“ວັນທີ 2–8 ເດືອນທັນວາ: ‘ເພື່ອຮັກສາເຂົາຢູ່ໃນທາງທີ່ຖືກຕ້ອງ.’ ໂມໂຣໄນ 1–6,” ຈົ່ງຕາມເຮົາມາ—ສຳລັບບ້ານ ແລະ ໂບດ: ພຣະຄຳພີມໍມອນ 2024 (2023)
“ວັນທີ 2–8 ເດືອນທັນວາ. ໂມໂຣໄນ 1–6,” ຈົ່ງຕາມເຮົາມາ—ສຳລັບບ້ານ ແລະ ໂບດ: 2024 (2023)
ມິເນີວາ ໄທເກີດ (1888–1976), Alma Baptizes in the Waters of Mormon [ແອວມາໃຫ້ບັບຕິສະມາຢູ່ໃນນ້ຳມໍມອນ], 1949–1951, ສີນ້ຳມັນ ເທິງແຜ່ນໄມ້ອັດ, 35 7/8 × 48 ນິ້ວ. ຫໍພິພິດທະພັນສິລະປະຂອງມະຫາວິທະຍາໄລບຣິກຳ ຢັງ, 1969
ວັນທີ 2–8 ເດືອນທັນວາ: “ເພື່ອຮັກສາເຂົາຢູ່ໃນທາງທີ່ຖືກຕ້ອງ”
ໂມໂຣໄນ 1–6
ຫລັງຈາກໄດ້ສຳເລັດບັນທຶກຂອງບິດາຂອງເພິ່ນເລື່ອງຊາວນີໄຟແລ້ວ ແລະ ໄດ້ຫຍໍ້ບັນທຶກຂອງຊາວຢາເຣັດ, ໂມໂຣໄນໄດ້ຄິດວ່າ ການຮັກສາບັນທຶກຂອງເພິ່ນແມ່ນສຳເລັດຮຽບຮ້ອຍແລ້ວ (ເບິ່ງ ໂມໂຣໄນ 1:1). ມີຫຍັງອີກແດ່ທີ່ຈະເວົ້າກ່ຽວກັບສອງປະຊາຊາດນີ້ ທີ່ຖືກທຳລາຍຈົນໝົດສິ້ນ? ແຕ່ໂມໂຣໄນໄດ້ເຫັນວັນເວລາຂອງເຮົາ (ເບິ່ງ ມໍມອນ 8:35), ແລະ ເພິ່ນໄດ້ຮັບການດົນໃຈໃຫ້ “ຂຽນຕື່ມອີກເລັກນ້ອຍ, ເພື່ອບາງທີມັນອາດຈະມີຄຸນຄ່າ … ໃນມື້ໜຶ່ງຂ້າງໜ້າ” (ໂມໂຣໄນ 1:4). ເພິ່ນໄດ້ຮູ້ວ່າການປະຖິ້ມຄວາມເຊື່ອຢ່າງຫລວງຫລາຍຈະເກີດຂຶ້ນ, ຊຶ່ງຈະເກີດຄວາມສັບສົນກ່ຽວກັບພິທີການຂອງຖານະປະໂລຫິດ ແລະ ກ່ຽວກັບສາດສະໜາໂດຍທົ່ວໄປ. ສິ່ງນີ້ຈຶ່ງອາດເປັນເຫດຜົນທີ່ເພິ່ນໄດ້ໃຫ້ຄວາມແຈ່ມແຈ້ງຢ່າງລະອຽດກ່ຽວກັບສິນລະລຶກ, ການບັບຕິສະມາ, ການມອບຂອງປະທານແຫ່ງພຣະວິນຍານບໍລິສຸດ, ແລະ ພອນຂອງການເຕົ້າໂຮມກັບຜູ້ທີ່ເຊື່ອຖືດ້ວຍກັນ ໃຫ້ “ຮັກສາ [ກັນແລະກັນ] ຢູ່ໃນທາງທີ່ຖືກຕ້ອງ, … ໂດຍເພິ່ງອາໄສແຕ່ໃນພຣະຄຸນຄວາມດີຂອງພຣະຄຣິດຢ່າງດຽວ, ອົງຜູ້ເປັນຜູ້ສ້າງ ແລະ ເປັນຜູ້ເຮັດໃຫ້ສັດທາ [ຂອງເຮົາ] ສົມບູນ” (ໂມໂຣໄນ 6:4). ຄວາມຮູ້ອັນລ້ຳຄ່າແບບນີ້ໄດ້ໃຫ້ເຮົາມີເຫດຜົນທີ່ຈະຂອບພຣະຄຸນທີ່ພຣະຜູ້ເປັນເຈົ້າໄດ້ຮັກສາຊີວິດຂອງໂມໂຣໄນໄວ້ ເພື່ອວ່າເພິ່ນຈະໄດ້ “ຂຽນຕື່ມອີກເລັກນ້ອຍ” (ໂມໂຣໄນ 1:4).
