ການກະກຽມສຳລັບການສະເດັດມາຄັ້ງທີສອງຂອງພຣະຄຣິດ

ໂດຍ ແອວເດີ ຄຣິສໂຕແຟວ ໂກນເດັນ

ແຫ່ງສາວົກເຈັດສິບ

ຫລາຍກວ່າທີ່ເຄີຍເປັນມາ, ເຮົາຖືກຮຽກຮ້ອງໃຫ້ປະເຊີນໜ້າກັບຄວາມເປັນຈິງວ່າ ເຮົາກຳລັງຫຍັບເຂົ້າໃກ້ເລື້ອຍໆເຖິງການສະເດັດມາຄັ້ງທີສອງຂອງພຣະເຢຊູຄຣິດ.

ດັ່ງທີ່ໄດ້ບັນທຶກໄວ້ໃນພຣະຄຳພີມໍມອນ, ຫົກປີກ່ອນການກຳເນີດຂອງພຣະເຢຊູຄຣິດ, ຊາມູເອນ, ຊາວເລມັນທີ່ຊອບທຳ, ໄດ້ທຳນາຍຕໍ່ຊາວນີໄຟຊຶ່ງຕອນນັ້ນໄດ້ກາຍເປັນຜູ້ທີ່ປະຖິ້ມຄວາມເຊື່ອເປັນສ່ວນໃຫຍ່,¹ ເຖິງເຄື່ອງໝາຍທີ່ຈະມາພ້ອມກັບການກຳເນີດຂອງພຣະຜູ້ຊ່ວຍໃຫ້ລອດຂອງເຮົາ. ໜ້າໂສກເສົ້າໃຈແທ້ໆທີ່, ຊາວນີໄຟສ່ວນຫລາຍໄດ້ປະຕິເສດເຄື່ອງໝາຍເຫລົ່ານັ້ນຍ້ອນວ່າ ຄືມັນ “ບໍ່ມີເຫດຜົນທີ່ຄົນຢ່າງພຣະຄຣິດ [ຈະ] ສະເດັດມາ.”²

ໜ້າເສຍໃຈທີ່, ອີງຕາມການບັນທຶກໃນພຣະຄຳພີ, ຊາວຢິວຫລາຍຄົນ, ໃນແບບດຽວກັນ, ກໍບໍ່ຍອມຮັບວ່າຊາຍຄົນໜຶ່ງທີ່ມີຊື່ວ່າ ເຢຊູ, ທີ່ມາຈາກແຂວງຄາລີເລນ້ອຍໆທີ່ບໍ່ມີຊື່ສຽງ, ຄືພຣະເມຊີອາແທ້ໆ ທີ່ພວກເຂົາໄດ້ລໍຄອຍເປັນເວລາດົນນານ.³ ພຣະເຢຊູ, ຜູ້ທີ່ໄດ້ສະເດັດມາເພື່ອບັນລຸຄຳທຳນາຍຫລາຍປະການຂອງສາດສະດາເຮັບເຮີຫລາຍໆທ່ານ, ຖືກປະຕິເສດ ແລະ ແມ່ນແຕ່ຖືກຄຶງ ຍ້ອນວ່າ, ຕາມທີ່ສາດສະດາຢາໂຄບໃນພຣະຄຳພີມໍມອນໄດ້ສິດສອນວ່າ, ຊາວຢິວໄດ້ “ເບິ່ງຂ້າມເຄື່ອງໝາຍ.” ດ້ວຍເຫດນີ້, ຢາໂຄບຈຶ່ງໄດ້ເປັນພະຍານວ່າ “ພຣະເຈົ້າໄດ້ເອົາຄວາມແຈ່ມແຈ້ງຂອງພຣະອົງໄປຈາກພວກເຂົາ, ແລະ ມອບຫລາຍສິ່ງຫລາຍຢ່າງໃຫ້ແກ່ພວກເຂົາຊຶ່ງພວກເຂົາເຂົ້າໃຈບໍ່ໄດ້, ເພາະພວກເຂົາປາດຖະໜາແນວນັ້ນ. ແລະ ຍ້ອນວ່າພວກເຂົາປາດຖະໜາແນວນັ້ນ, ພຣະເຈົ້າຈຶ່ງເຮັດແນວນັ້ນເພື່ອພວກເຂົາຈະໄດ້ສະດຸດ.”⁴

