Minerva Teichert (1888–1976), Moronaai: Te Kabanea n Nibwaite, 1949–1951, te oera iaon te mitinaaiti, 34 3/4 x 47 te inti. Brigham Young University Museum of Art, 1969

Ritembwa 9–15: “Ma E Na Tabekikorake Kristo”

Moronaai 7–9

Imwain are e kabanea te koroboki Moronaai ae ti ataia n te bong aei bwa Ana Boki Moomon n oin ana kabanea n taeka, e tibwauai teniua rongorongo mai iroun ana karo, Moomon: te taetae nakoia “taan irira Kristo i nanon te rau” (Moronaai 7:3) ao uoua reeta aika e a tia ni koroi Moomon nakon Moronaai. Moomon e karin rongorongo aikai inanon Ana Boki Moomon ibukina bwa e a kaman noori titeboon aron te kaangaanga n ana bong ao ara bong. Ngke a koreaki taeka aikai, aomata aika Nibwaite ni kabane a bane n tannako mai iroun te Tia Kamaiu. A mwaiti aika a tia ni “bua aia tangira, imarenaia” ao a bon kukurei ni “bwaai ni kabane ma tiaki ae raoiroi” (Moronaai 9:5, 19). Ma e teimatoa Moomon ni kunea karekean te kaantaninga, n reireiniira bwa te kaantaninga tiaki nanona ae katinanikuan ke n aki tabeakinii kangaanga n te aonaaba. Te kaantaninga nanona reken te onimaki iroun Tamara are i Karawa ao Iesu Kristo, are mwaakaia e korakora ao akea tokina riki nakon kangaanga akanne. E nanonaki n ae “ta[uii] ni kabane bwaai aika a raoiroi” (Moronaai 7:19). E nanonaki n ae kariaia Ana Mwakuri ni Kamaiu Iesu Kristo “ao kantaningaan mimitongina ma te maiu ae akea tokina, e na tiku n am iango n aki toki” (Moronaai 9:25).

Iango ibukin te Kamatebwai n te Mweenga ao n te Taromauri

Moronaai 7:12–20

Otan Kristo e buokai n ata te koaua man te kairua.

A mwaiti aomata aika a kan ataia, “N na kanga n ataia ngkana te namakin e roko mairoun te Atua ke bon man au iango?” ke “Ma aekakin kewekewe ni boong aikai, N na kanga n ata ae eti ke ae kairua?” Ana taeka Moomon n Moronaai 7 e anganiira tabeua tuua aika ti kona ni kaekai titiraki aikai. Taratarai riki inanon kiibu 12–20. Ko kona ni kabonganai koaua aikai ni buokiko n tarai nanon rongorongo ake ko karekei ao n te taneiai ae e reke iroum n te wiiki aei.

Taraa naba Guide to the Scriptures, “Light, Light of Christ,” Gospel Library; “Patterns of Light: Discerning Light” (video) Gospel Library.

Moronaai 7:20–48

Ibukina bwa iai Iesu Kristo, I kona n “tauii ni kabane bwaai aika a raoiroi.”

Moomon anga te titiraki are e taraa n rangi ni kakaawaki ni boong aikai: “Kam na kanga ni kona [n] tauii bwaai ni kabane aika a raoiroi?” (Moronaai 7:20). Imwiina e reirei taekan onimakinan Iesu Kristo, te kaantaninga, ao te tangira ae kororaoi. Ngkai ko wareki kibu 20–48, tarataraia bwa a kanga anua nako ni buokiko ni karekea ao n “taua ni kamatoa” bwaai aika a raoiroi ake a roko mairoun Iesu Kristo. Bukin tera aroaro aikai a bon riai ni iai iroun te tia iriira Iesu Kristo?

Taraa naba “Mormon’s Teachings about Faith, Hope, and Charity” (video), Gospel Library.

Moronaai 7:44–48

“Te tangira ae kororaoi bon ana tangira Iesu Kristo ae itiaki.”

