“Tijem̧ba 2–8: ‘N̄an Kōjparok Er ilo Wāween Ejim̧we.’ Moronai 1–6,” Itok, Ļoor Eō—N̄an M̧weeo im Kabun̄: Bok in Mormon 2024 (2023)
“Tijem̧ba 2–8 Moronai 1–6,” Itok, Ļoor Eō—N̄an M̧weeo im Kabun̄: 2024 (2023)
Minerva Teichert (1888–1976), Alma Baptizes in the Waters of Mormon, 1949–1951, oil on masonite, 35 7/8 × 48 inches. Brigham Young University Museum of Art, 1969
Tijem̧ba 2–8: “N̄an Kōjparok Er ilo Wāween Ejim̧we”
Moronai 1–6
Ālkin an kadedeļo̧k ļo̧o̧k eo an jemān kōn riNipai ro im kōkaduik ļo̧o̧k eo an riJared ro, Moronai eaar ļōmņak bwe jerbal eo an n̄an kōjparok ļo̧o̧k eo eaar jem̧ļo̧k (lale Moronai 1:1). Ta eo eaar ļapļo̧k n̄an ba kōn ruo laļ ko me raar kanooj jorrāān? Bōtaab Moronai eaar lo tōre ko ad (lale Mormon 8:35), im eaar im̧we n̄an “jeje bar jet men ko, me bōlen remaron̄ in aorōk … ilo jet raan tokālik” (Moronai 1:4). Eaar jeļā bwe ajeded in bun̄ jān tōmak eo eaar itok, bōktok ippān tok tarpok eo kōn kain̄i ko an priesthood eo im kabun̄ eo eļaptata. Menin emaron̄ etke eaar letok tipdik in meļeļe ko ralikkar kōn kwojkwoj eo, peptaij eo, leļo̧k menin letok eo an Jetōb Kwojarjar eo, im kōjeraam̧m̧an ko an koba ippān ritōmak ro m̧ōttad n̄an “kōjparok [doon] ilo wāween ejim̧we, … atartar make ioon em̧m̧an ko an Kraist, eo ej rijeje im rikadedeļo̧k an tōmak eo [ad] tōmak” (Moronai 6:4). Ļōmņak ko raorōk āinwōt kein rej letok n̄an un eo n̄an kam̧m̧oolol bwe Irooj eaar kōjparok mour eo an Moronai bwe en maron̄ “jeje bar jet men ko” (Moronai 1:4).
Ļōmnak ko n̄an Ekkatak ilo M̧weeo im ilo Kabun̄
Imaron̄ ļoor Jisōs Kraist jekdo̧o̧n jum̧ae.
Ilo am̧ riiti Moronai 1, ta eo ej im̧we eok kōn tiljek eo an Moronai n̄an Irooj im n̄an kūr eo an? Ta jet iaan wāween ko juon armej emaron̄ “kaarmejete Kraist”? (Moronai 1:2–3). Kōļmenļo̧kjeņ elmen am̧ maron̄ tiljek n̄an Jisōs Kraist, men̄e kwoj ioon apan̄ ko im jum̧ae.
Kain̄i ko an priesthood rej aikuj in kōm̧m̧an āinwōt an Irooj kean̄.
Moronai ekar ko n̄an kōjparok mour eo an ke eaar je jebta kein. Etke eaar kōņaan je wāween laajrak in kōjeraam̧m̧an ko āinwōt kilen kōm̧m̧ani kain̄i ko? Kōļmenļo̧kjeņ ilo am̧ riiti Moronai 2–6. Etke kwoj ļōmņak laajrak kein raorōk n̄an Irooj? Erkein rej jet iaan kajjitōk ko me maron̄ tōl ekkatak eo am̧.
-
Kapene (Moronai 2; 6:4).Ta naan in kōmeļeļe eo an Rilo̧mo̧o̧r ilo Moronai 2:2 ej katakin eok kōn kain̄ eo an kapene? Ta eo kwoj ļōmņak ej meļeļe in n̄an “karreoik er jān kajoor eo an Jetōb Kwōjarjar”? (Moronai 6:4).
-
Ekkapit an priesthood (Moronai 3).Ta eo kwoj loe ilo jebta in me emaron̄ jipan̄ juon m̧aanjabpopo n̄an ekkapit n̄an priesthood eo? Ta eo kwoj loe me enaaj jipan̄ juon kōpopo n̄an kōm̧m̧ane juon kain̄i?
