Bwe Kom̧in Maron̄ Jeļā, jān Gary L. Kapp

Tijem̧ba 16–22: “Itok n̄an Kraist im Weppān ilo E”

Moronai 10

Bok in Mormon ej jino kōn kallim̧ur eo an Nipai n̄an kwaļo̧k n̄an kōj bwe “tūriam̧o an Irooj ej pād ioon aolep ro eaar kāālet, kōn aer tōmak” (1 Nipai 1:20). Bok in ej ikkilōk kōn juon karuwainene jān Moronai: “Keememej ekōjkan an Irooj kar tūriam̧okake” (Moronai 10:2–3). Ta waanjon̄ak ko an Irooj kōn tūriam̧okake kwaar loi ilo Bok in Mormon? Kwomaron̄ ļōmņake wāween an Anij tūriam̧o kake n̄an tōl baam̧le eo an Liai ilo āne jem̧aden im kijoon dān ko reļļap, tūriam̧o eo em̧m̧an Eaar kwaļo̧k n̄an Inōs ke eaar kwōle kōn jeorļo̧k bōd, ak tūriam̧o̧ eo Eaar kwaļo̧k n̄an Alma, eo eaar rikōjdāt an Kabun̄ eo me eaar erom juon iaan rikattōrak ro raar jab mijak n̄an jidik. Ak ļōmņak ko am̧ remaron̄ oktakļo̧k n̄an tūriam̧o eo an jerkakpeje Rilo̧mo̧o̧r eaar kwaļo̧k n̄an armej ro ke Eaar kemour rinan̄inmej ro aer im kōjeraam̧m̧an ajri ro nejier reddik. Bōlen men eo eaorōktata, aolep men kein remaron̄ kakeememej eok kōn “keememej ekōjkan an Irooj kar tūriam̧okake” n̄an kwe, bwe juon iaan jibadbad ko reļļap an Bok in Mormon ej n̄an kūr kajjojo iaad n̄an bōk tūriam̧o an Anij—kūr n̄an kwaļo̧k naan in iak-iakwe eo an Moronai eļem waan, “itok n̄an Kraist, im weeppān ilo e” (Moronai 10:32).

Ļōmnak ko n̄an Ekkatak ilo M̧weeo im ilo Kabun̄

Moronai 10:3–7

Imaron̄ jeļā m̧ool otemjeļo̧k kōn kajoor eo an Jetōb Kwojarjar.

Kallim̧ur eo ilo Moronai 10:3–7 eaar ukōt mour ko an milien armej ro ipeļaakin laļ in. Ekōjkan an kar ukōt mour eo am̧? Ilo am̧ riiti Moronai 10:3–7, ļōmņak in lukkuun riiti jen ke kwaar m̧okta. Kwomaron̄ etale kajjojo naan, kajjitōk ippam̧ make kajjitōk ko āinwōt kein: Ta meļeļe in? Ekōjkan aō maron̄ kōm̧m̧ane menin em̧m̧anļo̧k? Ta en̄jake ko em̧ōj aō būki jān menin?

Ilo am̧ kōļmenļo̧kjeņ ilo am̧ lale make jetōbin m̧ool, emaron̄ jipan̄ eok katak n̄an jeļā elmen an ro jet kar loe m̧ool eo kōn kajoor eo an Jetōb Kwojarjar. Elder Mathias Held eaar kōmeļeļeik en̄jake in an āinwōt juon membōr ekāāl an Kabun̄ in (lale “Seeking Knowledge by the Spirit,” Liaona, Māe 2019, 31–33). Elder David F. Evans eaar kōmeļeļeik en̄jake in an āinwōt juon eo ekar rūttoļo̧k ilo Kabun̄ in ak ekar wōr wōt an kajjitōk (lale “The Truth of All Things,” Liaona, Nob. 2017, 68–70). Ļōmņak in riiti juon ak jim̧or ennaan ko im je jabdewōt men kwoj katak jān aer kappukot m̧ool eo me ejipan̄ eok je.

