Mo Dou Kila Kina, mai vei Gary L. Kapp

16–22 ni Tiseba: “Lako Mai vei Karisito, ka Vakataucokotaki Vua”

Moronai 10

A dolava na iVola i Momani vata kei na yalayala nei Nifai me vakaraitaka vei keda ni “sa yalololoma dina na Turaga vei ira kecega sa digitaka ko koya, ena vuku ni nodra vakabauta” (1 Nifai 1:20). E sogo na ivola oqo ena dua na veisureti vakatauvatani mai vei Moronai: “Mo nanuma tiko na nona loloma na Turaga” (Moronai 10:2–3). Na ivakaraitaki cava ni loloma veivueti ni Turaga o sa raica ena iVola i Momani? E rawa ni o vakasamataka vakatitobu na sala e veiliutaki kina ena yalololoma na Kalou ki na matavuvale nei Liai ena nodratou i lakolako ki na lekutu ka takosova yani na wasaliwa, na Nona yalololoma e vakaraitaka vei Inosi ena gauna a vakasaqara vagumatua na yalona me vosoti, se na yalololoma e vakaraitaka o Koya vei Alama, e dua na meca kaukauwa ni Lotu ka qai yaco me dua vei ira na dau tu taka na lotu ena yaloqaqa. Se e rawa ni o vagolea na nomu vakasama ki na loloma veivueti e vakaraitaka na iVakabula sa tucaketale kivei ira na tamata ena gauna sa vakabulai ira na tauvimate ka vakalougatataki ira na gone lalai. E rairai bibi duadua, ni veika kece oqo ena rawa mo vakananuma “na nona loloma na Turaga” vei iko, ia e dua na inaki bibi ni iVola i Momani e sureti keda yadua meda ciqoma na loloma ni Kalou—e dua na veisureti ka vakaraitaka e na vosa ni vakamoce nei Moronai , “Dou lako mai vei Karisito, ka mo dou vakataucokotaki vua” (Moronai 10:32

iDusidusi ni Veivakavulici ena iTikotiko ka vakakina e Vale

Moronai 10:3–7

Au sa rawa ni kila na ka dina ena kaukauwa ni Yalo Tabu.

Sa veisautaka na nodra bula e milioni na tamata e vuravura taucoko na yalayala e tiko ena Moronai 10:3–7. Esa veisautaka vakacava na nomu? Ni o wilika na Moronai 10:3–7, sa rawa mo wilika vakavinaka cake mai na veigauna sa oti. Sa rawa mo dikeva na malanivosa yadua, ni o tarogi iko na taro: Na cava e kena ibalebale oqo? Ena rawa vakacava niu cakava vakavinaka cake? Na cava soti au sa sotava vata mai na veika oqo?

Ni ko vakasamataka vakatitobu na nomu vakasaqara vakai iko na dina vakayalo, ena rawa ni veivuke mo vulica na sala era sa kunea kina na tani na dina ena kaukauwa ni Yalo Tabu. E vakamacalataka o Elder Mathias Held na veika a sotava vaka dua na lewe ni Lotu vou (raica na “Vakasaqara na Kilaka ena Yalotabu,” Liaona, Me 2019, 31–33). E vakamacalataka o Elder David F. Evans na veika a sotava me vaka e dua ka a susugi cake ena Lotu ia se tu ga na nona vakatataro (raica na “Na Dina ni Veika Kecega,” Liaona, Nove. 2017, 68–70). Vakasamataka mo wilika e dua se ruarua na itukutuku oqo ka vola e dua na ka o vulica mai na nodra vakasaqaqara me baleta na dina e vukei iko vata kei na nomu.

E rawa talega ni o vakadikeva na veika sa vakavulica na Kalou me baleta na dina ena nomu wilika eso na malanivosa ena iDusidusi ki na iVolanikalou, “Dina” (Valenivola ni Kosipeli). Na ivolanikalou cava e vaka me veivakararamataki vei iko? Sa rawa mo digitaka e dua mo wasea vua e dua tale e vakasaqara tiko na dina ena Yalotabu.

Raica talega Henry B. Eyring, “Na Vakabauta mo Kerea ka qai Cakacakataka,” Liaona, Nove. 2021, 74–76; “Yalo Tabu Liutaka,” Sere ni Lotu, naba 81; Ulutaga vakosipeli, “Vakasaqara na Dina ka Levea na Veicavilaki,” Valenivola ni Kosipeli.

Vola na Veivakauqeti. Na saumaki mai ki na kosipeli i Jisu Karisito e kena ibalebale ruarua na kilai kei na bulataki ni kosipeli. Ena rawa ni o cakacakataka na veika o vulica kevaka o vola. Kevaka o veivakavulici tiko, sureti ira o vakavulica me ra vola na nodra vakauqeti vakayalo.

Moronai 10:8–25

Na Kalou sa solia vei au na isolisoli vakayalo eso.

E vuqa tu na sala e rawa vua e dua na tamata me “cakitaka … na isolisoli ni Kalou” (Moronai 10:8). Era cakitaka eso na tamata ni tiko dina na isolisoli oqo. Eso tale era cakitaka na nodra isolisoli ena nodra vakawaletaka se ena nodra sega ni vakatorocaketaka. Ni o wilika na Moronai 10:8–25, vaqara na dina ena vukei iko mo raica na nomu isolisoli vakayalo ka vakayagataka ena kaukauwa levu cake me vakalougatataki iko kei ira tale eso. Na taro vakaoqo ena rawa ni veivuke: Na cava soti na isolisoli vakayalo? Era dau soli vei cei? Cava na vuna era gugumatua tiko kina? Me da vukei ira vakacava? E rawa beka ni o vakasamataka na ivakaraitaki ni tamata era vakayagataka tiko na isolisoli e volai tiko ena Moronai 10:9–16?

