O Josefa, o Meri, kei na gonelailai o Jisu ena dua na vale ni manumanu

Raica na Lami ni Kalou, mai vei Walter Rane

Siganisucu: “Ena Lako Mai ki Vuravura me Tasereki Ira na Nona Tamata”

Siganisucu

Mai na Nifai ki na Moronai, era yalodina na parofita yadua ena iVola i Momani ena itavi tabu ni vakalekalekataki na ivola tabana ni ulutaga: “me vakadinadinataki kina vei ira na [tamata] ni o Jisu sai koya na Karisito.” A raici Koya e dua na parofita me vaka e dua na yalo taumada, ka dua tale a raica na Nona sucu kei na Nona cakacaka ena dua na raivotu. A tucake e na lalaga me rau vunautaka na ivakatakilakila ni Nona sucu kei na Nona mate e dua, ia e dua tale a tekiduru e na yagona sa vakaturi cake tale, ka tara na we ni mavoa e ligana, yavana, kei na yasana. Ko ira kece sa kila na dina bibi oqo: “Sa sega ni dua tale na sala se kaukauwa me vakabulai kina na tamata, ena dra ni veisorovaki duadua i Jisu Karisito, o koya ena … lako mai me sereki ira na kai vuravura” (Ilamani 5:9).

Ena gauna ni Siganisucu oqo, ena nodra marautaka wavoliti vuravura na vakabauta vakarisito na vinaka ni loloma ni Kalou ena Nona tala mai na Luvena, ka vakasamataka sa vakaukauwataka vakacava na iVola i Momani na nomu vakabauti Karisito. Ni o vakasamataka na Nona sucu, vakananuma vakatitobu na cava na vuna e lako mai kina o Koya kei na ivakarau sa veisautaka na nomu bula. Sa na qai rawa ni o vakila na marau dina ni Siganisucu—na isolisoli sa solia vei iko o Jisu Karisito.

Vakasama eso ni Vuli e Vale vakakina ena Lotu

Ea sucu ko Jisu Karisito me noqu iVakabula.

E kena ivakarau me wiliki na italanoa ni sucu ni iVakabula ena Veiyalayalati Vou ena gauna ni Siganisucu, ia sa rawa mo raica na parofisai ni veika tabu vakalou oqo ena iVola i Momani. Me kena ivakaraitaki, era tiko kina na vei parofisai ni nona sucu kei na ilesilesi ni iVakabula ena 1 Nifai 11:13–36; Mosaia 3:5–10; Ilamani 14:1–13. Na vakasama cava e lako mai vei iko me baleti Jisu Karisito ni o wilika na veitikina oqo ka vakasamataka na kena ibalebale me baleta na ivakatakilakila ni Nona sucu? E yaco vakacava na nodra ivakadinadina na parofita oqo e Amerika makawa me vaqaqacotaka na nomu ivakadinadina me baleta na Karisito kei na Nona ilesilesi?

Oqo eso tale na vakatutu me vukei iko mo vakanamata vei Jisu Karisito ena gauna ni Siganisucu:

• O kila beka ni rawa ni o sarava na itukutuku mai na lotu ni Siganisucu ni Mataveiliutaki Taumada sa oti ena Valenivola ni Kosipeli? Vakaraica ena ikumuni ni “Vidio ni Siganisucu” Sa rawa mo wasea na itukutuku kei na sereivakatagi oqo me vakatetei kina na marau ni Siganisucu.

• Sa rawa talega vei iko kei na nomu matavuvale mo dou taleitaka na vakarorogo ki na veitikina digitaki eso mai na “Sereivakatagi niSiganisucu” ena Valenivola ni Kosipeli.

• Ena marautaki me ra tuvanaka na itaviqaravi vakamatavuvale e rawa ni caka ena veisiga volekata na Siganisucu me ra vakila na Yalo i Karisito, me vaka na veiqaravi vua e dua, se lagati vata na sere ni Siganisucu. Raica na LighttheWorld.org me baleta na vakasama eso.

