Ntaub Ntawv Ntxiv tom Kawg B

Rau lub Koom Haum Me Nyuam Yaus—Npaj cov Me Nyuam Kom Ua Raws Li Vajtswv tej Kev Khi Lus Tas Ib Sim Neej

Yog ib lub hlis muaj tsib hnub Sunday, xav kom cov xib hwb hauv lub Koom Haum Me Nyuam Yaus siv tej yam ntxim saib ntxim ua no pauv tej txheem txheem qhia ntawv ntawm Los, Nrog Kuv Mus rau hnub Sunday thib tsib.

Tej Ntsiab Cai thiab cov Kab Ke ntawm Yexus Khetos txoj Moo Zoo

Cov lus qhuab qhia ntawm Yexus Khetos qhia peb kom paub rov qab mus cuag Vajtswv.

Thaum Yexus Khetos tshwm sim rau cov neeg hauv Amelikas pom, Nws qhia lawv txog Nws cov lus qhuab qhia. Nws hais tias peb yuav nkag hauv Vajtswv lub nceeg vaj yog tias peb muaj kev ntseeg, hloov siab lees txim, ua kev cai raus dej, txais tus Vaj Ntsuj Plig Dawb Huv, thiab nyiaj mus kom txog thaum kawg (saib 3 Nifais 11:31–40; Lus Qhuab Qhia thiab Kev Khi Lus 20:29). Tej yam ntxim ua nram qab no yuav pab koj qhia cov me nyuam tias cov ntsiab cai thiab cov kab ke no yuav pab peb muab siab npuab tus Cawm Seej tas peb lub neej.

Yog xav kawm txog Khetos cov lus qhuab qhia, saib 2 Nifais 31.

Tej Yam Ntxim Ua

• Muab daim duab rau cov me nyuam uas qhia txog kev ntseeg Yexus Khetos, kev hloov siab lees txim, kev cai raus dej, thiab kev pom zoo (saib Phau Muaj Duab txog Txoj Moo Zoo, naj npawb 1, 111, 103, thiab 105). Nrog cov me nyuam nyeem los sis hais nqe kev ntseeg thib plaub, thiab hais kom lawv tsa lawv cov duab thaum hais txog lub ntsiab cai los sis txoj kab ke ntawd. Cia li pab cov me nyuam to taub tias cov ntsiab cai thiab cov kab ke no pab peb hloov los ua neeg zoo li Leej Txiv Saum Ntuj Ceeb Tsheej thiab Yexus Khetos.

• Koj yuav ua li cas pab cov me nyuam to taub tias kev ntseeg, kev hloov siab lees txim, txoj kev ua kev cai raus dej, thiab kev pom zoo tsis yog tej yam uas ua ib zaug xwb, tiam sis yuav pab peb sab ntsuj plig loj tuaj mus tas peb lub neej? Piv txwv hais tias, tej zaum koj yuav muab ib daim duab txog ib lub noob thiab ib tug ntoo loj rau lawv saib (los sis kos duab txog ob qho no). Pab lawv xav txog tej yam uas pab lub noob loj tuaj ua ib tug ntoo loj heev, xws li cov dej, cov av, thiab hnub ci. Pab lawv to taub tias tej yam no yeej zoo li tej yam uas peb ua kom nyob ze Vajtswv hauv peb lub neej—txhawb peb txoj kev ntseeg Yexus Khetos, hloov siab lees txim txhua hnub, ua raws li peb tej kev khi lus thaum ua kev cai raus dej, thiab mloog tus Vaj Ntsuj Plig Dawb Huv lus.

• Qhia cov me nyuam zaj dab dab neeg txog lub paj hluav taws los ntawm Txwj Laug Dale G. Renlund zaj lus “How Can Repenting Help Me Feel Happy?” (Friend, Kaum Ob Hlis Ntuj 2017, 12–13, los sis Liyahaunas, Kaum Ob Hlis Ntuj 2017, 70–71; kuj saib qhov vidi-aus “Repentance: A Joyful Choice” [Txoj Moo Zoo cov Ntawv]).

  Thaum hais dab neeg ntawd, nres ob peb zaug thiab caw cov me nyuam xav txog qhov uas Txwj Laug Renlund tau xav li cas. Vim li cas peb muaj kev xyiv fab thaum peb hloov siab lees txim? Qhia cov me nyuam txog kev xyiv fab thiab kev hlub uas koj muaj thaum koj tau thov Leej Txiv Saum Ntuj Ceeb Tsheej zam txim pub rau koj.

Kev cai raus dej

Yexus Khetos tau coj yam ntxwv zoo rau kuv thaum Nws ua kev cai raus dej.

Txawm yog Yexus tsis tau ua txhaum hlo li, Nws tau ua kev cai raus dej kom coj yam ntxwv zoo tag nrho txog kev mloog Leej Txiv Saum Ntuj Ceeb Tsheej lus (saib 2 Nifais 31:6–10).

