Bwe wāween ko an Anij reutiejļo̧k jen ko ad im jej aikuj iien otemjej leļo̧k kōj n̄an Ankilaan, E ej barāinwōt kōketak kōj n̄an ļōmņak im m̧akūtkūt n̄an kōj make. Ej juon katak Jared im ļeo jatin raar ekkatak. N̄an waanjon̄ak, ļōmņak eo kōn ilo̧k n̄an juon āne ekāāl me eaar “juon āneo ej make ioon aolepān laļ” āinwōt eaar ijjino ilo ļōmņak eo an Jared, im Irooj eaar leļo̧k, im ba n̄an ļeo jein im jatin Jared, “āindein Inaaj kōm̧m̧an n̄an eok kōnke iien in e aetok kwaar kūr n̄an eō” (lale Ether 1:38–43). Im ke ļeo jein im jatin Jared ej deļo̧n̄ illowaan baaj ko me ej bōkļo̧k er n̄an āneen aer kallim̧ur, Irooj eaar kajjitōk juon kajjitōk me ekkā ad kajjitōk Ippān: “Ta kwo kōņaan bwe in kōm̧m̧an?” (Ether 2:23). E ekōņaan ron̄ ļōmņak ko im pepe ko ad, im Enaaj ron̄jake im letok kapen eo An ak n̄e ejjab kapilōk kōj. Jet iien men eo de eo wōt ej kōjpel kōj jān kōjeraam̧m̧an ko jej kappukōti ej “rōn̄el nuknuk in jab tōmak eo,” eo ad make im eļan̄n̄e jemaron̄ “kekōl rōn̄el nuknuk in” (Ether 4:15, jemaron̄ in bwilōn̄ kōn ta eo Irooj ej m̧ōņōņō in kōm̧m̧ane n̄an kōj.
Bar lale “The Lord Appears to the Brother of Jared” (video), Gospel Ļaibrāre.
Ilo aō jar n̄an Irooj, E enaaj wōr an meanwōd ioō.
Ether 1:33–43 ej kōnono kōn jar ko jilu an ļeo jatin Jared. Ta eo kwoj katak jān uwaak eo an Irooj n̄an kajjojo jar? Ļōmņak kōn juon iien ke kwaar en̄jake meanwōd eo an Irooj ilo am̧ kar m̧ool in kwaļo̧k en̄jake ko am̧ ilo jar n̄an E. Kwomaron̄ in kōņaan je en̄jake in im kwaļo̧ke ippān juon eo me emaron̄ aikuj in ron̄jake naan in kam̧ool eo am̧.
Būreejtōn Russell M. Nelson eaar ba: “ij akweļap ippāmi n̄an kōļapļo̧k maron̄ in jetōb eo ami n̄an bōk revelesōn. … Kālet n̄an kōm̧m̧ane jerbal eo ekwojarjar eaikuji lan̄lōn̄ kōn menin letok eo an Jetōb Kwojarjar im eo̧ron̄ ainikien Jetōb eo emakijkijļo̧k im alikkarļo̧k” (“Revelesōn n̄an Kabun̄ eo, Revelesōn n̄an Mour ko Ad,” Liaona, Māe 2018, 96).
Ilo am̧ katak Ether 2; 3:1–6; 4:7–15, ta eo kwoj katak kōn “jerbal in jetōb” ? ennaan eo Būreejtōn Nelson ekar kōnono kake? Komaron̄ kakōļļeik kōn kōļar kajjitōk ko ak n̄ūrbōktak ko an ļeo jein Jared eaar wōr ippān im ta eo eaar kōm̧m̧ane, im ilo bar juon kōļar komaron̄ kakōļļāik ekōjkan an kar Irooj jipan̄ e im kar kōm̧m̧an bwe Ankilaan en waļo̧k.
Erkein rej jet kajjitōk ko kwomaron̄ jino kaki:
Ta eo ej im̧we eok kōn wāween an Irooj kar uwaake kajjitōk ko an ļeo jein Jared ilo Ether 2:18–25?
Elmen am̧ kōjerbal Ether 3:1–5 n̄an jipan̄ juon eo ej katak kilen jar?
Ta eo emaron̄ kōm̧m̧an bwe kwon jab bōk revelesōn jān Irooj? (lale Ether 4:8–10). Elmen an maron̄ ikutkut am̧ bōk revelesōn jān E? (lale Ether 4:7, 11–15).
Ta am̧ ļōmņak ej meļeļein “kekōl rōn̄el nuknuk in jab tōmak” ilo mour eo am̧ (Ether 4:15).
Ta ko jet kwoj katak jān ļeo jein Jared kōn revelesōn an juon make?