Raica talega na Maciu 1:18–25; 2; Luke 2; 3 Nifai 1:4–22; “Vakayawa ena Manumanu,” Sere ni Lotu, naba 118.

O Jisu Karisito e iVakabula kei vuravura.

Na vuna levu duadua eda marautaka kina na sucu i Jisu Karisito sai koya na Nona isoro ni veivakaduavatataki. Ena vuku ni solibula oya, sa rawa ni vakabulai keda o Koya mai na ivalavala ca kei na mate, vakacegui keda ena veivakararawataki, ka vukei keda meda “vakataucokotaki Vua” (Moronai 10:32). Na cava o sa vulica mai na iVola i Momani ena yabaki oqo me baleta na kaukauwa ni iVakabula me vakabulai iko? E tiko beka na italanoa se ivakavuvuli e matalia vei iko? Vakasamataka na cava beka e vakavulica vei iko na ilesilesi ni Vakabula na ivakaraitaki eso oqo: 2 Nifai 2:6; Alama 7:7–13; 11:40kei na Ilamani 5:9; 14:16–17. Na cava o vakauqeti kina mo cakava me vakaraitaka vei Koya na nomu vakavinavinaka?

ivakatakilakila ni semineri

Na iVola i Momani e ivakadinadinataki Jisu Karisito.

“E dua tale na ivakadinadina kei Jisu Karisito” e sega walega ni dua na iulutaga lailai me baleta na iVola i Momani; ia e dua na itukutuku ni kena inaki vakalou. Vakasamataka vakatitobu na veika o sa vulica mai na ivolanikalou oqo me baleta na inaki ni iVola i Momani me vakadinadinataki Karisito: 1 Nifai 6:4; 19:18; kei na 2 Nifai 25: 23, 26; 33: 4, 10.

Sa rawa mo vola ena ivolaniveisiga na kena vulici na iVola i Momani ena yabaki oqo sa vakavolekataki iko vakacava vei Karisito. E rawa ni veivuke na vakatutu eso oqo:

• “E dua na ka vou au vulica me baleta na iVakabula ena yabaki oqo e a …”

• “Na vulici ni iVakabula ena iVola i Momani a veisautaka na ivakarau ni noqu ”

• “Noqu tamata taleitaki [se italanoa] ena iVola i Momani e vakavulici au ni na iVakabula ena …”

Ena rairai tiko beka e dua ena vakalougatataki me kila na veika o vakila me baleta na iVola i Momani. O na wasea vakacava na veika o sa sotava kei na ivakadinadina? O na vakauqeti beka mo solia e dua na ilavelave me iloloma ni Siganisucu. Na app ni iVola i Momani e vakarawarawataka na veiwasei.

Bisopi Gérald Caussé e tuva e vica na dina mai na iVola i Momani me baleti Jisu Karisito (raica na “E Dua na iVakadinadina Bula ni Karisito Bula,” Liaona, Me 2020, 39–40). O na raica beka na nona lisi ka vakasamataka vakatitobu na sala sa veisau kina na veidina yadua oqo—se rawa ni veisau—nomu bula.

Raica talega na Ulutaga Vakosipeli, “iVola i Momani,” Valenivola ni Kosipeli.

Me baleta na vakasama tale eso, raica na ilavelave ni vula oqo ni Liaona kei na mekasini ni Me iSakisaki ni iTabagone .

Vakatutu baleta Nodra Tuberi na Gonelalai

O Jisu Karisito na isolisoli ni Tamada Vakalomalagi vei au.

• Me vukea na nomu matavuvale na vakanamata ki na isolisoli sa solia vei keda na Tamada Vakalomalagi ena nona vakauta mai na Luvena, sa rawa ni ologi e dua na iyaloyalo i Jisu Karisito me vaka e dua na iloloma ni Siganisucu. Sa rawa ni veivosakitaka na lewe ni matavuvale nai loloma taleitaki era sa ciqoma se namaka me ra ciqoma. Sa qai rawa ni cereki nai itaba i Karisito ka veitalanoataka na o Koya sai loloma uasivi vei keda. E dua na sere me vaka na “Tala Mai Na Luvena” (Nodra iVolanisere na Lalai, 20) e rawa ni vakuria na veivosaki oqo. Dusia vei ira na gone na malanivosa ni sere e vakamacalataka na veivakalougatataki sa tu vei keda me baleta na sucu i Jisu.