Yog xav kawm ntxiv txog txoj kev cai raus dej, cia li saib Lus Qhuab Qhia thiab Kev Khi Lus 20:37; Txoj Moo Zoo tej Ntsiab Lus, “Baptism,” Txoj Moo Zoo cov Ntawv.

Tej Yam Ntxim Ua

• Muab ib daim duab txog tus Cawm Seej txoj kev ua kev cai raus dej thiab lwm tus txoj kev ua kev cai raus dej rau sawv daws saib (los sis saib Phau Muaj Duab txog Txoj Moo Zoo, naj npawb 35 thiab naj npawb 103 los sis naj npawb 104). Hais kom cov me nyuam qhia tias nyob hauv ob daim duab no tej yam twg zoo ib yam thiab tej yam twg tsis zoo ib yam. Cia li nyeem Mathais 3:13–17 ua ke los sis “Tshooj 10: Yexus Ua Kev Cai Raus Dej” nyob hauv Cov Dab Neeg hauv Phau Tshiab, 26–29, los sis saib qhov vidi-aus los ntawm Txoj Moo Zoo cov Ntawv.

  Cia cov me nyuam taw tes rau tej yam hauv cov duab uas lawv twb nyeem los sis nyob hauv qhov vidi-aus. Qhia cov me nyuam txog koj txoj kev hlub tus Cawm Seej thiab qhov uas koj xav coj raws li Nws.

• Cia li mloog los sis hu ib zaj nkauj txog kev cai raus dej, xws li “When Jesus Christ Was Baptized” (Children’s Songbook, 102). Peb kawm dab tsi txog kev cai raus dej los ntawm tej nqe no? Cia li nyeem 2 Nifais 31:9–10, thiab caw cov me nyuam mloog seb vim li cas Yexus Khetos tau ua kev cai raus dej. Caw lawv kos duab txog lawv tus kheej thaum lawv ua kev cai raus dej.

Kuv xaiv tau kom khi lus nrog Vajtswv thiab ua kev cai raus dej.

Kev npaj ua kev cai raus dej tsis yog kev npaj rau lwm yam xwb. Yog kev npaj khi lus thiab ua raws li kev khi lus ntawd mus tas ib sim neej. Cia li xav seb koj yuav ua li cas kom pab cov me nyuam to taub txoj kev khi lus uas lawv yuav ua nrog Leej Txiv Saum Ntuj Ceeb Tsheej thaum lawv ua kev cai raus dej, uas yog tej lus cog tseg uas Nws cog lus rau lawv thiab cov lus cog tseg uas lawv cog lus rau Nws.

Tej Yam Ntxim Ua

• Piav tias ib txoj kev khi lus yog thaum ib tug neeg thiab Leej Txiv Saum Ntuj Ceeb Tsheej sib cog lus. Thaum peb sim ua raws li peb tau cog lus rau Vajtswv, Vajtswv cog lus tias Nws yuav foom koob hmoov rau peb. Cia li sau tej lus no rau daim kab das Kuv Cog Lus rau Vajtswv thiab Vajtswv Cog Lus rau Kuv. Cia li nyeem Mauxiyas 18:10, 13 thiab Lus Qhuab Qhia thiab Kev Khi Lus 20:37 ua ke, thiab pab cov me nyuam sau ntawv txog tej lus cog tseg uas lawv nrhiav tau hauv tej zaj us piav (kuj saib Dallin H. Oaks, “Your Baptism Covenant,” Phooj Ywg, Ob Hlis Ntuj 2021, 2–3). Qhia tias Leej Txiv Saum Ntuj Ceeb Tsheej tau foom koob hmoov rau koj thaum koj siv zog ua raws li koj tau khi lus thaum ua kev cai raus dej.

• Muab daim duab rau cov me nyuam saib txog tej yam uas Yexus Khetos tau ua thaum Nws nyob hauv lub ntiaj teb (ua piv txwv, saib Phau Muaj Duab txog Txoj Moo Zoo, naj npawb 33–49). Cia cov me nyuam tham txog qhov uas Yexus ua dab tsi nyob hauv txhua daim duab. Cia li nyeem Mauxiyas 18:8–10, 13, thiab caw cov me nyuam mloog seb lawv cog lus ua dab tsi thaum lawv ua kev cai raus dej (kuj saib “The Baptism Covenant,” Friend, Ob Hlis Ntuj 2019, 7; Liyahaunas, Ob Hlis Ntuj 2019, F3). Vim li cas tej lus cog tseg no yuav hloov tej yam uas peb ua txhua hnub? Cia li caw cov me nyuam kos duab txog lawv tus kheej thaum lawv pab ib tug neeg ib yam li Yexus tau ua. Los sis tej zaum koj yuav xav muab ib daim lo rau cov me nyuam uas muaj tus Cawm Seej lub npe.

  me nyuam tub ua kev cai raus dej

  Thaum peb ua kev cai raus dej, peb cog lus rau Vajtswv thiab Nws cog lus rau peb.

