ສັນຕິສຸກສ່ວນຕົວໃນຊ່ວງເວລາທີ່ທ້າທາຍ
ບໍ່ມີຊ່ວງເວລາທີ່ສຳຄັນຫລາຍກວ່ານີ້ ທີ່ຈະສະແຫວງຫາສັນຕິສຸກສ່ວນຕົວ.
ເມື່ອບໍ່ດົນມານີ້ ຂ້າພະເຈົ້າຖືກມອບໝາຍໃຫ້ອຸທິດພາກສ່ວນໜຶ່ງຂອງເມືອງນາວູແຫ່ງປະຫວັດສາດ. ໃນພາກສ່ວນຂອງການມອບໝາຍນັ້ນ, ຂ້າພະເຈົ້າໄດ້ໄປຢ້ຽມຢາມຄຸກລີເບີຕີໃນລັດມີເຊີຣີ. ຂະນະທີ່ຂ້າພະເຈົ້າໄດ້ເຫັນຄຸກນັ້ນ, ຂ້າພະເຈົ້າໄດ້ໄຕ່ຕອງເຫດການທີ່ເຮັດໃຫ້ມັນເປັນພາກສ່ວນທີ່ສຳຄັນຂອງປະຫວັດສາດຂອງສາດສະໜາຈັກ. ຊີວິດຂອງໄພ່ພົນຖືກຂົ່ມຂູ່ເພາະຄຳສັ່ງໃຫ້ກຳຈັດ ຈາກເຈົ້າລັດມີເຊີຣີ. ນອກເໜືອໄປຈາກນັ້ນ, ສາດສະດາໂຈເຊັບ ສະມິດ ແລະ ເພື່ອນຮ່ວມງານທີ່ຊື່ສັດສອງສາມຄົນໄດ້ຖືກຄຸມຂັງໃນຄຸກລີເບີຕີຢ່າງບໍ່ຍຸດຕິທຳ. ເຫດຜົນໜຶ່ງຂອງການຄັດຄ້ານທີ່ຮຸນແຮງຕໍ່ສະມາຊິກຂອງເຮົາກໍເປັນເພາະເຂົາເຈົ້າສ່ວນຫລາຍໄດ້ຄັດຄ້ານການເປັນຂ້າທາດ.1 ການຂົ່ມເຫັງທີ່ຮ້າຍແຮງນີ້ທີ່ໂຈເຊັບ ສະມິດ ແລະ ຜູ້ຕິດຕາມຂອງເພິ່ນໄດ້ຮັບ ປະກອບເປັນຕົວຢ່າງທີ່ຮ້າຍກາດຂອງການນຳໃຊ້ອຳເພີໃຈທີ່ບໍ່ຊອບທຳ ທີ່ສາມາດກະທົບກະເທືອນຜູ້ຄົນທີ່ຊອບທຳ. ເວລາຂອງໂຈເຊັບຢູ່ໃນຄຸກລີເບີຕີ ສະແດງໃຫ້ເຫັນວ່າຄວາມຍາກລຳບາກບໍ່ໄດ້ພິສູດວ່າ ພຣະຜູ້ເປັນເຈົ້າບໍ່ພໍພຣະໄທ ຫລື ຖອນພຣະພອນຂອງພຣະອົງອອກໄປ.
