Jān Nipai n̄an Moronai, aolep rikanaan an Bok in Mormon kar kallim̧ur n̄an jibadbad eo ekwojarjar kar kwaļo̧k ilo tukaduin ilo taitōl peij an bok eo: “kareel [aolep armej] bwe Jisōs Kraist ej RiKraist eo.” Juon rikanaan eaar lo E āinwōt juon jetōb ilo mour eo m̧okta, im bar juon eaar lo ļotak eo im jerbal in karejar eo An ilo juon visōn. Juon eaar jutak ioon wo̧o̧ļ eo n̄an kean̄ kōn kakōļļe ko kōn ļotak eo An im mej eo An, im bar juon eaar bukwelōlō im̧aan ānbwin jerkakpeje eo An un̄ur kinej ko ilo Pein, neen, im katūn. Aolepāer raar jeļā m̧ool in emenin aikuj: “ejjeļo̧k bar iaļ ak wāween eo im ie armej remaron̄ mour, kōn wōt bōtōktōkin pinmuur an Jisōs Kraist, eo … ej itok n̄an lo̧mo̧o̧ren laļ” (Hilamōn 5:9).
Kōn menin ilo tōre in iien Kūrijm̧ōj in, ilo an ro rej tōmak ipeļaakin laļ in kemem e em̧m̧an eo im iakwe eo an Anij n̄an jilkintok Nejin, kejekļo̧kjeņ ekōjkan an Bok in Mormon kar kōkajoorļo̧k tōmak eo am̧ ilo Kraist. Ilo am̧ ļōmņak kōn ļotak eo An, kejekļo̧kjeņ etke Eaar itok im ekōjkan an itok eo An kar ukōt mour eo am̧. Innām kwomaron̄ en̄jake m̧ool in lan̄lōn̄ eo an Kūrijm̧ōj—mennin letok eo me Jisōs Kraist eaar lewaj n̄an eok.
Ļōmņak ko n̄an Ekkatak ilo M̧weeo im ilo Kabun̄ in
Jisōs Kraist eaar lo̧tak bwe en aō Rilo̧mo̧o̧r.
Ej iminene n̄an riiti bwebwenato eo kōn ļotak eo an Rilo̧mo̧o̧r eo ilo Kallim̧ur Ekāāl ilo iien Kūrijm̧ōj, bōtaab kwomaron̄ barāinwōt lo naan in kanaan ko rekōm̧m̧akūt kōn iien in ekwojarjar ilo Bok in Mormon. N̄an waanjon̄ak, kanaan ko kōn ļotak eo an Rilo̧mo̧o̧r im jerbal in karejar eo rej waļo̧k ilo 1 Nipai 11:13–36; Mosaia 3:5–10; im Hilamōn 14:1–13. Ta en̄jake ko kōn Jisōs Kraist rej itok n̄an eok ilo am̧ riiti naan kein im kōļmenļo̧kjeņ kōn meļeļe ko kōn kakōļļe ko kōn ļotak eo An? Ekōjkan an naan in kam̧ool ko an rikanaan rein ilo Amedka etto kōkajoorļo̧k naan in kam̧ool eo am̧ kōn Kraist im mijen eo An?
Kwojeļā ke bwe kwomaron̄ alooje ennaan ko m̧okta jān Nokon in Jota in Kūrijm̧ōj eo an Būreejtōnji eo Kein Kajuon ilo Gospel Ļāibrāre eo? Kappukoti ilo “Christmas Videos” collection eo. Ļōmņak in kwaļo̧k ennaan im al ko n̄an kajedeed m̧ōņōņō ilo Kūrijm̧ōj.
Kwe im baam̧le eo am̧ maron̄ ron̄jake al ko kāāleti jān “Christmas Music” collection ilo Gospel Ļāibrāre eo.
Ļōmņak in karōk m̧akūtkūt ko me kwe im baam̧le eo am̧ maron̄ kōm̧m̧ani ilo raan ko im̧aan Kūrijm̧ōj eo n̄an en̄jake Jetōbin Kraist, eo āinwōt jerbal n̄an juon ak al al in Kūrijm̧ōj ko ippān doon. Lale LighttheWorld.org n̄an ļōmņak ko.