Kev Pom Zoo

Thaum kuv ua kev cai pom zoo, kuv los ua ib tug mej zeej nyob hauv Yexus Khetos lub Koom Txoos ntawm Tsoom Haiv Neeg Ntseeg hauv Hnub Nyoog Kawg.

Kev los ua ib tug mej zeej hauv Yexus Khetos lub Koom Txoos ntawm Tsoom Haiv Neeg Ntseeg hauv Hnub Nyoog Kawg ua rau peb txais tau cov koob hmoov ntau, tsis hais qhov uas cov me nyuam yuav muaj cib fim ua Vajtswv txoj hauj lwm.

Yog xav kawm ntxiv txog kev pom zoo thiab lub txiaj ntsim Vaj Ntsuj Plig Dawb Huv, saib Gary E. Stevenson, “Tus Vaj Ntsuj Plig Dawb Huv Pab Nej Li Cas?,” Liyahaunas, Tsib Hlis Ntuj 2017, 117–20; Txoj Moo Zoo tej Ntsiab Lus, “Holy Ghost,” Txoj Moo Zoo cov Ntawv.

Tej Yam Ntxim Ua

• Caw ib tug uas tsis ntev tas los tau ua kev cai raus dej thiab tau ua kev cai pom zoo los hauv koj chav kawm thiab qhia tias nws xav li cas thaum nws ua kev cai pom zoo. Tus no xav li cas txog qhov uas nws tau los ua ib tug mej zeej hauv Yexus Khetos lub Koom Txoos ntawm Tsoom Haiv Neeg Ntseeg hauv Hnub Nyoog Kawg? Pab cov me nyuam xav txog tej yam uas lawv muaj peev xwm ua kom ua raws li lawv tej kev khi lus ua mej zeej hauv lub Koom Txoos thaum ua kev cai raus dej (xws li kev pab lwm tus, kev caw lwm tus los kawm ntxiv txog Yexus, thov Vajtswv hauv kev sib ntsib, thiab li ntawd). Cia li qhia tias tej yam no tau pab koj li cas kom muaj kev xyiv fab vim koj yog ib tug mej zeej hauv Yexus Khetos lub Koom Txoos.

• Muab ib daim duab txog cov cov neeg nyob ntawm cov Dej Maumoos (saib Phau Muaj Duab txog Txoj Moo Zoo, naj npawb 76) rau sawv daws saib, thiab hais kom cov me nyuam piav tias lawv pom dab tsi nyob hauv daim duab. Hais zaj dab neeg txog Amas thiab nws cov neeg thaum lawv ua kev cai raus dej (saib Mauxiyas 18:1–17; “Tshooj 15: Amas Qhia thiab Muab Neeg Ua Kev Cai Raus Dej,” Cov Dab Neeg hauv Phau Ntawv Maumoos, 43–44, los sis qhov vidi-aus nyob hauv Txoj Moo Zoo cov Ntawv).

  Nyeem Mauxiyas 18:8–9 thiab caw cov me nyuam ua tej yam kom pab lawv nco ntsoov tej yam uas cov neeg txaus siab ua vim lawv yog cov mej zeej hauv Yexus Khetos lub Koom Txoos. Qhia txog ib lub sij hawm thaum koj tau pom lub Koom Txoos cov mej zeej pab lwm tus neeg li no.

Thaum kuv txais kev pom zoo lawm kuv txais lub txiaj ntsim Vaj Ntsuj Plig Dawb Huv.

Thaum peb ua kev cai raus dej thiab ua kev cai pom zoo, Leej Txiv Saum Ntuj Ceeb Tsheej cog lus rau peb tias peb yuav “muaj nws tus Ntsuj Plig nrog [peb] nyob tas mus li” (Lus Qhuab Qhia thiab Kev Khi Lus 20:77). Lub txiaj ntsim uas Vajtswv foom pub rau peb yog lub txiaj ntsim Vaj Ntsuj Plig Dawb Huv.

Tej Yam Ntxim Ua

• Cia li nyeem Lus Qhuab Qhia thiab Kev Khi Lus 33:15, thiab hais kom cov me nyuam mloog seb Leej Txiv Saum Ntuj Ceeb Tsheej yuav muab lub txiaj ntsim tshwj xeeb twg rau peb thaum peb ua kev cai raus dej thiab ua kev cai pom zoo. Xwv kom pab lawv kawm ntxiv txog qhov uas lub txiaj ntsim Vaj Ntsuj Plig Dawb Huv yuav pab lawv li cas, cia li nyeem Yauhas 14:26; Kalatias 5:22–23; 2 Nifais 32:5; 3 Nifais 27:20. Tej zaum koj kuj yuav xav nyeem zaj lus hu ua “The Holy Ghost Is …” (Friend, Rau Hli Ntuj 2019, 24–25; Liyahaunas, Rau Hli Ntuj 2019, F12–F13).

