Minerva Teichert (1888–1976), Moronai: Rinipai eo Āliktata,, 1949–1951, oil ioon masonite, 34¾ x 47 inij. Brigham Young University Museum of Art, 1969

Tijem̧ba 9–15: “A Kraist En Ļōn̄aj Eok”

Moronai 7–9

M̧okta jen an Moronai kar kadedeļo̧k ļo̧o̧k eo jejeļā kake rainin āinwōt Bok in Mormon kōn naan ko an make āliktata, eaar kwaļo̧k jilu ennaan ko jān jemān, Mormon, juon ekōnono n̄an “rikaļoor ro an Kraist reineem̧m̧an” (Moronai 7:3) im leta ko ruo me Mormon eaar je n̄an Moronai. Bōlen Moronai eaar kobaik enaan kein ilo Bok in Mormon kōnke eaar lo ejja āinwōt ko ikōtaan kauwōtata ko ilo raan ko an im ko ad. Ke naan kein raar jeje, armej in Nipai ro raar oktaļo̧k jān Rilo̧mo̧o̧r. Elōn̄ iaer raar “jako iakwe eo aer, juon n̄an bar juon” im laudin̄din̄ ilo “men otemjej ijello̧kun men eo em̧m̧an” (Moronai 9:5, 19). Im aaet Mormon eaar lo wōt kōjatdikdik, katakin kōj bwe kōjatdikdik ejjab meļeļein kowaane ak etale jorrāān ko an laļin. Kōjatdikdik meļeļein bōk tōmak ilo Jemedwōj Ilan̄ im Jisōs Kraist, eo kajoor eo An eļap im ej indeeo jān jorrāān kein. Ej meļeļein “ekkei[jel] pen ioon men otemjej em̧m̧an” (Moronai 7:19). Ej meļeļein kōtļo̧k an Pinmuur eo an Jisōs Kraist “im kōjatdikdik in An aiboojoj im mour indeeo, ren pād ilo ļōmņak eo am̧” (Moronai 9:25).

Ļōmnak ko n̄an Ekkatak ilo M̧weeo im ilo Kabun̄

Moronai 7:12–20

Meram in Kraist ej jipan̄ eō jeļā m̧ool jān bōd.

Elōn̄ armej rej ļōmņak, “elmen aō maron̄ jeļā n̄e im̧we eo ej itok jān Anij ak jān aō make ļōmņak?” ak “Kōn wōt an ļap m̧ōņ rainin, elmen aō maron̄ jeļā ke ejim̧we ak ebōd?” Ilo naan ko an Mormon ilo Moronai 7 ej letok jet pedped ko jemaron̄ kōjerbali n̄an uwaaki kajjitōk kein. Eļaptata lali ilo eoon 12–20. Kwomaron̄ kōjerbal m̧ool kein n̄an jipan̄ eok etale ennaan ko kwoj loi im en̄jake ko kwoj būki wiik in.

Bar lale Unin Tōl eo n̄an Jeje ko Rekwojarjar, “Light, Light of Christ,” Gospel Ļaibrāre; “Patterns of Light: Discerning Light” (video) Gospel Ļaibrāre.

Moronai 7:20–48

Kōn wōt Jisōs Kraist, imaron̄ “ekkeijel pen ioon men otemjej em̧m̧an.”

Mormon eaar kajjitōk kajjitōk in me eļap an aorōk rainin: “Ekōjkan an maron̄ bwe kom̧in maron̄ kūkki im dāpdep ioon men otemjej em̧m̧an?” (Moronai 7:20) Innām eaar kwaļo̧k kōn tōmak ilo Jisōs Kraist, kōjatdikdik, im iakwe em̧ool. Ilo am̧ riiti eoon 20–48, lale elmen an kajjojo m̧wiļ jipan̄ eok loe im “kūkki im dāpdep” ioon men otemjej em̧m̧an me ej itok jān Jisōs Kraist. Etke m̧wil kein rej aorōk n̄an juon rikaļoor an Jisōs Kraist?

Bar lale “Mormon’s Teachings about Faith, Hope, and Charity” (video), Gospel Ļaibrāre.

Moronai 7:44–48

“Iakwe em̧ool ej iakwe eo erreo an Kraist.”