ແປກທີ່ມັນອາດຈະເບິ່ງຄືວ່າ, ບໍ່ມີການສິດສອນໃດ, ບໍ່ມີສິ່ງມະຫັດສະຈັນໃດ, ແລະ ແມ່ນແຕ່ບໍ່ມີການປະກົດຂອງທູດສະຫວັນ, ດັ່ງທີ່ເລມັນ ແລະ ເລມູເອນໄດ້ເຫັນ,⁵ ທີ່ປະກົດວ່າມີພະລັງໃນການໂນ້ມນ້າວຈິດໃຈເພື່ອຊັກຈູງຄົນໃດຄົນໜຶ່ງໃຫ້ປ່ຽນແປງແນວທາງ, ມຸມມອງ, ຫລື ຄວາມເຊື່ອທີ່ວ່າບາງຢ່າງເປັນຄວາມຈິງ. ໂດຍສະເພາະແມ່ນໃນກໍລະນີເມື່ອຄຳສອນ ຫລື ສິ່ງມະຫັດສະຈັນນີ້ ບໍ່ກົງກັບຄວາມມຸ້ງຫວັງ, ຄວາມປາດຖະໜາ, ຫລື ຄວາມຄິດສ່ວນບຸກຄົນ.

ຈົ່ງປຽບທຽບພຣະຄຳພີສອງຂໍ້ຕໍ່ໄປນີ້ຈັກໜ່ອຍ, ຂໍ້ທຳອິດແມ່ນຈາກອັກຄະສາວົກໂປໂລທີ່ກ່າວກ່ຽວກັບຍຸກສຸດທ້າຍ, ບັນຍາຍກ່ຽວກັບທາງຂອງມະນຸດ, ແລະ ຂໍ້ທີສອງແມ່ນຈາກແອວມາຜູ້ເປັນສາດສະດາທີ່ກ່າວກ່ຽວກັບວິທີທີ່ພຣະເຈົ້າເຮັດວຽກງານຂອງພຣະອົງໃນທ່າມກາງມວນມະນຸດ. ຂໍ້ທຳອິດຈາກໂປໂລ:

“ຈົ່ງຮູ້ຈັກຂໍ້ຄວາມນີ້ວ່າ, ໃນຄາວທີ່ສຸດນັ້ນຈະເກີດຄວາມລຳບາກຢ່າງຮ້າຍແຮງ.

“ເພາະວ່າຄົນທັງຫລາຍຈະເຫັນແກ່ຕົວ, ເຫັນແກ່ເງິນຄຳ, ອວດຕົວ, ຈອງຫອງ, ມັກດ່າວ່າ, ບໍ່ເຊື່ອຟັງຄວາມພໍ່ແມ່, ເນລະຄຸນ, ເປັນຄົນບໍ່ມີສິນທຳ,

“ເປັນຄົນຂາດມະນຸດສະທຳ, ບໍ່ຍອມຜ່ອນຜັນຜູ້ໃດ, ໃສ່ຮ້າຍປ້າຍສີກັນ, ບໍ່ຮູ້ຈັກບັງຄັບຕົນ, ມີໃຈໂຫດຮ້າຍ, ເປັນຄົນບໍ່ຮັກການດີ,