ຂ້າພະເຈົ້າຮູ້ສຶກຊາບຊຶ້ງໃຈຂະນະທີ່ຂ້າພະເຈົ້າໄດ້ອ່ານສິ່ງທີ່ສາດສະດາໂຈເຊັບ ສະມິດ ໄດ້ປະກາດ ຂະນະທີ່ເພິ່ນຖືກຄຸມຂັງຢູ່ໃນຄຸກລີເບີຕີວ່າ: “ໂອ້ ພຣະອົງເຈົ້າ, ພຣະອົງຊົງປະທັບຢູ່ບ່ອນໃດ? ແລະ ສາລາທີ່ປົກປິດ ບ່ອນລີ້ຂອງພຣະອົງຢູ່ບ່ອນໃດ?”2 ໂຈເຊັບໄດ້ທູນຖາມວ່າ ຜູ້ຄົນຂອງພຣະຜູ້ເປັນເຈົ້າ “ຈະທົນຮັບເອົາການກະທຳຜິດ ແລະ ການກົດຂີ່ຂົ່ມເຫັງທີ່ຜິດກົດໝາຍເຫລົ່ານີ້” ນານເທົ່າໃດ.3
ຕອນຂ້າພະເຈົ້າໄດ້ຢືນຢູ່ໃນຄຸກລີເບີຕີ, ຂ້າພະເຈົ້າໄດ້ຮູ້ສຶກຊາບຊຶ້ງໃຈຂະນະທີ່ຂ້າພະເຈົ້າອ່ານຄຳຕອບວ່າ: “ລູກເອີຍ, ສັນຕິສຸກຈົ່ງມີແກ່ຈິດວິນຍານຂອງເຈົ້າ; ຄວາມທຸກທໍລະມານຂອງເຈົ້າຈະເປັນຢູ່ພຽງຊົ່ວຄາວ; ແລະ ຈາກນັ້ນ, ຖ້າຫາກເຈົ້າອົດທົນມັນໄດ້ດີ, ພຣະເຈົ້າຈະຍົກເຈົ້າຂຶ້ນສູ່ເບື້ອງບົນ.”4 ມັນກໍແຈ່ມແຈ້ງດີທີ່ການຕໍ່ຕ້ານສາມາດຫລໍ່ຫລອມເຮົາສຳລັບຈຸດໝາຍປາຍທາງຊັ້ນສູງ ແລະ ນິລັນດອນ.5
ພຣະຄຳທີ່ລ້ຳຄ່າຂອງພຣະຜູ້ຊ່ວຍໃຫ້ລອດທີ່ວ່າ “ລູກເອີຍ, ສັນຕິສຸກຈົ່ງມີແກ່ຈິດວິນຍານຂອງເຈົ້າ”6 ມີຄວາມໝາຍພິເສດສຳລັບຂ້າພະເຈົ້າ ແລະ ມີຄວາມສຳຄັນຫລາຍສຳລັບວັນເວລາຂອງເຮົາ. ມັນເຕືອນໃຈຂ້າພະເຈົ້າເຖິງການສິດສອນຂອງພຣະອົງຕໍ່ສານຸສິດຂອງພຣະອົງ ລະຫວ່າງການປະຕິບັດສາດສະໜາກິດໃນຊ່ວງມະຕະຂອງພຣະອົງ.
ກ່ອນການຮັບທຸກທໍລະມານຂອງພຣະຄຣິດຢູ່ທີ່ສວນເຄັດເຊມາເນ ແລະ ການຄຶງເທິງໄມ້ກາງແຂນ, ພຣະອົງໄດ້ບັນຊາອັກຄະສາວົກຂອງພຣະອົງວ່າ “ຈົ່ງຮັກຊຶ່ງກັນແລະກັນ; ເຮົາຮັກພວກເຈົ້າຢ່າງໃດ ພວກເຈົ້າກໍຈົ່ງຮັກຊຶ່ງກັນແລະກັນຢ່າງນັ້ນ”7 ແລະ ຕໍ່ຈາກນັ້ນໄດ້ປອບໂຍນ ພວກເພິ່ນດ້ວຍພຣະຄຳເຫລົ່ານີ້ວ່າ “ເຮົາມອບສັນຕິສຸກໄວ້ກັບພວກເຈົ້າ ເປັນສັນຕິສຸກຂອງເຮົາ ທີ່ເຮົາມອບໃຫ້ພວກເຈົ້າ, ສັນຕິສຸກທີ່ເຮົາໃຫ້ນັ້ນ ບໍ່ເໝືອນສັນຕິສຸກທີ່ໂລກໃຫ້. ຢ່າວຸ້ນວາຍເປັນທຸກໃຈ, ແລະ ຢ່າສູ່ຢ້ານ.”8
ພຣະນາມໜຶ່ງທີ່ທະນຸຖະໜອມທີ່ສຸດຂອງພຣະຜູ້ເປັນເຈົ້າ ແລະ ພຣະຜູ້ຊ່ວຍໃຫ້ລອດຂອງເຮົາ, ພຣະເຢຊູຄຣິດແມ່ນ, “ອົງສັນຕິລາດ.”9 ໃນທີ່ສຸດ ອານາຈັກຂອງພຣະອົງຈະຖືກສະຖາປະນາຂຶ້ນ ລວມທັງສັນຕິສຸກ ແລະ ຄວາມຮັກ.10 ພວກເຮົາລໍຖ້າການປົກຄອງໃນຊ່ວງພັນປີຂອງພຣະເມຊີອາ.