Mormon eaar loe bwe ad tōmak im kōjatdikdik ilo Jisōs Kraist ej tōlļo̧k kōj n̄an bōk iakwe em̧ool. Ta in iakwe em̧ool? Kwomaron̄ je Iakwe em̧ool ej … innām riiti Moronai 7:44–48, pukot naan ko im eoon ko me remaron̄ kadedeļo̧k jentōj in. N̄e em̧ōj, ļōmņak in bōk jikin naan eo Iakwe em̧ool ippān āt eo Jisōs Kraist. Ta eo menin ej katakin eok kōn Rilo̧mo̧o̧r? Elmen an Jisōs Kraist kar kwaļo̧k An iakwe em̧ool? Ļōmnaki waanjon̄ak ko jān jeje ko rekwojarjar im mour eo am̧ make.

Būreejtōn Dallin H. Oaks ear kwaļo̧k: “Un eo unin an iakwe em̧ool eban likjab im un eo iakwe em̧ool eļapļo̧k jān jekdo̧o̧n jerbal ko rem̧m̧an eļap aer aorōk … ej bwe iakwe em̧ool, ‘iakwe eo erreo an Kraist’ [Moronai. 7:47], ejjab juon jerbal bōtaab juon jekjek ak ļamļam eo. … Iakwe em̧ool ej juon men juon ej erom” (“The Challenge to Become,” Ensign, Nob. 2000, 34). Ļōmņak kōn enaan in, kwomaron̄ riiti ennaan eo an Elder Massimo De Feo “akwe eo Erreo: Ej Kōkkaļļe eo Em̧ool an Aolep Rikaļoor ro an Jisōs Kraist” (Liaona, Māe 2018, 81–83). Elmen an iakwe em̧ool jelet am̧ kaļoor? Elmen am̧ maron̄ “eddāp n̄an iakwe em̧ool”? (eoon 46).

Bar lale 1 Korint 13:1–13; Ether 12:33–34; “Love One Another,” Hymns, no. 308; “Charity: An Example of the Believers” (video), Gospel Library; Gospel Topics, “Charity,” Gospel Library.

Kōjerbal men ko kein katakin. Bōlen ļōmņak kōn jilu kein jijet ko remaron̄ jipan̄ eok meļeļeļo̧k kōn jemdo̧o̧n eo ikōtaan tōmak, kōjatdikdik, im iakwe em̧ool (lale Dieter F. Uchtdorf, “The Infinite Power of Hope,” Liahona, Nov. 2008, 21–24).

Moronai 9:3–5

Illu ej tōlļo̧k n̄an būrom̧ōj im en̄taan.

N̄an keidi naan eo an Mormon kōn iakwe ilo Moronai 7:44–48, leta eo kein karuo an Mormon n̄an Moronai ekar kobaik kōkaļļe ko ņae men eo elōn̄ rej apan̄ kake rainin ej—illu. Ekkar n̄an Moronai 9:3–5, ta kar jet iaan jekjek ko kōn illu eo an riNipai ro? Ta kōkaļļe ko jemaron̄ būki jān eoon 3–5, 18–20, 23?

Bar lale Gordon B. Hinckley, “Slow to Anger,” Liaona, Nob. 2007, 62–66.

Moronai 9:25–26

Imaron̄ bōk kōjatdikdik ilo Krasit jekdo̧o̧n jekjek ko aō.

Ālkin kōmeļeļeik nana eo eaar loe, Mormon eaar jiron̄ ļeo nejin n̄an jab būrom̧ōj. Ta eo ej kabwilōn̄ eok kōn ennaan eo an Mormon kōn kōjatdikdik? Ta meļeļe in n̄an kwe bwe Kraist en “ļōn̄aj [eok] lōn̄ļo̧k”? Ta m̧wil ko an Kraist im pedped in katak ko an gospel eo An “ren pād ilo ļōmņak eo am̧” im lewaj n̄an eok kōjatdikdik? (Moronai 9:25).

Bar lale Russell M. Nelson, “Lan̄lōn̄ in Mour in Jetōbl,” Liaona, Nob. 2016, 81–84.

N̄an waanjon̄ak, lale ennaan eo an allōn̄ in ilo Liaona im N̄an Kōkajoorļo̧k Jodikdik Ro māākjiin.