• Ua ntej koj pib qhia, thov ib tug me nyuam niam los sis txiv tuaj qhia rau sawv daws tias lawv tau koob hmoov vim lawv muaj lub txiaj ntsim Vaj Ntsuj Plig Dawb Huv. Nws ua li cas kom pab lawv? Lawv hnov Nws lub suab li cas?

• Hu ib zaj nkauj txog tus Vaj Ntsuj Plig Dawb Huv ua ke, xws li “The Holy Ghost” (Children’s Songbook, 105). Pab cov me nyuam to taub tias zaj nkauj no qhia dab tsi rau peb txog tus Vaj Ntsuj Plig Dawb Huv txoj kev pab.

Tus Vaj Ntsuj Plig Dawb Huv yuav siv ntau txoj kev kom qhia kuv.

Cov me nyuam uas to taub tus Ntsuj Plig lub suab yuav npaj siab txais kev tshwm sim kom coj lawv kev hauv lawv lub neej. Qhia lawv tias muaj ntau txoj kev uas tus Vaj Ntsuj Plig Dawb Huv hais lus rau peb.

Tej Yam Ntxim Ua

• Pab cov me nyuam xav txog tej yam peb ua taus kom nrog ib tug phooj ywg tham uas nyob deb heev, xws li kev sau tsab ntawv, xa email, los sis tham xov tooj. Qhia lawv tias Leej Txiv Saum Ntuj Ceeb Tsheej yuav hais lus rau peb dhau los ntawm tus Vaj Ntsuj Plig Dawb Huv. Siv Thawj Tswj Hwm Dallin H. Oaks zaj lus hu ua “How Does Heavenly Father Speak to Us?” kom pab cov me nyuam to taub txog tej txoj kev uas tus Vaj Ntsuj Plig Dawb Huv siv kom hais lus rau peb hauv peb lub siab lub ntsws (Phooj Ywg, Peb Hlis Ntuj 2020, 2–3; Liyahaunas, Peb Hlis Ntuj 2020, F2–F3).

• Cia li qhia txog ib lub sij hawm thaum tus Vaj Ntsuj Plig Dawb Huv hais lus rau koj, nyob hauv koj tej kev xav los sis kev xav hauv koj lub siab (saib Lus Qhuab Qhia thiab Kev Khi Lus 6:22–23; 8:2–3; kuj saib Henry B. Eyring, “Open Your Heart to the Holy Ghost,” Friend, Yim Hli Ntuj 2019, 2–3; Liyahaunas, Yim Hli Ntuj 2019, F2–F3). Ua tim khawv rau cov me nyuam tias tus Vaj Ntsuj Plig Dawb Huv yuav pab lawv ib yam li no.

• Pab cov me nyuam xav txog tej lub sij hawm thaum lawv tau hnov tus Ntsuj Plig—piv txwv tias, thaum hu ib zaj nkauj txog tus Cawm Seej los sis thaum ua ib yam zoo rau lwm tus. Pab lawv to taub txog tej kev xav ntawm sab ntsuj plig uas tus Vaj Ntsuj Plig Dawb Huv qhia peb. Koj xav tias yog vim li cas tus Vaj Ntsuj Plig Dawb Huv muab tej kev xav li no rau peb? Pab cov me nyuam xav txog tej yam uas peb xav tau kom hnov tus Vaj Ntsuj Plig Dawb Huv hais lus rau peb. Cia li xav txog tej yam uas pab koj hnov tus Ntsuj Plig meej dua ntxiv.

Lub Cim Nco Txog

Thaum kuv txais lub cim nco txog, kuv nco txog tus Cawm Seej thiab Nws txoj kev txi rau peb.

Tus Cawm Seej muab lub cim nco txog no kom pab peb nco txog Nws txoj kev theej peb lub txhoj thiab kom peb rov qab khi lus. Vim peb ua txoj kab ke no txhua lub lim tiam, peb yuav tau koob hmoov los ntawm txoj kev cai raus dej mus tas peb lub neej.

Yog xav kawm ntxiv, saib Mathais 26:26–30; 3 Nifais 18:1–12; Lus Qhuab Qhia thiab Kev Khi Lus 20:77, 79.

Tej Yam Ntxim Ua

• Caw cov me nyuam kos duab “Jesus Introduced the Sacrament to the Nephites” nyob hauv Scripture Stories Coloring Book: Book of Mormon (2019), 26. Hais kom lawv taw tes rau tej yam uas cov neeg xav txog nyob hauv daim duab. Nyeem tej nqe los ntawm 3 Nifais 18:1–12 rau cov me nyuam los sis nyeem “Tshooj 45: Yexus Khetos Qhia txog lub Cim Nco Txog thiab Kev Thov Vajtswv,” Cov Dab Neeg hauv Phau Ntawv Maumoos, 126–27, los sis saib qhov vidi-aus nyob ntawm ChurchofJesusChrist.org. Peb yuav ua li cas kom nco ntsoov Yexus Khetos thaum peb txais lub cim nco txog?

