ຈົ່ງຍົກຄວາມສະຫວ່າງຂອງທ່ານຂຶ້ນ

ໂດຍ ແອວເດີ ມາກັສ ບີ ແນຊ໌

ແຫ່ງສາວົກເຈັດສິບ

ຄຳເຊື້ອເຊີນຂອງຂ້າພະເຈົ້າໃນມື້ນີ້ກໍລຽບງ່າຍ: ຈົ່ງແບ່ງປັນພຣະກິດຕິຄຸນ. ຈົ່ງເປັນຕົວທ່ານເອງ ແລະ ຍົກຄວາມສະຫວ່າງຂອງທ່ານຂຶ້ນ.

ຂະນະທີ່ນັ່ງຍົນໄປປະເທດເປຣູສອງສາມປີກ່ອນ, ຂ້າພະເຈົ້າໄດ້ນັ່ງໃກ້ຜູ້ຊາຍຄົນໜຶ່ງທີ່ບໍ່ເຊື່ອວ່າມີພຣະເຈົ້າ. ລາວໄດ້ຖາມຂ້າພະເຈົ້າວ່າເປັນຫຍັງຂ້າພະເຈົ້າຈຶ່ງເຊື່ອໃນພຣະເຈົ້າ. ໃນລະຫວ່າງການສົນທະນາທີ່ມ່ວນຊື່ນຂອງພວກເຮົາ, ຂ້າພະເຈົ້າໄດ້ບອກລາວວ່າ ຂ້າພະເຈົ້າເຊື່ອໃນພຣະເຈົ້າ ເພາະວ່າໂຈເຊັບ ສະມິດ ໄດ້ເຫັນພຣະອົງ—ແລະ ຂ້າພະເຈົ້າໄດ້ເວົ້າຕື່ມວ່າ ຄວາມຮູ້ຂອງຂ້າພະເຈົ້າເຖິງພຣະເຈົ້າກໍໄດ້ມາຈາກປະສົບການສ່ວນຕົວທີ່ເປັນຈິງທາງວິນຍານນຳອີກ. ຂ້າພະເຈົ້າໄດ້ແບ່ງປັນຄວາມເຊື່ອຂອງຂ້າພະເຈົ້າກັບລາວວ່າ “ທຸກສິ່ງທຸກຢ່າງຊີ້ໃຫ້ເຫັນວ່າ ມັນມີພຣະເຈົ້າ”¹ ແລະ ໄດ້ຖາມລາວວ່າ ລາວເຊື່ອວ່າແຜ່ນດິນໂລກ—ບໍ່ນ້ຳແຫ່ງຊີວິດຢູ່ໃນຊ່ອງວ່າງໃນອາກາດ—ເປັນມາໄດ້ແນວໃດ. ລາວໄດ້ຕອບ, ໃນຖ້ອຍຄຳຂອງລາວເອງວ່າ “ເພາະຄວາມບັງເອີນ” ອາດໄດ້ເກີດຂຶ້ນເມື່ອຫລາຍໆລ້ານປີກ່ອນ. ເມື່ອຂ້າພະເຈົ້າໄດ້ອະທິບາຍວ່າສິ່ງນັ້ນເປັນໄປບໍ່ໄດ້ ທີ່ “ຄວາມບັງເອີນ” ຈະຜະລິດສິ່ງທີ່ສວຍງາມ ແລະ ມີລະບຽບດັ່ງນີ້ໄດ້, ລາວກໍໄດ້ງຽບໄປຄາວໜຶ່ງ ແລະ ແລ້ວດ້ວຍຄວາມຕະຫລົກໄດ້ເວົ້າວ່າ, “ຂ້ອຍບໍ່ຮູ້ຄຳຕອບ.” ຂ້າພະເຈົ້າໄດ້ຖາມຖ້າຫາກວ່າລາວຈະອ່ານພຣະຄຳພີມໍມອນ. ລາວເວົ້າວ່າລາວຈະອ່ານ, ສະນັ້ນຂ້າພະເຈົ້າຈຶ່ງໄດ້ສົ່ງເຫລັ້ມໜຶ່ງໄປໃຫ້ລາວ.