Moomon e nooria bwa ara onimaki ao ara kaantaninga iroun Iesu Kristo e kairiira nakon karekean te tangira ae kororaoi. Ma tera te tangira ae kororaoi? Kona bae ni korea Te tangira ae kororaoi bon … ao imwiina wareka Moronaai 7:44–48, n taratarai taeka ke kibuntaeka ake a kona ni kabwanina te tientitenti. Ngkana ko tia, iangoia n onea mwiin te taeka Charity ma aran Iesu Kristo. Tera ae ko reireinaki n aei ibukin te Tia Kamaiu? E kanga n tia ni kaota Ana tangira ae itiaki Iesu Kristo? Iangoi katoto man koroboki aika a tabu ao ni bon maium.

E nooria Beretitenti Dallin H. Oak: “Ibukina ngkai te tangira ae kororaoi e aki kona ni bwaka ao ibukina ngkai te tangira ae kororaoi e korakora riki nakon te kabanea ni kakawaki ni mwakuri n te raoiroi …bwa te tangira ae kororaoi, ‘ana tangira Kristo ae itiaki’ [Moronaai 7:47], tiaki te mwakuri ma te aroaro ke tein te aroaro. … Te tangira ae kororaoi bon te bwai ae reke iroun temanna” (“The Challenge to Become,” Ensign, Nobembwa 2000, 34). N iangoa te marooro aei, ko na bae ni wareka ana rongorongo Unimwaane Massimo De Feo “Pure Love: The True Sign of Every True Disciple of Jesus Christ” (Riaona, Meei 2018, 81–83). E kanga te tangira ae kororaoi n roota arom n riki bwa ana reirei Iesu? Kona kanga n “nim ma te tangira ae kororaoi”? (kibu 46).

Tara naba 1 I-Korinto 13:1–13; Ita 12:33–34; “Love One Another,” Hymns, no. 308; “Charity: An Example of the Believers” (video), Gospel Library; Gospel Topics, “Charity,” Gospel Library.

Kabongana te reirei ma bwaai ni kabotau. Tao iangoa te kaintekateka ae teniua waena e kona ni buokiko n ota riki n te reitaki imarenan te onimaki, kaantaninga, ao te tangira ae kororaoi (taraa Dieter F. Uchtdorf, “Mwaakan te Onimaki ae Akea tokina,” Riaona, Nob. 2008, 21–24).

Moronaai 9:3–5

Te un e karekea te nanokawaki ao te korakai.

Ni kaitaraan ana rongorongo Moomon iaon te tangira ni Moronaai 7:44–48, Ana kauoua ni kabwarabwara Moomon nakon Moronaai e airi ma te kauring iaon te bwai are a kaitara ma ngaiia aika a mwaiti n taai aikai—te un. Ni kaineti ma Moronaai 9:3–5, tera tabeua mwiin bwaai aika a na reke imwiin unin Nibwaai? Tera kauring aika ti kona ni karekei man kiibu 3–5, 18–20, 23?

Tara naba Gordon B. Hinckley, “Slow to Anger,” Liahona, Nob. 2007, 62–66.

Moronaai 9:25–26

I kona ni karekea te kaantaninga iroun Kristo n aki tabe ma au kaangaanga.

Imwiin kabwarabwaraan te buakaka are e a tia noori, Moomon e tuanga natina te mwaane bwa e na aki tang. Tera ae anaa nanom n ana rongorongo Moomon n te kaantaninga? Tera nanona nakoim ibukin Kristo bwa e na “[uotiko] rake? Tera anuan maiun Kristo ao tuua n Ana euangkerio “ae tiku n am iango” ao n anganiko te kaantaninga? (Moronaai 9:25).

Taraa Russell M. Nelson, “Joy and Spiritual Survival,” Riaona, Nobembwa 2016, 81–84.

Ibukin iango riki tabeua, taraa te beeba ni kaongora n te namwakain aio n te Riaona ao Ibukin Kakorakoraia Kairake maekatiin.