ເຖິງແມ່ນວ່າພາບນິມິດນີ້ໃຫ້ເຫັນວ່າຈະມີການປົກຄອງເປັນເວລາພັນປີ, ເຮົາກໍຮູ້ວ່າ ສັນຕິສຸກ ແລະ ຄວາມປອງດອງຕະຫລອດທົ່ວໂລກ ກໍບໍ່ໄດ້ແຜ່ຜາຍອອກໄປຫລາຍໃນວັນເວລາຂອງເຮົາ.11 ໃນຊີວິດຂອງຂ້າພະເຈົ້າ, ຂ້າພະເຈົ້າບໍ່ເຄີຍເຫັນການຂາດຄວາມສຸພາບຫລາຍຂະໜາດນີ້. ເຮົາຖືກໂຈມຕີດ້ວຍຄວາມໂມໂຫຮ້າຍ, ຄຳວາຈາທີ່ຂັດແຍ້ງ ແລະ ຍຸຍົງ, ການກະທຳອັນຮ້າຍກາດທີ່ທຳລາຍສັນຕິສຸກ ແລະ ຄວາມສະຫງົບ.
ສັນຕິສຸກຢູ່ໃນໂລກ ບໍ່ໄດ້ຖືກສັນຍາໄວ້ ຫລື ຮັບຮອງຈົນກວ່າການສະເດັດມາຄັ້ງທີສອງຂອງພຣະເຢຊູຄຣິດ. ພຣະຜູ້ຊ່ວຍໃຫ້ລອດໄດ້ສິດສອນອັກຄະສາວົກສິບສອງວ່າ ພາລະກິດຂອງພຣະອົງຢູ່ເທິງໂລກຈະບໍ່ໄດ້ບັນລຸເຖິງສັນຕິສຸກຕະຫລອດທົ່ວໂລກ. ພຣະອົງໄດ້ສິດສອນວ່າ, “ຢ່າຄິດວ່າເຮົານຳຄວາມສະຫງົບສຸກມາສູ່ໂລກ.”12 ສັນຕິສຸກຕະຫລອດທົ່ວໂລກບໍ່ໄດ້ເປັນພາກສ່ວນຂອງການປະຕິບັດສາດສະໜາກິດຕົ້ນຕໍຂອງພຣະອົງຢູ່ເທິງໂລກ. ບໍ່ມີສັນຕິສຸກຕະຫລອດທົ່ວໂລກໃນວັນເວລານີ້.
ເຖິງຢ່າງໃດກໍຕາມ, ຈະສາມາດບັນລຸເຖິງສັນຕິສຸກ ສ່ວນຕົວ ໄດ້ເຖິງແມ່ນວ່າຈະມີຄວາມໂມໂຫຮ້າຍ, ການຂັດແຍ້ງ, ແລະ ການແບ່ງແຍກທີ່ທຳລາຍ ແລະ ເຮັດໃຫ້ໂລກຂອງເຮົາເສື່ອມໂຊມ. ບໍ່ມີຊ່ວງເວລາທີ່ສຳຄັນຫລາຍກວ່ານີ້ ທີ່ຈະສະແຫວງຫາສັນຕິສຸກສ່ວນຕົວ. ເພງສວດທີ່ສວຍງາມ ແລະ ເປັນທີ່ໂປດປານເພງໜຶ່ງ ທີ່ຖືກແຕ່ງຂຶ້ນມາສຳລັບຊາວໜຸ່ມໃນວັນເວລານີ້ ໂດຍ ບຣາເດີ ນິກ ເດ ມີຊື່ວ່າ “Peace in Christ [ສັນຕິສຸກໃນພຣະຄຣິດ]” ປະກາດວ່າ, “ເມື່ອບໍ່ມີສັນຕິສຸກໃນໂລກ, ມີສັນຕິສຸກໃນພຣະຄຣິດ.”13 ເຮົາໄດ້ຮັບພອນທີ່ມີເພງສວດນີ້ກ່ອນທີ່ມີການລະບາດຂອງພະຍາດໂຄວິດ-19 ຕະລອດທົ່ວໂລກ.