ຫລາຍປີຕໍ່ມາ ຂ້າພະເຈົ້າໄດ້ຜູກມິດກັບເພື່ອນໃໝ່ຄົນໜຶ່ງຕອນຢູ່ໃນສະໜາມບິນທີ່ເມືອງລາໂກສ໌, ປະເທດນີເຊຣີ. ພວກເຮົາໄດ້ມາຮູ້ຈັກກັນຂະນະທີ່ລາວໄດ້ກວດເບິ່ງໜັງສືເດີນທາງຂອງຂ້າພະເຈົ້າ. ຂ້າພະເຈົ້າໄດ້ຖາມລາວເລື່ອງຄວາມເຊື່ອທາງສາດສະໜາ, ແລະ ລາວໄດ້ບອກວ່າ ລາວມີຄວາມເຊື່ອຫລາຍໃນພຣະເຈົ້າ. ຂ້າພະເຈົ້າໄດ້ແບ່ງປັນຄວາມຊື່ນຊົມ ແລະ ການມີຊີວິດຊີວາຂອງພຣະກິດຕິຄຸນທີ່ຟື້ນຟູຂອງພຣະເຢຊູຄຣິດ ແລະ ໄດ້ຖາມຖ້າຫາກວ່າລາວຢາກຮຽນຮູ້ຕື່ມອີກບໍຈາກຜູ້ສອນສາດສະໜາ. ລາວເວົ້າວ່າ ໂດຍ, ໄດ້ຮັບການສິດສອນ, ແລະ ໄດ້ຮັບບັບຕິສະມາ. ໜຶ່ງ ຫລື ສອງປີຕໍ່ຈາກນັ້ນ, ຂະນະທີ່ຂ້າພະເຈົ້າໄດ້ຍ່າງຜ່ານສະໜາມບິນຢູ່ທີ່ປະເທດລີເບເຣຍ, ຂ້າພະເຈົ້າໄດ້ຍິນຄົນເອີ້ນຊື່ຂ້າພະເຈົ້າ. ຂ້າພະເຈົ້າໄດ້ຫັນໄປເບິ່ງ, ແລະ ຊາຍໜຸ່ມຄົນດຽວກັນນັ້ນໄດ້ເຂົ້າມາຫາຂ້າພະເຈົ້າດ້ວຍຮອຍຍິ້ມທີ່ເບີກບານ. ພວກເຮົາໄດ້ໂອບກອດກັນຢ່າງຊື່ນຊົມ ແລະ ລາວໄດ້ບອກຂ້າພະເຈົ້າວ່າລາວຍັງເຂັ້ມແຂງຢູ່ໃນສາດສະໜາຈັກ ແລະ ກຳລັງເຮັດວຽກກັບຜູ້ສອນສາດສະໜາເພື່ອສິດສອນແຟນຂອງລາວ.

ເວລານີ້, ຂ້າພະເຈົ້າບໍ່ຮູ້ຖ້າຫາກວ່າເພື່ອນຂອງຂ້າພະເຈົ້າທີ່ບໍ່ເຊື່ອວ່າມີພຣະເຈົ້າໄດ້ອ່ານພຣະຄຳພີມໍມອນ ຫລື ໄດ້ເຂົ້າຮ່ວມສາດສະໜາຈັກຫລືບໍ່. ເພື່ອນຄົນທີສອງຂອງຂ້າພະເຈົ້າໄດ້ເຂົ້າຮ່ວມ. ສຳລັບທັງສອງ, ໜ້າທີ່ຮັບຜິດຊອບຂອງຂ້າພະເຈົ້າ²—ໂອກາດຂອງຂ້າພະເຈົ້າ—ແມ່ນອັນດຽວກັນ: ຍົກຄວາມສະຫວ່າງຂອງພຣະກິດຕິຄຸນຂຶ້ນ—ທີ່ຈະຮັກ, ແບ່ງປັນ, ແລະ ເຊື້ອເຊີນແຕ່ລະຄົນ ໃນວິທີທາງແບບປົກກະຕິ ແລະ ທຳມະຊາດ.³

ອ້າຍເອື້ອຍນ້ອງທັງຫລາຍ, ຂ້າພະເຈົ້າໄດ້ປະສົບກັບພອນຂອງການແບ່ງປັນພຣະກິດຕິຄຸນ, ແລະ ມັນເປັນສິ່ງທີ່ປະເສີດແທ້ໆ. ຕໍ່ໄປນີ້ແມ່ນບາງຕົວຢ່າງ:

ການແບ່ງປັນພຣະກິດຕິຄຸນນຳຄວາມຊື່ນຊົມ ແລະ ຄວາມຫວັງມາໃຫ້.