• Thov kom cov me nyuam qhia koj txog tej yam uas lawv yuav tsum nco ntsoov ua, xws li kev khi hlua khau los sis ntxuav tes ua ntej lawv noj mov. Vim li cas yuav tsum nco ntsoov tej yam no? Cia li nyeem Maulaunais 4:3 rau cov me nyuam, thiab caw lawv mloog seb peb cog lus tias peb yuav nco ntsoov leej twg thaum peb txais lub cim nco txog. Vim li cas yuav tsum nco ntsoov Yexus Khetos? Pab cov me nyuam to taub tias cov mov mog thiab cov dej uas yog lub cim nco txog pab peb nco ntsoov txog tej yam uas Yexus tau ua rau peb (saib Maulaunais 4:3; 5:2).

• Sau tej lus no hauv daim kab das “Kuv cog lus tias …” Ces nyeem zaj lus thov Vajtswv foom koob hmoov rau lub cim nco txog rau cov me nyuam (saib Lus Qhuab Qhia thiab Kev Khi Lus 20:77, 79). Thaum lawv hnov ib yam uas peb cog lus rau Vajtswv, cia li nres thiab pab lawv sau kab lus ntawd tiav sau qhov uas lawv tau hnov. Pab lawv to taub tias thaum peb txais lub cim nco txog, peb cog lus tias peb yuav ua ib yam li peb cog lus thaum peb ua kev cai raus dej.

• Lub ntsiab ntawm kev ris Khetos lub npe yog dab tsi? Kom pab cov me nyuam teb qhov no, cia li qhia txog ib yam uas peb sau npe rau. Vim li cas peb sau npe rau tej no? Vim li cas Yexus Khetos xav kom peb ris Nws lub npe? Xav seb puas qhia tej lus piav txog qhov no los ntawm Thawj Tswj Hwm Russell M. Nelson: “Qhov uas peb ris tus Cawm Seej lub npe txhais tias peb tshaj tawm thiab ua tim khawv rau lwm tus tias Yexus yog tus Khetos—los ntawm tej yam peb ua thiab hais” (“Lub Koom Txoos lub Npe uas Raug Lawm,” Liyahaunas, Kaum Ib Hlis Ntuj 2018, 88).

Lub Hwj Chim Pov Thawj Hwj, Txoj Cai, thiab Yawm Sij

Vajtswv siv lub hwj chim pov thawj hwj kom foom koob hmoov rau Nws cov me nyuam.

Tag nrho Vajtswv cov me nyuam—poj niam thiab txiv neej, cov hluas thiab cov laus los yog—lawv txais Vajtswv lub hwj chim thaum lawv ua raws li lawv tej kev khi lus. Peb ua tej kev khi lus no thaum peb txais cov kab ke pov thawj hwj xws li kev ua kev cai raus dej (saib General Handbook: Serving in The Church of Jesus Christ of Latter-day Saints, 3.5, Txoj Moo Zoo cov Ntawv). Yog xav kawm ntxiv, saib Russell M. Nelson, “Tej Nqi Zog ntawm Sab Ntsuj Plig,” Liyahaunas, Kaum Ib Hlis Ntuj 2019, 76–79; “Priesthood Principles,” tshooj 3 nyob hauv General Handbook.

Tej Yam Ntxim Ua

• Pab cov me nyuam pom cov koob hmoov uas lawv txais vim muaj lub pov thawj hwj. Yog xav pab lawv tawm tswv yim, tej zaum koj yuav xav muab qhov vidi-aus rau lawv saib “Blessings of the Priesthood” (Txoj Moo Zoo cov Ntawv).

• Sau tej koob hmoov no rau daim kab das. Vim li cas cov koob hmoov no tseem ceeb rau peb? Cia li ua tim khawv tias peb tau cov koob hmoov no los ntawm Yexus Khetos thiab Nws lub hwj chim pov thawj hwj.