ເພງສວດນີ້ສະທ້ອນໃຫ້ເຫັນຄວາມປາດຖະໜາສັນຕິສຸກໃນຮູບແບບທີ່ສວຍງາມ ແລະ ເນັ້ນຢ່າງຖືກຕ້ອງວ່າ ສັນຕິສຸກນັ້ນຖືກສ້າງຕັ້ງຂຶ້ນຢ່າງໝັ້ນຄົງໃນພຣະຊົນຊີບ ແລະ ພາລະກິດຂອງພຣະເຢຊູຄຣິດ. ປະທານໂຈເຊັບ ແອັຟ ສະມິດ ໄດ້ປະກາດວ່າ, “ວິນຍານແຫ່ງສັນຕິສຸກ ແລະ ຄວາມຮັກນັ້ນຈະມາສູ່ໂລກບໍ່ໄດ້ … ຈົນກວ່າມະນຸດຊາດຈະຮັບເອົາຄວາມຈິງຂອງພຣະເຈົ້າ ແລະ ຂ່າວສານຂອງພຣະເຈົ້າ … ແລະ ຮັບຮູ້ຄວາມຮູ້ ແລະ ສິດອຳນາດຂອງພຣະອົງ ຊຶ່ງມາຈາກສະຫວັນ.”14
ເຖິງແມ່ນວ່າເຮົາຈະບໍ່ເຊົາພະຍາຍາມທີ່ຈະບັນລຸສັນຕິສຸກຕະຫລອດທົ່ວໂລກ, ແຕ່ເຮົາໄດ້ຖືກຮັບຮອງວ່າ ເຮົາຈະສາມາດມີສັນຕິສຸກສ່ວນຕົວ, ດັ່ງທີ່ພຣະຄຣິດສິດສອນ. ຫລັກທຳນີ້ຖືກກຳນົດຢູ່ໃນ ຄຳສອນ ແລະ ພັນທະສັນຍາ ວ່າ: “ແຕ່ຈົ່ງຮຽນຮູ້ວ່າ ຄົນທີ່ເຮັດວຽກງານແຫ່ງຄວາມຊອບທຳຈະໄດ້ຮັບລາງວັນຂອງເຂົາ, ແມ່ນແຕ່ສັນຕິສຸກໃນໂລກນີ້, ແລະ ຊີວິດນິລັນດອນໃນໂລກທີ່ຈະມາເຖິງ.”15
ແມ່ນຫຍັງຄື “ວຽກງານແຫ່ງຄວາມຊອບທຳ” ບາງຢ່າງທີ່ຈະຊ່ວຍເຮົາຮັບມືກັບການໂຕ້ຖຽງ ແລະ ລົດຜ່ອນການຂັດແຍ້ງ ແລະ ພົບເຫັນສັນຕິສຸກຢູ່ໃນໂລກນີ້? ຄຳສອນທັງໝົດຂອງພຣະຄຣິດກໍຊີ້ໄປຫາທິດທາງນີ້. ຂ້າພະເຈົ້າຈະກ່າວເຖິງສີ່ຫ້າຢ່າງທີ່ຂ້າພະເຈົ້າເຊື່ອວ່າສຳຄັນເປັນພິເສດ.
ໜຶ່ງ: ຮັກພຣະເຈົ້າ, ດຳລົງຊີວິດຕາມພຣະບັນຍັດຂອງພຣະອົງ, ແລະ ໃຫ້ອະໄພທຸກຄົນ
ປະທານຈອດ ອາວເບີດ ສະມິດ ໄດ້ກາຍເປັນປະທານຂອງສາດສະໜາຈັກໃນປີ 1945. ຕະຫລອດຊີວິດຂອງເພິ່ນ ເພິ່ນໄດ້ເປັນທີ່ຮູ້ຈັກກັນໃນຖານະອັກຄະສາວົກຄົນໜຶ່ງວ່າ ເປັນຜູ້ນຳທີ່ຮັກສັນຕິສຸກ. ໃນເວລາ 15 ປີກ່ອນເພິ່ນໄດ້ເປັນປະທານ, ການທ້າທາຍ ແລະ ການທົດລອງເລື່ອງເສດຖະກິດຕົກຕ່ຳຄັ້ງຍິ່ງໃຫຍ່ຕະຫລອດທົ່ວໂລກ, ຕິດຕາມດ້ວຍຄວາມຕາຍ ແລະ ການທຳລາຍຂອງສົງຄາມໂລກຄັ້ງທີສອງ, ໄດ້ເປັນຊ່ວງເວລາແຫ່ງການຂັດແຍ້ງຫລາຍທີ່ສຸດ.