“ເປັນຄົນທໍລະຍົດ, ດື້ດ້ານ, ອວດສະຫາວ, ເປັນຄົນຮັກຄວາມສະໜຸກຫລາຍກວ່າຮັກພຣະເຈົ້າ; …

“ຍອມຮ່ຳຮຽນຢູ່ສະເໝີ, ແຕ່ບໍ່ອາດຈະເຖິງການສັງເກດຮູ້ຄວາມຈິງໄດ້ຈັກເທື່ອ.”⁶

ແລະ ບັດນີ້ ຈາກແອວມາ, ເລີ່ມຕົ້ນດ້ວຍຫລັກທີ່ເປັນຮາກຖານຂອງພຣະກິດຕິຄຸນຂອງພຣະເຢຊູຄຣິດ: “ບັດນີ້ລູກອາດຈະຄິດວ່າ ມັນເປັນຄວາມໂງ່ຈ້າຂອງພໍ່; ແຕ່ຈົ່ງເບິ່ງ ພໍ່ເວົ້າກັບລູກວ່າ ເລື່ອງເລັກນ້ອຍ ແລະ ງ່າຍໆຈະນຳເລື່ອງໃຫຍ່ມາ; ແລະ ໃນຫລາຍຢ່າງວິທີເລັກໆນ້ອຍໆຈະເຮັດໃຫ້ຄົນສະຫລາດຍອມຈຳນົນ.”⁷

ເຮົາມີຊີວິດຢູ່ໃນໂລກທັນສະໃໝທີ່ເຕັມໄປດ້ວຍຄວາມຮູ້ອັນຍິ່ງໃຫຍ່ ແລະ ຄົນທີ່ສະຫລາດຫລັກແຫລມຢ່າງຫລວງຫລາຍ. ເຖິງຢ່າງໃດກໍຕາມ, ສິ່ງເຫລົ່ານີ້ມັກຈະປົກປິດຮາກຖານອັນບໍ່ໝັ້ນຄົງທີ່ມັນຖືກສ້າງຂຶ້ນມາ. ດ້ວຍເຫດນີ້, ມັນຈຶ່ງບໍ່ນຳພາໄປຫາຄວາມຈິງທີ່ແທ້ຈິງ ແລະ ບໍ່ໄດ້ມຸ້ງໜ້າໄປຫາພຣະເຈົ້າ ແລະ ອຳນາດເພື່ອຮັບເອົາການເປີດເຜີຍ, ຮັບເອົາຄວາມຮູ້ທາງວິນຍານ, ແລະ ພັດທະນາສັດທາໃນພຣະເຢຊູຄຣິດທີ່ນຳໄປສູ່ຄວາມລອດ.⁸

ເຮົາໄດ້ຮັບການເຕືອນໃຈຢ່າງເລິກເຊິ່ງເຖິງພຣະຄຳຂອງພຣະຜູ້ເປັນເຈົ້າຂອງເຮົາທີ່ກ່າວຕໍ່ໂທມາ ແລະ ອັກຄະສາວົກຄົນອື່ນໆກ່ອນການເສຍສະລະຊົດໃຊ້ຂອງພຣະອົງ: “ພຣະເຢຊູໄດ້ຕອບເພິ່ນວ່າ, ເຮົານີ້ແຫລະເປັນທາງນັ້ນ, ເປັນຄວາມຈິງ, ແລະ ເປັນຊີວິດ: ບໍ່ມີຜູ້ໃດມາເຖິງພຣະບິດາໄດ້, ນອກຈາກມາທາງເຮົາ.”⁹

ສຳລັບຜູ້ທີ່ມີຕາເພື່ອແນມເຫັນ, ມີຫູເພື່ອໄດ້ຍິນ, ແລະ ມີຫົວໃຈທີ່ມີຄວາມຮູ້ສຶກ, ຫລາຍກວ່າທີ່ເຄີຍເປັນມາ ເຮົາຖືກຮຽກຮ້ອງໃຫ້ປະເຊີນໜ້າກັບຄວາມເປັນຈິງວ່າ ເຮົາກຳລັງຫຍັບເຂົ້າໃກ້ເລື້ອຍໆເຖິງການສະເດັດມາຄັ້ງທີສອງຂອງພຣະເຢຊູຄຣິດ. ແທ້ຈິງແລ້ວ, ຄວາມຍາກລຳບາກອັນໃຫຍ່ຫລວງຍັງຄອຍຖ້າຜູ້ທີ່ຢູ່ເທິງແຜ່ນດິນໂລກເມື່ອພຣະອົງສະເດັດກັບມາ, ແຕ່ໃນເລື່ອງນີ້, ຜູ້ທີ່ຊື່ສັດບໍ່ຈຳເປັນຕ້ອງຢ້ານ.