ທ່ານເຫັນບໍ່ ແລະ ທ່ານ ແລະ ຂ້າພະເຈົ້າຮູ້ວ່າ ເຮົາໄດ້ມີຊີວິດຢູ່ໃນຖານະລູກໆຂອງພຣະບິດາເທິງສະຫວັນ ກ່ອນໄດ້ລົງມາສູ່ແຜ່ນດິນໂລກ⁴ ແລະ ວ່າແຜ່ນດິນໂລກໄດ້ຖືກສ້າງຂຶ້ນມາເພື່ອຈຸດປະສົງຂອງການມອບໂອກາດໃຫ້ແຕ່ລະຄົນ ໄດ້ຮັບຮ່າງກາຍ, ມີປະສົບການ, ຮຽນຮູ້, ແລະ ເຕີບໂຕເພື່ອວ່າຈະໄດ້ຮັບຊີວິດນິລັນດອນ—ຊຶ່ງຄືຊີວິດຂອງພຣະເຈົ້າ.⁵ ພຣະບິດາເທິງສະຫວັນຮູ້ວ່າເຮົາຈະທົນທຸກ ແລະ ເຮັດບາບຢູ່ເທິງໂລກ, ສະນັ້ນ ພຣະອົງຈຶ່ງໄດ້ສົ່ງພຣະບຸດຂອງພຣະອົງມາ, ຜູ້ຊຶ່ງ “ພຣະຊົນຊີບອັນຫາທີ່ປຽບບໍ່ໄດ້”⁶ ແລະ ການເສຍສະລະຊົດໃຊ້ອັນບໍ່ມີຂອບເຂດ⁷ ເຮັດໃຫ້ເປັນໄປໄດ້ສຳລັບເຮົາ ທີ່ຈະໄດ້ຮັບການໃຫ້ອະໄພ, ຖືກປິ່ນປົວ, ແລະ ເຮັດໃຫ້ຫາຍດີ.⁸

ການຮູ້ຄວາມຈິງເຫລົ່ານີ້ແມ່ນການປ່ຽນແປງຊີວິດ! ເມື່ອຄົນໜຶ່ງຮຽນຮູ້ຈຸດປະສົງທີ່ຮຸ່ງໂລດຂອງຊີວິດ, ມາເຂົ້າໃຈວ່າພຣະຄຣິດໃຫ້ອະໄພ ແລະ ຊ່ວຍເຫລືອຜູ້ຄົນທີ່ຕິດຕາມພຣະອົງ, ແລະ ແລ້ວເລືອກທີ່ຈະຕິດຕາມພຣະຄຣິດລົງໄປໃນນ້ຳແຫ່ງການບັບຕິສະມາ, ຊີວິດກໍປ່ຽນແປງໄປໃນທາງດີ—ແມ່ນແຕ່ເມື່ອສະຖານະການພາຍນອກຂອງຊີວິດນັ້ນບໍ່ປ່ຽນແປງກໍຕາມ.

ເອື້ອຍນ້ອງທີ່ຊື່ນບານຄົນໜຶ່ງທີ່ຂ້າພະເຈົ້າໄດ້ພົບໃນເມືອງໂອນິດສາ, ປະເທດນີເຊຣີ, ໄດ້ບອກຂ້າພະເຈົ້າວ່າ ນັບຕັ້ງແຕ່ນາງໄດ້ຮຽນຮູ້ພຣະກິດຕິຄຸນ ແລະ ໄດ້ຮັບບັບຕິສະມາ (ແລະ ບັດນີ້ ຂ້າພະເຈົ້າຈະໃຊ້ຄຳເວົ້າຂອງນາງເອງ), “ທຸກສິ່ງກໍດີສຳລັບຂ້ານ້ອຍ. ຂ້ານ້ອຍມີຄວາມສຸກ. ຂ້ານ້ອຍໄດ້ຢູ່ໃນສະຫວັນ.”⁹ ການແບ່ງປັນພຣະກິດຕິຄຸນສ່ອງແສງຄວາມຊື່ນຊົມ ແລະ ຄວາມຫວັງເຂົ້າໄປໃນຈິດວິນຍານຂອງທັງຜູ້ໃຫ້ ແລະ ຜູ້ຮັບ. ຈິງໆແລ້ວ “[ ທ່ານ] ຈະມີຄວາມຊື່ນຊົມຫລາຍພຽງໃດ”¹⁰ ຂະນະທີ່ທ່ານແບ່ງປັນພຣະກິດຕິຄຸນ! ການແບ່ງປັນພຣະກິດຕິຄຸນຄືຄວາມຊື່ນຊົມເພີ່ມຕື່ມໃສ່ຄວາມຊື່ນຊົມ, ຄວາມຫວັງເພີ່ມຕື່ມໃສ່ຄວາມຫວັງ.¹¹