• Sau tej lus no rau ntawm daim kab das: Vajtswv lub hwj chim thiab Vajtswv lub hwj chim thiab txoj cai uas muab rau tib neeg hauv lub ntiaj teb. Hais kom cov me nyuam tso tej daim duab nram qab ntawm kab lus thib ib uas yuav pab peb to taub tias Vajtswv tau siv Nws lub hwj chim li cas kom foom koob hmoov rau peb, xws li kev tsim lub ntiaj teb, kev coj thiab qhia peb, kev ua tej yam qhia tias Nws hlub peb thiab paub peb, thiab hnov thiab teb peb tej lus thov (saib Phau Muaj Duab txog Txoj Moo Zoo, naj npawb 3, 68, 90, 111). Hais kom lawv tso tej daim duab nram qab ntawm kab lus thib ob uas yuav pab peb to taub tias cov txiv neej tsim nyog nyob hauv lub ntiaj teb no siv Vajtswv lub hwj chim thiab txoj cai kom foom koob hmoov rau peb, xws li thaum foom koob hmoov rau cov neeg mob, muab neeg ua kev cai raus dej, ua kev pom zoo, muab lub cim nco txog, thiab muab tsev neeg khi ua ke (saib Phau Muaj Duab txog Txoj Moo Zoo, naj npawb 46, 104, 105, 107, 120). Qhia yog vim li cas koj zoo siab tias muaj lub pov thawj hwj thiab cov koob hmoov uas los ntawm lub hwj chim ntawd.

• Peb txais tau cov koob hmoov los ntawm Vajtswv lub hwj chim hauv peb lub neej dhau los ntawm cov kab ke pov thawj hwj (saib Lus Qhuab Qhia thiab Kev Khi Lus 84:20). Kom pab cov me nyuam kawm qhov tseeb no, tej zaum koj yuav xav sau tej nqe vaj lug kub no rau daim kab das: 3 Nifais 11:21–26, 33 (kev cai raus dej); Maulaunais 2 (kev pom zoo); Maulaunais 4–5 (lub cim nco txog). Tej zaum yuav xav cia txhua tus me nyuam xaiv ib nqe thiab qhia tias nqe ntawd hais txog txoj kab ke twg. Caw cov me nyuam qhia tias lawv tau txais koob hmoov twg los ntawm cov kab ke pov thawj hwj no.

• Pab cov me nyuam to taub tias Vajtswv yuav muab hwj chim rau lawv thaum lawv ua kev cai raus dej thiab ua raws li lawv tej kev khi lus. Nug cov me nyuam seb lub hwj chim no yuav pab lawv li cas.

Vajtswv siv cov yawm sij pov thawj hwj coj Nws txoj hauj lwm thiab tib neeg siv txoj cai pov thawj hwj ua.

Cov txiv neej tsim nyog uas yog lub Koom Txoos cov mej zeej txais tau ib lub luag hauj lwm hauv lub pov thawj hwj. Tsis tas li ntawd xwb, thaum twg ib tug neeg txais kev tsa ua ib txoj hauj lwm los sis txais kev txib mus pab ua Vajtswv txoj hauj lwm, nws muaj cai siv txoj cai pov thawj hwj. Kev siv tag nrho txoj cai pov thawj hwj hauv lub Koom Txoos los tib neeg uas tuav cov yawm sij pov thawj hwj coj txoj hauj lwm ntawd, xws li ceg txheem ntseeg tus thawj tswj hwm, tus npisov, thiab tej pawg thawj tswj hwm. Cov yawm sij pov thawj hwj yog txoj cai kom coj tau txoj kev siv lub pov thawj hwj ua tus Tswv txoj hauj lwm.

Tej Yam Ntxim Ua

• Nrog cov me nyuam nyeem Malakaus 3:14–15 ua ke, thiab muab daim duab txog zaj no rau lawv saib (xws li Phau Muaj Duab txog Txoj Moo Zoo, naj npawb 38). Nug cov me nyuam seb lawv puas tau pom ib tug uas tau muab tsa rau ib lub luag hauj lwm ntawm lub pov thawj hwj los sis tau muab tsa lawv ua ib txoj kev hu (los sis qhia lawv txog lub sij hawm uas koj muaj lawm). Vim li cas qhov no yeej zoo ib yam li qhov uas tus Cawm Seej tau ua rau Nws cov Thwj Tim? Pab cov me nyuam sau ntawv txog tej luag hauj lwm los sis tej txoj kev hu uas muab tau rau cov mej zeej ntawm lub Koom Txoos, xws li ib tug xib hwb los sis tus thawj coj hauv ib lub koom haum. Nyob ze txhua lub luag hauj lwm los sis txoj kev hu, tej zaum koj yuav xav sau ntawv tias ib tug neeg uas muaj lub luag hauj lwm los sis txoj kev hu ntawd muaj txoj cai ua dab tsi. Qhia cov me nyuam tias qhov uas tau muab koj tsa los ntawm ib tug uas tuav cov yawm sij pov thawj hwj tau pab koj ua hauj lwm.

• Caw cov me nyuam xav txog ib yam uas yuav tsum muaj ib tug yawm sij, xws li ib lub tsheb los sis ib lub qhov rooj. Yog tias tsis muaj ib tug yawm sij ces yuav zoo li cas? Cia li nyeem Lus Qhuab Qhia thiab Kev Khi Lus 65:2 ua ke, thiab ua tim khawv txog qhov uas yuav tsum muaj cov yawm sij pov thawj hwj hauv lub ntiaj teb no. Tej zaum koj yuav xav saib qhov vidi-aus “Cov Yawm Sij Nyob Qhov Twg?” (Txoj Moo Zoo cov Ntawv) thiab mloog seb Txwj Laug Stevenson qhia dab tsi txog cov yawm sij pov thawj hwj.