ແນວຄິດສຳລັບການຮຽນຮູ້ຢູ່ທີ່ບ້ານ ແລະ ຢູ່ທີ່ໂບດ
ເຮົາສາມາດຕິດຕາມພຣະເຢຊູຄຣິດເຖິງແມ່ນຈະມີການຕໍ່ຕ້ານກໍຕາມ.
ຂະນະທີ່ທ່ານອ່ານ ໂມໂຣໄນ 1, ແມ່ນຫຍັງທີ່ດົນໃຈທ່ານກ່ຽວກັບຄວາມຊື່ສັດຂອງໂມໂຣໄນຕໍ່ພຣະຜູ້ເປັນເຈົ້າ ແລະ ຕໍ່ການເອີ້ນຂອງເພິ່ນ? ມີທາງໃດແດ່ທີ່ຜູ້ຄົນສາມາດ “ປະຕິເສດພຣະຄຣິດ”? (ໂມໂຣໄນ 1:2–3). ໃຫ້ໄຕ່ຕອງວິທີທີ່ທ່ານສາມາດສະແດງຄວາມຊື່ສັດຕໍ່ພຣະເຢຊູຄຣິດ, ແມ່ນແຕ່ເມື່ອທ່ານປະເຊີນກັບການທົດລອງ ແລະ ການຕໍ່ຕ້ານກໍຕາມ.
ພິທີການຂອງຖານະປະໂລຫິດຈະຕ້ອງຖືກປະຕິບັດຕາມທີ່ພຣະຜູ້ເປັນເຈົ້າບັນຊາ.
ໂມໂຣໄນໄດ້ປົບໜີເພື່ອເອົາຕົວລອດ ເມື່ອເພິ່ນໄດ້ຂຽນບົດເຫລົ່ານີ້ ເປັນຫຍັງເພິ່ນຈຶ່ງໄດ້ຂຽນກ່ຽວກັບລາຍລະອຽດຂອງການປະຕິບັດ ດັ່ງເຊັ່ນວິທີທີ່ຈະປະຕິບັດພິທີການແນວໃດ? ໃຫ້ໄຕ່ຕອງສິ່ງນີ້ຂະນະທີ່ທ່ານອ່ານ ໂມໂຣໄນ 2–6. ທ່ານຄິດວ່າເປັນຫຍັງລາຍລະອຽດເຫລົ່ານີ້ຈຶ່ງສຳຄັນຕໍ່ພຣະຜູ້ເປັນເຈົ້າ? ຕໍ່ໄປນີ້ແມ່ນຄຳຖາມບາງຂໍ້ ທີ່ສາມາດນຳພາທ່ານ ໃນການສຶກສາ:
-
ການຢືນຢັນ (ໂມໂຣໄນ 2; 6:4).ພຣະຜູ້ຊ່ວຍໃຫ້ລອດໄດ້ແນະນຳສິ່ງໃດ ຢູ່ໃນ ໂມໂຣໄນ 2:2 ທີ່ສິດສອນທ່ານກ່ຽວກັບພິທີການຂອງການຢືນຢັນ? ທ່ານຈະອະທິບາຍວ່າ “ອຳນາດຂອງພຣະວິນຍານບໍລິສຸດໄດ້ກະທຳ ແລະ ຊຳລະລ້າງເຂົາໃຫ້ສະອາດ” ໝາຍຄວາມວ່າແນວໃດ? (ໂມໂຣໄນ 6:4).
