Moronai ekar jeļā ta en̄jake eo n̄an ajimakeke ilo juon laļ eo enana—eļaptata ilo iien eo jemān ekar mej ilo tariņae im riNipai ro raar jorrāān. “N̄a make ij pād,” eaar je. “Ejjeļo̧k ro jera ak ia raar ilo̧k” (Mormon 8:3, 5). Men ko me raar āinwōt waan, bōtaab Moronai eaar loi kōjatdikdik ilo naan in kam̧ool eo an bwe“ jibadbad ko ejjeļo̧k jem̧ļo̧kier an Irooj renaaj wōnm̧aanļo̧k wōt” (Mormon 8:22). Im Moronai eaar jeļā bwe jerbal eo aorōk ilo jibadbad ko ejjeļo̧k jem̧ļo̧kier renaaj kar kōm̧m̧an jān Bok in Mormon—ļo̧o̧k eo eaar kiiō niknik ilo kadedeļo̧k, ļo̧o̧k eo me enaaj kar juon raan bōktok elōn̄ armej n̄an “jeļā kōn Kraist” (Mormon 8:16; 9:36). Tōmak eo an Moronai ilo kallim̧ur kein kar kapidodoik n̄an e n̄an kean̄ n̄an ro renaaj riiti bok in ilju im jekļaj, “Ij kōnono n̄an kom̧ āinwōt n̄e kom̧ ar pād” im “ i jeļā bwe kom̧ naaj bōk naan kein aō” (Mormon 8:35; 9:30). Kiiō ewōr ippād naan ko an, im jerbal eo an Irooj ej wōnm̧aanļo̧k wōt, kōn un eo kōnke Mormon im Moronai raar m̧ool wōt n̄an mijen eo aer, jekdo̧o̧n n̄e raar makeļo̧k.
“Lōke ilo Jisōs Kraist” im “ļoore gospel eo [An].”
Ālkin kōkaduduik ļo̧o̧k in armej ro an, Mormon eaar leļo̧k naan in kajjem̧ļo̧k eo an ilo Mormon 7. Etke kwoj ļōmņak ekar kāālet ennaan in an? Ta meļeļein n̄an eok n̄an “ļoore gospel eo eo an Kraist”? (Mormon 7:8).
Būreejtōn Russell M. Nelson kar kajjitōk: “Eļan̄n̄e ren kar lewaj n̄an eok diamond ak m̧ōr ko ak Bok in Mormon eo, ewi wōt eo kwon kar kāālete? Ilo m̧ool, ewi wōt eo ej aorōkļo̧k n̄an eok?” (“The Book of Mormon: What Would Your Life Be Like without It?,” Liaona, Nov. 2017, 61).
Jet iien kwomaron̄ en̄jake ajimakeke ilo kijejeto ko am̧ n̄an kōjparok kien ko. Ta eo kwomaron̄ katak jān waanjon̄ak eo an Moronai me emaron̄ jipan̄? (lale Mormon 8:1–11). N̄e kwon kar kajjitōk ippān Mormon elmen an tiljek wōt, ta eo kwoj ļōmņak en kar ba?
Jisōs Kraist eaar kwaļo̧k n̄an Moronai ta eo enaaj kar waļo̧k n̄e Bok in Mormon eaar wōnm̧aantak (lale Mormon 8:34–35, (im ta eo Moronai eaar loe ekar tōlļo̧k e n̄an letok kakkōļ ko reļļap kōn tōre in ad. Ilo am̧ riiti Mormon 8:26–41 im 9:1–30, kōļmenļo̧kjeņ elmen an naan ko an maron̄ jelet eok. N̄an waanjon̄ak, ilo eoon kein Moronai ej kajjitōk 24 kajjitōk ko. Ta kam̧ool eo em̧ōj am̧ loe ilo kajjitōk kein me Moronai ekar loi ilo tōre in ad? Elmen an Bok in Mormon maron̄ jipan̄ kōn apan̄ ko Moronai ekar loi?
Ron̄jake Jetōb. Leļo̧k am̧ n̄an ļōmņak ko im en̄jake ko am̧, mekarta n̄e remaron̄ jab iookļo̧k ta eo kwoj riiti. Im̧we kein remaron̄ in lukkuun men ko me Jemedwōj Ilan̄ ekōņaan bwe kwon jeļā. N̄an waanjon̄ak, ta im̧we ko ewōr ippam̧ ālkin kōļmenļo̧kjeņ kōn kajjitōk ko Moronai ekar kajjitōk ilo Mormon 9:1–30?
Moronai eaar kadedeļo̧k jeje ko an jemān kōn juon ennaan ekajoor n̄an armej ro ilo tōre in ad ro rejjab tōmak ilo menin bwilōn̄ ko Mormon 8:26; 9:1, 10–11). Etke kwoj en̄jake bwe juon tōmake kōn menin kabwilōn̄lōn̄ ko ej aikuji rainin? Lale Mormon 9:9–11, 15–27 im Moronai 7:27–29 im kōļmenļo̧kjeņ kōn kajjitōk ko āinwōt:
Ta eo jej katak kōn Rilo̧mo̧o̧r jān eoon kein?
Ta eo ij katak kōn menin bwilōn̄ ko, m̧okta im kiiō?
Ta jeraam̧m̧an ko n̄an tōmak bwe Jisōs Kraist ej juon Anij in menin bwilōn̄ ko? Ta jekjek ko n̄an jab tōmake menin?