ຕອນສົງຄາມໂລກຄັ້ງທີສອງໄດ້ສິ້ນສຸດລົງ, ລະຫວ່າງກອງປະຊຸມໃຫຍ່ສາມັນຄັ້ງທຳອິດຂອງເພິ່ນໃນຖານະປະທານ ໃນເດືອນຕຸລາ 1945, ປະທານສະມິດໄດ້ເຕືອນໄພ່ພົນເຖິງການເຊື້ອເຊີນຂອງພຣະຜູ້ຊ່ວຍໃຫ້ລອດ ທີ່ໃຫ້ຮັກເພື່ອນບ້ານ ແລະ ໃຫ້ອະໄພສັດຕູຂອງເຂົາເຈົ້າ ແລະ ແລ້ວໄດ້ສິດສອນວ່າ “ນັ້ນເປັນທັດສະນະຄະຕິທີ່ໄພ່ພົນຍຸກສຸດທ້າຍທຸກຄົນຄວນສະແຫວງຫາ ຖ້າຫາກເຂົາເຈົ້າຫວັງໃນມື້ໜຶ່ງ ທີ່ຈະຢືນຢູ່ໃນທີ່ປະທັບຂອງພຣະອົງ ແລະ ຮັບ ເອົາການຕ້ອນຮັບກັບບ້ານທີ່ຮຸ່ງໂລດຈາກພຣະອົງ.”16
ສອງ: ສະແຫວງຫາຜົນຂອງພຣະວິນຍານ
ອັກຄະສາວົກໂປໂລ ໃນສານຂອງເພິ່ນເຖິງຊາວຄາລາເຕຍ ກຳນົດຄວາມແຕກຕ່າງລະຫວ່າງວຽກງານແຫ່ງຄວາມຊອບທຳທີ່ເຮັດໃຫ້ເຮົາເໝາະສົມທີ່ຈະໄດ້ຮັບອານາຈັກຂອງພຣະເຈົ້າເປັນມໍລະດົກ ແລະ ວຽກງານທີ່ສາມາດເຮັດໃຫ້ເຮົາບໍ່ເໝາະສົມຈະໄດ້ຮັບ, ປາດສະຈາກການກັບໃຈ. ໃນບັນດາສິ່ງທີ່ເຮັດໃຫ້ເຮົາເໝາະສົມຈະໄດ້ຮັບແມ່ນຜົນຂອງພຣະວິນຍານແຫ່ງ “ຄວາມຮັກ, ຄວາມຊົມຊື່ນຍິນດີ, ສັນຕິສຸກ, ຄວາມອົດທົນດົນນານ, ຄວາມເມດຕາປານີ, ຄວາມດີ, [ສັດທາ], ຄວາມສຸພາບອ່ອນຫວານ, [ແລະ] ການຮູ້ຈັກບັງຄັບຕົນ.”17 ໂປໂລຍັງລວມທັງການຊ່ວຍຮັບພາລະໜັກຂອງກັນແລະກັນ ແລະ ບໍ່ອິດເມື່ອຍໃນການເຮັດດີ.18 ໃນບັນດາວຽກງານທີ່ບໍ່ຊອບທຳ ເພິ່ນລວມທັງຄວາມກຽດຊັງ, ຄວາມໂມໂຫ, ແລະ ການຜິດຖຽງກັນ.19
ບົດຮຽນທີ່ຍິ່ງໃຫຍ່ບົດໜຶ່ງຢູ່ໃນສະໄໝພຣະຄຳພີເດີມແມ່ນກ່ຽວກັບບິດາອັບຣາຮາມ. ອັບຣາຮາມ ແລະ ໂລດ, ຫລານຊາຍຂອງເພິ່ນ, ເປັນຄົນຮັ່ງມີແຕ່ໄດ້ພົບເຫັນວ່າເຂົາເຈົ້າອາໄສຢູ່ນຳກັນບໍ່ໄດ້. ເພື່ອຈະກຳຈັດການຜິດຖຽງກັນ, ອັບຣາຮາມໄດ້ປ່ອຍໃຫ້ໂລດເລືອກເອົາແຜ່ນດິນທີ່ລາວຢາກໄດ້. ໂລດໄດ້ເລືອກເອົາທົ່ງຮາບພຽງຂອງແມ່ນ້ຳຈໍແດນ, ຊຶ່ງທັງມີນ້ຳຫລາຍ ແລະ ສວຍງາມ. ອັບຣາຮາມໄດ້ເລືອກເອົາດິນແດນທີ່ອຸດົມສົມບູນໜ້ອຍກວ່າຂອງທົ່ງຮາບພຽງຂອງມຳເຣ. ແລ້ວພຣະຄຳພີໄດ້ກ່າວວ່າ ອັບຣາຮາມ ໄດ້ຕັ້ງທີ່ພັກຂອງເພິ່ນ ແລະ ໄດ້ສ້າງ “ແທ່ນບູຊາຖວາຍແກ່ພຣະເຈົ້າ.”20 ກົງກັນຂ້າມ, ໂລດໄດ້, “ຕັ້ງຖິ່ນຖານຢູ່ທ່າມກາງເມືອງຕ່າງໆ ໃນທົ່ງຮາບພຽງໃກ້ກັບເມືອງໂຊໂດມ.”21 ເພື່ອຈະມີຄວາມສຳພັນທີ່ສະຫງົບ, ບົດຮຽນກໍແຈ່ມແຈ້ງ: ເຮົາຄວນເຕັມໃຈທີ່ຈະປະນີປະນອມ ແລະ ກຳຈັດການຜິດຖຽງກັນໃນເລື່ອງທີ່ບໍ່ກ່ຽວກັບຄວາມຊອບທຳ. ດັ່ງທີ່ກະສັດເບັນຢາມິນໄດ້ສິດສອນວ່າ, “ພວກທ່ານຈະບໍ່ມີຈິດໃຈທີ່ຈະເຮັດສິ່ງອັນຕະລາຍໃຫ້ຊຶ່ງກັນແລະກັນ, ແຕ່ຈະຢູ່ນຳກັນ ຢ່າງສັນຕິ.”22 ແຕ່ໃນເລື່ອງການປະພຶດທີ່ກ່ຽວກັບຄວາມຊອບທຳ ແລະ ຂໍ້ຄຳສັ່ງຂອງຄຳສອນ, ເຮົາຕ້ອງຄົງຢູ່ຢ່າງໝັ້ນຄົງ ແລະ ແນ່ວແນ່.
