Noora ana Tibu te Atua, iroun Walter Rane

Ritembwa 23–29: “Ao E Na Roko Nakon te Aonaaba Bwa e Na Kaboia Ana Aomata”

Kiritimati

Mairoun Nibwaai nakon Moronaai, ni kabane burabeti n Ana Boki Moomon a kabaeaki nakon te kaantaninga ae tabu ae koreaki ni kakimototoaki iaon atuun iteranibaan te boki: “anaakin nanoia [aomata ni kabane] are Iesu bon te Kristo.” Temanna te burabeti e Nooria bwa te tamnei ae maiu imwain te maiu aei, ao temanna e noora Ana mwakuri n te maiu aei n te mii ni burabeti. Temanna e tei iaon te o ni katanoatai kanikinaa ni Bungiakina ao Matena, ao are temanna e katorobubua imatan Rabwatana ae e a mangauti, n riing ikoakin Baina, rangana, ao rarikina. Ngaiia ni kabane a ataa te koaua ae kakawaki aei: “Bwa akea riki te kawai ke te anga are e kona te aomata ni kamaiuaki iai, tii rinanon raraan Iesu Kristo ni kamaiu, are … roko bwa e na kabooa te aonaaba” (Ereman 5:9).

Ngaia are n tain te Kiritimati, ngkai taan onimaki ni kabuta te aonaaba ni bukamarua raoiroin ao ana tangira te Atua ngke e kanakoa Ana Rikitemanna, iangoia raoi bwa e kanga Ana Boki Moomon n tia ni kakorakora am onimaki iroun Kristo. Ngkana ko iangoa Bungiakina, iangoia raoi bwa bukin tera E roko ao E kanga Rokona n tia ni bita maium. Ngkana ko kona ni kakoaua aron kakukurein raoi te Kiritimati—te bwaintangira are e anganiko Iesu Kristo.

Iango ibukin Reiakinana n te Mweenga ao n te Taromauri

E bungiaki Iesu Kristo bwa e na riki bwa au Tia Kamaiu.

Bon te katei ae kakaraoaki warekan karakinan bungiakin te Tia Kamaiu n te Nu Tetemanti n tain te Kiritimati, ma ko kona naba ni kunei taetae ni burabeti n te tai ae mimitong aei inanon Ana Boki Moomon. Te katooto, taeka ni burabeti ni bungiakin ao ana mwakuri te Tia Kamaiu a kuneaki n 1 Nibwaai 11:13–36; Motiaea 3:5–10; ao Ereman 14:1–13. Tera namakin aika a reke iroum ibukin Iesu Kristo ngke ko wareki kibuntaeka aikai ao ni kabanei kanikinaa ni Bungiakina aika a kona n reke? A kanga aia koaua burabeti aikai ni kakorakora am koaua iroun Kristo ao Ana mition?

Aikai tabeua iango aika a na buokiko ni kabanea am iango iroun Iesu Kristo n tain te Kiritimati:

• Ko ataia ae ko kona ni mataku n aia rongorongo kaain te Moan Beretitentii n taian taromauri n te Kiritimati man te Gospel Library? Kakaei inanon te “Christmas Videos” ake a tia n raweaki. Iangoia n tibwauai rongorongo ao anene aikai n te Kiritimati.

• Ko kona naba ngkoe ma kaain am utu ni kukurei n ongoraei rinerine man te “Christmas Music” ake a tia n raweaki n te Gospel Library.

• Iangoia ni bairei waaki ni kakukurei are kam kona ni karaoia ngkoe ke kaain am utu imwaain tain te Kiritimati bwa a onga n namakina Tamnein Kristo, n aron buokan temanna ke ni bootaki n anenei anenen te Kiritimati. Taraa LighttheWorld.org ibukin iango.

Taraa naba Mataio 1:18–25; 2; Ruka 2; 3 Nibwaai 1:4–22; “Away in a Manger,” Boki n Anene, nambwa. 206.

Iesu Kristo bon te Tia Kamaiua te aonaaba.