-
ການແຕ່ງຕັ້ງຂອງຖານະປະໂລຫິດ (ໂມໂຣໄນ 3).ທ່ານພົບເຫັນຫຍັງແດ່ຢູ່ໃນບົດນີ້ ທີ່ສາມາດຊ່ວຍບາງຄົນໃຫ້ກະກຽມສຳລັບການແຕ່ງຕັ້ງສູ່ຖານະປະໂລຫິດ? ທ່ານພົບເຫັນຫຍັງແດ່ທີ່ຈະຊ່ວຍບາງຄົນໃຫ້ກະກຽມທີ່ຈະປະຕິບັດພິທີການແຕ່ງຕັ້ງ?
-
ສິນລະລຶກ (ໂມໂຣໄນ 4–5; 6:6).ທ່ານສາມາດເຮັດສິ່ງໃດເພື່ອເຮັດໃຫ້ສິນລະລຶກເປັນຈຸດເດັ່ນຂອງອາທິດຂອງທ່ານ?
-
ການບັບຕິສະມາ (ໂມໂຣໄນ 6:1–3).ທ່ານກຳລັງເຮັດຫຍັງຢູ່ເພື່ອຈະສືບຕໍ່ໃຫ້ເໝາະສົມສຳລັບການບັບຕິສະມາ?
ພຣະເຢຊູໄດ້ສິດສອນເຖິງວິທີທີ່ຄວນປະຕິບັດພິທີການ
ອີງຕາມສິ່ງທີ່ທ່ານໄດ້ຮຽນຮູ້, ທ່ານຈະປ່ຽນແປງວິທີທີ່ທ່ານຄິດ, ມີພາກສ່ວນ, ຫລື ກະກຽມຄົນອື່ນສຳລັບພິທີການເຫລົ່ານີ້ແນວໃດ?
ເບິ່ງ ຄຳສອນ ແລະ ພັນທະສັນຍາ 84:20 ນຳອີກ.
ຫລິ້ນລະຄອນກ້ອມ. ວິທີທີ່ດີຢ່າງໜຶ່ງທີ່ຈະຈື່ຈຳສິ່ງທີ່ທ່ານກຳລັງຮຽນຮູ້ຢູ່ ແມ່ນການອະທິບາຍມັນຕໍ່ຄົນອື່ນ. ຍົກຕົວຢ່າງ, ລອງຫລິ້ນລະຄອນກ້ອມທີ່ສະແດງເຫດການທີ່ຄ້າຍຄືກັນນີ້: ເພື່ອນຄົນໜຶ່ງບໍ່ແນ່ໃຈວ່ານາງພ້ອມຈະຮັບບັບຕິສະມາ. ທ່ານຈະໃຊ້ ໂມໂຣໄນ 6 ເພື່ອຊ່ວຍນາງແນວໃດ?
ການຮັບສ່ວນສິນລະລຶກຊ່ວຍເຮົາໃຫ້ເຂົ້າໃກ້ພຣະເຢຊູຄຣິດຫລາຍຂຶ້ນ.
ທ່ານອາດໄດ້ຍິນຄຳອະທິຖານສຳລັບສິນລະລຶກຫລາຍເທື່ອແລ້ວ ແຕ່ວ່າທ່ານຄິດຢ່າງລະມັດລະວັງກ່ຽວກັບຄວາມໝາຍຂອງຖ້ອຍຄຳນັ້ນເລື້ອຍປານໃດ? ບາງທີທ່ານສາມາດລອງຂຽນຄຳອະທິຖານສອງບົດນັ້ນຈາກຄວາມຊົງຈຳລົງໄວ້. ແລ້ວໃຫ້ປຽບທຽບສິ່ງທີ່ທ່ານໄດ້ຂຽນໃສ່ກັບ ໂມໂຣໄນ 4:3 ແລະ 5:2. ທ່ານສັງເກດເຫັນຫຍັງແດ່ກ່ຽວກັບຄຳອະທິຖານເຫລົ່ານີ້ ທີ່ແຕ່ກ່ອນທ່ານບໍ່ໄດ້ສັງເກດເຫັນ?