Ļōmnak ko n̄an Katakin Ajri ro

Moronai 7:33

N̄e ewōr aō tōmak ilo Jisōs Kraist, imaron̄ kōm̧m̧an jabdewōt men Ej kōņaan bwe in kōm̧m̧ane.

• Ļōmņak in lale jejjo̧ pija ko ippān doon me ej kwaļo̧k juon jān jeje ko rekwojarjar kadedeļo̧k juon men eaorōk, Gospel Art Book, no. 19, 70, 78, 81). Elmen an tōmak ilo Kraist kar kōm̧m̧an juon oktak ilo waanjon̄ak kein? Kwe im ajri ro nejum̧ maron̄ riiti Moronai 7:33, lale ta eo jemaron̄ kōm̧m̧ne n̄e ewōr ad tōmak ilo Jisōs Kraist. Kwomaron̄ bar kwaļo̧k en̄jake ko n̄an doon iien eo Anij ekar kōjeraam̧m̧an eok kōn kajoor n̄an kōm̧anm̧an Ankilaan.

Moronai 7:41

Tōmak ilo Jisōs Kraist emaron̄ letok n̄an eō kōjatdikdik.

• Ilo am̧ riiti Moronai 7:41 n̄an ajri ro nejum̧, bōlen remaron̄ kajutak peier n̄e rej ron̄ men eo Moronai eaar ba jej aikuj kōjatdikdik kake. Ba n̄an er kōn kōjatdikdik eo kwoj en̄jake kōn Jisōs Kraist.

• Kwe im ajri ro nejum̧ maron̄ bar ļōmņake ro jet emaron̄ bar pentok n̄an er. Bōlen ajri ro nejum̧ remaron̄ jin̄aik juon pija kōn armej eo me emaron̄ kakeememej e n̄an bōk kōjatdikdik ilo Jisōs Kraist.

Moronai 7:40–41; 9:25–26

Imaron̄ bōk kōjatdikdik ilo Jisōs Kraist, men̄e ilo iien ko reppen.

• N̄an katakin ajri ro nejum̧ kōn kōjatdikdik ilo Jisōs Kraist, kwomaron̄ kanne juon nien alikkar kōn dān im likūt ruo men ilowaan—juon ej epāpe im juon ej tum̧laļļo̧k. Ilo am̧ riit ippān doon Moronai 7:40–41 im 9:25–26, ajri ro nejum̧ remaron̄ lale ta eo kōjatdikdik ej kōm̧m̧ane n̄an kōj. Remaron̄ keidi men eo ej epāpe n̄an juon armej eo ewōr an kōjatdikdik ilo Kraist Elmen an Kraist “kotak [kōj]” n̄e jej ioon apan̄ ko reppen. Jipan̄ ajri ro ļōmņak wāween ko remaron̄ likatōttōt ilo Rilo̧mo̧o̧r im katak ko An rekōketak “ilo kōļmenļo̧kjeņ ko [aer] indeeo.”

Moronai 7:45–48

“Iakwe em̧ool ej iakwe eo erreo an Kraist.”

• Juon al kōn iakwe, āinwōt “Love One Another” (Children’s Songbook, 136), emaron̄ jino juon ekōnono kōn ta in iakwe em̧ool. Kwomaron̄ riiti ak kōmeļeļeiki Moronai 7:47 im kajjitōk ippān ajri ro nejum̧ n̄an jin̄aik pijain er make aer kwaļo̧k iakwe n̄an ro jet. Kakkobaba bwe ren likūt pija eo aer ijo enaaj kakeememej er n̄an iakwe ro jet āinwōt kar Jisōs.

• Elmen am̧ maron̄ im̧we ajri ro nejum̧ n̄an kappukot im kōļapļo̧k iakwe em̧ool an Kraist ilo mour ko aer? Bōlen kwomaron̄ jipan̄ er ļōmņake wāween ko Jisōs eaar kwaļo̧k iakwe em̧ool (lale, n̄an waanjon̄ak, Luk 23:34; Jon 8:1–11; Ether 12:33–34). Elmen ad maron̄ ļoor waanjon̄ak eo An?

N̄an ļōmņak ko reļļapļo̧k, lale ennaan eo an allōn̄ in ilo eo Jera māākjiin.

Pija in Kraist Rilo̧mo̧o̧r, jān Heinrich Hofmann