ຖ້າຫາກເຮົາຢາກມີສັນຕິສຸກ ຊຶ່ງເປັນລາງວັນຂອງວຽກງານແຫ່ງຄວາມຊອບທຳ, ເຮົາຈະ ບໍ່ ຕັ້ງຖິ່ນຖານຂອງເຮົາໃຫ້ຢູ່ໃກ້ໂລກ. ເຮົາຈະຕັ້ງຖິ່ນຖານຂອງເຮົາໃຫ້ຢູ່ໃກ້ພຣະວິຫານ.
ສາມ: ໃຊ້ອຳເພີໃຈເພື່ອເລືອກຄວາມຊອບທຳ
ສັນຕິສຸກ ແລະ ອຳເພີໃຈຜູກພັນກັນເປັນອົງປະກອບທີ່ຈຳເປັນຂອງແຜນແຫ່ງຄວາມລອດ. ດັ່ງທີ່ຖືກບັນຍາຍຢູ່ໃນບົດຄວາມຫົວຂໍ້ພຣະກິດຕິຄຸນ “ອຳເພີໃຈ ແລະ ຄວາມຮັບຜິດຊອບ,” “ອຳເພີໃຈຄືຄວາມສາມາດ ແລະ ສິດທິພິເສດທີ່ພຣະເຈົ້າປະທານໃຫ້ເຮົາ ເພື່ອໃຫ້ເລືອກ ແລະ ກະທຳເພື່ອຕົວເຮົາເອງ.”23 ດັ່ງນັ້ນ, ອຳເພີໃຈຈຶ່ງເປັນພາກສ່ວນທີ່ສຳຄັນທີ່ສຸດຂອງການເຕີບໂຕ ແລະ ປະສົບການສ່ວນຕົວທີ່ເປັນພອນໃຫ້ແກ່ເຮົາ ຂະນະທີ່ເຮົາຕິດຕາມພຣະຜູ້ຊ່ວຍໃຫ້ລອດ.24
ອຳເພີໃຈໄດ້ເປັນບັນຫາຕົ້ນຕໍໃນສະພາກ່ອນເກີດໃນສະຫວັນ ແລະ ການຂັດແຍ້ງລະຫວ່າງຜູ້ທີ່ເລືອກຈະຕິດຕາມພຣະຄຣິດ ແລະ ຜູ້ຕິດຕາມຊາຕານ.25 ການປ່ອຍປະຄວາມທະນົງຕົວ ແລະ ການຄວບຄຸມ ແລະ ການເລືອກພຣະຜູ້ຊ່ວຍໃຫ້ລອດຈະອະນຸຍາດໃຫ້ເຮົາມີຄວາມສະຫວ່າງຂອງພຣະອົງ ແລະ ສັນຕິສຸກຂອງພຣະອົງ. ແຕ່ສັນຕິສຸກສ່ວນຕົວຈະຖືກທ້າທາຍເມື່ອຜູ້ຄົນນຳໃຊ້ອຳເພີໃຈຂອງເຂົາເຈົ້າໃນວິທີທາງທີ່ອັນຕະລາຍ ແລະ ເຈັບປວດ.