-
Kwojkwoj eo (Moronai 4–5; 6:6).Ta eo kwomaron̄ kōm̧m̧ane n̄an kōm̧m̧an bwe kwojkwoj eo en juon iien ejetōbtōb ilo wiik eo am̧?
-
Peptaij (Moronai 6:1–3).Ta eo kwoj kōm̧m̧an n̄an kōkarbab eok n̄an erreeo ņae peptaij?
Jisōs eaar katakin ekōjkan an kain̄i ko aikuj kōm̧m̧an.
Pedped ioon ta eo kwar ekaktak, ekōjkan am̧ naaj ukōt wāween ko kwoj ļōmņak, bōk kūņaam̧ ie, ak kōpooj ro jet n̄an kain̄i kein?
Bar lale Katak im Bujen Ko 84:20.
Kōmmālmel. Juon wāween em̧m̧an n̄an keememej ta eo kwoj ekkatak ej n̄an kōmeļeļeik n̄an ro jet. N̄an waanjon̄ak, kajjieon̄ arrin men in: eo m̧ōttam̧ ejjab jeļā n̄e epojak in peptaij. Elmen am̧ kōjerbal Moronai 6 n̄an jipan̄ e?
Bōk m̧ōttan kwojkwoj eo ej jipan̄ eō epaakeļo̧k Jisōs Kraist.
Bōlen em̧ōj am̧ ron̄ kōn jar in kwojkwoj eo elōn̄ alen, ak ewi emakijkij in am̧ lukkuun ļōmņak kōn ta meļeļein naan ko? Bōlen kwomaron̄ kajjieon̄ je jar in kwojkwoj eo jān ļōmņak eo am̧. Innām keidi ta eo kwaar je ippān Moronai 4:3 im 5:2. Kwoj ke keememej jabdewōt men kōn jar kein me rekar jab kar kile m̧okta?
Ļōmņak in kobaik juon al in kwojkwoj ilo am̧ katak, āinwōt “In Memory of the Crucified” (Hymns, no. 190).
Rikaļoor ro an Jisōs Kraist rej kea kōn jetōb ko an ro jet.
Kāālet eo n̄an ļoor Kraist ej an juon make, ak ritōmak ro remaron̄ jipan̄ kōj “ilo wāween eo ejim̧we” (Moronai 6:4–5). Ta eo membōr ro an Kabun̄ in ilo tōre ko an Moronai raar kōm̧m̧ane n̄an kōkajoor doon? Ilo am̧ riiti Moronai 6:4–9, kōļmenļo̧kjeņ kōn kōjeraam̧m̧an ko me rej itok jān “bōnbōn ilubwiljin armej ro an kabun̄ eo an Kraist” (Moronai 6:4).
Kwomaron̄ bar ļōmņak kōn armej ro rej kobatok ilo ward ak branch eo am. Ewōr ke jabdewōt ro raikuji iakwe eo am̧—bōlen juon eo ekāāl ak ej kab bar ro̧o̧ltok? Elmen am̧ jipan̄ kōm̧m̧an bwe en̄jake ko aer ilo jar en āinwōt ta eo Moronai ekar kōmeļeļeiki? (n̄an ļōmņak ko, lale My Covenant Path ak “Strengthening New Members” pija ko ilo Gospel Ļaibrāre). Kwomaron̄ lo jet ennaan ko reim̧we ilo jekjen I ilo ennaan eo an Būreejtōn Dallin H. Oaks “The Need for a Church” (Liahona, Nov. 2021, 24–25).
Ilo am̧ kōļmenļo̧kjeņ kōn ta meļeļein “naajdik er jān em̧m̧an eo an naan in Anij” (Moronai 6:4), emaron̄ jipan̄ n̄an ļōmņak kōn naajdik juon ine ak juon nin̄nin̄—im ta eo ej waļo̧k n̄e ej kowaane. Lale Moronai 6:4–9 n̄an ļōmņak ko kōn elmen am̧ maron̄ jipan̄ “naajdik” jetōb ko an ro jet. Elmen an rikaļoor ro m̧ōttam̧ kar jipan̄ n̄an naajdik eok?