ບັດນີ້ຂ້າພະເຈົ້າຂໍອ້າງເຖິງຈັກໜ່ອຍຈາກ Church’s Gospel Topics [ຫົວຂໍ້ພຣະກິດຕິຄຸນຂອງສາດສະໜາຈັກ] ໃນຫົວຂໍ້ “ການສະເດັດມາຄັ້ງທີສອງຂອງພຣະເຢຊູຄຣິດ”:

“ເມື່ອພຣະຜູ້ຊ່ວຍໃຫ້ລອດສະເດັດມາອີກຄັ້ງ, ພຣະອົງຈະສະເດັດມາໃນອຳນາດ ແລະ ລັດສະໝີພາບເພື່ອທວງເອົາແຜ່ນດິນໂລກໃຫ້ເປັນອານາຈັກຂອງພຣະອົງ. ການສະເດັດມາຄັ້ງທີສອງຂອງພຣະອົງຈະເປັນການເລີ່ມຕົ້ນຂອງຍຸກພັນປີ.

“ການສະເດັດມາຄັ້ງທີສອງນີ້ຈະເປັນເວລາທີ່ໜ້າຢ້ານກົວ, ເຕັມໄປດ້ວຍຄວາມໂສກເສົ້າສຳລັບຄົນຊົ່ວຮ້າຍ, ແຕ່ວ່າຈະເປັນວັນແຫ່ງສັນຕິສຸກສຳລັບຄົນຊອບທຳ. ພຣະຜູ້ເປັນເຈົ້າໄດ້ປະກາດວ່າ:

“‘ເພາະພວກເຂົາເປັນຄົນສະຫລາດ ແລະ ໄດ້ຮັບເອົາຄວາມຈິງ, ແລະ ໄດ້ຮັບເອົາພຣະວິນຍານສັກສິດເພື່ອການນຳພາ, ແລະ ບໍ່ໄດ້ຖືກຫລອກລວງ—ຕາມຄວາມຈິງແລ້ວ ເຮົາກ່າວກັບພວກເຈົ້າວ່າ, ພວກເຂົາຈະບໍ່ຖືກໂຄ່ນລົງ ແລະ ໂຍນເຂົ້າກອງໄຟ, ແຕ່ຈະດຳລົງຢູ່ໃນວັນນັ້ນ.

“‘ແລະ ແຜ່ນດິນໂລກຈະຖືກມອບໃຫ້ແກ່ພວກເຂົາເພື່ອເປັນມູນມໍລະດົກ; ແລະ ພວກເຂົາຈະເພີ່ມທະວີ ແລະ ເຂັ້ມແຂງຂຶ້ນ, ແລະ ລູກຫລານຂອງພວກເຂົາຈະເຕີບໂຕປາດສະຈາກບາບໄປສູ່ຄວາມລອດ.