ຂ້າພະເຈົ້າໝັ້ນໃຈວ່າ ການຮັບປະກັນສັນຕິສຸກທີ່ເຮົາໄດ້ຮູ້ສຶກໃນຫົວໃຈຂອງເຮົາຖືກເຮັດໃຫ້ເຂັ້ມແຂງຂຶ້ນ ໂດຍຄວາມຮູ້ທີ່ເຮົາໄດ້ມີ ເຖິງສິ່ງທີ່ພຣະຜູ້ຊ່ວຍໃຫ້ລອດຂອງໂລກຈະສຳເລັດເພື່ອເຮົາ. ສິ່ງນີ້ກໍຖືກຂຽນໄວ້ຢ່າງສວຍງາມຢູ່ໃນປຶ້ມ ຈົ່ງສອນພຣະກິດຕິຄຸນຂອງເຮົາ: “ຂະນະທີ່ເຮົາເພິ່ງພາການຊົດໃຊ້ຂອງພຣະເຢຊູຄຣິດ, ພຣະອົງສາມາດຊ່ວຍເຮົາໃຫ້ອົດທົນຕໍ່ການທົດລອງ, ຄວາມເຈັບປ່ວຍ, ແລະ ຄວາມເຈັບປວດຂອງເຮົາ. ເຮົາສາມາດເຕັມໄປດ້ວຍຄວາມສຸກ, ຄວາມສະຫງົບ, ແລະ ການປອບໂຍນ. ທຸກສິ່ງທຸກຢ່າງທີ່ບໍ່ຍຸດຕິທຳໃນຊີວິດສາມາດຖືກແກ້ໄຂໃຫ້ຖືກຕ້ອງໄດ້ ຜ່ານທາງການຊົດໃຊ້ຂອງພຣະເຢຊູຄຣິດ.”26
ສີ່: ສ້າງຊີໂອນຢູ່ໃນຫົວໃຈ ແລະ ບ້ານເຮືອນຂອງເຮົາ
ເຮົາເປັນລູກຂອງພຣະເຈົ້າ ແລະ ພາກສ່ວນຂອງຄອບຄົວຂອງພຣະອົງ. ເຮົາຍັງເປັນພາກສ່ວນຂອງຄອບຄົວທີ່ເຮົາໄດ້ມາເກີດນຳອີກ. ສະຖາບັນຄອບຄົວເປັນພື້ນຖານສຳລັບຄວາມສຸກ ແລະ ສັນຕິສຸກ. ປະທານຣະໂຊ ເອັມ ແນວສັນ ໄດ້ສິດສອນເຮົາ—ແລະ ລະຫວ່າງການແຜ່ລະບາດນີ້ ເຮົາໄດ້ຮຽນຮູ້—ວ່າການປະຕິບັດທາງດ້ານສາດສະໜາໂດຍການເຮັດໃຫ້ບ້ານເຮືອນເປັນສູນກາງ, ໂດຍມີສາດສະໜາຈັກສະໜັບສະໜູນ ສາມາດ “ປ່ອຍພະລັງຂອງຄອບຄົວອອກໄປ … ເພື່ອປ່ຽນບ້ານເຮືອນ [ຂອງເຮົາ] ໃຫ້ເປັນສະຖານທີ່ສັກສິດແຫ່ງສັດທາ.”27 ຖ້າຫາກເຮົາມີການປະຕິບັດທາງດ້ານສາດສະໜາແບບນີ້ໃນບ້ານເຮືອນຂອງເຮົາ, ເຮົາຈະມີສັນຕິສຸກຂອງພຣະຜູ້ຊ່ວຍໃຫ້ລອດນຳອີກ.28 ເຮົາຮັບຮູ້ໄດ້ວ່າພວກທ່ານຫລາຍຄົນບໍ່ມີພອນຂອງບ້ານເຮືອນທີ່ຊອບທຳ ແລະ ຕໍ່ສູ້ເປັນປົກກະຕິກັບຜູ້ຄົນທີ່ເລືອກຄວາມບໍ່ຊອບທຳ. ພຣະຜູ້ຊ່ວຍໃຫ້ລອດສາມາດໃຫ້ການປົກປ້ອງ ແລະ ສັນຕິສຸກ ເພື່ອວ່າ ໃນທີ່ສຸດຈະນຳພາທ່ານໄປສູ່ຄວາມປອດໄພ ແລະ ທີ່ພັກອາໄສຈາກມໍລະສຸມຊີວິດ.