Iango ibukin Reiakinaia Ataei

Moronaai 7:33

Ngkana iai onimakinan Iesu Kristo irou, I kona ni karaoi bwaai nako ake e kainnanoai te Atua bwa N na karaoi.

• Iangoia n tarai tabeua tamnei n ikotaki ake a kaota temanna man koroboki aika a tabu ngke e katia te bwai ae kakaawaki (taraa, ibukin te katoto, Gospel Art Book, nambwa. 19, 70, 78, 81). E kanga te onimaki iroun Kristo ni karika te bitaki ni katoto aikai? Ngkoe ma am ataei kam kona ngkanne ni wareka Moronaai 7:33, n taratarai bwaai ake ti kona ni karaoi ngkana iai ara onimaki iroun Iesu Kristo. Ko kona n tibwai naba taneiai imarenami ngke te Atua e kakabwaiako n te mwaaka ni kona ni karaoi Ana kaantaninga.

Moronaai 7:41

Kakoauan Iesu Kristo e kona n anganai te kaantaninga.

• Ngkai ko wareka Moronaai 7:41 nakoia ataei, tao ko kona n tuangiia bwa a na katei baia ngkana a ongo ana taeka Moomon bwa e riai n iai iroura te kaantaninga. Tuangiia taekan te kaantaninga are ko namakinna ibukina bwa iai Iesu Kristo.

• Ngkoe ma natim kam kona naba n iangoa temanna ae iai ana kangaanga n te bwai teuana. Tao a kona ataei ni korea tamnein te aomata anne are e kona ni kauringnga bwa e na karekea te kaantaninga iroun Iesu Kristo.

Moronaai 7:40–41; 9:25–26

I kona ni karekea te kaantaninga iroun Iesu Kristo, n taai naba aika kaangaanga.

• N reireiniia natim taekan te kaantaninga iroun Iesu Kristo, ko kona ni kanoa te kaonteina teuana n te ran ao ko kabwakai bwaai aika uoua inanona—teuana ae beti ao teuana ae iinako. Ngkai kam ikotaki ni wareka Moronaai 7:40–41 ao 9:25–26, natimi a kona n tarataraia bwa tera ae kateia te kaantaninga ibukira. Ngkanne a kona ni kaabotaua te bwai are e beti nakon te aomata are iai ana kaantaninga iroun Kristo. E kanga Kristo n “[tabekira] rake” ngkai ti kaitara iai ma kakatai aika kaangaanga? Buokiia ataei n iangoi kawai ake ti kona iai ni kawakina te Tia Kamaiu ao Ana reirei aika kaunganano “n [aia] iango n aki toki.”

Moronaai 7:45–48

“Te tangira ae kororaoi bon ana tangira Kristo ae itiaki.”

• Te kuna n taekan te tangira, n aron “Love One Another” (Children’s Songbook, 136), a kona ni waakina te maroro iaon taekan te tangira ae itiaki. Ko kona n wareka ke ni kakimototoa Moronaai 7:47 ao ni kaoia natim bwa a na kaoia natim bwa a na korei tamneia ni kaota aia tangira nakon temanna. Tuangiia bwa a katekea aia tamnei n te tabo are e na kauringiia bwa a na tangiriia tabeman n aron are e karaoia Iesu.

• Kona kanga ni kaungai nanoia natim bwa a na ukoukora ao ni karikirakea ana tangira ae itiaki Kristo inanon maiuia? Tao ko kona ni buokiia bwa a na iangoi kawai ake e kaota iai Iesu te tangira ae kororaoi (taraa, katoto aika, Ruka 23:34; Ioane 8:1–11; Ita 12:33–34). Ti na kanga ni kona ni ira Ana katooto?

Ibukin iango riki tabeua, taraa te beeba ni kaongora n te namwakaina aio n te Te Rao maekaktiin.

Tamnein Kristo te Tia Kamaiu, iroun Heinrich Hofmann