Unleplep in ad keememej ļotak eo an Jisōs Kraist ej kōn en̄taan in pinmuur eo An. Kōn wōt en̄taan in, E emaron̄ lo̧mo̧o̧ren kōj jān jerawiwi im mej, kaenōm̧m̧an kōj ilo en̄taan ko, im jipan̄ kōj “weeppān ilo E” (Moronai 10:32). Ta eo em̧ōj am̧ ekkatak jān Bok in Mormon iiō in kōn kajoor eo an Rilo̧mo̧o̧r eo n̄an lo̧mo̧o̧ren eok? Elōn̄ ke iaan bwebwenato ko ak katak ko realikkar n̄an eok? Ļōmņak kōn ta eo eoon kein rej katakin eok kōn mijen in pinmuur eo an Rilo̧mo̧o̧r: 2 Nipai 2:6; Alma 7:7–13; 11:40; im Hilamōn 5:9; 14:16–17. Ta eo kwoj en̄jake n̄an im̧we eok n̄an kōm̧m̧ane n̄an kwaļo̧k am̧ kam̧m̧oolol E?
Pija
pija in jemenere
Bok in Mormon eo ej kam̧ool kōn Jisōs Kraist.
“Bar Juon Kallim̧ur kōn Jisōs Kraist” eļapļo̧k jān baj juon taitōļ n̄an Bok in Mormon, ej juon ennaan kōn jibadbad eo an ekwojarjar. Kōļmenļo̧kjeņ kōn ta eo kwoj ekkatak jān eoon kein kōn mijen eo an Bok in Mormon n̄an kam̧ool kōn Kraist: 1 Nipai 6:4; 19:18; im 2 Nipai 25:23, 26; 33:4, 10.
Ļōmņak in je ilo juon jōnōļ ekōjkan ekkatak kōn Bok in Mormon ilo iiō in eaar kepaakļo̧k eok n̄an Kraist. En̄jake kein remaron̄ jipan̄:
“Juon men ekāāļ iaar ekkatak kōn Rilo̧mo̧o̧r eo iiō in eaar …”
“Ekkatak kōn Rilo̧mo̧o̧r ilo Bok in Mormon ekar ukōt wāween aō …”
“Armej eo em̧m̧antata ippa [ak bwebwenato] eo ilo Bok in Mormon me eaar katakin eō bwe Rilo̧mo̧o̧r ej …”
Bōlen ebar wōr juon emaron̄ kar jeraam̧m̧an n̄an jeļā ekōjan am̧ en̄jake kōn Bok in Mormon. Elmen am̧ kwaļo̧k en̄jake im naan in kam̧ool eo am̧? Kwomaron̄ en̄jake im̧we n̄an leļo̧k juon kape āinwōt juon menin leļo̧k ilo Kūrijm̧ōj. The Book of Mormon app ej kōm̧m̧an an pidodo kwaļo̧ke.
Bisop Gérald Caussé eaar kōlaajrake jet m̧ool ko jān Bok in Mormon kōn Jisōs Kraist (lale “Juon Rikam̧ool Emour kōn Kraist eo Emour,” Liaona, Māe 2020, 39–40). Kwomaron̄ lale laajrak eo an im kōļmenļo̧kjeņ elmen an kajjojo m̧ool kein kar oktak—ak kar ukōt—mour eo am̧.
Bar lale Unin Kōnono ko an Gospel in, “Bok in Mormon,” Gospel Ļaibrāre.
N̄an lomņak ko reļļapļo̧k, lale ennaan eo an allōn̄ in ilo Liaona im N̄an Kōkajoorļo̧k Jodikdik Ro māākjiin.
Jisōs Kraist ej menin letok eo an Jemedwōj Ilan̄ n̄an eō.
N̄an jipan̄ ajri ro nejūm̧ mije wōt menin letok eo an Jemedwōj Ilan̄ ekar letok n̄an kōj n̄an jilkintok Nejin, kwomaron̄ rāpe juon pijain Jisōs Kraist āinwōt juon menin leļo̧k ilo Kūrijm̧ōj. Kwe im ajri ro nejūm̧ maron̄ kōnono kōn mennin leļo̧k ko an Kūrijm̧ōj em̧m̧an ippāer raar būki ak kōtmene n̄an bōke. Innām remaron̄ kōjarļo̧k peba eo kilin pija eo an Kraist im ekōnono kōn ekōjkan An kar juon mennin letok aorōk n̄an kōj. Juon al āinwōt “Stand for the Right” (Children’s Songbook, 34– 34) maron̄ kobaik n̄an iien kōnono in. Jipan̄ ajri ro nejum̧ lale eoon ko ilo al eo me ej kōmeļeļeik kōjeraam̧m̧an ko ad kōn wōt lo̧tak eo an Jisōs.