ການແບ່ງປັນພຣະກິດຕິຄຸນນຳອຳນາດຂອງພຣະເຈົ້າມາສູ່ຊີວິດຂອງເຮົາ

ເມື່ອເຮົາຮັບບັບຕິສະມາ, ເຮົາແຕ່ລະຄົນໄດ້ເຂົ້າເຮັດ¹² ພັນທະສັນຍາອັນຕໍ່ເນື່ອງກັບພຣະເຈົ້າ ທີ່ “ຈະຮັບໃຊ້ພຣະອົງ ແລະ ຮັກສາພຣະບັນຍັດຂອງພຣະອົງ,”¹³ ຊຶ່ງຮ່ວມດ້ວຍ “ທີ່ຈະຢືນເປັນພະຍານເຖິງ [ພຣະອົງ] ໃນທຸກເວລາ ແລະ ໃນທຸກສິ່ງ, ແລະ ໃນທຸກບ່ອນ.”¹⁴ ເມື່ອເຮົາ “ເຂົ້າສະໜິດຢູ່ໃນ” ພຣະອົງໂດຍການຮັກສາພັນທະສັນຍານີ້, ແລ້ວອຳນາດແຫ່ງຄວາມເປັນເໝືອນພຣະເຈົ້າທີ່ມີຊີວິດຊີວາ, ຄ້ຳຈູນ, ແລະ ຊຳລະໃຫ້ບໍລິສຸດ ຈະຫລັ່ງໄຫລເຂົ້າມາໃນຊີວິດຂອງເຮົາຈາກພຣະຄຣິດ, ດັ່ງທີ່ງ່າໄດ້ຮັບການບຳລຸງລ້ຽງຈາກເຄືອ.¹⁵

ການແບ່ງປັນພຣະກິດຕິຄຸນປົກປ້ອງເຮົາຈາກການລໍ້ລວງ

ພຣະຜູ້ເປັນເຈົ້າບັນຊາວ່າ:

“ສະນັ້ນ ຈົ່ງຍົກຄວາມສະຫວ່າງຂອງເຈົ້າຂຶ້ນເພື່ອມັນຈະສ່ອງແສງໄປທົ່ວໂລກ. ຈົ່ງເບິ່ງ ເຮົາຄືຄວາມສະຫວ່າງຊຶ່ງເຈົ້າຈະຍົກຂຶ້ນ—ພ້ອມທັງສິ່ງທີ່ເຈົ້າໄດ້ເຫັນເຮົາກະທຳໄປນັ້ນ. …

“… ເຮົາໄດ້ສັ່ງ … ໃຫ້ເຈົ້າເຂົ້າມາຫາເຮົາ, ເພື່ອເຈົ້າຈະໄດ້ສຳພັດ ແລະ ເຫັນ; ເຖິງແມ່ນເຊັ່ນນັ້ນເຈົ້າຈົ່ງປະຕິບັດຕໍ່ໂລກ; ແລະ ຜູ້ໃດກໍຕາມທີ່ຝ່າຝືນບັນຍັດນີ້ ຜູ້ນັ້ນຈະຍອມໃຫ້ຕົນຖືກຊັກນຳໄປຫາການລໍ້ລວງ.”¹⁶