Ea sucu ko Jisu Karisito me noqu iVakabula.

• Era na marautaka beka na luvemu me ra wasea vata kei kemuni na veika era kila me baleta na sucu i Jisu. Na iVola ni iYaloyalo Vakosipeli e tiko kina e vica na iyaloyalo ka rawa ni vukei ira me ra talanoataka na italanoa (raica na naba 28, 29, 30, 31). E rawa talega ni o raica na iyaloyalo eso e tukuna tiko na bula ni iVakabula kei na solibula veisorovaki. Na cava na vuna e talai Jisu Karisito kina na Tamada Vakalomalagi?

• Era na marautaka talega na luvemu me ra droinitaka na kedra iyaloyalo ni sucu kei na veiqaravi i Jisu. Sa rawa mera droinitaka na veika e vakamacalataki tiko ena 1 Nifai 11:13–23; Mosaia 3:5–10; Ilamani 14:1–13; kei na 3 Nifai 1:4–22. Sa rawa ni ra qai wasea vei iko na veika e vakavulica na nodra iyaloyalo me baleti Jisu Karisito.

• Me vakamatatataki ni iVola Tabu kei na iVola i Momani erau vakavulica ruarua na sucu i Jisu, sa rawa mo vola na veika e vakamacalataki ena Luke 2:4–14; Maciu 2:1–2; kei na 3 Nifai 1:15, 19–21. Vukei ira na gone mera vakasaqara na ivolanikalou oqo me kila kina se na veika e a yaco mai Peceliema, Amerika, se o rau ruarua. Na cava na vuna eda sa vakavinavinakataka tiko kina na iVola i Momani ni ikarua ni ivakadinadina ni sucu nei Jisu Karisito?

Era dau taleitaka na gone na italanoa. Na italanoa e tiko e dua na sala vinaka duadua me vukei ira na gone me ra vulica ka nanuma tiko na dina. Ni ko wasea na italanoa ni sucu i Jisu, vakasamataka mo wasea talega na italanoa mai na nomu bula ka sa vukea na kena vaqaqacotaki na nomu vakabauta na iVakabula.

Na iVola i Momani e vakadinadinataki Jisu Karisito.

• Ni o sa tinia kei ira na luvemuni na nomuni vulica na iVola i Momani ena yabaki oqo, e rawa ni dua na gauna vinaka mo ni veiwaseitaka kina vakai kemuni na nomuni italanoa taleitaki se malanivosa mai na ivola tabu oqo. Ni raici eso na iyaloyalo ena Lako Mai, Mo Muri Au se iTalanoa ni iVola i Momani ena rawa ni vukei ira na luvemu me ra nanuma tiko na veika era sa vulica tiko ena yabaki oqo. Vukei ira me ra raica na veika e vakavulica vei keda na italanoa oqo me baleti Jisu Karisito.

• Sa rawa talega mo solia vei ira na luvemu e dua na iyaloyalo kei Jisu, se mera droinitaka ga vakai ira. Sureti ira me ra taura cake tu na nodra iyaloyalo ena gauna era rogoca na yaca i Karisito ni ko wilika na 2 Nifai 25: 23, 26. Vakadinadinataka ni a volai na iVola i Momani me vukei keda meda “vakabauta na Karisito” (2 Nifai 25: 23).

Me baleta na vakasama tale eso, raica na ilavelave ni vula oqo ena mekasini ni iTokani .

sa vakaraitaka tiko vei Nifai e dua na agilosi na Yalewa savasava o Meri ena raivotu

Na raivotu nei Nifai me baleta na Yalewa savasava o Meri,, mai vei Judith A. Mehr

tabana ni itaviqaravi: O ira na parofita ni iVola i Momani era vakatavulica na ilesilesi i Jisu Karisito.