ຂ້າພະເຈົ້າຮັບຮອງທ່ານວ່າ ຄວາມຊື່ນຊົມ, ຄວາມຮັກ, ແລະ ຄວາມສຳເລັດທີ່ໄດ້ມີຢູ່ໃນຄອບຄົວທີ່ຊອບທຳ ແລະ ຮັກຫອມຈະສ້າງທັງສັນຕິສຸກ ແລະ ຄວາມສຸກ. ຄວາມຮັກ ແລະ ຄວາມເມດຕາເປັນສູນກາງຂອງການມີຊີໂອນຢູ່ໃນຫົວໃຈ ແລະ ບ້ານເຮືອນຂອງເຮົາ.29
ຫ້າ: ຕິດຕາມຄຳແນະນຳໃນປະຈຸບັນຂອງສາດສະດາຂອງເຮົາ
ສັນຕິສຸກຂອງເຮົາຈະເພີ່ມທະວີຂຶ້ນຫລາຍ ເມື່ອເຮົາຕິດຕາມສາດສະດາຂອງພຣະຜູ້ເປັນເຈົ້າ, ປະທານຣະໂຊ ເອັມ ແນວສັນ. ອີກຈັກໜ້ອຍເຮົາກໍຈະມີໂອກາດໄດ້ຍິນຈາກເພິ່ນ. ເພິ່ນຖືກກະກຽມໄວ້ຕັ້ງແຕ່ການວາງຮາກຖານຂອງໂລກສຳລັບການເອີ້ນນີ້. ການກະກຽມສ່ວນຕົວຂອງເພິ່ນກໍໄດ້ເປັນເລື່ອງທີ່ອັດສະຈັນ.30
ເພິ່ນໄດ້ສິດສອນເຮົາວ່າ ເຮົາສາມາດ “ຮູ້ສຶກເຖິງຄວາມສະຫງົບ ແລະ ຄວາມສຸກໄດ້ດົນນານ, ແມ່ນແຕ່ໃນຊ່ວງເວລາທີ່ປັ່ນປ່ວນນີ້,” ຂະນະທີ່ເຮົາພະຍາຍາມກາຍເປັນເໝືອນດັ່ງພຣະຜູ້ຊ່ວຍໃຫ້ລອດຂອງເຮົາ, ພຣະເຢຊູຄຣິດ.31 ພຣະອົງແນະນຳເຮົາໃຫ້ “ກັບໃຈທຸກວັນ” ຮັບເອົາ “ການຊຳລະລ້າງ, ການປິ່ນປົວ, ແລະ ການເສີມພະລັງ” ຂອງພຣະຜູ້ເປັນເຈົ້າ.32 ຂ້າພະເຈົ້າເປັນພະຍານສ່ວນຕົວວ່າ ສາດສະດາທີ່ຮັກແພງຂອງເຮົາໄດ້ຮັບ ແລະ ຈະສືບຕໍ່ໄດ້ຮັບການເປີດເຜີຍຈາກສະຫວັນ.
ຂະນະທີ່ເຮົາໃຫ້ກຽດ ແລະ ສະໜັບສະໜູນເພິ່ນໃນຖານະສາດສະດາຂອງເຮົາ, ເຮົານະມັດສະການພຣະບິດາເທິງສະຫວັນ ແລະ ພຣະຜູ້ຊ່ວຍໃຫ້ລອດຂອງເຮົາ, ພຣະເຢຊູຄຣິດ. ເຮົາໄດ້ຮັບການປະຕິບັດສາດສະໜາກິດຈາກພຣະວິນຍານບໍລິສຸດ.
ຂ້າພະເຈົ້າເປັນພະຍານ ແລະ ໃຫ້ການເປັນພະຍານສ່ວນຕົວຂອງອັກຄະສາວົກວ່າ ພຣະເຢຊູຄຣິດ, ພຣະຜູ້ຊ່ວຍໃຫ້ລອດ ແລະ ພຣະຜູ້ໄຖ່ຂອງໂລກ, ນຳພາ ແລະ ຊີ້ນຳສາດສະໜາຈັກທີ່ຟື້ນຟູຂອງພຣະອົງ. ພຣະຊົນຊີບ ແລະ ພາລະກິດແຫ່ງການຊົດໃຊ້ຂອງພຣະອົງເປັນແຫລ່ງທີ່ແທ້ຈິງແຫ່ງສັນຕິສຸກ. ພຣະອົງເປັນອົງສັນຕິລາດ. ຂ້າພະເຈົ້າສະແດງພະຍານທີ່ແນ່ນອນ ແລະ ຈິງຈັງຂອງຂ້າພະເຈົ້າວ່າ ພຣະອົງຊົງພຣະຊົນ. ໃນພຣະນາມຂອງພຣະເຢຊູຄຣິດ, ອາແມນ.