Ejjab alikkar n̄an aolep etke eaorōk n̄an “bōnbōn ilubwiljin armej ro an kabun̄ eo an Kraist” im n̄an “kweilo̧k emmakijkij” ilo kweilo̧k ko an Kabun̄ in. Elmen am̧ naaj kōmeļeļeik etke kwoj kam̧m̧ool bwe kwoj juon membōr in Kabun̄ eo an Jisōs Kraist? (lale jekjen ko jet kōn ennaan eo an Būreejtōn Oaks “The Need of a Church”).
N̄an ļōmņak ko reļļapļo̧k, lale ennaan eo an allōn̄ in ilo Liaona im N̄an Kōkajoorļo̧k Jodikdik ro māākjiin.
Ļōmņak ko n̄an Katakin Ajri ro
Jetōb Kwojarjar ej menin letok eo ekwojarjar.
-
Jetōb Kwojarjar ak Jetōb ej waļo̧k elōn̄ alen ilo Moronai 2–6. Bōlen kwon kajjitōk ippān ajri ro nejum̧ n̄an pukot aolep eoon ko me rej kōnono kōn E, riiti, im kōlaajrake ta eo rejeļā kōn Jetōb Kwojarjar. Kwomaron̄ bar kwaļo̧k kōn en̄jake ko jet ke kwaar en̄jake im̧we eo an Jetōb.
Ij bōk kwojkwoj eo n̄an kwaļo̧k bwe inaaj iien otemjej keememej Jisōs Kraist.
-
Riiti jar in kwojkwoj eo ippān ajri ro nejum̧ emaron̄ tōlļo̧k n̄an juon ekōnono kōn elmen bōk eļapļo̧k en̄jake kōn kwojkwoj eo. Emaron̄ jipan̄ er n̄an ļōmņake bwe ewōr juon m̧ōttaer ej kab kein kajuon an itok n̄an kweilo̧k in kwojkwoj eo. Elmen aer maron̄ kōmeļeļeik n̄an eo m̧ōttaer ta meļeļein kwojkwoj eo im etke ekwojarjar? Rōjan̄ ajri ro nejum̧ n̄an kōjerbal jabdewōt men jān Moronai 4 ak 5 ilo kōmeļeļe ko aer. Ajri ro reddikļo̧k remaron̄ kōjerbal peij in m̧akūtkūt eo an wiik in ak Bok in Gospel Pija, no. 108.
-
Ļōmņak in al juon al ippān doon me ejipan̄ ajri ro nejum̧ ļōm̧ņak kōn Rilo̧mo̧o̧r eo (āinwōt “Reverently, Quietly,” Children’s Songbook, 26). Kwomaron̄ bar kaminene jijet im jab keroro ilo iien kwojkwoj eo.
Imaron̄ keppopo n̄an peptaij.
-
Wōn ro raikuj peptaij? Jipan̄ ajri ro nejūm̧ n̄an pukot uwaak ko n̄an kajjitōk in ilo Moronai 6:1–3. Ta meļeļein n̄an wōr juon “bōro eo erup im jetōb ettā”? (Moronai 6:2). Ekōjkan an menin jipan̄ kōj m̧aanjabpopo n̄an peptaij? Ļōmņak in ba n̄an ajri ro nejum̧ elmen am̧ kar keppopo n̄an peptaij.
Jej ilo̧k n̄an jikinjar n̄an bōk kwojkwoj eo im rie doon.
-
Ajri ro nejum̧ rejeļā ke ta unin am̧ etal n̄an jar? Riiti Moronai 6:4–6, 9 emaron̄ lewaj n̄an eok iien em̧m̧an n̄an kōnono ippān doon jet iaan men ko jej kōm̧m̧ani ilo jar. Bōlen remaron̄ jin̄aik aer make kōm̧m̧ane men kein (āinwōt jar, katakin, al, im bōk kwojkwoj eo).
-
Ālkin riiti Moronai 6:4 ippān doon, kwe im ajri ro nejum̧ maron̄ lale pija ko ak waanjon̄ak in naajdik m̧ōn̄ā ko im keidi n̄an naajdik ānbwinnid “naajdik jān em̧m̧an eo an naan in Anij.” Kwomaron̄ bar alooje pija eo “Children Sharing the Gospel” (Gospel Library).
N̄an ļōmņak ko reļļapļo̧k, lale ennaan eo an allōn̄ in ilo eo Jera māākjiin.
Moronai ilo Ron̄ eo, jān Jorge Cocco