Elder Dale G. Renlund ekar kwaļo̧k kōn “Juon Ekkarōk in Jerbal kōņ Revelesōn” (Liaona, Nob. 2022, 16–19). Ļōmņak in jin̄aik juon ekkarōk in pija ak je emān ekkarōk in jerbal ko ilo kajjojo jait. Elmen an karōk in jerbal in jipan̄ eok “kōļap am̧ maron̄ n̄an bōk revelesōn”?
Bar lale Unin Kōnono ko an Gospel, “Personal Revelation,” Gospel Ļāibrāre.
Irooj enaaj kōpooj eō n̄an kijoone aō “m̧wilaļ in eļap.”
Jet iien, kijoon “m̧wilaļ in eļap” ej iaļ eo n̄an kakūrm̧ool ankilaan Anij n̄an kōj. Kwoj ke loe men ko rejjab ir jān mour eo am̧ ilo Ether 2:16–25? Elmen an Irooj kar kōpooj eok n̄an apan̄ ko am̧? Ta eo E ej kajjitōk ippam̧ n̄an kōm̧m̧ane kiiō n̄an kōppopo n̄an ta eo Ej aikuji eok n̄an kōm̧m̧ane ilju im jekļaj?
Mour kake ta eo kwoj katak. Katak gospel in ej im̧we kōj n̄an ukōt mour ko ad. Ālkin riiti Ether 4:11–12, kwomaron̄ kōlaajrake jet iaan im̧we ko ilo mour eo am̧ im ļōmņaki n̄e rej kareel eok n̄an kōm̧m̧an em̧m̧an. Ta oktak ko me kwoj en̄jaki me raar im̧we eok n̄an kōm̧m̧ani?
Rikam̧ool ro rej kam̧ool kōn m̧ool eo an Bok in Mormon eo.
Ilo am̧ riiti kanaan eo an Moronai ilo Ether 5, kōļmenļo̧kjeņ kōn jibadbad eo an Irooj n̄an kepooj elōn̄ rikam̧ool ro an Bok in Mormon. Ta kam̧ool ko raar im̧we eok n̄an tōmak bwe Bok in Mormon ej naan in Anij? Elmen an Bok in Mormon kar kwaļo̧k n̄an eok “kajoor eo an Anij im barāinwōt An innaan”? (Ether 5:4).
N̄e kwojeļā juon kajin me ajri ro nejum̧ rejjab jeļā, leļo̧k n̄an er jidikin meļeļein kajin eo (ak kejo̧ juon rekoot in ainikien kajin eo). Kwomaron̄ kōjerbal kōmeļeļein etke ļeo jein im jatin Jared ekar jar kōn jipan̄ ilo Ether 1:33–37. Kwaļo̧k elmen an Irooj kar en̄jake kōn jar in im elmen An kar uwaak (bar lale “Jebta 50: The Jaredites Leave Babel,” Bwebwenato ko ilo Bok in Mormon, 143–44).
Kajjitōk ippān ajri ro n̄an katen wōt n̄e rej jek juon baaj ilo am̧ riiti Ether 2:16–17). Innām kwe im ajri ro nejum̧ maron̄ riiti jorrāān ko an riJared ro ilo baaj ko (lale Ether 2:19) im wāween ko roktak me Irooj eaar uwaake jar eo an ļeo jein im jatin Jared (lale Ether 2:19–25; 3:1–6). Pija ko im peij in m̧akūtkūt eo ilo jemļo̧kin laajrakin in emaron̄ jipan̄ eok im ajri ro nejum̧ kwaļo̧k bwebwenato eo. Ta eo jej katak jān jar eo an ļeo jein im jatin Jared? Kwaļo̧k juon en̄jake eo me kwaar jar kōn jipan̄ im Jemedwōj Ilan̄ ekar jipan̄ eok.
Moronai eaar kanaan bwe Rikam̧ool ro Jilu renaaj jipan̄ kwaļo̧k m̧ool eo an Bok in Mormon. N̄an kwaļo̧k ta in rikam̧ool, kwomaron̄ kajjitōk ippān ajri ro nejum̧ n̄an kōmeļeļeik juon men eo raar loe ak en̄jake me ro jet raar jab. Innām ilo am̧ riiti Ether 5 ippān doon, kwomaron̄ kōnono etke Anij ej kōjerbal rikam̧ool ro ilo jerbal in An. Kwomaron̄ bar kwaļo̧k n̄an doon elmen am̧ jeļā bwe Bok in Mormon ej m̧ool im elmen am̧ maron̄ kwaļo̧k am̧ kam̧ool n̄an ro jet.
N̄an ļōmņak ko reļļapļo̧k, lale ennaan eo an allōn̄ in ilo eo Jera māākjiin.
Pija
Jisōs ej un̄ur dekā ko 16 ilo im̧aan mejān ļeo jein im jatin Jared
Kwaar Ke Lo Eļapļo̧k Jān In?, jān Marcus Alan Vincent