Kwomaron̄ bar pukot ta eo Anij eaar kwaļo̧k kōn m̧ool jen riiti jet iaan eoon ko ilo Unin Tōl n̄an Jeje ko Rekwojarjar, “M̧ool” (Gospel Ļāibrāre). Ewi eoon ko eļap aer juktok ilo ļōmņak eo am̧? Bōlen kwomaron̄ bōk juon n̄an kwaļo̧k n̄an ro jet me rej pukot m̧ool eo ilo Jetōb.

Bar lale Henry B. Eyring, “Tōmak eo n̄an Kajjitōk Innām n̄an Kōm̧m̧ane,” Liaona, Nob. 2021, 74–76; “Let the Holy Spirit Guide,” Hymns, no. 143; Unin Kōnono ko an Gospel, “Seek Truth and Avoid Deception,” Gospel Ļaibrāre.

Je Men ko Reim̧we. Oktak n̄an gospel eo an Jisōs Kraist ej meļeļein jim̧or jeļā im mour kake gospel in. Enij ļapļo̧k am̧ kōm̧m̧ane ta eo kwoj katak n̄e kwoj je. N̄e kwoj katakin, karuwaineneik armej ro kwoj katakin n̄an je jetōbin im̧we ko aer.

Moronai 10:8–25

Anij eaar letok n̄an eō menin letok ko an jetōb

Ekanooj lōn̄ wāween ko juon armej emaron̄ “kaarmejjete … mennin letok ko an Anij” (Moronai 10:8). Jet armej rej kaarmejjete bwe menin letok kein rejjab waļo̧k. Ro jet rej kaarmejjete menin letok ko aer jān kowaani ak likjab in kōļapiļo̧k. Ilo am̧ riiti Moronai 10:8–25, pukōt m̧ool ko me renaaj jipan̄ eok lo mennin letok ko am̧ ilo jetōb im kōjerbali n̄an kōjeraam̧m̧an ro nejin Anij. Kajjitōk ko āinwōt kein emaron̄ jipan̄: Ta mennin letok ko an jetōb? Wōn ro rej leļo̧k n̄an er? Etke rej leļo̧k n̄an er? Elmen ad buki? Kwomaron̄ ke ļōmņake waanjon̄ak in armej ro rej kōjerbal menin letok ko relaajrak ilo Moronai 10:9–16?

Moronai 10:30–33

Imaron̄ weeppān kōn jouj eo an Jisōs Kraist.

Kapilōk eo an Moronai n̄an “itok n̄an Kraist” eļapļo̧k jen baj ekkatak im ļōmņak kōn E. Ijello̧kin, en̄in ej kūr eo n̄an itok n̄an Kraist ilo jekjek eo edipio tata emaron̄ in—n̄an erom āinwōt E ej. Ilo am̧ riiti Moronai 10:30–33, keememej eoon ko me rejipan̄ eok meļeļe ta meļeļein itok n̄an Kraist, elmen an pidodo, im uwaak ko n̄an kōm̧m̧ani.

Relikļo̧k ilo am̧ katak Bok in Mormon iiō in, im kōļmenļo̧kjeņ ta eo kwaar en̄jake im kar katak kōn Jisōs Kraist. N̄an waanjon̄ak, elmen an kar Bok in Mormon jipan̄ eok itok n̄an E? Elmen an kar jipan̄ eok pedped ioon jouj eo An? Elmen an kar jipan̄ eok n̄an “jab kaarmejjete” kajoor eo an Rilo̧mo̧o̧r? Ļōmņak in kwaļo̧k kam̧ool eo am̧ make kōn Bok in Mormon ippān ro jet rej aikuj in ron̄, ekoba ro rejitenbōro im ro m̧ōttam̧ me rejjan̄in jeļā kōn ennaan eo ie.

Bar lale “Moroni Invites All to Come unto Christ” (video), Gospel Ļaibrāre.

N̄an ļōmņak ko reļļapļo̧k, lale ennaan eo an allōn̄ in ilo Liaona im N̄an Kōkajoorļo̧k Jodikdik Ro māākjiin.

Ļōmņak ko n̄an Katakin Ajri ro

Moronai 10:3–4

Imaron̄ jeļā ippa make bwe Bok in Mormon ej m̧ool.

