25 ni Noveba–1 ni Tiseba: “Sa Vakayacori Rawa na Ka Kecega ena Vakabauta” Ica 12–15
25 ni Noveba–1 ni Tiseba: “Sa Vakayacori Rawa na Ka Kecega ena Vakabauta” Ica 12–15,” Lako Mai, Mo Muri Au—Me Vulici e Vale kei na Lotu: iVola i Momani 2024 (2023)
“25 ni Noveba-1 ni Tiseba Ica 12–15,” Lako Mai, Mo Muri Au—Me Vulici e Vale kei na Lotu: 2024 (2023)
iVakatakilakila
Sa curu ki na dua na qaravatu o Ica
O Ica ni Vuni Tiko ena Qara ni Vatu, mai vei Gary Ernest Smith
25 ni Noveba-1 ni Tiseba: “Sa Vakayacori Rawa na Ka Kecega ena Vakabauta”
E parofisaitaka o Ica vei ira na Jeretaiti na veika “lelevu ka talei” (Ica 12:5). A “tukuna vakaidina vei ira na veika kece mai na ivakatekivu ni tamata” (Ica 13:2). A raica taumada “na gauna i Karisito” kei na dua na Jerusalemi Vou (Ica 13:4). Ka a tukuna o koya na “vakanuinui dei ki na dua na vuravura vinaka cake, io, e dua na tikina ena liga imatau ni Kalou” (Ica 12:4). Ia era a sega ni ciqoma na nona vosa o ira na Jeretaiti, ena iulubale vata ga era dau sega ni ciqoma kina na nodra parofisai na italai ni Kalou ena gauna oqo—“baleta ni ra sa sega ni raica rawa” (Ica 12:5). E taura na vakabauta me da vakadinata na yalayala se ivakasala ni veika eda sega ni raica, me vaka ni vakabauta ga a parofisaitaka kina o Ica na “veika lelevu ka talei” vei ira na tamata tawa-vakabauta. Na vakabauta a vakanuinui kina o Moronai ni rawa vua na Turaga me veisautaka nona “sega ni maqosa ena volavola” me nona kaukauwa (raica na Ica 12:23–27). Sai koya na vakabauta vakaoqo “ena vakadeitaki ira me ra tudei sara ka tawayavalati rawa ena cakacaka vinaka kecega, ka sa tuberi ira me ra vakalagilagia kina na Kalou” (Ica 12:4). Ia ena mataqali vakabauta vakaoqo “sa vakayacori rawa kina na ka kecega” (Ica 12:3).
Na vakabauti Jisu Karisito ena rawa kina na veicakacaka mana lelevu.
Sa matau tu nikua, me vaka ga ena gauna i Ica, me ra vinakata na tamata me ra raica na ivakadinadina ni bera ni ra vakabauta na Kalou kei na Nona kaukauwa. Na cava o vulica mai na Ica 12:5–6 me baleta na vakasama oqo?
Ni o wilika na Ica 12, e rawa ni o vola toka na veigauna kece o kunea kina na vosa “vakabauta.” Vakasamataka na cava e vakatavulica na veigauna yadua me baleta na vakabauta. Na taro vakaoqo ena rawa ni veivuke: Na cava na vakabauta? Na cava na ibalebale ni dina? Na cava soti na vua ni vakabauti Jisu Karisito? O rawa talega ni vola na nomu vakasama me baleta na ivakadinadina o sa rawata “ni oti na vakatovolei ni nomu vakabauta” (Ica 12:6).
Me ra veiwasei na tani, ka so na gauna era veivakavulici. Era na vuli vinaka na tamata ni basika na madigi me ra wasea na veika era sa vulica se veivakavulici sara mada ga ena dua na ituvaki taumada. E vale se ena lotu, navuca mo vakatarai ira na tani, oka kina na itabagone, me ra vakavulica e dua na tiki ni lesoni.
Sa solia vei keda o Jisu Karisito “e dua na vakanuinui uasivi sara.”
Me ikuri ni veivakararamataki bibi me baleta na vakabauta, e levu talega na ka e rawa ni tukuna o Ica 12 me baleta na inuinui. Me dusimaki iko na Yalo ena nomu vuli.
Na cava soti na vuna e tu kina vei Ica na “vakanuinui dei ki na dua na vuravura vinaka cake?” (raica na Ica 12:2–5).
Na cava na inaki ni sakaramede? Na cava na inuinui ni yalomu e tautauvata kei na cava e cakava e dua na ikelekele ki na dua na waqa? (raica na Ica 12:4).
E rawa ni vagolea o Jisu Karisito na noqu malumalumu ki na kaukauwa.
Ni da wilika na ivola qaqa eso nei Moronai, e rawarawa me da guilecava ni a leqataka o koya na nona “malumalumu ena volavola” ka rerevaka de ra vakalialia na nona vosa o ira na tamata (raica na Ica 12:23–25). Kevaka o sa bau lomaleqataka na nomu malumalumu, wilika na dredre nei Moronai—kei na nona sauma na iVakabula—ena Ica 12:23–29. E rawa talega ni o vakasamataka vakatitobu na gauna a vukei iko kina o Jisu Karisito mo kila na nomu malumalumu ka vakaukauwataki iko—kevaka sara mada ga e sega ni kauta tani vakadua. Vakasamataka talega na malumalumu o sotava tiko ena gauna oqo. Na cava o gadreva mo cakava mo ciqoma kina na yalayala ni iVakabula me “vakaukauwataki ira na veika era malumalumu”? (Ica 12:27).