ໃຫ້ພິຈາລະນາທີ່ຈະລວມເພງສວດສຳລັບສິນລະລຶກໃສ່ກັບການສຶກສາຂອງທ່ານ, ດັ່ງເຊັ່ນ “ມີພູຂຽວແສນໄກຫ່າງໄປ” (ເພງສວດ ແລະ ເພງຂອງເດັກນ້ອຍ, 26).
ສານຸສິດຂອງພຣະເຢຊູຄຣິດດູແລຈິດວິນຍານຂອງກັນແລະກັນ.
ການເລືອກທີ່ຈະຕິດຕາມພຣະຄຣິດເປັນເລື່ອງຂອງສ່ວນບຸກຄົນ, ແຕ່ຜູ້ທີ່ເຊື່ອຖືດ້ວຍກັນສາມາດຊ່ວຍເຮົາໃຫ້ຢູ່ “ໃນທາງທີ່ຖືກຕ້ອງ” ໄດ້ (ໂມໂຣໄນ 6:4–5). ສະມາຊິກຂອງສາດສະໜາຈັກໃນສະໄໝຂອງໂມໂຣໄນໄດ້ເຮັດຫຍັງແດ່ເພື່ອເພີ່ມຄວາມເຂັ້ມແຂງໃຫ້ກັນແລະກັນ? ຂະນະທີ່ທ່ານອ່ານ ໂມໂຣໄນ 6:4–9, ໃຫ້ໄຕ່ຕອງເຖິງພອນທີ່ມາຈາກການ “ຖືກນັບເຂົ້າຢູ່ໃນບັນດາຜູ້ຄົນຂອງສາດສະໜາຈັກຂອງພຣະຄຣິດ” (ໂມໂຣໄນ 6:4).
ທ່ານອາດຄິດກ່ຽວກັບຜູ້ຄົນທີ່ໄປຮ່ວມໃນຫວອດ ຫລື ສາຂາຂອງທ່ານນຳອີກ. ມີຜູ້ໃດບໍທີ່ອາດຕ້ອງການຄວາມຮັກຂອງທ່ານເປັນພິເສດ—ບາງທີອາດເປັນຄົນໃດຄົນໜຶ່ງທີ່ມາໂບດໃໝ່ ແລະ ຫາກໍກັບຄືນມາໂບດເມື່ອບໍ່ດົນມານີ້? ທ່ານຈະສາມາດຊ່ວຍເຮັດໃຫ້ປະສົບການຂອງເຂົາເຈົ້າຢູ່ທີ່ໂບດຄ້າຍຄືກັນກັບສິ່ງທີ່ໂມໂຣໄນໄດ້ບັນຍາຍໄດ້ແນວໃດ? (ສຳລັບແນວຄິດ, ໃຫ້ເບິ່ງ My Covenant Path ຫລື “Strengthening New Members” ວິດີໂອທີ່ຢູ່ໃນຫ້ອງສະໝຸດພຣະກິດຕິຄຸນ). ທ່ານອາດພົບເຫັນການດົນໃຈບາງຢ່າງຢູ່ໃນພາກ I ຂອງຂ່າວສານຂອງ ປະທານດາລິນ ເອັຈ ໂອກສ໌ “The Need for a Church” (Liahona, Nov. 2021, 24–25).
ຂະນະທີ່ທ່ານໄຕ່ຕອງຄວາມໝາຍຂອງການຖືກ “ບຳລຸງລ້ຽງດ້ວຍພຣະຄຳອັນປະເສີດຂອງພຣະເຈົ້າ” (ໂມໂຣໄນ 6:4), ມັນອາດຊ່ວຍໄດ້ທີ່ຈະຄິດກ່ຽວກັບການບຳລຸງລ້ຽງທີ່ຕົ້ນໄມ້ນ້ອຍ ຫລື ແອນ້ອຍຕ້ອງການ—ແລະ ສິ່ງທີ່ຈະເກີດຂຶ້ນຖ້າຫາກມັນຖືກລະເລີຍ. ໃຫ້ຄົ້ນຄວ້າ ໂມໂຣໄນ 6:4–9 ສຳລັບແນວຄິດກ່ຽວກັບວ່າທ່ານສາມາດຊ່ວຍ “ບຳລຸງລ້ຽງ” ຄົນອື່ນທາງວິນຍານໄດ້ແນວໃດ. ເພື່ອນສານຸສິດດ້ວຍກັນໄດ້ຊ່ວຍບຳລຸງລ້ຽງທ່ານແນວໃດ?