ການເລືອກທີ່ຈະບໍ່ຍົກຄວາມສະຫວ່າງຂອງພຣະກິດຕິຄຸນຂຶ້ນຈະນຳເຮົາໄປຢູ່ໃນຄວາມມືດ, ບ່ອນທີ່ເຮົາຈະຖືກລໍ້ລວງງ່າຍຂຶ້ນ. ສຳຄັນໄປກວ່ານັ້ນ, ສິ່ງກົງກັນຂ້າມກໍຈິງ: ການເລືອກຍົກຄວາມສະຫວ່າງຂອງພຣະກິດຕິຄຸນ ຈະນຳເຮົາໄປຢູ່ໃກ້ຄວາມສະຫວ່າງນັ້ນຢ່າງເຕັມທີ່ຫລາຍຂຶ້ນ ແລະ ການປົກປ້ອງ ທີ່ມັນມີໃຫ້ເພື່ອຕໍ່ຕ້ານການລໍ້ລວງ. ຊ່າງເປັນພອນຢ່າງເຫລືອລົ້ນແທ້ໆ ໃນໂລກທີ່ມືດມົນໃນປະຈຸບັນ!

ການແບ່ງປັນພຣະກິດຕິຄຸນນຳການປິ່ນປົວມາໃຫ້

ຊິດສະເຕີ ທິບຟານີ ມາຍໂລນ ໄດ້ຮັບເອົາການເຊື້ອເຊີນໃຫ້ສະໜັບສະໜູນຜູ້ສອນສາດສະໜາ ເຖິງແມ່ນຈະມີບັນຫາສ່ວນຕົວຢ່າງໜັກ, ລວມທັງຄຳຖາມກ່ຽວກັບສັດທາຂອງນາງກໍຕາມ. ເມື່ອບໍ່ດົນມານີ້ ນາງໄດ້ບອກຂ້າພະເຈົ້າວ່າ ການສະໜັບສະໜູນຜູ້ສອນສາດສະໜາໄດ້ຊ່ວຍໃຫ້ນາງມີສັດທາ ແລະ ມີສຸຂະພາບດີຂຶ້ນຄືນໃໝ່. ດ້ວຍຖ້ອຍຄຳຂອງນາງເອງວ່າ, “ວຽກງານເຜີຍແຜ່ເປັນການປິ່ນປົວທີ່ດີ.”¹⁷

ຄວາມຊື່ນຊົມ. ຄວາມຫວັງ. ອຳນາດທີ່ຍືນຍົງຈາກພຣະເຈົ້າ. ການປົກປ້ອງຈາກການລໍ້ລວງ. ການປິ່ນປົວ. ທັງໝົດນີ້—ແລະ ອີກຫລາຍຢ່າງ (ລວມທັງການໃຫ້ອະໄພບາບ)¹⁸—ຖອກເທຈາກສະຫວັນລົງເທິງເຮົາ ຂະນະທີ່ເຮົາແບ່ງປັນພຣະກິດຕິຄຸນ.

ບັດນີ້, ຈົ່ງຫັນໄປຫາໂອກາດທີ່ຍິ່ງໃຫຍ່ຂອງເຮົາ

ອ້າຍເອື້ອຍນ້ອງທັງຫລາຍ, “ມີຫລາຍຄົນໃນບັນດາສຳນັກ … [ກຸ່ມ,] ແລະ ນິກາຍທັງປວງ … ຜູ້ທີ່ຖືກກີດກັນຈາກຄວາມຈິງ ເພາະພວກເຂົາບໍ່ຮູ້ວ່າຈະຊອກຫາມັນໄດ້ຢູ່ບ່ອນໃດ.”¹⁹ ຄວາມຈຳເປັນທີ່ຈະຍົກຄວາມສະຫວ່າງຂອງເຮົາຂຶ້ນ ບໍ່ເຄີຍຈຳເປັນຫລາຍກວ່າໃນເວລານີ້ໃນປະຫວັດສາດຂອງມະນຸດທັງໝົດ. ແລະ ຄວາມຈິງບໍ່ເຄີຍເຂົ້າເຖິງໄດ້ຫລາຍກວ່ານີ້.