Navuca mo vakasaqara na veimalanivosa oqo mo raica kina na sala era rawata kina na tani ena ivolanikalou na kaukauwa mai na loloma soliwale i Jisu Karisito:
Na vakanadakui ni parofita ni Turaga e biuti au ena veika rerevaki vakayalo.
Na ilesilesi ni nodra tui na Jeretaiti e dua na itutu rerevaki mai na veigauna makawa. A ka dina sara vei Korianatuma na ka oqo, ena nodra “segata e vuqa na tamata qaqa … me ra vakarusai koya” (Ica 13:15–16). Ena Ica 13:15–22, raica na ka a kitaka o Korianatuma me taqomaki koya kei na ka a vakasalataki koya kina o Ica me cakava. Ni o wilika na vo ni iVola i Ica, vakasamataka na isau ni nodra vakanadakui na parofita. Na cava ena yaco vei ira na tamata ni “sa mudu nona dau vakauqeti ira tiko na Yalo ni Turaga.”? (Ica 15:19). Na cava e vinakata na Turaga meu vulica mai na italanoa eso oqo? Vakasamataka na cava o na cakava mo muri ira kina na Nona parofita.
Me baleta na vakasama tale eso, raica na ilavelave ni vula oqo ni Liaona kei na mekasini ni Me iSakisaki ni iTabagone .
Na vakabauta sa ikoya noda vakadinata na veika eda sega ni raica rawa.
Sa rawa mo vukei ira na luvemu me ra tokaruataka vata kei iko “Na vakabauta sai koya na vakanuinuitaki ni veika sa sega ni rairai” mai na Ica 12:6. Vakaraitaka na iyaloyalo ka vakatakarakarataka na ivakaraitaki ni vakabauta ena Ica 12:12:13–15, 20–21 (raica na iVola ni iYaloyalo Vakosipeli,, naba 78, 85, kei na tabana ni itaviqaravi ni macawa oqo). Me ra qai vakamacalataka na luvemuni na veika era kila me baleta na italanoa yadua. Oqo eso na taro me vukei iko mo veivosakitaka na ivakaraitaki ni vakabauta oqo:
Na cava era a vakanuinuitaka o ira na tamata oqo?
A vakatovolei vakacava na nodra vakabauta?
Na cava a yaco ena vuku ni nodra vakabauta?
Sa rawa talega mo wasea na veika o sa sotava ena nomu cakacakataka na vakabauta.
Na inuinui sa vaka e dua na ikelekele ki na yaloqu.
Mo kila vinaka na veika e vakavulica na Ica 12:4 me baleta na inuinui, sa rawa vei iko kei ira na luvemu mo ni raica na iyaloyalo ni dua na waqa kei na dua na ikelekele. Na cava era gadreva kina na iyaqa na waqa? Na cava ena yaco ki na dua na waqa ka sa sega na kena iyaqa? Ni o wilika vata na Ica 12:4 , veivosakitaka na sala e vukei keda kina na inuinui ena sala e vukea e dua na waqa na iyaqa. Sureti ira na gone mera droinitaka na nodra droini yadua ni dua na waqa kei na iyaqa ka mera vakatavulica kina na nodra matavuvale me baleta na inuinui.
Kevaka era gadreva na luvemu e dua na ivakamacala ni inuinui vukei, ira me ra kunea e dua ena iDusidusi ki na iVolanikalou, “iNuinui” (Valenivola ni Kosipeli). Me vaka na ivakamacala oqori kei na Ica 12:4, 32, na cava eda vakanuinuitaka? (raica talega na Moronai 7:40–42). Vukei ira na gone mera vakasamataka na veivosa tale e so me baleta na nuitaka,vata kei na vosa ka kena ibalebale na veibasai ni nuitaka. E rawa talega ni o veiwaseitaka eso na dina ni kosipeli ka solia vei iko na inuinui.
Ena so na gauna era sotava na gone na ituvaki eso ka ra vakila kina na malumalumu, me vaka ga a yaco vei Moronai. Vukei ira na luvemu me ra kila na vuna e vakanananu kina vaqo o Moronai ena Ica 12:23–25, ka tarogi ira kevaka era sa bau vakila vakakina. Qai sureti ira mera wilika na tikina e 26–27 me ra raica na sala a vakayaloqaqataki Moronai kina na Turaga.
Sureti ira na gone mera droinitaka na iyaloyalo ni dua na ka malumalumu kei na dua na ka kaukauwa. Qai sureti ira mera kuria kina nodra droini eso na vosa se malanivosa mai na Ica 12:23–29 ka vakavulica vei ira ni iVakabula e rawa ni vukei keda me vukica na noda malumalumu me kaukauwa. Vakauqeti ira na gone mera vakasamataka e dua na nodra malumalumu ka qai vakasaqara na veivuke ni iVakabula mera kaukauwa kina. Wasea e dua na ka e a vukei iko kina na iVakabula mo kaukauwa mo cakava rawa kina e dua na ka dredre.
Me baleta na vakasama tale eso, raica na ilavelave ni vula oqo ena mekasini ni iTokani .
iVakatakilakila
Sa tekiduru o Ica ena gusu ni dua na qara
Taleitaki na Parofisai i Ica,, mai vei Walter Rane