Bukina raoi ngkai ti bukamarua bungiakin Iesu Kristo bon ibukin Ana angakarea ni kamaiu. Ibukin te angakarea anne, E kona ni kamaiura man te bure ao te mate, kamwengaraoira man karawawatakira, ao ni buokira “ni kakororaoaki Irouna” (Moronaai 10:32). Tera ae ko a tia n reiakinna man Ana Boki Moomon n te ririki aei iaon mwaakan te Tia Kamaiu ni kamaiuko? A kakawaki rongorongo ke reirei nakoim? Iangoa te bwai ae e a tia n reireiniko kibuntaeka aikai iaon ana mwakuri ni kamaiu te Tia Kamaiu: 2 Nibwaai 2:6; Aramwa 7:7–13; 11:40; ao Ereman 5:9; 14:16–17. Tera ae ko namakinna bwa ko kairaki bwa ko na karaoia ni kaota am kakaitau Nakoina?

Ana Boki Moomon e taekina koauan Iesu Kristo.

“Te Kakoaua teuana ibukin Iesu Kristo” e raka riki nakon te kabwarabwara ibukin Ana Boki Moomon; bon te rongorongo ibukin te kaantaninga mai ieta. Iangoa raoi te bwai ae ko reiakinna man koroboki aika tabu aikai iaon ana mition Ana Boki Moomon ni kakoaua iroun Kristo: 1 Nibwaai 6:4; 19:18; ao 2 Nibwaai 25:23, 26; 33:4, 10.

Iangoia ni koroi n te tieno bwa e kanga te kamatebwai n Ana Boki Moomon n te ririki aei ni uotiko ni kaniiko riki nakon Kristo. Iango aikai a kona n ibuobuoki:

• “Te bwai ae I reiakinna ke n namakinna ibukin te Tia Kamaiu n te ririki aei bon …”

• “Reiakinan taekan te Tia Kamaiu n Ana Boki Moomon e bita te kawai are N na …”

• “Te aomata [ke te karaki] ae mamaten nanou n Ana Boki Moomon e reireinai bwa te Tia Kamaiu …”

Tao iai temanna ae e na kakabwaiaaki n ataia bwa e kanga am namakin ibukin Ana Boki Moomon. Ko na kanga n tibwauai am taneiai ao am koaua? Ko na bae n namakina te kukurei n anga am kaobi bwa te bwaintangira n te Kiritimati. Te app ibukin Ana Boki Moomon e kabebete aron te tibwatibwa.

Bitiobi Gérald Caussé e koroi ni karinani tabeua koaua man Ana Boki Moomon iaon taekan Iesu Kristo (taraa “Te Tia Kakoaua ae Maiu iroun te Kristo ae Maiu,” Riaona, Meei 2020, 39–40). Ko kona n taraa te bwai ae e koroia ao iangoia raoi bwa a kanga koaua aikai n tatabeua nako n tia ni bita—ke ni kona ni bita—maium.

Taraa naba Gospel Topics, “Ana Boki Moomon,” Gospel Library.

Ibukin iango riki tabeua, taraa te beeba ni kaongora n te namwakaina aio n te Riaona ao Ibukin Kakorakoraia Kairake maekatiin.

Iango ibukin Reiakinaia Ataei

Ibukin bwa te Taabati aio bon te kanimaua n Taabati n te namwakaina, a kaungaaki taan reirei n te Moanrinan bwa ana kabonganai reirei ake n te “Appendix B: Preparing Children for a Lifetime on God’s Covenant Path.”

Iesu Kristo bon Ana bwaintituaraoi Tamara are i Karawa nakoiu.