ທ້າວຈິມມີ ທອນ, ຜູ້ທີ່ໄດ້ເຕີບໃຫຍ່ຂຶ້ນເປັນຊາວພຸດ, ມີຄວາມປະທັບໃຈກັບຄອບຄົວໜຶ່ງທີ່ໄດ້ແບ່ງປັນຊີວິດຢູ່ໃນຢູທູບ. ເມື່ອລາວໄດ້ຮຽນຮູ້ວ່າເຂົາເຈົ້າເປັນສະມາຊິກຂອງສາດສະໜາຈັກຂອງພຣະເຢຊູຄຣິດແຫ່ງໄພ່ພົນຍຸກສຸດທ້າຍ, ລາວໄດ້ສຶກສາພຣະກິດຕິຄຸນທາງອອນລາຍດ້ວຍຕົວເອງ, ໄດ້ອ່ານພຣະຄຳພີມໍມອນໂດຍການໃຊ້ແອັບ, ແລະ ແລ້ວໄດ້ຮັບບັບຕິສະມາຫລັງຈາກໄດ້ພົບກັບຜູ້ສອນສາດສະໜາຕອນຢູ່ວິທະຍາໄລ.²⁰ ຕອນນີ້ ແອວເດີ ທອນ ກໍເປັນຜູ້ສອນສາດສະໜາເຕັມເວລາເອງແລ້ວ.

ລາວ ແລະ ເພື່ອນຜູ້ສອນສາດສະໜາຂອງລາວຕະຫລອດທົ່ວໂລກ, ກໍເປັນກອງທັບຂອງພຣະຜູ້ເປັນເຈົ້າ—ຕາມຄຳເວົ້າຂອງສາດສະດາຂອງເຮົາ.²¹ ຜູ້ສອນສາດສະໜາເຫລົ່ານີ້ກະທຳສິ່ງທີ່ແຕກຕ່າງຈາກແນວໂນ້ມຂອງໂລກ: ໃນເມື່ອການສຳຫລວດລາຍງານວ່າ ຄົນລຸ້ນ Gen Z [ເກີດລະຫວ່າງປີ 2000-2010] ກຳລັງຫັນ ໜີໄປ ຈາກພຣະເຈົ້າ,²² ນັກຮົບໜຸ່ມຂອງເຮົາ²³ ພວກແອວເດີ ແລະ ຊິດສະເຕີກຳລັງຫັນຜູ້ຄົນໃຫ້ ມາຫາ ພຣະເຈົ້າ. ແລະ ສະມາຊິກຂອງສາດສະໜາຈັກເປັນຈຳນວນຫລາຍເພີ່ມຂຶ້ນກໍກຳລັງຮ່ວມມືກັບຜູ້ສອນສາດສະໜາໃນການແບ່ງປັນພຣະກິດຕິຄຸນ, ຊ່ວຍເຫລືອໝູ່ເພື່ອນຫລາຍຄົນໃຫ້ມາຫາພຣະຄຣິດ ແລະ ສາດສະໜາຈັກຂອງພຣະອົງ.

ສະມາຊິກໄພ່ພົນຍຸກສຸດທ້າຍຂອງເຮົາໃນປະເທດລີເບເຣຍໄດ້ຊ່ວຍໝູ່ເພື່ອນຈຳນວນ 507 ຄົນລົງໄປໃນນ້ຳແຫ່ງການບັບຕິສະມາລະຫວ່າງ 10 ເດືອນທີ່ບໍ່ມີຜູ້ສອນສາດສະໜາເຕັມເວລາຮັບໃຊ້ຢູ່ໃນປະເທດຂອງເຂົາເຈົ້າ. ເມື່ອປະທານສະເຕກທີ່ດີເລີດຢູ່ທີ່ນັ້ນໄດ້ຍິນວ່າຜູ້ສອນສາດສະໜາເຕັມເວລາອາດຈະກັບຄືນມາ, ເພິ່ນໄດ້ກ່າວວ່າ: “ໂອ້ ດີຫລາຍ, ບັດນີ້ເຂົາເຈົ້າຈະສາມາດຊ່ວຍພວກເຮົາກັບວຽກງານ ຂອງພວກເຮົາ.”