• Elmen am̧ maron̄ jipān̄ ajri ro nejum̧ bōk kūr eo an Moronai n̄an kajjitōk ippān Anij eļan̄n̄e Bok in Mormon ej m̧ool? Ļōmņak in leļo̧k n̄an er jidik peba ippān naan ko Riit, Keememej, Kōļmenļo̧kjeņ, im Kajjitōk em̧ōj je ioer. Ajri ro nejum̧ remaron̄ lale naan kein ilo Moronai 10:3–4. Ta eo jej aikuj riiti, keememeje, kōļmenļo̧kjeņ, im kajjitōk n̄an bōke ak kōkajoorļo̧k naan in kam̧ool ko ad kōn Bok in Mormon? Ajri ro nejum̧ remaron̄ barāinwōt kappukot ejjeļo̧k oktak ko kōtaan eoon kein im al “Search, Ponder, and Pray” (Children’s Songbook, 109).

• Ajri ro nejum̧ remaron̄ kōjebal pija eo ilo jemļo̧kin laajrak in n̄an kōnono kake an Moronai kalbwin pilej gold ko (bar lale “Jebta 54: The Promise of the Book of Mormon,” Bwebwenato ko an Bok in Mormon, 156). Ajri ro reddik remaron̄ m̧ōņōņō in katen wōt n̄e er Moronai ej jeje ioon pileij ko im kalbwini. Kwaļo̧k n̄an doon naan in kam̧ool ko ami kōn Bok in Mormon.

Moronai 10:8–19

Jemedwōj Ilan̄ ej letok n̄an eō menin letok ko an jetōb.

• N̄an katakin ajri ro nejum̧ kōn menin letok an jetōb, kwomaron̄ je nōm̧ba 9 n̄an 16 ioon bar jet peba im rāpi kajjojo peba āinwōt juon menin leļo̧k. Ajri ro nejum̧ remaron̄ bōk kuņaer n̄an kōppeļo̧k menin leļo̧k eo aer, riiti eoon ko jān Moronai 10:9–16 me ekkar n̄an nōm̧ba ko, im kalikkar kajjojo menin letok. Kwomaron̄ kōnono elmen an Jemedwōj Ilan̄ kōņaan bwe jen kōjerbal menin letok ko n̄an kōjeraam̧m̧an ro Nejin. Kwomaron̄ bar jipan̄ ajri ro nejum̧ keememej menin letok ko me Jemedwōj Ilan̄ eaar liļo̧k n̄an er.

Moronai 10:32–33

Jisōs Kraist ekōņaan bwe in itok n̄an E.

• Ajri ro nejum̧ rejeļā ke ta meļeļein n̄an “itok n̄an Kraist”? Bōlen kwomaron̄ riiti Moronai 10:32 im kajjitōk ippāer n̄an āliji eoon ko ippam̧. Innem remaron̄ kilōke mejeer ilo am̧ likūt juon pija in Jisōs jabdewōt jikin ilo ruum̧ eo. Innām ren kōppeļo̧k mejeer, pukot pija eo, kuktok ipeļakin, im kōnono kōn wāween ko me jemaron̄ itok n̄an Kraist. Bōlen enaaj jipan̄ n̄an je kajjitōk ko Ta meļeļe n̄an itok n̄an Kraist? Jipan̄ er lale Moronai 10:32–33 n̄an lale uwaak ko rekkar Laajrak in Tōmak Ko 1:3–4). Jerbal ippān doon n̄an kōlaajraki ta eo Kraist ekōņaan bwe jen kōm̧m̧ane im ta eo Ej kallim̧uri n̄an kōm̧m̧ane n̄an kōj.

• Bōlen ajri ro nejum̧ remaron̄ kōņaan kainōknōke pāāj eo aer annan̄ in menono me ej ba “Ij iakwe Anij kōn aolepen aō, aolepen aō ļōm̧ņak, im aolepen aō kajoor” (lale Moronai 10:32). Ilo aer kōm̧m̧ane, kōnono ippāer kōn elmen ad kwaļo̧k n̄an Anij ke jej iakwe E.

N̄an ļōmņak ko reļļapļo̧k, lale ennaan eo an allōn̄ in ilo eo Jera māākjiin.

M̧okta jen an kalbwini ļo̧o̧k ko, Moronai eaar karuwaineneik kōj n̄an “keememej ekōjkan an Irooj kar tūriam̧okake” (Moronai 10:3)