• Thov ib tug hauv pawg ntseeg uas tuav cov yawm sij pov thawj hwj los hauv koj chav kawm thiab qhia cov me nyuam tias kev tuav cov yawm sij pov thawj hwj txhais li cas. Caw nws piav tias nws ua tej hauj lwm dab tsi. Nws coj tus Tswv txoj hauj lwm twg? Tus Cawm Seej ua li cas kom pab nws?

Lub Tuam Tsev thiab Txoj Hau Kev Zoo Siab

Lub tuam tsev yog tus Tswv lub tsev.

Cov tuam tsev yeej yog ib feem ntawm Leej Txiv Saum Ntuj Ceeb Tsheej txoj hau kev rau Nws cov me nyuam. Nyob hauv cov tuam tsev, peb khi lus rau Nws, txais vaj txiaj ntsim uas yog lub hwj chim pov thawj hwj, txais kev tshwm sim, ua cov kab ke sawv cev rau peb cov poj koob yawm txwv uas tau tas sim neej lawm, thiab ua kev cai sib khi nrog peb tsev neeg nyob mus ib txhis li. Peb ua tag tag nrho tej yam no vim muaj Yexus Khetos thiab Nws txoj kev theej txhoj.

Koj yuav ua li cas kom pab cov me nyuam uas koj qhia to taub tias tus Tswv lub tsev dawb ceev npaum li cas thiab npaj lawv lub siab ua neeg tsim nyog kom txais tau cov kab ke hauv lub tuam tsev? Kawm tej yam pab no: Lus Qhuab Qhia thiab Kev Khi Lus 97:15–17; Russell M. Nelson, “Tej Lus Xaus,” Liyahaunas, Kaum Ib Hlis Ntuj 2019, 120–22; “Why Latter-day Saints Build Temples,” temples.ChurchofJesusChrist.org.

cov tub hluas ntxhais hluas nyob nraum lub tuam tsev

Cov tuam tsev yeej yog ib feem ntawm Leej Txiv Saum Ntuj Ceeb Tsheej txoj hau kev rau Nws cov me nyuam.

Tej Yam Ntxim Ua

• Muab ob peb daim duab txog lub tuam tsev rau lawv saib. Nug cov me nyuam seb vim li cas lub tuam tsev yog ib qho chaw tshwj xeeb. Taw tes rau qhov chaw ntawm txhua lub tuam tsev uas sau li no tias: “Kev Dawb Huv rau tus Tswv: Tus Tswv lub Tsev.” Nug cov me nyuam seb lawv xav tias “Kev Dawb Huv rau tus Tswv” txhais li cas. Vim li cas peb hais tias lub tuam tsev yog tus Tswv lub tsev? Qhov no qhia dab tsi rau peb txog lub tuam tsev? Yog tias ib tug me nyuam twb mus hauv ib lub tuam tsev, ces cia nws qhia tias nws xav li cas thaum nws nyob ntawd. Yog tias koj tau mus rau hauv lub tuam tsev, cia li qhia txog qhov uas tus Tswv lub hwj huam nyob ntawd, thiab vim li cas lub tuam tsev yog ib qho chaw dawb ceev rau koj.

• Cia li nyeem Lus Qhuab Qhia thiab Kev Khi Lus 97:15–17 ua ke. Hais kom cov me nyuam xav seb tus Tswv xav kom cov neeg uas nkag hauv Nws lub tsev dawb huv ua dab tsi. Vim li cas peb yuav tsum ua neeg tsim nyog nkag hauv Nws lub tsev? Thaum nej sib tham txog qhov no, cia li qhia cov me nyuam txog tej daim ntawv tso cai nkag tuam tsev, thiab yuav tsum ua li cas kom txais tau. Tej zaum koj yuav xav caw ib tug los ntawm pawg npisov los qhia tias kev xam phaj txais tau ib daim ntawv tso cai nkag tuam tsev zoo li cas thiab yuav nug tej lus nug twg.

Nyob hauv lub tuam tsev, peb nrog Vajtswv khi lus.

Thawj Tswj Hwm Russell M. Nelson qhia tias, “Yexus Khetos caw peb ua raws li peb tej kev khi lus kom rov qab mus tsev nrog Leej Txiv Leej Niam Saum Ntuj Ceeb Tsheej thiab nrog cov uas peb hlub nyob” (“Los, Nrog Kuv Mus,” Liyahaunas, Tsib Hlis Ntuj 2019, 91) Pab cov me nyuam to taub tias txoj kev ua raws li kev khi lus yog kev ua kev cai raus dej, kev cai pom zoo, thiab vaj txiaj ntsim thiab kev cai sib khi hauv lub tuam tsev.