“‘ເພາະພຣະຜູ້ເປັນເຈົ້າຈະສະຖິດຢູ່ໃນທ່າມກາງພວກເຂົາ, ແລະ ລັດສະໝີພາບຂອງພຣະອົງຈະຢູ່ເທິງພວກເຂົາ, ແລະ ພຣະອົງຈະເປັນກະສັດຂອງພວກເຂົາ ແລະ ເປັນຜູ້ໃຫ້ກົດຂອງພວກເຂົາ’ (ຄຳສອນ ແລະ ພັນທະສັນຍາ 45:57–59).”¹⁰

ໃນການກຽມຕົວຂອງເຮົາສຳລັບການສະເດັດມາຄັ້ງທີສອງຂອງພຣະເຢຊູຄຣິດ, ຂ້າພະເຈົ້າຂໍມອບຂໍ້ຄວາມທີ່ສຳຄັນ ແລະ ໃຫ້ການປອບໂຍນແກ່ຜູ້ທີ່ຊື່ສັດ ຈາກພຣະຄຳພີເດີມໂດຍສາດສະດາອາໂມດ ທີ່ວ່າ: “ແນ່ນອນວ່າອົງພຣະຜູ້ເປັນເຈົ້າບໍ່ໄດ້ເຮັດສິ່ງໃດໂດຍບໍ່ບອກແຈ້ງໃຫ້ຮູ້ລ່ວງໜ້າເຖິງແຜນການຂອງພຣະອົງແກ່ສາດສະດາຄືຜູ້ຮັບໃຊ້ຂອງພຣະອົງ.”¹¹

ໃນຄວາມຮູ້ສຶກນີ້, ສາດສະດາຂອງພຣະຜູ້ເປັນເຈົ້າຄົນປະຈຸບັນຂອງໂລກ, ປະທານຣະໂຊ ເອັມ ແນວສັນ, ຈຶ່ງໄດ້ໃຫ້ຄຳແນະນຳທີ່ດົນໃຈ ເມື່ອບໍ່ດົນມານີ້ວ່າ: “ພຣະກິດຕິຄຸນຂອງພຣະເຢຊູຄຣິດ ແມ່ນ ພຣະກິດຕິຄຸນແຫ່ງການກັບໃຈ. ຍ້ອນການຊົດໃຊ້ຂອງພຣະຜູ້ຊ່ວຍໃຫ້ລອດ, ພຣະກິດຕິຄຸນຂອງພຣະອົງຈຶ່ງໄດ້ເຊື້ອເຊີນໃຫ້ສືບຕໍ່ປ່ຽນແປງ, ເຕີບໂຕ, ແລະ ກາຍເປັນຄົນບໍລິສຸດຫລາຍຂຶ້ນ. ມັນແມ່ນພຣະກິດຕິຄຸນແຫ່ງຄວາມຫວັງ, ແຫ່ງການປິ່ນປົວ, ແລະ ແຫ່ງການກ້າວໜ້າ. ດັ່ງນັ້ນ, ພຣະກິດຕິຄຸນ ຄືຂ່າວສານແຫ່ງ ຄວາມສຸກ! ຈິດວິນຍານຂອງເຮົາປິຕິຍິນດີກັບທຸກໆບາດກ້າວນ້ອຍໆທີ່ເຮົາກ້າວໄປຂ້າງໜ້າ.”¹²

ຂ້າພະເຈົ້າເປັນພະຍານຢ່າງບໍ່ມີຂໍ້ສົງໄສ ແລະ ຢືນຢັນເຖິງຄວາມເປັນຈິງຂອງພຣະເຈົ້າ ແລະ ສິ່ງມະຫັດສະຈັນໃນຊີວິດປະຈຳວັນຂອງຜູ້ຄົນຈົນນັບບໍ່ຖ້ວນ ຈາກສະຖານະການຂຶ້ນໆລົງໆຂອງຊີວິດ. ຄວາມຈິງແລ້ວ, ມີຫລາຍໆປະສົບການທີ່ສັກສິດທີ່ບໍ່ຄ່ອຍໄດ້ກ່າວເຖິງ, ສ່ວນໜຶ່ງເປັນຍ້ອນຕົ້ນກຳເນີດຂອງຄວາມສັກສິດຂອງມັນ ແລະ ເຫດຜົນທີ່ອາດເປັນໄປໄດ້ວ່າຈະຖືກເຍາະເຍີ້ຍຈາກບາງຄົນທີ່ບໍ່ຮູ້ຈັກດີໄປກວ່ານັ້ນ.