ເພິ່ນເວົ້າຖືກ: ການເຕົ້າໂຮມອິດສະຣາເອນ—ອຸດົມການທີ່ຍິ່ງໃຫຍ່ທີ່ສຸດຢູ່ເທິງແຜ່ນດິນໂລກນີ້ກໍເປັນໜ້າທີ່ຮັບຜິດຊອບແຫ່ງພັນທະສັນຍາ²⁴—ຂອງເຮົາ. ແລະ ນີ້ກໍເປັນວັນເວລາ ຂອງເຮົາ! ຄຳເຊື້ອເຊີນຂອງຂ້າພະເຈົ້າໃນມື້ນີ້ກໍລຽບງ່າຍ: ຈົ່ງແບ່ງປັນພຣະກິດຕິຄຸນ. ຈົ່ງເປັນຕົວທ່ານເອງ ແລະ ຍົກຄວາມສະຫວ່າງຂຶ້ນ. ຈົ່ງອະທິຖານທູນຂໍຄວາມຊ່ວຍເຫລືອຈາກສະຫວັນ ແລະ ເຮັດຕາມການກະຕຸ້ນຂອງພຣະວິນຍານ. ຈົ່ງແບ່ງປັນຊີວິດຂອງທ່ານຢ່າງປົກກະຕິ ແລະ ທຳມະຊາດ; ເຊື້ອເຊີນຄົນອື່ນ ໃຫ້ມາເບິ່ງເອົາ, ໃຫ້ມາຊ່ວຍເຫລືອ, ແລະ ໃຫ້ມາຮ່ວມນຳ.²⁵ ແລະ ແລ້ວຈົ່ງຊື່ນຊົມເຖິດຂະນະທີ່ທ່ານ ແລະ ຜູ້ຄົນທີ່ທ່ານຮັກຮັບເອົາພອນທີ່ໄດ້ສັນຍາໄວ້.

ຂ້າພະເຈົ້າຮູ້ວ່າໃນພຣະຄຣິດ ຂ່າວປະເສີດເຫລົ່ານີ້ກໍຖືກສັ່ງສອນໃຫ້ແກ່ຜູ້ຄົນທີ່ອ່ອນນ້ອມ; ໃນພຣະຄຣິດ ຜູ້ຄົນທີ່ລະທົມໃຈ ແລະ ຊອກຊ້ຳຈະໄດ້ຮັບການປິ່ນປົວ; ໃນພຣະຄຣິດ ເສລີພາບຈະຖືກປະກາດແກ່ຊະເລີຍເສິກ; ແລະ ໃນພຣະຄຣິດ, ພຽງແຕ່ໃນພຣະຄຣິດເທົ່ານັ້ນ, ພວກທີ່ໄວ້ທຸກຈະໄດ້ຊົມຊື່ນຍິນດີແທນທີ່ຈະໂສກເສົ້າ.²⁶ ດັ່ງນັ້ນ ຈຶ່ງມີຄວາມຈຳເປັນຫລາຍພຽງໃດທີ່ຈະເຮັດໃຫ້ສິ່ງເຫລົ່ານີ້ເປັນທີ່ຮູ້ຈັກ!²⁷

ຂ້າພະເຈົ້າເປັນພະຍານວ່າ ພຣະເຢຊູຄຣິດເປັນພຣະຜູ້ສ້າງ ແລະ ເປັນຜູ້ເຮັດໃຫ້ສັດທາຂອງເຮົາສົມບູນ.²⁸ ພຣະອົງຈະເຮັດໃຫ້ສຳເລັດ, ພຣະອົງຈະເຮັດໃຫ້ສົມບູນ, ການໃຊ້ສັດທາຂອງເຮົາ—ເຖິງແມ່ນຈະບໍ່ສົມບູນແບບ ເທົ່າໃດກໍຕາມ—ໃນການຍົກຄວາມສະຫວ່າງຂອງພຣະກິດຕິຄຸນນັ້ນຂຶ້ນ. ພຣະອົງຈະເຮັດສິ່ງມະຫັດສະຈັນໃນຊີວິດຂອງເຮົາ ແລະ ໃນຊີວິດຂອງທຸກຄົນທັງປວງທີ່ພຣະອົງເຕົ້າໂຮມ, ເພາະພຣະອົງເປັນພຣະເຈົ້າແຫ່ງສິ່ງມະຫັດສະຈັນ.²⁹ ໃນພຣະນາມອັນມະຫັດສະຈັນຂອງພຣະເຢຊູຄຣິດ, ອາແມນ.