Moronai 10:30–33

Sa rawa niu vakataucokotaki ena loloma soliwale i Jisu Karisito.

Na ivakasala nei Moronai meda “lako mai vei Karisito” e okati kina e levu cake sara mai na kena vulici ka vakasamataki o Koya. Ia, oqo e dua na veisureti me ra lako mai vei Karisito ena kena vakasama taucoko sara e rawa—ka me yaco meda vakataki Koya. Ni o wilika na Moronai 10:30–33, raica na veimalanivosa e vukei iko mo kila na ibalebale ni lako mai vei Karisito, na sala e rawati kina, kei na kena macala ni da cakava vakakina.

Raica lesu na nomu vulica na iVola i Momani ena yabaki oqo, ka vakasamataka vakatitobu na veika o sa vakila ka vulica me baleti Jisu Karisito. Me ivakaraitaki, e sa vukei iko vakacava na iVola i Momani mo lako mai Vua? E sa vukei keda vakacava na ka oqo meda vakararavi vakataucoko ena loloma soliwale i Karisito? E sa vukei keda vakacava meda “kakua ni cakitaka” na kaukauwa ni iVakabula? Sa rawa mo wasea na nomu ivakadinadina ni iVola i Momani vata kei na dua e gadreva me rogoca, oka kina o ira na daulomani kei na itokani era sega ni kila na kena itukutuku.

Raica talega na “Sureti Ira Kece na Lako Mai vei Karisito o Moronai” (vidio), Valenivola ni Kosipeli.

Me baleta na vakasama tale eso, raica na ilavelave ni vula oqo ni Liaona kei na mekasini ni Me iSakisaki ni iTabagone .

Vakatutu baleta Nodra Tuberi na Gonelalai

Moronai 10:3–4

Au rawa ni kila vakataki au ni dina na iVola i Momani.

• Vaqara na sala me ra vukei kina na gone me ra ciqoma na veisureti nei Moronai me taroga vua na Kalou kevaka e dina na iVola i Momani? Sa rawa mo solia vei ira na tiki ni pepa e tiko kina na vosa Wilika, Nanuma, Vakasamataka vakatitobu, ka Taroga na veika sa volai tu kina. Sureti ira na gone me ra kunea na veivosa oqo ena Moronai 10:3–4 Na cava me da wilika, nanuma, tugana, ka kerea me da rawata kina se vaqaqacotaka na noda ivakadinadina ni iVola i Momani? Kerei ira na gone me ra vakaraica na tautauvata na tikina oqo kei na sere “Vaqaqara ka Masu” (Nodra iVolanisere na Lalai, 66).

• E rawa ni ra vakayagataka na luvemu na iyaloyalo ena mua ni idusidusi oqo me veivosakitaki kina na nona buluta tiko o Moronai na peleti koula (raica talega na “Wase54: Na Yalayala ni iVola i Momani,” iTalanoa ni iVola i Momani, 156). Era na marautaka na gonelalai me ra sa vakai Moronai ni volavola ena peleti ka laki buluti ira. Mo ni veiwaseitaka na nomuni ivakadinadina me baleta na iVola i Momani.

Moronai 10:8–19

Na Tamada Vakalomalagi e solia vei au na isolisoli vakayalo.

• Me vakavulici ira na luvemu me baleta na isolisoli vakayalo, sa rawa mo vola na naba 9 ki na 16 ena veitiki ni pepa yadua ka ovica na pepa yadua me vaka e dua na iloloma. E rawa ni ra veivukevuke na luvemu ena kena cereki na isolisoli, wilika na veitikina mai na Moronai 10:9–16 ka salavata kei na iwiliwili, ka raica na isolisoli vakayalo yadua. E rawa ni o veivosakitaka na sala e vinakata na Tamada Vakalomalagi meda vakayagataka kina na veisolisoli oqo me vakalougatataki ira na Luvena. E rawa talega ni o vukei ira na luvemu me ra raica na isolisoli sa solia vei ira na Tamada Vakalomalagi.

Moronai 10:32–33

E vinakati au o Jisu Karisito meu lako mai ki Vua.

• Era sa kila vakamatata tu li o ira o vakavulica na ka e vakaibalebaletaki ena lako mai vei Karisito? Sa rawa mo wilika na Moronai 10:32 ka sureti ira mera tokaruataka vata kei iko na malanivosa. Kerei ira me ra bobo ni o biuta e dua na iyaloyalo kei Jisu ena dua na vanua ena loma ni rumu. Me ra qai dolava na matadra, raica na iyaloyalo, sokumuna wavokita, ka veivosakitaka na sala eso eda rawa ni lako mai kina vei Karisito. Ena rawa beka ni veivuke me volai na taro Na cava na ibalebale ni lako mai vei Karisito? Vukei ira mera vakasaqara ena Moronai 10:32–33 na isaunitaro e rawa ni saumi (raica talega na Yavu ni Vakabauta 1:3–4). Ni cakacaka vata me vola na cava e vinakata na Karisito meda cakava kei na Nona yalayala me cakava ena vukuda.

• Vukei ira na gone me ukutaka na beji buli vaka-uto ka kaya “Au lomana na Kalou ena noqu igu taucoko, vakasama, kei na kaukauwa” (raica naMoronai 10:32). Ni ra vakayacora vakakina, veitalanoataka vata kei ira na sala eda vakaraitaka kina vua na Kalou ni da lomani Koya.

Me baleta na vakasama tale eso, raica na ilavelave ni vula oqo ena mekasini ni iTokani .

Ni bera ni buluti na ivolatukutuku, a sureti keda o Moronai meda “nanuma tiko na nona loloma na Turaga” (Moronai 10:3)