ມັນບໍ່ຈະແຈ້ງຕໍ່ທຸກຄົນວ່າເປັນຫຍັງມັນຈຶ່ງສຳຄັນທີ່ຈະຖຶກ “ນັບເຂົ້າຢູ່ໃນບັນດາຜູ້ຄົນຂອງສາດສະໜາຈັກຂອງພຣະຄຣິດ” ແລະ ໄດ້ “ຊຸມນຸມກັນຢູ່ເລື້ອຍໆ” ໃນກອງປະຊຸມຂອງສາດສະໜາຈັກ. ທ່ານຈະອະທິບາຍວ່າ ເປັນຫຍັງທ່ານຈຶ່ງຂອບພຣະຄຸນທີ່ໄດ້ເປັນສະມາຊິກຂອງສາດສະໜາຈັກຂອງພຣະເຢຊູຄຣິດແນວໃດ? (ເບິ່ງພາກອື່ນໆຂອງຂ່າວສານຂອງປະທານໂອກສ໌ “The Need for a Church”).
ສຳລັບແນວຄິດເພີ່ມເຕີມ, ໃຫ້ເບິ່ງວາລະສານ Liahona ແລະ For the Strength of Youth ສະບັບຂອງເດືອນນີ້.
ແນວຄິດສຳລັບການສິດສອນເດັກນ້ອຍ
ພຣະວິນຍານບໍລິສຸດເປັນຂອງປະທານສັກສິດ.
-
ພຣະວິນຍານບໍລິສຸດ ຫລື ພຣະວິນຍານກໍຖືກກ່າວເຖິງຫລາຍເທື່ອຢູ່ໃນ ໂມໂຣໄນ 2–6. ບາງທີທ່ານກໍສາມາດຂໍໃຫ້ລູກໆຂອງທ່ານຊອກຫາທຸກໆຂໍ້ທີ່ກ່າວເຖິງພຣະອົງ, ອ່ານຂໍ້ເຫລົ່ານັ້ນ, ແລະ ຂຽນລາຍຊື່ຂອງສິ່ງທີ່ພວກເຂົາຮຽນຮູ້ກ່ຽວກັບພຣະວິນຍານບໍລິສຸດ. ທ່ານຍັງສາມາດແບ່ງປັນປະສົບການນຳກັນ ຕອນທີ່ທ່ານໄດ້ຮູ້ສຶກອິດທິພົນຂອງພຣະວິນຍານນຳອີກ.
ເຮົາຮັບສ່ວນສິນລະລຶກເພື່ອສະແດງໃຫ້ເຫັນວ່າເຮົາຈະລະນຶກເຖິງພຣະເຢຊູຄຣິດຕະຫລອດເວລາ.
-
ການອ່ານຄຳອະທິຖານສຳລັບສິນລະລຶກກັບລູກໆຂອງທ່ານ ສາມາດນຳພາໄປສູ່ການສົນທະນາກ່ຽວກັບການມີປະສົບການທີ່ມີປະໂຫຍດກັບສິນລະລຶກຫລາຍຂຶ້ນ. ມັນອາດຊ່ວຍໄດ້ສຳລັບພວກເຂົາທີ່ຈະວາດພາບເຫັນເພື່ອນຄົນໜຶ່ງມາຮ່ວມກອງປະຊຸມສິນລະລຶກເປັນເທື່ອທຳອິດ. ເຮົາຈະອະທິບາຍໃຫ້ເພື່ອນຂອງເຮົາຮູ້ແນວໃດວ່າ ສິນລະລຶກຄືຫຍັງ ແລະ ວ່າເປັນຫຍັງມັນຈຶ່ງສັກສິດ? ຊຸກຍູ້ລູກໆຂອງທ່ານໃຫ້ໃຊ້ບາງສິ່ງຈາກ ໂມໂຣໄນ 4 ຫລື 5 ໃນຄຳອະທິບາຍຂອງພວກເຂົາ. ລູກຜູ້ນ້ອຍສາມາດໃຊ້ໜ້າກິດຈະກຳຂອງອາທິດນີ້ ໃນ ປຶ້ມຮູບພຣະກິດຕິຄຸນ, ເລກທີ 108.
