ອະໄພຫລາຍກວ່າເກົ່າ, ເຮົາຈະເສຍສະລະຫລາຍກວ່າເກົ່າສຳລັບອານາຈັກຂອງພຣະອົງ.

ຂ້າພະເຈົ້າເປັນພະຍານວ່າ ພຣະບິດາເທິງສະຫວັນຊົງພຣະຊົນຢູ່, ແລະ ພຣະອົງຮູ້ຈັກເຮົາແຕ່ລະຄົນເປັນສ່ວນຕົວ, ວ່າພຣະເຢຊູຄືພຣະຄຣິດ, ວ່າປະທານຣະໂຊ ເອັມ ແນວສັນ ເປັນສາດສະດາຂອງພຣະເຈົ້າໃນປະຈຸບັນ. ຂ້າພະເຈົ້າເປັນພະຍານວ່າ ສາດສະໜາຈັກຂອງພຣະເຢຊູຄຣິດແຫ່ງໄພ່ພົນຍຸກສຸດທ້າຍ ເປັນອານາຈັກຂອງພຣະເຈົ້າເທິງແຜ່ນດິນໂລກ ແລະ ພຣະຄຳພີມໍມອນເປັນຄວາມຈິງ. ໃນພຣະນາມອັນສັກສິດຂອງພຣະເຢຊູຄຣິດ, ພຣະຜູ້ໄຖ່ຂອງເຮົາ, ອາແມນ.