• Ni buokiia am ataei bwa a na kabanea aia iango iaon ana bwaintangira Tamara are i Karawa ae anganiira man kanakoan Ana Rikitemanna, ko kona niniiratamnein Iesu Kristo n aron te bwaintangira n te Kiritimati. Ko kona ngkoe ma am ataei ni maroroakin bwaintangira n te Kiritimati aika ko a tia ni karekei ke ni kaantaningaia bwa ko na karekei. Ngkanne a kona ni manga kabwara niiran tamnein Kristo ao ni kabwarabwara bwa E kanga n tia n riki bwa te bwaintangira ae kakawaki nakoira. Te anene n aron “He Sent His Son” (Aia Boki n Anene Ataei, 34–35) e kona n ibuobuoki nakon te marooro aei. Buokiia natim ni kakaei mwakoro n taeka ake n te kuna aika a kabwarabwarai kakabwaia ake iai iroura ibukina bwa e a tia ni bungiaki Iesu.

E bungiaki Iesu Kristo bwa e na riki bwa au Tia Kamaiu.

• A na bae ni kukurei am ataei n tibwauaia ma ngkoe te bwai ae ataia ni bungiakin Iesu. Te Gospel Art Book iai inanona tabeua tamnei aika a na kona ni buokiia ni karakina te karaki (taraa nambwa. 28, 29, 30, 31). Ko kona naba n tarai tamnei aika a kaota maiun ao ana angakarea ni kamaiu te Tia Kamaiu. Bukin tera Tamara are i Karawa e karokoa Iesu Kristo?

  

• A na bae naba am ataei ni kukurei ni koroi oin aia tamnei iaon bungiakin ao ana mwakuri Iesu. Tao a kona ni korea aia tamnei n te bwai ae kabwarabwaraaki inanon 1 Nibwaai 11:13–23; Motiaea 3:5–10; Ereman 14:1–13; 3 Nibwaai 1:4–22. Ngkanne a kona n tibwauaia ma ngkoe bwa tera reirei ae reke man aia tamnei iaon taekan Iesu Kristo.

• Ni katuruturua ni kamatataa bwa booki aika uoua te Baibara ao Ana Boki Moomon a reirei taekan aron bungiakin Iesu, ko kona ni karinani bwaai aika riki aika kabwarabwaraaki inanon Ruka 2:4–14; Mataio 2:1–2; ao 3 Nibwaai 1:15, 19–21. Ngkanne a kona am ataei n ukeri kiibu aikai ni kakaea bwa tera bwaai aika riki i Betereem, i Amerika, ke taabo aikai ni kauoua. Bukin tera ti karabwarabwa ngkai iai iroura ana Boki Moomon bwa te kauoua ni kakoaua ibukin bungiakin Iesu?

Ataei a tatangiri taian karaki. Te karaki bon teuana te kawai ae rianako tamaroana ibukin buokaia ataei bwa a na reiakin man ururingi taian koaua. N am tai n tibwaua karakinan bungiakin Iesu, iangoia naba bwa ko na tibwauai karakinan oin maium ake a tia ni buokiko ni kamatoatoa am onimaki iroun te Tia Kamaiu.

Ana Boki Moomon e taekina koauan Iesu Kristo.

• Ngkai ngkoe ao natimi kam kabanea ami kamatebwai iaon Ana Boki Moomon n te ririki aei, e na riki bwa te tai ae tamaroa n tibwauai bon imarenami ami karaki aika mamate nanomi iai ke kibuntaeka man te booki ae tabu aei. N taraakin tamnei tabeua inanon Nakomai, Iriirai ke Book of Mormon Stories a kona ni buokiia am ataei n uring bwaai aika a tia n reiakin n te ririki aei. Buokiia n tarai bwaai aika a reireiniira man karaki aikai iaon taekan Iesu Kristo.

• Ko kona naba n angan am ataei tamnein Iesu, ke n tuangiia bwa a na bon koroi aia tamnei. Kaoiia bwa a na katei aia tamnei ni katoa te tai are a ongo iai aran Kristo n am tai ni wareka 2 Nibwaai 25:23, 26. Kaota am koaua bwa e koreaki ana Boki Moomon ni buokira bwa ti na “kakoauaa Kristo” (2 Nibwaai 25:23).

Ibukin iango riki tabeua, taraa te beeba ni kaongora n te namwakaina aio n te Te Rao maekatiin.

Mii ni Burabeti Nibwaai ibukin te Kibono are Maria, iroun Judith A. Mehr