Jisōs Kraist eaar lo̧tak bwe en aō Rilo̧mo̧o̧r.
Ajri ro nejūm̧ remaron̄ kōņaan kwaļo̧k n̄an eok ta eo rejeļā kōn ļotak eo an Jisōs. Ilo Bok in Gospel Pija ewōr jet pija ko remaron̄ jipan̄ er kwaļo̧k bwebwenato eo (lale nos. 28, 29, 30, 31). Kwomaron̄ bar lale pija in mour im en̄taan in pinmuur eo an Rilo̧mo̧o̧r. Etke Jemedwōj Ilan̄ eaar jilkintok Jisōs Kraist?
Ajri ro nejum̧ remaron̄ bar kōņaan jin̄a aer make pija in ļotak im jerbal in karejar eo an Jisōs. Bōlen remaron̄ jin̄aik ta eo ej kōmeļeļeik ilo 1 Nipai 11:13–23; Mosaia 3:5–10; Hilamōn 14:1–13; im 3 Nipai 1:4–22. Innām remaron̄ kwaļo̧k n̄an kwe ta pija ko aer rej katakin kōn Jisōs Kraist.
N̄an kwaļo̧k bwe Baibōļ im Bok in Mormon rej jim̧or kwaļo̧k kōn ļotak eo an Jisōs, kwomaron̄ kōlaajrake men ko kar kōmeļeļeiki ilo Luk 2:4–14; Matu 2:1–2; im 3 Nipai 1:15, 19–21. Jipan̄ ajri ro nejum̧ pukot eoon kein n̄an ļōmņake n̄e men kein raar waļo̧k ilo Betlem, Amedka, ak jim̧or. Etke jej kam̧m̧oolol bwe ewōr ippād Bok in Mormon āinwōt kein kam̧ool eo kein karuo kōn lo̧tak eo an Jisōs?
Em̧m̧an bwebwenato ippān ajri ro. Bwebwenato rej jet wāween ko rem̧m̧antata n̄an jipan̄ ajri ro jeļā im keememej m̧ool ko. Ilo am̧ kwaļo̧k bwebwenato in lo̧tak eo an Jisōs, bar ļōmņake in kwaļo̧k bwebwenato ko jān mour eo am̧ me ekar kōkajoorļo̧k tōmak eo am̧ ilo Rilo̧mo̧o̧r.
Bok in Mormon eo ej kam̧ool kōn Jisōs Kraist.
Ilo am̧ im ajri ro nejum̧ kadedeļo̧k ami ekkatak kōn Bok in Mormon iiō in, emaron̄ juon iien n̄an kwaļo̧k n̄an doon bwebwenato ko rem̧m̧an ippam̧ ak eoon ko jān bok in ekwojarjar. Lale jet iaan pija ko ilo Itok, Ļoor Eō ak Bwebwenato ko an Bok in Mormon remaron̄ jipan̄ ajri ro nejum̧ keememej ta eo raar ekkatak ilo iiō in. Jipan̄ er lo ta eo bwebwenato kein rej katakin kōj kōn Jisōs Kraist.
Kwomaron̄ bar leļo̧k n̄an ajri ro nejum̧ juon pijain Jisōs Kraist, ak kōtļo̧k bwe ren make jin̄a. Kajjitōk ippāer n̄an kotak pija ko aer kajjojo iien n̄e rej ron̄ etan Kraist ilo am̧ riiti 2 Nipai 25:23, 26. Kam̧ool bwe Bok in Mormon eaar jeje n̄an jipan̄ kōj “tōmak ilo Kraist” (2 Nipai 25:23).
N̄an ļōmņak ko reļļapļo̧k, lale ennaan eo an allōn̄ in ilo eo Jera māākjiin.