Tej Yam Ntxim Ua

• Hais kom cov me nyuam pab koj nco txog tej kev khi lus uas peb khi rau Vajtswv thaum peb ua kev cai raus dej thiab thaum peb txais lub cim nco txog (saib Mauxiyas 18:10; Lus Qhuab Qhia thiab Kev Khi Lus 20:77, 79). Muab ib daim duab txog lub tuam tsev rau lawv saib thiab piav tias Leej Txiv Saum Ntuj Ceeb Tsheej muaj cov koob hmoov uas Nws xav foom pub rau peb hauv lub tuam tsev.

• Kos duab txog ib lub qhov rooj laj kab uas qhib kom pom ib txoj kev. Nug cov me nyuam saib yog vim li cas yuav tsum muaj ib txoj kev rau yus taug kev. Nyeem 2 Nifais 31:17–20 ua ke, thaum Nifais muab kev khi lus ntawm txoj kev cai raus dej piv rau lub qhov rooj laj kab thiab caw peb taug txoj kev ntawd tom qab peb ua kev cai raus dej. Muaj tej kev khi lus uas yuav tsum khi tom qab ua kev cai raus dej, tsis hais tej kev khi lus uas ua hauv lub tuam tsev. Cia li piav hais tias Thawj Tswj Hwm Nelson hais tias txoj kev no yog “txoj kev ua raws li tej kev khi lus.”

Nyob hauv lub tuam tsev, peb sawv cev rau cov poj koob yawm txwv uas tas sim neej lawm ua kev cai raus dej thiab ua kev cai pom zoo.

Yexus Khetos txoj moo zoo ua rau tag nrho Vajtswv cov me nyuam muaj ib txoj kev rov qab mus nrog Nws nyob, tsis hais thaum lawv tuag ua ntej lawv paub txog txoj moo zoo los yog. Nyob hauv lub tuam tsev, peb yuav sawv lawv cev ua kev cai raus dej thiab ua kev pom zoo ua cov mej zeej hauv Yexus Khetos lub Koom Txoos.

Tej Yam Ntxim Ua

• Cia li hais txog ib lub sij hawm thaum lwm tus tau ua ib yam dab tsi pab koj uas koj ua tsis taus koj tus kheej. Caw cov me nyuam qhia txog tej lub sij hawm zoo li no. Piav tias thaum peb mus rau hauv lub tuam tsev, peb txais tau cov kab ke dawb ceev xws li kev cai raus dej rau lwm tus uas tau tas sim neej lawm. Peb ua neeg zoo li Yexus li cas thaum peb pab cov neeg tuag? Nws tau ua dab tsi pab peb uas peb ua tsis taus peb tus kheej?

• Caw ob peb tug tub hluas ntxhais hluas uas tau ua kev cai raus dej sawv lawv poj koob yawm txwv cev qhia tias twb zoo li cas thaum lawv ua li ntawd. Thov kom lawv qhia tias nyob hauv lub tuam tsev zoo li cas. Hais kom lawv qhia tias lawv xav li cas thaum lawv ua txoj hauj lwm no kom pab lawv cov poj koob yawm txwv.

• Kos duab txog ib tug ntoo rau daim kab das, tsis hais cov cag thiab cog ceg ntoo. Hais kom cov me nyuam xav txog vim li cas ib tsev neeg yeej zoo li ib tug ntoo. Nyob ntawm cov cag sau lo lus Poj Koob Yawm Txwv, nyob ntawm cov ceg sau lo lus Xeeb Ntxwv, ces rau ntawm cev ntoo sau lo lus Koj. Nyeem kab lus los ntawm Lus Qhuab Qhia thiab Kev Khi Lus 128:18 ua ke: “Peb tsis muaj peev xwm ua kom peb zoo tag nrho yog tsis muaj [peb cov poj koob yawm txwv]; thiab tsis muaj peev xwm ua kom lawv zoo tag nrho yog tsis muaj peb.” Nug tej lus xws li no: “Vim li cas peb yuav tsum muaj peb cov poj koob yawm txwv? Vim li cas peb cov xeeb leej xeeb ntxwv yuav tsum muaj peb? Peb cov niam tsev txiv tsev, pog, yawg, thiab lwm tus poj koob yawm txwv tau ua li cas kom pab peb?” Caw cov me nyuam nrhiav tej lus hauv Lus Qhuab Qhia thiab Kev Khi Lus 128:18 kom seb puas muaj lus uas piav tias peb yuav ua li cas kom pab peb cov poj koob yawm txwv.

• Xav seb puas ua hauj lwm nrog txhua tus me nyuam cov niam tsev txiv tsev pab lawv nrhiav ib lub npe ntawm ib tug poj koob yawm txwv rau tus me nyuam coj mus rau lub tuam tsev (saib FamilySearch.org).