-
ໃຫ້ຄິດທີ່ຈະຮ້ອງເພງໜຶ່ງນຳກັນທີ່ຊ່ວຍລູກໆຂອງທ່ານໃຫ້ຄິດກ່ຽວກັບພຣະຜູ້ຊ່ວຍໃຫ້ລອດ (ດັ່ງເຊັ່ນ “ພຣະຜູ້ຊ່ວຍດ້ວຍຄວາມຖ່ອມ,” ເພງສວດ ແລະ ເພງຂອງເດັກນ້ອຍ, 28). ທ່ານສາມາດຝຶກນັ່ງຢ່າງຄາລະວະລະຫວ່າງພິທີສິນລະລຶກນຳອີກ.
ເຮົາສາມາດກະກຽມທີ່ຈະຮັບບັບຕິສະມາ.
-
ໃຜສາມາດຮັບບັບຕິສະມາໄດ້? ຊ່ວຍລູກໆຂອງທ່ານໃຫ້ຊອກຫາຄຳຕອບຕໍ່ຄຳຖາມນີ້ ຢູ່ໃນ ໂມໂຣໄນ 6:1–3. ຄຳວ່າ “ໃຈທີ່ຊອກຊ້ຳ ແລະ ວິນຍານທີ່ສຳນຶກຜິດ” ໝາຍຄວາມວ່າແນວໃດ? (ໂມໂຣໄນ 6:2). ສິ່ງນີ້ຊ່ວຍເຮົາໃຫ້ກະກຽມສຳລັບການບັບຕິສະມາແນວໃດ? ໃຫ້ພິຈາລະນາທີ່ຈະບອກລູກໆຂອງທ່ານວ່າທ່ານໄດ້ກະກຽມທີ່ຈະຮັບບັບຕິສະມາແນວໃດ.
ເຮົາໄປໂບດເພື່ອຮັບສິນລະລຶກ ແລະ ສະໜັນສະໜູນກັນແລະກັນ.
-
ລູກໆຂອງທ່ານຮູ້ບໍວ່າເປັນຫຍັງທ່ານຈຶ່ງມັກໄປໂບດ? ການອ່ານ ໂມໂຣໄນ 6:4–6, 9 ສາມາດໃຫ້ໂອກາດທ່ານທີ່ຈະສົນທະນານຳກັນເຖິງບາງສິ່ງທີ່ເຮົາເຮັດຢູ່ທີ່ໂບດ. ບາງທີພວກເຂົາສາມາດແຕ້ມຮູບຕົນເອງກຳລັງເຮັດສິ່ງເຫລົ່ານີ້ (ດັ່ງເຊັ່ນ ອະທິຖານ, ສິດສອນ, ຮ້ອງເພງ, ແລະ ຮັບສ່ວນສິນລະລຶກ).
-
ຫລັງຈາກການອ່ານ ໂມໂຣໄນ 6:4 ນຳກັນ, ທ່ານ ແລະ ລູກໆຂອງທ່ານສາມາດເບິ່ງຮູບ ຫລື ຕົວຢ່າງຂອງອາຫານທີ່ບຳລຸງລ້ຽງ ແລະ ປຽບທຽບການບຳລຸງລ້ຽງຮ່າງກາຍຂອງເຮົາໃສ່ກັບການຖືກ “ບຳລຸງລ້ຽງດ້ວຍພຣະຄຳອັນປະເສີດຂອງພຣະເຈົ້າ.” ພວກທ່ານກໍສາມາດເບິ່ງວິດີໂອ “Children Sharing the Gospel” (ຫ້ອງສະໝຸດພຣະກິດຕິຄຸນ) ນຳອີກ.
ສຳລັບແນວຄິດເພີ່ມເຕີມ, ໃຫ້ເບິ່ງວາລະສານ Friend ສະບັບຂອງເດືອນນີ້.
Moroni in the Cave [ໂມໂຣໄນຢູ່ໃນຖ້ຳ], ໂດຍ ໂຮເຮ ໂກໂກ