ໃນເລື່ອງນີ້, ໂມໂຣໄນ ສາດສະດາຄົນສຸດທ້າຍຂອງພຣະຄຳພີມໍມອນ, ຈຶ່ງເຕືອນເຮົາວ່າ:

“ແລະ ອີກເທື່ອໜຶ່ງ ຂ້າພະເຈົ້າຂໍເວົ້າກັບທ່ານຜູ້ປະຕິເສດການເປີດເຜີຍຂອງພຣະເຈົ້າ, ແລະ ເວົ້າວ່າມັນໝົດໄປແລ້ວ, ວ່າບໍ່ມີການເປີດເຜີຍ, ຫລື ການທຳນາຍ, ຫລື ຂອງປະທານ, ຫລື ການປິ່ນປົວ, ຫລື ການເວົ້າດ້ວຍພາສາອື່ນ, ແລະ ການແປຄວາມໝາຍຂອງພາສາອື່ນ;

“ຈົ່ງເບິ່ງ ຂ້າພະເຈົ້າກ່າວກັບທ່ານວ່າ, ຄົນທີ່ປະຕິເສດສິ່ງເຫລົ່ານີ້ບໍ່ຮູ້ຈັກພຣະກິດຕິຄຸນຂອງພຣະຄຣິດ; ແທ້ຈິງແລ້ວ, ເຂົາບໍ່ໄດ້ອ່ານພຣະຄຳພີ; ຖ້າຫາກອ່ານ, ເຂົາກໍບໍ່ເຂົ້າໃຈມັນ.

“ເຮົາບໍ່ໄດ້ອ່ານບໍວ່າ ພຣະເຈົ້າເປັນເໝືອນກັນເຊັ່ນມື້ວານນີ້, ມື້ນີ້, ແລະ ຕະຫລອດການ, ແລະ ໃນພຣະອົງບໍ່ມີຄວາມຜັນແປ ທັງບໍ່ມີເງົາຂອງຄວາມປ່ຽນແປງເລີຍ?”¹³

ຂ້າພະເຈົ້າຂໍສະຫລຸບບົດປາໄສຂອງຂ້າພະເຈົ້າດ້ວຍຄຳປະກາດທີ່ດົນໃຈຢ່າງແທ້ຈິງຂອງສາດສະດາໂຈເຊັບ ສະມິດ, ທີ່ໄດ້ກ່າວໃນຕອນໃກ້ສິ້ນສຸດການປະຕິບັດສາດສະໜາກິດຂອງເພິ່ນ ຂະນະທີ່ເພິ່ນຕັ້ງຕາລໍຄອຍການສະເດັດມາຄັ້ງທີສອງຂອງພຣະເຢຊູຄຣິດວ່າ: “ພວກເຮົາຈະບໍ່ກ້າວຕໍ່ໄປໃນອຸດົມການອັນຍິ່ງໃຫຍ່ເຊັ່ນນີ້ບໍ? ກ້າວໄປໜ້າ ແລະ ບໍ່ຖອຍກັບ. ຈົ່ງກ້າຫານ, ອ້າຍນ້ອງທັງຫລາຍ [ແລະ, ຂ້າພະເຈົ້າຂໍເພີ່ມ, ເອື້ອຍນ້ອງນຳອີກ]; ແລະ ກ້າວຕໍ່ໄປ, ຕໍ່ໄປເຖິງໄຊຊະນະ! ຂໍໃຫ້ໃຈຂອງພວກທ່ານປິຕິຍິນດີເຖີດ, ແລະ ດີໃຈຢ່າງຍິ່ງ.”¹⁴ ຂ້າພະເຈົ້າຂໍຕື່ມປະຈັກພະຍານຂອງຂ້າພະເຈົ້າໃສ່ນຳ, ໃນພຣະນາມຂອງພຣະເຢຊູຄຣິດ, ອາແມນ.