Ta menin bwilōn̄ ko—reļļap im reddik—Rilo̧mo̧o̧r eaar jerbali ilo mour eo aō? Ta eo menin bwilōn̄ kein rej katakin eō kōn E?
Būreejtōn Russell M. Nelson ekar kwaļo̧k: “Rilo̧mo̧o̧r eo ad im Ripinmuur, Jisōs Kraist, enaaj kōm̧m̧ane jet iaan jerbal ko An rekajoor ikōtaan kiiō im iien eo Ej bar itok. Jenaaj lo kōkaļļe in menin bwilōn̄ ko me Anij Jemād im Nejin, Jisōs Kraist, ej tōl Kabun̄ in ilo wōj im aeboojoj” (“Revelesōn n̄an Kabun̄ eo, Revelesōn n̄an Mour ko Ad,” Liaona, Māe 2018, 96). Ta en̄jake eo am̧ kōn menin bwilōn̄ kein? Ta eo kwomaron̄ kōm̧m̧ane n̄an jipan̄ Rilo̧mo̧o̧r kakūrm̧ooli?
Ta eo kwoj katak kōn tōmak im menin bwilōn̄ ko jān en̄jake ko an ro Rekwojarjar ro ilo Samoa, Tonga, Fiji, im Tahiti iien eo Būreejtōn im Sister Nelson raar loļo̧k er? (lale Russell M. Nelson, “Kraist Em̧ōj an Jerkakpeje ilo Tōmak ilo Enaaj Kōm̧akūt Toļ ko,” Liaona, Māe 2021, 101–4).
Bar lale Ronald A. Rasband, “Lo! N̄a Anij in Menin Bwilōn̄ ko,” Liaona, Māe 2021, 109–12; Unin Kōnono ko an Gospel, “Miracles,” Gospel Ļāibrāre.
Bok in Mormon im Baibōļ eo rej kam̧ool kōn Jisōs Kraist.
N̄an kwaļo̧k jemjerā eo ikōtaan Baibōļ eo im Bok in Mormon, āinwōt kar Moronai, kwomaron̄ ikkure juon ikkure āinwōt in ippān ajri ro nejum̧: Kajjitōk ippāer n̄an ba “Kallim̧ur M̧okta, Kallim̧ur Ekāāl” ilo am̧ kotak Baibōļ eo im “Bar Kallim̧ur” ilo am̧ kotak Bok in Mormon. Kwomaron̄ bar kwaļo̧k jen men ko rekar waļo̧k jim̧or ilo Baibōļ im Bok in Mormon n̄an kam̧ool kōn—āinwōt ļotak eo an Jisōs, mej, im Jerkakpeje—im kajjitōk ippān ajri ro nejum̧ n̄an lale pija ko an iien kein (n̄an waanjon̄ak, ilo Gospel Bok in Pija).
N̄an jipan̄ ajri ro nejum̧ katak kōn laajrak in tōmak ralitōk, kwomaron̄ je kajjojo naan ejenoļo̧k ioon jidik peba. Karuwaineneik ajri ro nejum̧ n̄an jerbal ippān doon n̄an likūt naan ko ejim̧we karōkier im āliji elōn̄ alen.
Imaron̄ kōjparok kien ko men̄e ij en̄jake ajimakeke.
Waanjon̄ak eo an Moronai emaron̄ im̧we ajri ro nejum̧ n̄an pokake kien ko n̄e rej en̄jake ajimakeke. Ālkin am̧ riiti Mormon 8:1–7 ippāer, remaron̄ kwaļo̧k elmen aer kar en̄jake āinwōt n̄e er kar Moronai. Ilo eoon 1, 3, im 4, ta eo Moronai ekar kean̄ n̄an kōm̧m̧ane, im elmen an kar pokake? Elmen ad maron̄ āinwōt Moronai?
Bōlen kwe im ajri ro nejum̧ maron̄ kōnono kōn jekjek ko ijo rej aikuj kāālet ikōtaan em̧m̧an im nana n̄e ejjeļo̧k juon ej lale. Elmen an bōk tōmak ilo Jisōs Kraist jipan̄ kōj ilo jekjek kein? Juon al āinwōt “Stand for the Right” (Children’s Songbook, 159) maron̄ itok n̄an kōnono in.
Kwomaron̄ kōmeļeļeik ajri ro nejum̧ bwe juon menin bwilōn̄ ej juon men eo Anij en kōm̧m̧ane n̄an kwaļo̧k An kajoor n̄an kōjeraam̧m̧an mour ko ad. Kwomaron̄ riiti naan kein jān Mormon 9:11–13, 17 me ej kōmeļeļeik jet iaan menin bwilōn̄ ko an Anij, im ajri ro nejum̧ remaron̄ ļōmņak kōn menin bwilōn̄ ko jet (pija ko jān Bok in Gospel Pija, āinwōt. 26, 40, 41, and 83, emaron̄ jipan̄). Kōnono kōn menin bwilōn̄ ko me Anij eaar kōm̧m̧ani ilo mour eo am̧.
Kwaļo̧k n̄an ajri ro juon iiōk, im kōnono ta eo enaaj waļo̧k n̄e ejabwe kein kāre. Riit ippān doon Mormon 8:24 im 9:20–21 n̄an lale “kein kāre” me emaron̄ tōlļo̧k n̄an menin bwilōn̄ ko jān Anij.
N̄an ļōmņak ko reļļapļo̧k, lale ennaan eo an allōn̄ in ilo eo Jera māākjiin.
Pija
Moronai ej lale jorrāān eo an riNipai ro
Moronai ej lale jorrāān eo an riNipai ro, jān Joseph Brickey